LARTIK LETID 29
Kontant ou avek sa ki ou kapab fer pour Zeova!
“Sakenn i devret . . . kontan akoz sa ki li menm in fer e pa akoz i pe konpar li avek en lot dimoun.”—GAL. 6:4.
KANTIK 34 Mars avek fidelite
SA KI NOU POU ETIDYE *
1. Akoz Zeova pa konpar nou avek lezot?
ZEOVA pa anvi ki tou keksoz oubyen tou dimoun i parey. Nou konn sa parski i’n fer diferan kalite plant, zannimo ek dimoun. Napa personn ki egzakteman parey ou. Alor, Zeova pa zanmen konpar ou avek lezot. I kapab vwar ki kalite dimoun ou ete. (1 Sam. 16:7) I osi konn sa ki ou kapab e pa kapab fer e lafason ki ou’n grandi. I pa demann ou pour fer plis ki sa ki ou kapab fer. Nou bezwen vwar nou prop lekor parey Zeova i vwar nou e sa pou fer nou annan en “lopinyon rezonnab” lo nou lekor.—Rom. 12:3.
2. Akoz i pa bon pour konpar nou lekor avek lezot?
2 Nou kapab aprann bann bon keksoz avek lezot. Par egzanp, i kapab ki nou konn en frer ouswa en ser ki fer byen dan predikasyon. (Ebr. 13:7) Nou kapab aprann avek li ki mannyer nou kapab amelyor lafason ki nou anons sa bon nouvel. (Fili. 3:17) Me i annan en diferans ant swiv legzanp en dimoun ek konpar nou lekor avek li. Si nou konpar nou lekor avek lezot, nou kapab vin groker, dekouraze oubyen santi ki nou pa vo nanryen. Parey nou ti aprann dan sa lartik avan, si nou esey fer konpetisyon avek nou bann frer ek ser dan kongregasyon, sa i osi kapab gat nou lanmitye avek Zeova. Alor, Zeova i dir nou: “Sakenn i devret egzamin son prop aksyon e apre sa, i pou kontan akoz sa ki li menm in fer e pa akoz i pe konpar li avek en lot dimoun.”—Gal. 6:4.
3. Ki serten progre ki ou’n fer pour ador Zeova ki fer ou zwaye?
3 Zeova i anvi ki ou kontan akoz bann progre ki ou’n fer pour ador li. Par egzanp, ou devret kontan ki ou’n atenn sa lobzektif pour batize. Sa i en desizyon ki ou’n fer lo ou menm. Ou’n fer sa desizyon akoz ou kontan Bondye. Mazin lo tou sa ki ou’n fer depi sa letan. Par egzanp, eski ou lanmour pour lektir ek letid Labib in ogmante? Eski ou pe fer bann lapriyer senser? (Ps. 141:2, NWT) Eski ou’n amelyor lafason ki ou konmans bann konversasyon dan predikasyon e lafason ki ou servi bann zouti dan predikasyon? Si ou annan en fanmir, eski Zeova in ed ou pour vin en pli bon msye, madanm ouswa paran? Ou kapab santi ou pli zwaye avek tou bann sanzman ki ou’n fer.
4. Ki nou pou diskite dan sa lartik?
4 Nou kapab ed lezot pour kontan akoz bann progre ki zot in fer pour ador Zeova. Nou osi kapab ed zot pour aret konpar zot avek lezot. Dan sa lartik, nou pou vwar ki mannyer bann paran i kapab ed zot zanfan, ki mannyer msye ek madanm i kapab ed kanmarad e ki mannyer bann ansyen ek lezot i kapab ed bann frer ek ser. Finalman, nou pou vwar serten verse Labib ki kapab ed sakenn parmi nou pour met bann lobzektif ki nou kapab atenn.
KI BANN PARAN EK BANN KOUP MARYE I KAPAB FER?
Paran, montre sakenn parmi ou bann zanfan ki ou kontan bann bon keksoz ki zot fer (Vwar paragraf 5-6) *
5. Dapre Efezyen 6:4, ki paran i devret evite fer?
5 Paran pa devret konpar zot zanfan avek kanmarad oubyen ekspekte ki en zanfan i fer plis ki i kapab. Si paran i fer sa, zot kapab dekouraz zot zanfan. (Lir Efezyen 6:4.) En ser ki apel Sachiko * i dir: “Mon bann ansenyan ti ekspekte ki mon fer pli byen ki mon bann kanmarad lekol. An plis, mon manman ti anvi ki mon fer byen lekol pour ki mon ansenyan ek mon papa ki pa en Temwen Zeova i mazin an byen lo Temwen Zeova. Anfet mon manman pa ti anvi mon fer okenn fot dan mon legzanmen. Me sa ti enposib. Menm si i fer plizyer lannen ki mon’n fini lekol, parfwa mon santi ki menm si mon pe donn Zeova mon meyer, Zeova pa satisfe.”
6. Ki bann paran i kapab aprann avek Psonm 131:1, 2?
6 En leson enportan pour bann paran i trouve dan Psonm 131:1, 2, NWT. * (Lir.) Lerwa David ti dir ki i pa “tay deryer bann keksoz ki tro gro” oubyen bann keksoz ki gran pour li. Vi ki i ti annan limilite, i ti kontant li avek sa ki i annan e i ti ere. Ki bann paran i kapab aprann avek sa ki David ti dir? Paran i kapab demontre limilite ler zot pa ekspekte tro bokou avek zot lekor e avek zot zanfan. Paran i kapab fer zot zanfan santi ki zot ganny apresye ler zot rekonnet sa ki zot zanfan i kapab fer e sa ki i pa kapab fer. Apre, i ed son zanfan pour met bann lobzektif ki i kapab atenn. En ser ki apel Marina i dir: “Mon manman pa ti zanmen konpar mwan avek mon trwa frer oubyen avek lezot zanfan. I ti ansenny mwan ki tou dimoun i annan diferan abilite e ki nou tou nou presye pour Zeova. Gras a mon manman, i rar ki mon konpar mwan avek lezot.”
7-8. Ki mannyer en msye i kapab onor son madanm?
7 En msye Kretyen i bezwen onor son madanm. (1 Pyer 3:7) Pour onor lezot i vedir donn en latansyon spesyal e demontre respe anver zot. Par egzanp, en msye i onor son madanm ler i demontre respe pour li. I pa demann li pour fer plis ki i kapab fer. I pa konpar li avek lezot madanm. Ki mannyer en madanm pou santi si son msye i konpar li avek lezot madanm? Msye en ser ki apel Rosa, ki pa en Temwen Zeova, i souvan konpar Rosa avek lezot madanm. Son bann parol blesan in fer Rosa santi ki i pa vo nanryen e ki lezot pa vreman kontan li. Rosa i dir: “Mon bezwen ganny rapel souvan ki Zeova i apresye mwan.” De lot kote, en msye Kretyen i onor son madanm. I konnen ki sa i annan en bon lefe lo son relasyon avek son madanm e lo son lanmitye avek Zeova. *
8 En msye ki onor son madanm i koz an byen lo son madanm avek lezot dimoun. I dir son madanm ki i kontan li e ki i apresye li. (Prov. 31:28) I koumsa ki msye Katerina, ki’n ganny mansyonnen dan sa lartik avan, ti ed li pour aret santi ki i pa alaoter. Ler Katerina ti ankor en zanfan, son manman ti kritik li e souvan i ti konpar li avek lezot fiy, enkli son bann zanmi. Alor Katerina ti konmans konpar li avek lezot e i ti kontinyen fer sa menm apre ki i ti’n vin en Temwen Zeova. Me son msye ti ed li pour aret fer sa e pour annan en bon lopinyon lo son lekor. Katerina i dir: “I kontan mwan. I felisit mwan pour bann bon keksoz ki mon fer e i priy pour mwan. I osi fer mwan rapel bann zoli kalite Zeova e i ed mwan pour aret annan bann lopinyon negatif.”
KI BANN ANSYEN EK LEZOT DAN KONGREGASYON I KAPAB FER?
9-10. Ki mannyer bann ansyen ti ed en ser pour aret konpar son lekor avek lezot?
9 Ki mannyer bann ansyen i kapab ed bann frer ek ser ki konpar zot lekor avek lezot? Annou vwar legzanp en ser ki apel Hanuni. Ler Hanuni ti ankor en zanfan, i rar ki i ti ganny felisite. I dir: “Mon ti timid e santi ki lezot zanfan i pli meyer ki mwan. Depi ler mon ti ankor en zanfan, mon ti konmans konpar mon lekor avek lezot.” Menm apre ki Hanuni in vin dan laverite in kontinyen konpar son lekor avek lezot dan kongregasyon. Alor i ti santi ki sa ki i ti fer dan kongregasyon pa ti enportan. Me aprezan Hanuni i zwaye e i pe servi konman en pionye. Kwa ki’n ed li sanz son latitid?
10 Hanuni i dir ki i ti ganny led avek bann ansyen. Zot ti dir li ki i ganny bokou apresye dan kongregasyon e felisit li pour son legzanp fidelite. Hanuni i dir: “Parfwa bann ansyen ti demann mwan pour ankouraz bann ser ki ti bezwen led. Sa ti fer mwan santi ki bann frer ek ser i bezwen mon led. Mon rapel ler bann ansyen ti remersi mwan pour lankourazman ki mon ti donn serten zenn ser. Apre zot ti lir 1 Tesalonisyen 1:2, 3 avek mwan. Sa ti fer mwan vreman kontan! Gras a sa bann ansyen, aprezan mon konnen ki mon itil dan kongregasyon.”
11. Ki mannyer nou kapab ed bann “ki’n ganny kraze e ki lespri i fatige” parey i ganny ekri dan Izai 57:15?
11 Lir Izai 57:15, NWT. * Zeova i vreman enterese avek bann “ki’n ganny kraze e ki lespri i fatige.” Nou tou, enkli bann ansyen, nou kapab ankouraz sa bann frer ek ser. En fason ki nou ankouraz zot i ler nou montre zot ki nou enterese avek zot. Zeova i anvi ki nou montre zot ki kantite i kontan zot. (Prov. 19:17, NWT) Nou osi kapab ed nou bann frer ek ser par demontre limilite e pa demonstre akoz bann abilite ki nou annan. Nou pa anvi atir latansyon lo nou menm parski nou pa anvi ki lezot i zalou nou. O kontrer, nou servi nou bann abilite ek konnesans pour ankouraz lezot.—1 Pyer 4:10, 11.
Bann disip Zezi ti kontan pas letan avek Zezi parski i pa ti zanmen azir konmsi i ti pli siperyer ki zot. I ti kontan pas letan avek son bann zanmi (Vwar paragraf 12)
12. Akoz bann dimoun ti kontan pas letan avek Zezi? (Vwar portre lo kouvertir.)
12 Nou kapab aprann en kantite lo ki mannyer pour tret lezot avek lafason ki Zezi ti tret son bann disip. I ti sa pli gran zonm ki’n deza egziste. Kantmenm sa, i ti ‘dous e annan limilite.’ (Mat. 11:28-30) I pa ti demonstre akoz i ti entelizan e akoz i ti konn en kantite keksoz. Ler i ti ansenny bann dimoun, i ti koz dan en fason ki senp e i ti servi bann legzanp ki ti fasil pour konpran e ki ti tous leker bann ki annan limilite. (Lik 10:21) Zezi pa ti parey bann sef relizye orgeye. I ti toultan fer lezot santi ki zot presye pour Bondye. (Zan 6:37) I ti tret bann dimoun avek respe.
13. Ki mannyer Zezi ti montre ki i ti tret son bann disip avek labonte ek lanmour?
13 Zezi ti tret son bann disip avek labonte ek lanmour. I ti konnen ki zot annan diferan abilite ek sirkonstans. Alor, pa zot tou ki ti pou kapab fer menm keksoz oubyen fer menm kantite dan predikasyon. Me i ti kontan ki sakenn parmi zot ti donn zot meyer. Zezi ti montre ki i ti konpran zot ler i ti donn zot sa legzanp konsernan bann talan. Dan sa legzanp, sa met ti donn sak lesklav en travay “dapre son abilite.” Enn parmi sa de lesklav ki ti travay dir ti ganny plis talan ki lot, me sa met ti felisit tou le de parey. I ti dir: “Ou’n byen fer, ou en lesklav ki bon e fidel!”—Mat. 25:14-23.
14. Ki mannyer nou kapab tret lezot parey Zezi ti fer?
14 Zezi i toultan tret nou avek labonte ek lanmour. I konnen ki nou tou nou annan diferan abilite ek sirkonstans. I kontan ler nou donn nou meyer. Nou devret tret lezot parey Zezi ti fer. Nou pa devret zanmen fer en frer oubyen en ser santi ki i pa vo nanryen oubyen onte akoz i pa kapab fer otan ki lezot. O kontrer, nou devret toultan felisit nou bann frer ek ser pour fer zot mye pour servi Zeova.
MET BANN LOBZEKTIF KI OU KAPAB ATENN
Trouv lazwa ler ou met e atenn ou bann lobzektif (Vwar paragraf 15-16) *
15-16. Ki byenfe en ser ti gannyen ler i ti met bann lobzektif ki i kapab atenn?
15 Ler nou annan bann lobzektif dan servis Zeova, nou lavi pou fer sans e nou pou satisfe. Me nou bezwen met bann lobzektif ki nou kapab atenn. Nou pa bezwen annan menm lobzektif parey lezot. Si nou fer sa, i kapab ki nou pou dezapwente e dekouraze. (Lik 14:28) Annou vwar legzanp en ser ki apel Midori e ki en pionye.
16 Ler Midori ti ankor en zanfan, son papa ti abitye dir li ki son bann frer ek ser ek kanmarad lekol ti pli meyer ki li. Midori i dir: “Mon ti santi ki mon pa vo nanryen.” Me anmezir ki Midori ti grandi, i ti konmans santi li pli byen. I dir: “Mon ti lir Labib toulezour parski sa ti ed mwan pour santi ki Zeova i kontan mwan.” An plis, i ti met bann lobzektif ki i ti kapab atenn e i ti priye pour ganny led pour atenn sa bann lobzektif. Sa ti fer Midori satisfe avek bann keksoz ki i ti kapab fer pour Zeova.
KONTINYEN DONN ZEOVA OU MEYER
17. Ki mannyer nou kapab “kontinyen renouvle [nou] fason panse” e ki rezilta sa pou anmennen?
17 I kapab pran en kantite letan pour sanz lafason ki nou santi konsernan nou prop lekor. Zeova i dir nou: “Zot devret kontinyen renouvle zot fason panse.” (Efe. 4:23, 24) Pour fer sa, ou bezwen priye, etidye Parol Bondye e medite. Alor, kontinyen fer sa bann keksoz e demann Zeova lafors. Son lespri sen pou ed ou pour aprann pour pa konpar ou lekor avek lezot. Zeova pou osi ed ou konnen si ou’n vin orgeye oubyen groker e i pou osi ed ou pour fer bann sanzman vitman.
18. Ki mannyer sa bann parol dan 2 Kronik 6:29, 30 i kapab rekonfort ou?
18 Lir 2 Kronik 6:29, 30, NWT. * Zeova i konn sa ki dan nou leker. I osi konnen ki nou pe lager kont bann move lenfliyans sa lemonn e kont nou prop lenperfeksyon. Ler Zeova i vwar ki kantite nou pe lager kont sa bann move keksoz, son lanmour pour nou i vin pli for.
19. Ki legzanp Zeova i servi pour montre nou lafason ki i santi anver nou?
19 Zeova i servi legzanp lanmour ki annan ant en manman ek son pti baba pour montre ki mannyer i santi anver nou. (Iza. 49:15) Annou vwar legzanp en manman ki apel Rachel. Rachel i dir: “Mon fiy Stephanie ti ne avan son ler. Ler mon ti vwar li, i ti paret ptipti e frazil. Apre ki i ti ne, i ti reste lopital pour en mwan me toulezour dokter ti les mwan pran li dan mon lebra. Pandan sa letan, nou ti vin vreman pros avek kanmarad. Aprezan, i annan si-z-an e i pli pti ki manrmay son laz. Kantmenm sa, mon kontan li en kantite parski i’n lalit pour li viv e i fer mwan vreman kontan.” Nou kontan pour konnen ki Zeova i kontan nou en kantite ler i vwar nou pe fer tou sa ki nou kapab pour donn li nou meyer.
20. Konman en serviter Zeova, ki rezon ou annan pour zwaye?
20 Konman en serviter Zeova, ou en dimoun ki presye dan son fanmir e napa personn ki parey ou. Zeova pa’n atir ou ver li akoz ou pli meyer ki lezot. I’n atir ou parski in vwar ki ou en dimoun ki annan limilite e ki pare pour aprann avek li e fer bann sanzman neseser. (Ps. 25:9, NWT) Ou kapab asire ki Zeova i kontan ler ou fer ou mye pour servi li. Ou’n andire e ou fidel avek li. Sa i montre ki ou annan “en leker bon e pir.” (Lik 8:15) Alor, kontinyen donn Zeova ou meyer. Apre ou pou annan bon rezon pour zwaye “akoz sa ki [ou] menm [ou’n] fer.”
KANTIK 38 I pou fer ou for
^ par. 5 Zeova pa konpar nou avek lezot. Me i kapab ki nou konpar nou avek lezot e apre nou santi ki nou pa alaoter. Dan sa lartik, nou pou vwar akoz i mal pour nou konpar nou avek lezot. Nou pou osi vwar ki mannyer nou kapab ed nou bann manm fanmir ek bann frer ek ser dan kongregasyon pour vwar zot parey Zeova i vwar zot.
^ par. 5 Serten non in sanze
^ par. 6 Psonm 131:1, 2: “1 O Zeova, mon leker i pa orgeye, mon lizye pa arogan, mon pa anvi tay deryer bann keksoz ki tro gro, ni bann keksoz ki tro gran pour mwan. 2 Non, plito mon’n kalme e fer mon nanm reste trankil parey en zanfan sevre avek son manman, mon satisfe parey en zanfan sevre.”
^ par. 7 Menm si nou pe koz lo bann msye, en kantite sa bann prensip i aplik pour bann madanm.
^ par. 11 Izai 57:15, (NWT): “La sa ki sa enn gran e siperyer, ki reste pour touzour e ki son non i sen, in dir: ‘Mon reste anler e dan en landrwa sen, me osi avek sa enn ki’n ganny kraze e ki lespri i fatige, pour relev moral bann ki annan limilite e pour soulaz leker bann ki pe ganny kraze.’”
^ par. 18 2 Kronik 6:29, 30, (NWT): “29 Nenport lapriyer, nenport demann pour ganny faver delapar okenn zonm oubyen tou ou pep Izrael, (parski sakenn i konn son soufrans ek son douler) ler zot pou priy avek zot lanmen ouver ver sa lakaz 30 alor ou ki dan lesyel, la kot ou reste, ou a ekout zot e pardonn zot e donn sakenn dapre son aksyon, parski ou konn son leker (akoz zis ou ki konn leker bann imen).”
