1. Inyuki Yéhôva a nhégha bé bés ni bôt bape?

YÉHÔVA a mbem bé le bôt bobasôna tole gwom gwobisôna bi ba nlélém. Hala a nene mu bihégél gwé kiki bo bibebela, binuga, ni bôt ba binam. Hégél to yada mu i mpôna bé bés. Jon Yéhôva a nhégha bé bés ni bôt bape. A nyi njee u yé toi. (1 Samuel 16:7) A nyi ngap yoñ, bibomb gwoñ ni binéñél gwoñ. A mbat bé we iloo kiki u nla ti. Di nlama tehe bésbomede kiki Yéhôva a ntehe bés. Hala a ga boñ le di tehe bésbomede “i nya kôli,” hala wee di nhoñol bé le di nloo bôt bape, tole di nlôôha bé suhus bésbomede.​—Rôma 12:3.

2. Inyuki i ta bé loñge i hégha bésbomede ni bôt bape?

² I yé maliga le i ta bé béba i kôna hémle i mankéé nu muda tole nu munlôm nu a nyi téé likalô. (Lôk Héber 13:7) I ndémbél i mankéé i, i nla hôla bés i hôlôs likeñge jés li likalô. (Filipi 3:17) Ndi maselna ma yé ipôla i kôna ndémbél ilam i mut ni i hégha bésbomede ni nye. Hala a nla boñ le di bôdôl tam bôt bape, di tomb tole di kahal hoñol le di kôli bé. Tole kiki di bi tehe i yigil i ntagbe, ibale di njôp i pémsan ni lôk kéé ipe, di ga nimis maada més malam ni Nyambe. Jon ni gwéha, Yéhôva a mbéhe bés le: “Hiki mut a wan minson nwé nyemede, ha nyen a’ bana njom i kon maséé inyu minson nwé nyetama, ndi ha inyu bé le a nhégha nyemede ni mut numpe.”​—Galatia 6:4.

3. Mambe mahol u ma boñ i pes mbuu ma ma nti we maséé?

 ³ Yéhôva a ngwés le u ba maséé ni mahol moñ. Kiki hihéga, ibale u yé nsôblege, u nlama ba maséé le u bi pam i yônôs i njômbi i! Wemede nyen u bi yoñ makidik ma. Gwéha yoñ inyu Nyambe yon i bi tinde we. Hoñol mahol momasôna u bi boñ ibôdôl ha. Kiki hihéga, baa gwéha yoñ inyu lisoñgol ni yigil i Bibel i nañ? Baa masoohe moñ ma nkônde yila njôôñ? (Tjémbi 141:2) Baa hala a yé we jam li ntomb i bôdôl minkwel likalô nano, tole baa u nyi gwélél bisélél gwés inyu likalô nano iloo kôba? Ibale u gwé lihaa, baa Yéhôva a nhôla we i yila loñge isañ mbai, nyañ mbai tole ngwal? U ga ba maséé kiyaga i tehe mahéñha momasôna u ma boñ.

4. Kii di ga tehe munu yigil ini?

⁴ Di nla hôla lôk kéé i kon maséé ni mahol ba mboñ i pes mbuu. Di nla ki hôla bo i keñgle lem i hégha bomede ni bôt bape. Munu yigil ini, di ga tehe lelaa bagwal ba nla hôla bon bap mu jam li, lelaa babiina ba nla hôlna, ni lelaa mimañ ni ini lôk kéé ipe i nla hôla lôk kéé yap i bôda ni i bôlôm. I mamélél, di ga tehe matiñ ma Bibel ma ma nla hôla hiki wada wés i téé ngim mam a nla yônôs.

5. Inoñnaga ni kaat Éfésô 6:4, kii bagwal ba nlama bé boñ?

⁵ Bagwal ba nlama bé hégha man wap wada ni bana bape, to bat nye le a boñ ngim jam i i nloo nye. I nya maboñok i i nla boñ le man wap a nimis makénd mé. (Añ Éfésô 6:4.) Mankéé nu muda wada le Sachiko * a nkal le: “Balét bem ba bé gwés le me loo bana baudu bape. Yak mama yem a bé gwés le me sal loñge i suklu inyu boñ le me tééne balét bem ni pua yem nu a ta bé Mbôgi Yéhôva likalô. A bé gwés bé le me kwoo yom to yada i makégse, ki le me bé nôgda le me nla bé pam i boñ hala. Tolakii me bi téé suklu behee, me ngi badbaga too Yéhôva a yé maséé ni biliya gwem.”

6. Bimbe biniigana bagwal ba ñôt mu i kaat Tjémbi 131:1b, 2?

⁶ Bagwal ba nla ôt biniigana bilam mu i kaat Tjémbi 131:1b, 2. (Añ.) Kiñe  David a kal le a bé “jôp [bé] i wan mam makeñi,” hala wee mam ma bé loo nye. Suhulnyuu yé i bé ‘mômôs ñem wé, i hôgbahaga nye.’ Kii hala a niiga bagwal? Bagwal ba nlama unda le ba yé suhulnyuu, le ba nyi minwaa nwap mu mam ba nsômbôl boñ dilo di nlo, ba nlama yak boñ nlélém inyu bon bap. Bagwal ba nla hôla man wap i nôgda le a yé nseñ ibale ba nyi i mam a nla boñ ni i mam a nla bé boñ mu kii ba nhôla nye i yônôs ngim mam dilo di nlo. Sita yada le Marina a mbigda le: “Mama yem a mah hégha bé me ni ini lôk kéé yem ipe, to ni boñge bape. A bi niiga me le hiki mut a gwé jé likébla, ni le hiki wada wés a yé mahee i mis ma Yéhôva. Inyu hala nyen me mbéna bé hégha memede ni bôt bape.”

7-8. Lelaa munlôm a nla unda nwaa le a nti nye lipém?

⁷ Nlôm nu a yé kristen a nlama ti nwaa lipém. (1 Pétrô 3:7) Ba nkal le mut a nti numpe lipém ngéda a ndiihe nye i nya i tôbôtôbô. Kiki hihéga, munlôm a nti nwaa lipém i ngéda a mboñ le nwaa a nôgda le a yé nseñ. A mbat bé nye le a boñ mam ma nloo nye. A nhégha bé to nye ni bôda bape. Kii muda a nôgda ngéda nlôm a nhégha nye ni bôda bape? Sita Rôsa nu nlôm a ta bé Mbôgi Yéhôva a nkal le, nlô wé a bé béna hégha nye ni bôda bape. Bibuk bibe a bé leñ nye bi bé tééñga nye, bi tin-ge nye i hoñol le mut nye ki nye a ngwés bé nye. A nkal le: “Hiki ngéda, me gwé ngôñ le ba hôñlaha me le Yéhôva a ngwés me ngandak.” Maselna ni i yom mut nu a bé boñ, munlôm nu a yé kristen a nti nwaa lipém. A nyi le ngéda a mboñ hala, maada mé ni nwaa ma nkônde lama, ba nkônde ki kôôge bebee ni Yéhôva. *

⁸ Munlôm a nti nwaa lipém ngéda a mbégés nye, ngéda a nkal nye le a ngwés nye, ni i ngéda a nti nye mayéga inyu mam a mboñ. (Bingéngén 31:28) Hala nyen nlôm Katérina nu di mpôdôl i yigil i ntagbe a mboñ, a nhôla nwaa i yémbél mana mahoñol le bana bôda bape ba nloo nye. Ngéda Katérina a bé mañge, nyañ a bééna lem i yahal nye, ni i hégha nye ni dingonda dipe, yak ni mawanda mé. Hala a bi boñ le Katérina a bôdôl hégha nyemede ni bôt bape, a bi ke ni bisu i boñ hala ngéda a yila Mbôgi Yéhôva! Ndi nlô wé nu a yé kristen, a bi hôla nye i yémbél lem i hégha nyemede ni bôt bape, ni i bana litehge li kôli li nyemede. A nkal le: “A ngwés me, a mbégés me inyu mam malam me mboñ, a nsoohe ki inyu yem. A nhôñlaha yak me bilem bi Yéhôva, a hôlga me i kodol litehge libe me gwé inyu memede.”

9-10. Lelaa mimañ mi bi hôla sita yada nu a bééna lem i hégha nyemede ni bôt bape?

⁹ Lelaa mimañ mi nla hôla i bet ba mbéna hégha bomede ni bôt bape? Di yoñ hihéga hi sita Hanuni, nu ba bé bégés bé i ngéda a bé isii mañge. A mbigda le: “Me bé nsut, me hoñlak le bana boñge bape ba nloo me. Ibôdôl me mañge, me bi bôdôl hégha memede ni bape.” Yak i ngéda a bi jôp maliga, Hanuni a bi tééda i lem i. Sôk i nsôk, a bé hoñol le a gwé bé nseñ likoda. Ndi i len ini, a yé maséé i sal kiki nsañal. Kii i bi hôla nye i héñha litehge jé?

 ¹⁰ Hanuni a nkal le mimañ nwon mi bi hôla nye. Ba bi yis nye le a nlôoha nseñ ikété likoda, ba ti ki nye mayéga inyu ndémbél yé ilam. A ntila le: “Mbus ngéda, mimañ mi bi bat me le me hôla bisita bihogi. Hala a bi hôla me i nôgda le me yé nseñ. Me mbigda ngéda mimañ mi bi ti me mayéga inyu mahôla me bi ti njohok bisita. Mbus ba éñél me kaat 1 Tésalônika 1:2, 3. Hala a bi tihba me ngandak! Me nti mimañ mayéga, inyule ba bi hôla me i nok le me yé nseñ ikété likoda.”

11. Inoñnaga ni Yésaya 57:15, lelaa di nla hôla ‘bôt ba nok ndutu, ba bak suhulnyuu’?

¹¹ Añ Yésaya 57:15. Yéhôva a nyén ki lôñni ‘bôt ba nok ndutu, ba bak suhulnyuu.’ Bésbobasôna di nla hôla i nya lôk kéé i bôda ni i bôlôm i, ha mimañ ndik bé. Njel yada di nla gwélél inyu ti bo makénd i yé le di unda bo le di tôñ bo. Yéhôva a ngwés le maboñok més ma unda bo le a ngwés bo ngandak. (Bingéngén 19:17) Di nla yak hôla lôk kéé yés i bôda ni bôlôm ngéda di yé suhulnyuu, di yik le di gwé minwaa. Di nkadba bé kayéle maboñok més ma tinde bo i jôp i pémsan ni bés, tole i kil bés njôñ. Maselna ni hala, di ngwélél ngap yés ni yi yés inyu lédés bape.​—1 Pétrô 4:10, 11.

12. Inyuki bôt ba suhulnyuu ba bé kôôge Yésu bebee? (Béñge titii i lipep li bisu.)

¹² I ngéda di ntehe lelaa Yésu a bé niñ ni banigil bé, hala a nhôla bés i yi lelaa di nla niñ ni bôt bape. A bé loo bôt ba binam bobasôna ba ba ma niñ hana ’isi. Ndi, a bééna “ñem nwee ni suhulnyuu.” (Matéô 11:28-30) A bé unda bé le a nlôôha yi jam iloo bôt bape. I ngéda a bé niiga, a bé gwélél bibuk bi ntomb ni dihéga di di bé tihba miñem mi bôt. (Lukas 10:21) Maselna ni baéga base ba ba bé ngôk, Yésu a bé unda bé bôt bape le ba gwé bé mahee i mis ma Djob. (Yôhanes 6:37) A bé ti yak diyeyeba lipém.

13. Lelaa loñgeñem ni gwéha i Yésu bi bé nene mu maada mé ni banigil bé?

¹³ Loñgeñem ni gwéha i Yésu bi bé nene mu maada mé ni banigil bé. A bé yi le ba gwé bé nlélém ngap, le ba mboma bé to minlélém mi mam i niñ yap. Jon ba bé bé le ba gwel minlélém mi minson; ba bé bé ki to le ba téé likalô nya yada. Ndi a bé kon maséé ni biliya hiki wada wap a bé boñ ni ñem wé wonsôna. I lem i Yésu i, i bi nene mu hihéga hi talént a bi yoñ. Mu hihéga hi, nwet ndap a bi ti minkol nwé bôlô, “hiki mut inoñnaga ni ngap yé.” Nwet wap a bé lo bañ, a koba le wada a nkôs nseñ iloo nuu numpe. Ndi a bi bégés bo iba, a kal hiki wada wap le: “Bôlô ilam, a loñge nkol u maliga!”​—Matéô 25:14-23.

14. Lelaa di nla nigle Yésu?

¹⁴ Yésu a ngwés bés, a undga bés loñgeñem. A nyi le di gwé bé nlélém ngap, ni le di bi boma bé minlélém mi mam, a nkon ki maséé ngéda di mboñ biliya gwés gwobisôna i nson Djob. Di nlama nigle Yésu. Di boñok bañ ngim jam i i nla tinde mankéé ikété likoda i hoñol le a kôli bé, tole i wo nyuu inyule a nla bé boñ kiki ini lôk kéé ipe. Maselna ni hala, di yéñ manjel i bégés bilôk bikéé bi bôlôm ni bi bôda inyu biliya ba mboñ inyu gwélél Yéhôva ni ñem wap wonsôna.

15-16. Lelaa sita yada i bi kon maséé ni mam a bi téé le a nlama yônôs inoñnaga ni ngap yé?

¹⁵ I téé ngim mam di nsômbôl yônôs dilo di nlo i nlémés niñ yés, i hôlga bés  i bana ngim njômbi. Ndi inyu boñ le hala a bane bés nseñ, i nsômbla le i mam di nsômbôl yônôs ma kiha ni ngap yés, he i bôt bape bé. Ibale di mboñ mam inyule di noñ bape, di yé le di tomb, tole i nla pam le di wo nyuu inyule di nla bé yônôs mo. (Lukas 14:28) Di yoñ hihéga hi sita yada le Midori, nu a yé nsañal.

¹⁶ Isañ Midori nu a ta bé Mbôgi Yéhôva a bé wéha nye nyuu i ngéda a bé mañge, a héghaga nye ni lôknyañ, yak ni mawanda mé ma suklu. Midori a nkal le: “Me bé nôgda le me nhee bé to yom.” Ndi i ngéda a bi nañ, a bi bôdôl bana makénd. A nkal le: “Me ñañ Bibel hiki kel inyu boñ le me bana ñem nwee ni le me pam i nôgda le Yéhôva a ngwés me.” Midori a bi téé mam a nlama yônôs inoñnaga ni ngap yé, a soohe ki Yéhôva le a hôla nye i yônôs mo. Midori a bi sôk kon maséé ni mahol mé.

17. Lelaa di nla “ke ni bisu i yila yondo ikété ngui i ñénél mahoñol [més],” kii di nsôk kôhna?

¹⁷ I mbat ngéda inyu boñ le mut a pam i héñha litehge jé li mam ni mahoñol mé. Inyu hala nyen Yéhôva a mbéhe bés ni bini bibuk le: “Ni nlama ke ni bisu i yila yondo ikété ngui i ñénél mahoñol manan.” (Éfésô 4:23, 24) Inyu pam i boñ hala, di nlama soohe, di nigil Bibel, di soñda ki. Di kee ni bisu i boñ i mam ma, ni i bat Yéhôva le a ti bés ngui. Mbuu mpubi wé u ga hôla we i yémbél mahoñol momasôna ma ma nla tinde we i hégha wemede ni bôt bape. Yéhôva a ga hôla yak we i yi too u gwé lem i hégha wemede ni bôt bape, too u ntam gwom bi bôt, tole u nyila ngôk, a ga hôla ki we i pala boñ mahéñha.

18. Lelaa bibuk di nléba i kaat 2 Miñañ 6:29, 30, bi nla lédés bés?

 ¹⁸ Añ 2 Miñañ 6:29, 30. Yéhôva a nyi i yom di nhoñol. A nyi ki le di njôs mahoñol ma nkoñ ’isi ni libak jés li kwéha. I ngéda Yéhôva a ntehe bés di njôs i nya mam mabe i, gwéha yé inyu yés i nkônde nañ.

19. Himbe hihéga Yéhôva a nyoñ inyu nôgha bés i gwéha a gwééne bés?

¹⁹ Inyu nôgha bés i gwéha a gwé inyu yés, Yéhôva a nyoñ hihéga hi maada ma yé ipôla nyañ ni nkéñéé wé man. (Yésaya 49:15) Di yoñ hihéga hi muda wada le Rachel. A nkal le: “Ngond yem Stéphanie a bi gwéé ngéda yo ngi kola. I ngéda me bi tehe nye inyu ngélé bisu, a pôna me man tôlô, nu a gwééba bé. Dokta i bi ti me kunde i begee nye ndék hiki kel tolakii ba bi ha nye mashin i het ba nha boñge ba ba ngwéé ngéda ngi kola. I ndék ngéda di bé tégbaha ntôñ i bi lédés maada més. I len ini a gwé nwii minsamal, a bak isii iloo boñge ba nwii nwé. Ndi me ngwés nye ngandak inyule a bi jo inyu niñ, ni le a nlôôha ti me maséé!” Kinje maséé di nôgda i yi le Yéhôva a ngwés bés ngandak kiki nyañ a ngwés man wé, i ngéda a ntehe biliya bi ngui di mboñ inyu gwélél nye ni ñem wés wonsôna!

20. Inyuki we ngwélél Yéhôva, u nla ba maséé?

²⁰ Kiki u yé ngwélél Yéhôva, u nlôôha nseñ ikété lihaa jé, mut numpe a mpôna bé we. Yéhôva a bi ôt bé we i nyeni inyule u nloo bôt bape. A bi ôt we inyule a bi tehe mahoñol moñ ma kété kété, a tehe le u yé mut suhulnyuu, nu a nla m’ma. (Tjémbi 25:9) Ba nkwoog nkaa le a nkon maséé i ngéda a ntehe we u mboñ kii yosôna u nla inyu gwélél nye. Hônba yoñ ni ndéñbe yoñ bi ñunda le u yé ‘maliga u ban-ga loñgeñem.’ (Lukas 8:15) Jon kee ni bisu i gwélél Yéhôva ni ñem woñ wonsôna. Ni i njel i, w’a bana bañga njom i kon maséé ‘inyu minson nwoñ wetama.’