1. Tiheeni enahaala weereya wakhala wi achu akina anniisoona okhala oochuneyaxa waapwaha akina?

MWEELAPONI olelo, achu ancipale ilukuluku soothene anneererya wiisoona okhala aphaama waapwaha akina nave hanapwacha mukhalelo saweera saya sinaavolowelaaya akina. Ntoko yootakiherya, mulipa a nakoso onanwerya ochuna okhumelela phaama waapwaha alipa a nakoso akina. Nave onanwerya weeraka ichu seiho sinaahooxa akina. Mulipa a mapokha onanwerya omphoreiha mmoha a nikhuuru nikina moolakelela wi awerye ovootha. Naxikola onanwerya wiiya isaami wi aphwanelele oya ixikola sa vasulu. Ntoko Akristu, ninnasuwela wi ichu seiha ti soonanara; iha makupa a “miteko sa mwiili.” (Gal. 5:19-21) Nyenya ti wooweryeya wa anna ni arokora akina ohisuwela wi aapacerya wiisoona okhala oochuneyaxa waapwaha akina, nave enanwerya oweeriha akina weeraka emohamoha. Nnaphwanela wuupuwela vooloca sa yeela nthowa nawi, wakhala wi achu oothene mmulokoni anneererya wiisoona okhala oochuneyaxa waapwaha akina, owo onanwerya okhala woohiiwanana.

2. Tiheeni nnahaalaahu othokororya mmwaha yoola?

² Mmwaha yoola, nnahaala othokororya ichu seiho sinaneeriha ochuna okhala achu oophwanelelaxa waapwaha annihu. Nnahaala tho othokororya sootakiherya sa alapeli a Yehova analociwa Mpiipiliyani yaawo yaahiisoona okhala oochuneyaxa waapwaha akina. Voopaceryani hankooni nthokororye mukhalelo nneeraahu niwerye ovareryela miyoonelo sahu.

3. Makoho taani nnaphwanelaahu wiipakela?

³ Elukuluku ti elukuluku ti yoophwanelela waalikhela miyoonelo  sahu. Nnaphwanela wiikoha: ‘Apwanne kinniisoona okhala oophwanelelaxa vaavaa kiniilikanyihaaka ni akina? Mpwanne kinniilipixerya mmulokoni nthowa nawi kinachuna wooniwaka okhala oophwanelelaxa naari oohiphwanelela waapwaha akina? Naari kiniilipixerya pahiru nthowa nawi kinachuna omuhakalaliha Yehova?’ Ntakhara heeni ninnaphwanela wiipakela makoho yaala? Moone yeeyo Masu a Muluku analocaaya.

4. Ntakhara heeni ninnaphwanela osepa wiilikanyiha ni akina, ntoko elociwaaya mu Galasya 6:3, 4?

⁴ Piipiliya onnanleela wi nnaphwanela osepa wiilikanyiha ni akina. (Mwaalakhanye Galasya 6:3, 4.) Ntakhara heeni? Nthowa nimoha ti nawi, wakhala wi ninnuupuwela wi ninnapaka ichu saphaama ompwaha munnihu, nnanwerya okhala awiirumiha. Nthowa nikina ti nawi wakhala wi ninnuupuwela wi annihu annapaka ichu saphaama onipwaha hiyaano, nnanwerya okhala ooceecheya. Mikhalelo soomiili seiha sawuupuwela tahi sa miruku. (Aro. 12:3) Murokora mmoha awiichaniwa Katerina, * yoowo onakhala o Kresiya, ooloca: “Kaaniilikanyiha ni akina yaawo yooneya ntoko ooreeraxa, yaarino mavyakelo mmuteko woolaleerya, nave yaapaka asinthamwene aphaama. Ntoko yookhumelela, kaaniisoona ohikhala echweenevo.” Nnaphwanela wuupuwela wi Yehova oonikeriha wa yene, ohiya nthowa nawi na achu ooreela, ninnaloca phaama, naari wi achu akina annalikana ni hiyo, nyenya nthowa nawi ninnachuna omusivela yoowo ni onwiriyana Mwaana awe.—Yoh. 6:44; 1 Kor. 1:26-31.

5. Tiheeni muhusenryaanyu orweela wa yaweereya ya munna awiichaniwa Hyun?

⁵ Nikoho nikina nnaphwanelaahu wiipakela ti nla, ‘Apwanne anna anakoona ntoko muchu yoowo onapaka murecele ni akina, naari ohiniiwanana ni akina?’ Moone yaweereya ya munna mmoha awiichaniwa Hyun, yoowo onakhala o Koreya Oohico. Mu elukuluku ekina, owo uupuwela wi yaale yaarino mirici mmulokoni yaaniisoona okhala oochuneyaxa ompwaha yene. Owo ooloca, “Kaanawaakaaha anna yaala, nave ilukuluku ikina nkeemererya ichu yaalocaaya.” Tiivi yaari yookhumelela? Owo onneemererya, “Saweera saka saaheeriha muloko okhala woohiiwanana.” Asinthamwene akina a Hyun yaamukhaviherya osuwela nikacamiho nawe. Hyun aapaka matorokelo oochuneya, nave olelo owo onarumeela ntoko mutokweene aphaama. Wakhala wi nohoona wi nookhalano muupuwelo wa wiisoona okhala oochuneyaxa waapwaha akina nnaphwanela opaka matorokelo mwawaakuveya wi ntikitherye murecele.

6. Mwawiiwanana ni Galasya 5:26, mikhalelo taani soohiphwanelela sinamweeriha muchu wiisoona okhala oochuneyaxa waapwaha akina?

⁶ Mwaalakhanye Galasya 5:26. Mikhalelo taani inahaala omweeriha muchu wiisoonaka okhala oochuneyaxa waapwaha akina? Mmoha wa seiho ori wiichuna muchu mukhateiye. Muchu awiichuna mukhateiye ta wiirumiha nave onathokororya sawaweru. Mukhalelo mukina nrima. Tahi wi pahiru muchu anrima onachuna echu yeeyo muchu mukina oreiyeno nyenya tho onnachuna ekhanle yawawe. Mwawiihiiha muchu yoowo onamukhalela nrima muchu mukina, onnamwiica. Mweeparipari nnaphwanela osepa mikhalelo seiha sinapahula!

7. Yootakiherya taani enooniherya wi okhala a wiirumiha ni anrima ti yoonanara?

⁷ Wiichuna muchu mukhateiye ni nrima inanwerya olikanyihiwa ni murawa yoowo ori mu etankhi ya aviyawu mummo onaheliwamo kasolina. Aviyawu onanwerya ovava, nyenya murawa owo onanwerya onanariha ituupu  onaviramo kasolina nave aviyawu owo onanwerya oyeleela ikuru voocharela amore. Moolikana, muchu onanwerya omurumeela Yehova mu elukuluku yincipale. Nyenya wakhala wi owo ta wiirumiha ni anrima, onanwerya othoowa. (Masi. 16:18) Owo onahaala ohiya omurumeela Yehova nave tho onahaala wiiruuhela epahu mukhateiye ni wa akina. Vano tiheeni nnaphwanelaahu weera wi nsepe okhala awiirumiha ni anrima?

8. Ti mwawiihai nnahaalaahu owaniha wiirumiha?

⁸ Nnanwerya owaniha wiirumiha moorweela wa opharihela ekano ya Paulo wa Akristu o Filipi: “Muheere echu muchunaka wiiphwanyerya nari wiisoona, nto mwiiyeviheke; mmoha ni mmoha amweereke mukhwaawe wi tompwaha.” (Fil. 2:3) Wakhala wi ninnawoona akina okhala oonipwaha, hinnahaala ochunaka waapwaha yaale arino mavyakelo onipwaha hiyaano. Moohiyana, nnahaala ohakalalaka ni yaawo. Ela eparipari xaxaxa waakhanle wi awo anapharihela mavyakelo aya wi emurumeele Yehova ni omucicimiha yoowo. Nave wakhala wi munna naari murokora yoowo orino mavyakelo mancipale onnapharihela ekano ya murummwa Paulo, owo onahaala woonaka mikhalelo saphaama mwa hiyo. Ntoko yookhumelela, oothene ahu nnahaala otikitherya murecele ni wiiwanana mmulokoni.

9. Ti mwawiihai nneeraahu nsepe waakhalela nrima anna ni arokora?

⁹ Nnanwerya osepa omukhalela nrima munna naari murokora mukina wakhala wi noosuwela wi sookhalavo ichu ikina seiho nihinaweryaahu weera. Wakhala wi naachu awiiyeviha, hinnahaala weererya wiisooneihaka wi naachu amavyakelo naari ooweryaxa waapwaha akina. Moohiyana, nnahaala woonaka mukhalelo nneeraahu nihuserye orweela wa yaale arino mavyakelo onipwaha hiyaano. Ntoko yootakiherya, mwaanyiherye wi munna mmoha mmulokoni onnaperekha phaama miyaha. Nnanwerya omveka owo wi anileele mukhalelo onaweryeiye orehererya phaama miyaha sawe. Wakhala wi murokora onnaapeya phaama nnanwerya omveka sooleeliherya seiho sinahaala onikhaviherya waapeyaka phaama. Nave wakhala wi Mukristu yoowo ori mmiravo hanawerya waapaka asinthamwene, owo onanwerya oveka miruku wa muchu yoowo onawerya waapaka asinthamwene aphaama. Wakhala  wi ninneerano ichu seiha, nnahaala osepa okhala anrima nave nnahaala waaceererya mavyakelo ahu.

10. Nikacamiho taani Kiteyoni aahoolenleiye?

¹⁰ Muupuwele yeeyo yeeren’ye variyari va Kiteyoni, yoowo aari a nihimo na Manase, ni alopwana a nihimo na Efraimu. Yehova aahimukhaviherya Kiteyoni ni anakhoco awe 300 ovootha ekhoco yeeyo yaahaala oweeriha okhala awiirumihaxa. Alopwana o Efraimu yaaya wa Kiteyoni, ohiya wi yamuthamalele, nyenya wi yaakhulane ni yoowo. Awo yaanyeenyeya nthowa nawi owo haawaawompe wi ekhale vamoha wi yawane ni amwiicani a Muluku. Awo yaachuna wi pahiru achu ecicimiheke nihimo naya, nyenya yaacuwala wi echu yoochuneyaxa wa Kiteyoni waari oruuhela ncicimiho nsina Yehova ni waakhapelela achu Awe.—Amut. 8:1.

11. Ti mwawiihai Kiteyoni aawaakhunleiye alopwana a Efraimu?

¹¹ Mwawiiyeviha Kiteyoni aahaaleela alopwana a Efraimu: “Tisheeni miyo keenraaka woopwahaani nyuwo?” Voocharela owo aahiwuupuxerya mukhalelo Yehova aakhavihenryeiye wi epake ichu itokweene. Ntoko yookhumelela, “mirimaaya yaahaakhurunuwa.” (Amut. 8:2, 3) Waanachuneya wi Kiteyoni akhale awiiyeviha wi atikitherye murecele variyari va achu a Muluku.

12. Tiheeni nnahuseryaahu orweela wa yootakiherya ya a Efraimu ni Kiteyoni?

¹² Tiheeni nnahuseryaahu orweela wa yaweereya yeela? Orweela wa yaweereya ya a Efraimu, ninnahuserya wi hannaphwanela wiiruuhela ncicimiho mukhatiihu nyenya omuruuhela ncicimiho Yehova. Ntoko miru sa ichoko ni atokweene, nnanwerya ohuserya orweela wa yootakiherya ya Kiteyoni. Wakhala wi muchu oonyeenyeya ni echu yeeyo nenraahu, nnaphwanela weererya wiiwexexa ntakhara heeni muchu owo onyeenyen’yeiye. Nnahaala tho omuthamalela muchu owo nthowa na ichu saphaama seiho oneereiye. Onamuchuneya wiiyeviha wi neereno yeela, xaxaxa wakhala wi muchu owo tohense. Nyenya echu yoochuneyaxa ori okhalano onthamwene waphaama ni annihu ohiya wiisooneiha wi hiyo nri aphaama.

13. Nikacamiho taani Ana aahoolenleiye, nave tiheeni owo enreiye?

¹³ Muupuwele yootakiherya ya Ana. Owo aatheliwe ni Muleevi awiichaniwa Elikana, yoowo aamusivela vancipale. Nyenya Elikana aakhalano muthiyana mukina, Penina. Elikana aamusivelaxa vancipale Ana omuhiya Penina; nyenya, ‘Penina aakhalano anamwane nto Ana haayara.’ Nthowa na yeela, Penina “aanamuroha ni omuhoosha” Ana. Ana oona hai? Owo “aanasarasareya murima, ananla, ahinalya.” (1 Sam. 1:2, 6, 7) Nyenya Piipiliya hanaloca wi Ana aaheererya waakhulana ni Penina  mmukhalelo vyakala. Ohiya yeeyo, owo aamuleela Yehova mukhalelo isooneiye nave aanaroromela wi owo aahaala omukhaviherya. Apwanne Penina aahitoroka meerelo awe? Piipiliya hanaloca. Nyenya ninnasuwela wi murima wa Ana waakhala woomaaleleya. Piipiliya oni: “Vaavaa Haana aarowa ahakalalaka.”—1 Sam. 1:10, 18.

14. Tiheeni nnahuseryaahu orweela wa yootakiherya ya Ana?

¹⁴ Tiheeni nnahuseryaahu orweela wa yootakiherya ya Ana? Wakhala wi muchu mukina onniisoona okhala a woopwahaani mmukhalelo vyakala, muupuwele wi nyuwaano munanwerya ovareryela mukhalelo yoowo. Muheemererye wi mwaakhulane ni muchu yoowo. Ohiya okookiherya yoonanara wa yoonanara, mweererye opaka murecele ni muchu yoowo. (Aro. 12:17-21) Naamwi owo ahichunaka otoroka moonelo awe, nyuwaano munanwerya okhala oomaaleleya ni oohakalala.

15. Ti mwawiihai Apolu ni Paulo yaalikanaaya?

¹⁵ Vookuchula, muthokororye yeeyo nnaweryaahu ohuserya orweela wa sootakiherya sa oohuserya Apolu ni murummwa Paulo. Ooweeli yaanasuwela phaama Soorempwa. Ooweeli aya yaanasuweliwa nave yaari ahusiha aphaama. Nave yaahaakhaviherya achu ancipale okhala oohuserya. Nyenya awo hiyaakhalelana nrima.

16. Apolu aari muchu awiihai?

¹⁶ Apolu aari a “epooma ya wAlishantriya,” yeeyo yaari nipuro noovuwa weiwo achu yaahuseryaayawo mahusiheryo avasulu. Owo aanasuwela oloca phaama, nave aari “oosuwelano Soorempwa.” (Saw. 18:24) Vaavaa owo aarumeeleiye o Korinto, anna mmulokoni yaahooniherya wi yaamuchunaxa yene ohiyana ni anna akina, ophitaanyerya Paulo. (1 Kor. 1:12, 13) Apwanne Apolu aahooniherya mukhalelo wa okawanya muloko? Hinnaanyiherya wi owo aaheerano yeeyo. Mweeparipari elukuluku  ekina Apolu amanle ovinyawo o Korinto, murummwa Paulo aamuceenyerya wi akookelewo. (1 Kor. 16:12) Paulo haahaala weerano yeela waakhanle wi Apolu aakawanya muloko. Chiryene, Apolu aapharihela mavyakelo awe mmukhalelo waphaama—olaleerya michaka saphaama ni waalipiha annawe. Hiyaano tho nnanwerya ororomela wi Apolu aari awiiyeviha. Ntoko yootakiherya, Piipiliya hanaloca wi owo aanyeenyeya vaavaa Akila ni Priskila ‘yaamuleelinhaaya phamasene mphiro wa Muluku.’—Saw. 18:24-28, BNM.

17. Ti mwawiihai Paulo aatikithenryeiye murecele?

¹⁷ Murummwa Paulo aanasuwela muteko waphaama yoowo Apolu aapankeiye. Nyenya Paulo huukhuwa wi achu yaahaala wuupuwela wi Apolu taapanke ichu sincipale ompwaha yene. Vaavaa nnaalakhanyaahu yeeyo aarepenleiye Akorinto, ninnawerya woona wi owo aari awiiyeviha ni oophimelela. Owo haasiveliwa vaavaa achu yaalocaaya eriki: “Miyo ka awawe Paawulu.” Moohiyana owo aaveleela ncicimiho noothene wa Yehova Muluku ni wa Yesu Kristu.—1 Kor. 3:3-6.

18. Mwawiiwanana ni 1 Korinto 4:6, 7, tiheeni nnahuseryaahu orweela wa yootakiherya ya Apolu ni Paulo?

¹⁸ Tiheeni nnahuseryaahu orweela wa yootakiherya ya Apolu ni Paulo? Nnanwerya olapa mwakuru ntakhara Yehova ni waakhaviherya ancipale oya vahoolo ophiyerya opatisiwa. Nyenya nnanwerya wiiwexexa wi eyo eweryen’ye pahiru nnikhaviheryo na Yehova. Orweela wa yootakiherya ya Apolu ni Paulo ninnahuseryavo tho wi vaavaa nnakhalaahuno mirici mmulokoni, nnanwerya waaceererya murecele mmulokoni. Ninnathamalela vancipale vaavaa achu yaawo arino mirici mmulokoni, anatikitheryaaya murecele ni wiiwanana moorweela wa opharihela malakiheryo a Masu a Muluku ni moorweela wa otikitheryeya ohiya pahiru wa yaawo mukhataaya, nyenya ochariha yootakiherya ya Yesu Kristu!—Mwaalakhanye 1 Korinto 4:6, 7.

19. Tiheeni mmoha ti mmoha onaphwaneleiye weera? (Moone tho ekaaxa “ Musepe Okhala Awiisoona.”)

¹⁹ Muluku omvaha mmoha ti mmoha a hiyo mavyakelo. Hiyaano nnanwerya opharihela mavyakelo ahu wi ‘nirumeelaneke.’ (1 Ped. 4:10, NN) Nnanwerya wiisoona wi yeeyo nnapakaahu tahi yoochuneyaxa. Nyenya muupuwele wi ekuwo yaluceleliwa ni ekuwo ekina, ennakhala yoowara yooreera. Mwawiihiiha, echu eri yoothene yeeyo munapakaanyu ennakhaviherya wi muloko okhale wawiiwanana. Oothene ahu nnaphwanela wiilipixerya wi nihiisooneke okhala oophwanelelaxa waapwaha akina. Hankooni nikhale oolakelela otikitherya murecele ni wiiwanana mmulokoni.—Éfe. 4:3.