1. ?From wanem Jehova i no komperem yumi wetem narafala?

JEHOVA i laekem ol defdefren kaen samting. Yumi luksave samting ya tru long kriesen, inkludum yumi ol man. Yumi evriwan i defdefren. Mo Jehova i neva komperem yu wetem ol narafala. Hem i luk samting we i stap dip insaed long hat blong yu. (1 Saml. 16:7) Mo tu, hem i save samting we yu naf blong mekem, samting we yu no naf blong mekem, mo bakgraon blong yu. Mo hem i no askem yu blong mekem moa long wanem we yu yu naf blong mekem. Yumi mas luk yumi wan olsem we Jehova i luk yumi. Nao, bambae yumi gat “stret tingting” mo yumi no tinghae tumas o ting nating long yumi wan.—Rom 12:3.

2. ?From wanem i nogud blong skelem yumi wan wetem narafala?

² I tru, yumi save lanem plante gudfala samting long eksampol blong wan brata o sista we i gat gudhan long wok blong prij. (Hib. 13:7) Eksampol blong olgeta i save halpem yumi blong kamgud moa long wok blong prij. (Fil. 3:17) Be fasin ya blong folem gudfala eksampol blong wan man, i defren long fasin ya blong skelem yu wetem hem. Sipos yumi stap skelem yumi wan wetem ol narafala, yumi save kam jalus, tingting i foldaon, o yumi ting nating long yumi wan. Olsem yumi luk long las stadi, sipos yumi traem winim ol narafala long kongregesen, hemia i save spolem yumi long saed blong spirit. Taswe Jehova i enkarejem yumi se: “I gud man i jekem wok we hem nomo i mekem, blong faenemaot se wok ya i olsem wanem. Olsem nao, hem i save glad from wok we hem nomo i mekem, be i no from we hem i skelem wok blong hem wetem wok blong narafala.”—Gal. 6:4.

3. ?Wanem sam progres we yu bin mekem mo yu glad from?

³ Jehova i wantem se yu glad long ol traehad we yu nomo yu  mekem. Eksampol, sipos yu baptaes, !yu sud glad se yu kasem mak ya! Yu nomo yu mekem desisen ya from yu lavem God. Tingbaot ol progres we yu bin mekem kam kasem naoia. Eksampol, ?yu yu ridim Baebol mo stadi dip moa? ?Ol prea blong yu oli kam gud moa? (Sam 141:2) ?Yu yu kamgud moa long fasin blong statem storian mo yusum ol defren tul blong prij? Mo sipos yu gat wan famle, ?Jehova i bin halpem yu blong kam wan gudfala hasban, waef, o perens? Sipos yes, yu save glad mo haremgud long ol progres ya we yu bin mekem.

4. ?Bambae yumi tokbaot wanem long stadi ya?

⁴ Yumi save halpem ol narafala blong oli glad long ol traehad we olgeta wan oli mekem blong wosipim Jehova. Mo tu, yumi save halpem olgeta blong oli stop blong komperem olgeta wetem narafala. Long stadi ya, bambae yumi luk olsem wanem ol perens oli save halpem ol pikinini blong olgeta, olsem tufala we i mared i save givgivhan long tufala, mo olsem wanem ol elda mo ol narafala oli save halpem ol brata mo sista. Biaen, bambae yumi tokbaot sam rul blong Baebol we oli save givhan long yumi blong putum sam mak we yumi save kasem folem wanem we yumi naf blong mekem, mo folem situesen blong laef blong yumi.

5. Folem Efesas 6:4, ?ol perens oli mas lukaot blong no mekem wanem?

⁵ Ol perens oli mas lukaot blong no komperem wan pikinini wetem wan narafala o askem hem blong mekem mo long wanem we hem i naf blong mekem. Sipos oli mekem olsem, hemia bambae i mekem tingting blong pikinini blong olgeta i foldaon. (Ridim Efesas 6:4.) Wan sista nem blong hem Sachiko * i talem se: “Ol tija blong mi oli ekspektem mi blong kasem ol gudfala mak moa bitim ol narafala pikinini long skul. Antap long hemia, mama blong mi i wantem se mi wok had long skul blong mi save givim wan gudfala witnes long tija blong mi, mo long papa blong mi we i no wan Witnes. Hem i wantem se mi kasem 100 pesen long ol eksam blong mi, we long mi hemia i no posibol. Nating se plante yia nao mi no moa go long skul, be samtaem mi no sua sipos mi givim bes blong mi long Jehova.”

6. ?Ol perens oli save lanem wanem long Ol Sam 131:1, 2?

⁶ Wan impoten lesen blong ol perens i stap long Ol Sam 131:1, 2. (Ridim.) King Deved i  talem se hem i “no stap traehad blong kasem sam bigfala samting” o mekem sam samting we hem i no naf blong mekem. From we hem i gat tingting daon, tingting blong hem i ‘kwaet mo i harem gud.’ ?Ol perens oli save lanem wanem long ol tok ya blong Deved? Ol perens we oli gat tingting daon oli no fosem olgeta wan blong mekem ol samting we oli no naf blong mekem, be long semtaem oli no mas fosem ol pikinini blong olgeta blong mekem moa long wanem we oli naf blong mekem. Ol perens oli save mekem pikinini blong olgeta i haremgud, taem oli luksave samting we pikinini i naf blong mekem mo samting we hem i no naf blong mekem, mo halpem hem blong putum sam mak we hem i save kasem. Wan sista nem blong hem Marina i talem se: “Mama blong mi i neva komperem mi wetem ol trifala brata blong mi o wetem ol narafala pikinini. Hem i tijim mi se evri man i gat gudhan blong mekem defdefren samting mo se yumi wanwan i sas long ae blong Jehova. Mi talem tangkiu long hem, from hemia i halpem mi blong no komperem mi wetem ol narafala.”

7-8. ?Olsem wanem wan hasban i soem se i ona long waef blong hem?

⁷ Wan Kristin hasban i mas ona long waef blong hem. (1 Pita 3:7) Ona i min se yu soem intres mo yu respektem narafala. Eksampol, wan hasban we i ona long waef blong hem, i luk se waef blong hem i moa impoten long hem. Hem i no askem waef blong hem blong givim samting we hem i no naf blong givim. Mo hem i no komperem hem wetem ol narafala woman. ?Wan woman bambae i harem olsem wanem sipos hasban blong hem i stap komperem hem? Wan sista nem blong hem Rosa, mo we hasban blong hem i no stap long trutok, oltaem i stap komperem Rosa wetem ol narafala woman. Ol rabis tok blong hem i mekem Rosa i harem nogud, be tu hem i ni sua sipos i gat man we i rili lavem hem. Hem i talem se: “Oltaem mi mas rimaenem mi wan se Jehova i tinghae long mi.” Be wan Kristin hasban i defren. Hem i mas ona long waef blong hem. Hem i save se fasin ya bambae i afektem frensip blong hem wetem waef blong hem mo wetem Jehova. *

⁸ Wan hasban we i ona long waef blong hem, i talem ol gudfala tok long saed blong waef blong hem long ol narafala man, i talem long hem se i lavem hem mo se hem i impoten. (Prov. 31:28) Hemia nao samting we hasban blong Katerina, we yumi tokbaot hem finis long las stadi, i mekem blong halpem hem blong winim nogud filing ya se ol narafala oli gud moa long hem. Taem hem i pikinini, oltaem mama blong hem i daonem hem mo i komperem hem wetem ol narafala gel, inkludum ol fren blong hem. From samting ya, Katerina i stat blong komperem hem wetem ol narafala mo hem i gohed blong mekem olsem afta we hem i kam long trutok. Be hasban blong hem i givhan long hem blong winim fasin ya mo blong u gat stret tingting long hem wan. Katerina i talem se: “Hem i lavem mi, hem i talem ol gudfala tok from ol samting we mi mekem, mo i prea from mi. Mo tu, hem i rimaenem mi long ol naesfala fasin blong Jehova, mo i halpem mi blong stretem ol rong tingting blong mi.”

9-10. ?Olsem wanem ol elda oli halpem wan sista blong i no komperem hem wetem narafala?

⁹ ?Olsem wanem ol elda oli save halpem olgeta we oli stap komperem olgeta wetem narafala? Tingbaot ekspiriens blong wan sista we nem blong hem Hanuni, we taem hem i pikinini, oli neva talem gudfala toktok long hem.  Hem i talem se: “Mi mi stap sem mo mi harem se ol narafala pikinini oli gud moa long mi. Stat taem mi pikinini mi stap komperem mi wetem ol narafala.” Iven afta we Hanuni i kam long trutok, hem i gohed blong komperem hem wetem ol narafala. From samting ya, hem i harem se hem i no impoten long kongregesen. Nating se i olsem, naoia hem i mekem wok blong paenia mo i glad tumas. ?Wanem i halpem hem blong jenisim fasin blong hem?

¹⁰ Hanuni i talem se ol elda oli kaen mo oli halpem hem. Oli talem se hem i impoten insaed long kongregesen mo oli talem tangkiu from gudfala eksampol blong hem. Hem i talem se: “Wanwan taem ol elda oli askem mi blong enkarejem sam sista we oli nidim help. Hemia i mekem mi harem se oli nidim mi. Mi tingbaot we ol elda oli talem tangkiu long mi from we mi enkarejem sam yangfala sista. Biaen oli ridim 1 Tesalonaeka 1:2, 3 long mi. !Samting ya i tajem hat blong mi! Tru long ol elda ya, mi luksave se mi gat wan impoten wok insaed long oganaesesen blong Jehova.”

11. Folem Aesea 57:15, ?olsem wanem yumi save halpem olgeta we oli “harem nogud tumas mo we tingting blong olgeta i foldaon”?

¹¹ Ridim Aesea 57:15. Jehova i kea bigwan long olgeta we oli “harem nogud tumas mo we tingting blong olgeta i foldaon.” I no ol elda nomo be yumi evriwan i save help blong enkarejem ol gudfala brata mo sista ya. Wan rod we yumi save enkarejem olgeta, hemia taem yumi soem se yumi kea long olgeta. Jehova i wantem we yumi soemaot long olgeta se hem i lavem olgeta tumas. (Prov. 19:17) Mo tu, yumi save halpem ol brata mo sista blong yumi taem yumi gat tingting daon mo yumi no flas from samting we yumi naf blong mekem. Yumi no wantem mekem samting blong pulum man blong i lukluk yumi, from yumi no wantem mekem narafala i jalus. Defren olgeta, yumi wantem yusum gudhan mo save blong yumi blong enkarejem ol narafala.—1 Pita 4:10, 11.

12. ?From wanem ol man we oli gat tingting daon oli laekem Jisas? (Yu luk pija long fran pej.)

¹² Eksampol blong Jisas i save tijim yumi olsem wanem blong tritim gud ol narafala. Hem i man ya we i hae moa long olgeta man, be yet hem i wan “kwaet man mo tingting blong [hem] i stap daon.” (Mat. 11:28-30) Hem i neva flas from bigfala waes mo save we hem i gat. Taem hem i tij, hem i yusum ol simpol toktok mo pijatok we i save kasem hat blong ol man we i gat tingting daon. (Luk 10:21) Jisas i no olsem ol lida blong skul we oli praod, mo hem i neva mekem ol man oli harem se oli nating nomo long lukluk blong God. (Jon 6:37) Mo hem i soemaot se hem i respektem ol man.

13. ?Olsem wanem Jisas i soem se hem i kaen mo i gat lav?

¹³ Fasin we Jisas i mekem long ol disaepol i soemaot klia se hem i kaen mo i gat lav. Hem i save se olgeta wanwan oli gat gudhan blong mekem defren wok mo laef blong olgeta i no sem mak. Taswe oli no save mekem sem samting o kasem sem risal long wok blong prij. Be yet, hem i glad long traehad blong olgeta mo hem i soemaot samting ya tru long parabol blong talen mane. Long parabol ya, masta i givim wok long wanwan slef, “folem samting we oli naf blong mekem.” Wan long tufala slef ya i winim moa mane i bitim narawan. Be masta i talem semfala toktok long tufala, i se: “!Gudfala wok! !Yu yu wan gudfala slef we yu stap wok gud oltaem!”—Mat. 25:14-23.

14. ?Olsem wanem yumi save folem eksampol blong Jisas?

¹⁴ Fasin blong Jisas blong dil wetem yumi i soem se hem i kaen mo i gat lav. Hem i save se yumi evriwan i gat gudhan blong mekem defdefren wok, mo se laef blong yumi i no sem mak, mo hem i glad nomo taem yumi mekem bes blong yumi. Yumi mas folem eksampol  blong Jisas. Yumi neva wantem mekem ol narafala Kristin oli harem se oli nating nomo, o mekem oli sem from we oli no naf blong mekem plante wok olsem ol narafala. Be oltaem yumi wantem tekem janis blong talem gudfala toktok long olgeta, from oli mekem bes blong olgeta blong wosipim Jehova.

15-16. ?Wan sista i kasem wanem taem i putum ol mak we i stret long hem?

¹⁵ Taem yumi gat ol mak long saed blong spirit, bambae laef blong yumi i gat mining mo yumi glad. Be mak we yumi wantem putum i mas folem wanem we yumi naf blong mekem mo situesen blong laef blong yumi, be i no folem mak blong narafala. Sipos yumi mekem olsem, bambae yumi no harem nogud mo tingting blong yumi i no foldaon. (Luk 14:28) Traem luk eksampol blong wan paenia sista we nem blong hem Midori.

¹⁶ Taem Midori i pikinini, oltaem papa blong hem we i no Witnes i stap tok daonem hem, i stap komperem hem wetem ol brata sista blong hem mo wetem ol pikinini long skul. Midori i se: “Mi harem se mi nating nomo.” Be taem hem i stap gruap, hem i stat blong gat stret tingting long hem wan. Hem i se: “Evri dei mi ridim Baebol blong mi save gat pis long hat blong mi mo blong mi haremsave se Jehova i lavem mi.” Mo tu, hem i putum sam mak we i stret long hem mo i prea long Jehova blong i halpem hem blong kasem ol mak ya. Hemia i halpem Midori blong i glad long ol samting we hem i naf blong mekem blong Jehova.

17. ?Wanem i save halpem yumi blong jenisim tingting blong yumi, mo wanem bambae i kamaot from?

¹⁷ Ol nogud tingting mo filing oli no save lus long wan naet nomo. Taswe Jehova i talem long yumi se: “Yufala i mas gohed blong mekem se paoa we i stap pusum tingting blong  yufala, i kam niuwan.” (Efes. 4:23, 24) Blong mekem samting ya, yumi mas prea, stadi Baebol, mo tingting dip. Yu mas gohed blong mekem ol samting ya mo askem Jehova blong i givim paoa long yu. Nao tabu spirit blong hem bambae i givhan long yu blong no skelem yu wan wetem narafala. Mo tu, Jehova bambae i halpem yu blong save sipos yu gat fasin blong jalus o praod, mo bambae i halpem yu blong rutumaot nogud fasin ya kwiktaem.

18. ?Olsem wanem 2 Kronikel 6:29, 30 i leftemap tingting blong yumi?

¹⁸ Ridim 2 Kronikel 6:29, 30. Jehova i savegud samting we i stap long hat blong yumi. Mo tu, hem i save we yumi stap traehad blong faet agensem ol rabis fasin blong wol mo sin we i stap long yumi. Taem Jehova i luk we yumi traehad olsem, hem i lavem yumi moa.

19. ?Jehova i yusum wanem eksampol blong soemaot se hem i lavem yumi?

¹⁹ Blong kasemsave filing we Jehova i gat long yumi, Jehova i yusum eksampol blong lav we wan mama i gat long bebi blong hem. (Aes. 49:15) Tingbaot eksampol blong wan mama nem blong hem Rachel. Hem i talem se: “Gel blong mi Stephanie i bon we i no taem blong hem yet. Faswan taem we mi luk hem, hem i smol we i smol mo i no gat paoa. Be ol dokta oli letem mi mi karem hem evri dei long faswan manis we hem i stap long glas. Long taem ya, mi harem se mi kam klosap moa long bebi blong mi. Naoia hem i gat sikis yia mo hem i smol moa long ol narafala pikinini we oli gat sem yia olsem hem. !Nating se i olsem, mi lavem hem tumas from we hem i faet strong blong stap laef mo hem i mekem mi mi glad tumas long laef blong mi!” !Yumi harem gud blong save we Jehova i lavem yumi tumas, taem hem i luk we yumi givim bes blong yumi long hem!

20. ?Wanem i mekem se ol man blong Jehova oli glad?

²⁰ From we yu yu wan man blong Jehova, i no gat wan narafala man we i olsem yu, mo yu yu sas insaed long famle blong hem. Jehova i no pulum yu yu kam long hem from we yu gud moa long ol neba blong yu. Hem i pulum yu from we hem i luk hat blong yu, i luk se yu gat tingting daon mo yu rere blong letem hem i jenisim yu. (Sam 25:9) Yu save sua se hem i glad taem yu mekem bes blong yu long wok blong hem. Fasin blong yu blong stanap strong mo holemstrong long hem, i pruvum se yu gat wan “hat [we] i stret mo i gud.” (Luk 8:15) Taswe i gud yu gohed blong givim bes blong yu long Jehova. Nao bambae yu glad ‘from wok we yu nomo yu mekem.’