1. Boasa dang olo Jahowa mambanding-bandingkon hita tu na asing?

DANG diharappon Jahowa ikkon sarupa hita songon halak na asing. Takkas ma i tarida sian akka toppaanna. Misalna, marragam do jenis ni akka suan-suanan, akka binatang, jala jolma pe marasing-asing do. Dang adong halak na persis songon hita. Alani i ma dang hea dibanding-bandingkon Jahowa hita tu na asing. Rohatta do na diida Jahowa. (1 Sam. 16:7) Takkas do diboto Ibana kelebihanta, hahuranganta, dohot latar belakangta. Dang hea dipangido Jahowa na so boi taulahon. Ikkon songon cara ni Jahowa i ma hita menilai diritta sandiri. Molo tatiru Jahowa, gabe “marbisuk” ma hita. Dang taanggap be massai penting diritta, manang merasa hita dang mararga.​—Rom 12:3.

2. Aha do akibatna molo sai tabandingkon diritta tu na asing?

² Lomo do rohatta marsiajar sian akka donganta na asing. Misalna molo adong donganta na malo marbarita na uli, boi do hita marsiajar sian ibana. (Heb. 13:7) Molo tabahen songon i, gabe malo ma tong hita marbarita. (Plp. 3:17) Alai beda do maniru teladan ni sasahalak dohot mambandingkon diritta tu ibana. Molo tabandingkon diritta tu na asing, boi do gabe late rohatta, marmetmet ni roha, manang gabe merasa dang marguna. Jala songon na taparsiajari di artikel sebelumna, molo sai naeng bersaing hita dohot akka donganta, boi do sega hubunganta tu Jahowa. Alani i ma didok di Bibel, “Ganup ma halak mamparrohahon ulaonna be. Dung i boi ma ibana marlas ni roha alani ulaonna i, dang ala paimbar-imbarhon tu ulaon ni halak.”​—Gal. 6:4.

3. Aha do kemajuan naung dibahen hamu dukkon tardidi?

³ Lomo do roha ni Jahowa molo marlas ni roha hita mangulahon ulaonta tu Ibana. Pasti las do rohamuna ala  nungnga dibahen hamu kemajuan jala boi hamu tardidi. Hamu sandiri do na mambahen keputusan i. Alani holongmuna tu Jahowa do makana dibahen hamu keputusan i. Coba ma jo ingot hamu akka kemajuan naung dibahen hamu dukkon tardidi. Misalna, nga lam taratur be hamu manjaha Bibel? Lam bagas do parsiajaran Bibel pribadimuna? Lam jotjot jala lam gomos do hamu martangiang? (Ps. 141:2) Lam terampil do hamu marbarita na uli dohot mamakke akka alat lao mangajari? Jala molo nungnga berkeluarga hamu, nungnga gabe suami, istri, dohot natua-tua na lam burju hamu? Pasti las do rohamuna jala puas do hamu molo nungnga dibahen hamu akka kemajuan sisongon i.

4. Aha do na lao tabahas di artikel on?

⁴ Boi do taurupi akka halak na asing asa marlas ni roha halak i ala nungnga dibahen nasida kemajuan. Di artikel on, tabahas ma songon dia hita boi mangurupi na asing asa unang sai mambanding-bandingkon dirina tu na asing. Misalna tabahas ma songon dia natua-tua mangurupi anakkonna, songon dia akka naung menikah mangurupi suami manang istrina, jala songon dia akka sintua dohot hita sude mangurupi akka donganta di huria. Tabahas ma muse prinsip ni Bibel na mangurupi hita mambahen cita-cita na masuk akkal na sesuai tu kemampuanta.

5. Sesuai tu Epesus 6:4, aha do na so boi diulahon akka natua-tua?

⁵ Unang ma dibanding-bandingkon natua-tua anakkonna tu na asing. Jala unang ma disuru akka natua-tua anakkonna mangulahon akka na so sanggup diulahon ibana. Alana boi do i mambahen metmet roha ni anakkonna. (Jaha Epesus 6:4.) Donganta si Sara * mandok, “Diharappon gurukku do au asa ummalo sian sude dongan sakalashu. Omakku pe songon i do. Ikkon dapot nilai 100 do au tikki ujian, asa boi ninna i gabe kesaksian tu gurukku dohot tu bapakku na so Saksi Jahowa. Hape dang mungkin i. Alani i, martaon-taon dung tamat sikkola au, olo dope sipata au merasa dang cukkup na hulean i tu Jahowa, nang pe nungnga hubahen na undenggan.”

6. Aha do na boi diparsiajari natua-tua sian Psalmen 131:1, 2?

 ⁶ Akka natua-tua boi do marsiajar sian Psalmen 131:1, 2. (Jaha.) Didok Raja Daud, dang dilului ibana akka “ulaon na balga” manang na so sanggup diulahon Ibana. Ala serep rohana, ‘gabe sonang jala dame ma dihilala ibana’. Aha do na boi ditiru natua-tua sian si Daud? Akka natua-tua na marserep ni roha, dang dipaksahon dirina mangulahon akka na so tolap diulahon ibana. Songon i ma tong tu anakkonna, dang diharappon gellengna i mangulahon tugas na so tolap diulahon anakna i. Boi do diurupi akka natua-tua anakkonna mamboto kelebihan dohot kelemahanna, asa boi dibahen anakkonna i cita-cita na masuk akkal. Donganta si Marina mandok, “Dang hea dibanding-bandingkon omakku au tu abangku dohot tu dua adekku, manang tu dakdanak na asing. Didok omak, sude do halak adong kelebihanna jala sude do hita mararga di Jahowa. Ala songon i do dibahen omakku mangajari au, gabe dang hea hubandingkon dirikku tu na asing.”

7-8. Songon dia do suami patuduhon na diargai ibana do istrina?

⁷ Sahalak suami Kristen ikkon diattusi do pakkilalaan ni istrina. (1 Ptr. 3:7) Ikkon diargai ibana do istrina i. Dang suruonna istrina mangulahon akka ulaon na so tolap diulahon istrina. Jala dang dibanding-bandingkon ibana istrina tu borua na asing. Alana dang denggan molo dibahen ibana songon i. Donganta si Rosa na so Saksi Jahowa suamina, sering do dibandingkon suamina ibana tu borua na asing. Kasar do hata ni suamina i tu ibana. Alani i gabe merasa do si Rosa dang mararga ibana. Didok ibana, “Ikkon sai torus ma hupapos rohakku na arga do au di Jahowa.” Alai molo sahalak suami Kristen dang boi songon i, ikkon diargai do istrina. Molo dang diargai ibana istrina i, sega ma hubunganna tu istrina dohot tu Jahowa. *

⁸ Molo diargai sahalak suami do istrina, pasti olo do ibana mamuji istrina i. Baru muse, olo do ibana mandok na holong rohana tu istrina i jala na arga do istrina i di ibana. (Poda 31:28) Songon i do na diulahon suami ni si Katarina, na dibahas di artikel sebelumna. Diurupi suamina do ibana asa unang merasa dang mararga. Tikki dakdanak si Katarina, sering do dibandingkon-bandingkon omakna ibana tu akka donganna. Alani i, gabe jotjot ma dibandingkon ibana dirina tu halak na asing, bahkan dung gabe Saksi Jahowa ibana. Alai diurupi suamina do si Katarina asa unang songon i be ibana. Didok si Katarina, “Holong do roha ni suamikku tu au. Dipuji do au, jala ditangiakkon. Dipaingot ibana do au taringot tu akka sifat ni Jahowa. Jala i ma na mangurupi au padenggatton cara marpikkirhu.”

9-10. Songon dia do akka sintua mangurupi si Hani na sai mambandingkon dirina tu na asing?

⁹ Aha do na boi diulahon akka sintua molo adong dongan di huria na mambanding-bandingkon dirina tu na asing? Taida ma jo pengalaman ni donganta si Hani, na so hea mandapot pujian tikki gelleng. Didok ibana, “Parila do au. Sai merasa do au undenggan donganku sian au. Nga mulai sian dakdanak au sai mambandingkon dirikku tu na asing.” Torus dope sai songon i si Hani bahkan dukkon  Saksi Jahowa ibana. Akibatna, gabe merasa ma ibana dang mararga. Alai saonari nungnga gabe perintis na marlas ni roha ibana. Aha do na mangurupi si Hani?

¹⁰ Akka sintua do na mangurupi si Hani. Dipapos do roha ni ni si Hani na mararga do ibana. Dipuji akka sintua i do ibana. Didok si Hani, “Hea do piga-piga hali dipangido sintua au mangurupi akka donganta borua di huria. Huingot dope tikki mandok mauliate akka sintua tu au ala huurupi akka donganta i. Dijahahon nasida do 1 Tessalonik 1:2, 3. Hona hian do i tu rohakku. Mandok mauliate do au tu akka donganta sintua na burju i, ala dipapos nasida do rohakku na dihaporluhon do au di huria.”

11. Aha do na boi taulahon lao mangurupi akka “halak na malala rohana” songon na didok di Jesaya 57:15?

¹¹ Jaha Jesaya 57:15. Parduli do Jahowa tu “halak na malala rohana”. Alani i, sude do hita boi patoguhon akka dongan di huria, dang holan akka sintua. Sada cara patoguhon nasida, i ma molo tapardulihon nasida. Lomo do roha ni Jahowa asa tapapos roha ni nasida na holong do roha ni Jahowa tu halak i. (Poda 19:17) Molo serep rohatta jala dang taanggarhon kemampuanta, boi ma taurupi akka donganta i. Unang ma tabangga-banggahon diritta, asa unang cemburu na asing. Alai tapakke ma kemampuanta i patoguhon akka donganta.​—1 Ptr. 4:10, 11.

12. Boasa lomo roha ni akka halak jonok tu Jesus? (Ida gambar sampul.)

¹² Boi do hita marsiajar sian teladan ni Jesus lao patuduhon na parduli hita tu akka donganta. Sabotulna, Jesus do jolma na ummalo na hea mangolu di tano on. Alai ‘lambok do ibana jala serep do rohana’. (Mat. 11:28-30) Dang dipatudu-tudu Jesus kelebihanna manang dipaboa-boa ibana sude na binotona. Gariada tikki mangajari, dipakke Jesus do bahasa dohot ilustrasi na sederhana, asa boi hona tu roha ni akka halak. (Luk. 10:21) Dang songon pamimpin agama na sombong Jesus. Dang dibahen Jesus akka halak merasa dang arga nasida di jolo ni Debata. (Joh. 6:37) Gariada massai diargai Jesus do akka halak na so pola sangap di jolo ni jolma.

13. Songon dia do Jesus patuduhon na holong do rohana tu akka siseanna?

¹³ Burju do Jesus tu akka siseanna jala holong do rohana tu nasida. Diboto ibana do, marasing-asing do kemampuan dohot situasi ni nasida. Jadi dang diharappon Jesus boi sarupa tugas na diulahon nasida dohot hasil ni karejo ni nasida. Diargai Jesus do upaya ni sude siseanna lao mangalean na dumenggan. Tarida ma i sian ilustrasi ni Jesus taringot talenta. Di ilustrasi i, disuru sahalak bawa do akka hatobanna mangurus akka artana “hombar tu na tolap uruson ni nasida”. Adong do dua hatobanna na ringgas. Sian hatobanna na dua i, unggodang do hasil na dapot ni sahalak hatoban. Alai dipuji tuanna i do halak i na dua. Didok ibana, “Denggan ma na binahenmi. Tutu ma ho hatoban na burju jala haposan!”​—Mat. 25:14-23.

14. Songon dia do hita boi maniru Jesus?

¹⁴ Burju jala holong do tong roha ni Jesus tu hita. Diboto ibana do marasing-asing kemampuan dohot situasitta be. Las do roha ni Jesus molo tabahen na dumenggan tikki mangulahon tugasta. Porlu do tong tatiru Jesus. Unang ma tabahen akka donganta merasa dang mararga dirina, manang tabahen nasida maila ala dang sarupa na diulahon nasida songon na asing. Gariada, ikkon tapuji do  nasida ala nungnga berupaya mangalean na dumenggan tu Jahowa.

15-16. Aha do na dihilala sahalak donganta ala dibahen ibana cita-cita na masuk akkal?

¹⁵ Molo tabahen cita-cita manang tujuan rohani, gabe bermakna ma ngolutta. Alai ikkon sesuai do i tu kemampuanta dohot situasitta, dang asa sarupa songon na asing. Alana molo sai naeng sarupa hita dohot na asing, boi do gabe kecewa hita jala marmetmet ni roha. (Luk. 14:28) Taida ma contoh ni sahalak perintis na margoar si Midori.

¹⁶ Dang Saksi Jahowa bapak ni si Midori. Sai dibanding-bandingkon bapakna i do ibana tu akka adekna dohot tu akka dongan sasikkolana. Didok si Midori, “Dang hea au merasa na arga do au.” Dung balga ibana, gabe hurang percaya diri ma ibana. Didok ibana ma muse, “Hujaha ma Bibel ganup ari, gabe dame ma huhilala. Huboto ma na holong do roha ni Jahowa tu au.” Dung i, dibahen si Midori ma cita-cita na masuk akkal, jala ditangiakkon ibana ma i. Hasilna, gabe marlas ni roha ma ibana, ala adong do hape na boi dilehon ibana tu Jahowa.

17. Songon dia do carana padenggatton cara marpikkirta na negatif, jala aha do hasilna molo taulahon i?

¹⁷ Asa boi taubah cara marpikkirta na negatif i, porlu do godang tikki. Alani i ma dipasingot Jahowa hita, “Naeng ma dipaimbaru roha dohot pikkiranmuna.” (Eps. 4:23, 24) Alani i, ikkon martangiang do hita, manjaha Bibel, jala mangarimangi i. Torus ma taulahon i jala tajalo ma gogo sian Jahowa. Pasti diurupi tondi parbadia ni Jahowa do hita asa unang sai tabandingkon be diritta tu na  asing. Diurupi do hita tong mamareso atik naung adong do late ni roha manang ginjang ni roha di diritta. Jala pasti diurupi do hita asa boi muba.

18. Songon dia do 2 Kronika 6:29, 30 patoguhon rohatta?

¹⁸ Jaha 2 Kronika 6:29, 30. Diboto Jahowa do isi ni rohatta. Diboto Ibana do molo hita berjuang mangalo pengaruh na jahat sian portibi on dohot kelemahanta sandiri. Molo diida Jahowa hita toktong berupaya mangalo i sude, gabe lam holong ma rohana tu hita.

19. Sadia balga do holong ni Jahowa tu hita? Bahen ma tudosanna.

¹⁹ Holong hian do roha ni Jahowa tu hita. Dipatudos ma i songon holong ni sahalak borua tu anakkonna na manusu dope. (Jes. 49:15) Taida ma jo na didok ni sahalak borua na margoar si Rahel. Didok ibana, “Tubu prematur do borukku si Stepani. Parjolo sahali huida ibana, gelleng hian do ibana jala gale-gale. Dirawat ma borukki saleleng sabulan di rumah sakit. Alai dipaloas dokter do au mangabing ibana tiap ari. Alani i lam kuat ma ikatan batinnami. Saonari nga onom taon be umurna. Gelleng hian do dagingna, beda sian akka donganna. Holong hian do rohakku tu ibana. Alana berjuang do ibana asa boi mangolu. Alani borukki, lam tamba do las ni rohakku.” Dos songon i ma Jahowa, holong hian do rohana tu hita. Apalagi molo diida Ibana hita berupaya manomba Ibana sian nasa rohatta. Pasti las do rohatta mamboto i!

20. Aha do na mambahen akka naposo ni Jahowa marlas ni roha?

²⁰ Marasing-asing do sude naposo ni Jahowa. Jala arga do nasida sude di Ibana. Ditarik Jahowa pe hita tu Ibana, dang ala na undenggan hita sian halak na asing. Alai ala diida Jahowa do serep rohatta, olo hita diajari, jala olo hita muba. (Ps. 25:9) Pos ma rohatta, pasti diargai Jahowa do sude upayatta lao manomba Ibana. Molo toktong hita sabar jala setia, boi ma hita didok “halak na burju jala na tulus rohana”. (Luk. 8:15) Alani i, torus ma talean na dumenggan tu Jahowa asa marlas ni roha hita ‘alani ulaonta be’.