1. Jewba trürümkelaiñmu, ¿chemu piabüimi tüba?

CHAU JEHOVÁ ayüquelai iñchiñ taiñ com femngeal. ¿Chumngelu quimiyiñ? Jehová deumafi caquerume culliñ, anümca ca caquerumechi che. Iñchiñ femngelaiñ caquelu che reque, feimu Jehová turpu trürümlayaiñmu caquelu che mu. Chau Dios cüme quimniei taiñ chumngen ta iñchiñ (1 Sam. 16:7). Ca quimniei chem taiñ femafel ca chem taiñ femnoafel. Ca quimniei chumngechi tremümngeiñ, feimu feipiquelaeiñmu taiñ femal taiñ pepilnoel. Duamnieiñ taiñ inayentuafiel Jehová chumngechi taiñ pequeteu iñchiñ. Femliyiñ, cüme raquiduam nieaiñ fei checahun-ngelayaiñ, huelu ca falinolu troquiulayaiñ (Rom. 12:3).

2. ¿Chemu kümelai trürümyawal?

² Iñchiñ inayentuafuiñ pu peñi, pu lamngen cüme amuldunguquelu, femngechi taiñ doi cüme amuldungual (Heb. 13:7; Filip. 3:17). Huelu cuñiutucuhuaiñ. Cümelai taiñ trürümuhual fei engün mu. Femliyiñ, ütrirngeafuiñ taiñ piuque mu, huesa duamafuiñ ca falinolu troquihuafuiñ. Huelu fei ca müten no. Ca eluhuafuiñ taiñ doicülelu troquingeal trahunche mu, femliyiñ hueniyehuelayafuiñ ta Jehová. Feimu Jehová feipieiñmu: “Caque quiñeque che ngüneduamuupe quisu tañi femün. Fei ayühuai quisu tañi dungu mu, trürümuulayai caquelu che engu” (Gál. 6:4, TNM).

3. Tami küdawabel Jewba, ¿chem dungu ayüwülkeimu?

³ Iñchiñ fillque dungu femqueiñ taiñ doi cüme poyeafiel Jehová, fei quisu ayüquei taiñ ayüucüleal. Raquiduamnge: eimi fente tami piuqueyefiel mu ta Jehová, fautizahuimi.  Fei ¿ayüucülenoafulu am eimi? Raquiduamnge tami fautizahun mu, ca tami chumün fantepu mu. ¿Doi falintufimi mai tami papeltufiel ti Biblia? Tami llellipun, ¿doi ponhuitu tami piuque mu tripai? (Sal. 141:2). ¿Doi cüme amuldunguchequeimi? ¿Doi cüme pepilfimi ti fillque quellu tami amuldungucheal? ¿Doi cüme fütangerpuimi cam doi cüme domongerpuimi? ¿Doi cüme chaungerpuimi cam doi cüme ñuquengerpuimi? Femngechi cümeque dungu femürpulmi, ayüucülenge.

4. ¿Chem ngütramkaaiñ tübachi kimelün mu?

⁴ Quiñeque taiñ pu peñi ca pu lamngen fillque dungu femquei ñi poyeafiel ta Jehová. Huelu trürümuuqueingün caquelu peñi ca lamngen engün, feimu huesa duamcületuingün. Fei iñchiñ quelluntucuafuiñ ñi trürümuunoal engün, fei ñi ayüucüleal. Tüfachi troquiñ mu peaiñ tüfa: pu chau ca pu ñuque, ¿chumngechi quelluntucuafui tañi familia ñi ayüucüleal tañi femqueel meu? Pu curehuen cai, ¿chumngechi huelucontu quelluhuafuingu? Ca peaiñ chumngechi pu loncolelu ca com iñchiñ quelluntucuhuafuiñ. Ca ngüneduamaiñ quiñeque ngülam mülelu Biblia mu, tüfa quelluaiñmu taiñ raquiduamal chem taiñ femürpuafel Jehová ñi troquiñche mu.

5. Efesios 6:4 tañi eipin, pu chaw ñuke engu ¿chumlaabüi engu?

⁵ Pu chau ngelai ñi trürümafiel tañi pichiqueche caquelu pichiqueche engün. Ca ngelai tañi feipiafiel ñi femal tañi pepilnoel engün. Femfule, huesa duamelafui tañi pu pichiqueche (papeltunge Efesios 6:4). Quiñe lamngen, Sachiko⁠ * pingelu feipi: “Colegio mu tañi pu quimeltufe ayüquefui iñche tañi doicüleal tañi pu compañ. Tañi ñuque ca ayüquefui tañi cüme amuleal colegio mu. Femngechi tañi pu quimeltufe ca tañi chau testigongenolu, cüme raquiduamafuingün Jehová tañi pu che mu. Tañi ñuque ca ayüquefui re cümeque nota ñi entual. Huelu iñche mu, tüfa rume cüdaungefui. Fentren dungu tañi feipingeel iñche petu pichicalu, müte cümelcaquelaeneu. Fei famülque mu, chumte cüdahuelfili rume ta Jehová, ayüucülenolu troquiquefiñ” pi taiñ lamngen.

6. Salmo 131:1, 2 tañi eipin, ¿chem kimelelkebi ti pu chaw ka ñuke?

⁶ Ti rey David feipi: “Ahuem Jehová, iñche mallmangelan tañi piuque mu ca checahun-ngelan tañi nge mu no rume,  ayüquelan ñi femürpual fütraque dungu ca pepilfalnochi dungu iñche mu. Huelu mai, iñche tüngcülen ca cüme duamcülen, quiñe moyohuenochi pichiche reque mülelu tañi ñuque engu, iñche ayüucülen quiñe moyohuenochi pichiche reque” (Salmo 131:1, 2). David ayüquelai ñi femürpual “fütraque dungu ca pepilfalnochi dungu”. David ñom piuquengefui, feimu tüngcülefui ca cüme duamcülefui. Pu chau, ¿chem quimürpuafui David ñi feipin mu? Tati pu chau ñom piuquengelu, quimnieingün chem dungu tañi pepilnoel. Feimu ca feipilayafingün tañi pu pichiqueche ñi femal tañi pepilnoel engün. Pu chau, ¿chumngechi quelluafui tañi pu pichiqueche ñi cüme duamcüleal? Raquiduamelafingün chem dungu tañi adümuucülen ca ñi adümuucülenon engün. Femngechi pu pichiqueche quimaingün chem tañi femürpuafel. Quiñe lamngen, Marina pingelu, feipi: “Tañi ñuque turpu trürümquelaeneu tañi pu lamngen mu cam caquelu pichiqueche mu. Ca quimeltueneu com iñchiñ caquerumei taiñ adümuhun, fei caque quiñeque iñchiñ Jehová falintucuqueiñmu. Tañi ñuque ñi duam mu, trürümuuquelan caquelu lamngen mu” pi taiñ lamngen.

7, 8. ¿Chumngechi ti büta balintukebi tañi kure?

⁷ Ti füta cristianongelu, falintuquefi tañi domo (1 Ped. 3:7, TNM). ¿Chumngechi pengelelfi tañi falintuquefiel? Itrocom dungu mu respetaquefi. Feipiquelafi ñi femal chem tañi pepilnoel ca trürümquelafi caquelu domo mu. Femngechi femfule ti füta, huesa duamelafui tañi domo. Peaiñ ñi rupan quiñe lamngen Rosa pingelu. Tañi füta testigongenolu trürümqueyu caquelu domo mu. Ñi femün mu tañi füta, Rosa huesa duamquei ca rumel raquiduamquei ñi piuqueyengequenon. Quisu feipi: “Duamnien fill antü tañi feipingeal tañi piuqueyeteu ta Jehová” pi taiñ lamngen. Huelu, tati pu füta poyequefilu Jehová, ¿femngechi femquepei mai? Femlai. Yamquefi tañi domo. Ti füta quimniei respetanofile tañi domo, cüme amulelayai tañi curehuen-ngen, fei hueniyehuelayafui ta Jehová.⁠ *

⁸ Ti füta falintuquefilu tañi domo, cüme nütramcaquei quisu meu. Ca feipiquefi tañi piuqueyeniefiel ca falintuquefiel (Prov. 31:28). Femngechi femi taiñ lamngen Katerina ñi füta. Fei rume quellufi ta Katerina ñi huesa duamcülenoal. ¿Chumngelu? Pichi domongelu Katerina, tañi ñuque rumel lladcütuquefeyu huelulcaulu. Ca trürümngequei cangelu pichique domo engu. Rupalu tüfachi dungu mu Katerina, trürümuuquei caquelu che mu. Deu fautizaulu cütu, petu femngechi raquiduam niequei. Huelu tañi füta quellueyu tañi cüme raquiduamcüleal ca ñi quisutu trürümuunoal. Katerina feipi: “Tañi füta piuqueyequeneu. Saquiqueneu tañi cüme femquen mu ca llellipuquei iñche mu. Feipiqueneu ñi cüme piuquengen ta Jehová. Ca quelluqueneu ñi famentuafiel huesaque raquiduam” pi taiñ lamngen.

9, 10. Kiñe domüche trawünche mu trürümyawki, beimu ¿chumngechi pu longkolelu newentubi engün?

⁹ Pu loncolelu, ¿chumngechi quelluafuingün pu peñi ca pu lamngen trürümuuquelu caquelu che mu? Peaiñ ñi rupan taiñ lamngen Hanuni pingelu. Pichi domongelu, “cümei tami femün” pingequelai. Quisu feipi: “Iñche yehuenchengequefun ca raquiduamquefun caquelu pichiqueche ñi doi adümuucülen iñche mu. Feimu pichicalu müten iñche, trürümuuquen caquelu che mu” pi taiñ lamngen. Fautizaulu rume, Hanuni petu trürümuuquefui caquelu  che mu, feimu müte falinolu troquiuquei trahunche mu. Huelu cacünui ñi raquiduam, fei feula quiñe ayüucülechi precursorangei. ¿Chem quellueyu?

¹⁰ Tati pu loncolelu piuqueyen mu quellufi ta Hanuni. Taiñ lamngen feipingei ñi rume falin-ngen ta trahunche mu ca ñi inayentufalngen ñi cüme femün meu. Hanuni feipi: “Quiñeque mu, tati pu loncolelu feipiqueneu tañi yafültucuafiel pu lamngen huesa duamcülelu. Yafültucufilu iñche pu lamngen, raquiduameleneu ñi rume falin-ngen trahunche mu. Quiñe rupa pu loncolelu saquieneu tañi yafültucufiel mu quiñeque üllchaque lamngen. Fei papeltuleleneu ñi feipin 1 Tesalonicenses capitulo 1, versiculo 2 ca 3. Tüfa müna ayühuleneu. Ti pu loncolelu ñi duam mu, fachantü cüme duamcületun ca falilu troquiuquen trahunche mu” pi taiñ lamngen.

11. Isaías 57:15 eipi kiñeke che “illamngekelu”, ¿chumabüiñ taiñ newentuabel?

¹¹ Biblia feipi: “Tüfa ñi feipiel tati Doicülelu, tati Alüpüralelu, tati rumel mongelequelu ca yamfalngelu tañi üi: ‘Alüpüralen mu ca tati yamfalngechi mülehue meu mülen ta iñche, huelu ca mülen tati pu trañmaduamcülelu ca tati pu cuñifallcülelu engün, tañi yafülduamelafiel tati pu cuñifallcülelu ca yafültucuñmayafiel ñi piuque tati pu trañmaduamcülelu’” (Isaías 57:15). Jehová duamtuniefi pu huesa duamcülelu. Com iñchiñ yafültucuafuiñ engün, pu loncolelu müten no. ¿Chumafuiñ? Pengelelafiyiñ taiñ duamtuniefiel engün. Jehová ayüquei taiñ pengelelafiel engün Jehová ñi piuqueyenieteu (Col. 3:12). ¿Ca chem chumafuiñ? Ñom piuquengeaiñ ca mallmaulayaiñ taiñ nien mu ta adümuhun. Checahun-ngelayaiñ femngechi taiñ ütrirnoaeteu taiñ pu peñi, pu lamngen. Huelu mai, nieliyiñ adümuhun, püneafiyiñ taiñ hueluquentu quelluhual (1 Ped. 4:10, 11).

12. ¿Chemu ti pu che inanyawkebingün Jesu? (Pebinge ti adentun mülelu ti unen pagina mu).

¹² Jesús quimün huentrungefui, huelu ñom piuquengei ca mallmaulai (Mat. 11:28-30). “Iñche rume quimün nien” piquelai, ca checauquelai rume. Enseñafiel mu ta che, tañi quimeltun ca tañi pengelün dungu rume adümfali. Com tañi quimeltuel ta Jesús, puuquei pu ñom che ñi piuque mu (Luc. 10:21). Jesús inayentulafi ñi huesa femün pu loncolechi religioso. Jesús raquiduamelquefi tati pu che fente tañi falintunieteu ta Jehová (Juan 6:37). Jesús yamquefi ti pu che. Iñchiñ inayentufiliyiñ Jesús, ca cüme duamelafuiñ ta caquelu che.

13. ¿Chumngechi Jesu pengeli piwkeyen ka büreneken tañi pu inaneketu?

¹³ Jesús pengelelfi tañi pu discipulo tañi piuqueyefiel engün. Quisu quimniefui caquerumei ñi mongen ca ñi adümuhun engün. Feimu com femngechi cüdau ta elungelayafuingün. Femfule rume, Jesús doi falintufi tañi cüdahual engün com piuque mu. Peaiñ quiñe pengelün dungu ñi entuel ta Jesús. Tüfa feipi ta quiñe huentru elufi cüdau ta quiñeque cüdaufe, “caque quiñeque chumngechi tañi adümuhun engün”. Epu cüdaufe cüme entuingu tañi cüdau, huelu quiñe doi plata huehui. Huelu ti huentru mür engu ta saquifi (Mat. 25:14-23). Tüfachi nütram mu, Jesús pengeli ñi falintufiel caque quiñeque tañi pu discipulo ñi cüdau.

14. ¿Chumngechi inayentobüiñ Jesu küme yeal kakelu che mu?

¹⁴ Jesús ca pengelquei taiñ piuqueyenieteu. Cüme quimniei caquerumei taiñ adümuhun ca taiñ rupamequen mongen meu. Feimu Jesús doi falintuquei caque quiñeque iñchiñ taiñ cüdauquen com piuque mu. Iñchiñ mülefui taiñ inayentuafiel ta Jesús. Quiñeque peñi ca lamngen, pepi cüdauquelaingün cangelu peñi cam lamngen reque. Huelu iñchiñ turpu  raquiduamel-layafiyiñ tañi falin-ngenon engün. Doi mai rumel saquiafiyiñ engün tañi cüdahuelquefiel ta Jehová com piuque mu.

15, 16. Kiñe domüche trawünche mu rakiduami chem küdaw ñochikechi dipoal, ¿chum duamnagi kidu?

¹⁵ Raquiduamliyiñ ca chem dungu femafuiñ taiñ doi cüdahuelafiel ta Jehová, fei eluuliyiñ taiñ huechunentuafiel, ayüucüleaiñ. Huelu mülei taiñ raquiduamal quisu iñchiñ taiñ femafel, raquiduamlayaiñ caquelu che tañi femafel. Trürümuulayaiñ quisu engün mu, femliyiñ huesa duamcüleafuiñ (Luc. 14:28). Peaiñ ñi rupan quiñe precursora, Midori pingelu.

¹⁶ Pichi domongelu Midori, tañi chau testigongenolu trürümqueyu caquelu pichiqueche mu. Feimu Midori rume huesa duami, falinolu troquihui. Huelu tremlu, doi cüme duamquetui. Quisu feipi: “Fill antü papeltuquen Biblia, fei doi cüme duamnagquei ñi piuque ca ngüneduamquen fente tañi piuqueyeteu ta Jehová” pi taiñ lamngen. ¿Ca chem quellueyu? Taiñ lamngen raquiduami chem tañi femafel ñi doi cüdahuelafiel ta Jehová, fei llellipufi Jehová tañi quelluaeteu. Femngechi Midori ayüduamcületui tañi cüdahuelfiel Jehová tunte tañi pepilel.

17. ¿Chumngechi ‘newentukoaiñ taiñ we küme rakiduamneal’? ¿Chum tripaai?

¹⁷ Alün tripantu rupayafui taiñ huesa duamcülehuenoal. Feimu Jehová feipiqueiñmu: “Eimün felei tamün nietual hue cüme raquiduam tamün lonco meu” (Efes. 4:23, 24). Taiñ femal tüfa, llellipuafiyiñ ta Jehová, papeltuafiyiñ Biblia ca raquiduamaiñ tañi chem piquen. Fentecünulayaiñ taiñ femal com tüfa. ¿Chumngechi quelluaiñmu? Jehová tañi nehuen quelluaiñmu taiñ trürümuunoal  caquelu che iñchiñ. Cafei ngüneduamnoliyiñ taiñ nieel ütriruhun ca mallmahun taiñ piuque mu, Jehová quelluafeiñmu taiñ ngüneduamuhual taiñ entual tüfa.

18. 2 Crónicas 6:29, 30 tañi eipin, ¿chumngechi küme duamkeiñmu?

¹⁸ Biblia feipi: “Chem che rume cam com tami troquiñche Israel fampuhul-le ñi cuhu tüfachi ruca mu, fei entule chem ngillatun cam llellipun rume (fei quisuque engün am quimniei chem tañi hueñancülqueteu ca chem tañi cutrancaqueteu), fei huenu meu, cheu tami mülen mu, allcütufinge fei ca perdonayafimi engün. Eimi quimüñmafimi quisu tañi piuque engün (eimi müten cüme quimüñmafimi pu che tañi piuque), fei chumngechi ñi femün engün, culliafimi” (2 Crónicas 6:29, 30). ¿Chem quimeltueiñmu tüfachi troquiñ Biblia? Jehová quimüñmaqueiñmu taiñ piuque. Feimu quimniei taiñ nehuentulen ñi femnoal huesaque dungu, culpanchengeliyiñ rume. Pefiel mu tüfa, Jehová doi piuqueyeiñmu.

19. ¿Chumngechi Jewba kimeleleiñmu taiñ duamneketu?

¹⁹ Quiñe ñuque piuqueyequefilu tañi pichiche, femngechi piuqueyequeiñmu Jehová (Is. 49:15). Peaiñ ñi rupan quiñe lamngen, Raquel pingelu. Fei feipi: “Tañi püñeñ Estefanía, choyüfiñ petu ñi puunon ti antü tañi choyüngeal. Hue pefilu iñche, afmatulehuen fente tañi pichin. Ti hunen cüyen mu, quisu mülequefui quiñe pichi maquina ‘incubadora’ pingelu. Felefulu rume, ti doctor elcünueneu tañi metayafiel. Feula quisu nietui 6 tripantu. Huelu müte tremlai caquelu pichiqueche reque nielu ca femngechi tripantu. Quisu rume nehuentuuquei tañi mongeleal ca rume ayühulqueneu, fei iñche rume piuqueyefiñ” pi taiñ lamngen. Iñchiñ ca femngechi nehuentuuqueiñ taiñ doi cüme cüdahuelafiel ta Jehová, feimu Jehová müna piuqueyequeiñmu. Quimfiel tüfa, müna ayühulqueiñmu.

20. ¿Chemu ayüwkülepoabüiñ?

²⁰ Com iñchiñ femngelaiñ, ca Jehová tañi troquiñche mu rume falin-ngeiñ. Cuifi mu, Jehová pei taiñ ñom piuquengen ca taiñ cüpa quimfiel quisu, feimu cüpaleiñmu (Sal. 25:9). Quisu cüpal-laeiñmu taiñ adümuhun-ngen mu. Rüf quimnieiñ Jehová ñi ayüucülen taiñ poyefiel mu com taiñ nehuen mu. Iñchiñ fentecünuquelaiñ taiñ cüdahuelfiel Jehová nor piuque mu, fei tüfa pengeli taiñ cüme piuquengen (Luc. 8:15). Feimu llemai, amulenge müten tami cüdahuelafiel Jehová tunte tami pepilel eimi. Femngechi ayüucüleaimi quisu tami femel mu.