1. Sabwaya jani Yehova kanniladdaniha na attu ena?

YEHOVA onokwela ottiyana wa dhilobo. Eji enowoneya mwa dhottandda dhaye dhotene, otaganyiha na nlogo na attu. Attu otene bottiyana. Sabwa ya ejuwene Yehova kanuladdaniha na attu ena. Iyene onopepesa murima wawo vina onoziwa omuttu wawo wa mwari. (1 Sam. 16:7) Iyene onoziwa vangomela guru dhawo, mukalelo otanddiwiwe vina kankumbirha wi okose elobo ehinwodhiwe okosa. Iyo ninofwanyela ovyonaga dhahene ninga munnonela Yehova. Dhawene panwodhihu “ononelamo” pama, wi kanilitxi attu apama opitta attu ena vina kanilitxi ottabwaya.—Rom. 12:3.

2. Ekalelini yabure oviladdaniha na attu ena?

² Kavali makani wang’anaga dhotagiha dhapama dha attu ena. Motagiha, weyo txino onomuziwa mbali onlaleya na ttotto? (Aheb. 13:7) Akala pumwenemo, yotagiha yaye enele wukamihedha okana yopurelamo yapama mmabasani a olaleya. (Fil. 3:17) Mbwenye vahikala ottiyana onddimuwa wa omutagiha muttu na oviladdaniha na muttu mwina. Onviladdaniha na muttu mwina onodhaga okala muttu wa nrima, onokumuwa vina onodhaga ovyona wi kana ttima. Ninga monilehu nsunzo nivirile otamela mavurhano mmulogoni, enodha wobaniha nroromelo nehu. Yehova onloga wi: “Muthu-muthu onfwanyela avipimena merelo aye: agafwanya dhinimuthabiha, agayena ahañganaga merelo a athu ena.”—Gal. 6:4.

3. Matxinjo gani apama akoseliwe mwigumini mwawo anuttukulela wagalala?

³ Yehova onfuna wi weyo wagalale na mabasa animukosiliwe. Motagiha, akala weyo ohibatiziwa ehikala! Eji yogana ekosiliwe wamunya, sabwa ya omukwela wawo Mulugu. Ovano kobuwela wunuwa wa omuyani onkaniwe ovanene. Motagiha,  onowona wi efunelo yawo ya omwengesa Bibilia vina okosa nsunzo n’omwinya enodhowavi vasogorho? Mowonamo wawo onubuwela wi malobelo animukosiliwe Yehova, onimukosela na murima wotene? (Masal. 141:2) Onokosa mabasa a olaleya se wova vina ohisunza olabihedha pama dhipano dhosunzihana? Akala ohikana murala, onowona wi Yehova oukamihedha okala mamuni, muteliwi obe okala mambali wapama? Akala ohikosa matxinjo apama mwa dhipaddi esi, onele wagalala venjene sabwa ya ejuwene.

4. Txini enasekeserhihu mwari mwa nsunzo ntti?

⁴ Ninowodha wakamihedha attu ena okana wagalala na ovilibihedha onkosani wawunuwa mpaddi w’omuyani. Enowodheya vina wakamihedha wi ahiviladdanihege na attu ena. Mwari mwa nsunzo ntti, ninele wona voroma mukalelo onakamihedhe amambali anawa, vanawili mukalelo onakamihedhena atelani, yaneraru ninele wona vina nikamihedho ninavahe anddimuwa a mmulogoni abali na arogora. Omamalelowa, ninele osekeserha magano a Bibilia ananikamihedhe odhowanavi dhogana dhikosilihu mowiwanana na ewodhelo vina makattamiho ehu.

5. Mowiwanana na Éfeso 6:4, amambali anfwanyela orabela okosa nni?

⁵ Amambali anofwanyela okala txenjewa wi analaddanihege anawa obe anakumbirhege okosa elobo ehinwodhani. Agakosa dhawene anodha wasilidhiha anawa. (Kengesa Éfeso 6:4.) Murogora dhahi onkuweliwa Sachiko * ohiloga: “Anamasunziha aga a oskola, addifunana wi ddikale muttu wa eziwelo opitta anamasunza akwaga. Mowenjedhedha, mmani waddifunana ddikale namasunza woriheya wi ddavahe onamoona wapama anamasunziha aga, anaskola vina babani wahali Munamoona wa Yehova. Iyene wafuna wi vaporovani ddiburutxege manota aderetu, eji kiyali yovevuwa. Masiki mmarihilemi masunzo wale, mudhidhi mwina ddinovivuzaga akala ddinomulabela Yehova venjene.”

6. Elobo gani ensunza amambali na nlebo na Masalmo 131:1, 2?

⁶ Amambali anosunza elobo ya ttima na nlebo na Masalmo 131:1, 2. (Kengesa.) Mwene David ohiloga wi ‘katamela dhilobo dhinddimuwa’ obe dhahawodhiye okana.  Sabwa ya okala muttu wovyeviha vina wovipimelela David wahiwodha ‘ofwasiha vina okurumutxa’ murima waye. Txini ensunza amambali na mazu a David? Amambali kalani ovyeviha vina ovipimelela, kamujedhele okosa dhilobo dhinddimuwa obe dhihinwodhinyu vina kamujedhele wi aninyu anele okosa dhilobo dhakakene. Munofwanyela oziwa vangomela guru dha aninyu vina mwakamihedhe okosa dhogana dhinakwanihedhani. Mugakosa dhawene awene anele wona wi ahikana ttima. Murogora onkuweliwa Marina onowubuwela: “Mmani txipo kaddiladdaniha na abalaga obe na aima ena. Iyene wanddisunziha wi attu otene ahikana dhiwodhelo dhottiyana vina iyo notene nihikana ttima vamentoni va Yehova. Sabwa ya iyene, kaddiniviladdanihetxa na attu ena.”

7-8. Mamuni onatonyihedhe dhavi wi onomulemeza mwadhiye?

⁷ Mamuni wa Mukristu onofwanyela omulemeza mwadhiye. (1 Ped. 3:7) Olemeza entapulela omutamala muttu vina omuriha. Motagiha, mamuni onomulemeza mwadhiye na nriho ninddimuwa. Iyene kanimukumbirha ejile ehinwodhiye okosa. Vina kanimuladdaniha na ayana ena. Muteliwi anewemo dhavi akala mamune mudhidhi wotene onomuladdaniha na ayana ena? Koona yotagiha ya murogora onkuweliwa Rosa oteliwe na mulobwana ohili Munamoona wa Yehova wamuladdanihetxa na ayana ena. Merelo aba a mamune ahiputtula venjene mukalelo onivyona Rosa. Iyene ohiloga dhahi: “Miyo ddanfuna wi attu addubutxedhege wi ddikana ttima vamentoni va Yehova.” Nona mamuni oli Mukristu onofwanyela omuriha mwadhiye. Iyene onoziwa wi eji enele opatta mandano aye na mwadhiye vina mandano aniyena na Yehova. *

⁸ Mamuni onimulemeza mwadhiye onomusiba agakala na attu ena, agakala na mwadhiyeya onomwaddela wi onomukwela vina onomutamalela. (Gano 31:28) Jijuwene ekosile mamuni wa Katerina, ologiwe nsunzo nivirile, iyene ohimukamihedha mwadhiye ovyonagana ttima. Katerina bali mwana, maye mudhidhi wotene wanimulogana, wanimuladdaniha na anayana ena vina akwaye avegiyena. Edhile opadduwa, Katerina wahiroma opima ttima eniyena aviladdanihaga na attu ena—masiki mukaleliye Munamoona wa Yehova! Mamune oli Mukristu ohimukamihedha owanana ekalelo eji vina oroma ovyonagana ttima. Katerina ohiloga: “Mamunaga onoddikwela, onodditamalela sabwa ya dhilobo dhapama dhinkosimi vina onoddiloga mmalobeloni mwaye. Iyene vina onoddubutxedha mikalelo dhokoddela dha Yehova vina onoddikamihedha wogolela dhubuwelo dhaga dhohifwanyelela.”

9-10. Anddimuwa a mulogo amuzuzumeli dhavi omukamihedha murogora owanana elemelelo ya oviladdaniha na attu ena?

⁹ Anddimuwa a mmulogoni anawodhe dhavi wakamihedha abale ana elemelelo ya oviladdaniha na attu ena? Koona yotagiha ya murogora Hanuni, iyene bali mwana kavo wamutamalela. Hanuni onowubuwela: “Miyo ddali muttu wamanyazo vina ddobuwela wi aima ena balitxi attima opitta miyo. Ddiromile oviladdaniha na attu ena ovenyana muhimani.” Masiki vadhiliye okala Munamoona wa Yehova, Hanuni wanviladdanihavi na attu ena. Sabwa ya ejuwene, wavyona ninga muttu ohina ttima mmulogoni. Ovano, iyene onowagalala na mabasa aye o pionera. Txini emukamihedhile otxinja monelo waye?

 ¹⁰ Hanuni ohiloga wi okamihedhiwe na anddimuwa a mmulogoni. Awene amunonihedhemo wi iyene wali wofuneya mmulogoni vina ahimutamalela sabwa ya okala yotagiha yapama. Iyene ohileba dhahi: “Mudhidhi mwina anddimuwa a mmulogoni anddikumbirha wi ddapaganrhaze arogora afuna nikamihedho. Ottomeliwa dhipaddi esi dhanddikamihedha wona wi ddili amakamaka. Miyo ddinowubuwela mudhidhi wadditamaleli anddimuwa a mmulogoni sabwa ya walibiha arogora azombwe aveda nikamihedho. Awene ahiddengesela nlebo na 1 Tesalónika 1:2, 3. Eji yahiddiginya murima waga! Sabwa ya nikamihedho niddivahile akumbuzi aba okwela, ovano ddinovaha ttima mburo waga munikuruni na Yehova.”

11. Ninawodhe dhavi wakamihedha attu “opujiiwa, na ovyeviha,” anlogiwa va Izaiya 57:15?

¹¹ Kengesa Izaiya 57:15. Yehova onowatanala venjene attu “opujiiwa, na ovyeviha.” Ottiya anddimuwavi a mmulogoni, iyo notene ninofwanyela walibiha abali na arogora. Mukalelo mmodha wa okosa ejuwene ku olagiha wi ninowatanaala. Yehova onfuna wi nakamihedhege abalihu wonaga okwela oniyena na mabila aye. (Gano 19:17) Ottiya ejo, ovyeviha na ovipimelela wehu onele wakamihedha abalihu. Iyo kaninfwanyela otamela wang’aniwetxa sabwani ejo enodha otatamula nrima mwa attu ena. Enfwanyelihu okosa ku olabihedha ewodhelo na eziwelo yehu wi nikamihedhena muttu na mukwaye.—1 Ped. 4:10, 11.

12. Txini yattukulela attu ovyeviha okala ofiyedheya na Yezu? (Koona foto ya kapa.)

¹² Iyo ninosunza venjene mukalelo wowaweddiha attu ena nigatanaalela mweddihedho waweddiha Yezu anamafwara aye. Yezu ddi namasunziha munddimuwa okalilewo. Masiki dhawe, iyene wali muttu wana “murima wofwasa wokurumuwa.” (Mt. 11:28-30) Yezu wali muziwetxi vaddiddi masiki dhawene kavigwarula. Agasunzihaga walabihedha mazu ononeleyamo vina misibo dhalogiye dhanddiginya mirima dha attu ovyeviha. (Lk. 10:21) Mottiyana na asogorheli a marelijiau a nsaka nttile akosiha attu ovyona ninga kana ttima vamentoni va Mulugu, Yezu wali ottiyana. (Jo. 6:37) Iyene wanariha attu otene.

13. Opama na okwela wa Yezu wonehile dhavi na mweddihedho waweddihiye anamafwara aye?

¹³ Opama na okwela wa Yezu woneya na mweddihedho waweddihiye anamafwara aye. Iyene wanziwa wi muttu-muttu wa awene wahikana ttotto vina mikalelo dhottiyana. Sabwa ya ejuwene, otene kagawodhile okosa mabasa akakene nne okana dhopurelomo dhakakene mmabasani a olaleya. Masiki dhawene, iyene wanvaha ttima mabasa akosa muttu-muttu. Musibo ologile Yezu wakobiri dha nddarhama onowoniha wi iyene wali muttu wononelamo. Vamusiboni obu nabuya ohimuttomela mabasa mwimeleli mmodha-mmodha “apimelelaga owarala wa muthu-muthu.” Mwimeleli mmodha walabile pama wahiwodha oranjula venjene opitta mukwaye. Masiki dhawene nabuyawa wahatamalela na mazu akakene: “Eyá ekala mwimeleli wapama, wawiwananeyana!”—Mt. 25:14-23.

14. Ninawodhe dhavi otagiha mweddihedho waweddiha Yezu attu ena?

¹⁴ Yezu ononeddiha na okwela vina oderetu. Iyene onononelamo wi makattamiho na ewodhelo yehu enottiyana vina onowagalala aganonaga nivilibihedhaga mpaka apale vanwodhelihu. Ninofwanyela waweddiha attu ena na oderetu dhahene ninga mwakosela Yezu. Enodha opadduwa abalihu ohiwodhaga okosa venjene ninga munkosela abali ena, masiki dhawene nikale pasope wi ninaloge elobo enatotele manyazo obe ovyona ninga kana ttima. Ottiya ejo, natamaalele sabwa ya  guru enkosani ya omulabela Yehova mpaka vanwodhelani.

15-16. Murogora dhahi opurelimo dhavi sabwa ya okana dhogana dhatxibarene?

¹⁵ Nigakana dhogana dhomuyani egumi yehu enokana ttima vina dhotene dhinkosihu dhinosogora. Wi ejo epadduwe, ninofwanyela okosa dhogana nipimelelaga ewodhelo yehu vina mowiwanana na makattamiho ehu, ottiya oviladdaniha na attu ena. Nigahikose dhawene, dhogana dhehu dhinodha onitotela makattamiho vina orimeliwa wagalala. (Lk. 14:28) Koona epadduwile na murogora onkuweliwa Midori.

¹⁶ Midori bali mwana, babe wahali Munamoona wa Yehova kanvaha ttima, iyene wanimuladdaniha na abalaye vina akwaye o’skola. Midori ohiloga: “Miyo ddavyona ninga elobo yohikana mabasa.” Mbwenye mudhidhi wonuwa Midori, wahiroma ovyang’anela. Vasogorhova ohiloga dhahi: “Omwengesa Bibilia malabo otene oddikamihedha okana wagalala wa mmurimani vina oziwa wi Yehova onoddikwela.” Ottiya ejo Midori wahikosa elobo yina, iyene wahitadela dhogana dhatxibarene vina wankosa malobelo wi Yehova amukamidhe wakwanihedha. Txini Edhile opadduwa? Midori ohiwodha wagalala na wunuwa waye mpaddi w’omuyani.

17. Ninawodhe dhavi ‘ohabihedhaga murima na zelu yehu’ nanda ninakane yopurelamo gani?

¹⁷ Dhubuwelo dhohifwanyelela dhindowa badhigavira vang’ono-vang’ono. Nona Yehova aganilibiha wi: “Enofuneya muhabihedhe murima na zelu yenyu.” (Ef. 4:23, 24) Wi niwodhe okosa ejuwene, enofuneya olobela, wengesa Nzu na Mulugu vina otanalela.  Kavirihamo dhilobo esi mwigumini mwawo vina kamukumbirhe Yehova wi ovahe guru ya okosa ejuwene. Muya waye wokoddela onele wukamihedha opemberha elemelelo ya oviladdaniha na attu ena. Egapadduwa bewu ya nrima na ovittukulela enroma omela mutxitxi mmirimani mwawo Yehova onele wukamihedha ozinddiyela wi owodhe oddulamo.

18. Mazu anfwanyeya va 2 Mapadduwo 6:29, 30 annipangarhaza dhavi?

¹⁸ Kengesa 2 Mapadduwo 6:29, 30. Yehova onoziwa dhili mmirima mwehu. Iyene vina onoziwa wi ninowanana—muya wa elabo ejino vina na ohiligana wehu. Mbwenye Yehova aganonaga nivilibihedhaga owanana mirega esi, onikwela waye onowejendhedheya.

19. Yehova onlabihedha nladdaniho gani wi anikamihedhe ononelamo onikwela waye?

¹⁹ Wila aladdanihe onikwela waye, Yehova ohilabihedha okwela onna mambali na mwanaye wanyenye. (Iza. 49:15) Koona epadduwile na mambali onkuweliwa Rachel. Iyene ohileba: “Mwanaga Stephanie wabaliwe na myeri dhohakwanela. Mbwenyi mweri woroma wafuna iyene okala mu inkubadora, adotoriya ahiddittiya wi akale na miyo siku notene. Mudhidhene obule, miyo na mwanaga nakala ofiyedheya muttu na mukwaye. Ovano Stephanie ona vyaka tanu na modha dhobaliwa iyene mung’ono kanligana na aima ena abaliwe nsaka nakakene. Masiki dhawene, ddinomukwela venjene vowi ohiwodha okalawo vina ohiddidhelana wagalala mwigumini mwaga!” Johagalaliha oziwa wi Yehova onnikwela dhawene aganonaga nivilibihedhaga wi nimulabele na murima wehu wetene!

20. Txini enuttukulela wagalala sabwa ya okala mulabeli wa Yehova?

²⁰ Sabwa ya okala mulabeli wa Yehova, weyo ohikana ttima munikuruni naye vina ohittiyana na attu ena. Yehova kokukuseli munikuruni naye sabwa yokala wamakamaka opitta attu ena. Iyene wukukuseli sabwa ya wona murima wawo, oziwa wi oli wovyeviha vina womala nawale wi osunze magano aye. (Masal. 25:9) Kakuluvela wi Yehova onovaha ttima dhotene dhinkosiwe mmabasani mwaye. Ovilela na ntidi vina weddeyana wawo dhinowoniha wi “okana murima womyala.” (Lk. 8:15) Nona, kadidelavi okosa mabasa a Yehova mpaka apale vanwodhiwe. Ogakosa dhawene onele ‘wagalala na dhowira dhawo.’