1. Uḍighi ika kụ aZihova iyira ru/tomaạm ghan bọ bunhọn?

AZIHOVA o/wạ mọ torobọ iyaạr eḍighi eniin. Iphẹn phọ eganana ni esi olhẹm mọ odị, eḅaramaạm omhạr awe. Yira ogbaranhaạn ni. Esi iduọn phọ, aZihova iyira ru/tomaạm ghan bunhọn. Odị raaḅeghiọn ghan ekpom mọ anạ eḍighi bọ oye ibooghiạn anạ. (1 Sam. 16:7) Odị alegheri ni inyaạm mọ, ḍidugh, ḅilhẹ remitenhom mọ anạ. Odị ra/puru ghan idị epel nyinhạ loor. Ewạ mọ yira omhiịn aani ghan loor phọ ayira eten phọ epẹ aZihova ramiịn ghan bọ. Bịn yira morue omoọgh “iitughiạn dị ekasiạn,” ilọ aloor phọ ayira.—Rom. 12:3.

2. Uḍighi ika kụ i/nighẹ bọ otomaạm aloor ayira bunhọn?

² Okạr oghaạph, yira kotue ni omooghọm suọ reḍeenhaan abunhọn. Esi omaạm, yira otue ni omiịn emạ eḍeenhaan onyọ umor obobọ umarani dị raḍighi ni imạ epẹ erugh phọ. (Hib. 13:7) Yira kotue ni otuughạ iyaạr esi onyọ umor obobọ umarani, dị kilhoghonhaạn iyira ḍighaạgh orophomhi asighalhanyạ phọ ayira epẹ erugh phọ. (Fil. 3:17) Toroboiperolbọ, ogbaranhaạn odi ni esi otuughaạny emạ eḍeenhaan oye r’otomaạm aloor oye phọ onhọn oye. Odọ phọ otomaạm mọ ophọn phọ rakọm ghan eḍịm, oḅonyonhu ozuan, r’olhoghoma mọ oye phọ o/mhoọgh maạr oḍighinhom. Idiphọ yira otuughạ bọ epẹ omhạn, eegharạ iipikian ketue ni epuẹ siya phọ ayira r’Enhaạn. Esi iduọn phọ, r’ephomhoghiạn aZihova uromha iyira mọ: “Torobọ oye amaạr aaḅeghiọn ezọ phọ odị aphogh! Kụ kparipẹ r’osighẹ aIoor phọ odị omaaniọm onọn oye, odị asighẹ ghan ghụn oIoghi odị kụ amitenom ezue!”—Gal. 6:4.

3. Eeghe odọ oghị aghisigh anạ siẹn igey phọ kụ mengọ nyinhạ ibo?

³ AZihova rawạ dị nạ kabo esi oghị aghisigh phọ anạ. Esi omaạm, eḍighi maạr dị nạ maḍiiny muụm, olhoghi anạ aḅaạl li iduọn nạ mateẹny bọ ḍiigbu phọ aḍiphẹ phọ! Nạ kụ usopha ni oḍighi ipẹ phọ. Loor esi dị nạ apomoghiạn Enhaạn. Tuutughiạn  ilọ oomo oghị aghisigh phọ anạ k’amem mọ opọ phọ. Esi omaạm, aḍiḅeraạn phọ anạ aạl ghan r’otuughạ aBaibul phọ ke”bụgh ḍughụm? Iiḅereghị phọ anạ k”enhighẹ epu idị erọl ghan ḍughụm? (Ps. 141:2) Aḍighalhanyạ oghaaphạn awe epẹ erugh phọ r’osighẹ oḍighinhom araraạr itughemhiọm mọ ayira k”eroph epu idị erọl ghan? Eḍighi iyaạr dị nạ amhoọgh eghunotu, aZihova ko”lhoghonhaạn nyinhạ ḍighaạgh oḍighi ogey olom, anhịr, odẹ obobọ onhiin ḍughụm? Nạ katue ni amoọgh ibo r’ogbaanyạn esi ophoph oghị aghisigh phọ anạ ophọn phọ.

4. Yira kooḅeghiọn eeghe siẹn emhuoghaạph phọ ephẹn phọ?

⁴ Yira kotue ni ologhonhaạn ḍighaạgh bunhọn omhoọgh ibo esi oghị aghisigh phọ abidị. Yira kotue ni oḅilhẹ ologhonhaạn bidị ḍighaạgh oghel otomaạm ghan aloor abidị bunhọn. Siẹn emhuoghaạph phọ ephẹn phọ, yira komiịn idị aburudẹ r’aburunhiin kotue ologhonhaạn ḍighaạgh ibạm anmụny abidị, idị olom r’anhịr kotue ologhonhaạn ḍighaạgh siloor abidị, ḅilhẹ r’idị ikumor awe arookpomhoghan r’abunhọn kotue ologhonhaạn ḍighaạgh bumor r’abumarani phọ ayira. Kụ edị esughanham omhạn, yira kooḅeghiọn sinhị iilhogh aBaibul dị kilhoghonhaạn iyira ḍighaạgh ophighi asiigbu dị edaphạn inyaạm r’asidọl phọ ayira.

5. Odaphạn Efesọs 6:4, eeghe kụ edị aburudẹ r’aburunhiin kokel?

⁵ Aburudẹ r’aburunhiin ku/sighẹ ghan oniin obumoọny utomaạm onhọn obobọ ku/tom oḍighi iyaạr dị epel inyaạm abidị. Loor esi dị, rekọm ghan oḅonyonhu ozuan. (Bạl Efesọs 6:4.) Onyọ umarani dị oghol mọ Sachiko * aḅẹm mọ: “Otughemhiạ phọ amhị awạ ghan mọ mị uḍighi upu bueriphọ anmụny askul phọ. Ḅilhẹ kẹn, onhiin amhị awạ ghan mọ mị uḍighi agey epẹ otu askul phọ, pidị eḍighi ogbaanhaạn engọ butughemhiạ phọ amhị ḅilhẹ r’odẹ phọ amhị u/ḍighi aani bọ onyọ ogbaanhaạn aZihova. Okạr oghaạph, odị awạ ghan dị mị kapasị ghan bịn amạn oomo ezạm mọ, iphẹn phọ i/tue idugh. Kụ ghalhamọ r’iduọn mị mamhadạn bọ ni askul k’asiạ phọ, bịn eeni amem mị raatughiạn ghan ni mọ eeni arukumuan phọ amhị i/mạn maạr esi aZihova ghalhamọ mị uḍighi ni oomo ipẹ mị katue bọ.”

6. Aburudẹ r’aburunhiin kotuughạ eeghe siphẹ Psalm 131:1, 2?

⁶ Ephigh iyaạr ituughạ edianhaan ni burudẹ r’aburunhiin siphẹ Psalm 131:1, 2. (Bạl.) Uw-emhạ phọ Devid aḅẹm mọ odị “o/mhoọgh iyaạr oḍighinhom igbogh araraạr,” obobọ raraạr dị  ekparanhaạn nyodị. Osooromhi aloor ḅilhẹ r’ogbaanyạn phọ odị aḍighi ni idị odị ‘amhoọgh eephọ’ olhoghi. Eeghe kụ idị aburudẹ r’aburunhiin kotuughạ esi ikpo onhụ phọ aDevid? Aburudẹ r’aburunhiin kotue ni oḍeenhaan osooromhi aloor r’olhegheri okụ esi ipẹ bidị r’ibạm anmụny phọ abidị kotue bọ oḍighi. Bidị kotue ni okparamhị ibạm anmụny phọ abidị esi olhọgh ghan elhegh inyaạm ḅilhẹ r’asidugh phọ abidị mem dị bidị rologhonhaạn ḍighaạgh bidị ophighi asiigbu dị ekasiạn. Umarani dị oghol mọ Marina aḅẹm mọ: “Amem i/tọl dị onhiin amhị utomaạm ghan imhị bumor amhị obobọ bunhọn ibạm anmụny. Odị utughemhị imhị mọ torobọ oye amoọgh ni inmo ilọ odị ḅilhẹ mọ aZihova amaghamhị ni maạr torobọ onyọ ayira. Esi iduọn phọ, rekpạr ghan ni kụ mị asighẹ loor amhị atomaạm bunhọn.”

7-8. Ika kụ idị olom katue aḍeenhaan m’onọ akuenhi ni anhịr odị?

⁷ Ewạ mọ olom alhọgh ghan eghuan anhịr odị. (1 Pit. 3:7) Olhọgh eghuan oye eḅaramaạm omhaạr ophogh ḅilhẹ r’olhọgh eegu. Esi omaạm, olom kaḍeenhaan eghuan anhịr odị esi ozoọm ghan odị r’olhọgh eegu. Odị ka/puru ghan nyodị idị epel nyodị loor. Ḅilhẹ ka/tomaạm ghan nyodị bunhọn anmariịr. Anhịr raloghoma ghan ika mem dị olom odị atomaạm nyodị bunhọn? Olom umarani ayira dị oghol mo Rosa dị u/ḍighi onyọ Ogbaanhaạn, agbor ghan atomaạm nyodị bunhọn anmariịr. Iphẹn phọ iḍighi idị aRosa alhoghoma ghan m’onọ o/mhoọgh maạr oḍighinhom, ḅilhẹ mọ olom mọ odị o/phomhoghiạn nyodị. Odị aḅẹm mọ, “mị uwạ ghan dị kogbor ghan uutughianhạm imhị mọ aZihova usereghiạn ni imhị.” Dị egbạgh r’iphẹn phọ, olom dị aḍighi onyọ aKristẹn ralọgh ghan eghuan anhịr odị. Loor esi dị odị alegheri mọ iphẹn phọ ketir ri emạ eten siya phọ odị amhoọgh bọ r’anhịr phọ odị ḅilhẹ r’aZihova. *

⁸ Olom dị alhọgh eghuan anhịr odị rakaạph ghan imạ ilọ anhịr phọ kaḅenhị bunhọn, ḅilhẹ raḅenhị ghan ni anhịr phọ odị m’onọ apomoghiạn nyodị, k’aḅilhẹ asẹph nyodị. (Prov. 31:28) Ipẹ kụ idị Olom aKaterina, oghaạph bọ oghol siphẹ emhuoghaạph phọ eten bọ, alhoghonhaạn ḍighaạgh aKaterina okpạr opu olhoghoma ghan mọ odị o/mhoọgh maạr oḍighinhom. Mem dị aKaterina aghom, onhiin odị agbor ghan asighẹ nyodị atomaạm ghan righirị odị r’abunhọn anmanyaạn. Esi iduọn phọ, aKaterina amhiigh ni bịn otomaạm ghan aloor odị bunhọn—ghalhamọ r’amem mọ odị aḍigh bọ ni siẹn igey phọ! Toroboiperolbọ, olom mọ odị, aḍighi bọ ni onyọ Ogbaanhaạn, malhoghonhaạn nyodị ḍighaạgh okpạr opu eegharạ phọ ephẹn phọ kụ omhoọgh ephoghom dị eeleeny ilọ aloor odị. AKaterina aḅẹm mọ: “Olom amhị uphomhoghiạn imhị, rusẹph ghan imhị esi imạ araraạr dị mị aḍighi, kụ aḅilhẹ aaḅereghị r’amhị. Odị ragbor ghan kẹn kuutughianhạm imhị imạ araagharạ phọ aZihova olhoghonhaạn amhị ḍighaạgh oolemhi iitughiạn phọ amhị.”

9-10. Ika kụ idị ikumor awe phọ olhoghonhaạn ḍighaạgh oniin onyọ umarani okpạr opu eegharạ otomaạm ghan aloor odị bunhọn?

⁹ Ika kụ idị ikumor awe kotue ologhonhaạn ḍighaạgh we dị omhoọgh eegharạ otomaạm ghan aloor abidị bunhọn? Ooḅeghiọn eḍeenhaan umarani phọ Hanuni, dị u/gbor ghan usereghiạn mem dị aghom. Odị aḅẹm mọ: “Mị ughiil ghan umugholoor aḅilhẹ agbor ghan aatughiạn mọ abunhọn ibạm anmụny kụ unhighẹ upu imhị. K’amem mọ amuphẹ phọ kụ edị mị amhiigh otomaạm ghan aloor amhị bunhọn.” Ghalhamọ r’amem mọ odị aḍigh bọ siẹn igey phọ, aHanuni aghị ni ghisigh atomaạm ghan loor odị bunhọn. Iphẹn phọ ikọm idị odị alhoghoma m’onọ o/mhoọgh maạr oḍighinhom siẹn ookpomhoghan phọ. Kuolọ nyiidiphọ, odị rakumuan ni  roḅaạl olhoghi idiphọ okọy eten. Eeghe kụ ikọm bọ onmia phọ ophọn phọ?

¹⁰ AHanuni aḅẹm mọ ikumor awe phọ kụ ulhoghonhaạn nyinọ ḍighaạgh. Bidị uḅenhị nyodị mọ odị amạn ni maạr siphẹ ookpomhoghan phọ. AHanuni aḅẹm mọ: “Bidị urom ghan ni imhị eeni amem oghị okparamhị abunhọn abumarani dị omhoghi olhoghonhaạn aḍighaạgh. Iphẹn phọ ingọ ni imhị ibo. Mị ko/wulha ipẹ ikumor awe phọ usereghiạn ghan bọ imhị esi olhoghonhaạn aḍighaạgh phọ mị mangọ bọ iḍoọgh abumarani phọ. Bidị aalhanhaạn ni imhị 1 Tesalonikạ 1:2, 3. Ipẹ phọ itir ri ekpom amhị! Mị asereghiạn ni imạ abupoghom mọ abuẹn phọ, nyiidiphọ mị malhegheri mọ mị amạn ni maạr siẹn ookpomhoghan phọ.”

11. Ika kụ idị yira kotue ologhonhaạn ḍighaạgh buphẹ “oḅonyonhu bọ ozuan,” Isaiah 57:15 eghaạph bọ eghol?

¹¹ Bạl Isaiah 57:15. AZihova amoọgh ni ogbolhomaam abuphẹ “oḅonyonhu bọ ozuan.” Ikumor awe phọ ḅilhẹ r’oomo phọ ayira, kotue ni ologhonhaạn ḍighaạgh okparamhị abuuḅi abumor r’abumarani phọ abuẹn phọ. Eniin eten dị yira kotue oḍighi iduọn phọ pọ oḍeenhaan ghan abidị ogey ogbolhomaam. AZihova rawạ ghan mọ yira oḍeenhaan ghan iyool phọ odị mọ onọ apomhoghiạn ni bidị. (Prov. 19:17) Yira kotue kẹn ni ologhonhaạn ḍighaạgh bumor r’abumarani phọ esi oḍeenhaan ghan osooromhi aloor r’olhegheri okụ. Yira ro/wạ ghan oḍeenhaan idị yira omhạn obọ kekọm ghan bọ iipikian r’eḍịm. Kparipẹ ghụn, osighẹ emhaạr phọ r’olhegheri iyaạr phọ ayira okparamhiọm bunhọn.—1 Pit. 4:10, 11.

12. Uḍighi ika kụ buphẹ awe osighẹ bọ mọ u/mạn maạr owạ ghan bọ orọl r’aZizọs? (Miịn afoto oḅẹl opoḍi phọ.)

¹² Yira kotue ni otuughạ reten phọ ipẹ yira kozoọm ghan bọ bunhọn, esi okiririom ophogh eten phọ epẹ aZizọs azoọm ghan bọ bumatuạn phọ odị. Ghalhamọ r’iduọn odị kụ aḍighi bọ oye dị apelheghiom dị marọl ghan, odị aḍighi ni oye “oophọ ologhi r’osooromhi aloor.” (Mat. 11:28-30) Odị oo/tuma ghan ilọ ogbogh olhegheri iyaạr ḅilhẹ r’osụ olhoghi phọ odị. Odị asighẹ ghan aḍighinhom ikpo onhụ r’oghaạph omaaniọm dị adughanhaan buphẹ odị ratughemhị bọ onhaghanhạn. (Luk 10:21) Dị u/kịgh buḍiemhiom aruukụ iiḅereghị phọ ophoophe bọ loor, aZizọs r’amem r’amem o/ḍighi idị awe kologhoma mọ bidị u/mạn maạr ghisigh Enhaạn. (Jọn 6:37) Kparipẹ ghụn, oḍị aghuenhi ni buẹn awe osighẹ bọ mọ u/mạn maạr.

13. Ika kụ idị aZizọs aḍeenhaan ephomhoghiạn r’onmạ ighirigiir bumatuạn phọ odị?

¹³ Onmạ ighirigiir r’ephomhoghiạn phọ aZizọs, ikạr kụ eganana esi eten phọ epẹ odị azoọm ghan bọ bumatuạn phọ odị. Odị alhegheri ni mọ inyaạm mọ r’asidọl phọ abidị egbaranhaạn ni. Esi iduọn phọ, bidị ko/tue opạm iniịn phọ arukumuan phọ obobọ okumuan eniin phọ eten phọ. Toroboiperolbọ, odị asereghiạn ni ipẹ torobọ onyọ abidị arue ghan bọ aḍighi r’oomo ekpom. Iphẹn phọ igananani siphẹ aḍidogh ikpoki phọ aZizọs adogh bọ. Siphẹ oghaạph omaaniọm mọ opọ phọ, odẹ-otu phọ angọ rebenhẹ phọ iiḍighi dị edaphạn “inyaạm ilọ oye r’oye.” Oniin siphẹ iyạl arebenhẹ phọ akpạr bọ ḍighaạgh kụ amhoọgh suọ apu nyoriphọ. Kuolọ odẹ-otu phọ asephọm iyạl phọ abidị iniin phọ ikpo onhụ phọ eḅẹm bọ mọ: “Maḍighi. nạ ogey ebenẹ ni!”—Mat. 25:14-23.

14. Ika kụ idị yira kotue ozoọm aani ghan bunhọn idiphọ aZizọs?

¹⁴ AZizọs azoọm ghan bunhọn eten ephomhoghiạn ḅilhẹ r’eyoghoyoghọ. Odị alegheri ni mọ inyaạm mọ ḅilhẹ r’asidọl phọ ayira egbaranhaạn ni, kụ odị rasereghiạn ghan ni mem dị yira oḍighi ipẹ yira kotue bọ. Yira otuughaạny aani Zizọs. R’amem r’amem yira ko/wạ oḍighi iyaạr dị ebenhẹ aZihova kaloghoma umugholoor ḅilhẹ m’onọ o/mhạn maạr, loor idị odị u/tue uḍighi aani ipẹ abunhọn roḍighi bọ. Kparipẹ ghụn, yira owaaghị ghan reten osẹph ghan abumor r’abumarani phọ ayira esi inyaạm mọ bidị olhọgh bọ okumu aZihova.

15-16. Ika kụ idị oniin onyọ umarani amhooghọm suọ esi ophighi asiigbu dị odị katue ateẹny?

¹⁵ Mem dị yira omhoọgh siigbu siẹn arukumuan phọ yira r’ongọ bọ aZihova, yira komoọgh ni ekol ḅilhẹ r’oḅaạl olhoghi. Kuolọ, iyaạr dị emhạn maạr pọ, ophighi asiigbu dị edaphạn sidọl phọ ḅilhẹ r’inyaạm mọ ayira, ki/lọ abunhọn. Ogbon asiigbu dị inyaạm ayira i/si ketue ni ekọm mabi r’oḅonyonhu ozuan. (Luk 14:28) Ooḅeghiọn eḍeenhaan umarani dị aḍighi okọy eten, dị oghol mọ Midori.

¹⁶ Odẹ aMidori, o/ḍighi onyọ Ogbaanhaạn, kụ aafolhomhi ghan Midori esi osighẹ ghan odị otomaạm bumor odị r’abudị r’odị odi eniin ekụ. AMidori aḅẹm mọ, “mị ulhoghoma ghan mọ mị u/moọgh maạr oḍighinhom.” Kuolọ, iduọn odị ramanhạm bọ, bịn iitughiạn phọ ipẹ phọ emhiigh oowolhoghụ. Odị aḅẹm mọ, “mị rabạl ghan Baibul phọ torobọ aḍio loor esi dị ringọ ghan imhị eephọ olhoghi r’olhoghoma mọ aZihova uphomhoghiạn ni imhị.” Oḅarạm isiẹn, odị apighi siigbu dị odị katue ateẹny, kụ aaḅereghị alhọm olhoghonhaạn aḍighaạgh oteẹny. Iphẹn phọ ilhoghonhaạn ḍighaạgh Midori omhooghọm ibo esi araraạr phọ ipẹ odị katue bọ aḍighi angọ aZihova.

17. Ika kụ idị yira kotue okiọm ghisigh oḍighi ‘Ilhoghi phọ r’iitughiạn phọ’ ayira imhoom omadạn, kụ eeghe asuọ kụ edị yira komoọgh?

¹⁷ Resighẹ ghan ni mem onme iitughiạn r’olhoghoma dị u/nighẹ ilọ aloor oye phọ. Esi iduọn phọ, aZihova uromha iyira mọ: “Iloghi phọ anyina r’iitughiạn phọ anyina eḍighi imoom emadạn.” (Efẹ. 4:23, 24) Orue oḍighi iduọn phọ, ewạ dị yira kooḅereghị ghan, otuughạ Ekpo Onhụ phọ Enhaạn, ḅilhẹ ogbirima ghan ipẹ yira aạl bọ. Yira oghiọm ghisigh oḍighi ghan iphẹn phọ, kụ oḅilhẹ olhọm ghan olhoghonhaạn aḍighaạgh aZihova. Uwaloor iigbia phọ odị kulhoghonhaạn  ni iyira ḍighaạgh okpạr opu eegharạ otomaạm ghan aloor ayira bunhọn. AZihova kulhoghonhaạn kẹn iyira ḍighaạgh oogboronhom olhọgh elhegh kụ oruphuron osighẹ siphẹ ekpom mọ ayira torobọ eeteḅa eegharạ eḍịm r’ophoophe aloor.

18. Ika kụ idị ikpo onhụ phọ edi bọ 2 Chronicles 6:29, 30 ketue iidereghị iyira?

¹⁸ Bạl 2 Chronicles 6:29, 30. AZihova alegheri ni ekpom mọ ayira. Odị alegheri kẹn inyaạm mọ yira rolọgh ghan bọ eenhan—inyuughiom aḅirinhi phọ ḅilhẹ re/munughan phọ ayira. Mem dị aZihova amhiịn ikuph phọ yira olhọgh bọ eenhan ikarạph inyuughiom, ephomhoghiạn phọ odị amhoọgh bọ aru esi ayira rebụgh ghan bịn.

19. AZihova atomaạm eeghe ogbolhomaam mọ odị esi ayira?

¹⁹ AZihova asighẹ ogọ ephomhoghiạn phọ edi ghan bọ igbo onhiin r’bumoọny kụ atomaạm ephomhoghiạn phọ r’ogbolhomaam mọ odị esi ayira. (Isa. 49:15) Ooḅeghiọn eḍeenhaan onhiin dị oghol mọ Rachel. Odị aḅẹm mo: “Arunwanyụ phọ ke”mhunhughan kụ mị amhạr bọ Stephanie. Kụ eḅẹl amem mọ mị amhiịn bọ nyodị, odị aghom agey kụ inyaạm o/mhoọgh. Toroboiperolbọ, abuọ arookonhom mọ umheera ni mọ mị ukị ghan torobọ aḍio uḅọgh nyodị siphẹ amasịn phọ olhọgh bọ nyodị. Asimem mọ ipẹ phọ ikparamhị ogọ asiya phọ amhị r’odị. Odị mamhạn odiiny asiạ nyiidiphọ, kuolọ odị akom ni apu iigbo odị. Mị apomoghiạn nyodị agey loor esi dị odị akpạr ri orọl r’ighuḍum, odị rungọ ghan ni imhị ibo!” P’eeghe idị eḍighi iyaạr iidereghị olhegheri mọ aZihova uphomhoghiạn ni iyira mem dị odị amhiịn dị yira rokparaghạ oḍighi oomo ipẹ yira kotue bọ okumu odị r’oomo ekpom!

20. Idiphọ arebenhẹ aZihova dị moḅọgh loor ongọ, eeghe ariphigh kụ edị yira omhoọgh otuạn obo?

²⁰ Idiphọ ebenhẹ aZihova, nạ amạn ni maạr siẹn egbogh eghunotu phọ aZihova. Odị nyinhạ o/ḍur olhoghomạ loor idị nạ anhighẹ apu bunhọn. Kuolọ odị amhiịn mọ nạ asooromhi loor aḅilhẹ aḍighi oye dị kameera mọ odị atughemhị aḅilhẹ aḅọl. (Ps. 25:9) Kuphom ni owol mọ odị rasereghiạn ghan ni mem dị nạ aḍighi ipẹ nạ katue bọ aḍighi. Okparạm mọ r’adọl oḅạr phọ anạ edeenhaan mọ nạ amoọgh ‘ophooph ologhi.’ (Luk 8:15) Esi iduọn phọ, kiọm ghisigh angọ ghan aZihova oomo ipẹ nạ katue bọ. Bịn nạ kamoọgh ni riphigh otuạn obo ‘esi aloor phọ [anạ] bịn.’