1. Amarida asay haratuppe aadhdhiyaaba milatanawu baaxetiyoogee eti waatanaadan oottana danddayii?

ALAMIYAN ha wodiyan, daro asay haratuppe aadhdhiyaaba milatanawu ubbatoo baaxetees, qassi eti oottiyoobay harata ay keena qohiyaakko qoppokkona. Leemisuwawu, issi zalaˈˈanchchay hara zalˈˈanchchatuppe keehi gooba gidanawu koyiyo gishshawu, harata qohiyaabaa oottennan waayi aggana. Issi atileetee ispporttiyan xoonanawu hara citaa kaassanchchaa eriiddi qohees. Issi tamaaree keehi erettida yuniversttiyaa gelanawu paaciyaa wuuqqees. Nuuni Kiristtaane gidiyo gishshawu, hegaa malabati bala gidiyoogaa eroos; qassi hegee ‘asatettaa ooso.’ (Gal. 5:19-21) SHin amarida ishanttinne michchontti eti haratuppe aadhdhiyaaba milatanawu maliyoogaanne haratikka hegaadan oottanaadan eti denttettiyoogaa akeekiyoonaa? Hegee keehi koshshiya oysha; ayssi giikko, annaacettiyoogee ishanttu giddon deˈiya issippetettaa moorana danddayees.

2. Nuuni ha huuphe yohuwan ay beˈanee?

² Nuuni nu ishanttuppe aadhdhiyaaba milatanawu koyanaadan oottiyaabata ha huuphe yohuwan beˈana. Haratuppe aadhdhiyaaba milatanawu baaxetibeenna, Geeshsha Maxaafan etabay odettido Yihoowa ashkkaratubaakka nuuni pilggana. Koyro, nuuni issibaa oottiyo gaasuwaa ane beˈoos.

3. Nuuni nuna ayba oyshata oychchana koshshii?

³ Nuuni issibaa oottiyo gaasuwaa issi issitoo qoriyoogee  loˈˈo. Hagaadan nuna oychchana danddayoos: ‘Taani ufayttiyoy hara urappe aadhdhiyaabadan qoppiyo wode xallaanee? Taani gubaaˈiyan minna oottiyoy haratuppe aadhdhanawu woy gooba gidanawu koyiyo gishshataassee? Woy qassi taani minna oottiyoy Yihoowa ufayssanawu koyiyo gishshataassee?’ Nuuni ha oyshata oychchana koshshiyoy aybissee? Xoossaa Qaalay yootiyoobaa akeeka.

4. Galaatiyaa 6:3, 4y yootiyoogaadan, nuuni nuna haratuura geeddarssana koshshennay aybissee?

⁴ Nuuni nuna haratuura geeddarssana koshshennaagaa Geeshsha Maxaafay yootees. (Galaatiyaa 6:3, 4 nabbaba.) Aybissi? Nuuni nu ishaappe aarobaa oottiyaabadan qoppikko, otorettana danddayiyo gishshataassa. SHin, nu ishantti nuuppe aarobaa oottiyaabadan nu qoppikko, hidootaa qanxxana danddayoos. He naaˈˈu ogetunkka qoppiyoogee likke gidenna. (Roo. 12:3) Giriiken deˈiya Katirino * giyo michchiyaa hagaadan gaasu: “Taappe loˈˈiyaageetuura, sabbakiyoogaaninne laggetiyoogan gooba gididaageetuura tana ubbatoo kase geeddarssays. Hegaappe denddidaagan, pattennabadan tawu siyettees.” Yihooway nuna baakko ehiidoy, nuuni puulanchcha gidiyo gishshataassa, haasayaa haasayiyoogan gooba gidiyo gishshataassa woy daro asay nuna dosiyo gishshataassa gidennan, A siiqanawunne A Naˈay yootiyoobaa siyanawu eeno giido gishshataassa gidiyoogaa hassayana bessees.—Yoh. 6:44; 1 Qor. 1:26-31.

5. Hayuna giyo ishaa hanotaappe ay tamaaray?

⁵ Nuuni nuna oychchana danddayiyo hara oyshay, ‘Ishantti tana sigettiya asadan xeelliyoonaayye woy haratuura darotoo maayettenna asadan xeelliyoonaa?’ yaagiyaagaa. Tohossa Kooriyan deˈiya Hayun giyo ishaa hanotaa qoppa. Gubaaˈiyan aawatettay deˈiyo amaridaageeti appe aadhdhiyaaba milatanawu baaxetiyaabadan I ubbatoo kase qoppees. I, “Taani hegaa mala ishantta borays, qassi eti yootiyoobaa darotoo maayettikke” yaagiis. Hegee ay kaalettidee? I, “Ta eeshshay gubaaˈiyan issippetettay deˈennaadan oottiis” yaagiis. Hayuna laggetuppe amaridaageeti I ba metuwaa akeekanaadan maaddidosona. Hayuni koshshiyaaban laamettido gishshawu, haˈˈi keehi loˈˈo cima gididi oottees. Nuuni sarotettan deˈiyaageeta gidennan, annaacettiyo eeshshay nunan deˈiyoogaa akeekikko, sohuwaara nu laamettana bessees.

6. Galaatiyaa 5:26y yootiyoogaadan, nuuni haratuppe aadhdhiyaaba milatanawu koyanaadan oottana danddayiya iita eeshshati awugeetee?

⁶ Galaatiyaa 5:26 nabbaba. Annaacettanaadan oottana danddayiya iita eeshshay aybee? Issoy hada ceeqettiyoogaa. Hada ceeqettiya asi otoretteesinne babaa xallaa qoppees. Hara iita eeshshay miqqaynniyoogaa. Miqqaynniya asi hara urawu deˈiyaabaa koyiyoogaa xalla gidennan, hara urawu deˈiyaabay xayanaadankka koyees. Yaatiyo gishshawu, hara ura miqqaynniya asi he izaawa ixxees. Nuuni he iita eeshshata nuuppe muleera xayssanawu koyiyoogee qoncce!

7. Otorettiyoogeenne miqqaynniyoogee iita gidiyoogaa qonccissiya leemisoy aybee?

⁷ Hada ceeqettiyoogaanne miqqaynniyoogaa keettaa mittaa miya ollattaara geeddarssana danddayoos. Keettay keehi loˈˈiyaagaa gidikkonne, ollattay miikko wurssettan I kunddees. Hegaadankka, issi uri Yihoowawu amarida wodiyawu haggaazana danddayees. Gidoppe attin, I otorettiyaagaanne miqqaynniyaagaa gidikko, kunddees. (Lee. 16:18) I Yihoowayyo haggaaziyoogaa aggees, qassi bananne harata qohees. SHin, nuuni otorettennaadaaninne  miqqaynnennaadan naagettanawu ay oottana danddayiyoo?

8. Hada ceeqettennaadan nuuni waani naagettana danddayiyoo?

⁸ Kiitettida PHawuloosi Piliphisiyuusa Kiristtaanetuyyo xaafido zoriyaa nuuni oosuwan peeshshiyoogan hada ceeqettennaadan naagettana danddayoos: “Inttena siiqiyoogan woikko ceeqettanau koyiyo hada amuwan issibaanne oottoppite; shin issoi issuwaappe gitatais yaagidi qoppennan, issoi issuwaayyo intte huuphiyaa kaushshite.” (Pili. 2:3) Nuuni harati nuuppe aadhdhiyaabadan xeellikko, eran nuuppe aadhdhiyaageetuura annaacettokko. Qassi nuuni etan ufayttoos. Eti Yihoowayyo haggaaziyoogan bantta eraa A sabbanawu goˈettikko, keehi ufayttoos. Eray deˈiyo nu ishanttinne michchontti PHawuloosa zoriyaa kaallikko, eti nu loˈˈo eeshshata akeekana. Hegaappe denddidaagan, nuuni ubbay gubaaˈiyan sarotettaynne issippetettay deˈanaadan maaddana.

9. Nuuni issi ishaa woy michchiyo miqqaynnennaadan waani naagettana danddayiyoo?

⁹ Nuuni loytti oottana danddayennabay deˈiyoogaa akeekikko, issi ishaa woy michchiyo miqqaynnennaadan naagettana danddayoos. Nuuni nuna ziqqi oottikko, hara urappe aadhdhiyoogaa bessanawu baaxetokko. Eran nuuppe aadhdhiyaageetuppe tamaaranawu baaxetoos. Leemisuwawu, gubaaˈiyan dere haasayaa loytti haasayiya ishaa qoppa. Nuuni I ba haasayaa waati giigettiyaakko A oychchana danddayoos. Issi michchiya qumaa kattiyoogan qara gidikko, qumaa kattiyoogan nuuni qara gidanawu maaddiya zoriyaa O oychchana danddayoos. Qassi issi yelaga Kiristtaanee haratuura laggetanawu metootikko, laggetiyoogan gooba gidida uraa zoriyaa oychchana danddayees. Nuuni hegaadan oottiyo wode, miqqaynnokko, qassi kaseegaappe aaruwan gooba gidoos.

10. Geedoona ayba metoy gakkidee?

¹⁰ Minaase yara gidida Geedoona giddooninne Efireema yara gidida asatu giddon merettidabaa qoppa. Geedooninne aara deˈiya 300 asati olan xoonanaadan Yihooway maaddido  gishshawu, eti otorettana danddayoosona shin. Efireema asay Geedoonaara gayttidoy A galatanaassa gidennan, aara ooyettanaassa. Xoossaa morkketa olanawu Geedooni eta koyroppe doommidi xeesibeenna gishshawu eti hanqqettidosona. Eta keehi qofissidabay asay eta yaraa bonchchana koshshiyoogaa. SHin Geedooni Yihoowa sunttaa bonchchissanawunne A asaa naaganawu oottido keehi koshshiyaabaa eti dogidosona.—Daan. 8:1.

11. Geedooni Efireema asawu woygidee?

¹¹ Geedooni bana ziqqi oottidi Efireema asawu hagaadan giis: “Taani oottidoogaappe intte oottidoogee aadhdhenneeyye?” Yaatidi, eti gitabaa oottanaadan Yihooway eta keehi maaddidoogaa hassayissiis. Asati hegaa siyido wode, “zarbbidosona.” (Daan. 8:2, 3) Xoossaa asaa giddon sarotettay deˈana mala giidi Geedooni bana ziqqi oottanawu eeno giis.

12. Efireema asaappenne Geedoonappe ay tamaarana danddayiyoo?

¹² Ha taarikiyaappe ay tamaarana danddayiyoo? Nuna bonchchissiyaabaa qoppiyoogaa aggidi Yihooway bonchchettanaadan oottiyaaba qoppana koshshiyoogaa Efireema asaa hanotaappe tamaaroos. Nuuni so asawu huuphenne gubaaˈe cima gidikko, Geedoonappekka tamaarana danddayoos. Nuuni oottidoban issi uri hanqqettikko, I aybissi hanqqettidaakko akeekanawu nu malana koshshees. Qassi I oottido loˈˈobawu A galatana danddayoos. Hegaadan oottanawu nuuni nuna ziqqi oottiyaageeta gidana koshshees, ubba qassi hara uri balaba oottiyo wode. SHin nuuni oottidobay likke gidiyoogaa qonccissiyoogaappe aaruwan nu ishanttuura sarotettan deˈiyoogee keehi koshshiyaaba.

13. Haanno gakkida metoy aybee, qassi A waatadee?

¹³ Haanni hanotaakka qoppa. A Leewa zare gidida Elqqaana gelaasu, I O keehi siiqees. SHin Elqqaanassi Piniino giyo hara machchiyaa deˈawusu. Elqqaani Piniinippe aaruwan Haanno siiqiyaaba gidikkonne, “Piniinissi naati de7oosona; shin Haannissi issi na7ikka baawa.” Hegaa gaasuwan, Piniina Haanno ‘hanqqetissanawu’ ubbatoo cayawusu. Haanniyyo aybi siyettidee? A keehi hanqqettaasu! ‘A yeekkaasunne qumaa meennan ixxaasu.’ (1 Sam. 1:2, 6, 7) SHin Haanna aybinkka Piniini bolli haluwaa kiyanawu malidoogaa Geeshsha Maxaafay yootenna. A bawu siyettiyaabaa Yihoowawu yootido gishshawu I bana maaddanaagaa ammanettaasu. Haanno xeelliyaagan Piniini eeshshay laamettidee? Geeshsha Maxaafay hegaabaa yootennaba gidikkonne, Haanna woppu gaada saruwan deˈidoogaa nuuni eroos. “Hegaappe simmin mulekka azzanabeikku.”—1 Sam. 1:10, 18.

14. Haannippe ay tamaarana danddayiyoo?

¹⁴ Haanni hanotaappe ay tamaarana danddayiyoo? Issi uri issi issiban nenaara annaacettanawu malikko, he hanotay laamettanaadan neeni oottana danddayiyoogaa hassaya. Neeni  annaacettana koshshenna. Iitabaa iitaban zaariyoogaappe, he uraara sigettanawu mala. (Roo. 12:17-21) I laamettana xayikkonne, neeni woppu gaananne ufayttana.

15. Aphiloosinne PHawuloosi issi mala gididoy aybinee?

¹⁵ Wurssettan, erissiyo ashkkaraa Aphiloosappenne kiitettida PHawuloosappe nuuni ay tamaarana danddayiyaakko qoppa. Eti naaˈˈaykka Geeshsha Maxaafaa loyttidi eroosona. Eti loytti erettiya asanne gooba asttamaare. Eti naaˈˈaykka daroti erissiyo ashkkara gidanaadan maaddidosona. SHin eti issoy issuwaa qanaatibookkona.

16. Aphiloosi ay mala asee?

¹⁶ Aphiloosi he wodiyan asay tamaaranawu biyo keehi erettida sohuwan ‘Iskkinddiriyan yelettiis.’ I haasayaa haasayiyoogan keehi goobanne ‘Geeshsha Maxaafaa daro eriya asa.’ (Oos. 18:24) Aphiloosi Qoronttoosan haggaaziyo wode, PHawuloosa gujjin hara ishanttuppe aaruwan, gubaaˈiyan deˈiya amarida ishantti Aphiloosa dosiyoogaa bessidosona. (1 Qor. 1:12, 13) He shaahotettay deˈanaadan oottiday Aphiloosee? I oottiis giidi nuuni mule qoppokko. Aphiloosi Qoronttoosappe bi simmin, guyye simmanaadan PHawuloosi A mintti woossiis. (1 Qor. 16:12) Aphiloosi gubaaˈiyaa shaakkiyaabadan PHawuloosi qoppiyaakko hegaadan mule woossenna. Aphiloosi mishiraachchuwaa yootiyoogaaninne ba ishantta minttiyoogan ba eraa loˈˈobawu goˈettidoogee qoncce. Qassi Aphiloosi bana ziqqi oottiya asa gidiyoogaa nuuni ammanettana danddayoos. Leemisuwawu, Aqiilinne PHirisqqila “Xoossaa ogiyaa kaseppe sittayidi, ayyo geeshshidi” yootido wode, I yiillotidoogaa Geeshsha Maxaafay yootenna.—Oos. 18:24-28.

17. PHawuloosi sarotettay deˈanaadan waati oottidee?

¹⁷ Aphiloosi oottido loˈˈo oosuwaa kiitettida PHawuloosi erees. Gidikkonne, PHawuloosi  Aphiloosi baappe aadhdhiyaabadan asay qoppana giidi hirggibeenna. PHawuloosi Qoronttoosan deˈiya Kiristtaanetuyyo xaafidobaa nuuni nabbabiyo wode, I bana ziqqi oottiya ashkke asa gidiyoogaa akeekana danddayoos. Asay “taani PHauloosaagaa” giyoogan I ufayttibeenna. Asay Xoossaa Yihoowanne Yesuus Kiristtoosa bonchchanaadan I yootiis.—1 Qor. 3:3-6.

18. Koyro Qoronttoosa 4:6, 7 maaran, Aphiloosappenne PHawuloosappe nuuni ay tamaariyoo?

¹⁸ Aphiloosappenne PHawuloosappe ay tamaarana danddayiyoo? Nuuni Yihoowayyo minnidi oottiyo gishshawu daroti xammaqettanaadan maaddana danddayoos. SHin nuuni hegaadan oottana danddayiyoy Yihooway nuna maaddiyo gishshataassa gidiyoogaa akeekoos. Gubaaˈiyan nuuyyo daro aawatettay deˈikko, gubaaˈiyan sarotettay deˈanaadan loytti maaddana danddayiyoogaakka Aphiloosanne PHawuloosa hanotaappe tamaaroos. Nuuni issippetettaaninne issoy issuwaara saruwan deˈanaadan cimatinne gubaaˈiyawu oottiyaageeti nuna maaddiyo wode keehi ufayttoos. Eti Geeshsha Maxaafaappe zoriyo wode hegaadan oottoosona. Eti haratuppe aadhdhanawu baaxetokkona, shin gubaaˈiyan deˈiya ubbay Yesuusawu azazettanaadaaninne A leemisuwaa kaallanaadan maaddoosona.—1 Qoronttoosa 4:6, 7 nabbaba.

19. Nuuni ubbay ay oottana danddayiyoo? (“ Annaacettanaadan Oottiyaabaappe Naagetta” giya saaxiniyaakka xeella.)

¹⁹ Xoossay immido eray nu ubbaassi deˈees. Nuuni ‘issoy issuwawu oottanawu’ nu eraa goˈettana danddayoos. (1 PHe. 4:10) Nu oottiyoobay keehi gitaba gidenna giidi qoppennan waayi aggana. SHin guutta gidida daro qunccuutee loˈˈiya maayuwaa sikkana danddayiyoogaa hassaya. Nuuni haratuppe aadhdhiyaaba milatanawu mule baaxetennaadan ubbatoo minni oottana koshshees. Qassi gubaaˈiyan sarotettaynne issippetettay deˈanaadan nuuyyo danddayettida ubbabaa oottana koshshees.—Efi. 4:3.