1. Mase lang ongga ibanding-bandingkon Jahowa hita pakon na halak legan?

MARMASAM do ganup tompaon ni Jahowa. Dong marmasam planet, binatang, ampa na legan. Sonai homa jolma pe lang adong na sarupa. Jadi lang ongga ibandingkon Jahowa ham pakon halak na legan. Ibotoh Ia do aha na ibagas uhurmu. (1 Sam. 16:7) Ibotoh Ia do homa sadiha bahat na boi tarbahen ham. Lang ongga ipindo Ia na lang boi tarbahen ham. Anggo tongtong idingat hita ai, gabe ‘pandei ma hita maruhur’. Maksudni lang gabe iahap hita gijangan hita marimbangkon na legan. Anjaha lang homa iahap hita lang maharga dirinta.​—Rom 12:3.

2. Mase lang dear anggo ibandingkon hita dirinta pakon halak na legan?

² Bahat do na boi iparlajari hita humbani hasoman i kuria. (Heb. 13:7) Umpamani, boi do hita marlajar humbani sidea sonaha carani ase lambin pandei ibagas pangidangion. (Pil. 3:17) Tapi sanggah hita marlajar humbani sidea, sedo artini ai ibandingkon hita dirinta pakon sidea. Halani anggo ibahen hita sonai, gabe simburu ma holi hita atap pe maretek ni uhur. Bani artikel na salpu domma iulas hita anggo marusaha hita gabe gijangan marimbangkon na legan, gabe lang orot be parhasomananta pakon Jahowa. Halani ai, ibere Jahowa do podah on hubanta, “Ganup ma mamareksa horjani bei, jadi halani dirini tumang ma ia mamuji-muji diri, sedo halani na legan.”​—Gal. 6:4.

3. Hamajuon aha do na dob ibahen ham na mambahen malas uhurmu?

 ³ Sihol do Jahowa ase malas uhurmu mambahen hamajuon ibagas pangidangion. Halani holong uhurmu bani Jahowa, ibahen ham do keputusan laho ididi. Tontu malas do uhurmu halani ai. Anjaha dobkonsi ai pe, dong do homa hamajuon na ibahen ham. Umpamani, ra do domma lambin bagas na iarusi ham isi ni Bibel. Ra do homa domma humbani gok ni uhur ham martonggo. (Ps. 141:2) Ibotoh ham do homa carani mambahen kata pengantar sanggah marbarita. Anjaha lambin pandei do ham manggunahon publikasi na ipakei laho mangajarhon Bibel. Anggo domma markaluarga ham, iurupi Jahowa do ham ase boi gabe suami, istri, atap pe namatoras na bujur. Tontu malas do uhurmu anggo ibahen ham hamajuon sisonai.

4. Aha do na laho iulas hita bani artikel on?

⁴ Urupi hita ma halak na legan ase malas homa uhur ni sidea mangidangi Naibata. Urupi hita homa sidea ase ulang ibandingkon sidea dirini pakon na legan. Bani artikel on, iulas hita ma sonaha sidea na dob marhajabuan boi mangurupi pasanganni pakon anakni ase ulang mambandingkon dirini pakon na legan. Iulas hita homa sonaha sintua boi mangurupi halak i kuria. Dob ai, iulas hita do holi prinsip ni Bibel na boi mangurupi hita mambahen tujuan na sosok pakon kesanggupanta.

5. Domu bani Galatia 6:4, aha do na lang boi ibahen namatoras hubani anakni?

⁵ Ulang ma ibandingkon namatoras anakni pakon na legan. Janah ulang ipindo sidea na lang boi tarbahen anakni. Anggo ibanding-bandingkon nasiam anakmu, gabe maretek ni uhur holi sidea. (Basa Epesus 6:4.) Botou Sachiko * mangkatahon, “Hinan ihatahon guru do bangku maningon ahu do na sipandeinan i kalasku. Janah ihatahon inang do homa anggo ujian ahu lang boi adong na salah hubahen jawabanni. Ai do nini carani patuduhkon bani bapangku na lang saksi pakon gurungku anggo Saksi Jahowa ai do ugama na sintong. Tapi lang tarbahen ahu ai. Halani ai, huahap ma lang marosuh Jahowa hubangku age pe domma hubahen na sidearan. Sonai ma lalab pangahapku age dob tamat sikolah ahu.

6. Aha do na boi iparlajari namatoras humbani Psalmen 131:1, 2?

 ⁶ Dong do homa na boi iparlajari namatoras humbani Psalmen 131:1, 2. (Basa.) Ijai ihatahon si Daud do ‘seng habanggalon na iayak-ayak ia barang hatimbulon na mangatasi dirini’. Halani toruh maruhur si Daud, ihasonangkon ia do aha na dong bani. Gabe damei ma pangahapni. Sonai homa namatoras, maningon martoruh ni uhur do homa nasiam. Ulang ibahen nasiam tujuan na lang masuk akal. Anjaha ulang homa ipindo nasiam na lang tarbahen anakmu. Maningon ibotoh nasiam do sadiha bahat na boi tarbahen anakmu. Janah urupi ma sidea mambahen tujuan na sosok pakon kesanggupan ni sidea. Botou Marina mangkatahon, “Lang ongga ibandingkon inang ahu pakon sanina botouhu atap bani na legan. Tapi iajarhon ia do maharga do ganup halak bani Jahowa. Janah lang sarupa na boi ibahen tiap halak. Jadi malas uhurhu halani ronsi sonari lang hubandingkon diringku pakon ma legan.”

7-8. Sonaha suami boi mangkargai istrini?

⁷ Maningon ihargai suami do istrini. (1 Ptr. 3:7) Halani ai, maningon bujur do suami bani istrini. Tontu lang ipindo suami aha na lang tarbahen istrini. Anjaha lang boi homa ibandingkon ia istrini pakon naboru na legan. Mase sonai? Pardiateihon ma pangalaman ni Botou Rosa na suamini lang Saksi. Kasar tumang parsahap ni suamini hu bani. Janah gati do homa ia ibandingkon pakon naboru na legan. Halani ai, iahap si Rosa ma lang maharga dirini. Nini ma, “Gabe ragu do ahu, ai ihaholongi Jahowa do ahu atap lang.” Halani ai, maningon ihargai suami Kristen do istrini. Anggo lang ibahen sonai, lang orot be holi ia pakon istrini tarlobih ma pakon Jahowa. *

⁸ Sahalak suami boi mangkargai istrini marhitei mangkaholongisi ampa mamujisi. (Pod. 31:28) Ai ma na ibahen suami ni si Katarina. Bani artikel na salpu, isaritahon do gati do iahap si Katarina lang maharga dirini. Halani sanggah dakdanak ia, ibandingkon inangni do ia pakon na legan. Dobkonsi magodang pe, gati do si Katarina mambandingkon dirini pakon halak age pe domma Saksi Jahowa ia. Tapi iurupi suamini ma ia ase lang sonai lalab pangahapni. Nini si Katarina do, “Holong tumang do ia bangku. Ipuji ia do pambahenanku na dear. Itonggohon ia do homa ahu. Gati do itarsingati ia bangku pasal sifat ni Jahowa. Anjaha sai tongtong do iurupi ia ahu mangubah cara marpingkirku.”

9-10. Sonaha sintua mangurupi sada botou ase lang mambandingkon dirini pakon na legan?

⁹ Sonaha sintua mangurupi sanina botou ase lang mambandingkon dirini pakon na legan? Pardiateihon ma pangalaman ni si Hani. Lang ongga ia ipuji sanggah dakdanak. Nini do, “Gabe parmaila tumang ma ahu. Jagonan do huahap hasomanku na legan marimbangkon ahu. Gabe hubandingkon ma diringku pakon halak.” Dobkonsi ididi pe si Hani, sai tong do ibandingkon ia dirini pakon halak i kuria. Halani ai, lang maharga be pangahapni dirini. Tapi sonari domma gabe perintis biasa ia janah malas uhurni. Aha do na mangurupi ia mambahen parubahan?

 ¹⁰ Ihatahon si Hani do bujur tumang sintua hu bani. Ipuji sidea do pambahenanni na dear. Nini si Hani, “Ongga do ipindo sintua ahu laho mangurupi piga-piga hasoman i kuria. Malas tumang uhurhu halani dong hape na boi hubahen laho mangurupi hasoman. Ipuji sintua do homa ahu halani dong piga-piga na maposo na huurupi i kuria. Ibasahon sintua ma hubangku 1 Tessalonika 1:2, 3. Malas tumang uhurhu halani holong do sidea hubangku. Sonari hubotoh do bahat do hape na boi hubahen laho mangurupi kuria.”

11. Sonaha hita boi mangurupi halak na marpusok ni uhur, songon na ipatugah bani Jesaya 57:15?

¹¹ Basa Jesaya 57:15. Holong tumang do uhur ni Jahowa bani “partonduy na marosak” atap na marpusok ni uhur. Ganup do hita boi mangurupi hasoman i kuria lang pitah sintua. Maningon parduli do hita hubani sanina botou. Sihol do Naibata ase tongtong iurupi hita sidea porsaya harga tumang do sidea i lobei ni Naibata. (Pod. 19:17) Maningon totap do homa hita martoruh ni uhur. Ulang ma hita pajuntul-juntulhon diri bani na legan. Halani boi do ai mambahen sidea gabe simburu hubanta. Tapi gunahon hita ma hapentaranta laho mangurupi na legan.​—1 Ptr. 4:10, 11.

12. Mase bahat halak sihol dohor bani Jesus? (Tonggor ma gambar sampul.)

¹² Bahat do na boi iparlajari hita humbani Jesus. Halak na ‘lamlam janah toruh maruhur’ do ia. (Mat. 11:28-30) Age pe pentar tumang ia, tapi lang ra ia pajuntul-juntulhon dirini. Sanggah mangajar, sederhana do bahasani janah igunahon ia contoh-contoh na urah iarusi. (Luk. 10:21) Halani ai, gabe hona ma pangajaranni ai bani halak na mambogei. Lang ongga ia layas mangidah halak songon na ibahen pemimpin ugama hinan. Tapi ihatahon ia do bani susianni harga tumang do sidea bani Jahowa. (Joh. 6:37) Bujur tumang do ia bani ganup halak.

13. Sonaha Jesus patuduhkon holongni bani susianni?

¹³ Holong janah parduli do Jesus bani susianni. Ibotoh ia do sadihat bahat na boi tarbahen susianni. Jadi lang sarupa tugas atap pe tanggung jawab na ibere bani sidea. Tapi malas do uhurni anggo marusaha sidea mambahen na sidearan. Ibotoh hita do ai humbani contoh na isaritahon ia pasal talenta. Ijai isaritahon do dong majikan na mambere tugas bani jabolonni “domu hubani gogohni” bei. Hassi pe dong jabolon na mandapot hasil na sibanggalan marimbangkon jabolon na sada nari, tapi sarupa do pujian na ibere majikan ai bani sidea. Nini do, “Dear ma ai, ale juakjuak sidear uhur anjaha hatengeran.”​—Mat. 25:14-23.

14. Sonaha hita boi maniru Jesus?

¹⁴ Bujur anjaha holong do homa Jesus hubanta. Ibotoh ia do homa sadiha bahat na boi tarbahen hita. Janah malas uhurni anggo ibahen hita na sidearan. Jadi, tiru hita ma homa Jesus. Ulang ma ibandingkon hita sanina botou pakon na legan. Halani gabe maila do holi sidea atap maretek ni uhur. Tapi puji hita ma sidea halani domma ibahen sidea na sidearan laho mangidangi Jahowa.

15-16. Sonaha ma pangahap ni sada botou halani mambahen tujuan na sosok pakon kesanggupanni?

¹⁵ Tontu malas tumang uhurta anggo dong cita-cita na ibahen hita ibagas mangidangi Jahowa. Ulang ma ibahen hita cita-cita pitah halani ase sarupa pakon na legan. Halani anggo lang saud cita-citanta ai, gabe maretek ni uhur ma hita. Jadi dearan do anggo ibahen hita cita-cita atap pe tujuan na sosok pakon kesanggupanta. (Luk. 14:28) Pardiateihon ma pangalaman ni Botou Midori na mangidangi gabe perintis biasa.

 ¹⁶ Lang Saksi bapa ni si Midori. Hinan gati do ia ibandingkon bapani pakon sanina botouni atap bani hasomanni sakalas. Nini si Midori ma, “Lang marguna be huahap ahu.” Tapi dob magodang lang be sonai pangahap ni si Midori. Nini do, “Hubasa ma Bibel bai ganup ari. Gabe damei ma uhurhu. Gabe pos do uhurhu ihaholongi Jahowa do ahu.” Dob ai, ibahen si Midori ma cita-cita na sosok pakon kesanggupanni. Anjaha itonggohon ia do homa ase boi saud cita-citani ai. Gabe malas tumang uhurni halani lang ibandingkon ia dirini pakon na legan.

17. Sonaha hita boi mambahen hamubahon ibagas uhur pakon pingkiran, anjaha aha do gunani ai hubanta?

¹⁷ Tontu lang urah mambahen hamubahon ibagas uhur ampa pingkiran. Halani ai iparentahkon Jahowa do hita, “Gabe bayu ma nasiam ibagas tonduy ni uhur nasiam.” (Ep. 4:23, 24) Jadi, maningon martonggo do hita, marlajar Bibel ampa manrimangi isini. Dalankon hita ma homa na iparlajari hita. Pindo ma hagogohon bani Jahowa. Ibere Jahowa ma holi tonduy-Ni laho mangurupi hita ase lang mambandingkon diri pakon na legan. Hasilni, iurupi Jahowa ma hita mambahen parubahan anggo mulai hita simburu bani na legan, atap pe anggo dong gijang ni uhur ibagas dirinta.

18. Mase hata na isurat bani 2 Kronika 6:29, 30 boi mangapoh hita?

¹⁸ Basa 2 Kronika 6:29, 30. Ibotoh Jahowa  do na ibagas uhurta. Anggo marusaha hita mangkorjahon na dear age pe lang urah iahap hita, ipardiateihon Jahowa do ai. Ai do na mambahen lambin banggal holong ni uhur-Ni hubanta.

19. Contoh aha do na ibere Jahowa laho patuduhkon holong-Ni hubanta?

¹⁹ Ase boi iarusi hita sonaha holong ni Jahowa hubanta, rimangi sonaha holong ni sada inang bani anakni. (Jes. 49:15) Pardiateihon ma pangalaman ni Botou Rahel. Nini do, “Sanggah tubuh borungku si Stephani, hurang ope umurni. Prematur do ia. Etek tumang dagingni. Ipamasuk ma ia hu inkubator. Bani bulan na parlobei, ibere dokter ma ahu tiap ari manonggor ia anjaha mandahopsi. Sadokah ai ma lambin holong uhurhu bani borungku ai. Sonari domma marumur onom tahun ia. Tapi etek do dagingni lang songon hasomanni na saumuran pakonsi. Lambin holong do uhurhu halani lang pala sehat ia songon na legan. Malas tumang uhurhu mangidahsi.” Sonai ma homa holong ni Jahowa hubanta. Sanggah ididah Ia marusaha hita mangidangi-Si humbani gok ni uhurta, lambin holong ma uhur-Ni banta.

20. Aha do sasintongni na boi mambahen hita marmalas ni uhur?

²⁰ Harga tumang do ganup hita i lobei ni Jahowa. Lang ongga ibeda-bedahon Ia hita. Sedo halani hapentaranta ipilih Ia hita laho mangidangi-Si. Tapi uhurta do na ididah Naibata. Itonggor Ia do anggo hita halak na martoruh ni uhur anjaha ra manjalo podah. (Ps. 25:9) Pos ma uhurta malas tumang do uhur-Ni anggo marusaha hita mambahen na sidearan hu Bani. Halani totap setia nasiam, on patuduhkon dong do “uhur na bonar anjaha na madear” ibagas dirimu. (Luk. 8:15) Halani ai, marusaha ma mambere na sidearan bani Jahowa. Gabe malas tumang ma uhurta halani lang ibandingkon hita dirinta pakon na legan.