1. San kan pasa te sma e strei nanga trawan?

NA INI a grontapu disi furu sma e strei nanga makandra fu di den wani sori taki den bun moro trawan. Fu eksempre, wan bisnisman kan du ala sortu sani fu meki moro moni leki trawan, awinsi a e du ogri nanga sma. Wan sportman kan gi wan trawan mankeri soso fu man wini wan plèi. Wan studenti di wani go na wan prenspari universiteit kan spiek srefi na a eksame so taki den kan teki en tapu a skoro. Wi leki Kresten sabi taki den sani disi no bun, fu di na „sani di a sondu skin e du” (Gal. 5:19-21). Ma a kan pasa taki sondro fu den sabi, son futuboi fu Yehovah e bigin strei nanga trawan na ini a gemeente? A kan pasa taki den meki taki trawan bigin du a srefi? Dati na prenspari aksi, fu di wánfasi no o de na ini a gemeente te sma e strei nanga makandra.

2. Fu san wi o taki na ini na artikel disi?

² Na ini na artikel disi, wi o taki fu sani di kan meki taki wi wani strei nanga wi brada nanga sisa. Wi o luku a moi eksempre fu sma na ini Bijbel ten di no ben strei nanga trawan. Ma meki wi luku fosi fa wi kan ondrosuku wisrefi.

3. San wi musu aksi wisrefi?

³ Ten na ten a bun fu ondrosuku wisrefi. Wi kan aksi wisrefi: ’Mi e firi bun soso te mi feni taki mi betre moro trawan? Fu san ede mi e wroko tranga na ini a gemeente? Na fu di mi wani du sani moro bun moro ala sma? Noso fu di mi wani du ala san mi man gi Yehovah?’ Fu san ede wi musu aksi wisrefi den sani disi? Luku san Gado Wortu e taki.

4. Fu san ede wi no musu teki wisrefi gersi nanga trawan soleki fa Galasiasma 6:3, 4 e taki?

 ⁴ Bijbel e taigi wi taki wi no musu teki wisrefi gersi nanga trawan. (Leisi Galasiasma 6:3, 4.) Fu san ede? Efu wi teki wisrefi gersi nanga trawan, dan wi kan denki taki wi bun moro wi brada nanga sisa èn na so wi kan kisi bigifasi. Ma efu na a tra sei wi feni taki wi brada bun moro wi, dan wi kan lasi-ati. Awinsi fa a no fa, efu wi teki wisrefi gersi nanga trawan, dan wi e sori taki wi no de nanga krin frustan (Rom. 12:3). Wan sisa di nen Katerina * èn di e libi na ini Grikikondre e taki: „Mi ben abi a gwenti fu teki misrefi gersi nanga trawan. Gi mi a ben gersi leki den ben moro moi, den ben du en moro bun na ini a preikiwroko, èn a ben moro makelek gi den fu meki mati. Disi ben meki mi firi leki mi no warti noti.” Wi musu hori na prakseri taki Yehovah no hari wi kon na en fu di wi ben moi so, fu di wi man taki bun, noso fu di furu sma lobi wi. Yehovah hari wi kon na en fu di wi sori taki wi lobi en nanga wi heri ati èn fu di wi wani arki en Manpikin.​—Yoh. 6:44; 1 Kor. 1:26-31.

5. San yu e leri fu na ondrofenitori fu wan brada di nen Hyun?

⁵ Wan tra sani di wi kan aksi wisrefi na: Fa sma sabi mi? Leki wan sma di e meki taki freide de, noso leki wan sma di lobi haritaki nanga trawan? Luku na ondrofenitori fu wan brada di nen Hyun èn di e libi na ini Zuid-Korea. A ben e denki taki son brada di ben abi grani na ini a gemeente ben pruberi fu sori en taki den e du sani moro bun leki en. A e taki: „Mi ben krutu ala pikinpikin sani di den brada disi ben du èn nofo tron mi no ben agri nanga den sani di den ben taki.” San ben pasa? A e taki: „A fasi fa mi ben tyari misrefi ben tyari pratifasi kon na ini a gemeente.” Wan tu mati fu Hyun yepi en fu frustan taki a abi wan problema. Hyun kenki a fasi fa a ben e tyari ensrefi èn now a e dini leki wan bun owruman. Efu wi si taki wi e kisi a firi fu strei nanga trawan na presi fu sorgu taki freide de, dan wi musu kenki a fasi dati wantewante.

6. Soleki fa Galasiasma 5:26 e taki, dan sortu fasi kan meki taki wan sma bigin strei nanga trawan?

⁶ Leisi Galasiasma 5:26. San kan meki taki wan sma e bigin strei nanga trawan? Wan reide na te a e denki tumusi furu fu ensrefi. So wan sma abi bigifasi èn a e prakseri ensrefi nomo. Wan tra reide na te wan sma e dyarusu. Wan sma di e dyarusu no wani nomo san wan trawan abi, ma a wani puru en na en anu tu. Fu taki en leti, wan sma di e dyarusu tapu wan trawan e teige a trawan. A no de fu taki dati wi no wani kisi den takru fasi disi.

7. Gi wan eksempre fu sori fu san ede a no bun fu abi bigifasi èn fu dyarusu.

⁷ Te sma e denki tumusi furu fu densrefi èn e dyarusu, dan dati de neleki uduloso di e nyan wan daki fu wan oso. Awinsi o moi na oso de na dorosei, efu den uduloso nyan en, a o broko fadon te fu kaba. Na so a de tu taki wan sma kan dini Yehovah wan pisi ten kaba. Ma efu a abi bigifasi noso efu a e dyarusu, dan a o fadon te fu kaba (Odo 16:18). A o tapu fu dini Yehovah èn dati o tyari problema kon gi en nanga trawan. Ma fa wi kan sorgu taki  wi no denki tumusi furu fu wisrefi èn taki wi no e dyarusu?

8. San kan yepi wi fu no denki tumusi furu fu wisrefi?

⁸ Wan sani di kan yepi wi fu no denki tumusi furu wisrefi na te wi e teki a rai di na apostel Paulus ben gi den Filipisma: „No strei nanga makandra èn no prakseri tumusi furu fu unsrefi, ma abi sakafasi èn si trawan moro hei leki unsrefi” (Fil. 2:3). Efu wi e si trawan moro hei leki wisrefi, dan wi no o strei nanga den wan di man du sani moro bun leki wi. Na presi fu dati wi o breiti gi den, spesrutu te den e gebroiki a koni fu den fu meki Yehovah kisi grani. Èn te wan brada noso sisa di sabi du furu sani bun e teki a rai fu Paulus, dan den o si den bun fasi fu wi. Na so wi alamala o man sorgu taki freide nanga wánfasi de na ini a gemeente.

9. San wi kan du so taki wi no dyarusu tapu trawan?

⁹ Wi kan feti nanga a firi di wi e kisi fu dyarusu tapu trawan te wi e hori na prakseri taki son sani de di trawan man du moro bun leki wi. Efu wi abi sakafasi, dan wi no o pruberi fu sori taki wi bun moro trawan. Na presi fu dati wi o luku san wi kan leri fu den sma di man du sani moro bun leki wi. Kon meki wi taki dati wan brada na ini a gemeente e hori moi lezing. Kande wi kan aksi en fa a e sreka ensrefi gi den lezing. Efu wan sisa sabi bori bun, dan wi kan aksi en san wi kan du fu bori bun tu. Èn efu wan yongu Kresten feni en muilek fu meki mati, dan a kan suku rai na wan tra sma di e meki mati gaw. Te wi e du den san disi, dan wi no o dyarusu èn wi o leri fu du sani moro bun.

10. Sortu problema miti Gideon?

¹⁰ Prakseri san ben pasa nanga Gideon di ben de fu a lo Manase èn nanga den man fu a lo Efrayim. Yehovah ben yepi Gideon nanga den 300 man fu en fu wini wan feti èn den ben kan meki bigi. Ma den no du dati. Di den man fu Efrayim miti Gideon, den no prèise en, ma den bigin suku trobi nanga en. Biginbigin Gideon  no ben kari den fu kon yepi en feti nanga den feanti fu Gado èn a sori leki den ben mandi fu a sani disi. Den ben broko den ede nomo nanga a grani di a lo fu den ben musu kisi. Ma den ben frigiti san ben de moro prenspari. Dati na taki Gideon ben yepi fu meki Yehovah nen kisi glori èn a ben yepi kibri a pipel fu Gado.​—Krut. 8:1.

11. San Gideon taigi den man fu Efrayim?

¹¹ Na wan sakafasi Gideon taigi den man fu Efrayim: „Den sani di unu du, kefalek moro den sani di mi du.” Dan a memre den fa Yehovah ben yepi den fu du bigi sani. Di den man fu Efrayim yere dati, dan na ’atibron fu den kon kowru’ (Krut. 8:2, 3). Gideon ben de klariklari fu sori sakafasi soso fu man sorgu taki freide tan de na mindri Gado pipel.

12. San wi kan leri fu den man fu Efrayim èn fu Gideon?

¹² San wi kan leri fu a tori disi? Na eksempre fu den man fu Efrayim e leri wi taki wi no musu feti fu kisi grani, ma san moro prenspari na taki wi musu meki Yehovah kisi grani. Osofamiri-edeman nanga owruman kan leri wan moi sani fu Gideon tu. Efu wan sma e mandi nanga wi fu wan sani di wi du, dan wi musu pruberi fu frustan fu san ede a sma e mandi. Wi kan prèise a sma tu gi den sani di a du bun. A no de fu taki dati wi musu abi sakafasi fu man du dati, spesrutu te a de krin taki a sma fowtu. A moro prenspari fu abi freide nanga wi brada nanga sisa leki fu sori taki wi abi leti.

13. Sortu problema Hana ben abi èn san a du?

¹³ Prakseri na eksempre fu Hana. A ben trow nanga wan Leifisma di ben nen Elkana. Elkana ben lobi Hana srefisrefi. Ma Elkana ben abi wan tra wefi di ben nen Penina. Elkana ben lobi Hana moro Penina. „Penina ben abi pikin, ma Hana no ben abi pikin.” Dati meki Penina ben „tanteri Hana doronomo, fu di a ben wani Hana firi sari”. Bijbel e taki dati „Hana ben e krei èn a no ben wani nyan” (1 Sam. 1:2, 6, 7). Ma Bijbel no e taki dati Hana pruberi fu du wan hati sani baka nanga Penina. Na presi fu dati Hana fruteri Yehovah ala san ben de na tapu en ati èn a ben abi a frutrow taki Yehovah ben o yepi en. A de so taki Penina no ben tanteri Hana moro? Bijbel no e taki dati. Ma san wi sabi na taki Hana no ben broko en ede moro nanga a problema fu en èn taki „a no ben de nanga wan sari fesi moro”.​—1 Sam. 1:10, 18.

14. San wi leri fu na eksempre fu Hana?

¹⁴ San wi kan leri fu na eksempre fu Hana? Efu wan sma e pruberi fu strei nanga yu fu di a wani sori taki a bun moro  yu, dan hori yusrefi èn no meki a sma hari yu go na ini a strei. Na presi fu pai ogri fu ogri, pruberi fu meki freide nanga a sma (Rom. 12:17-21). Srefi te a sma no kenki, yu o de koloku.

15. Sortu sani Paulus nanga Apolos ben sabi du bun?

¹⁵ Leki lasti wi o luku san wi kan leri fu na eksempre fu a disipel Apolos nanga na apostel Paulus. Den ala tu ben sabi Gado Wortu bun. Den ala tu ben de bun leriman èn furu sma ben sabi den. Èn den ala tu yepi furu sma fu tron disipel. Ma den tu man disi no ben strei nanga makandra.

16. Fa Apolos ben de?

¹⁶ Apolos ben de „wan Dyu fu Aleksandria”, wan prenspari foto pe sma ben go fu kisi hei skoroleri. A sori leki a ben de wan bun takiman èn a ben „sabi Gado Buku bun” (Tori 18:24). Di Apolos ben de na ini Korente, dan son sma na ini a gemeente ben sori taki den ben lobi en moro tra brada, soleki Paulus (1 Kor. 1:12, 13). Na Apolos ben leri den fu du dati? Wi no man bribi taki a ben o du so wan sani. Fu taki en leti, wan pisi ten baka di Apolos gowe libi Korente, Paulus ben aksi en fu go drape baka (1 Kor. 16:12). Paulus no ben o aksi en a sani dati noiti efu a ben denki taki Apolos ben tyari pratifasi kon na ini a gemeente. A de krin taki Apolos gebroiki a koni fu en na wan bun fasi. A gebroiki a koni fu en fu preiki a bun nyunsu èn fu gi den brada fu en deki-ati. Wi kan de seiker tu taki Apolos ben abi sakafasi. Fu eksempre, Bijbel no e taki dati a ben firi wan fasi di Akwila nanga Preskela „fruteri en moro fini fu a pasi fu Gado”.​—Tori 18:24-28.

17. San Paulus du fu meki freide de na ini a gemeente?

 ¹⁷ Na apostel Paulus ben sabi sortu bun wroko Apolos ben du. Ma Paulus no ben broko en ede taki sma ben o denki taki Apolos bun moro en. Paulus ben abi sakafasi èn a no ben denki tumusi furu fu ensrefi. Yu kan si dati te yu e leisi a rai di a ben gi a gemeente Korente. Di son sma na ini a gemeente ben taki „mi na fu Paulus”, dan a no meki a sani dati frei go na en ede, ma a sori taki na Yehovah Gado nanga Yesus Krestes musu kisi ala grani.​—1 Kor. 3:3-6.

18. Te wi leisi 1 Korentesma 4:6, 7, dan san wi e leri fu na eksempre fu Paulus nanga Apolos?

¹⁸ San wi kan leri fu na eksempre fu Apolos nanga Paulus? A kan taki wi e wroko tranga gi Yehovah èn taki wi e yepi furu sma fu teki dopu. Ma wi e frustan taki wi man du dati fu di Yehovah e blesi wi. Wan tra sani di wi kan leri fu na eksempre fu Paulus nanga Apolos na disi: O moro frantwortu wi abi, o moro wi kan du fu sorgu taki freide de na ini a gemeente. Wi de nanga tangi te owruman nanga dinari ini a diniwroko e sorgu taki freide nanga wánfasi de na ini a gemeente. Den e du dati te den e gi rai di e komoto fu Gado Wortu èn te den no e suku biginen, ma te den e yepi a gemeente fu poti prakseri na wi eksempre Krestes Yesus.​—Leisi 1 Korentesma 4:6, 7.

19. San ibriwan fu wi kan du? (Luku a faki „ No strei nanga makandra”.)

¹⁹ Ibriwan fu wi abi wan sani di a man du bun. Wi kan gebroiki a sani dati „fu dini makandra” (1 Petr. 4:10). Kande wi feni taki san wi e du no prenspari so. Ma prakseri na eksempre disi: Wan lo fini titei di brei kon na wán e meki wan krosi. Na so ala den pikinpikin sani di wi e du e yepi fu meki wánfasi de na ini a gemeente. Ibriwan fu wi musu sorgu taki wi no du nowan sani di kan gi wi brada nanga sisa a firi taki wi denki taki wi betre moro den. Meki wi du ala san wi man fu libi bun nanga makandra so taki wánfasi de na ini a gemeente.​—Ef. 4:3.