1. Rosai ḇefnai fa Yahwe byukikara koḇa kuker snonggaku ḇesesya?

YAHWE imarisen faro roi nayafa kam. Ine neḇemam ro ḇraur ḇepyum kaku Ḇyena, isoine ifrur rokaker na, aiwan sya, isof ro snonggaku sya. Yahwe fyawi ko oser-oser komnis kam ḇa. Inja, Yahwe byukikara ko ḇa kuker snonggaku ḇesesya. Myam randum ro kosnesna. (1 Sam. 16:7) I kako myam samambraḇ, ḇaḇeraryarḇa, ma moḇ waḇa rona. Ma dor syadi ro Au ḇa ro roi wasambraḇ fa wafrur na. Fandun kaku fa komam raris Yahwe myam koraya. Mura nari kona ”kakara ḇepyum”, inja nari kokara kosyadi ḇa ro roi ḇekaku na.​—Rm. 12:3.

2. Rosai ḇefnai fa ipyum ḇa kobukikara ko kuker snonggaku ḇesesya?

² Kaku ḇae, bisa kofarkor roi ḇepyum ro snonggaku ḇesesya kuker komamuser moḇsa naek srar ḇekir ro ḇaḇebaryas ya. (Ibr. 13:7) Ramnai imbude komam ḇaido kofarkor nyan rariso bisa koḇekir syadi ro ḇaḇebaryas koḇena. (Flp. 3:17) Ḇape, kofarari roi ḇepyum snonggaku oso fyasnai na iḇese kuker kobuk nafa kobukmam manggunko ḇardi. Rofyor kobukikara manggunko kuker snonggaku ḇesesya na nafrur kofafayaf, koḇesanekar, ḇaido kokara koḇemaeja ḇa. Koḇesewar fa kofamfaḇri kuker naek srar koḇesi ro sidang ido, ḇaḇebati koḇena kuker Yahwe I kako na napyum ḇa, imnis ra kofarkor ro farkarkor ḇepupes ya. Inja, Yahwe kuker saswar danun ḇeko, ”Iḇye syadi snonkaku oser-oser imnasen mankundi resari ro kankenem ḇyedi; insape imsik mankundi, mboi myam awer faro kankenem snonkaku ḇese.”​—Gal. 6:4.

3. Roi risai wafrur kwar fa wasur ro ḇaḇerur ya ḇefrur waryaḇ ya?

 ³ Yahwe imarisen waryaḇ snar wasur kwar ro ḇaḇerur manggun Bedi. Imnis ra, nari wamarisen kaku fyor ḇebaptis kwar. Ine snemuk manggun ḇenairi snar waswar Allah I. Kwara pan rosai monda wafrur kwar fyor ḇebaptis ya. Imnis ra, wamarisen syadi fa wawasya Refo ma wafrur farkarkor manggun Bedi ke? Nadi Bena ro kirine napyum syadi ma benadi kuker sne ḇesiper ke? (Mz. 141:2) Kirine wawos pyum syadi kuker snonggaku sya fyor wabaryas ke ḇaido ḇekir syadi fa buk roiebor kobuki farkor na ro faramyan ya ke? Be snonswa, ḇinswa, ḇaido sinan ido, kuker fafnoḇek ro Yahwe, Ausya ro kirine bisa wuf fararur Bena kuker pyum syadi ke? Manggundaw na waryaḇ ma wamarisen kuker roi wafrur kwar ro ḇar-ḇar nane.

4. Rosai nari kawos ro farkarkor ine?

⁴ Kofnoḇek snonggaku ḇese siryaḇ snar rosai sifrur kwar ro ḇaḇerur manggun sena. Kokako kofnoḇek si fa sbukikara awer si kuker ḇesesya. Ro farkarkor ine, nari komam moḇsa sinan sya na sifnoḇek romawa sesya rai, rariso snonswa ḇaido binswa sufnoḇek yae su rai, ma rariso penatua ma naek srar ḇesesya sifnoḇek ḇesesya rai. Ḇepupes ya, nari kawos wos farkin riḇeso ḇefnoḇek ko oser-oser fa kap roi koḇe kofrur na ḇemnis kuker samambraḇ ma fafisu koḇena oser-oser.

5. Imnis Efesus 6:4 ya, rosai sinan sya sifrur awer na?

⁵ Sinan sya na sisasor kaku si fa sbukikara romawa oso kuker romawa ḇesesya awer ḇaido sor fa sifrur nabor syadi ro roi sipok sifrur ḇa na. Snar nari nafrur romawa sya simarisen ḇa ḇaido nafrur sestres. (Wasya Efesus 6:4.) Imbesrar oso ḇenir Sachiko * doḇe, ”Guru ayesi simarisen insa yana nilai ḇepyum syadi ro bati ḇero ro rumfarkor ya. Awini kako dor fa yana nilai ḇepyum ro rumfarkor, insama guru ayesi ma kamami ḇe Saksi ḇa sna kakara ḇepyum kuker Saksi-Saksi Yahwe sya. Osower ido, awini imarisen yasmai nilai 100 ro ujian yena, yakara ine napyan ḇa. Kirine, taun ḇe taun ḇyenande yamnai ro farkarkor yena kwar. Ḇape, snar pengalaman ani, fyorno ido yakara yabuk roi  ḇepyum syadi kwar faro Yahwe, ḇoi yakara nasrow ḇa kaker ro mamam Ḇyena.”

6. Rosai sinan sya sfarkor ro Mazmur 131:1, 2?

⁶ Sinan sya bisa sfarkor roi oser ḇefandun ro Mazmur 131:1, 2. (Wasya.) Raja Daud doḇe ima ”myander roi ḇekaki syadi manggun ḇa” ḇaido roi ipok ifrur ḇa na. Snar nya sne ḇerun ma isyadadi ḇa nafrur ismai ”samarawraw ma sneprei”. Rosai sinan sya sfarkor ro Daud wos ḇyena? Insama sinan sya sna sne ḇerun ma sisyadadi ḇa, sipok sor nabor ro manggun si ma si kako sor nabor awer ro romawa sesya. Sinan sya bisa sbuk wos sneprei faro romawa sesi fa sifawi rosai bisa sifrur na ma rosai sipok sifrur ḇa na ramnai sifnoḇek si fa sifawi roi siḇe sifrur na. Imbesrar oso ḇenir Marina iwasen kaḇer ḇo doḇe, ”Awin ayedi ima byukikara aya ḇa kuker srar rikyor ayeskoya ḇaido romawa ḇesesya ḇa. Fyarkor aya snar snonggaku oser-oser sna fakamaman ḇemnis kam ḇa ma oser-oser ḇyemaeja ro ḇarpon Yahwe. Snar roi ine, aya kako yabukikara manggundaya kuker ḇesesya ḇa.”

7-8. Rariso snonswa fyasnai syowi faro swari rai?

⁷ Snonswa Kristen oso fandun myam ma ḇyesyowi kaku swari. (1 Ptr. 3:7) Imnis ra, ipok dor syadi ro swari roi syambraḇ byuk na ḇa. Ma byukikara swari ḇa kuker bin ḇesesya. Rosai ḇefnai fa ifrur rarirya awer? Mampan fawar ro imbesrar oso ḇenir Rosa. Swari ima dakḇe Saksi ḇa inja byukikara ker i kuker bin ḇesesya. Wos ḇepyum ḇa ro swari ḇyena nafrur Rosa fyafko ro manggundi ma ḇyeḇirḇar doḇe na oso isya ḇeswar kaku i ke. Ikofen wer ḇo doḇe, ”Fandun fa sbuk wos kakyar ḇefasnai kaku snar Yahwe ima ḇyesyowi Aya.” Imbape, snoswa Kristen fandun fa ḇyesyowi swari snar ifawi roi ifrur ḇe swari na nawyae wis ḇyena kuker Yahwe I. *

⁸ Snonswa fandun fa myanen swari ma ḇesyowi kaku i samaido swari ḇyabir snar ismai saswar ma ḇyefandun. (Ams. 31:28) Ine iso Katerina swari ifrur ya, imnis ḇeyap ro farkarkor ḇepon ya. Swari ḇe snonggaku Kristen kako, ifnoḇek i fyor kyara ipyum syadi ḇa ro snonggaku ḇesesya. Fafisu Katerina ibaḇa ya, snari myamkur i kuker byukikara ker i kuker inaikir ḇesesya, ine faro bati ḇyesi kako. Inja, Katerina byukikara manggundi kako kuker snonggaku ḇesesya ma ifrur rarirya ker rofyor ḇye Saksi-Saksi Yahwe kwar! Ḇape, swari ifnoḇek i fa myam manggundi kuker pyum ma ḇyesewar fa nya kakara ḇepyum kuker ḇyukikara i kuker snonggaku ḇesesya ḇa. Katerina doḇe, ”Iswar aya, byuk wos sandik ḇe aya faro roi ḇepyum yafrur na, ma ḇyenadi faro aya. Kako swarapepen ḇe aya faro Yahwe rari-rari ḇepyum Ḇyena ma ifnoḇek aya fa yasawen kakara ḇesasar ayena.”

9-10. Moḇsa penatua sya sifnoḇek imbesrar oso insama byukikara manggundi awer kuker snonggaku ḇesesya rai?

⁹ Moḇsa penatua sifnoḇek naek srar bena marisen fa ḇebukkara manggun si kuker ḇesesya rai? Mampan fawar imbesrar oso ḇenir Hanuni. Rofyor ibaḇa ya ismai wos sandik ḇa. Doḇe, ”Ayama yamamyai ma yakara romawa ḇesesya sipyum syadi ma sepande ro aya. Rofyor yaḇe Saksi kwar, fyorno ido yabukikara manggundaya kuker ḇesesya.” Ine nafrur kyara dakḇefandun ro  sidang ḇa. Ḇape, kirine duffarmyan ḇe perintis bena aski. Rosai ḇefnoḇek i fa fyadwer mamam ḇyena?

¹⁰ Hanuni doḇe ismai fafnoḇek ro penatua ḇefrur pyum sya. Sikofen ḇe i sikyar kaku i ma sisandik i faro soasuser ḇepyum fyasnai na. Hanuni fyas ḇo doḇe, ”Rarwan riḇeso penatua sya sor aya fa yabuk samarawraw ḇe imḇesrar riḇeso ḇefandun fafnoḇek. Fararur ine nafrur yaḇaḇir sifandun aya. Yaswarepen kaker, rofyor penatua sikofen kasumasa ḇe aya faro fafnoḇek yabuk kwar ḇe imbesrar ḇebabo kaker riḇeso ayeskoya. Ramnai siwasya 1 Tesalonika 1:2, 3 ḇe aya. Ine nafrur yaḇeaski kaku! Snar penatua ḇefrur pyum sine, kirine yafawi snar sesyowi aya ro sidang.

11. Rariso kofnoḇek ḇesanekar ma bena sne ḇerun sya, raris ḇefasnaibos ro Yesaya 57:15?

¹¹ Wasya Yesaya 57:15. Yahwe iswar kaku faro snonggaku ḇesanekar ma bena sne ḇerun sya. Kokame, inema faro penatua sya monda ḇa, na kakfnoḇek fa kobuk samarawraw ḇe naek srar sya. Nyan oser iso kofasnai ḇesi koswar si. Yahwe imarisen kofasnai saswar Ḇyena faro domba-domba Ḇyesi. (Ams. 19:17) Kokako kofnoḇek naek ma srar koḇesi kuker kofasnai sne ḇerun ma kawos nabor awer faro samambraḇ koḇena. Komewer smam manggun ko snar komewer snonggaku ḇesesya sne sena sfafayaf kondi. Ḇape, komarisen roi kawos ma kofrur nakam nbuk samarawraw ḇe naek srar koḇesi.​—1 Ptr. 4:10, 11.

12. Rosai ḇefnai fa snonggaku ḇena sne ḇerun simarisen faro Yesus? (Mam sonin ḇero ḇarpon.)

¹² Kofarkor nabor moḇsa kofrur pyum snonggaku ḇesesya kuker kokarauser nyan moḇsa Yesus ifrur pyum manfamyan ḇyesi raya. Yesus iso snonggaku ḇesambraḇ kaku ḇekenem ro fafisu ya. Ḇape, ima ”imyaren asuser ma sneri ikaki ḇa”. (Mat. 11:28-30) Dakfasnai fawawi ḇekaki ḇyena fa ḇyukidararer i ḇa ma ikofenḇair fawawi ḇyena kam ḇa. Rofyor fyarkor snonggaku sya, dawos wos ḇekaki ḇa ma byuk wos sarḇer ḇepyandam sifawi na, ma nsun ro sisnesna. (Luk. 10:21) Yesus dakmnis ra manfarkin agama ḇeararer sya ḇa. Ifrur fa snonggaku ḇesesya smam snar semaeja ḇe Allah. (Yoh. 6:37) Ifrur pyum snonggaku sarirya kam kuker syowi.

13. Rariso Yesus fyasnai ima ḇyenaḇye ma iswar faro manfamyan ḇyesi?

¹³ Yesus ḇaḇenaḇye ma saswar ḇyena nefasnaiḇair ro nyan ifrur pyum manfamyan ḇyesi. Ifawi snar sna samambraḇ ma fafisu sena namnis kam ḇa. Inja fararur suf na kako naḇeseyae, ramnai barbor ro fararmyan sena namnis kam ḇa kako. Ḇape, imarisen oser-oser sifrur na kuker sne ḇesiper. Ine nasnai ro sarḇer kuker talenta byuk na. Ro sarḇer ani, tuan ani byuk fararur ḇe manfamyan ḇyesi oser-oser ”sisma raris samambraḇ sena.” Oser ro manfamyan risuru ḇemyaren susmai syadi ro ḇesesya. Tuan ani isandik snon ansuya kuker doḇe, ”Fararur bedi ipyum kaku, ne, manfamyan ḇeḇye ma ḇeḇesyowi yedi!”​—Mat. 25:14-23.

14. Rariso koso Yesus nyan ifrur pyum snonggaku ḇesesya rai?

¹⁴ Yesus ima ḇyenaḇye ma iswar ko ine nasnai ro nyan ifrur pyum ko. Ifawi samambraḇ ma fafisu koḇena oser-oser namnis kam ḇa, ma imarisen kofrur roi ḇepyum kaku. Kofrur pyum snonggaku ḇesesya raris Yesus i raya. Kopok kofrur awer min Kristen koḇesi skara sesyowi ḇa ḇaido kofrur awer fa simai snar sifrur  nabor syadi ḇa raris snonggaku ḇesesya sifrur na. Ḇape, komarisen kosewar swaf fa kobuk wos sandik ḇe naek srar koḇesi snar sbuk roi ḇepyum syadi kwar fa suffarmyan ḇe Yahwe.

15-16. Fainda risai imbesrar oso ismai na snar dap roi ḇepyum iḇe ifrur na?

¹⁵ Rofyor kap roi fandun koḇe kofrur ro fararmyan koḇena ḇe Yahwe, kankenem koḇena nari neaski ma nun mararisen. Ḇape roi ḇefandun kaku iso kap roi fandun koḇe kofrur na insama namnis kuker samambraḇ ma fafisu koḇena, ḇoi namnis snonggaku ḇesesya ḇa. Kap roi fandun manggenem ḇa fa koḇe kofrur na ido, imbude na kofafko ma koḇesanekar. (Luk. 14:28) Mgorama komam fawar ro imbesrar perintis ḇenir Midori.

¹⁶ Rofyor Midori ibaḇa kaker, kmari ḇe Saksi ḇa, ifrur mamyai Midori kuker byukikara i kuker doḇe ḇyepande imnis ra kasun ḇyesi ḇa ma ḇati ro kelas ḇyedi. Midori doḇe, ”Yakara sifandun aya ḇa.” Ḇape, rofyor iba muryas, Midori insape ikyar manggundi. Doḇe, ”Yawasya Refo ro ras ḇe ras iso ḇefrur yasmai sne ḇeknon ma yakyar snar Yahwe iswar aya.” Osower ido, Midori dap roi ḇepyum fandun iḇe ifrur na ma ḇyenadi insama Yahwe ifnoḇek i. Barakas ya, Midori ismai raryaḇ snar roi ifrur faro Yahwe.

17. Rariso kofarwei nyan kakara koḇena rai, ma payamyum rosai kosmai na?

¹⁷ Sneḇaḇir ma kakara ḇesasar koḇena kuker manggun ko imbude napromes ḇeri ḇa. Inja Yahwe danun ḇe ko, nyan kakara ḇeḇor mkoḇena fandun fa nefararwei ḇaido nbabo kam pdef. (Ef. 4:23, 24) Iso ḇewar fa koḇenadi pdef, kofarkor Refo,  ma kokarauser na. Kor samambraḇ ro Yahwe. Papoik ro rur ḇesren ḇyedi na nafnoḇek Au fa pampum marasrisen fa bukimam kara manggundaw kuker snonggaku ḇesesya. Kuker fafnoḇek ro Yahwe, na wafawi ausya nwa sne ḇefafayaf ma ararer, ma nari ifnoḇek Au fa wafrur fararwei ḇeri.

18. Rariso manggundaw wasmai sneprei ro wos ḇero 2 Tawarikh 6:29, 30?

¹⁸ Wasya 2 Tawarikh 6:29, 30. Yahwe ifawi roi ḇero kosnesna. Ifawi kako snar koḇesewar kaku fa kopampum roi ḇeḇye ḇa ro dunya ine ma ḇaḇeraryar ḇa manggun koḇena. Rofyor Yahwe myam koḇesewar kaku kopampum roi anna, nafrur fa iswar kaku ko.

19. Rariso Yahwe fyasnaiḇair sneḇaḇir Ḇyena faro ko?

¹⁹ Yahwe dap saswar ro awin oso ḇe kapira ḇyedi fa fyasnaiḇair sneḇaḇir Ḇyena faro ko. (Yes. 49:15) Mampan wos ro awin oso ḇenir Rachel. Fyas radine, ”Romawa yedi, Stephanie, paik ḇyena namnis ḇaim ḇo yakapari. Randak yamam i, ibaḇa mgun kaku ma syambraḇ ḇa. Swaf paik oser, sriri ro inkubator. Ḇape, dokter byuk fa yaforaweni ro ras ḇe ras. Nane nafrur aya ma kapira yedi nuna wis ḇesambraḇ. Kirine ḇyetaun riwonem kwar, ma ḇaken ḇyena nggasun syadi ro romawa ḇeumur mnis kuker insya. Mboi, yaswar fafaya i ḇa kukro ḇyesewar kaku fa ikenem, ma ifrur yamarisen kaku!” Rarirya kako kuker Yahwe I, iswar fafaya koḇa rofyor myam koḇesewar kaku fa kuffarmyan I kuker sne ḇesiper. Roi ine nbuk sneprei kaku ḇe ko!

20. Snar waḇe Yahwe manfamyan Ḇyedi, rosai monda ḇefrur fa wamarisen ḇaido waryaḇ?

²⁰ Snar koine Yahwe manfamyan Ḇyesi ko, Auso oser ro Yahwe kina Ḇyedi ma ḇemaeja kaku. Yahwe dun Au ḇe I inema snar wapyum syadi ro snonggaku ḇesesya ḇa. Ḇape, snar myam kaku sne Bedi, ma myam snar nwa sne ḇerun, wamarisen wafarkor ro I, ma wamarisen wafrur fararwei. (Mz. 25:9) Wakyar kaku, Yahwe imarisen fyor ḇesewar fa wuffarmyan I. Ḇaḇefarmku ma soasuser Ḇena nfasnai kaku snar ’sne [Bedi] nasiper ma ḇaḇye’. (Luk. 8:15) Inja, buk roi ḇepyum syadi pdef faro Yahwe, ma nari wamarisen ma waryaḇ ”snar manggundaw”.