1. Cossa che sucede quando una persona la vol esser meio che i altri?

LE PERSONE che le vol esser meio che i altri sol le pensa in lore stesse. Par esémpio, un paron el pol far robe sbaliade par guadagnar de pi che i altri. O una persona che la fà sport la pol farghe mal a qualchedun sol par vinser el giugo. O fursi una persona la pol imbroiar nte una prova par ndar studiar nela università che la vol. Noantri semo sicuri che queste robe le ze tanto sbaliade. (Gàl. 5:19-21) Ma ghemo de star atenti parché, sensa nicorderse, podemo voler esser meio che i altri nela congregassion. Se femo questo, podemo intrigar la union intrà i fradei.

2. Cossa che ndaremo veder in questo stùdio?

² Questo stùdio el ndarà giutarne a pensar parché che servimo a Geovà. Anca vederemo due robe che le pol farne voler esser meio che i altri. Dopo, ndaremo anca veder esempi de òmini e done del passà che no i ga volesto esser meio che i altri.

3. Che domande ghemo de farse?

³ L’è sempre importante pensar parché che servimo a Geovà. Par esémpio, podemo farse queste domande: ‘Parché che mi seito vardar quel che i altri i fà? L’è par sentirme  meio che lori? Fao le robe nela congregassion par sentirme meio che i altri o parché mi vui contentar a Geovà?’ Parché che l’è importante farse queste domande? Ndemo veder cossa la Bìblia la dise.

4. De acordo con Gàlati 6:3, 4, parché che no ghemo de vardar i altri par veder se femo de pi o de manco che lori?

⁴ La Bìblia la dise che no ghemo de vardar quel che i altri i fà par veder se semo drio far de pi o de manco che lori. (Ledi Gàlati 6:3, 4. *) Parché? Parché, se pensemo che semo drio far de pi, podemo deventar orgoliosi, e se pensemo che semo drio far manco che lori, podemo restar desanimadi. Se pensemo cossita, no mostremo sabedoria. (Rom. 12:3) Katerina, * una sorela dela Grèssia, la ga dito: “Mi me sentia sensa valor parché sempre pensea che le altre sorele le era pi bele, pi brave nela predicassion e le savea far amighi meio che mi.” Ghemo de ricordarse che Geovà el ne ga scoliesto parché lo amemo e parché ghemo scoltà el so Fiol, e nò parché semo bei, parlemo ben o cognossemo tante persone. — Gioani 6:44; 1 Cor. 1:26-31.

5. Cossa che imparemo de quel che ga sucedesto col fradel Hyun?

⁵ Noantri podemo anca domandarse: ‘I fradei i me vede come una persona che la vol viver in pace con tuti o una persona che no la ze mai intesa coi altri?’ Varda quel che ga sucedesto col fradel Hyun, che l’è de star nela Corea del Sud. Anca che el fusse un ansiano, lu el pensea che i altri fradei i volea esser meio che lu. Lu el ga dito: “Mi seitea a parlar robe rugne sora lori, e quasi sempre no ero de acordo con quel che i disea.” Hyun anca el conta cossa che ga sucedesto: “Quel che mi fea l’era drio intrigar la pace dela congregassion.” Arquanti fradei i ze stati boni de giutarlo a veder quel che el gavea de cambiar. Alora, lu l’è stà bon de far i cambiamenti che ghe ocorea, e ancoi, l’è un bravo ansiano. Cossa che imparemo? Se vedemo che, invesse de voler viver in pace con tuti, volemo esser meio che i altri, ghemo de cambiar presto quel che ne ocore.

6. De acordo con Gàlati 5:26, che due robe le pol farne voler esser meio che i altri?

⁶ Ledi Gàlati 5:26. * Che due robe le pol farne voler esser meio che i altri? Una dele robe la ze pensar sol in noantri stessi. La persona che la fà questo la ze orgoliosa. E quel’altra roba che pol farne voler esser meio che i altri la ze la invìdia. La persona che la ze invidiosa la vol gaver quel che i altri i ga, ma anca la vol che i perda quel che i ga. La persona che la ga invìdia de qualchedun la ga anca òdio par lu. Ghemo de star atenti par mai pensar sol in noantri stessi e mai esser invidiosi.

7. Che esémpio el ne giuta a capir quel che ndarà suceder se pensemo sol in noantri stessi o se semo invidiosi?

⁷ Metemo dir che rento el òio de un avion ghen’è sporchìssie. Alora, fursi el sarà bon de zolar, ma se queste sporchìssie le stropa le manghere, el avion el va perder forsa e un pochetin vanti de rivar in tera, el va cascar. Noantri podemo dir che queste sporchìssie  rento el òio le ze come la invìdia e pensar sol in noantri stessi. Parché? Parché fursi una persona la serve a Geovà a tanto tempo, ma se la pensa e la fà cossita, la va cascar. (Pro. 16:18) Come cossita? Questa persona la ndarà fermarse de servir a Geovà, la ndarà sofrir e la farà i altri sofrir. Alora, cossa che ghemo de far par no pensar sol in noantri stessi o esser invidiosi?

8. Cossa che ndarà giutarne a no pensar sol in noantri stessi?

⁸ El consìlio che Paolo el ga dato ai filipensi ne mostra cossa far par no pensar sol in noantri stessi. Paolo el ga dito: “No sté far gnente con competission e gnanca pensando sol in quel che l’è meio par valtri. Ma gavé de esser ùmili e pensar che i altri i ze pi importanti che valtri.” (Fil. 2:3) Se pensemo che i altri i ga de pi abilità che noantri, no ghemo de voler esser meio che lori. Pitosto, ghemo de restar contenti con quel che lori i fà. Restaremo ancora de pi contenti de veder che i ze drio doperar le so abilità par Geovà. Ma anca i fradei che i ga tante abilità i ga de ricordarse dele parole de Paolo e veder le bele qualità dei altri. Cossita, ghen sarà pace e union nela congregassion.

9. Cossa podemo far par no deventar invidiosi?

⁹ Quando ghemo ben in mente quel che semo boni e quel che no semo boni de far, no deventemo invidiosi. Se femo questo, no voleremo mostrar ai altri che semo meio o che ghemo de pi abilità che lori. Pitosto, ndaremo imparar con quei che i ga de pi abilità che noantri. Par esémpio, se te cognossi un fradel che el fà bei discorsi, domàndaghe come el se parecia par farli. O se te cognossi una sorela che la fà un bon magnar, domàndaghe come che la fà. O se te cognossi una persona che sempre la fà novi amighi, domàndaghe come che te pol far compagno. Cossita, no deventaremo orgoliosi e gavaremo altre abilità.

10. Che dificoltà Gideon el ga infrontà?

¹⁰ Pensa in quel che ga sucedesto con Gideon, dela tribo de Manassè, e i òmini dela  tribo de Efrain. Col aiuto de Geovà, Gideon e i so 300 òmini i ze stati boni de vinser una guera. Lori i podea deventar orgoliosi, ma no i ga fato questo. Ma, poco tempo dopo, i òmini de Efrain i ze ndati catarse con Gideon par dirghe su. Lori i ze restadi disgustadi parché Gideon no li gavea ciamà par ndar a quela guera. Lori i volea tanto che i altri i rispetesse la so tribo che i se ga desmentegà che la roba pi importante la era darghe onor a Geovà e proteger el so pòpolo. — Giuisi 8:1.

11. Cossa che Gideon el ga dito ai òmini de Efrain?

¹¹ Gideon l’è stà ùmile e el ga dito ai òmini dela tribo de Efrain che lori i gavea belche fato tanto de pi che lu. Lu el ga anca parlà come Geovà el gavea benedio la tribo de Efrain. Cossita, i òmini de Efrain i ze restadi pi tranquili. (Giuisi 8:2, 3) Gideon el ga bio de mostrar tanta umiltà par mantegner la pace e union intrà el pòpolo.

12. Cossa che imparemo de quel che ga sucedesto con Gideon e i òmini de Efrain?

¹² Cossa che imparemo de quel che ga sucedesto con Gideon e i òmini de Efrain? La roba pi importante la ze darghe onor a Geovà e nò a noantri. Se semo paroni de fameia o ansiani, imparemo una bela roba con Gideon. Se qualchedun l’è restà disgustà con noantri, ghemo de proar capir parché che l’è drio pensar de quela maniera. Podemo anca lodarlo par causa de quel che el ga belche fato de bon. Par far queste robe, ghemo de esser ùmili, de pi ancora se questa persona la ze sbaliada. Ghemo de ricordarse che viver in pace l’è pi importante che mostrar ai altri chi che l’è giusto e chi che l’è sbalià.

13. Cossa che Ana la ga infrontà, e come la ze stata bona de dàrghene fora con quela dificoltà?

¹³ Pensa anca nel esémpio de Ana. Ela la era maridada con un omo levita, che gavea nome Elcana, e lu la amea tanto. Ma lu anca el gavea nantra dona, de nome Penina. Penina la gavea fioi, ma Ana nò. Par quela, Penina la ghe disea su aposta par farla restar disgustada. Ana la ze restada tanto disgustada, la piandea tanto e gnanca no la magnea. (1 Sam. 1:2, 6, 7) Invesse de proar vingarse de Penina, Ana la ga pregà a Geovà e la se ga fidà che lu el ndaria giutarla. La Bìblia no la dise se Penina la se ga fermà de dirghe su, ma Ana la ze stata bona de tornar a esser contenta e a gaver pace. — 1 Sam. 1:10, 18.

14. Cossa che imparemo col esémpio de Ana?

¹⁴ Cossa che imparemo del esémpio de Ana? Se qualchedun el vol mostrar che l’è meio che ti, ricòrdate che no te ocore mia provarghe che te sì meio che lu. Invesse de tratarlo dela medèsima maniera che el te ga tratà, proa farghe qualcossa de bon. (Rom. 12:17-21) Cossita, te gavarè pace e te sarè  contento, anca che questa persona no la càmbie.

15. Cossa che Apolo e Paolo i fea compagno?

¹⁵ Varda quel che podemo imparar anca col esémpio del dissìpolo Apolo e del apòstolo Paolo. Tuti due i insegnea tanto ben, i savea tanto dele Scriture, e tante persone li cognossea. Tuti due i ga anca giutà tante persone a deventar dissìpoli. Ma Apolo e Paolo no i vedea un al altro come nemighi.

16. Come che l’era Apolo?

¹⁶ Apolo l’era de Alessandria, una cità che le persone le era tanto studiade. Lu l’era anca un bravo maestro e el savea tante robe sora le Scriture. (Ati 18:24) Quando Apolo l’è restà un tempo in Corinto, i fradei i parlea che i ghe volea pi ben a lu che ai altri fradei, come Paolo. (1 Cor. 1:12, 13) Ma l’è sicuro che Apolo no’l pensea come lori. Paolo el ga domandà che Apolo el tornesse a quel posto, una roba che mai el ndaria far se Apolo el pensesse come quei fradei. (1 Cor. 16:12) E quando Àchila e Prissila i ghe ga giutà a capir meio le Scriture, la Bìblia no la dise che Apolo l’è restà disgustà. (Ati 18:24-28) Semo sicuri che Apolo l’era un omo ùmile, che el doperea le so bele qualità par parlar dele bone notìssie e par incoraiar ai fradei.

17. Come savemo che Paolo el se sforsea par viver in pace con tuti?

¹⁷ El apòstolo Paolo el savea che Apolo el fea un bel laoro, ma no lo vedea come un nemigo. Paolo el gavea umiltà, sabedoria e el savea quel che l’era bon e quel che no l’era bon de far. Noantri savemo de questo par causa de quel che el ga fato quando arquanti fradei i disea: “Mi son de Paolo.” Lu el ga  dato bei consili a quele persone e no’l ga pensà che l’era meio che i altri. Invesse, sempre el ga dato el onor a Geovà e a Gesù. — 1 Cor. 3:3-6.

18. De acordo con 1 Corinti 4:6, 7, cossa che imparemo con Apolo e Paolo?

¹⁸ Cossa che imparemo del esémpio de Paolo e Apolo? Podemo far tanto nel laoro a Geovà e giutar tanti a batesarse. Ma savemo ben che l’è par causa dela benedission de Geovà che semo boni de far questo. El esémpio de lori anca el ne insegna che, quando ghemo tanti laori de far nela congregassion, noantri ghemo anca bele oportunità par mostrar che volemo viver in pace. Semo tanto grati de gaver ansiani e servi ministeriai che i ne giuta a viver in pace e union. Lori i fà questo quando i dopera la Bìblia par dar consili, quando no i vol esser pi importanti che i altri e quando i giuta i fradei a obedir a Gesù e a ndar drio al so esémpio. — Ledi 1 Corinti 4:6, 7. *

19. Cossa che tuti noantri ghemo de far? (Varda anca el quadro “ No sté voler esser meio che i altri”.)

¹⁹ Tuti noantri ghemo ricevesto abilità de Dio e ghemo de doperarle par servir ai altri. (1 Pie. 4:10) Ma fursi te pensi che no te fè tante robe. Se te pensi cossita, proa ricordarte che quel che te fè l’è come i punti che se fà par cosir una roba. Par causa de questi pìcoli punti, diverse parte de una roba le resta unide. Alora, sfòrsate tanto par no voler esser meio che i altri, e fà el meio che te pol par viver in pace coi fradei nela congregassion. — Efe. 4:3.