1. Engkai maka la bandingken Jahwe kita ras kalak si deban?

ATE Jahwe labo gelah seri kerina manusia. Enda terbukti arah ciptanNa si luar biasa, termasuk manusia. Labo lit kalak si seri kel ras kam. Emaka labo pernah bandingken Jahwe kam ras kalak si deban. ItehNa uga kin kam situhuna. (1 Sam. 16:7) ItehNa ka kai si banci lakokenndu alu mehuli, kai si la banci lakokenndu, janah tehNa uga kam ipebelin. Labo pindoNa lakokenndu lebih asangken kengasupenndu. Banci sinen dirita bagi cara Jahwe ngenen kita. Alu bage, la lebihsa ntah pe kurangsa siakap banta, tapi banci sinen dirita “uga litna.”​—Rom. 12:3.

2. Engkai maka la mehuli adi sibandingken dirita ras kalak si deban?

² Banci kita erlajar arah usihen si mehuli si iban kalak si deban. Contohna, katakenlah lit sitandai sekalak turang seninata si beluh kel erberita. (Heb. 13:7) Banci siusih ia gelah reh ulina ka carata erberita. (Pil. 3:17) Tapi ngusih ia beda nge ras mbandingken dirita ras ia. Adi sibandingken dirita ras kalak si deban, banci dungna cian ateta, kitik ukurta, ntah pe la siakap erguna banta. Adi siusahaken jadi kalak si ulin asangken turang seninata, enda banci ncedai hubungenta ras Jahwe bagi si enggo sipelajari bas artikel sebelumna. Emaka, siingetlah pedah Jahwe enda: “Tiap kalak arus pereksana perbahanenna, janah ermeriah ukur ia perban dirina, labo perban bandingkenna ia ras kalak si deban.”​—Gal. 6:4.

3. Kai saja nge si enggo lakokenndu bas nembah Jahwe si erban kam ermeriah ukur?

³ Ate Jahwe meriah min ukurta bas kerina si enggo silakoken guna nembah Ia. Contohna, adi kam enggo iperidiken,  pasti meriah ukurndu perban dungna seh sura-surandu guna iperidiken. Kam me si erban keputusen e. Si e lakokenndu perban keleng atendu Dibata. Tapi cuba ukuri kai saja si lakokenndu kenca kam iperidiken. Contohna, reh riahna nge kapndu mbaca Pustaka ras ngukurisa alu mbages? Reh ulina nge toto si ipesehndu? (Ms. 141:2) Reh ulina nge kam bas mbenaken percakapen sanga erberita? Janah reh beluhna nge kam nggunaken alat-alat erberita? Adi kam enggo erjabu, isampati Jahwe nge kam jadi perbulangen, ndehara, ntah orang tua si reh ulina? Banci datndu keriahen ukur bas kerina perubahen si enggo ibanndu.

4. Kai kari sibahas bas artikel enda?

⁴ Banci sisampati kalak si deban gelah meriah ukurna bas kai si enggo ilakokenna guna nembah Jahwe. Banci ka sisampati kalak e gelah lanai bandingkenna dirina ras kalak si deban. Bas artikel enda sibahas kari uga orang tua banci nampati anak-anakna, uga kalak si enggo erjabu banci sisampat-sampaten, ras uga pertua-pertua ras kalak si deban banci nampati turang senina. Si terakhir, sibahas kari piga-piga pedah Pustaka si banci nampati kita guna erban tujun si banci sidatken.

5. Menurut Epesus 6:4, kai si arusna la ilakoken orang tua?

⁵ Orang tua arus hati-hati gelah ula bandingkenna anakna ntah pe arapkenna lakoken anakna lebihen asangken kengasupenna. Sebap adi bage iban orang tua banci kari kitik ukur anakna. (Baca Epesus 6:4.) Sekalak turang seninata si gelarna Sachiko * ngataken, “Arapken guruku gelah jilen nilaiku asangken teman-teman sekelasku. Selain si e, arapken mamakku mejile min nilaiku bas sekolah, gelah guruku ras bapakku si lenga Saksi mehuli tanggapenna kerna Saksi Jahwe. Arapken mamakku ka gelah sanga ujian la lit kuban si salah, tapi situhuna e labo mungkin. Amin pe enggo piga-piga tahun aku tamat sekolah, mon-mon tetap denga kuakap la meriah ukur Jahwe ngidah aku, amin pe enggo kulakoken si mehulina.”

6. Kai si banci pelajari orang tua arah Masmur 131:1, 2?

⁶ Lit pelajaren si penting si banci dat orang tua arah Masmur 131:1, 2. (Baca.) Ikataken Raja Daud maka labo ‘meganjangsa sura-surana’ ntah pe lakokenna  atena kai si meserasa akapna ngelakokenca. Perban ia meteruk ukur janah tehna kengasupenna, ‘tenang ia janah terapuli.’ Kai si banci pelajari orang tua arah kata-kata Daud e? Orang tua si meteruk ukur la mbuesa arapkenna arah dirina bage pe arah anak-anakna. Adi teh orang tua si banci ras si la banci lakoken anak-anakna alu mehuli, banci sampatina anak-anakna gelah meherga kapna bana. Kenca si e, banci ibanna tujun-tujun si masuk akal si banci lakoken anak-anakna. Bagenda nina sekalak turang seninata si gelarna Marina, “La pernah bandingken mamakku aku ras telu turangku ntah pe anak-anak si deban. Iajarina aku maka tiap kalak beda kengasupenna janah tiap kalak meherga i lebe-lebe Jahwe. Ngata bujur kel aku man mamakku, perban gundari enggo jarang kubandingken aku ras kalak si deban.”

7-8. Uga carana sekalak perbulangen mehamat man ndeharana?

⁷ Perbulangen si nembah Jahwe arus mehamat man ndeharana. (1 Pet. 3:7) Mehamat ertina ermediate ras ngergai kalak si deban. Contohna, sekalak perbulangen mehamat man ndeharana alu ngergai ia. Labo arapkenna lakoken ndeharana lebih asa ngasupna. Selain si e, labo bandingkenna ndeharana ras diberu si deban. Kai nge pengaruhna adi bage banna? Cuba perdiateken pengalamen sekalak turang seninata si gelarna Rosa. Perbulangenna si lenga Saksi rusur banding-bandingkenna ia ras diberu si deban. Kata-kata perbulangenna si kasar labo saja erban ceda ukur Rosa, tapi erban ragu ia keleng nge ate perbulangenna ia ntah lang. Nina, “Arus rusur kuingetken bangku maka ergai Jahwe nge aku.” Tapi sekalak perbulangen si enggo ngelayani Jahwe mehamat ia man ndeharana. Itehna maka si lakokenna lit pengaruhna man hubungenna ras ndeharana bage pe ras Jahwe. *

⁸ Perbulangen si mehamat man ndeharana ipujina ndeharana, janah banna igejapken ndeharana maka ia ikelengi ras iergai. (Kua. 31:28) Enda me si lakoken perbulangen Karin, si ituriken bas artikel sebelumna. Sampati perbulangenna ia sanga la kapna merga bana. Sanga Karin kitik denga, rusur ipandangi mamakna ia. Bandingkenna ia ras anak-anak si deban, termasuk teman-temanna. Akibatna, mulai bandingken Karin dirina ras kalak si deban janah terus lakokenna bage amin pe ia enggo Saksi Jahwe. Sampati perbulangenna ia gelah lanai bage janah gelah benar carana rukur. Nina Karin, “Keleng atena aku, pujina perbahanenku si mehuli, janah totokenna aku. Ingetkenna ka aku kerna sipat-sipat Jahwe si seh kel ulina janah sampatina aku gelah benar caraku rukur.”

9-10. Kai si lakoken pertua-pertua si ermediate guna nampati sekalak turang senina gelah la bandingkenna dirina ras kalak si deban?

⁹ Uga cara pertua-pertua nampati kalak si nggit mbandingken dirina ras kalak si deban? Cuba perdiateken pengalamen turang seninata si gelarna Hanuni, si jarang ipuji sanga ia kitik denga. Bagenda nina, “Aku jadi kalak si permela janah ulin kuakap anak-anak si deban asangken aku. Kitik denga pe aku enggo mulai kubandingken diriku ras kalak si deban.” Amin pe ia enggo jadi Saksi Jahwe, tetap denga bandingken Hanuni dirina ras kalak si deban.  Akibatna, la kapna penting kai pe si lakokenna bas runggun. Tapi gundari, enggo meriah akapna ngelayani jadi perintis. Kai si nampati ia erban perubahen e?

¹⁰ Ikataken Hanuni maka pertua-pertua si perkeleng enggo nampati ia. Ikataken kalak e maka ia meherga bas runggun janah pujiken kalak e usihenna si mehuli. Bagenda nina Hanuni, “Lit piga-piga kali pindo pertua-pertua aku mpegegehi piga-piga turang senina si diberu si merluken penampat. Penugasen enda erban meherga kuakap bangku. Kuinget denga sanga ngata bujur pertua-pertua e man bangku perban enggo kupegegehi piga-piga turang senina si diberu si nguda denga. Kenca si e, bacaken kalak e 1 Tesalonika 1:2, 3 man bangku. Enda erban meriah kel kuakap! Ngata bujur kel aku perban penampat pertua-pertua si perkeleng e. Gundari kuteh maka aku erguna bas runggun.”

11. Uga carata nampati kalak si ‘getem pusuhna ras lanai semangat,’ bagi si ikataken bas Masmur 34:18?

¹¹ Baca Masmur 34:18. Ermediate kel Jahwe man kalak si ‘getem pusuhna ras lanai semangat.’ Labo pertua-pertua ngenca si banci mpegegehi kalak si bage, tapi kerina kita banci ikut nampati. Salah sada carata nampati kalak e eme alu ermediate man kalak e. Ate Jahwe sibuktiken min maka keleng ateta kalak e. (Kua. 19:17) Banci ka sisampati turang seninata adi meteruk ukur kita. La siusahaken gelah perdiateken kalak kita, perban la ateta erban kalak si deban cian man banta. Tapi ateta min ranan ras perbahanenta mpegegehi turang seninata.​—1 Pet. 4:10, 11.

12. Engkai maka kalak biasa meriah kapna ras Jesus? (Nen gambar sampul.)

¹² Melala si banci sipelajari kerna uga arusna perbahanenta man kalak si deban alu ngukuri uga perbahanen Jesus man murid-muridna. Jesus me manusia si luar biasana si pernah nggeluh, tapi ia kalak si “mehuli janah meteruk ukur.” (Mat. 11:28-30) Labo icidah-cidahkenna uga pentarna ia bage pe kerna kerina si enggo itehna. Sanga ajarina kalak, pakena kata-kata si sederhana janah gunakenna perumpaman si menukah iangkai, si banci kena ku pusuh kalak si meteruk ukur. (Luk. 10:21) Jesus beda kel ras peminpin-peminpin agama si sombong. Lalap usahaken Jesus gelah iteh kalak maka meherga akap Dibata kalak e. (Joh. 6:37) Selain si e, mehuli perbahanenna man kalak si biasa.

13. Uga cara Jesus mbuktiken kekelengen ras kiniulinna man murid-muridna?

¹³ Kekelengen ras kiniulin Jesus teridah arah perbahanenna man murid-muridna. Iangkana maka murid-muridna la seri kengasupenna ras keadanna. Emaka labo arapkenna kerina kalak e seri tanggung jawapna janah seri ka keberhasilenna bas pelayanen. Tapi meriah ukurna perban kerina kalak e ngelakoken si mehulina. Perasan Jesus e igambarken bas perumpaman kerna talenta. Bas perumpaman e bereken tuanna talenta man budakna “menurut kengasupenna sekalak-sekalak.” Salah sada arah dua budak si rajin e ngaloken upah si buen asangken si debanna. Tapi pujin si bereken tuanna man duana budak e seri. Bagenda nina, “Merandal kel, kam budak si mehuli ras setia!”​—Mat. 25:14-23.

14. Uga carata ngusih Jesus bas erurusen ras kalak si deban?

¹⁴ Jesus lalap mehuli janah perkeleng sanga erurusen ras kita. Itehna maka beda kengasupenta ras keadanta janah meriah ukurna sanga silakoken si mehulina. Arus siusih Jesus. Ula pernah siban la meherga akap turang seninata dirina, ntah pe  mela ia perban la banci lakokenna bagi si lakoken kalak. Tapi arus terus sipuji turang seninata perban enggo lakokenna si mehulina bas ngelayani Jahwe.

15-16. Manpaat kai si idat Midori perban ibanna cita-cita si masuk akal?

¹⁵ Adi lit siban cita-cita rohani, dungna lit tujunta. Tapi cita-citata e arus masuk akal. Cita-citata labo arus seri ras kalak si deban, sebap adi bage siban banci saja kecewa kita janah kitik ukurta. (Luk. 14:28) Mari sibahas sada contoh arah sekalak perintis si gelarna Midori.

¹⁶ Sanga Midori kitik denga, kataken bapakna maka ulin adek-adekna ras teman sekolahna asangken ia. Bapak Midori e la Saksi. Nina Midori, “La kuakap meherga bangku.” Tapi sanga ia reh galangna mulai meherga akapna bana. Nina, “Kubaca Pustaka tiap wari perban e nampati aku nggejapken maka keleng ate Jahwe aku.” Selain si e, ibanna ka cita-cita rohani si masuk akal janah totokenna gelah sampati Jahwe ia ndatkenca. Hasilna, Midori tetap ermeriah ukur perban kai si banci lakokenna bas ngelayani Jahwe.

17. Kai si banci nampati kita ngubah perukurenta janah kai hasilna?

¹⁷ Perlu waktu guna ngubah carata rukur. Emaka persingeti Jahwe kita: “Cara kena rukur arus terus iubah.” (Ep. 4:23, 24) Guna ngelakoken si e perlu kita ertoto, mpelajari Kata Dibata, ras ngukurisa. Teruslah lakoken si e janah pindo gegeh arah Jahwe nari. KesahNa si badia banci nampati kam gelah la bandingkenndu dirindu ras kalak si deban. Sampati Jahwe ka kam gelah tehndu adi lit turah sipat percian ntah pe sombong bas dirindu, janah sampatiNa kam gelah meter erban perubahen.

18. Uga kata-kata bas 2 Kronika 6:29, 30 ngapuli kam?

 ¹⁸ Baca 2 Kronika 6:29, 30. Teh Jahwe isi pusuhta. TehNa maka kita erjuang ngelawan pengaruh si la mehuli arah doni enda ras kelemahenta. Sanga idah Jahwe uga beratna siakap erjuang ngelawan kerina si e, reh kelengNa ateNa kita.

19. Uga cara Jahwe njelasken kerna perasanNa man banta?

¹⁹ Guna nggambarken perasan Jahwe man banta igunakenNa hubungen antara pernanden ras anakna. (Jes. 49:15) Cuba perdiateken contoh arah sekalak pernanden si gelarna Rachel. Bagenda nina, “Anakku Stephanie lahir prematur. Sanga lahir, kitik kel ia janah la lit gegehna. Tapi mulai ia lahir, sanga ia bas rumah sakit denga, lit sada bulan dekahna bereken dokter kuangkip ia tiap wari. Enda erban aku ras Stephanie seh kel deherna. Gundari umurna enggo enem tahun janah kitiken dagingna asangken teman-teman sebayana. Tapi keleng kel ateku ia perban erjuang kel ia bas geluhna janah meriah kel ukurku ibanna.” Emaka meriah kel ukurta perban siteh keleng kel ate Jahwe kita sanga idahNa erjuang kita ngelakoken si mehulina bas ngelayani Ia.

20. Perban enggo baktikenndu dirindu ngelayani Jahwe, kai si erban kam ermeriah ukur?

²⁰ Perban enggo layanindu Jahwe, kam enggo jadi salah sada anggota keluarga Jahwe si meherga janah la lit si bali ras kam. Itarik Jahwe kam labo perban ulin kam asangken kalak si deban. Tapi itarikNa kam perban inenNa pusuhndu janah idahNa maka kam kalak si meteruk ukur, nggit iajari, ras nggit erban perubahen. (Ms. 25:9) Teklah kam maka meriah ukurNa sanga lakokenndu si mehulina bas ngelayani Ia. Enggo terus kam setia ngelayani Ia. Enda mbuktiken maka ‘pusuhndu bujur ras mehuli.’ (Luk. 8:15) Emaka teruslah berekenndu si mehulina man Jahwe. Alu bage, lit me alasenndu ermeriah ukur ‘perban dirindu.’