1. Poukwa Jéova pa’a konparé-nou èvè lézòt ?

LÈ NOU ka gadé tousa Jéova kréyé, toujou ni on biten ki diféran ki sé pawmi sé plant-la, ki sé pawmi sé zannimo-la é ki sé pawmi lézimen. Sa ka montré-nou kè Jéova enmé sa ki diféran. Pa ni ponmoun asi latè ki ègzaktèman kon nou. Sé pousa Jéova pa jen ka konparé-nou èvè ponmoun. Li, sa i ka gadé, sé sa ki anfon a tchè an nou, kivédi kimoun nou yé vréman (1 Sam. 16:7). I ka vwè tout bon biten nou ka fè. I ka vwè osi sa nou pa’a rivé fè é i konnèt byen sa nou ja viv. É konm i ka tchenn kont dè tousa, i pé’é jen mandé-nou fè on biten ki two fò pou nou. Fò-nou imité Jéova. Konsa nou ké vwè-nou kon li ka vwè-nou. Kifè, nou ké ‘rézonné byen konm i fo’, nou pé’é di kè nou pi fò ki lézòt é nou pé’é di kè lézòt pi fò ki nou nonplis (Wom. 12:3).

2. Poukwa fò pa nou konparé-nou èvè lézòt ?

² Frè é sè an nou pé aprann-nou onlo biten. Pa ègzanp, pétèt nou konnèt on frè oben on sè ki ka fè on bon travay an prédikasyon (Ébr. 13:7). Si nou pran tan gadé kijan i ka fè, kò an nou ké vin pibon an prédikasyon (Filip. 3:17). Men pran tan gadé kijan on moun ka fè pou imité-y é pran tan gadé kijan on moun ka fè pou konparé-nou èvè-y a pa menm biten-la. Si nou ka konparé-nou èvè lézòt nou pé rivé a vin jalou, sa pé dékourajé-nou é nou pé jous mèt an tèt an nou kè nou pa ni pon valè. Anplisdisa, kon nou vwè adan awtik a simenn pasé, si nou anripaj èvè frè é sè an nou, nou pé’é bon bon zanmi èvè Jéova ankò. Sé pousa Jéova ka ban-nou on konsèy ki plen lanmou. Mi sa i ka di : « Men fò chakmoun pran on tan pou réfléchi asi jan i ka aji, konsa i ké kontan parapòt a sa limenm fè, men i pé’é kontan pas i konparé-y èvè ondòt moun » (Gal. 6:4).

3. Dépi ou koumansé sèvi Jéova, ki pwogré ou ja fè é poukwa fò ou kontan dè sa ?

 ³ Dépi ou koumansé sèvi Jéova, ou ja fè onlo pwogré ! É Jéova vé kè ou kontan sé pwogré-la ou ja fè la. Pa ègzanp, si òbjèktif a-w sé té pran lèbatèm, sèten ou té kontan lèwvwè ou rivé fè sa ! Sé voumenm a-w ki pran désizyon a-w pas ou té enmé Jéova é ou té anvi ba-y vi a-w. Men réfléchi a tout pwogré ou ja fè dépi sa. Ès ou enmé li Labib é étidyé-y plis ki avan ? Lè ou ka gadé jan ou té ka priyé avan é jan ou ka priyé konnyéla la, ès ou ka santi kè ou ka wouvè tchè a-w ba Jéova tibwen plis ? (Sòm 141:2). Ès ou ka rivé koumansé on ti kozé èvè on moun pi fasilman ? Ès ou ka sèvi èvè vidéo an nou é piblikasyon an nou pibyen ? É ès Jéova édé-w vin on pibon mari, on pibon madanm, on pibon papa oben on pibon manman ? Ou pé kontan toubònman pou sé pwogré-la ou ja fè la.

4. Ka nou ké vwè adan awtik-lasa ?

⁴ Lè frè é sè an nou ka fè pwogré adan lavérité, fò yo kontan é nou pé édé-yo fè sa. Nou pé ankourajé-yo osi pou yo pa konparé-yo èvè lézòt. Adan awtik-lasa, nou ké vwè kijan sé paran-la pé édé timoun a yo, kijan lè 2 moun-mayé yonn pé édé-lòt é kijan sé ansyen-la é sélézòt pwoklamatè-la ki adan lasanblé-la pé édé frè é sè a yo. É nou ké vwè osi déotwa prensip a Labib ki ké édé-nou pa pann chapo an nou two ho lèwvwè nou ka chwazi ki òbjèktif nou ké ni.

5. Dapré Éfézyen 6:4, ka pou sé paran-la pa fè ?

⁵ Fò sé paran-la fè atansyon pou yo pa konparé timoun a yo èvè ondòt timoun é fò-yo fè atansyon osi pou yo pa mandé timoun-la fè on biten ki two fò ba-y. Pas si yo fè sa, sa ké dékourajé timoun-la (li Éfézyen 6:4). Mi sa on sè, non a-y sé Sachiko * ka rakonté : « Pwofésè an mwen té vé an travay pibyen ki kanmarad-lékòl an mwen. É manman té vé an travay byen lékòl pou pwofésè an mwen é pap’an mwen ki pa té adan lavérité pa té malpalé Témwen a Jéova. Sa té vé di kè fò pa an té fè on ti érè lèwvwè an té k’ay lègzamen. Men pou mwen, an pa té’é jen rivé fè sa ! Sa ja ka fè onpakèt lanné an lésé lékòl, men jous aprézan an ka mandé-mwen si Jéova kontan sa an ka fè ba-y. Poutan, an sav kè an ka fè tousa an pé pou sèvi-y. »

6. Ka Sòm 131:1, 2 ka montré sé paran-la ?

 ⁶ Sé paran-la pé aprann on biten enpòwtan adan Sòm 131:1, 2 (li-yo). Adan sé vèwsé-lasa, wa David ka di kè ‘i pa té ka chèché biten ki té two gran ba-y é biten ki té two fò pou-y’. Konm i té ni imilité é kè i té ka rèkonnèt limit a-y, sa édé-y « rété kalm » é sa « trankilizé-y ». Ka sé pawòl-la David maké la ka montré sé paran-la ? Pou sé paran-la aji èvè imilité, fò pa yo chèché a fè biten yo pé’é rivé fè é fò pa yo fòsé kad a sé timoun-la nonplis. Si sé paran-la ka édé timoun a yo ni òbjèktif ki ka tchenn kont dè sa yo kapab fè é dè sa yo pa kapab fè, sa ké édé sé timoun-la vwè kè yo ni onlo valè. Mi sa on sè non a-y sé Marina ka sonjé : « Nou té a 4 timoun men manman-mwen pa jen konparé-mwen èvè frè an mwen oben èvè dòt timoun. I toujou di-mwen kè nou pa ni menm kapasité ki lézòt men kè noutout ni onlo valè pou Jéova. Grasa-y, an pa ni labitid konparé-mwen èvè lézòt. »

7-8. Kijan on mari pé ba madanm a-y lonnè ?

⁷ On mari ki ka sèvi Jéova ka ba madanm a-y lonnè (1 Pyè 3:7). Lè ou ka ba on moun lonnè, sa vé di kè ou ka fè atansyon a moun-lasa é kè ou ka rèspèkté-y. Pa ègzanp, on mari ké ba madanm a-y lonnè si i ka fè atansyon a jan-la i ka aji èvè-y la. I pé’é mandé-y fè on biten ki two fò ba-y é i pé’é konparé-y èvè pondòt madanm nonplis. Si i ka konparé-y èvè ondòt madanm, ka ki pé rivé ? Rosa, sé on sè, mari a-y pa Témwen é misyé-la toujou té ka konparé-y èvè dòt madanm. I té ka di Rosa tèlman biten pou fè-y mal kè Rosa té ka pansé kè i pa té ni pon valè é kè ponmoun pa té’é pé enmé-y. Mi sa i ka di : « Toutlè, fò an té fè on travay asi mwen mwen té mèt an tèt an mwen kè Jéova enmé-mwen. » On mari ki enmé Jéova ké ba madanm a-y onlo valè. I sav kè si i fè sa, li é madanm a-y ké antann-yo byen é i ké bon bon zanmi èvè Jéova osi *.

⁸ On mari ki ka ba madanm a-y lonnè toujou ka di bon biten asi-y. I toujou ka di-y kè i enmé-y é i ka félisité-y (Pwov. 31:28). Sé sa mari a Katerina, on sè nou palé dè-y simenn pasé ka fè lè madanm a-y ni santiman négatif. Lèwvwè i té timoun, manman Katerina té ka kritiké-y toutlè, i té ka konparé èvè dòt tifi é i jous té ka konparé-y èvè pwòp zanmi a-y. Akòz dè sa, Katerina koumansé konparé-y èvè lézòt é i jous kontinyé fè sa lèwvwè i vin Témwen a Jéova. Men mari a-y ka édé-y lagé mové labitid-lasa é i ka édé-y rézonné byen konm i fo. Mi sa sè-la ka di : « Mari an mwen enmé-mwen, i ka félisité-mwen toutlè é i ka priyé ban mwen. Anplisdisa, i ka fè-mwen sonjé tout bèl kalité a Jéova é i ka édé-mwen chanjé mannyè an ka rézonné. »

9-10. Ni on sè ki toujou té ka konparé-y èvè lézòt, kijan sé ansyen-la édé-y goumé èvè mové labitid-lasa ?

⁹ Kijan sé ansyen-la pé édé sé frè é sè-la ki toujou ni labitid konparé-yo èvè lézòt ? An-nou palé dè on sè, non a-y sé Hanuni. Lèwvwè i té piti, yo pa té ka tèlman félisité-y. Mi sa i ka sonjé : « An té timid é an té toujou ni lenprésyon kè sa sélézòt timoun-la té ka fè té myé ki sa an té ka fè. An rann-mwen kont kè sé dépi toupiti kè an ka konparé-mwen èvè lézòt. » Kifè, lè Hanuni vin Témwen a Jéova, fò i té goumé èvè mové labitid-lasa. An réyalité, i té ni lenprésyon kè sa i té ka fè adan lasanblé-la pa té ni onlo valè. Men konnyéla la, i pyonyé é  i ni tchè-kontan. Ka ki édé-y chanjé mannyè i té ka rézonné ?

¹⁰ Hanuni ka di kè sé sé ansyen-la ki édé-y onlo. Yo té ka félisité-y pas i té fidèl é yo té ka di-y kè i té on bèl ègzanp adan lasanblé-la. Yo té ka di-y osi kè i té ka fè tout lasanblé-la dibyen. Mi sa i ka rakonté : « Dépawfwa, sé ansyen-la té ka mandé-mwen si an té pé édé sèwten sè ki té dékourajé. Lè yo té ka di’an sa an té ni lenprésyon kè an pa té on zéwo douvan on chif. An ka sonjé kè on jou, sèwten ansyen vin di-mwen mèsi pas an té ankourajé déotwa jenn ti sè. An touvé sa janti toubònman. Yo pran 1 Tésalonisyen 1:2, 3 èvè mwen. Sa touché-mwen onlo ! Grasa sé bon bèwjé-lasa, an rivé konprann kè an ka jouwé on wòl enpòwtan adan lasanblé-la. »

11. Izayi 57:15 ka palé dè ‘moun ki ni imilité é dè moun tchè a yo fann’. Kijan nou pé ankourajé-yo ?

¹¹ (Li Izayi 57:15.) Jéova ka sousyé-y onlo dè moun ‘tchè a yo fann’. A pa enki sé ansyen-la ki pé ankourajé frè é sè an nou, noutout pé fè sa. Pa ègzanp, nou pé montré-yo kè nou ka sousyé-nou dè yo vréman. Jéova vé kè nou montré-yo kè i enmé-yo fò (Pwov. 19:17). Nou pé édé-yo si nou ka aji épi imilité èvè yo é si nou pa’a blagé lèwvwè nou sav fè on biten. Nou pé’é mèt-nou prèmyé douvan pou frè é sè an nou pa jalou. Sa nou anvi, sé sèvi èvè kapasité an nou é sa nou konnèt pou nou ankourajé-yo (1 Pyè 4:10, 11).

12. Poukwa nou pé di kè Jézi sé té moun a toutmoun ? (gadé imaj-la ki anlè po a jounal-la).

¹² Jan-la Jézi té ka aji èvè disip a-y ka aprann-nou onlo biten. Pa té ni boug ki té pi enpòwtan ki Jézi asi latè é poutan ‘i té dous é i té ni imilité’ (Mat. 11:28-30). Pa té ni moun ki té pi entélijan é ki té ni plis konésans ki-y nonplis men apapousa i té ka chèché a fè moun pòté-y anlè. Lèwvwè i té ka anségné sé moun-la, i té ka sèvi èvè dé mo ki senp é lèwvwè i té ka pran dé ègzanp èvè yo, sé té dé biten yo té pé konprann fasilman. Kifè, sa té ka touché tchè a yo (Lik 10:21). Sé chèf a rèlijyon juif la té ni onlo òwgèy é yo té ka fè sé moun-la konprann kè yo pa té ni onlo valè pou Bondyé, men li Jézi a pa konsa i té ka aji (Jan 6:37). I té ka rèspèkté toutmoun.

13. Jézi té ka aji èvè bonté épi disip a-y é i montré-yo kè i té enmé-yo onlo. Kijan i fè sa ?

¹³ Jézi té ka aji èvè bonté épi disip a-y é i montré-yo kè i té enmé-yo onlo. I té sav kè yotout pa té ni menm kapasité-la é kè sitiyasyon a yonn pa té sitiyasyon a lòt. Kifè, yotout pa té pé ni sé menm rèsponsabilité-la é yo pa té pé pasé menm kantité tan-la an prédikasyon. Men sa Jézi té ka aprésyé sé kè yochak té ka ba Jéova sa yo té ni dè méyè. Ègzanp a sé talan-la ka montré kè Jézi té ka chèché a konprann lézòt. Adan ègzanp-lasa, mèt-la ka tchenn kont dè ‘kapasité a chak èsklav’ avan i ba-yo on travay. Ni 2 èsklav ki té ka travay rèd é yonn gangné plis ki lòt-la. Men mèt-la félisité-yo toulédé menmjan-la. Mi sa i di-yochak : « Sé byen ou sé on bon èsklav é ou fidèl ! » (Mat. 25:14-23).

14. Kijan nou pé imité Jézi lèwvwè nou ka aji èvè frè é sè an nou ?

¹⁴ Jézi toujou ka aji èvè nou épi bonté é èvè lanmou. I sav kè noutout pa ni menm kapasité-la é i sav osi kè sitiyasyon an noutout diféran. Men i kontan toubònman lè i ka vwè kè nou ka ba Jéova sa nou ni dè méyè. Kijan nou pé imité Jézi lèwvwè nou ka aji èvè frè é sè an nou ? On biten nou pa té’é jen vé sé kè nou fè on frè oben on sè santi kè i pa ni valè oben santi-y jenné pas i pé pa fè menm biten ki ondòt frè. Pisimé nou félisité frè é sè an nou pou tout éfò yo ka fè pou sèvi Jéova.

15-16. Ka ki édé on sè rann-li kont kè i ni valè ?

¹⁵ Lè nou ni òbjèktif pou sèvi Jéova, vi an nou ka pi bèl é sa ka ba vi an nou on sans. Men lè nou ka chwazi ki òbjèktif nou ké ni, fò-nou tchenn kont dè sa nou kapab fè é dè sitiyasyon an nou. A pa paskè on moun ni on òbjèktif pou nou di kè nou osi, fò-nou ni menm òbjèktif-lasa. Paskè si nou ka fè sa, sa pé rivé a fòsé-nou, sa ké désèvwa-nou é sa ké dékourajé-nou (Lik 14:28). An-nou pran ègzanp a Midori, on sè ki pyonyé.

¹⁶ Lèwvwè Midori té jenn, pap’a-y ki pa Témwen a Jéova té ka konparé-y èvè frè a-y é sè a-y oben èvè kanmarad-lékòl a-y pou fè-y wont. Mi sa i ka di : « An té ni lenprésyon kè an pa té vo ayen ». Men lè i vin gran, i rann-li kont kè i té ni valè. Mi sa i ka èspliké : « An té ka li Labib é sa té ka trankilizé-mwen. An té ka santi kè Jéova enmé-mwen. » Anplisdisa, lèwvwè i té ka chwazi ki òbjèktif i té’é ni, i pa té ka pann chapo a-y two ho é i té ka mandé Jéova édé-y pou i té rivé atenn-yo. Grasa sa, lèwvwè Midori té ka vwè jan i té ka fè pwogré adan lavérité, i té ni tchè-kontan.

17. a) Kijan nou pé ‘kontinyé lésé mantalité-la ki ka dirijé-nou la chanjé pou i vin nèf’ ? b) Ki byenfé sa ké pwokiré-nou ?

¹⁷ Lè on moun ni mové lidé é lèwvwè i ni santiman négatif, sa pa’a pati konsa ! Sé pousa, mi konsèy-lasa Jéova ka ban-nou : « Fò zò kontinyé lésé mantalité-la ki ka dirijé-zòt la chanjé pou i vin nèf » (Éféz. 4:23, 24). Pou nou rivé fè sa, fò-nou priyé, fò-nou étidyé Pawòl a Bondyé é fò-nou pran tan réfléchi asi-y. Kontinyé fè sé biten-lasa é mandé Jéova ba-w fòs. Si ou ni labitid konparé-w èvè lézòt, grasa lèspri sen a-y, Jéova ké édé-w goumé èvè mové  labitid-lasa. Anplisdisa, Jéova ké édé-w vwè si lòwgèy oben lajalouzi koumansé pran lanmen asi-w é i ké édé-w fè sa ki fo pou chanjé onfwa-onfwa.

18. Kijan 2 Kronik 6:29, 30 ka konsolé-nou ?

¹⁸ (Li 2 Kronik 6:29, 30.) Jéova konnèt sa ki an tchè an nou. I konnèt èvè ki biten nou ka goumé : i sav kè nou enpawfè é kè nou ni a goumé èvè létadèspri a mond-lasa. É lè i ka vwè jan nou ka fè éfò, i enmé-nou plis ankò.

19. Ki ègzanp Jéova ka itilizé pou montré jan i enmé-nou ?

¹⁹ Jéova ka pran ègzanp a on manman ki enmé ti bébé a-y fò pou montré-nou jan i enmé-nou (Iz. 49:15). An-nou vwè ègzanp a on manman, non a-y sé Rachel. Mi sa i maké : « Fi an mwen, Stephanie, fèt avan lè. Prèmyé fwa an vwè-y, an té ni lenprésyon kè i té toupiti é kè i té frajil. Prèmyé mwa-la, i té an kouvèz, men sé mèdsen-la aksèpté kè an vin vwè-y touléjou mwen pran-y an bra an mwen. Chak ti moman nou té ka pasé yonn èvè lòt té ka rann lanmou an nou pi fò. Konnyéla la, Stephanie ni 6 an é i pi piti ki sélézòt timoun-la. A pa ti enmé an enmé-y pas an sav jan i goumé pou i té pé sa viv é pas i ka mèt onlo jwa an tchè an mwen. « A pa ti byen sa ka fè-nou dibyen lè nou sav kè sé konsa Jéova enmé-nou pas i sav jan nou ka goumé èvè tout fòs an nou pou sèvi-y !

20. Pou ki biten nou pé kontan ?

²⁰ Noutout diféran men Jéova ka akéyi-nou bra gran wouvè adan fanmi a-y pas nou ni onlo valè pou-y. Jéova pa fè-w vin owa-y pas ou méyè ki lézòt. Men sé pas i vwè kè ou té ni imilité an tchè a-w, kè ou té dakò pou i pé sa anségné-w é kè ou té paré a chanjé (Sòm 25:9). Ou pé sèten kè i kontan lè i ka vwè ou ka fè tousa ou pé pou sèvi-y. Lèfètkè ou ka andiré é kè ou ka rété fidèl, sa ka montré kè ou ni on ‘tchè ki pwòp é ki bon’ (Lik 8:15). Alò, kontinyé fè tousa ou pé pou ba Jéova sa ou ni dè méyè. É a moman-lasa ou pé’é kontan pas ou konparé-w èvè lézòt men ou ké kontan ‘parapòt a sa voumenm a-w’ fè.