1. So šaj te desini pe ako neko mangela te mothovi soj tano pošukar averendar?

BUT manuša avdije, mangena te mothoven soj tane pošukar averendar hem na razmislinena sar odova so ćerena utičini upro avera. Na primer, jekh poslovno manuš mangela te ovel pošukar averendar. Odolese, ov tano spremno te ćerel razna lošna buća samo te mothovi soj tano pošukar averendar. Jekh sportista šaj namerno te povredini avere igrače samo te pobedini. Jekh terno ćhavo mangela te upisini pe ko jekh šukar fakultet. Odolese, ov tano spremno te ćerel razna prevare ko test, samo te uspini. Amen haljovaja so akala buća nane šukar. On tane „delija ando telo“ (Gal. 5:19-21). Ama, da li šaj te desini pe so jekh e Jehovaso sluga nane svesno so mangela te mothovi soj tano pošukar averendar? Amen valjani te razmislina akalestar sose ako neko ki skupština mangela te ovel pošukar averendar, tegani i skupština na ka ovel ko jekhipe.

2. Sostar ka vaćera ko akava članko?

² Ko akava članko, ka dikha sose šaj te ovel amen želja te mothova so hijam pošukar averendar. Isto ađahar, ka vaćera ando e Devlese verna sluge kola na manglje te mothoven soj tane pošukar averendar. Najangleder, hajde te dikha sar šaj te đana soj tano ko amaro vilo.

3. So valjani te puća amen?

³ Podijekh puti, šukar tano te razmislina soj tano ko amaro vilo. Šaj te puća amen: „Da li hijum bahtalo samo ked  dikhava so hijum pošukar averendar? Da li dava sa mandar ki skupština sose mangava te ovav najšukar ja barem hari pošukar averendar? Ja ćerava odova sose mangava te dav mo najšukar e Jehovase?“ Sose valjani te razmislina ando akala pućiba? Dikh so e Devleso Lafi vaćeri odolestar.

4. Premalo Galatima 6:3, 4, sose na valjani te uporedina amen averencar?

⁴ I Biblija phenela so na valjani te uporedina amen averencar. (Čitin Galatima 6:3, 4.) Sose? Ako mislinaja so hijam pošukar averendar, tegani šaj te ova ponosna. Ki aver strana, ako mislinaja so ništa na vredinaja hem so avera tane ko sa pošukar amendar, amen ka ova obeshrabrime. Nane mudro te razmislina ađahar (Rimlj. 12:3). I phen i Katarina * koja živini ki Grčka, phenela: „Angleder uporedinđum man okolencar kola dićhilje soj tane pošuže mandar, soj tane pošukar ki služba hem kola isi len pobuter amala. Sebepi odova, mislinđum so ništa na vredinava.“ Na valjani te bistra so o Jehova na privucinđa amen koro peste sose hijam šuže, sose đanaja te vaćera šukar, ja sose isi amen but amala, već sebepi so mangaja le hem sose mangaja te šuna olese Ćhave (Jov. 6:44; 1. Kor. 1:26-31).

5. So sikljovaja ando phral o Hun?

⁵ Razmislin hem akalestar: „Da li hijum penđardo sar neko ko ćerela te ovel mir ja često isi man problemi averencar?“ Jekh starešina andi Južno Koreja kova vićini pe Hun, jekh vreme mislinđa so o phralja kola isi len odgovornostija mangena te mothoven soj tane pošukar olestar. Ov phenela: „Hine man lošno mišljenje olendar hem često na složinđum man odoleja so on vaćerđe.“ Đi soste odova anđa? Ov phenela: „Sebepi so hine man asavko stav, ki skupština na hine jekhipe.“ Disave olese amala pomožinđe lese te dikhel kaj tano o problemi. O Hun menjinđa pe hem avdije tano but šukar starešina. O mir ki skupština tano but važno. Odolese, ako dikhaja so isi amen želja te mothova so hijam pošukar averendar, valjani sig posig te menjina amen.

6. Premalo Galatima 5:26, so šaj nekas te ćhivel te mangel te ovel pošukar averendar?

⁶ Čitin Galatima 5:26. So šaj nekas te ćhivel te mangel te mothovi soj tano pošukar averendar? Jekh buti šaj te ovel sose neko mangela te vazdel kokri pes. Asavki osoba tani ponosno hem sebično. Pana jekh buti tani i zavist. O zavidno manuš na samo so mangela te lel averendar odova so isi len, već hem mangela on te aćhon bizo odova. U stvari, o zavidno manuš mrzini averen. Amen na mangaja te dozvolina odola osobine te mukhen koreno ko amaro vilo.

7. Kova primer mothovi kobor tano opasno te vazda amen hem te ova zavidna?

⁷ Ked neko vazdela pe hem ked tano zavidno, odova šaj te uporedini pe odoleja sar ked ko avioni ćhivela pe lošno gorivo. Jekh vreme o avioni šaj te letini. Ama, sebepi so isi le lošno gorivo, sigate palo odova o motori više na ka ćerel hem ko krajo o avioni ka perel. Isto ađahar, neko šaj te služini e Jehovase jekh vreme, ama ako tano zavidno hem mangela te vazdel pe, ov ka perel (Posl. 16:18). Ov ka ćhinavi te služini e Jehovase hem ađahar ka povredini kokri pes hem averen. So šaj te ćera te na vazda amen hem te na ova zavidna?

8. So šaj te ćera ako dikhaja so vazdaja amen?

⁸ Ama, so šaj te ćera ako dikhaja so vazdaja amen? Tegani, šukar tano te ićera amen  ko savet kova o apostol Pavle dinđa e phralenđe ko Filipi: „Ma ćeren ništa andi holi ja sose mangena te vazden tumen, nego oven ponizna hem dikhen averen sar pobare tumendar“ (Fil. 2:3). Ako upro avera dikhaja sar pobare amendar, tegani ka ova svesna so avera tane ko but buća pošukar hem posposobna amendar hem na ka manga te mothova so hijam pošukar olendar. Umesto odova, ka ova bahtale sebepi olengo, posebno ako on pe sposobnostija koristinena te služinen e Jehovase pana pobuter. Ki aver strana, ako odola phralja hem phenja šunena e Pavleso savet, tegani ka dikhen kola šuže osobine amen isi amen. Sebepi odova, sare ka ćera te ovel mir hem jekhipe ki skupština.

9. So šaj te ćera te na ova zavidna?

⁹ Ako na mangaja i zavist te mukhel po koreno ko amaro vilo, valjani te ova skromna. Odova značini so valjani te haljova so disave buća našti te ćera. Ako hijam skromna, amen na ka manga te mothova so hijam pošukar averendar. Umesto odova, ka dikha so šaj te sikljova ando okola kola tane pošukar amendar. Na primer, ako jekh phral ićeri but šuže govorija, amen šaj te puća le sar pripremini pe aso pe govorija. Ako jekh phen ćerela šužo habe, amen šaj te puća la te sikavi amen te ćera odova habe. Ako jekhe terne phralese tano pharo te arakhi pese amalen, ov šaj te rodel pomoć nekastar koj tano šukar ko odova. Ako ćeraja ađahar, na ka ova zavidna hem ka ova pana pošukar manuša.

10. Savo problemi hine le o Gedeon?

¹⁰ Razmislin ando odova so ulo maškaro Gedeon, kova hine ando e Manasijaso pleme, hem maškaro manuša ando e Jefremeso pleme. Uzi e Jehovasi pomoć, o Gedeon hem olese 300 manuša pobedinđe ko jekh maribe. On šaj hine te oven but ponosna sebepi odova. O manuša ando e Jefremeso pleme alje ko Gedeon, ama na te pohvalinen le, već te svađinen pe oleja. On holjanđe upro Gedeon sose ki početka na vićinđa len te đan oleja ko maribe. Olenđe hine považno  so o manuša ka mislinen ando olengo pleme, nego odova so o Gedeon proslavinđa e Devleso anav hem zaštitinđa e Devlese narodo (Sud. 8:1).

11. So o Gedeon phenđa e manušenđe ando e Jefremeso pleme?

¹¹ O Gedeon mothovđa soj tano ponizno, ked e manušenđe ando e Jefremeso pleme phenđa: „Ked uporedinava man tumencar, so me ćerđum?“ Palo odova, ov setinćerđa len ko odova sar o Jehova pomožinđa lenđe te ćeren bare buća. Ked šunđe odova „on smirinđe pe“ (Sud. 8:2, 3). O Gedeon hine ponizno hem sebepi odova hine mir maškaro e Devleso narodo.

12. So sikljovaja kotar o manuša ando e Jefremeso pleme hem ando Gedeon?

¹² So sikljovaja ando manuša kotar e Jefremeso pleme? Amenđe valjani te ovel považno te proslavini pe o Jehova, a na amen. Ako hijam poglavarija hem starešine, ando Gedeon šaj te sikljova so valjani te ćera ako neko holjanđa upro amende sebepi diso so ćerđam. Najangleder, valjani te da sa amendar te haljova sose holjanđa. Isto ađahar, valjani te pohvalina le aso šukar buća kola ćerela. Te šaj te ćera odova, valjani te ova ponizna, posebno ako hijam svesna so odija osoba nane u pravu. Ama, o mir tano považno nego te mothova so odija osoba grešinđa.

13. Kova problemi i Ana hine la hem sar borinđa pe odoleja?

¹³ Isto ađahar, razmislin andi Ana. Olako rom vićinđa pe Elkana. Ov hine Levit hem but manglja la. Ama, ov hine le pana jekh romni, i Fenina. O Elkana pobuter manglja e Ana nego e Fenina. Ama „i Fenina hine la ćhave, a i Ana na hine la.“ Odolese, i Fenina „marđa muj e Anaće.“ Sar i Ana osetinđa pe sebepi odova? Odova but dukhavđa e Ana. Oj „runđa hem ništa na halja“ (1. Sam. 1:2, 6, 7). Ama, e Devleso Lafi na vaćeri so i Ana irinđa e Feninaće aso sa odova so ćerđa laće. Umesto odova, oj phravđa po vilo e Jehovase hem verujinđa so ov ka pomožini laće. Da li palo odova i Fenina averćhane ponašinđa pe e Anaja? I Biblija na vaćeri odolestar. Ama, o Jehova dinđa la mir ko vilo hem „na hine više tužno“ (1. Sam. 1:10, 18).

14. So šaj te sikljova andi Ana?

¹⁴ So šaj te sikljova andi Ana? Ako neko mangela te mothovi soj tano pošukar tutar, ma bistri so odova sar ka reagujine zavisini samo tutar. Ma mukh te pere ki zamka ađahar so ka mange te mothove so hijan pošukar andi odija osoba. Umesto te irine o lošnipe lošnipaja, de sa tutar te ove ko mir odola osobaja (Rimlj. 12:17-21). Ama, čak iako odija osoba na menjini pe, tu ka ovel tut mir ko vilo hem ka aćhove bahtalo.

15. Ko kola buća o Apolo hem o apostol Pavle hine slična?

 ¹⁵ Ko krajo, hajde te dikha so šaj te sikljova ando Apolo hem ando apostol Pavle. On solduj but šukar penđarđe o spisija. Hem o Apolo hem o Pavle hine penđarde maškaro phralja hem đanđe but šukar te sikaven e manušen. On solduj pomožinđe bute manušenđe te oven e Hristese učenikija. Ama, nijekh olendar na hine ljubomorno jekh upro avereste.

16. Savo manuš hine o Apolo?

¹⁶ O Apolo hine „andi Aleksandrija“, kuri o manuša ko odova vreme đelje te školujinen pe. Ov đanđa but šukar te vaćeri hem „šukar penđarđa o Lila“ (Dela 18:24). Ked služinđa ko Korint, disave phralja ki skupština pobuter manglje ole nego e Pavle hem avere phralen (1. Kor. 1:12, 13). Da li o Apolo ćhivđa e phralen te ćeren asavke podele? Ni ki godi našti te avel amenđe odova. U stvari, disavo vreme palo odova so o Apolo đelo ando Korint, o Pavle podstakninđa le te irini pe uduri (1. Kor. 16:12). O apostol Pavle niked ne bi ćerela odova, ako bi mislini so o Apolo ćerela podele ki skupština. O Apolo hine sposobno manuš, ama ov pe sposobnostija koristinđa te propovedini i šukar vest hem te zorjaćeri pe phralen. Isto ađahar, šaj te ova sigurna so o Apolo hine ponizno manuš. Na primer, ked o Akila hem i Priskila vićinđe le koro peste te objasninen lese pošukar e Devleso drumo, ov na holjanđa (Dela 18:24-28).

17. Sar o Pavle ćerđa te ovel mir?

¹⁷ O apostol Pavle đanđa kola šukar buća o Apolo ćerđa. Ama, o Pavle na sikirinđa pe so o manuša šaj ka phenen so o Apolo tano  pošukar olestar. Ked pisinđa e phralenđe ko Korint, but šukar dićhilo kobor o apostol Pavle hine ponizno hem skromno manuš. Ked o manuša phenđe: „Me hijum e Pavleso“, olese odova na sviđinđa pe. Ov uvek podstakninđa e phralen te šunen e Jehova hem e Isuse Hriste (1. Kor. 3:3-6).

18. Premali 1. Korinćanima 4:6, 7, so šaj te sikljova ando Apolo hem ando apostol Pavle?

¹⁸ So šaj te sikljova ando Apolo hem ando apostol Pavle? Šaj isi amen but odgovornostija ki e Jehovasi organizacija hem šaj pomožinaja bute manušenđe te aven đi o krštenje. Ama, amen haljovaja so sa odova šaj te ćera samo odolese so o Jehova pomožini amen. Ando Apolo hem ando apostol Pavle šaj te sikljova pana diso. So pobuter odgovornostija isi amen, pana pobuter šaj te ćera te ovel mir ki skupština. But hijam zahvalna ked o starešine hem o sluge pomoćnikija pomožinena amen te ova ko jekhipe hem ko mir jekh jekheja. On odova ćerena ađahar so koristinena e Devleso Lafi ked dena amen savetija. On na mangena te ćeren pe važna, već te pomožinen sarinenđe ki skupština te šunen e Isuse hem te ićeren pe ko odova so ov vaćerđa. (Čitin 1. Korinćanima 4:6, 7.)

19. So svako amendar šaj te ćerel? (Isto ađahar, dikh o okvir „ Ma ćhiv averen te mangen te oven pošukar averendar.“)

¹⁹ O Jehova svakonese amendar dinđa disave sposobnostija. Amare sposobnostija valjani te koristina „te služina jekh jekhese“ (1. Petr. 4:10). Ama, šaj mislineja so odova so ćereja nane važno. Ma bistri so o šeja tane šuže sebepi so o thava povezinena len. Isto ađahar, svako buti koja ćereja, kobor god te ovel tikni, pomožini e skupštinaće te aćhol ko jekhipe. Odolese, svako amendar valjani te del sa pestar ando po vilo te ikali i želja te ovel pošukar averendar. Hem de sa tutar ki skupština te ovel mir hem jekhipe (Ef. 4:3).