1. Mazibu gahi iroho ly’akamashigwe lyakalerha egarhi k’abantu?

OMW’IGULU ly’ene, bantu banji bali balongozibwa n’iroho ly’akamashigwe. Omuntu oguza bintu bilebe, anajira okwage koshi ciru akolese n’enjira zirhashinganini ly’aguza kulusha ababo barhimbuzi. Omushasi wa mucezo mulebe anahikira aha avuna n’obulonza owabo mushasi w’omu ekipe bali basharha nayo mpu lyo babahima. Omwanafunzi olonzize okupata enafasi oku université elengerire, anazimba amashuzo g’amashindano ly’opata enafasi kw’eyo université. Rhwê nka Bakristu, rhuba rhumanyire oku olugenzi lwa ntyo luba lubi bwenene, n’oku luba cigabi c’omu ‘bijiro by’omubiri.’ (Gl. 5:19-21) Cikoki, ka byanahikira abakozi ba Yehova bahire iroho ly’akamashigwe omu cigamba buzira kumanya? Eryo lir’idoso lya bulagirire bulya iroho ly’akamashigwe lyanarhuma ecinyabuguma cabulikana omu cigamba.

2. Bici rhwaganirira mw’eci cigabi?

² Mw’eci cigabi, rhwaganirira ngeso nguma na nguma mbi zakarhuma rhwarhondeza iroho ly’akamashigwe ekarhi ka bene wirhu na bali birhu. Na kandi rhwaganirira enyiganyo z’abalume n’abakazi bishwekerezi ba mîra barhajagamo iroho ly’akamashigwe. Burhangiriza, rhuganirire gurhi rhwakakacilabirizamwo rhwene lyo rhumanya ebirhushumya rhujire kantu kalebe.

3. Madoso gahi rhwakacidosa rhwenene?

³ Ngasi mango byanakahûna rhulabirize ebirhushumya rhujire kantu kalebe. Rhwanacidosa ntya: ‘Ka nancigerere oku bandi ly’omanya oku ndi wa bulagirire? Ebinshumya oku njire kantu kalebe, ka kuba kulonza nyereke abandi oku niene nyishikajira bwinja erhi kubayereka oku nie ndushire abandi? Erhi nnambijire lyo nshagalusa Yehova?’ Bulya gurhi rhushinganine okucidosa  ago madoso? Rhulole ebi Akanwa ka Nnamahanga kadesire.

4. Nk’oku biyerekinwe omu lwandiko lwa Abagalasiya 6:3, 4, bulya gurhi rhushinganine rhuyake okukacigerera oku bandi?

⁴ Ebibliya erhuhanwîre oku rhurhakag’icigerera oku bandi. (Osome Abagalasiya 6:3, 4.) Bulya gurhi kurhali kwinja okujira ntyo? Omu njira nguma, erhi rhwakakarhanya oku rhwe rhujira ebintu bwinja kulusha bene wirhu erhi bali birhu, oko kwanarhuma rhwaba ba bucibone. N’omu yindi njira, okucigerera oku bandi kwanarhuma rhwahikira aha rhwavunika omurhima. Muli ezo njira zombi, okucigerera oku bandi, kwanarhuma rhurhaciba n’entanya nyinja. (Rm. 12:3) Mwali wirhu muguma ohamagalwa Katerina, * olama e Grèce, adesire ntya: “Nagwerhe enkomêdu y’okucigerera oku bandi bakagibonekana nka bagwerhe iranga linja, amalehe minja omu mahubiri, n’obuhashe bw’okukoma obwîra. Buzinda, narhondera okucibona wabusha-busha.” Rhushinganine rhukakengera oku Yehova akulwire ngasi muguma wirhu emwage, arhali mpu bulya rhugwerhe iranga linja, erhi mpu bulya rhuyishiganira erhi mpu bulya rhuba rhumanyikine bwenene, cikone ajijire ntyo bulya rhuba rhumuzigire rhunakanayumvirhiza Omugala.​—Yn. 6:44; 1 Kr. 1:26-31.

5. Bici olwiganyo lwa mwene wirhu Hyun lukuyigirizize?

⁵ Kandi ngasi muguma wirhu anacidosa er’idoso: ‘Ka mbamanyikine oku mba muntu okajira omurhula, erhi ngasi mango ntalugiyumvikana n’abandi?’ Orhanye kw’ebi mwene wirhu ohamagalwa Hyun, olama e Corée du Sud acibwinire. Mango maguma, akagilwa oluhali n’abagwerhe emikolo yago-yago omu cigamba. Adesire ntya: “Nakagiderha kubi abo bene wirhu, hali n’amango nakagilahira ebi badesire.” Bici oko kwalesire? Adesire ntya: “Olo lugenzi lwani lwarhuma ecigamba cirhabamo ecinyabuguma.” Bîra baguma na baguma ba Hyun bamurhabala ahugûkwa ago mazibu alikola agwerhe. Hyun ajira empindûlo zishinganine, n’ene ali mugula omu cigamba cage. Erhi rhwakalaba akandalala kirhu rhubone oku rhukola rhulimo eh’iroho hy’okulerha akamashigwe omu cigamba ahali h’okulerhamw’omurhula, rhushinganine rhujire empindûlo ho n’aho.

6. Nk’oku biyerekinwe omu lwandiko lwa Abagalasiya 5:26, ngeso zihi mbi zirhuma haba iroho ly’akamashigwe?

⁶ Osome Abagalasiya 5:26. Ngeso zihi mbi zakarhuma omuntu ahikira aha aba n’iroho ly’akamashigwe? Engeso ntanzi kuli kucizigira wene. Omuntu oba wakucizigira yene aba wabucibone na kandi wa kucikaliza. Eyindi ngeso mbi kuli kukayagalwa n’abandi. Omuntu oyagalwa n’abandi anayumvize abandi obumvu enyanya z’ebi bagwerhe n’okulonza abarhôle ebyo bagwerhe. Kobinali, okuyagalwa n’abandi ko kunayorha nka nshombo. Rhuba rhulonzize okuyaka ezo ngeso mbi ziyorha nka buhanya!

7. Lwigango luhi luyerekine amazibu gakalerhwa n’okucizigira rhwene n’okukayagalwa n’abandi?

⁷ Engeso y’okucizigira wenene n’okukayagalwa n’abandi byanashushanyizibwa n’izinga lyakaja omu mazutu erhi omu esanse bahira omu motere gurhuma e aviyo yayaka. Eyo aviyo yanahashibalala eje emalunga, cikone er’izinga lyanafunga enjira amazutu gagereramo, n’oko kwanarhuma e aviyo yaheza obuhashe bwayo embere egwe na ntyo yanarhibuka. Ko n’oko, omuntu anakolera Yehova kasanzi kalebe. Cikone erhi akaba ali wakucizigira yenene na wakuyagalwa n’abandi, anahikira aha arhibuka. (Mig. 16:18) Anahikira aha aleka okukolera Yehova n’oko kwanamulerhera amazibu kugalerhere n’abandi. Gurhigi rhwakajira lyo rhurhagiba bakucizigira rhwenene erhi bakuyagalwa n’abandi?

8. Gurhi rhwakajira lyo rhurhagiba n’engeso mbi y’okucizigira rhwenene?

 ⁸ Lyo rhurhagiba n’engeso mbi y’okucizigira rhwenene rhwanakakengera ngasi mango er’ihano Paolo ahâga Abafilipi: “Ntaco mujirage n’omurhima gw’okuciberulamwo mirhwe ibirhi erhi gw’okuciyerekana oku murhali; cingasi muguma akagerereza n’obwirhohye oku ababo bamulushire.” (Fl. 2:3) Erhi rhwakakabona abandi oku barhulushire, rhurhakakacigerera kwa balya bajira nshokano nyinji erhi buhashe bunji kurhulusha. Lubero n’oko, rhwanakabashagalukira. N’okujira ntyo kwanaba kwinja bwenene erhi akaba bali bakolesa obo buhashe bwabo omu mukolo gwa Yehova lyo bamulerhera irenge. N’omu yindi njira, erhi bene wirhu bagwerhe buhashe bulebe nabo bakakulikira er’ihano Paolo ahânaga, nabo banakasegeza amorhere girhu minja bashagalukira. Rhweshi nka rhwakakajira ntyo, rhwanarhuma omurhula n’ecinyabuguma byaja omu cigamba.

9. Gurhi rhwakahashilwisa engeso mbi y’okukayagalwa n’abandi?

⁹ Rhwanalwisa engeso y’okukayagalwa n’abandi omu kuba ba lugero, erhi kuhugûkwa oku hali ebi rhurhakahasha. Erhi rhwakaba ba lugero, rhurhakakalonza okujira akantu k’okuyereka abandi oku rhwe rhujira nshokano nyinji erhi buhashe bunji kulusha abandi boshi. Ahali h’okujira ntyo, rhwanalola gurhi rhwakayiga abandi bajira buhashe bunji kurhulusha. Kwa lwiganyo, orhanye kuli mwene wirhu w’omu cigamba ojira obuhashe bw’okugeza ehotuba zage bwinja. Rhwanamudosa gurhi ajira amango ali arheganya ehotuba. N’erhi akaba hali mwali wirhu oyishiyenda bwinja, rhwanamuhûna amahano gakarhurhabala lyo rhukubûla oku rhuyenda. N’Omukristu ociri musole ojira amazibu gw’okukoma obwîra, anahûna amahano owundi Mukristu ojira obuhashe b’okukoma obwîra. Erhi rhwakakajira ntyo, rhwanahash’ilwisa engeso mbi y’okukayagalwa n’abandi na ntyo rhwanakubûla obuhashe bwirhu rhwenene.

10. Mazibu gahi Gideoni arhimanine nago?

¹⁰ Orhanye oku byahikiraga Gideoni, w’omu bûko bwa Manase n’abalume b’omu bûko bwa Efrayimu. Yehova ahashisa Gideoni na balume  300 bali boshi okuhima abashombanyi babo n’obo buhimi bwakarhumire baciyumva oku bali ba bulagirire bwenene. Bene Efrayimu bajibona Gideoni, barhayishaga mpu lyo bamuvuga omunkwa kw’ebyo anajijire cikone bamulongoza bwenene. Bibonekine oku baciyumvirhe kubi bulya Gideoni arhabalalikaga aha murhondero oku bajilwisa haguma naye abashombanyi ba Nnamahanga. Basegeza obwenge oku lukengwa obûko bwabo bwakahâbirwe ci barhabonaga ako kanga koshi nk’oku kaliyosire: Gideoni ajijire ntyo ly’akengesa izino lya Nnamahanga n’okulanga olubaga lwage.​—Bac. 8:1.

11. Gurhi Gideoni ashuzize bene Efrayimu?

¹¹ Gideoni abwira bene Efrayimu n’obwirhohye ntya: “Ka nani kwo najizirage akinyu?” Buzinda abaha olwiganyo luyerekine n’obwalagale gurhi Yehova anabagishire. Erhi bene Efrayimu bayumva ntyo “oburhe [bwabo] bwatwika.” (Bac. 8:2, 3) Gideoni n’obulonza bwinja aleka okucibona oku ali wabulagirire bwenene ly’agendekeza omurhula egarhi k’olubaga lwa Nnamahanga.

12. Bici rhuciyigirizize kugerera olwiganyo lwa bene Efrayimu n’olwa Gideoni?

¹² Bici ogu mwanzi gwakarhuyigiriza? Olwiganyo lwa bene Efrayimu lurhuyigirizize oku rhurhashinganini rhukasegeza obwenge okw’irenge rhwakahâbwa cikone rhwanabusegeza okw’irenge Yehova akahâbwa. Akaba rhuli birhwe bya mulala erhi bagula omu cigamba, rhwanaciyigiriza binji kugerera olwiganyo lwa Gideoni. Erhi muntu mulebe akagaya enyanya z’ebi rhwajiraga, rhwanaciseza rhuhugûkwe bulya gurhi agayire. Na kandi rhanavuga oyo muntu omunkwa oku bintu binja anajiraga. Lyo rhuhashijira ntyo byanahûna rhube birhohye, ci bwenene erhi akaba oyo muntu ye orhagwerhe ehaki. Cikone omurhula gwo g’obulagirire bwenene kulusha okuyerekanana oku rhwe rhugwerhe ehaki.

13. Mazibu gahi gahikire Ana, na gurhi agahimiremwo?

¹³ Orhanye n’oku lwiganyo lwa Ana. Aliherusire omu mwa Mulawi muguma wakagihamagalwa Elkana, analimuzigire bwenene. Cikone Elkana agwerhe owundi mukazi wakagihamagalwa Penina. Elkana alizigire Ana bwenene kulusha Penina; cikone, “Penina aligwerhe abana, ci Ana yehe arhalibagwerhe.” Enyanya z’oko, Penina akaha Ana ebinioko lyo “amuyirha burhe.” Gurhi Ana akagiciyumva? Akaciyumva kubi bwenene! “Akalaka n’okulakûla, akaleka okulya.” (1 Sam. 1:2, 6, 7) Ciru akaba ntyo ntaco ciyerekine oku Ana akagicihola enyanya z’ebyo Penina akagimujijira. Lubero n’oko, akashenga Yehova n’omurhima goshi analiyemire n’obwalagale oku Yehova amurhabala. Ka Penina ayishir’ihikira aha ashanja oko akagijirira Ana? Ebibliya erhadesiri ntyo. Cikone rhumanyire oku Ana acibiriba n’omurhula gw’ekandalala anagendekera agulanga. “Obusu bwage burhaciri nk’embere.”​—1 Sam. 1:10, 18.

14. Bici olwiganyo lwa Ana lurhuyigirizize?

¹⁴ Bici olwiganyo lwa Ana lurhuyigirizize?  Erhi muntu mulebe akalonza okuba luhali enyanya zirhu omu njira nguma erhi omu yindi, oshinganine okengere oku muli ako kanga hali ebi wakajira. Orhashinganini ocilekerere kuhika muhikire aha mwaja omu kamashigwe na muntu mulebe. Ahali h’okugalulira omuntu obubi oku bundi, ocihangane okujira omurhula haguma n’oyo muntu. (Rm. 12:17-21) Erhi akaba oyo muntu arhalonzizi okujira omurhula, wehe wanagendekera waba n’omurhula gw’ekandalala.

15. Bici byalishushine egarhi ka Apolo na Paolo?

¹⁵ Buzinda, rhuganirirage ebi rhwakaciyigiriza kugerera olwiganyo lw’omwanafunzi Apolo n’olw’entumwa Paolo. Abo balume bombi balimanyire bwinja Amandiko. Bombi bali bigiriza binja banalimanyikine. Na bombi barhabire bantu banji bahikira aha babà banafunzi. Cikone bombi nta muguma wakagiba luhali l’owabo.

16. Apolo ali muntu wa gurhi?

¹⁶ Apolo ali Muyahudi “aburhiragwa e Alegizandiriya,” omu myaka igana mirhanzi, eyo munda yo yali santre abantu bakayigira bulenga bunji. Ali muntu oyish’iderha, anali “amanyire bwenene Amandiko.” (Ebj. 18:24, Mashi Bible) Erhi Apolo akakolera e Korinti, bantu baguma baguma b’omu cigamba barhondera okuyerekana oku bamusimire bwenene kulusha abandi bene wirhu, kwa lwiganyo nka Paolo. (1 Kr. 1:12, 13) Ka Apolo agendekezize ezo ntanya z’okugaba ecigamba? Ciru n’ehitya rhurharhanyizi oku ajijire ntyo. Na ntyo, kasanzi kasungunu enyuma z’aho erhi Apolo arhenga e Korinti, Paolo amugukulira oku acibigaluka eyo munda. (1 Kr. 16:12) Paolo arhakajijire ntyo acibonaga oku Apolo anarhumire ecigamba cagabanyikamo. Kobinali, Apolo akolesa enshokano zage omu njira nyinja bwenene: kuyaliza omwanzi mwinja n’okuzibuhya bene wabo. Na kandi rhwanayemera n’obwalagale oku Apolo ali mwirhohye. Kwa lwiganyo, nta kantu koshi-koshi kayerekine oku agayire erhi Akila na Prisila “bamuzabûlira kwinja enjira ya Nyamuzinda.”​—Ebj. 18:24-28.

17. Gurhi Paolo ajijire ly’agendekeza omurhula?

 ¹⁷ Entumwa Paolo yalimanyire bwinja-bwinja omukolo mwinja Apolo ahikirizize. Cikone arhayobohaga oku abantu babona nka Apolo ye omulushire. Obwirhohye, olugero, n’okuba n’entanya nyinja kwa Paolo kwabonekana kugerera amahano ahâga ecigamba c’e Korinti. Ahali hw’okurhebwa n’abakagiderha oku: “Niono, ndi wa Paolo,” asegeza obwenge kuli Nnamahanga na Yezu Kristu.​—1 Kr. 3:3-6.

18. Nk’oku biyerekinwe omu lwandiko lwa 1 Abakorinti 4:6, 7, bici rhwakaciyigiriza kugerera olwiganyo lwa Apolo n’olwa Paolo?

¹⁸ Bici rhwakaciyigiriza kugerera olwiganyo kwa Apolo n’olwa Paolo? Nkaba rhwanakolera Yehova bwenene, n’okuhikira aha rhwarhabala bantu banji babatizizbwe. Cikone rhunahikire aha rhwahugûkwa oku oburhabale Yehova arhuha bo burhuma rhwajira ebyo byoshi. Hali akandi kantu rhuciyigirizize kugerera olwiganyo lwa Apolo n’olwa Paolo: erhi akaba rhugwerhe mikolo minji yago-yago omu cigamba, rhwanarhabala bwenene lyo rhugendekeza omurhula. Kunganaci rhuvuzire omunkwa okubona abalume bahizirweho n’iroho litagatifu banagendekeze omurhula n’ecinyabuguma erhi bahâna amahano gayimangire oku Kanwa ka Nnamahanga n’omu kusegeza obwenge kuli Yezu Kristu, lwiganyo lwirhu, ci arhali kuli bo bonene!​—Osome 1 Abakorinti 4:6, 7.

19. Bici ngasi muguma wirhu akajira? (Olole ecisanduku cidesire “ Oyake Okulerha Iroho ly’Akamashigwe.”)

¹⁹ Ngasi muguma wirhu ajira nshokano erhi buhashe bulebe ahâbagwa na Nnamahanga. Rhwanakolesa eyo nshokano “omu kukolera abandi.” (1 Pt. 4:10, NWT) Hali amango rhwakaciyumva nk’omukolo rhujira guba musungunu bwenene. Cikone ebijiro bisungunu by’okugendekeza omurhula ko biba nka nyuzi nsungunu-ngunu zirhuma omushangi gwagwarhana. Rhujirage okwirhu koshi lyo rhukula omu murhima gwirhu ngasi ntanya zakalerha iroho ly’akamashigwe. Rhweshi rhuhige okugendekera kwajira ebi rhwakanahasha byoshi lyo rhugendekeza omurhula n’ecinyabuguma omu cigamba.​—Ef. 4:3.