1. Nganong dili ta itandi ni Jehova sa uban?

DILI gusto ni Jehova nga magkaparehas ang tanan. Nahibalo ta niini kay lainlaing klase sa tanom, hayop, ug bisan mga tawo ang iyang gilalang. Ang matag usa kanato dili managsama. Busa si Jehova dili gyod magtandi nimo sa uban. Gisusi niya ang imong kasingkasing, ang imong tinuod nga pagkatawo. (1 Sam. 16:7) Nahibalo sab siya kon unsay imong kayang himoon, kon unsay imong mga limitasyon, ug kon unsay imong mga kaagi. Wala siya magdahom ug labaw sa imong mahimo. Kinahanglan natong sundogon si Jehova pinaagi sa paglantaw sa atong kaugalingon sama sa iyang paglantaw kanato. Kon ato nang himoon, makabaton tag “maayong panghunahuna,” nga dili mag-isip sa atong kaugalingon nga importante kaayo o kaha walay pulos.—Roma 12:3.

2. Nganong dili maayong itandi nato ang atong kaugalingon sa uban?

² Siyempre, makabenepisyo tingali ta sa pagpaniid sa maayong ehemplo sa usa ka matinumanong igsoon nga mabungahon sa ministeryo. (Heb. 13:7) Tingali makakat-on ta niyag mga paagi kon unsaon pagpauswag ang atong ministeryo. (Filip. 3:17) Pero dunay kalainan ang pagsundog sa maayong ehemplo sa usa ka igsoon ug ang pagtandi sa atong kaugalingon kaniya. Kon itandi nimo ang imong kaugalingon sa uban, posibleng masina ka, madismayar, o mobati pa ganing walay pulos. Sumala sa atong nakat-onan sa miaging artikulo, kon makigkompetensiya ta sa mga igsoon sa kongregasyon, madaot ang atong relasyon kang Jehova. Busa si Jehova mahigugmaong nagtambag kanato: “Angayng susihon sa matag usa ang iyang kaugalingong binuhatan, aron malipay siya sa iyang mga  buhat ug dili tungod sa pagtandi sa iyang kaugalingon sa uban.”—Gal. 6:4.

3. Unsang espirituwal nga pag-uswag ang imong nahimo nga nakapalipay nimo?

³ Gusto ni Jehova nga malipay ka sa imong kaugalingong pag-uswag sa espirituwal. Pananglitan, kon bawtismado ka na, angay kang malipay nga nakab-ot nimo ang maong tumong! Personal nimo kana nga desisyon. Gihimo nâ nimo tungod sa imong gugma sa Diyos. Hunahunaa ang imong pag-uswag sukad niadto. Pananglitan, mas ganahan ka na bang magbasa ug magtuon sa Bibliya? Nahimo bang mas kinasingkasing ang imong mga pag-ampo? (Sal. 141:2) Mas sayon na ba para nimo ang pagsugod ug mga panaghisgot dihang magsangyaw ka, ug mas epektibo ka na ba sa paggamit sa atong mga himan sa ministeryo? Ug kon duna kay pamilya, gitabangan ka ba ni Jehova nga mahimong mas maayong bana, asawa, o ginikanan? Malipay kaayo ka sa pag-uswag nga imong nahimo nianang mga bahina.

4. Unsay atong hisgotan niining artikuloha?

⁴ Matabangan nato ang uban nga magmalipayon sa ilang espirituwal nga pag-uswag. Matabangan sab nato sila nga dili itandi ang ilang kaugalingon sa uban. Niining artikuloha, masayran nato kon sa unsang paagi ang mga ginikanan makatabang sa ilang mga anak, ang mga magtiayon makatabang sa usag usa, ug ang mga ansiyano ug ang uban makatabang sa mga igsoon. Ug konsiderahon nato ang pipila ka prinsipyo sa Bibliya nga makatabang nato sa pagtakdag realistikong mga tumong sumala sa atong kaugalingong abilidad ug kahimtang.

5. Sumala sa Efeso 6:4, unsay angayng likayan sa mga ginikanan?

⁵ Ang mga ginikanan angayng mag-amping nga dili itandi ang ilang anak ngadto sa laing bata o magdahom nga ang ilang anak mohimog labaw pa kay sa makaya niini. Kon buhaton ni sa mga ginikanan, mahimong maglagot ang ilang anak. (Basaha ang Efeso 6:4.) Ang sister nga si Sachiko * miingon: “Ang akong mga titser nagdahom nga malabwan nako ang akong mga klasmet. Dugang pa, gusto ni Mama nga mahimo kong kinahaworan sa klase aron makahatag kog maayong pamatuod sa akong titser ug sa akong dili Saksing amahan. Gani, gusto niya nga pirme kong ma-perfect sa eksam, nga dili gyod nako kaya. Bisag dugay na kong nahumag eskuwela, usahay maghunahuna gihapon  ko nga basig wala malipay si Jehova bisag gihimo nako ang akong kinamaayohan.”

6. Unsay makat-onan sa mga ginikanan sa Salmo 131:1, 2?

⁶ Ang mga ginikanan dunay importanteng leksiyon nga makat-onan sa Salmo 131:1, 2. (Basaha.) Si Haring David miingon nga wala siya “mangandoy ug dagko kaayong mga butang” o sa mga butang nga dili niya makab-ot. Tungod sa iyang pagkamapainubsanon, siya kontento ug malinawon. Unsay makat-onan sa mga ginikanan sa giingon ni David? Ikapakita sa mga ginikanan nga sila mapainubsanon kon dili sila magdahom ug labaw pa sa ilang makaya ug sa makaya sa ilang anak. Matabangan sa mga ginikanan ang ilang anak nga mobating importante kon ilhon nila kon unsay makaya ug dili makaya sa ilang anak ug dayon tabangan kini sa pagtakdag realistikong mga tumong. Ang sister nga si Marina nahinumdom: “Wala gyod ko itandi ni Mama sa akong tulo ka igsoon o sa ubang mga bata. Gitudloan ko niya nga ang tanan lainlaig abilidad ug ang matag usa kanato bililhon kang Jehova. Tungod niya, panagsa ra nakong itandi ang akong kaugalingon sa uban.”

7-8. Sa unsang paagi ang bana makapakitag pasidungog sa iyang asawa?

⁷ Angayng pasidunggan sa usa ka Kristohanong bana ang iyang asawa. (1 Ped. 3:7) Ang pagpasidungog nagpasabot nga hatagan natog espesyal nga pagtagad ug pagtahod ang uban. Pananglitan, mapasidunggan sa bana ang iyang asawa pinaagi sa pagtahod kaniya. Dili siya magdahom ug labaw sa mahimo sa iyang asawa. Ug dili gyod niya siya itandi sa ubang mga babaye. Kon itandi niya ang iyang asawa sa uban, unsa kahay bation sa iyang asawa? Ang dili Saksing bana sa sister nga si Rosa sagad magtandi niya sa ubang mga babaye. Tungod sa sakit nga mga pulong sa iyang bana, si Rosa nawad-ag kompiyansa sa kaugalingon. Siya miingon, “Kinahanglang pasaligan ko pirme nga bililhon ko kang Jehova.” Sa laing bahin, ang Kristohanong bana maghatag ug pasidungog sa iyang asawa. Siya nahibalo nga kon buhaton niya kana, molig-on ang iyang relasyon sa iyang asawa ug kang Jehova. *

⁸ Ang bana nga nagpasidungog sa iyang asawa magdayeg kaniya, magpasalig kaniya sa iyang gugma, ug maghatag kaniyag komendasyon. (Prov. 31:28) Mao nay gihimo sa bana ni Katerina, nga gihisgotan sa miaging artikulo, sa pagtabang kang Katerina nga madaog ang pagbati nga wala siyay pulos. Sa bata pa si Katerina, sawayon siya sa iyang mama kinsa pirmeng magtandi niya sa ubang batang babaye, apil na sa iyang mga amiga. Tungod niana, pirme nang itandi ni Katerina ang iyang kaugalingon sa uban ug padayon nâ niyang gihimo bisag nakadangat na siya sa kamatuoran! Pero gitabangan siya sa iyang Kristohanong bana nga masuklan kini nga tendensiya ug maugmad ang mas makataronganong panglantaw sa iyang kaugalingon. Si Katerina miingon: “Gimahal ko niya, komendahan ko niya sa maayong mga butang nga akong nahimo, ug mag-ampo siya para nako. Iya sab kong pahinumdoman sa nindot nga mga hiyas ni Jehova ug tabangan nga matul-id ang akong negatibong panghunahuna.”

9-10. Sa unsang paagi gitabangan sa mapinanggaong mga ansiyano ang usa ka sister nga madaog ang tendensiya nga itandi ang iyang kaugalingon sa uban?

⁹ Sa unsang paagi makatabang ang mga ansiyano niadtong may tendensiya nga itandi ang ilang kaugalingon sa uban? Tagda ang eksperyensiya sa sister nga si Hanuni, kinsa sa bata pa panagsa rang komendahan. Nahinumdom siya: “Maulawon ko ug gibati nako nga mas maayo ang ubang mga bata kay kanako. Sukad sa  bata pa ko, gitandi na nako ang akong kaugalingon sa uban.” Bisan dihang nakadangat na si Hanuni sa kamatuoran, gitandi gihapon niya ang iyang kaugalingon sa uban. Tungod niana, mibati siya nga wala kaayo siyay pulos diha sa kongregasyon. Pero karon, siya malipayong nag-alagad ingong payunir. Unsay nakatabang niya nga mausab ang iyang panghunahuna?

¹⁰ Si Hanuni miingon nga gitabangan siya sa mapinanggaong mga ansiyano. Gipasaligan nila siya nga importante siya sa kongregasyon ug gikomendahan siya sa iyang maayong ehemplo. Siya misulat: “Dihay mga higayon nga gihangyo ko sa mga ansiyano nga dasigon ang pipila ka sister nga nagkinahanglag tabang. Tungod niini, gibati nako nga mapuslanon ko. Nahinumdom ko sa dihang gipasalamatan ko sa mahigugmaong mga ansiyano sa akong pagdasig sa pipila ka batabatang mga sister. Dayon, gibasahan ko nila sa 1 Tesalonica 1:2, 3. Nakatandog gyod to sa akong kasingkasing! Tungod niadtong mahigugmaong mga magbalantay, gipabilhan na nako karon ang akong lunâ diha sa organisasyon ni Jehova.”

11. Sa unsang paagi makatabang ta niadtong “mga nahugno” nga gihisgotan sa Isaias 57:15?

¹¹ Basaha ang Isaias 57:15. Si Jehova mahunahunaon kaayo niadtong “mga nahugno.” Kitang tanan, dili lang ang mga ansiyano, makatabang sa pagdasig niining minahal nga mga igsoon. Ang usa ka paagi nga madasig nato sila mao ang pagpakitag sinserong interes kanila. Gusto ni Jehova nga ipakita nato kanila ang kadako sa iyang gugma kanila. (Prov. 19:17) Makatabang sab ta sa atong mga igsoon pinaagi sa pagpabiling mapainubsanon ug dili pagpanghambog sa atong mga abilidad. Dili nato gusto nga mapokus kanato ang atensiyon sa uban nga tungod niana, masina sila kanato. Hinunoa, gamiton nato ang atong mga abilidad ug kahibalo sa pagdasig sa usag usa.—1 Ped. 4:10, 11.

12. Nganong ganahang makig-uban kang Jesus ang mga mapainubsanon? (Tan-awa ang hulagway sa atubangan sa magasin.)

¹² Daghan tag makat-onan kon unsaon pagtratar ang uban pinaagi sa pagkonsiderar kon giunsa pagtratar ni Jesus ang iyang mga sumusunod. Siya ang labing bantogang tawo nga nabuhi sukad. Pero, siya “malumo ug mapainubsanon.” (Mat. 11:28-30) Wala siya manghambog kon unsa siya ka intelihente ug kon unsa ka daghan ang iyang nahibaloan. Nanudlo siya gamit ang simpleng mga pulong ug mga ilustrasyon nga nakatandog sa kasingkasing sa mapainubsanong mga tawo. (Luc. 10:21) Dili sama sa aroganteng mga lider sa relihiyon, wala gyod ipabati ni Jesus sa uban nga dili sila bililhon sa Diyos. (Juan 6:37) Hinunoa, gitahod niya ang ordinaryong mga tawo.

13. Sa unsang paagi ang kaayo ug gugma ni Jesus makita diha sa iyang paagi sa pagtratar sa iyang mga tinun-an?

¹³ Ang kaayo ug gugma ni Jesus makita diha sa iyang paagi sa pagtratar sa iyang mga tinun-an. Nahibalo siya nga lainlain silag abilidad ug kahimtang. Busa dili pareho ang ilang maabaga nga responsibilidad, ug dili sab pareho ang ilang mahimo diha sa ministeryo. Pero giapresyar niya ang kinasingkasing nga paningkamot sa kada usa. Ang pagkamasinabtanon ni Jesus makita diha sa ilustrasyon sa mga talanton. Niana nga ilustrasyon, gihatagan sa agalon ang matag ulipon ug buluhaton “sumala sa katakos sa matag usa.” Ang usa sa duha ka kugihang ulipon mas daghag nahimo. Pero silang duha parehong giingnan sa agalon: “Dalayegon ang imong gihimo, maayo ug kasaligan nga ulipon!”—Mat. 25:14-23.

14. Unsaon nato pagsundog ang paagi ni Jesus sa pagtratar sa uban?

¹⁴ Si Jesus nagpakitag kaayo ug gugma diha sa iyang paagi sa pagtratar kanato. Nahibalo siya nga lainlain ang atong abilidad ug kahimtang, ug malipay siya dihang himoon nato ang  atong kinamaayohan. Angay natong sundogon si Jesus. Dili nato gusto nga ang atong igsoon mobating walay pulos o kaha maulaw kay dili niya kayang himoon ang mahimo sa uban. Hinunoa, mangita tag kahigayonan aron komendahan ang atong mga igsoon kay gihimo nila ang ilang kinamaayohan sa pag-alagad kang Jehova.

15-16. Sa unsang paagi ang usa ka sister nakabenepisyo sa pagtakdag realistikong mga tumong?

¹⁵ Ang espirituwal nga mga tumong maghatag ug direksiyon ug katuyoan sa atong kinabuhi. Pero kinahanglang magtakda tag mga tumong sumala sa atong mga abilidad ug kahimtang, dili nianang sa uban. Kon magbase ta sa uban, madismayar ug maluya lang ta. (Luc. 14:28) Konsideraha ang ehemplo sa usa ka payunir nga sister nga si Midori.

¹⁶ Sa bata pa si Midori, pakaulawan siya sa iyang dili Saksi nga papa pinaagi sa pagtandi kaniya sa iyang mga igsoon ug mga klasmet. “Mibati kong way pulos,” miingon si Midori. Pero samtang nagdako si Midori, nakabaton siyag kompiyansa sa kaugalingon. Siya miingon, “Basahon nako ang Bibliya kada adlaw aron magmalinawon ang akong kasingkasing ug bation nako nga gimahal ko ni Jehova.” Nagtakda pod siyag realistikong mga tumong, ug espesipiko siyang nag-ampo alang sa tabang aron makab-ot kana. Ingong resulta, si Midori nagmalipayon sa iyang kaugalingong pag-uswag sa espirituwal.

17. Sa unsang paagi ‘padayon natong mabag-o ang atong panghunahuna,’ ug unsay mga resulta niana?

¹⁷ Ang negatibong mga pagbati ug hunahuna dili tingali dayon mawala. Busa giawhag ta ni Jehova: “Angay nga padayon ninyong bag-ohon ang inyong panghunahuna.” (Efe. 4:23, 24) Siyempre aron mahimo kana, kinahanglan tang mag-ampo, magtuon sa Pulong sa Diyos, ug mamalandong. Padayon sa pagbuhat  niining mga butanga, ug pangayog kusog kang Jehova. Ang iyang balaang espiritu makatabang nimo nga madaog ang tendensiya nga itandi ang imong kaugalingon sa uban. Tabangan sab ka ni Jehova nga makita kon nahimo na kang masinahon o garboso, ug tabangan ka niya sa paghimo dayog mga kausaban.

18. Sa unsang paagi ang giingon sa 2 Cronicas 6:29, 30 makahupay nimo?

¹⁸ Basaha ang 2 Cronicas 6:29, 30. Si Jehova nahibalo kon unsay naa sa atong kasingkasing. Nahibalo sab siya nga naningkamot ta nga masuklan ang espiritu sa kalibotan ug ang atong kaugalingong mga kahuyangan. Sa dihang makita ni Jehova nga naningkamot ta pag-ayo nga masuklan kining mga butanga, mas molalom ang iyang gugma kanato.

19. Giunsa pag-ilustrar ni Jehova ang iyang pagbati kanato?

¹⁹ Aron iilustrar ang iyang pagbati kanato, gigamit ni Jehova ang gugma sa inahan sa iyang anak. (Isa. 49:15) Konsideraha ang pananglitan sa usa ka inahan nga si Rachel. Siya misulat: “Ang akong anak nga si Stephanie natawo nga premature. Dihang una nako siyang nakita, gamay kaayo siya ug luoy kaayo tan-awon. Sa unang bulan niya dihang naa pa siya sa incubator, gitugotan ko sa ospital nga kugoson siya kada adlaw. Tungod niana, nasuod kaayo mi. Karon, siya sayis anyos na ug mas gamay kay sa uban nga parehas niyag edad. Pero, palangga kaayo nako siya kay naningkamot siya nga mabuhi, ug nakahatag siya nakog dakong kalipay!” Makapalipay gyod ang pagkahibalo nga ingon ana ka lalom ang gugma ni Jehova kanato dihang makita niya nga naningkamot ta sa pag-alagad kaniya nga kinasingkasing!

20. Ingong alagad ni Jehova, unsay imong rason nga malipay?

²⁰ Ingong alagad ni Jehova, importante ka nga membro sa iyang pamilya ug walay lain nga sama nimo. Si Jehova nagkabig nimo dili tungod kay mas maayo ka sa uban. Gikabig ka niya kay nakita niya sa imong kasingkasing nga ikaw mapainubsanon ug andam magpatudlo kaniya ug magbag-o. (Sal. 25:9) Makasalig ka nga gipabilhan niya ang imong mga paningkamot sa pag-alagad kaniya. Ang imong paglahutay ug pagkamatinumanon nagpakita nga duna kay “madinawaton ug maayong kasingkasing.” (Luc. 8:15) Busa padayong ihatag ang imong kinamaayohan kang Jehova. Kon imo nang himoon, duna kay maayong rason nga malipay “sa [imong] mga buhat.”