1. Ano an mahimo magin epekto ha mga tawo han espiritu han pakigkompetensya?

DAMU yana nga mga tawo an naniniguro nga pirme magin mas maopay kay ha iba, ngan waray hira labot bisan kon may masakitan hira. Pananglitan, an usa nga negosyante bangin magbuhat hin mga butang nga makakaraot ha iba basi la malabwan niya an iba nga mga negosyante. An usa nga atleta nga nag-uuyag bangin tinuyo nga magbuhat hin maraot ha usa nga atleta ha iya kakontra nga team basi la magdaog. An usa nga estudyante nga karuyag makaeskwela ha kilala nga unibersidad bangin magkodigo ha mga entrance exam basi la hiya makapasar. Sugad nga mga Kristiano, maaram kita nga sayop ito nga mga buhat; kaapi ito han “mga buhat han unod.” (Gal. 5:19-21) Pero posible ba nga an pipira nga mga surugoon ni Jehova mahimo mag-aghat ha kongregasyon hin espiritu han pakigkompetensya ngan diri nira nasasantop ito? Importante ito nga pakiana kay an espiritu han pakigkompetensya mahimo makaapekto han aton pagkaurosa.

2. Ano an hihisgotan naton hini nga artikulo?

² Hini nga artikulo, hihisgotan naton an maraot nga mga kalidad nga makakaaghat ha aton nga makigkompetensya ha aton kabugtoan. Hihisgotan liwat naton an mga ehemplo han matinumanon nga mga surugoon ni Jehova ha panahon han Biblia nga waray magpadara ha espiritu han pakigkompetensya. Hisgotan anay naton kon paonan-o naton uusisahon an aton mga motibo.

3. Ano an angay naton igpakiana ha aton kalugaringon?

³ Ha panapanahon, maopay gud nga usisahon naton an aton  mga motibo. Mahimo ta pakianhan an aton kalugaringon: ‘Nag-oopay la ba an akon pagkita ha akon kalugaringon kon inaabat ko nga mas maopay ako kay ha iba? Maduruto ba ako ha kongregasyon tungod kay karuyag ko nga ako an magin pinakamaopay o magin mas maopay kay ha iba? O ginbubuhat ko ba ito kay karuyag ko ihatag kan Jehova an akon pinakamaopay?’ Kay ano nga dapat naton ito igpakiana? Tagda an ginsisiring han Pulong han Dios.

4. Kay ano nga diri dapat naton ikompara an aton kalugaringon ha iba, sugad han gin-uunabi ha Galacia 6:3, 4?

⁴ An Biblia nagsusugo ha aton nga diri naton ikompara ha iba an aton kalugaringon. (Basaha an Galacia 6:3, 4.) Kay ano? Kay kon huhunahunaon naton nga mas maopay kita kay ha aton bugto, mahimo kita magin mapahitas-on. Ha luyo nga bahin, kon huhunahunaon naton nga mas maopay an iba kay ha aton, posible nga manluya kita. Ito nga mga panhunahuna pariho diri maaramon. (Roma 12:3) An sister nga hi Katerina, * nga taga Greece, nagsiring: “Hadto, iginkukompara ko pirme an akon kalugaringon ha mga tawo nga baga hin mas mahusay kay ha akon, mas epektibo ha ministeryo, ngan mas madagmit magkaada kasangkayan. Tungod hito, inabat ko nga waray ako pulos.” Kinahanglan naton hinumdoman nga iginpahirani kita ni Jehova ha iya, diri tungod han aton maopay nga hitsura, pagin maopay magyakan, o pagin popular, pero tungod kay andam kita nga higugmaon hiya ngan mamati ha iya Anak.​—Juan 6:44; 1 Cor. 1:26-31.

5. Ano an imo nahibaroan tikang ha eksperyensya han brother nga hi Hyun?

⁵ Ini an usa pa nga mahimo naton ipakiana ha aton kalugaringon, ‘Kilala ba ako nga pirme nakikigmurayaw, o agsob ako nga may iginkakaaway?’ Tagda an eksperyensya han brother nga hi Hyun, nga taga-South Korea. May panahon hadto nga an iya pagkita ha kabugtoan nga may pribilehiyo karibal niya ha pag-alagad. Hiya nagsiring, “Nagin kritiko ako hini nga kabugtoan, ngan kaurogan na nga diri ako nauyon ha ira ginsisiring.” Ano an resulta? “Tungod hini nga akon paggawi nawara an pagkaurosa han kongregasyon,” siring niya. Ginbuligan hi Hyun han pipira niya nga kasangkayan nga masantop niya nga maraot ito nga iya ginhihinimo. Nagbag-o hi Hyun, ngan yana usa na hiya nga maopay gud nga tigurang. Kon makita naton nga may tendensya kita nga makigkompetensya imbes nga tipigan an kamurayawan, kinahanglan maghimo kita dayon hin mga pagbag-o.

6. Sumala ha Galacia 5:26, ano nga magraot nga kalidad an mahimo magpagios ha usa nga makigkompetensya?

⁶ Basaha an Galacia 5:26. Ano an magraot nga kalidad nga mahimo magpagios ha usa nga makigkompetensya? An usa amo an pagpaimportante ha kalugaringon. An tawo nga nagpapaimportante ha kalugaringon mapahitas-on ngan makikalugaringon. An usa pa nga maraot nga kalidad amo an kaawa. An usa nga aw-anon diri la kay naruruyag magkaada han mga butang nga may-ada an iba, kondi karuyag liwat niya nga mawara ito ha ira. Oo, an kaawa usa nga klase han kangalas. Karuyag gud naton likyan ito nga maraot nga mga kalidad pariho hin paglikay ha nakakatapon ngan makamaratay nga sakit!

7. Kay ano nga delikado an pagpaimportante ha kalugaringon ngan pagin aw-anon? Iilustrar.

⁷ An magraot nga kalidad nga pagpaimportante ha kalugaringon ngan kaawa maipapariho ha mga hugaw ha fuel nga ginagamit han usa nga eruplano. Makakalupad an eruplano, pero an mga hugaw mahimo makabara han mga tubo han fuel nga magigin hinungdan nga mamatay an makina antes pa makalanding an eruplano,  salit magka-crash ito. Sugad man, an usa nga tawo mahimo makag-alagad kan Jehova hin pipira ka panahon. Pero kon nagpapaimportante hiya ngan aw-anon, maghihikaraot hiya. (Prob. 16:18) Diri hiya magpapadayon ha pag-alagad kan Jehova, ngan madadaot niya an iya kalugaringon ngan an iba. Kondi paonan-o naton malilikyan an pagpaimportante ha kalugaringon ngan pagin aw-anon?

8. Paonan-o naton maaatohan an pagpaimportante ha kalugaringon?

⁸ Maaatohan naton an pagpaimportante ha kalugaringon pinaagi ha pag-aplikar han sagdon ni apostol Pablo ha mga taga-Filipos: “Ayaw pagbuhat hin bisan ano tungod ha hilig ha pakiglantugi o tungod ha pagpaimportante ha kalugaringon, lugod may pagkamapainubsanon nga iyo tagdon an iba nga labaw ha iyo.” (Fil. 2:3) Kon ginhuhunahuna naton nga labaw an iba kay ha aton, diri kita makikigkompetensya hadton mas talentado ngan mas maabilidad kay ha aton. Lugod, malilipay kita para ha ira. Ito gud an aton inaabat kon ginagamit nira an ira mga abilidad para ha pag-alagad kan Jehova ngan ha pagdayaw ha iya. Ngan kon susundon han aton maabilidad nga kabugtoan an sagdon ni Pablo, magpupokus hira ha aton mag-opay nga mga kalidad. Sugad nga resulta, makakabulig kita ngatanan nga matipigan an kamurayawan ngan pagkaurosa ha kongregasyon.

9. Paonan-o naton malilikyan nga maawa?

⁹ Malilikyan naton an pagin aw-anon pinaagi ha pagkultibar han pagin mapainubsanon, nga ginhuhunahuna nga may-ada kita mga limitasyon. Kon mapainubsanon kita, diri kita magios nga baga hin mas talentado kita o mas maabilidad kay ha iba. Lugod, maniningkamot kita nga mahibaro tikang hadton mas maabilidad kay ha aton. Pananglitan, kon an usa nga brother ha kongregasyon maopay magpahayag, mahimo naton hiya pakianhan kon paonan-o niya gin-aandaman an iya mga pahayag. Kon an usa nga sister marasa magluto, mahimo naton hiya aroan hin mga suhestyon basi magin maopay liwat kita magluto. Ngan kon an usa nga batan-on nga Kristiano nakukurian pagkaada kasangkayan, mahimo hiya mangaro hin sagdon ha usa nga masayon la magkaada kasangkayan. Kon bubuhaton naton ito, diri kita maaawa ngan mapapauswag naton an aton mga abilidad.

10. Ano nga problema an gin-atubang ni Gideon?

¹⁰ Tagda an nahitabo kan Gideon, nga tikang ha tribo ni Manases, ngan ha kalalakin-an tikang ha tribo ni Efraim. Ha bulig ni Jehova, hi Gideon ngan an 300 nga lalaki nagdaog ha usa nga girra, ngan mahimo unta nira ighambog ito nga ira kadaogan. An kalalakin-an ha tribo ni Efraim nakigkita kan Gideon, diri para kumendasyonan hiya, kondi basi makig-away ha iya. Nasina hira kay ha tinikangan pa la waray hira sidngi ni Gideon nga umupod ha pakig-away ha mga kaaway han Dios. Nagpokus hira ha pagprotektar han kadungganan han ira tribo, salit waray nira makita kon ano an mas importante. Ginbuhat ito ni Gideon basi pasidunggan an ngaran ni Jehova ngan proteksyonan an Iya katawohan.​—Huk. 8:1.

11. Ano an ginsiring ni Gideon ha kalalakin-an han Efraim?

¹¹ Hi Gideon mapainubsanon nga nagsiring ha kalalakin-an han Efraim: “Ano an akon nabuhat kon itanding ha iyo?” Katapos, ginpahinumdoman niya hira kon paonan-o ginbendisyonan hira ni Jehova. Salit “nagkalma” hira. (Huk. 8:2, 3) Andam magpaubos hi Gideon basi matipigan an kamurayawan ha katawohan han Dios.

12. Ano an aton nahibaroan tikang ha ehemplo han mga Efraimita ngan ni Gideon?

¹² Ano an aton mahibabaroan tikang hini nga panhitabo? Ha ehemplo han mga Efraimita, nahibaroan naton nga diri kita dapat magpokus gud ha pagprotektar han aton dungog, lugod magpokus kita ha pagpasidungog kan Jehova. Sugad nga mga ulo han pamilya ngan mga tigurang, may mahibabaroan kita nga leksyon kan Gideon. Kon may nasisina ha aton tungod han aton ginbuhat, kinahanglan mangalimbasog kita nga intindihon kon kay ano nga nasina ito nga tawo. Mahimo liwat naton hiya kumendasyonan han iya maopay nga ginbuhat. Kinahanglan gud naton magin mapainubsanon basi mabuhat ito, labi na kon klaro nga hiya mismo an sayop. Pero an kamurayawan mas importante gud kay han aton pride.

13. Ano nga problema an gin-atubang ni Hana, ngan paonan-o niya ito nalamposan?

¹³ Hunahunaa liwat an ehemplo ni Hana. Asawa hiya han Levita nga hi Elkana, nga nahigugma gud ha iya. Pero hi Elkana may usa pa nga asawa, hi Penina. Mas hinigugma ni Elkana hi Hana kay ha kan Penina. Pero hi “Penina may mga anak, kondi hi Hana waray anak.” Tungod hito, hi Hana ‘padayon nga gintinamay [ni Penina] basi pasakitan hiya.’ Ano an inabat ni Hana? Nasubo gud hiya! “Nagtinangis hiya ngan diri nakaon.” (1 Sam. 1:2, 6, 7) Pero waray mababasa ha Biblia nga hi Hana nangalimbasog pagbulos kan Penina. Lugod, iginsumat niya kan Jehova an ngatanan nga iya inaabat ngan sinarig nga bubuligan hiya. Nagbag-o ba an pagtratar ni Penina kan Hana? Waray ginsisiring an Biblia. Pero maaram kita nga hi Hana nagkaada utro  murayaw nga hunahuna ngan natipigan niya ito. “An iya nawong diri na masurub-on.”​—1 Sam. 1:10, 18.

14. Ano an aton mahibabaroan ha ehemplo ni Hana?

¹⁴ Ano an aton mahibabaroan tikang ha ehemplo ni Hana? Kon may nakikigkompetensya ha imo ha anoman nga paagi, hinumdumi nga kontrolado mo an sitwasyon. Diri mo kinahanglan tugotan an imo kalugaringon nga makigkompetensya. Imbes nga bumulos hin maraot ha maraot, pangalimbasog nga makigmurayaw hito nga tawo. (Roma 12:17-21) Bisan kon diri hiya nagbabag-o, matitipigan mo an imo murayaw nga hunahuna.

15. Ano an ginkakaparihoan nira Apolos ngan Pablo?

¹⁵ May mahibabaroan liwat kita tikang ha ehemplo han disipulo nga hi Apolos ngan ni apostol Pablo. Hira nga duha may hilarom gud nga kahibaro ha Kasuratan. Pariho hira kilala ngan mag-opay gud nga magturutdo, ngan damu an ira nabuligan nga magin mga disipulo. Pero waray nira hunahunaa nga magkaribal hira.

16. Ano nga klase hin tawo hi Apolos?

¹⁶ Hi Apolos “taga-Alejandria,” usa nga lugar nga sentro han edukasyon ha siyahan nga siglo. Maopay gud hiya nga mamumulong ngan “maaram gud han Kasuratan.” (Buh. 18:24) Han nakadto hi Apolos ha Corinto, iginpakita han iba ha kongregasyon nga mas karuyag nira hiya kay ha iba nga kabugtoan, upod na hi Pablo. (1 Cor. 1:12, 13) Ginsuportaran ba ni Apolos ito nga pagkabahin-bahin? Diri naton maiimadyin nga bubuhaton niya ito. Ngani, paglabay hin pipira ka panahon tikang han binaya hi Apolos ha Corinto, gin-aghat hiya ni Pablo nga bumalik ngadto. (1 Cor. 16:12) Diri gud unta ito bubuhaton ni Pablo kon ginhuhunahuna niya nga hi Apolos nagigin hinungdan han pagkabahin-bahin han kongregasyon. Klaro nga gin-gamit ni Apolos an iya mga abilidad ha maopay nga paagi ​—basi ipasamwak an maopay nga sumat ngan basi parig-unon an iya kabugtoan. Makakasiguro liwat kita nga mapainubsanon hi Apolos. Pananglitan, waray mababasa ha Biblia nga inabat hiya hin kahiubos han “iginsaysay ha iya [nira Aquila ngan Priscila] hin mas husto an dalan han Dios.”​—Buh. 18:24-28.

17. Ano an ginbuhat ni Pablo basi matipigan an kamurayawan?

¹⁷ Maaram hi apostol Pablo han mag-opay nga ginbuhat ni Apolos. Pero waray mabaraka hi Pablo nga hunahunaon han mga tawo nga mas maopay ha iya hi Apolos. Makikita ha sagdon ni Pablo ha kongregasyon ha Corinto nga mapainubsanon hiya, ginkikilala niya an iya mga limitasyon, ngan makatadunganon hiya. Imbes nga malipay ha mga nasiring “ako kan Pablo,” iginpakita niya nga hi Jehova nga Dios ngan hi Jesu-Kristo an angay kumarawat han kadayawan.​—1 Cor. 3:3-6.

18. Sumala ha 1 Corinto 4:6, 7, ano an aton mahibabaroan ha ehemplo nira Apolos ngan Pablo?

¹⁸ Ano an aton mahibabaroan ha ehemplo nira Apolos ngan Pablo? Bangin maduruto gud kita ha pag-alagad kan Jehova, ngan bangin damu na an aton nabuligan nga mag-uswag ngadto ha pagpabawtismo. Pero maaram kita nga bisan ano nga aton kalamposan, nagin posible ito tungod han bendisyon ni Jehova. Ha ehemplo nira Apolos ngan Pablo, may nahibaroan kita nga usa pa nga leksyon​—kon mas damu an aton responsabilidad ha kongregasyon, mas damu an aton oportunidad nga makabulig basi matipigan an kamurayawan ha kongregasyon. Mapasalamaton gud kita kon an pinili nga kalalakin-an nabulig nga matipigan an kamurayawan ngan pagkaurosa pinaagi ha paghatag hin sagdon nga iginbasar ha Pulong han Dios ngan ha pagpokus, diri ha ira kalugaringon, kondi ha aton susbaranan, hi Kristo Jesus!​—Basaha an 1 Corinto 4:6, 7.

19. Ano an mahimo buhaton han kada tagsa ha aton? (Kitaa liwat an kahon nga “ Likayi nga Mag-aghat hin Pakigkompetensya.”)

¹⁹ An tagsa ha aton may-ada talento o abilidad nga hatag han Dios. Mahimo naton ito gamiton ha “pagserbi ha usa kag usa.” (1 Ped. 4:10) Bangin abaton naton nga gutiay la an aton nahihimo. Pero an gutiay nga mga buhat nga nakakabulig basi matipigan an pagkaurosa maipapariho ha gudtiay nga mga tahi nga nagtutugkop han mga parte han usa nga bado. Hinaot mangalimbasog kita nga tanggalon an bisan ano nga sinyales nga nagkakaada na kita espiritu han pakigkompetensya. Magin determinado kita nga buhaton an aton bug-os nga makakaya basi matipigan an kamurayawan ngan pagkaurosa ha kongregasyon.​—Efe. 4:3.