1. Hano cowa ko papalalinien ni Yihofa kita to tao?

 COWA kaolah ci Yihofa malecad maemin, mikitini misangaˈan Ningra makapahay a maamaan mahapinang. O misangaˈan Ningra a tamdaw cowa kalecalecad, kahacecay tamdaw mikiriwiˈay maemin, mihaenay cowa ko papalalinien ni Yihofa kita to tao. O kemoday a falocoˈ ita ko minengnengan Ningra, o soˈliˈlinay a waywayan ita. (1 Samuil 16:7) O maanan ko kangaˈayan ita, dangoc ato kalomahadan a lalengawan, mafanaˈay Cingra maemin. Cowa ko mamataˈlif ko saali Ningra kitaanan. Wa tano harateng ni Yihofa ko sapinengneng ita to niyah. Mihaen o ‘matatodong ko harateng’ ita, eca pisatakaraw minengneng to niyah, cowa ko mamisakahmaw minengneng to niyah.—Loma 12:3.

2. Palalinien ko niyah ato tao hano awaay ko epoc hani?

² Manaokaniw, wa ngaˈay kita misongilaˈ mihapinang to mafanaˈay mitosil pasifanaˈ a salikaka, pasayra cangranan minanam. (Hipray 13:7) Mihaen, o mamananam ita ko pina inaneng, paira to epoc no mitosilay a tayal no niyah. (Filipi 3:17) Kawra, minanam to ngaˈayay taˈarawan no tao o cecay demak, palalini to tao to niyah o roma a demak. Palalini to tao wa paira to sakaˈinap to tao alatek, o mamatoled ko falocoˈ, awaay ko kapo no niyah saan miharateng. Mikitini fafekangay lalakaw mananamay ita, malalifet to salikaka wa mipalak to kalalaˈed ita ci Yihofaan. Ciharatengay ci Yihofa kitaanan, mansa palimoˈot kitaanan: ‘O kahacecay tamdaw hapinangen ko demak no niyah. Mihaen, o kahemek ningra o pakayniay i demak no niyah, cowa ko pakayniay i palalini to tao.’ —Kalatiya 6:4.

3. Wa pakayni kiso i kacakat no niyah i maanan a demakan a mahemek hani?

 ³ Tokel ni Yihofa tisowanan pakayni ka cakat no niyah a mahemek. Ano malaˈosiayto ko patosokan iso micada to paputisem, tada o kalipahakan konini. Ono miso a misaˈosian konini, hanaca mihaen ko demak iso pakayniay kaolah iso to Kawas. Haratengen, mikitiya misatapang, iraay ko manan kacakatan iso? Tinakoen, matongalay to salakatay ko kaolah iso micekiw to Fangcalay Cudad han? Itini pitolon iso makahiay mihadak to nafalocoˈan a pasowal ci Yihofaan han? (ˈOlic 141:2) Ano mitosil kiso i matongalay ko kafanaˈ masasowal anca misakadademak to sapasifanaˈ a lalosidan han? Ano iraay ko paro no lomaˈ iso, itini pitadiˈec to sadama ni Yihofa tisowanan, malo ngaˈayay a faˈinay, fafahi anca wama wina han? Itini toniya pina demak ano macakatay kiso, tada kahemekanto.

4. Oniya lalakaw wa milengo to maanan?

⁴ Ngaˈayay padamaen ita ko roma tamdaw, ho ngaˈay pakayni kacakat no niyah a mahemek cangra, miliyas to palalini to tao. Oniya lalakaw wa milengo sasamaan ko wama wina padama to wawa, o mararamoday sasamaan masasidama, ato malohemay malitengay ato roma tamdaw samaan padama to salikaka. Saikor, wa milengo kita o maanan a safalod no Fangcalay Cudad ngaˈay padama kitaanan mitoor to ˈicel no niyah ato pakayraan, misaˈosi to matatodongay a patosokan.

5. Pakayni Ifiso 6:4, cowa ko ngangaˈay ko wama wina samaan ko demak?

⁵ Wa minaˈon ko wama wina, aka palalinien ko wawa no niyah ato wawa no tao, aka pakidem ko saali to wawa. Mihaen o papatoled to falocoˈ no wawa, ira ko ˈinteh no falocoˈ alatek. (ˈOsien ko Ifiso 6:4.) O cecay ci Since b fafahiyan salikaka sanay: “Tokel no singsi takowanan nanay mikikaka ko ngaˈay to tao. O wina ako mitokelay ngaˈay ko tingso ako, ano mihaen o singsi ato cowa pihakelong a wama wa ngaˈayto ko pinengneng to Misawacayay Tamdaw ni Yihofa. Soˈlinay i, tokel no wina 100 maemin ko tingso no misikingan ako, kawra caay pakadangar kako. Soˈlin halafinayto micodiyap kako, kawra latekay kamayanho maharateng ako, ano hakowato ko pisaˈicel ako cowa ko mamarenec ci Yihofa.”

6. O wama wina wa ngaˈay mikitini ˈOlic 131:1, 2 minanam to maanan?

⁶ O wama wina wa ngaˈay mikitini ˈOlic 131:1, 2. (ˈOsien.) Minanam to cecay kalimlaan a  kimad. Sowal no Hongti ci Tafiti ‘caay pisalataˈataˈang kako, caayto pidemak to cowa ka dangar a demak.’ Tada misapoeneray cingra, misamimingayho, mansa rihadayay ko falocoˈ ningra. O malo wamaay ato wina wa ngaˈay mikitini sowal ni Tafiti minanam to maanan hani? Ano misamimingay ko wama wina, cowa ko ˈaˈakawang ko pitokel to niyah, cowa ko papakidem ko saali to wawa. Ngaˈayay padamaen no wama wina ko wawa mihapinang to mamadangar ato caay ko mamadangar no niyah, patireng to matatodongay a patosokan, mihaen wa matongal ko pakasoˈlin no wawa to niyah. Cecay ci Marina fafahiyan salikaka sanay: “O wina ako cowa palalini takowanan to faˈinayan kaka, safa ato roma a wawa. Sowal ningra o kahacecay tamdaw cowa ka lecalecad ko inaneng, o kahacecay tamdaw sahtoay o kalimlaan ni Yihofa. Samanen mihaenay ko wina pasifanaˈ takowanan, mansa caay palalini kako to tao.”

7-8. O faˈinay sasamaan mikangodo to fafahi?

⁷ O malo faˈinayay a Krisciyang o kakangodoen ko fafahi. (1 Pitiro 3:7) O mikangodoay o caciharateng ato misaareteng minengneng. Mikangodo ko faˈinay to fafahi, o mamiharateng to kasenengan no fafahi, cowa ko papakidem ko saali cingranan, cowa ko papalalini to roma fafahiyan cingranan. O mahaenay palalini hano tatiih hani? O faˈinay no salikaka ci Rosa cowa ko Misawacayay Tamdaw ni Yihofa, marariday a palalini ci Rosaan to roma fafahiyan, milokesay ko sowal, midokaˈay ci Rosaan, matoleday ko falocoˈ. Sanay cingra: “Marariday kako cisasa ci Yihofaan soˈlinay misaareteng takowanan hokira, misaaliay to sapakalalok ato sahinom no tao.” O faˈinay a Krisciyang mikangodoay to fafahi, mafanaˈay cangra mihaen to demak wa patanektek to kalalaˈed to fafahi, ngaˈayho patanektek to kalalaˈed ci Yihofaan. c

⁸ Mikangodo ko faˈinay to fafahi, wa micerid pasowal to fafahi to tada maolahay cingranan, misaaretengay cingranan, mipakahemekho to fafahi i ˈayaw no tao. (Taneng 31:28) Masowalay i fafekang a lalakaw ci Katelina samanen mahaenay ko faˈinay padama cingranan, mansa ngaˈay miremo to misakahmaway to niyah a harateng. Kaemangho, miceriday ko wina midokaˈ to falocoˈ ningra, palalini cingranan to widang ningra ato roma fafahiyan. Mansa, miceriday ci Katelina palalini to tao to niyah, ikor mafanaˈ to kimad kamayanho mahaen. Kawra itini sadama no faˈinay, mafalicayto ci Katelina. Nohatini iraay ko matatodongay a pinengneng to niyah. Sanay cingra: “O faˈinay ako tada maolahay takowanan, miceriday patado takowanan mitolon. Ano ngaˈay ko demak ako, pakahemekay cingra takowanan. Pakalalokay cingra takowanan miharateng to makapahay a capeling ni Yihofa, padama takowanan misalof to masofaway a harateng.”

9-10. Samanay ko malohemay malitengay padama to cecay fafahiyan salikaka, caayto palalini cingra to tao?

⁹ Roma salikaka marariday palalini to tao, sasamaan ko malohemay malitengay padama cangranan hani? Nengnengen ita ko nalifetan ni Hanoni. Kaemangho cingra awaay ko pakahemekay cingranan, sanay cingra: “Halingodoay kako, ikakaay ko ngaˈay no tao takowanan saan miharateng. Mikikaemangho misatapang maolahay palalini to tao.” Ikor micada cingra to paputisem, mararidayho palalini to roma salikaka, awaay ko epoc no niyah i kasakopang saan miharateng. Kawra, o lipahakayto a misakafahay cingra nohatini, cowato kalecad to salakatay. O maanan ko mifalicay cingranan hani?

¹⁰ Sowal ni Hanoni, o kaciharateng no malohemay malitengay taˈangayay ko sadama  cingranan. Pakasoˈlinay ko malohemay malitengay cingranan, pakahemekayho cingranan, o ngaˈayay a taˈarawan saan ko sowal. Sanay cingra: “Kinapinaay, mitahidangay ko malohemay malitengay takowanan pakalalok to misaaliay to sadama a salikaka. Patoroday cangra toniya ˈinorong takowanan, o iraay ko epoc no niyah saan kako miharateng. Maharatengay ako miakoˈiday ko malohemay malitengay to pakalalok ako to kaemangay salikaka, dotoc miˈosiay to 1 Tisalonika 1:2, 3 patengil takowanan. Tada matemeray ko falocoˈ ako itiya! Oniya ngaˈayay pakaenay ciharatengay takowanan, padama takowanan mafanaˈ to iraay ko epoc ako i likakawa ni Yihofa, tada miakoˈiday kako cangranan.”

11. Sasamaan kita pakalalok to ‘mararomay ko faloco’ ato matoleday ko falocoˈ a tamdawˈ hani? (Isaya 57:15)

¹¹ ˈOsien ko Isaya 57:15. Tada ciharatengay ci Yihofa to ‘mararomay ko falocoˈ ato matoleday ko falocoˈ a tamdaw.’ Pakalalok to kaolahan a salikaka cowa ko ˈinorong aca no malohemay malitengay, kita o kahacecay tamdaw ngaˈay mihadak to ˈicel. Ngaˈay kita mikifalocoˈ ciharateng cangranan. Mitokelay ci Yihofa pakayni kitaanan, matinako noniya kalimlaan a siri ko olah Ningra. (Taneng 19:17) Roma i, misamiming kita, wa ngaˈay pakalalok to salikaka. Caay ka ciharateng kita samacayen no tao ko niyah, ho eca pikidat to sakaˈinap no tao. Ao, mamisaka dademak kita to sifanaˈ ato ˈicel pakalalok to tao.—1 Pitiro 4:10, 11.

12. O kalowa tamdaw hano masolot ni Yis hani? (Nengnengen ko potalay coka.)

¹² Nengnengen ita samanay ci Yis micada to nisawawaan, wa mananam to samaan micada to tamdaw. Ci Yis o kasapaan a tamdaw, kawra “o damsayay, o poeneray ko falocoˈ” cingra. (Matay 11:28-30) Tada citanengay ci Yis, adihayay ko sifanaˈ, kawra cowa ka pahiyo. O sowal ningra, ihkalay ko sapatinako, mitemeray to falocoˈ no kalowa tamdaw. (Luka 10:21) Cowa ka lecad ci Yis to misatakaraway a ˈaˈideman no pihakelongan. Caay ka pisakahmaw minengneng to tao, papiharateng cangranan to awaay ko epoc no niyah i pinengneng ni Yihofa. (Yohani 6:37) Tada mikangodoay ci Yis to kalowa tamdaw, pafeli cangranan to kasenengan.

13. Mikitini pakayraan ni Yis micada to nisawawaan, samaan mahapinang ita to sidaˈitay ciolahay cingra hani?

¹³ Mikitini pakayraan ni Yis micada to nisawawaan, ngaˈayay mahapinang to sidaˈitay ciolahay cingra. Mafanaˈay cingra cowa ka lecalecad ko ˈicel ato pakayraan no nisawawaan, mansa o mamadangar nangra a tayal ato minaroˈan cowa ka lecad. Kawra ano misarocod ko kahacecay tamdaw a midemak, masemeray cingra. Mikitini misowalan ni Yis linkim a sapatinako, wa ngaˈay mahapinang ita konini. O tawki i sapatinako ‘mitooray to ˈicel no kahacecay koli’ pafeli to tayal cangranan. Tatosaay a koli tada malalokay, adihayay ko maetanay payci. Soˈlin ikakaay ko maetanay no cecay, kawra malecaday ko sapakahemek no tawki cangranan. Sanay: ‘O ngaˈayay madimadiay a koli, tada ngaˈayay ko demak iso!’—Matay 25:14-23.

14. Wa ngaˈay kita samaan malecad ci Yisan a micada to salikaka?

¹⁴ Tada sidaˈitay ci Yis kitaanan, mafanaˈay cingra to cowa ka lecad ko ˈicel ato pakayraan ita. Ano misarocod kita a midemak, mahemekayto cingra. Mihaenay, o mamahaen ci Yisan ko picada ita to salikaka. O roma salikaka cowa ka lecad to tao adihay ko midemakan, aka pakesemen ita ko falocoˈ nangra, anca miharateng to awaay ko kapo no niyah. O kakilimen ita ko toki pakahemek to salikaka, somowal to masemeray kita to pisarocod nangra matayal saki Kawasan.

15-16. Cecay fafahiyan salikaka patirengay to matatodongay patosokan no niyah, samanay ko minaroˈan hani?

¹⁵ Itini midokoay a pakayraan ira ko ihkalay patosokan ita, wa ira ko araaw ato ciepoc ko  kaˈorip. Kawra haratengen, patireng kita to patosokan i haratengen ko ˈicel ato pakayraan no niyah, aka minengneng o maanan ko patosokan no tao o manan ko patirengen ita a patosokan, ano mihaen wa madolo masomad matoled ko falocoˈ. (Luka 14:28) Nengnengen ko tinakoan no cecay misakafahay ci Mitenli.

¹⁶ O wama ni Mitenli cowa ko Misawacayay Tamdaw ni Yihofa, kaemangho cingra i, marariday ko wama palalini cingranan to safasafa ato cafay micudad, pakangodoay cingranan. Sanay ci Mitenli: “Awaay ko kapo ako sanay miharateng.” Kawra lomahadto cingra iraayto ko pakasoˈlin to niyah, sanay: “Miasipay kako to Fangcalay Cudad to romiˈamiˈad, mihaen matinakoay ako ko olah ni Yihofa, rihadayay ko falocoˈ.” Roma i, patirengay cingra to matatodongay a patosokan no niyah, pakayniay sakalaˈosi noniya patosokan a mitolon to Kawas. Telocto, malaˈosi ningra koniya patosokan i, ngaˈayayto pakayni kacakat no niyah a mahemek.

17. (1) Samaan ko demak ita, wa ngaˈay padadotoc misafaeloh to pakayraan no niyah a miharateng? (2) Mihaen ko demak papaira to manan a ngaˈayay a minaroˈan hani?

¹⁷ O matoleday falocoˈ ato harateng cowa ka kahnay malahdaw alatek, mihaenay, palimoˈotay ci Yihofa kitaanan: ‘Ka padadotoc misafaeloh to pakayraan namo a miharateng.’ (Ifiso 4:23, 24) Sapidangaraw tonini, o mamitolon kita, micekiwho ato midotim to kimad no Kawas. Cangacangen ita ci Yihofa pafeli to ˈicel kitaanan, ho ngaˈay tahacelem kita. Ira ko sapadama no fangcalay saocor, wa mananam ita ecato palalini to tao. Ano misatakaraw kita, anca misatapang a maˈinap to tao, o papadama ci Yihofa kitaanan mihapinang to pasangaray no niyah, hanaca kaliki a mifalic.

18. Maharek miˈosi to 2 Rayray 6:29, 30 ikor, malifokay iso ko manan sahinom hani?

¹⁸ ˈOsien ko 2 Rayray 6:29, 30. Falocoˈ ita iraay ko manan a harateng, ihkalay mahapinang  ni Yihofa, mafanaˈayho Cingra to misaˈicelay malaˈodot kita to waywayan no hekal ato dangoc no niyah. Maˈaraw ni Yihofa ko pisaˈicel ita, matongalay ko olah kitanan.

19. Ci Yihofa tano manan a sapatinako mitadtad to kaolah Ningra kitanan hani?

¹⁹ Ci Yihofa tano olah no wina to wawa mitadtad to samanay Cingra micada kitaanan. (Isaya 49:15) O wina ci Rowiciw, sanay cingra: “O fafahiyan wawa ako ci Setifeni kalikiay hofocen a wawa. Sakinacecay maˈaraw cingra i, tada malonayay cingra, tada mimingay. Caho ka cecay folad cingra, itiniay cingra i sapafaedet a hako, kawra makahiay ko ising takowanan miˈafofo cingranan to romiˈamiˈad. Toniya dihkoay a tatokian patirengay to ngaˈayay kalalaˈed ako to wawa. Anini 6 ko miheca ningra, kawra palalinien to malecaday ko mihecaan a wawa mimingay. Ano maˈaraw ako cingra tada tanektekay, misaˈicelay maˈorip, matongal matongalay ko kaolah cingranan. Patongalan ningra ko adihayay a lipahak nokaˈorip ako.” Malecaday, maˈaraw ni Yihofa ko mihadakan ita a ˈicel, misarocod ko falocoˈ ato harateng midoko Cingranan, mikiriwiˈay maolah Cingra kitaanan. Mafanaˈ tonini, tada mahinomay kita!

20. Malo sikawdan ni Yihofa, iraay ko manan a lalangian iso lipahak?

²⁰ Itini taˈangayay a paro no lomaˈ ni Yihofa, cecay aca kiso cowa ka tatosa, tada kalimlaan. Misolotan ni Yihofa kiso tayra itihi Ningra, cowa ko pakayniay ikaka ko kangaˈay iso to tao, ao maˈaraway ko soˈliˈlinay a falocoˈ iso, mafanaˈay to o madaˈmaˈay a tamdaw kiso, makahi micada to pisalof Ningra. (ˈOlic 25:9) Misarocod kiso midoko Cingranan, o mamasemer Cingra tisowanan. Tanektek mihadidi a madimadi kiso, paihkalay konini to iraay ko cecay ‘makapahay ngaˈayay a falocoˈ’ iso. (Luka 8:15) Mihaenay i, padadotoc patafang to sangaˈayay no niyah ci Yihofaan. Mihaen, wa ngaˈayto kiso ‘pakayni i demak no niyah’ a lipahak.