1. Нәјә ҝөрә Јеһова бизи башгалары илә мүгајисә етмир?

ЈЕҺОВА мүхтәлифлији севир. Бу, инсанлар да дахил олмагла, Онун јаратдығы һәр шејдә өзүнү ҝөстәрир. Һәр биримиз хүсусијик. Буна ҝөрә дә Јеһова һеч вахт бизи бир-биримизлә мүгајисә етмир. О, үрәјимизә, дахилән неҹә инсан олдуғумуза бахыр (1 Ишм. 16:7). Һәмчинин бизим зәиф вә ҝүҹлү тәрәфләримизи билир, һансы мүһитдә бөјүдүјүмүздән аҝаһдыр. О биздән ҝүҹүмүздән артығыны истәмир. Јеһовадан өрнәк алараг, биз дә өзүмүзә Онун ҝөзү илә бахмалыјыг. Онда сағлам дүшүнҹәјә саһиб олаҹағыг: өзүмүз һагда нә јүксәк фикирдә олаҹағыг, нә дә ашағы фикирдә (Ром. 12:3).

2. Нәјә ҝөрә инсанын өзүнү башгасы илә мүгајисә етмәси јахшы дејил?

² Әлбәттә, биз башгаларындан нүмунә ҝөтүрә биләрик. Ола билсин, һансыса баҹы вә ја гардаш чох ҝөзәл тәблиғ едир (Ибр. 13:7). Ондан хидмәтдә сәриштәли олмағы өјрәнә биләрик (Филип. 3:17). Амма бири вар, киминсә јахшы нүмунәсиндән өрнәк ҝөтүрәсән, бири дә вар, бунун әсасында өзүнә дәјәр верәсән. Бунлар фәргли шејләрдир. Өзүнүзү башгалары илә мүгајисә етсәниз, сиздә пахыллыг јаранаҹаг, руһдан дүшәҹәксиниз, һәтта өзүнүзү дәјәрсиз һисс едәҹәксиниз. Үстәлик, өтән мәгаләдә гејд олундуғу кими, јығынҹагдакы баҹы-гардашларла рәгабәт апарсаныз, Јеһова илә мүнасибәтләриниз корланаҹаг. Одур ки, мәһәббәтли Аллаһымыз Јеһова нөвбәти нәсиһәти верир: «Гој һәр кәс өз әмәлләрини јохласын, онда өзүнү башгасы илә мүгајисә етмәдән өз әмәлләринә ҝөрә севинә биләҹәк» (Гал. 6:4).

3. Һансы руһани инкишафыныз сизә севинҹ ҝәтирир?

 ³ Јеһова истәјир ки, өз руһани инкишафыныза бахыб севинәсиниз. Мәсәлән, вәфтиз олунмусунузса, севинә биләрсиниз ки, бу мәгсәдинизә чатмысыныз! Чүнки бу сизин өз гәрарыныз олуб, өзүнүз Јеһованы севдијиниз үчүн вәфтиз олунмусунуз. Һәмчинин вәфтиздән сонракы инкишафыныз һагда да дүшүнә биләрсиниз. Мәсәлән, ола билсин, инди Мүгәддәс Китаб мүталиәсини даһа һәвәслә едирсиниз. Дуаларыныз даһа долғун, даһа сәмими олуб (Зәб. 141:2). Инди тәблиғдә сөһбәтә даһа јахшы башлајырсыныз. Хидмәт үчүн вәсаитләрдән даһа баҹарыгла истифадә едирсиниз. Әҝәр аиләлисинизсә, Јеһованын көмәји илә даһа јахшы әр, арвад, валидејн олмусунуз. Хошбәхт ола биләрсиниз ки, бу кими саһәләрдә тәрәгги етмисиниз.

4. Бу мәгаләдә нә һагда данышаҹағыг?

⁴ Биз башгаларына көмәк едә биләрик ки, өз руһани инкишафларына бахыб севинсинләр вә даһа өзләрини башгалары илә мүгајисә етмәсинләр. Бу мәгаләдән өјрәнәҹәјик ки, валидејнләр ушагларына, әр-арвадлар бир-биринә, ағсаггаллар вә диҝәр мәсиһиләр диндашларына бу саһәдә неҹә көмәк едә биләр. Һәмчинин Мүгәддәс Китабдан бәзи принсипләри арашдыраҹағыг. Бу принсипләр көмәк едәҹәк ки, гаршымыза мәгсәдләр гојаркән өз баҹарығымызы вә имканларымызы нәзәрә алаг.

5. Ефеслиләрә 6:4 ајәсинә әсасән, валидејнләр нә етмәмәлидир?

⁵ Валидејнләр еһтијатлы олмалыдыр ки, бир ушағы диҝәри илә мүгајисә етмәсинләр, јахуд ондан ҝүҹү чатмајан шеји истәмәсинләр. Бу ҹүр мүгајисәләр вә һәдсиз тәләбкарлыг ушағын гол-ганадыны сындыра биләр. (Ефеслиләрә 6:4 ајәсини охујун.) Сачико * адлы баҹы дејир: «Мүәллимләрим мәним синиф јолдашларымдан даһа јахшы охумағымы ҝөзләјирдиләр. Бир тәрәфдән дә, анам истәјирди гијмәтләрим јахшы олсун ки, мүәллимләримә вә иманда олмајан атама јахшы шаһидлик верим. О истәјирди ки, имтаһанларда бир дәнә дә сәһвим чыхмасын, бу исә мүмкүн дејилди. Мәктәби чохдан гуртармышам, амма бәзән дүшүнүрәм: “Әлимдән ҝәләни етсәм дә, бәлкә, Јеһова үчүн бу, кифајәт дејил?”»

6. Валидејнләр Зәбур 131:1, 2 ајәләриндән нә өјрәнә биләр?

 ⁶ Зәбур 131:1, 2 ајәләриндә валидејнләр үчүн чох дәјәрли мәсләһәт вар. (Ајәләри охујун.) Бу ајәләрдә Давуд падшаһ дејир ки, «әлчатмаз шејләр, бөјүк шејләр» далынҹа дүшмәди. О, тәвазөкар олдуғу үчүн гәлбини овундуруб сакитләшдирмишди. Валидејнләр Давудун бу сөзләриндән нә өјрәнә биләр? Валидејнин тәвазөкар олдуғу тәк өзүндән јох, һәмчинин ушағындан да ҝүҹү чатмајан шеји тәләб етмәмәсиндән ҝөрүнүр. Валидејнләр ушағын гаршысына мәгсәд гојаркән онун һәм зәиф, һәм ҝүҹлү тәрәфини нәзәрә алса, ушағын өзүнә әминлији артар. Марина адлы баҹы дејир: «Анам һеч вахт мәни нә баҹыларымла, нә гардашымла, нә дә башга ушагларла мүгајисә етмирди. О мәни өјрәдирди ки, һәрәнин өз баҹарығы вар вә Јеһованын ҝөзүндә һәр биримиз дәјәрлијик. Анамын сајәсиндә мән чох надир һалларда өзүмү киминләсә мүгајисә едәрәм».

7, 8. Әр арвадына һөрмәт гојдуғуну неҹә ҝөстәрә биләр?

⁷ Мәсиһи әрләр һәјат јолдашларына һөрмәт гојмалыдыр (1 Бут. 3:7). Мәсәлән, әр арвадына һөрмәт гојдуғуну она бөјүк дәјәр вермәклә ҝөстәрә биләр. О, арвадындан баҹармадығы шејләри тәләб етмир. Ону әсла башга гадынларла мүгајисә етмир. Әҝәр әр арвадыны башгасы илә мүгајисә етсә, бу, арвадына неҹә тәсир едәр? Роза адлы баҹынын иманда олмајан әри ону тез-тез башга гадынларла мүгајисә едир. Әринин кобуд сөзләри Розанын тәкҹә өзүнә әминлијини сарсытмајыб, она даһа бөјүк зәрәр вуруб. Роза дејир: «Јеһова үчүн дәјәрли олдуғума даим мәни әмин етмәк лазымдыр». Бунун әксинә олараг, мәсиһи әр арвадына һөрмәт гојур. О билир ки, белә етмәси онун һәм арвады илә, һәм дә Јеһова илә мүнасибәтини јахшылашдырыр *.

⁸ Арвадына һөрмәт едән әр ону тәрифләјәҹәк, ону севдијинә вә дәјәр вердијинә әмин едәҹәк (Мәс. 31:28). Әввәлки мәгаләдә ады чәкилән Катеринанын әри она дәјәрсизлик һиссинин өһдәсиндән ҝәлмәјә көмәк етди. Катерина ушаг оланда анасы ону алчалдырды. Һәмишә ону достлары да дахил олмагла, башга гызларла мүгајисә едирди. Нәтиҹәдә, Катерина һәтта һәгигәтә ҝәләндән сонра да өзүнү башгалары илә мүгајисә едирди. Онун мәсиһи әри она бу хүсусијјәти илә мүбаризә апармаға вә өзүнә даһа таразлы јанашмаға көмәк етди. О дејир: «Әрим мәни севир. Јахшы ишләримә ҝөрә тәрифләјир вә мәним үчүн дуа едир. Һәмчинин мәнә Јеһованын ҝөзәл хүсусијјәтләрини хатырладыр вә мәнә мәнфи дүшүнҹәми дәјишмәјә көмәк едир».

9, 10. Гајғыкеш ағсаггаллар бир баҹыја өзүнү башгалары илә мүгајисә етмәмәјә неҹә көмәк етди?

⁹ Өзүнү башгалары илә мүгајисә етмәк мејли оланлара ағсаггаллар неҹә көмәк едә биләр? Ҝәлин Һануни баҹынын нүмунәсинә бахаг. Ушаглыгда демәк олар ки, ону тәрифләмәјибләр. О дејир: «Мән утанҹаг идим вә дүшүнүрдүм ки, башга ушаглар мәндән даһа јахшыдыр. Өзүмү таныјандан һәмишә өзүмү башгалары илә мүгајисә етмишәм». Һәтта һәгигәтә ҝәләндән сонра да Һануни өзүнү башгалары илә мүгајисә едирди. Буна ҝөрә дә о, јығынҹагда јарарсыз олдуғуну дүшүнүрдү. Амма инди о,  өнҹүл хидмәтини севинҹлә иҹра едир. Она дүшүнҹәсини дәјишмәјә нә көмәк етди?

¹⁰ Гајғыкеш ағсаггалларын Һанунијә бөјүк көмәји дәјди. Онлар ондан разы олдугларыны билдирирдиләр, ҝөзәл нүмунәсинә ҝөрә тәрифләјирдиләр. О јазыр: «Бир нечә дәфә ағсаггаллар мәндән бәзи баҹылары руһландырмағы хаһиш етмишди. Мәнә белә бир тапшырыг вердикләри үчүн өзүмү лазымлы һисс едирдим. Бәзи ҝәнҹ баҹылары руһландырдығым үчүн ағсаггалларын мәнә миннәтдар олмалары индијә кими јадымдадыр. Сонра онлар мәнә 1 Салоникилиләрә 1:2, 3 ајәләрини охудулар. Бу мәнә чох хош олду! Әсас бу ҝөзәл чобанларын сајәсиндә мән Јеһованын тәшкилатында өз јерими гијмәтләндирирәм».

11. Әшија 57:15 ајәсиндә гејд олунан «мәзлум, фағыр» кәсләрә неҹә көмәк едә биләрик?

¹¹ Әшија 57:15 ајәсини охујун. «Мәзлум, фағыр» кәсләр Јеһова үчүн чох дәјәрлидир. Тәк ағсаггаллар јох, һәр биримиз бу әзиз баҹы-гардашлары руһландыра биләрик. Буну етмәјин бир јолу онлара сәмими мараг ҝөстәрмәкдир. Јеһова гузуларыны севир вә истәјир ки, биз Онун севҝисини онлара өтүрәк (Мәс. 19:17). Биз һәмчинин тәвазөкар олмагла, өзүмүзлә ловғаланмамагла да онлара көмәк едә биләрик. Истәмәздик ки, диггәти өзүмүзә ҹәлб едиб башгаларында пахыллыг јарадаг. Әксинә, билијимизи вә баҹарығымызы башгаларыны руһландырмаға сәрф етмәлијик (1 Бут. 4:10, 11).

12. Садә инсанлар нәјә ҝөрә Исанын јанында олмаг истәјирди? (Үз габығындакы шәклә бахын.)

¹² Иса Мәсиһин давамчылары илә мүнасибәтиндән чох шеј өјрәнә биләрик. О, дүнјада јашамыш ән даһи инсан иди. Бунунла белә, о, «һәлим вә гәлбән тәвазөкар» иди (Мәт. 11:28—30). О, үстүн зәкасы вә билији илә һеч вахт өјүнмүрдү. Давамчыларыны садә диллә өјрәдирди. Раһат баша дүшмәләри үчүн нүмунәләр чәкирди (Лука 10:21). Өзләриндән разы дин хадимләриндән фәргли олараг, Иса инсанларын Аллаһ үчүн әһәмијјәтсиз олдуғу тәәссүратыны ојатмырды (Јәһ. 6:37). О, садә инсанлара һөрмәтлә јанашырды.

13. Исанын хејирхаһ вә мәһәббәтли олдуғу шаҝирдләри илә рәфтарындан неҹә ҝөрүнүр?

¹³ Исанын хејирхаһ вә мәһәббәтли олдуғу шаҝирдләри илә давранышындан ҝөрүнүрдү. О билирди ки, онларын имкан вә баҹарыглары бир-бириндән фәргләнир. Һансыса ишләри һамысынын баҹармасы, һамысынын хидмәтдә ејни нәтиҹә әлдә етмәси мүмкүн дејил. Амма һәр кәсин әлиндән ҝәләни етмәсини о, чох гијмәтләндирирди. Исанын анлајышлы олдуғуну талант һагда чәкдији мәсәлдән ҝөрмәк олар. Бу мәсәлдә аға һәр бир нөкәрин «баҹарығыны нәзәрә алараг» иш тапшырыр. Ики чалышган нөкәрдән бири о бириндән даһа чох талант газанса да, аға һәр икисини ејни сөзләрлә тәрифләјир. «Афәрин, мәним гочаг, садиг нөкәрим!» — дејир (Мәт. 25:14—23).

14. Исадан өрнәк алараг башгалары илә неҹә давранмалыјыг?

¹⁴ Иса бизә гаршы да мәһәббәтли вә хејирхаһдыр. О билир ки, һәр биримизин баҹарығы вә шәраити бир-бириндән фәрглидир. Биз өз баҹардығымызы едәндә бу она хош олур. Биз дә башгалары илә Иса кими давранмалыјыг. Диндашымыз нәјисә башгалары гәдәр едә билмирсә, буна ҝөрә ону утандырмајаҹағыг. Истәмәрик, о өзүнү јарарсыз һисс етсин. Чалышмалыјыг ки, һәр фүрсәтдән истифадә едиб, баҹы-гардашлары Јеһоваја хидмәтдә әлләриндән ҝәләни етдикләринә ҝөрә тәрифләјәк.

15, 16. Әлчатан мәгсәдләр гојмаг бир баҹыја неҹә көмәк едиб?

¹⁵ Јеһоваја хидмәтдә гојдуғумуз мәгсәдләр бизә истигамәт верир вә һәјатымызы мәналы едир. Амма бунун үчүн гаршымыза башгаларынын мәгсәдини гојмамалыјыг. Өз баҹарыг вә габилијјәтимизи нәзәрә алмалыјыг. Истәмәрик ки, гаршымыза әлчатмаз мәгсәдләр гојаг, сонра да руһдан дүшәк (Лука 14:28). Ҝәлин өнҹүл кими хидмәт едән Мидори баҹынын нүмунәсинә бахаг.

¹⁶ Мидоринин атасы Јеһованын Шаһиди дејил. Мидори ушаг оланда атасы ону баҹысы вә гардашы илә, синиф јолдашлары илә мүгајисә едиб алчалдырды. Мидори дејир: «Өзүмү дәјәрсиз һисс едирдим». Амма бөјүдүкҹә Мидоридә өзүнә гаршы әминлик һисси јаранды. О дејир: «Мән һәр ҝүн Мүгәддәс Китабы охујурам. Бу мәнә гәлб раһатлығы тапмаға көмәк едир, Јеһованын мәни севдијинә әмин едир». Бундан әлавә, Мидори гаршысына чата биләҹәји мәгсәдләр гојурду вә бу мәгсәдләрә чатмаг үчүн дуада Јеһовадан көмәк истәјирди. Беләҹә, о өз руһани инкишафыны ҝөрүб севинирди.

17. Даима дүшүнҹә тәрзимизи неҹә јениләшдирә биләрик вә бунун нәтиҹәси нә олаҹаг?

¹⁷ Мәнфи һиссләр вә дүшүнҹәләр бир ҝүнүн ичиндә јох олмајаҹаг. Буна ҝөрә Јеһова бизи тәшвиг едир: «Даима дүшүнҹә тәрзинизи јениләшдирмәлисиниз» (Ефес. 4:23, 24). Амма әлбәттә ки, бунун үчүн дуа етмәли, Мүгәддәс Китабы охумалы вә охудугларымызын үзәриндә дүшүнмәлијик. Бүтүн бунлары етмәјә давам един вә Јеһовадан көмәк истәјин. Мүгәддәс руһ сизә өзүнүзү башгалары илә мүгајисә етмәк мејлинә үстүн ҝәлмәјә көмәк едәҹәк.  Јеһова һәмчинин сизә көмәк едәҹәк ки, үрәјиниздә пахыллығын вә гүрурун јараныб јаранмадығыны мүәјјән едәсиниз вә дәрһал тәдбир ҝөрүб бу мәнфи хүсусијјәтләри көкүндән чыхарасыныз.

18. 2 Салнамәләр 6:29, 30 ајәләри сизә неҹә тәсәлли верир?

¹⁸ 2 Салнамәләр 6:29, 30 ајәләрини охујун. Јеһова бизим үрәјимизи ҝөрүр. О билир, биз бу дүнјанын руһу илә вә өз гејри-камиллијимизлә мүбаризә апарырыг. Јеһова ҝөрәндә ки, бу мәнфи тәсирләрә јенилмәмәк үчүн вар ҝүҹүмүзлә чалышырыг, бизә мәһәббәти даһа да артыр.

19. Јеһова бизә олан һиссләрини һансы нүмунә әсасында изаһ едир?

¹⁹ Бизә олан һиссләрини ифадә етмәк үчүн Јеһова ана-бала арасындакы бағлылығы нүмунә чәкир (Әшј. 49:15). Ана олан Рејчел баҹынын нүмунәсинә нәзәр салаг. О јазыр: «Гызым Стефани вахтындан әввәл дүнјаја ҝәлди. Ону илк дәфә ҝөрәндә о, ҹылыз, көмәксиз ҝөрүнүрдү. Амма хәстәханада мәнә иҹазә вердиләр ки, о, бир ај инкубаторда олдуғу вахт әрзиндә һәр ҝүн ону гуҹағыма алым. Бу ҝөзәл анларда баламла арамда мөһкәм бағлылыг јаранды. Инди онун алты јашы вар. О өз јашыдларындан даһа хырдадыр. Һәр шејә рәғмән, мән ону һәдсиз дәрәҹәдә чох истәјирәм, чүнки о, јашамаг үчүн чох мүбаризә апарыб, һәјатымыза бөјүк севинҹ ҝәтириб!» Јеһова ҝөрәндә ки, биз Она хидмәт етмәк үчүн вар ҝүҹүмүзлә чалышырыг, бизә бу ҹүр мәһәббәт бәсләјир. Буну билмәк үрәјимизи овундурур!

20. Бизим севинмәк үчүн һансы сәбәбимиз вар?

²⁰ Јеһованын хидмәтчиси олдуғунуз үчүн Онун бөјүк аиләсиндә дәјәрли јер тутурсунуз. Јеһова сизи Өзүнә она ҝөрә ҹәлб етмәјиб ки, сиз башгаларындан даһа јахшысыныз. О сизин үрәјинизә бахыб ҝөрдү ки, сиз һәлим инсансыныз, сизә тәлим вериб, формалашдыра биләр (Зәб. 25:9). Әмин олун ки, Јеһова Она хидмәтдә әлиниздән ҝәләни етдијинизи ҝөрәндә чох севинир. Сизин дөзүмлү вә сәдагәтли олмағыныз ҝөстәрир ки, «јахшы вә ҝөзәл үрәкли» инсансыныз (Лука 8:15). Одур ки, бундан сонра да Јеһованын јолунда әлиниздән ҝәләни един. Онда өз әмәлләринизә ҝөрә севинә биләҹәксиниз.