1. Saide Yehofa nai maiki wi anga taawan?

TE U luku libisama, den sii, den meti, anga ala den taa sani di Yehofa meke, da wi e si kiin taki Yehofa á lobi wan sani namo. Neen meke noiti a o maiki yu anga wan taa sama. Yehofa poi si san de aini yu ati, a sabi fa i de tuutuu (1 Sam. 16:7). Yehofa sabi san i poi du bun, anga san yu á poi du. A sabi tu taki a fasi fa i kiya e meke son sani moo taanga gi i fu du. Neen meke a nai akisi i fu du sani di a sabi taki yu á poi du. U mu meke moiti fu si useefi enke fa Yehofa e si u. Te wi e si useefi enke fa Yehofa e si u, da u ná o go e fii useefi, ma u ná o go e si enke taawan bun moo u tu.​—Rom. 12:3.

2. Saide wi á mu e maiki useefi anga taawan?

² A á fowtu fu e luku fa taawan e du sani, bika a sani ya sa yeepi u fu sabi fa fu du son sani. Kande i sabi wan baala efuso wan sisa, di sabi peleiki bun (Heb. 13:7). I sa leli fa fu toon wan moo bun peleikiman te yu e luku fa ai du en wooko (Filip. 3:17). Ma a á be o bun fu e maiki iseefi anga a baala efuso sisa ya, bika a sani ya sa meke i bigin dyalusu anga en. A sa meke i lasi-ati efuso booko-saka tu. U be leli aini a artikel di pasa taki efu wi e sitee anga taawan aini a kemeente, a sani de o meke wi á libi na a wan moo. Sitee libi sa poli wi anga Yehofa tu. Neen meke Yehofa e taigi u taki: ‘Meke ala sama ondoosuku enseefi. A sani de o meke a piisii anga san a poi du. A á mu maiki enseefi anga taawan.’​—Gal. 6:4.

3. Fa i si taki i go a fesi aini den ten di pasa?

 ³ Yehofa wani i piisii te yu e go a fesi. Meke u taki wan fu den maiki fi i, a be fu dopu. Te i doo a maiki ya, i mu piisii, bika a wan fasi fa i go a fesi. A di i lobi Yehofa meke i du a sani ya. Pakisei ala den fasi fa i go a fesi fanafu di i bigin sutudeli. I kon moo lobi leisi Beibel? Te yu e begi nownow i man taki moo bun anga Yehofa? (Ps. 141:2) Ai moo makiliki gi i fu taki anga sama aini a peleikiwooko, efuso fu koboloiki den nyun wookosani di den baala gi u fu peleiki? Efi yu abi wan osufamii, Yehofa yeepi i fu toon wan moo bun man, wan moo bun uman, wan moo bun mma efuso wan moo bun dda? Ala den sani ya a fasi fa i go a fesi. Neen meke efi i si taki i go a fesi anga iniiwan fu den sani ya, i mu piisii anga a moiti di i meke.

4. San wi o luku aini a artikel ya?

⁴ U sa yeepi taawan fu denseefi piisii te den e go a fesi. U sa yeepi den tu fu den nai maiki denseefi anga taawan. Aini a artikel ya wi o luku fa mma anga dda sa yeepi den pikin, fa toowpaa sa yeepi makandaa, anga fa owluman efuso Kelesten di abi ondoofeni sa yeepi taa baala anga sisa. Baka dati wi o luku wantu leli fu Beibel, di o yeepi ibiiwan fu u fu poti maiki di u sa doo.

5. Enke fa Efeisesama 6:4 e soi, da anga san mma anga dda mu luku bun?

⁵ Mma anga dda mu luku bun fu den nai suku fini a den pikin fu den tumisi. Efi yu e maiki i pikin anga taawan, a sani de o meke den fii enke den á bun. (Leisi Efeisesama 6:4.) Wan sisa den e kai Sasiko * taki: ‘Den muneli anga den yefolow be e wani mi wooko bun moo den taa pikin. Efu dati á be sai, da mma be e feti fu mi wooko bun a sikoo, bika a be e si enke na a sani de be o meke nda kon dini Yehofa. A be wani mi wooko bun tu fu soi a yefolow fu mi taki Kotoigi pikin e leli a sikoo. A be taigi mi taki a soso 10 mi be mu kisi na a eksame, ma mi á be koni fu so. A wantu yali kaba mi kaba sikoo, toku son yuu mi e fii enke a moiti di mi e meke á bun sai gi Yehofa.’

6. San mma anga dda sa leli fu Psalm 131:1, 2?

 ⁶ Mma anga dda sa leli wan pelensipali sani fu a sani di sikiifi a Psalm 131:1, 2. (Leisi en.) Kownu David be taki ‘a á be e suku sani di bigi tumisi’ efuso sani di a si taki a á be o poi fende. Fu di a be abi sakafasi meke a be e tifeedi anga san a be poi du. San mma anga dda sa leli fu a sani di David taki ya? Mma anga dda mu abi sakafasi. Dati wani taki den á mu e maiki denseefi anga taawan. Den á mu e suku fini tumisi a den pikin fu den tu. Te den e yeepi den pikin fu poti maiki gi denseefi, den mu holi a pakisei san a pikin poi du anga san a á poi du. A sani ya o yeepi a pikin fu a á fii booko-saka te a á poi du son sani. Wan sisa den e kai Marina taki: ‘Noiti mma be e maiki mi anga den taawan a osu, a á be e maiki mi anga taa pikin tu. A leli mi taki ala sama abi den sani di den poi du bun. A leli mi tu taki Yehofa lobi ibiiwan fu u. Na a sani ya meke tide na a dei mi nai maiki miseefi anga taawan.’

7-8. Fa wan man sa soi taki a lobi en uman?

⁷ Wan Kelesten man mu lobi en uman (1 Peit. 3:7). A mu e lesipeki en. Wan man di e lesipeki en uman o go e libi bun anga en ala yuu. A ná o go e akisi en fu du sani di á a poi du. Noiti a o maiki en uman anga taa uman tu. Sowtu takuu bakapisi a abi te wan man e maiki en uman anga taawan? Wan sisa di man nai dini Yehofa taki: ‘Na ala yuu mi man e maiki mi anga taa uman. Den hati sani di ai taigi mi e meke mi e fii enke mi á bun. Mi e fii enke nawan sama o poi lobi mi. Na ala yuu mi mu e membee miseefi taki Yehofa lobi mi.’ Wan man di e dini Yehofa mu e soi en uman taki a lobi en, bika na a sani ya o meke a toowlibi fu den waka bun. Efu a nai libi bun anga en uman, en anga Yehofa o poli. *

⁸ Wan man di lobi en uman e gafa en. Ai taigi en taki a lobi en. Te a de a sama ini seefi ai taki bun fi en uman (Odo 31:28). A so a man fu Katerina di u be taki fi en aini a artikel di pasa, yeepi en fu bigin si enseefi enke fa Yehofa e si en. Di a sisa ya be nyoni, en mma be lobi soso en. A be lobi maiki en anga taa pikin, moomoo den mati fi en. A sani ya be meke Katerina be e maiki enseefi anga taawan ala yuu. Di a bigin dini Yehofa seefi a be e du a sani ya ete. Ma a man fi en yeepi en fu a nai maiki enseefi anga taawan moo. A sisa ya taki: ‘Mi man lobi mi, ai gafa mi, ai begi gi mi tu. Ai yeepi mi fu poti pakisei a den moin manii fu Yehofa. A den sani ya e yeepi mi fu mi á si miseefi enke wan sama di ná abi fa.’

9-10. Fa owluman yeepi wan sisa di be lobi maiki enseefi anga taawan?

⁹ Fa owluman sa yeepi den sama di lobi maiki denseefi anga taawan? Luku a toli fu wan sisa den e kai Hanuni. Di a sisa ya be e goo kon, sama á be e gafa en te a be du wan bun sani. A taki: ‘Sen be e kisi mi. Ala yuu mi be e fii enke den taa pikin bun moo mi. A senten a ten de mi bigin maiki miseefi anga taawan.’ Baka di a sisa ya kon dini Yehofa seefi, a be e maiki enseefi anga taawan ete. Neen meke a be e fii enke a á be pelensipali aini a kemeente. Ma nownow a sisa ya a wan  pionili di e piisii fu dini Yehofa. San yeepi en?

¹⁰ Hanuni taki a den owluman yeepi en. Den soi en taki a pelensipali aini a kemeente. Den be e gafa en fu den sani di a be e du tu. A sisa ya taki: ‘Son leisi a mi den owluman be e akisi fu gi taa sisa taanga-sikin. Den sani ya be e meke mi fii enke mi pelensipali aini a kemeente. A omen leisi owluman gi mi daa te mi be yeepi yonkuu sisa di be abi taanga-sikin fanowdu. Son leisi den be e leisi 1 Tesalonikasama 1:2, 3 gi mi. Ná pikin switi a sani ya be e switi gi mi. Mi e gi Yehofa daa fu den owluman ya, bika nownow mi e fii taki mi pelensipali aini a olikanisâsi fu Yehofa.’

11. Fa u sa yeepi den sama di booko-saka? (Yesaya 57:15)

¹¹ Leisi Yesaya 57:15. Yehofa e booko en ede anga den sama di booko-saka. A ná owluman wawan sa yeepi den sama ya, na ala sama aini a kemeente sa du a sani ya. Wan fasi fa u sa soi taki u lobi den sama ya, a te wi e meke moiti fu sabi fa ai go anga den. Yehofa wani u yeepi den fu si taki a lobi den (Odo 19:17). Wan taa fasi fa wi o yeepi u baala anga sisa, a te wi e tyai useefi a wan fasi di e soi taki wi abi sakafasi. Wi á mu e du, efuso taki sani di sa meke taawan dyalusu. Ma u mu e meke moiti fu gi den taanga-sikin anga ala san wi e du.​—1 Peit. 4:10, 11.

12. Saide den pootiman be lobi Yesesi? (Luku a fowtow a fesise fu A Wakititolen.)

¹² A fasi fa Yesesi be e libi anga taawan e soi u fa useefi sa du a sani ya. Winsi fa Yesesi a be a moo pelensipali sama di be libi a goontapu, toku ‘a be abi safu-ati anga sakafasi’ (Mat. 11:28-30). Yesesi á be e gafa taki a be koni moo ala sama di be de a goontapu. Te a be e leli sama, a á be e koboloiki omen kofaliki wowtu tu, ma a be e taki a wan fasi di den pootiman seefi be e fusutan (Luk. 10:21). Yesesi á be de enke den kelikifesiman di be e fii denseefi. Ala yuu a be e meke sama fii taki den pelensipali gi Gadu (Yoh. 6:37). A be e libi bun anga den pootiman.

13. Fa Yesesi soi taki a be lobi ala den disipel fi en?

¹³ A fasi fa Yesesi be e libi anga den disipel fi en be e soi taki a lobi den. Ala den be abi den manii, anga sani di den be poi du bun. A ná ala den osulibi a be aseefi tu. Neen meke a á be poi gi ala den aseefi faantiwowtu. Son wan fu den be sa du moo aini a peleikiwooko, ma taawan be abi taa faantiwowtu a osu. Toku Yesesi be e teke en fu bigi taki ibiiwan fu den be e du ala san den be poi. Wi e si a sani ya kiin te u luku a ageisitoli di a be gi fu den talenti. Aini a ageisitoli ya, a masaa be gi ibiiwan saafu wan wooko di a be sabi taki a be o poi du. Wan fu den saafu di be du en wooko bun, be du moo sani enke a taawan, ma toku na aseefi fasi a gafa den. A taigi den taki: ‘Moin so! Yu a wan bun saafu di mi sa fitoow!’​—Mat. 25:14-23.

14. Fa u sa waka a Yesesi baka te u luku a fasi fa a be e libi anga taawan?

¹⁴ Ala yuu Yesesi e holi wi a pakisei, bika a lobi u. A sabi taki a ná ala u poi du denseefi sani. Toku ai piisii te wi e du ala san u poi. A so useefi mu e libi anga taawan tu. Wi á mu e du efuso taki sani di o meke u baala efuso sisa fii wan fasi fu di den á poi du sani enke u. U mu e suku  fasi fu gafa u baala anga sisa fu a moiti di den e meke fu du ala san den poi gi Yehofa.

15-16. Sowtu wini wan sisa e fende fu di ai poti maiki di a poi doo?

¹⁵ Te u sabi san u wani du aini a olikanisâsi, wi e moo piisii. Ma u mu luku bun fu u nai maiki useefi anga taawan te wi e du a sani ya. I mu poti maiki di i si taki yu o poi doo. Efu u wani du san taawan e du, winsi fa a libi fu wi anga den a ná aseefi, wi o lasi-ati te u si taki wi á poi du den sani di u be wani (Luk. 14:28). Luku a toli fu wan pionili sisa den e kai Midori.

¹⁶ Midori dda a ná wan Kotoigi. Na ala yuu en dda be e maiki en anga en pikin baala anga en pikin sisa efuso den pikin a sikoo. A be e soso Midori te den taawan be du wan sani bun moo en. Midori taki: ‘Mi be e fii enke mi á bun.’ Ma di Midori kon bigi, a be bigin si enseefi taa fasi. A taki: ‘Ala dei mi e leisi a Beibel, bika a sani ya e yeepi mi fu fii taki Yehofa lobi mi.’ Nownow Midori nai booko en ede so moo anga son sani. Wan taa sani di e yeepi en, na a begi di ai begi Yehofa fu yeepi en fu doo den maiki fi en. Ná pikin piisii Midori e piisii te a doo wan fu den maiki di a be poti.

17. San o yeepi u fu kengi a fasi fa wi e denki? Sowtu wini wi o fende te wi e du a sani ya?

¹⁷ A o teke ten fu kengi a fasi fa wi e fii efuso si useefi. Yehofa sabi a sani ya, neen meke ai taigi u taki: ‘U mu e meke moiti fu denki taa fasi’ (Efe. 4:23, 24). Fu man du a sani ya, u mu e begi, sutudeli Beibel, da u teke ten pakisei san wi e leli. Na ala yuu u mu e meke moiti fu du  den sani ya. Begi Yehofa fu a yeepi i fu si sowtu manii i mu kengi gawgaw fosi den poli yu anga en.

18. Fa a sani di sikiifi a 2 Koloniki 6:29, 30 e toosutu u?

¹⁸ Leisi 2 Koloniki 6:29, 30. Yehofa sabi san wi e denki, anga fa wi e fii. A sabi a moiti di wi e meke fu toto futu gi a ogii goontapu ya. A sabi tu taki na ala yuu u mu e feti anga den sondu fii fu u. Yehofa e moo lobi u te a si a moiti di wi e meke fu libi enke fa a wani, winsi fa a goontapu ya wani u du sani enke den.

19. Fa Yehofa yeepi u fusutan fa ai fii gi u?

¹⁹ Yehofa taki a lobi u moo fa wan mma lobi wan yonkuu pikin fi en (Yes. 49:15). Wan uman den e kai Rachel taki: ‘A meisyo fu mi meke fosi en yuu doo. A fosi leisi di mi si en, a be nyoni te, a á be poi du nawan sani fi enseefi. Den be poti en aini wan masini wantu wiki fosi mi be sa tyai en go a osu. Na ala dei den dataa be e meke mi holi en fu a be gwenti mi. Nownow a abi sigisi yali. A nyoni moo den taa pikin fi en yali, toku mi lobi en anga mi hii ati, bika a feti fu tan a libi. Ai meke a libi moo switi gi mi.’ Na aseefi fasi ya Yehofa lobi u tu. Wi e fii bun te u pakisei fa Yehofa e piisii te wi e meke moiti fu dini en anga u hii ati.

20. Saide ala sama di e dini Yehofa sa piisii?

²⁰ Fanafu a dei di i bigin dini Yehofa neen i toon wan pisi fu a osufamii fi en. Na ala sowtu sama de aini a olikanisâsi ya. Yehofa lobi i. A ná bun i bun moo taawan meke a hali i kon neen. Ma a di a si taki yu a wan sama di abi sakafasi. A si taki i be de kabakaba fu libi enke fa a wani, neen meke a hali i kon neen (Ps. 25:9). I sa biibi taki Yehofa e teke en fu bigi te yu e du ala san i poi gi en. A fasi fa yu e holidoo, anga a moiti di yu e meke fu dini Yehofa e soi taki yu a wan ‘sama di abi wan kiin ati’ (Luk. 8:15). Neen meke, tan du ala san i poi gi Yehofa. Te yu e du a sani ya, ‘yu o piisii anga san i poi du’.