1. ¿Imataj pasanman ali tucushpanchi hermanunchicunawan yalinacuycarga?

CAY munduchoga waquincunapitapis ‘nogami más yachaj cä’ nir runacuna imatapis ruran. Chaymi waquincunaga guellayninta mirachishganraycur alapa chiquinacärin. Waquincunapis puclaycashgancho puclajmasinta adrede cumaycunman. Öraga estudianticunapis universidäman yaycunanraycur trampata ruranman. Rasunpa cristianucunaga chayta ruranapaj yarpaylapis yarpashwanchu (Gál. 5:19-21). Y mana musyaycarpis congregaciunninchicho ali tucushpanchi ¿pilawanpis yalinacuycarga? Chayno tapucushganchega alimi caycan. Imapitapis masga hermanunchicunawan juc yarpayla cananchitami munanchi.

2. ¿Imacunapitataj canan yachacurishun?

² Canan parlarcushun imacunata rurartaj ali tucoj cashganchi ricacaycämunman. Chayno mana cananpaj imataj unay Diosta sirvejnincunata yanapargan, chaypitapis yachacushunmi. Pero naupataga quiquinchipitaraj parlarcushun.

3. ¿Ima tapucuycunamantaj yarpachacushwan?

³ Alimi canga imano caycashganchiman yarpachacurga. Cayno tapucushwan: “¿Ali ricacunäpäga waquincunawanrächuraj  tincuchicuycäman? ¿Imaraycurtaj congregaciuncho yanapacö? ¿Maygan hermanulatapis gänayta munarchuraj? O ¿Jehovalaman yarparchu lapanta rurä?”. Musyanapäga ricärishun ima nintaj Diospa Palabran caycunapita.

4. Gálatas 6:3, 4 nishganno, ¿imanirtaj ima ruraycashganchitaga mana tincuchiycashwanchu waquincunapa cajwan?

⁴ Bibliami nin ima rurashganchicunata waquincunapa cajwan mana tincuchiycänapaj (leiriy Gálatas 6:3, 4). Chayta rurarga ichanga ali tucushwanpis o ichanga mana valejnopis ricacushwanmi. Mayganpis mana alimi canga (Rom. 12:3). Grecia naciunpita Katerina * cristianami cayno nin: “Waquin cristianacunaga cuyaylapämi ricacoj, ali yachachicärej y jucnin jucninpis cushi cushila capäcoj, paycunano mana carmi laquicoj cä y mana valejno ricacoj cä”. Jehovaga payta sirvinapaj acramashcanchi casucur ali shongu cashganchipitami, y manami imaycata charashganchiraycur ali tucushganchipitachu (Juan 6:44; 1 Cor. 1:26-31).

5. ¿Imatataj yachacunqui Hyun imapa pasashganpita?

⁵ ¿Imanotaj caycanchi? ¿Jauca jaucalachu cawacunchi? O ¿imalapitapis achaquita ashirchu caycanchi? Chaytapis tapucushwanmi. Corea del Sur naciunpita Hyun wauguinchipita parlarcushun. Congregaciunchoga carguyoj cajcunatash chiquipaj. Paymi cayno nin: “Anciano masëcunataga ashliparmi mana casupaj cächu”. Chayraycurshi congregaciunninpis raquicashgaraj. Aliyarcunanpäga achca amiguncunaräshi yanaparcurgan. Cananga cushi cushilanash congregaciuncho yanapacuycan. ¿Imatataj yachacunchi? Congregaciuncho waquincunawan yalinacuyparaj imatapis ruraycarga, noganchipis aliyarcushwanmi ali cajcunatana rurar galaycunapaj.

6. ¿Imata rurartaj waquincunawan chiquinacur yalinacuycashwan Gálatas 5:26 texto nishganno?

⁶ (Leiriy Gálatas 5:26). ¿Imata rurartaj waquincunawan chiquinacur yalinacuycashwan? Chayga canman ali tucushpanchi quiquinchilaman yarparäcurmi. O waquincunatapis envidiaparmi. Envidioso runaga waquincunata chiquiparmi paylapaj imatapis munan. Chauras cayno mana ali ruraycunapitaga cuidacushwanmi, imanomi cuidacunchi gueshya charicarcämänanchipita, chaynola.

7. Juc ejempluwan tantiachicamuy imataj pasanman shongunchipita mana alicunata mana jorgurga.

⁷ Pipis paylaman yarparäcurga y waquincunatapis envidiaparga puyu ushash guerunomi canman. Ichanga cay gueruga janalanpaga alimi ricacaycanman, pero rurinpaga puyu ushash captin paquicänanpäna caycanman. Chaynola achca watapana Diosta sirviycarpis shongunchipita chiquinacuytapis enviadianacuytapis mana jorgurga mana alimanmi chayashwan (Prov. 16:18). Ichanga Diospitapis raquicäcushwan y waquincunatapis laquichishwanmi. Pero ¿imata rurartaj chayno runa ama cashwanchu?

8. ¿Imata rurartaj quiquinchilaman yarparäcur cacuycäshunchu?

 ⁸ Ali runamanga ticrashun cayno apóstol Pablo ima nishganta casucurmi, paymi nergan: “Alichru cayta munalar o yachragtucurga ama ruraychu. Sinöga waquintapis quiquin canganpita mas alicagtanuy ricapäcuchun” (Filip. 2:3, Ambo Pasco Biblia). Biblia nishgannopis waquincunata “mas alicagtanuy” ricarga ima rurashgancunapitaga cushicushunmi, masraj Diosta alabaycaptenga, mananami yalinacuycäshunnachu. Ali cajta rurajcuna Pablo nishganta casucuptenga noganchitapis alimi ricamäshun. Cay lapancho calpachacurga congregaciunchoga juc yarpayla juc shongula caycäshun.

9. ¿Imacunata rurartaj envidioso runa mana cashunchu?

⁹ ¿Imaraj yanapämäshun envidioso runa mana canapaj? Yarparcushwan waquincunapita más yachaj más musyaj mana cashganchita. Nircurpis ali canga más tantiaj cajcunapita yachacunapaj calpachacuptinchi. Waquincunaga ali discursutami rurarcamun, ‘¿imanotaj shumaj camacächishcanqui?’ nirpis tapupashwanmi. Ali yanucojcunapitapis yachacushwanmi. Amigucunata tarinapäpis calpachacushwanmi, waquincunata nishwan yanapämananchipaj. Cay lapanta rurashganchimi yanapämäshun envidioso runa mana canapaj.

10. ¿Imataj pasargan Gedeonwan y Efraín tribu runacunawan?

¹⁰ ¿Imataj pasargan Gedeonwan y Efraín tribu runacunawan? Jehová yanapacurganmi 300 soldaduncunalawan Gedeón guerrata ganananpaj. Chaylapita Efraín tribu runacunaga ‘¿imanirtaj nogacunata gayachimashcanquichu guerra galaycushgancho, peliaj aywanapaj?’ nir  rabiacärirgan. Ali tucushpanchi y paycunalaman yarparchi chayno parlarcaycargan. Gedeón ichanga Jehovapa jutinta respetachiycargan y marcanta defendiycargan (Juec. 8:1).

11. ¿Ima nirgantaj Gedeón Efraín tribu runacunata?

¹¹ Ñanpu shongu cashpanmi Gedeonga cayno nergan chay runacunata: “Noqapita mas alitami rurapäkushqanki”. Nircur Gedeón wilacamurgan imano Jehová bendecishganpita, chaypitana Efraín runacuna “rabyashqa kaykashqanpita kushikärirqan” (Juec. 8:2, 3). Gedeonga ichiclapis ali tucurganchu, chaypa trucanga Jehovapa marcancho jaucala cawacärinanta munargan.

12. ¿Imatataj yachacunchi efraimitawan Gedeonpita?

¹² ¿Imatataj yachacunchi cay wilacuypita? Efraín tribu runacunapitaga yachacunchi quiquilanchiman yarparäcunapaj trucanga Jehovapa jutin respetashga cananpaj calpachacunapaj. Tayta cajcuna y ancianucuna Gedeonpitapis yachacunmanmi, pilawanpis jucla mana rabiacunmanchu. Chaypa trucanga imata rurashganlapitapis ‘alitami rurashcanqui’ ninman. Cayta ruranapäga humildirämi pipis canman. Imapitapis jaucala cawacushganchimi más aliga canga.

13. ¿Imataj pasargan Anawan, y imatataj payga rurargan?

¹³ Anapitapis canan parlarcushun. Payga Elcaná levita runapa warmin cargan, pero Elcanapa juc caj warminpis Peniná jutiyoj cargan. Imano captinpis Anatami más cuyaj. Chayno captinpis Peninawanmi wamrayoj cargan, ichanga Anapami wawancuna carganchu. Peniná warmiga “Anata chiquej. Asipaj, manacajman churaj”, chaymi Anaga “amatar wagashpan mana micojpischu” (1 Sam. 1:2, 6, 7). Chayno rurashga carpis Bibliaga manami wilacunchu Peninawan Ana vengacushganta. Chaypa trucanga shongunta mashtaparmi Jehovaman yaracurgan. ¿Peninaga ali warmiman ticrarganchuraj? Biblia manami wilacunchu. Anapita ichanga wilacun shongun cushicushganpita “mana llaquicurannachu” nir (1 Sam. 1:10, 18).

14. Anapita ima yachacushganchita parlacaramuy.

¹⁴ ¿Imatataj Anapita yachacunchi? Pilapis ‘nogami gampita más ali cä’ nimaptinchega, quiquinchipitami canga rabiashgala canapaj o mana. Peliaycänapaj trucanga jaucala goyanapaj calpachacushun (Rom. 12:17-21). Ofendimajninchi  rabiashgala cacuptinpis mana laquicurmi jauca jaucala caycashwan.

15. ¿Ima nishwantaj Apolospitawan Pablupita?

¹⁵ Cananga Apolospita y apóstol Pablupita yachacurishun. Ishcancunami Diospa Palabranta ali reguipäcoj y ali yachachicoj capäcoj. Jina achca runacunatami yanapacurgan cristianuman ticrananpaj. Mana chiquinacuypami ishcancuna arupäcurgan.

16. ¿Ima nishwantaj Apolospita?

¹⁶ Apolos discipuluga reguishga marca Alejandriapitami cargan, payga ali parlaj y ali yachachicojmi cargan (Hech. 18:24). Corinto marcacho caycaptinshi waquincunaga nipäcoj ‘nogaga Apolostami gaticushaj, waquincunataga casupäshächu’ nir (1 Cor. 1:12, 13). ¿Apolosga nirganchuraj ‘Pablutaga pipis casupanchu, nogawan ichanga runacuna caycan’ nir? Manami. Chaychi Corinto marcapita Apolos aywacuptin Pabluga nergan ‘caycashgäpa cuticamuy’ (1 Cor. 16:12). Pabluga manachi chayta ninmanchu cargan cristianucunata Apolos raquicächishga captenga. Apolosga más aruycargan Diospa ali wilacuyninpita yachachicunanpaj y cristiano masincunata shacyächinanpämi. Y humilde runa cashpanchi, yachachicuycashgancho aliyarcunanpaj Aquilawan Priscila niptin piñacurganchu (Hech. 18:24-28).

17. ¿Imatataj Pablo rurargan piwanpis juc shongula cananpaj?

¹⁷ Pabluga musyarganmi imano Apolos Diosta sirvir yanapacamushganta. Ima  ayca rurashgantaga chiquiparganchu. Corinto congregaciunman cartacushganchoga imalapis canchu Pablo ali tucushganpitaga, ñanpu shongu runami cargan. ‘Nogaga Pablupami cä’ runacuna niycaptinpis payga Jehovalamanmi y Jesuslamanmi yarparäcurgan (1 Cor. 3:3-6).

18. 1 Corintios 4:6, 7 textucuna wilacushganno, ¿imatataj yachacunchi Apolospitawan Pablupita?

¹⁸ ¿Imatataj yachacunchi Apolospitawan Pablupita? Diosta sirvir imaycata rurashganchicuna y waquincuna bautizacärinanpaj yanapashga carga lapanpis Diospa bendiciunninlawanmi ruracämun. Jina yachacunchi congregaciuncho ima carguyoj carpis jucninchi jucninchi juc yarpayla y juc shongula caycänapämi. Ancianucunapis y siervo ministerialcunapis quiquilancunapita yachachicunanpa trucanga Diospa Palabranpitami ima consejulatapis jorgaramun, Cristunola rurapäcushganta ricarga cushicunchimi (Leiriy 1 Corintios 4:6, 7).

19. ¿Imatataj jucninchi jucninchi rurashwan? (“ Mana yalinacuycarla imatapis ruray” nej recuadruta ricay).

¹⁹ Quiquin Tayta Diosmi yachayta gomashpanchi jucninchi jucninchi yanapanacunapaj munan (1 Ped. 4:10). Ichiclata o achcata rurarpis yanapacuycanchimi congregaciuncho mana raquicaypa caycänapaj. Imanomi juc wasi sharcachishga cananpäga lapan adobecunapitaraj canman, chaynola. Chauras imalatapis rurarga mana chiquinacuypa, mana envidianacuypa y mana yalinacuypa ruraycäshun. Chaynopami congregaciunchoga juc shongula mana raquinacuypa caycäshun (Efes. 4:3).