1. Kiki ekisobora kubaho kakuba abantu abamu balengaho kwoleka ngu nibakira abandi?

ABANTU baingi kasumi kanu, bagonza kweyoleka ngu nibakira abandi, kandi befaaho bonka. Ekyokurorraho, omusubuzi n’asobora kukora ebintu ebirukulemesa abantu abandi nukwo bizineesi ye ey’eyongere kukurakurana kukira ez’abantu abandi. Omuzaani n’asobora kuhutaaza omuzaani owa tiimu endi akigenderiire nukwo asobole kusingura omuzaano. Omwegi n’asobora kukopa ebirengeso nukwo asobole kugenda omu yunivasite ey’amaani. Itwe nk’Abakristaayo, tukimanyire ngu ebikorwa ebi bibi, kandi biri bimu ha ‘ngeso ez’omubiri.’ (Bag. 5:19-21) Abamu h’abaheereza ba Yahwe nibasobora kuba nibalengaho kukira abandi baitu batakimanyire kandi nibaletera n’abandi nabo kukora ekintu nikyo kimu. Tusemeriire kuteekerezaaho ekintu kinu, habwokuba kakuba ab’omu kitebe balengaho kwoleka ngu nibakirangana, ekitebe tikirukwija kubamu obumu.

2. Kiki ekiturukwija kubazaaho omu kicweka kinu?

² Omu kicweka kinu, nitwija kubazaaho ebintu ebituletera kugonza kwoleka ngu nitukira ab’oruganda abandi. Kandi nitwija n’okubazaaho abaheereza ba Yahwe ab’omu Baibuli abatarayolekere ngu nibakira abandi. Katubanze tubazeeho ensonga habwaki nitusobora kwetwaza omu mulingo ogu.

3. Bikaguzo ki ebitusemeriire kwekaguza?

³ Kirungi obwire bwona kwikara nitwekebiija ebigendererwa byaitu. Nitusobora kwekaguza: ‘Nyehurra kurungi obuntekereza ngu ninkira omuntu ondi? Nkora muno omu kitebe  ngu habwokuba ningonza kukirayo, rundi kukira abandi? Rundi ngonza kukora muno habwokuba ningonza kusemeza Yahwe?’ Habwaki tusemeriire kwekaguza ebikaguzo ebi?

4. Nk’oku kyolekerwe omu Abagaratiya 6:3, 4, habwaki tusemeriire kwerinda kwerengesaniza n’abantu abandi?

⁴ Baibuli n’etutererra ngu tuleke kwerengesaniza n’abantu abandi. (Soma Abagaratiya 6:3, 4.) Habwaki? Emu ha nsonga eri ngu, kakuba tutekereza ngu nitukora kukira ow’oruganda, nitusobora kufooka b’emyehembo. Baitu kakuba tutekereza ngu ab’oruganda nibakora muno kutukira, nikisobora kutumaramu amaani. Kutekereza tuti omu miringo enu yoona ebiri tikiri ky’amagezi. (Bar. 12:3) Munyaanya itwe arukwetwa Katerina, * arukwikara Greece, nagamba ati: “Nakiraga kwerengesaniza n’abantu abandi abasemiire, abaine obukugu omu kutebeza, kandi n’abamanyire kutunga abanywani. Kinu kyandeteraga kwehurra nk’ow’ataine mugaso.” Tusemeriire kukiijuka ngu Yahwe akatucunda kwija hali uwe habwokuba twetekaniize kumugonza hamu n’okuhuliiriza Omwana we hatali habw’okusemera kwaitu, kumanya kubaza kurungi, rundi habw’okuranganwa.​—Yoh. 6:44; 1 Kol. 1:26-31.

5. Ekyokurorraho ky’ow’oruganda Hyun nikitwegesa ki?

⁵ Ekikaguzo ekindi ekitusobora kwekaguzo nikyo kinu, ‘Manyirwe nk’omuntu agonza kuleetaho obusinge rundi nkira kuleetaho obutetegerenzangana n’abandi?’ Wetegereze ekyokurorraho eky’ow’oruganda arukwetwa Hyun, kandi arukwikara South Korea. Obuyaheerezaaga nk’omugurusi omu kitebe, yakiraga kurora abagurusi abandi nk’abanyanzigwa be. Nagamba ati: “Nabazaahoga kubi ab’oruganda banu, kandi nakiraga kuhakaniza ebintu ebibabaga babalize.” Kiki ekyarugiremu? Nagamba ati: “Entekereza yange enu, ekaletaho okwebaganizaamu omu kitebe.” Bamu h’abanywani ba Hyun bakamukonyera kwetegereza ekizibu kye. Hyun akakora empindahinduka ezirukwetaagisa, kandi kasumi kanu n’aheereza nk’omugurusi w’ekitebe omurungi. Kakuba tukyetegereza ngu tutungire omutima ogw’okugonza kukira abantu abandi, tusemeriire kukora empindahinduka aho naaho.

6. Kusigikirra ha Abagaratiya 5:26, miringo ki embi ey’esobora kutuletera kugonza kukira abandi?

⁶ Soma Abagaratiya 5:26. Miringo ki embi ey’esobora kuletera omuntu kwoleka ngu nakira abandi? Gumu ha miringo egi, nugwo ogw’okwenyumiza. Omuntu arukwenyumiza aba aine emyehembo kandi nayefaaho wenka. Omulingo ogundi omubi, niryo ihali. Omuntu ow’ihali takwatwa ihali habw’ekintu eky’omuntu ondi kyonka, baitu agonza n’okukimwihaho. Nahabweki, omuntu ow’ainiire mugenzi we ihali, aba namunoba. Nitugonza kwetantarra kimu omuze gunu omubi muno!

7. Kyokurorraho ki ekirukwoleka nk’oku kiri kibi kuba n’emyehembo hamu n’ihali?

⁷ Emyehembo hamu n’ihali nibisobora kulengesanizibwa n’oburofu obugenda omu mafuta g‘enyonyi. Enyonyi n’esobora kwimuka ekagenda, baitu oburofu obu nibusobora kwigarra enseke ezirukutwara amafuta, kikaletera injini kuhwa amaani kandi enyonyi ekatunga butandwa obwire bwayo obw’okugwa butakahikire. Omu mulingo nugwo gumu, omuntu n’asobora kuheereza Yahwe kumara akasumi, baitu kakuba aba aine emyehembo hamu n’ihali, naija kugwa ahwerekerre. (Nfu. 16:18) Naija kuleka kuheereza Yahwe, kandi ayeretere akabi hamu n’abantu abandi. Hati kiki ekitusobora kukora kwerinda emyehembo hamu n’ihali?

8. Nitusobora tuta kurwanisa emyehembo?

 ⁸ Nitusobora kurwanisa emyehembo, kakuba tuteeka omu nkora obuhabuzi omukwenda Paulo y’ahaire Abafiripi oburugukugamba ngu: “Mutakora kintu kyona obwokukungana nekitinisa ekitarumu, baitu omu buculezi omuntu wena omulinywe atekereze mutahiwe okumukira.” (Baf. 2:3) Kakuba turora abantu abandi nk’abarukutukira, titurukwija kuteekereza ngu nitukira abo abaine ebisembo hamu n’obusobozi ebitutaine. Oihireho nitwija kusemererwa hamu n’abo, kukira muno obu barukuba nibakozesa obusobozi bwabo kuheereza Yahwe. Kandi kakuba ow’oruganda rundi munyaanya itwe anyakwine ebisembo bingi ateeka omu nkora obuhabuzi bwa Paulo, nikiija kumwanguhira kurora emiringo yaitu enungi. Kandi ekirarugamu, itwena nitwija kukurakuraniza obusinge hamu n’obumu omu kitebe.

9. Nitusobora tuta kwerinda kukwatirwa abandi ihali?

⁹ Nitusobora kwerinda kukwatirwa ow’oruganda rundi munyaanya itwe ihali kakuba tukyetegereza ngu haroho ebintu ebimu ebitutasobora kukora kurungi. Obuturaaba tuli bebundaazi, titurukwija kulengaho kwoleka ngu nitukira abandi. Oihireho, nitwija kulengaho kwegera hali abo abarukutukira. Ekyokurorraho, kakuba ow’oruganda omu kitebe aba naha embazo enungi, nitusobora kumukaguza omulingo atekanizaamu embazo ze. Kakuba munyaanya itwe aba amanyire kucumba kurungi, nitusobora kumukaguza akatuha amagezi agaratukonyera kuba abacumbi abarungi. Kandi kakuba Omukristaayo omuto kiba nikimugumira kutunga abanywani, n’asobora kukaguza omuntu ow’amanyire kutunga abanywani. Obuturakora ebintu binu, titurukwija kukwatirwa abandi ihali kandi nitwija kwongera ha bukugu bwaitu.

10. Kizibu ki Gideoni ekiyatungire?

¹⁰ Tekerezaaho ekyabaireho hagati ya Gideoni, ow’akaba n’aruga omu ruganda rwa Manase hamu n’abasaija kuruga omu ruganda rwa Eferaimu. Habw’obukonyezi bwa Yahwe, Gideoni hamu n’abasaija be 300 bakasingura  obulemu obw’amaani ekyali nikisobora kubaleetera kwehemba. Abasaija kuruga Eferaimu bakaija kukunganiza Gideoni omu kiikaro ky’okumusiima. Nikizooka ngu bakasaalirwa muno habwokuba Gideoni akaba atabeesere ha kubanza kumweteranizaaho kurwanisa abanyanzigwa ba Ruhanga. Abasaija banu omutima bakaguteeka ha kulinda ekitiinisa eky’oruganda rwabo. Baitu bayebwa nk’oku kyali kikuru muno Gideoni kukonyera omu kuhaisa ibara lya Yahwe ekitiinisa hamu n’okulinda abantu Be.​—Bac. 8:1.

11. Gideoni akagarukamu ata abasaija kuruga Eferaimu?

¹¹ Omu mulingo ogw’okwebundaaza, Gideoni akagarukamu abasaija kuruga Eferaimu ati: “Nyowe nkozire ki okuingana [inywe]?” Akabaha ebyokurorraho eby’embaganiza kubooleka omulingo Yahwe akaba abahaire omugisa. Abasaija obubahuliire eki “ekiniga kyabu kyakeha.” (Bac. 8:2, 3) Gideoni akaikiriza kwebundaaza nukwo asobole kulinda obusinge hagati y’abantu ba Ruhanga.

12. Ekyokurorraho ky’Abeferaimu hamu n’ekya Gideoni nibitwegesa ki?

¹² Kiki ekitusobora kwegera omu omu byahandiikirwe binu? Omu kyokurorraho ky’Abeferaimu, nitwega ngu titusemeriire kuteeka muno omutima ha kwetungira ebitiinisa baitu tuguteeke muno ha kukiteekamu Yahwe. Banyineeka hamu n’abarugurusi omu kitebe nibasobora kwega isomo kuruga hali Gideoni. Kakuba omuntu abiihirwa habw’ekintu ekitukozere, tusemeriire kulengaho kumanya habwaki abiihirwe. Nitusobora n’okusiima omuntu ogu habw’ebintu eby’akozere kurungi. Kusobora kukora eki, nikiija kutwetaagisa obwebundaazi kukira muno omuntu ogu obwaraaba nuwe ali omu nsobi. Baitu kikuru muno kuba n’obusinge hagati yaitu n’ow’oruganda omu kiikaro ky’okugonza kumwoleka ngu niiwe ohikire.

13. Kizibu ki Hana ekiyatungire, kandi akakora ki kukisingura?

¹³ Tekerezaaho n’ekyokurorraho kya Hana. Akaba aswirwe omusaija Omulevi arukwetwa Erekana, ayamugonzaaga muno. Baitu Erekana akaba aine omukazi ondi arukwetwa Penina. Erekana yagonzaaga muno Hana kukira Penina, baitu “Penina akabanyina abana, baitu Hana akaba atanyinabo.” Habw’ekintu eki, Penina yatutunzaaga Hana ‘okumubiihiza.’ Hana akehurra ata? Akabiihirwa muno! “Nikyo yaliriire, yayanga okulya.” (1 Sam. 1:2, 6, 7) Baitu busaho nambere Baibuli erukugamba ngu, Hana akalengaho kuhoora enzigu hali Penina omu mulingo gwona. Oihireho akagambira Yahwe omulingo akaba nayehurramu kandi yamwesiga ngu naija kuterekereza ensonga. Entekereza ya Penina hali Hana ekahinduka? Baibuli terukukyoleka. Baitu tukimanyire ngu Hana akongera yatunga obusinge kandi yakaira abwine. “Amaisoge gatabe gobujune obundi.”​—1 Sam. 1:10, 18.

14. Kiki ekiturukwegera omu kyokurorraho kya Hana?

 ¹⁴ Kiki ekitusobora kwega omu kyokurorraho kya Hana? Omuntu kakuba alengaho kukwoleka ngu nakukira, ijuka ngu oine eky’osobora kukora kumaraho ekizibu eki. Tikirukukwetaagisa kumwoleka ngu naiwe n’omukira. Omu kiikaro eky’okuhoora enzigu, lengaho kugarraho obusinge n’omuntu ogu. (Bar. 12:17-21) Omuntu ogu nobwarukaba atahindukire, noija kwikara oteekaine kandi oine okusemererwa.

15. Apolo na Paulo bakaba nibasisana omu mulingo ki?

¹⁵ Ekyokumalirra, tekerezaaho ekitusobora kwegera ha kyokurorraho ky’omwegeswa arukwetwa Apolo hamu n’omukwenda Paulo. Abasaija banu babiri bakaba bamanyire kurungi Ebyahandiikirwe. Boona bakaba bamanyirwe kandi bali beegesa barungi. Kandi boona bakaba bakonyire abantu baingi kufooka abegeswa. Baitu bakaba batainiirengana ihali.

16. Apolo akaba ali muntu wa mulingo ki?

¹⁶ Apolo akaba ali “Omunyalegezanderiya,” ekiikaro ekikaba kimanyirwe muno omu by’okwegesa omu kyasa eky’okubanza. Akaba amanyire kuha kurungi embazo, kandi ali “wamani omu Byahandikirwe.” (Eng. 18:24) Apolo obuyamazire obwire omu Kolinso, abamu omu kitebe bakakyolekera kimu ngu nibamugonza muno kukira ab’oruganda abandi otwaliiremu n’omukwenda Paulo. (1 Kol. 1:12, 13) Apolo akakurakuraniza entekereza egi ey’okwebaganizaamu? Atakirengo nakake. Hanyuma y’obwire, Apolo akaruga Kolinso baitu Paulo akamwekambisa kugarukayo. (1 Kol. 16:12) Paulo tiyakumugambiire kukora eki kakuba Apolo akaba nabaganizaamu ekitebe. Kinu nikyolekera kimu ngu, Apolo akakozesa kurungi ebisembo bye kutebeza amakuru amarungi hamu n’okugarramu ab’oruganda amaani. Kandi nitukigumya ngu Apolo n’asobora  kuba akaba ali musaija mwebundaazi. Ekyokurorraho, Baibuli terukwoleka ngu akabiihirwa Akuro na Pirisikira obubamutwaire “bamusoborra [kurungi] omuhanda gwa Ruhanga.”​—Eng. 18:24-28.

17. Paulo akakurakuraniza ata obusinge?

¹⁷ Omukwenda Paulo akaba amanyire omulimo omurungi Apolo ogw’akaba akozere. Baitu Paulo ateralikirre ngu abantu baakutekeriize ngu Apolo namukira. Obutusomaho Paulo ebiyahandikiire Abakolinso, nitukirorra kimu ngu akaba ali mwebundaazi kandi n’ayetegereza. Kitamusemeze abantu obubagambire ngu: “Nyowe ndi wa Paulo.” Oihireho ekitiinisa akakigarurra Yahwe Ruhanga hamu na Yesu Kristo.​—1 Kol. 3:3-6.

18. Kusigikirra ha 1 Abakolinso 4:6, 7, kiki ekiturukwegera ha kyokurorraho kya Apolo na Paulo?

¹⁸ Kiki ekitusobora kwegera ha kyokurorraho kya Apolo n’omukwenda Paulo? Nitusobora kwekamba muno omu kuheereza Yahwe, kandi tukakonyera baingi kukurakurana bakahika ha kubatizibwa. Baitu twijuke ngu eki nikisoboka habwokuba Yahwe n’atukonyera. Ekindi nitwega ngu obutuba twine obujunanizibwa bwingi omu kitebe, nitusobora kukora kikooto kuletaho obusinge omu kitebe. Tusiima muno ab’oruganda abaine obujunanizibwa omu kitebe obubatukonyera kwikara tuli hamu omu bumu kandi twine obusinge. Kinu bakikora, obuhabuzi bwona obu batuha obububa niburuga omu Baibuli. Kandi obubatalengaho kwetwara kuba b’omugaso muno baitu bakakonyera boona omu kitebe kworobera Yesu n’okuhondera ekyokurorraho kye!​—Soma 1 Abakolinso 4:6, 7.

19. Kiki buli omu hali itwe eky’asobora kukora? (Rora akasanduuko “ Werinde Kwoleka Ngu Nokira Abandi.”)

¹⁹ Buli omu hali itwe aine ekisembo rundi obusobozi obw’embaganiza Ruhanga obuyamuhaire. Nitusobora kukozesa ekisembo eki ‘kuheerezangana.’ (1 Pet. 4:10) Nitusobora kuteketereza ngu ebiturukukora tibiri by’omugaso. Baitu ijuka ngu ebintu ebitaito ebyokora kukurakuraniza obumu nibisisana n’ehuuzi eziteraniza hamu orugoye. Leka twekambe muno kweyihamu omutima ogw’okugonza kwoleka ngu nitukira abandi. Katucweremu kimu kukora kyona ekirukusoboka kukurakuraniza obusinge hamu n’obumu omu kitebe.​—Bef. 4:3.