1. Ka uagu magoubaguagüdün lubadiwa Heowá hama amu?

WÉIRITI línsiñe ámuñegueinarügü katei lun Heowá. Láurügü warihini sun katei buiti le adüga láalibei, kei burí gürigia. Úatiña bián gürigia lun hagiaméme hamá, úatiña bián gürigia lun aban lan habu lun Heowá. Ariha lumuti le tídanbei wanigi, le múnadagiñebei wabiti (1 Sam. 16:7). Gabaroun lumuti Heowá le gayara wabéi adüga, le wafiñerubei luma le sügǘ wamaalibei lidan wabagari. Ani mamuriahanti Heowá lóugiñe le gayara wabéi íchiga. Lunti wáyeihani, lun waríagun woungua kei larihiniwa. Anhein wadüga, warufuduba “lichú au” ani masaminarunbadiwa buídutima wamá hawéi amu o buídutima hamá amu wawéi (Rom. 12:3).

2. Ka uagu mabuidun lubéi waríagun woungua buidu wamá hawéi amu o buídutima hamá amu wawéi?

² Inarüni, mariban lan warihini lubuidun lani aban íbiri hénpulu le buiti lidan apurichihani (Ebü. 13:7). Gayaraati líderaguniwa katei le lun giñe wabuiduragüdüni ligaburi wapurichihan (Fili. 3:17). Gama lumoun, mama ligiaméme warihini lubuidun lani aban íbiri hénpulu lumoun wagoubaguagüdüni anhein buidu wabéi luéi o anhein wuriba wabéi. Anhein wadüga ítara, gayaraabei ladügün lira lun wagimugaruniña, ani féridi wameime waguraasun ani adüga ligíame lun wasaminarun ni kata lan wagía. Luagu le aban oubaü, kei warihini lidan aturiahani le lubaragiñebei le, dan le wásügüragun woungua hama wíbirigu lidan damuriguaü ladügüba lira lun weferidiruni wamadagua luma Heowá. Ligía lariñagubei woun lau ínsiñeni: “Kada aban gürigia lunti laríagun lungua ida liña lan ligaburi lóuserun, ánheinti adariragua lungua buíduñu gayaraati lanaagun lungua lau le ladügübei, metenirunga lun le hadügübei amu” (Gal. 6:4).

3. Káteitima san adügübei lun hagundaarun lidan weseriwidun lun Heowá?

³ Busenti Heowá lun gunda wamá súngubei luagu wawanserun lidan ligaburi wáhuduragun lun. Kei hénpulu, anhein badisei hadiwa  lubéi, gébunati lun wagundaarun luagu pasu le wíchugubei. Gürigia anúadirubalin lungua lederegeruni libagari lun Heowá ladüga ínsiñeni le hasandirubei luagu. Samina wamá luagu ida liña lan labuidurun wabagari lúmagiñe dan ligía. Háfuga, hínsiñeeli lan aliihani woun luma lun waturiahanu Bíbülia. Másiñati buídutimahali lan ligaburi wafurieidun (Sal. 141:2). Másiñati giñe buídutimahali lan wasandiragun woungua da le wagumeserun aban yanu luma burí lun wayusurunu agumeiraguagüdüni tótima wayusuruboun lun wapurichihan. Ani másiñati íderagua láadiwa lan Heowá lúntima buidu lan wagunfulirun lau wani buligasion keisi weiriei, weiriou, o agübürigu. Gayaraati wasandiragun woungua lau saragu ugundani lau le adüga wamaalibei lidan wamadagua luma Heowá.

4. Kaba wariha lidan aturiahani le?

⁴ Gayaraati wíderaguniña amu lun hagundaarun lidan heseriwidun lun Heowá mama lun wagoubaguagüdüniña hama amu. Lidan aturiahani le, warihiba ida luba lan híderaguniña agübürigu hasaanigu, ida luba lan hídehan maríeitiña hámagua, ida luba lan hídehan wéiyaaña lidan afiñeni luma giñe ida luba lan hídehan amu íbirigu hámagua. Ani lagumuhóun warihiba fiu adundehani tídangiñeti Bíbülia le lunbei líderaguniwa ibihei le gayara wabéi adüga.

5. Kei lariñaguni Éfesuna 6:4, ka lunbei madügün hamani agübürigu?

⁵ Mabuidunti hariñagun agübürigu hawagun hasaanigu buidu lan aban luéi le aban ni lun lamuriahóun lóugiñe le gayara habéi adüga. Gayaraati ladügün le lun lagañidun irahü (aliiha huméi Éfesuna 6:4). Ariñagatu aban íbiri gíritu Sachiko *: “Agurabatiña meha numaisturungu buídutima nan tidan külase hawéi nánigu paaná. Lanwoun lira, busentu meha giñe núguchu lun aban nan aturiahatu to buitu lun hasaminarun numaisturungu luma núguchi le mámabei Gefenti buidu nuagu. Busentu meha lun íñutima lan puntu lasagarun lidan egüsámini, gama lumoun hénrenguti meha lira. Lau sun sügühali lan saragu irumu lúmagiñe nagumuchuni nileskuela, anihein dan nasaminarun íbini weiri lan náfagun lidan neseriwidun lun Heowá, lougua lan lira lun Heowá”.

6. Ka gayarabei hafurendeirun agübürigu lídangiñe le lariñagubei Sálumu 131:1, 2?

⁶ Gayaraati hafurendeirun agübürigu aban puntu súdiniti lídangiñe le lariñagubei Sálumu 131:1, 2 (aliiha huméi). Ariñagati urúei Dawidi: “Nabureme, mapantantu nanigi, manaagun  ligía nagu lungua, mídintina lárigi katei wéinamugubuti le díseti luéi niyara”. Seremei ǘnabugu lan ani subudiléi halía lan lébeda le gayara lubéi adüga, sandiguati lungua lau “darangilaü”. Arufudati le houn agübürigu gayara lan ǘnabugu hamá ani subudi hameime le gayara habéi adüga, mámarügü luagu le hagurabubei hámagiñegua luma giñe le hagurabubei hámagiñe hasaanigu. Lunti gabaroun hamani agübürigu le gayara habéi hasaanigu adüga luma le siñá habéi adüga, danme le híchugun dasi houn lun gayara lan hasandiragun houngua buidu. Haritaguatu aban íbiri to gíriboun Marina: “Magoubaguagüdün tumutina meha núguchu hama ǘrüwa níbirigu ni hama amu irahüñü. Arufudahatu núguchu nun sun lan wagía anihein lan ámuñegueinarügü katei le gayara wabéi adüga ani sun lan wagía gebegitiwa lun Heowá. Seremei núguchu, meredetina agoubaguagüda nungua hama amu ”.

7, 8. Ida luba inebetá lani wügüri weiriou lun?

⁷ Mosu gunfuranda lanu wügüri kristiánu lani weiriou (1 Fe. 3:7). Mini lan lira, mosu lan lóuserunu buidu inebe tuguyame lun. Ida luba ladügüni? Mosu larufuduni tun weiri lan tebegi lun, mamuriaha ligíame tuma lóugiñe le gayara tubéi adüga, ni lun lariñagun buídutima hamá amu würiña tuéi. Ka uagu wuriba lubéi katei le? Ariha huméi tikesin aban íbiri to gíriboun Rosa. Ganigiti meha tani weiriei, le mama Gefenti, lun lariñagun buídutimatiña lan amu würiña tuéi. Mámarügü adügarügüti lun tasandiragun Rosa tungua mebegi tan, adügati giñe lira lun machourun tani anhein hínsiñe tubéi houn somu gürigia. Ariñagatu: “Mégeitina naritaguagüdüniwa súnwandan weiri lan nebegi lun Heowá”. Ánheinti kristiánugu wügüriña maríeitiña inebetu hani weiriou houn, ítara subudi hamuti hóunigiruñein lan hamadagua dandu tuma hani weiriou kei luma Heowá. *

⁸ Wügüriña ha inebetu hani weiriou houn ayanuhatiña buidu tuagu, ariñagatiña tun hínsiñe tan houn ani buidu lan tadüga dan le tadügün katei buiti (Ari. 31:28). Ligía ladügübei tani Katerina weiriei, to uagu layanuhóua lidan aturiahani le lubaragiñebei le, le íderagubarun lun labuidurun tasandiragun tungua. Dan meha le ñǘraügiru Katerina, mebereseguntu meha túguchu tau ani saragu dan ariñagatu meha buídutima hamá amu irahüñü tuéi, íbini tumadagu. Ligía tagumeserunbei Katerina asaminara buídutima hamá amu tuéi, íbini lárigiñe tagumeserun asubudirei inarüni. Gama lumoun, íderagua lumutu tani weiriei agidarei luriban saminaü le luma lun labuidurun tasaminarun tuougua. Ariñagatu: “Hínsiñetina lun nani weiriei, ani ariñagati nun buidu lan nadüga dan le nadügün katei buiti ani furíei ligía nuagu. Haritaguagüda lumutina luagu lubuidun ligaburi Heowá ani íderagua lumutina lun nabuiduragüdüni nisaminan le mabuidunbei”.

9, 10. Ida liña híderagunu wéiyaaña lidan afiñeni aban íbiri to hínsiñeti tun tasaminarun o tariñagun buídutima hamá ha híbiri tuéi?

⁹ Ida luba híderaguniña wéiyaaña íbirigu ha asaminarubaña buídutima hamá hawéi amu o buídutima hamá amu hawéi? Ariha waméi tásügürün aban íbiri to gíriboun Hanuni, lídanha ñǘraügiru hénrenguti meha lariñawagún tun buidu lan tadügüni katei. Ariñagatu: “Haburitina meha ani sanditina meha buídutima hamá amu irahüñü nuéi. Murusun katei le naritagubei luagu niñüraü, súnwandan lan nasaminarun buídutima hamá amu nuéi”. Íbini lárigiñe aban tan Gefentu, sigitu Hanuni asaminara buítima hamá amu tuéi, ani adügati lira lun tasandiragun tungua murusunrügüñein lan tídehan lidan damuriguaü. Ani guentó ábanharu prekursora to gúndaatu. Ka íderagubarun asansira?

 ¹⁰ Ariñagatu Hanuni resibi tumuti lan hídehan luma hínsiñehabu wéiyaaña. Ariñagatiña tun afiñe hamá tuagu luagu lubuidun tani hénpulu. Abahüdaguatu Hanuni: “Anihein dan, amuriahatiña wéiyaaña lidan afiñeni numa lun níderagun amu íbirigu ha mégeibaña ídemuei. Adügati lira lun nasandiragun nungua mégeiwa nan lidan damuriguaü. Haritagua nágili teinki hamutina lan wéiyaaña lidan afiñeni lau ínsiñeni lau níderaguniña amu íbirigu ha nibureingiña, lárigiñe aba haliihani 1 Tesalónikana 1:2, 3 nun. Chülüti lira tidoun nanigi. Seremei houn habuidun íbirigu ha ítarabaña kei hóuniri mudún, guenlé subudi naali anihein lan aban ubaraü buiti nun tidan lóundarun Heowá”.

11. Según lariñaguni Isaíasi 57:15, ida luba wíderaguniña ha “ǘnabugubaña ani nidiheri hagía”?

¹¹ (Aliiha huméi Isaíasi 57:15). Bereseti Heowá hau gürigia ha “ǘnabugubaña ani nidiheri hagía”. Mámarügü wéiyaaña lidan afiñeni lunbei híchugun gurasu houn wíbirigu ha asandiragubaña houngua ítara, sun wagía gayaraati wadügüni. Aban katei le lubéi wadügüni, webereserun hau tídangiñe sun wanigi. Busenti Heowá lun warufuduni weiri lan hínsiñe lubúeingu woun (Ari. 19:17). Ábaya igaburi lun gayara lan wíderaguniña lun ǘnabugu wamá luma lun wasubudiruni le wayaraabei adüga. Máfaaguntiwa lun híchugun gürigia uéiriguni woun ladüga mabusenrúntiwa lun lebelurun gimugaü. Himei wamagili wayusuruni le wayaraati luma le wasubudirubei lun gayara lan wíchugun gurasu wámagua (1 Fe. 4:10, 11).

12. Ka meha uagu hésebe habéi gürigia ha ǘnabugubaña lurugabu Hesusu? (Ariha huméi dibuhu le luágubei tidáü garüdia).

¹² Gayaraati wafurendeirun saragu luáguti ida liña lan hóuseruniwa amu lau warihini ida liña lan lóuseruniña Hesusu lánigu disipulu. Íbini meha ligía lan wügüri le súdinitimabei lidan meha dan ligía, ligía meha wügüri le gaguraasun túmabei ani “ñulú tuguya lanigi” (Mat. 11:28-30). Manaagunti meha lungua lau lueirin lichú lau luma lisubudin. Dan meha le larufudahan, yúsuti meha dimurei le ménrenguti gunfurandawa lan luma hénpulu le gayarabei lachülürün tidoun hanigi gürigia ha ǘnabugubaña (Luk. 10:21). Amu meha ligaburi Hesusu hawéi alidihatiña relihión ha barüguabaña houngua, adügati meha lun buidu lan hasandiragun gürigia houngua ani gebegi hamá lun Bungiu (Huan 6:37). Súnwandan meha lóuseruniña gürigia ha ǘnabugubaña lau inebesei.

13. Ka uagu wariñaga óusera lániña Hesusu lani disipulugu lau areini luma lau ínsiñehabuni?

¹³ Óusera lumutiña meha Hesusu lani disipulugu lau areini luma ínsiñehabuni. Subudi lumuti meha ámuñegueinarügü lan le hayaraati luma le gádanbaliña, ligíati mama meha súngubei lun gani hamani ligiaméme buligasion ni lun hadügüni ligiaméme lidan apurichihani. Gama lumoun, sun áfaaguni le hadügübei kada aban tídangiñe sun hanigi, gebegiti meha lun Hesusu. Gayaraati warihini furangu gunfuranda lániña Hesusu gürigia lidan labahüdagun luagu seinsu. Lidan abahüdaguni le, ayanuhati luagu aban iyubudiri le ichugúbei wadagimanu houn lidamun “según le hayaraabei”. Inarüni, hadan bián idamuni ha agunfulirubaña lau hadasin anihein aban wéiritimati lagañeirun luéi le aban. Gama lumoun, ariñagati hayubudiri houn biángubei buidu lan hadüga lau dimurei burí le: “Aban musu buiti, ani úaraguati buguya” (Mat. 25:14-23).

14. Ida luba wasigiruni lani Hesusu hénpulu lidan wóuseruniña amu?

¹⁴ Óusera lumutiwa giñe Hesusu lau areini luma lau ínsiñeni. Subudi lumuti luagu ámuñegueinarügü lan liyara gürigia adüga ani ámuñegueinarügü lan le gádanbalin ani gúndaati dan ladügüni kada gürigia le liyaraati. Ida luba wáyeihani? Mabusenrúntiwa lun lasandiragun ni aban íbiri lungua lau busiganu ladüga siñá lan ladügüni le wayaraabei adüga. Áluaha wamá  súnwandan lun wariñagun houn wábirigu buidu lan hadüga lau hadügüni sun hayaraati lidan heseriwidun lun Heowá.

15, 16. Ida liña tibihin aban íbiri lun gasuuni lan tibagari?

¹⁵ Dan le waganwoundagüdüni weseriwidun lun Heowá íderagua lumutiwa lun gasuuni lan wabagari. Mosu úara lan katei le luma le wayaraabei adüga luma le gádanbaliwa sin wagoubaguagüdüni luma le hayaraabei amu adüga. Anhein madügün wamá ítara, chóuruti weferidirubei lan waguraasun (Luk. 14:28). Ariha waméi tani aban prekursora gíritu Midori hénpulu.

¹⁶ Dan meha le ñǘraügiru Midori, mama Gefenti túguchi, ani adügati meha lun tasandirun busiganu lau lariñagun buídutima hamá tíbirigu hama tupanaagu leskuelarugu tuéi. Ariñagatu: “Sandiguatina meha nungua meseriwín nan lun ni kata”. Lau lásügürün dan, aba labuidurun tasandiragun tungua. Ariñagayatu Midori: “Aliiha numutu Bíbülia sagü weyu ladüga adügati lira lun darangilu lan ligaburi nasandiragun nungua ani adügati giñe lun nasandiragun nungua hínsiñe nan lun Heowá”. Adügatu katei le gayara tubéi ibiha, ani aba tamuriahan luma Heowá lun líderagunu lun tibihini. Adügati lira, lun tasandirun ugundani luagu le tiyaraabei adüga lidan teseriwidun lun Heowá.

17. Ida luba hadügün kristiánugu lun iserigua hama lidan hani “sífiri luma lidan hasaminan”, ani ida luba lidin houn?

¹⁷ Magidabei le wasandirubei luma luriban saminaü lau lóufudagun. Ariñagati Heowá: “Lunti iserigua humá lidan hani sífiri luma lidan hisaminan” (Efe. 4:23, 24). Inarüni, lun gayara lan wibihini lunti wafurieidun, waturiahanu Lererun Bungiu luma lun wasaminarun hulili luagu le waliihabei. Mígira waméi wadügüni katei le, amuriaha wama luma Heowá lun líchugun erei woun. Líderagubadiwa lani sífiri sandu lun wígiruni saminaü buídutima wamá hawéi amu o buídutima  hamá amu wawéi. Líderagubadiwa giñe Heowá lun warihini anhein beluha lubéi gimugaü lau sun pantaü tidoun wanigi, luma lun wadügün somu katei lau lóufudagun lun wígiruni luriban igaburi le.

18. Ida liña líchugun dimurei le lídanbei 2 Krónikasi 6:29, 30 gurasu hun?

¹⁸ (Aliiha huméi 2 Krónikasi 6:29, 30). Subudi lumuti Heowá le tídanbei wanigi. Subudi lumuti giñe luagu wáfaaguña lan lun wígiruni sífiri le lánina ubóu le luma giñe wageindaguña lan luma wachara guánarügü. Dan le larihini Heowá áfaaguni le wadügübei, ábatima laganwoundun ínsiñeni le lasandirubei luagu kada aban wádangiñe.

19. Ka hénpulu layusurubei Heowá lun gayarabei lan lariñaguni le lasandirubei wawagu?

¹⁹ Lun lariñaguni Heowá le lasandirubei wawagun, aba layusuruni ínsiñeni le tasandirubei aban úguchuru luagu tiráü (Isa. 49:15). Ariñagatu aban úguchuru gíritu Rachel: “Aba tagüriahóuniwa Stephanie lubaragiñe dan. Dan le narihibarun furumiñeti wéiyaasu ma tiñüraü ani débilitu... Lidan furumiñeti hati, lídanñoun meha aban máhina, gama lumoun ígirati meha surusia lun nóuyuahanu sagü weyu. Adügati weyu burí ligía lun ñein lan aban ínsiñeni espechaliti wámagua. Guenlé sisi hali irumu tau ani lau sun ñüraü tan hawéi irahüñü ha tiseisin, hínsiñetu nun tídangiñe sun nanigi ladüga tárügüdün luagu ibagari. Ani gudagüda táadina saragu”. Dan le larihini Heowá wáfaagun lau sun were, lun wíchuguni sun le buídutimabei wámagiñe lun aba lasandirun wawagu aban ínsiñeni libe lira. Ma ruti saragu gurasu wasubudiruni le?

20. Ka uagu gayara lubéi gunda wamá?

²⁰ Kei hádangiñetün lubéi lubúeingu Heowá hínsiñetün lun ani gebegitün lun ani úati ni aban kei huguya. Machawahan lumutiwa Heowá luouguoun ladügarügü buídutima wamá hawéi amu, lachawahabaliwa ladüga larihin aban anigi buiti wawagun ani aba larihin ǘnabugu wamá ani ígiraguagüdaatiwa woungua lun larufudahan woun luma lun lasansiruni wagaburi (Sal. 25:9). Gayaraati wachoururuni aba lan lagundaarun lidan wadügüni sun wayaraati lidan weseriwidun lun. Arufudati wawandun luma úaragua wamá luagu “anuhein lan anigi buitu wawagun” (Luk. 8:15). Ligíati, sigí wamá íchigei le buídutimabei wámagiñe lun Heowá. Anhein wadüga, garichabadiwa lun wagundaarun luagu le adüga wamaalibei.