1. ¿Jamüsü nnojotka niyoujireʼerüin wakuwaʼipa Jeʼwaa namaa na waneinnua?

NAATAWAISÜ sukuwaʼipa tü kasa nukumalakat Jeʼwaa jee naatawaisü sukuwaʼipa wayuu nutuma. Müsüjeseʼe wayaawatüin saaʼu kamalain nümüin naatawalin sukuwaʼipa kasa. Nnojotsüjeseʼe niyoujireʼerüin wakuwaʼipa Jeʼwaa namaa na waneinnua, shia jülüjaka naaʼin tü suluʼukat waaʼin (1 Sam. 16:7). Nütüjaa aaʼu Jeʼwaa tü mapüleekat wamüin, tü kapüleekat wamüin otta tü sukuwaʼipakat wepijia. Nnojotsü nuchuntuin wamüin wanee kasa eekai isain wachiki. Anasü washatüle nukuwaʼipa otta talatüle waya sümaa tü kasa waaʼinrakat. Waaʼinrüle tia pansaajeerü tü jülüjakat waaʼin wachikijiraa, nnojoleerü jülüjain waaʼin analeein wakuwaʼipa noulia na waneinnua jee nnojoleerü mojuin waaʼin sünainjee tü kasa anasü eekat nanain na waneinnua (Roma 12:3).

2. ¿Jamüsü mojuka wayoujireʼerüle wakuwaʼipa namaa na waneinnua?

² Nnojotsü mojuin jülüjale waaʼin nukuwaʼipa wanee wawala eekai nütüjain süpüleerua aküjaa pütchi jee ekirajaa wayuu (Heb. 13:7). Eesia tü kasa watüjeetkat nünainjee (Filip. 3:17). Nnojotpejeʼe anain wayoujireʼerüle wakuwaʼipa süpüla watüjaain saaʼu nütüjale woulia jee watüjale nuulia. Waaʼinrüle tia achumujeerü waaʼin, mojeerü waaʼin otta jülüjeerü waaʼin nnojoluin kasain anain apüla waya. Maʼaka wekirajaaitpain suluʼu ekirajaaya 28, amojujaajeerü wakuwaʼipa nümaa Jeʼwaa wayoujireʼerüle wakuwaʼipa namaa na wawalayuukana. Müsüjeseʼe müin nünüiki Jeʼwaa wamüin: «Anakaja eere jaaʼin sünain tü jaaʼinrakat süpüla jütüjaainjatüin saaʼu müleka anale je müleka mojule. Maa aka analejeʼe tü jaaʼinrakat, talateeshiijaʼa jia sümaa. Je nnojolu jiyoujireerüin tü jaaʼinrakat namaa juwalayuu» (Gal. 6:4).

3. ¿Kasa talataka atuma paaʼin sünainjee tü paaʼinrakat süpüla puʼwaajüin Maleiwa?

³ Keeʼireesü naaʼin Jeʼwaa talatüin waaʼin sümaa tü kasa waaʼinrakat süpüla waʼwaajüin nia. Jamüshiijaʼa woutiisale waya talatüinjatü waaʼin sümaa tia. Waneeküin süka waaʼin wamüiwaʼa tia  süka alin wapüla Jeʼwaa. Jülüjataa waaʼin tü kasa anasü waaʼinrakat soʼujeʼereʼeya tia. Eesüjaʼa kamalainre wamüin waashajeʼerüin jee wekirajaain sünain tü Bibliakat, eesüjaʼa mapüleere wamüin maaʼulu waküjain nümüin Jeʼwaa tü suluʼukat waaʼin (Sal. 141:2). Eesüjaʼa mapüleere wamüin maaʼulu yootoo sümaa wayuu sünain aküjaa pütchi jee watüjain süpüleerua ekirajaa sükajee tü karaloʼuta wekirajakalü aka wayuu. Eeshii nükaalinjale waya Jeʼwaa süpüla waaʼinrüin tü nuchuntakat nümüin wanee wayuu eekai kaʼwayuusein, sümüin wanee jierü eeka kaʼwayuusein jee namüin na kachonshiikana. Eeshii süpüla talatüin waya sümaa tü kasa waaʼinrakat süpüla anain wakuwaʼipa.

4. ¿Kasa wekirajaajeetka anain sünain ekirajaayakat tüü?

⁴ Eeshii süpüla wakaalinjain na waneinnua süpüla talatüin naaʼin sümaa tü naaʼinrakat sünain aʼyatawaa nümüin Jeʼwaa otta süpüla nnojoluinjatüin nayoujireʼerüin nakuwaʼipa namaa na waneinnua. Sünain ekirajaayakat tüü wekirajaajeerü anain tü naaʼinrajatkat na kachonshiikana, na kaʼwayuuseshiikana, na laülaashiikana jee na wawalayuukana süpüla nnojoluin nayoujireʼerüin nakuwaʼipa. Otta wekirajaajeerü anain waneirua pütchi suluʼujee tü Bibliakat akaalinjeenaka waya süpüla wasaʼwatüin waneirua kasa wanaapünaa sümaa tü wountakat.

5. Saashin Éfeso 6:4, ¿kasa nnojoluinjatka naaʼinrüin na kachonshiikana?

⁵ Na kachonshiikana nnojotsü naʼwanaajireʼerüinjatüin nakuwaʼipa nachonnii namaa na waneinnua otta nnojotsü nachuntuinjatüin namüin wanee kasa kapüleeka namüin. Eesü süpüla mojuin naaʼin nachonnii naaʼinrüle tia (paashajeʼera Éfeso 6:4). Anuu sünüiki wanee wawala kanüliaka Sachiko *: «Keeʼireepuʼusü naaʼin na profesootkana anainjatüin tanootain noulia na waneinnua. Süka nnojolin nüküjalin pütchi nüchiki Jeʼwaa chi tashikai jee chi taprofesootsekai, süküjapuʼuin tamüin tü teikat nnojoluinjatüin amüloulin tatuma wanee examen süpüla anainjatüin pütchi wachiki süka wanoujain. Mayaainjeʼe wainmain tü kasa taaʼinrakat jülüjasü taaʼin isain tachiki talatüinjanain naya tamaa. Eeirü maʼaka jeʼra juya süchikijee tajaʼttirüin takoleejiase, eesü jülüjawaire taaʼin nnojolin talatüin Jeʼwaa tamaa jaʼitasü wainmain tü kasa taaʼinrakat».

6. ¿Kasa natüjaka na kachonshiikana sünainjee tü sümakat Salmo 131:1, 2?

⁶ Anuu nünüiki chi aluwataaikai David: «Nnojotsü kachiiruain taaʼin wainma kasa, nnojotsü  kachiiruain taaʼin tü nnojotkat eein süpüla tasaʼwatüin» (paashajeʼera Salmo 131:1, 2). Nnojotsü shapaain naaʼin David süka nnojoluin yaletüin naaʼin otta niyaawatüin saaʼu tü isakat nüchiki. Tü natüjakat na kachonshiikana sünainjee tü nümakat David shia nnojoluinjatüin yaletüin naaʼin jee nayaawatüinjatüin saaʼu tü isakat nachiki nayakana jee tü isakat nachiki nachonnii. Neʼitaainjatüle napüleerua wanee kasa nasaʼwateeka amüin nachonnii, anasü jülüjale naaʼin tü mapüleekat jee tü kapüleekat namüin. Anuu sünüiki wanee wawala kanüliaka Marina: «Nnojotsü shiyoujireʼerüin takuwaʼipa tü teikat namaa na tawalayuukana jee namaa waneinnua tepichi. Süküjain tamüin naatawalin tü kasa watüjakalü apüleerua otta süküjain tamüin kojutuin waya nümüin Jeʼwaa wapüshuaʼa. Sutuma tia nnojotsü tayoujireʼerawalin takuwaʼipa namaa na waneinnua».

7, 8. ¿Kasa naaʼinrajatka wanee wayuu süpüla kojutuin nuʼwayuuse nümüin?

⁷ Na tooloyuu kaʼwayuusekana kojutuinjatü namüin naʼwayuuse (1 Ped. 3:7). Kapülainjatü naaʼin jee nnojoluinjatü mojuin nanüiki sümüin. Kojutusü namüin naʼwayuuse wanaa sümaa nnojoluin nachuntuin kasa eekai kapüleein sümüin jee nnojoluin nayoujireʼerüin sukuwaʼipa sümaa wane jiet. ¿Jamüsü mojuka nayoujireʼerüle sukuwaʼipa naʼwayuuse? Jülüjataa waaʼin tü alatakat sümüin wanee wawala kanüliaka Rosa, manoujainsai suʼwayuuse jee niyoujireʼerawalin sukuwaʼipa sümaa waneinnua jieyuu. Süka airuʼuluin nünüiki sümüin jülüjasü saaʼin nnojoluin kasain anain apüla shia jee maalin shia apüla. Anuu sünüiki: «Choʼujaasü süküjünawalin tamüin kojutuin taya nümüin Jeʼwaa». Naatainjatpejeʼe nukuwaʼipa wanee anoujashi eekai kaʼwayuusein, kojutuinjatü nümüin nuʼwayuuse süpüla anainjatüin nukuwaʼipa sümaa jee nümaa Jeʼwaa. *

⁸ Chi wayuu kojutukai amüin nuʼwayuuse anasü nünüiki süchiki, nüküjain sümüin alin shia nüpüla jee nüküjain anain tü saaʼinrakat (Prov. 31:28). Shiaʼaya naaʼinrakat tia chi suʼwayuusekai Katerina, tü wachuntayütkalü anülia suluʼu ekirajaaya 28. Nükaalinjain shia suulia jülüjain saaʼin analeein nakuwaʼipa na waneinnua suulia shiakat. Jintuluiwaʼaya Katerina ayoujünüsü sutuma tü shiikat jee shiyoujireʼerawalin sukuwaʼipa namaa na wane tepichikana. Kiʼrasüjeseʼe Katerina suʼwanaajireʼerüin sukuwaʼipa namaa na waneinnua, ayatüsia saaʼinrüin tia sunoujapa. Nükaalinjapejeʼe shia chi suʼwayuusekai süpüla sunouteʼerüin tü jülüjakat saaʼin süchikijiraa. Anuu sünüiki: «Aisü taya nüpüla chi taʼwayuusekai, nüküjain tamüin tü kasa anasü taaʼinrakat. Woʼuraajapa achuntushi nia nümüin Maleiwa tapüleerua. Nüküjain tamüin tü akuwaʼipaa anasü eekat nünain Jeʼwaa süpüla sotuin shia taaʼin. Nükaalinjain taya süpüla tanouteʼerüin tü jülüjakat taaʼin».

9, 10. ¿Kasa naaʼinraka na laülaashiikana süpüla nakaalinjain wanee wawala ayoujireʼeraka sukuwaʼipa namaa na waneinnua?

⁹ ¿Kasa naaʼinrajatka na laülaashiikana süpüla nakaalinjain wanee wawala ayoujireʼeraka nukuwaʼipa namaa na waneinnua? Jülüjataa waaʼin tü alatakat sümüin wanee wawala kanüliaka Hanuni. Nnojotpuʼusü aküjünüin sümüin jintuluiwaʼaya shia tü kasa anasü saaʼinrakat. Anuu sünüiki: «Jintuluiwaʼaya taya japüleʼe taya jee tekiiruʼusü analeein nakuwaʼipa na wane tepichikana toulia. Tayoujireʼerawalin takuwaʼipa waneepia namaa na waneinnua». Wanaa sümaa süküjalüin pütchi nüchiki Jeʼwaa ayatüsia Hanuni shiyoujireʼerüin sukuwaʼipa namaa na waneinnua, müsüjeseʼe jülüjain saaʼin nnojoluin jaloulin maʼin shia namüin na wawalayuukana. Eekajasaʼa jooluʼu pürekutsoolüitpa shia otta talatüsü  saaʼin. ¿Kasa akaalinjaka shia süpüla sunouteʼerüin tü jülüjakat saaʼin?

¹⁰ Süküjain Hanuni nakaalinjain shia na laülaashiikana jee kamaneein naya sümüin. Naküjain kojutuin shia namüin jee anain sukuwaʼipa napüleerua na waneinnua. Anuu sünüiki: «Eesü nachuntapuʼule tamüin na laülaashiikana tatütüleʼerüinjatüin saaʼin waneinnua wawalayuu choʼujaakana amüin. Jülüjaka taaʼin eein süpüla jaloulin taya namüin na wawalayuukana. Sotusü taaʼin wanaa sümaa naapüin analuʼut tamüin na laülaashiikana saaʼujee tü taaʼinrakat süpüla tatütüleʼerüin naaʼin waneinnua majayünnüü jee naashajeʼerüin tamüin 1 Tesalónica 1:1-3. Tü naaʼinrakat na laülaashiikana shia wanee kasa akaalinjaka taya süpüla tayaawatüin saaʼu eein süpüla jaloulin taya sümüin nupueulose Jeʼwaa».

11. ¿Kasa waaʼinrajatka süpüla wakaalinjain na yüülakana aaʼin aküjünaka achiki suluʼu Isaías 57:15?

¹¹ (Paashajeʼera Isaías 57:15). Kachipünaashii naaʼin Jeʼwaa na yüülakana aaʼin jee na nnojoliikana yaletüin aaʼin. Eeshii süpüla wakaalinjain na wawalayuu makana akuwaʼipa. Nnojoishii nayainjanain neʼe na laülaashii aaʼinrüinjanakana tia, waaʼinrajatü tia wapüshuaʼa. Süpüla waaʼinrüin tia kapülainjana naya waaʼin. Keeʼireesü naaʼin Jeʼwaa nayaawatüin saaʼu na wawalayuukana alin naya nüpüla wakajee (Prov. 19:17). Otta wane kasa wakaalinjaka anain naya shia nnojorüle yaletüin waaʼin. Nnojoluinjana waya aʼwaataain suluʼu wakuwaʼipa suulia nachumujüin aaʼin na wawalayuukana. Shia anaka aluʼu watütüleʼerüle naaʼin sükajee tü wamakat jee tü waaʼinrakat napüleerua (1 Ped. 4:10, 11).

12. ¿Jamüsü kamalainka sümüin wayuu namaain naya Jesuu? (Piirakaa sümüin tü ayaakuaa sünainkat süta tü rewiisütakat).

¹² Süpüla watüjaain saaʼu tü wakuwaʼipainjatkat sümaa wayuu, anasü jülüjale waaʼin nukuwaʼipa Jesuu namaa na nikirajüinkana. Mayaainjeʼe niain chi kojutukai maʼin sutuma wayuu, wayuu anamia nia jee nnojotsü yaletüin naaʼin (Mat. 11:28-30). Nnojoishi aʼwaataain suluʼu kekiin maʼin nia suulia wayuu. Mapüleesat nikirajia jee aashajaashi nia süchiki tü kasa eʼnnaajünakat sutuma wayuu süpüla süntajatüin suluʼumüin saaʼin tü pütchikat (Luc. 10:21). Naata nukuwaʼipa Jesuu noulia na nekiipüʼükana na judíokana. Sükajee tü naaʼinrakat Jesuu shiyaawata aaʼu wayuu kojutuin naya nümüin Maleiwa (Juan 6:37). Kojutushii nümüin Jesuu na wayuu nnojoliikana eʼnnaajünüin maʼin.

13. ¿Jamüsü watüjaaka saaʼu kamaneein jee alin nüpüla Jesuu na nikirajüinkana?

¹³ Kamaneeshi Jesuu namüin na nikirajüinkana jee aishii naya nüpüla. Nütüjaa aaʼu naatawalin tü kasa natüjakalü apüleerua jee tü nakuwaʼipakat. Müsüjeseʼe nütüjaain aaʼu Jesuu naatawalinjatüin tü aʼyatawaa aapünüinjatkat namüin jee tü kasa nountuinjatkat. Kojutupejeʼe nümüin Jesuu tü naaʼinrakat süka süpüshuaʼa naaʼin waneʼewai nakua. Wayaawata aaʼu tia sükajee tü nümakat Jesuu nachiki na achepchiee aapünakat amüin woʼot nneerümaajatü. Naatawaisü tü aapünakat namüin nutuma chi nalaamainkai, oʼunusü süchiirua tü nountakat. Naʼakajee na piamashii achepchieekana ekeraajaka tü aʼyatawaakat eeshi wanee wainmaka akanain nuulia chi wane. Wanaawapejeʼe tü nümakat chi nalaamainkai namüin piamale, müshi nia: «Tachepchiee, wayuujaʼa eera anashi pia» (Mat. 25:14-23).

14. ¿Kasa waaʼinrajatka süpüla washatüin nukuwaʼipa Jesuu namaa na waneinnua?

¹⁴ Akaʼaya Jesuu kamaneeshi nia wamüin jee aishii waya nüpüla. Nütüjaa aaʼu tü kasa watüjakalü apüleerua jee nnojoluin wanaawain wakuwaʼipa. Talatüshi nia wamaa sükajee tü kasa waaʼinrakat süka süpüshuaʼa waaʼin waneʼewai wakua. ¿Kasa waaʼinrajatka süpüla washatüin nukuwaʼipa Jesuu? Nnojotsü waaʼinrüinjatüin wanee kasa eeka süpüla jülüjain atuma naaʼin wanee wawala natüjaleein maʼin na waneinnua nuulia jee wanee kasa mojeetka atuma naaʼin sutuma isain nüchiki naaʼinrüin tü naaʼinrakat na waneinnua. Wachajaa sukuwaʼipa  süpüla watütüleʼerüin naaʼin na wawalayuukana saaʼujee tü naaʼinrakat nüpüleerua Jeʼwaa süka süpüshuaʼa naaʼin.

15, 16. ¿Kasa shiʼraka wanee wawala sutuma shiʼitaain süpüleerua tü kasa eekat süpüla suuntuin?

¹⁵ Weʼitaale wapüleerua wanee kasa eeka süpüla wountuin sünain aʼyatawaa nümüin Jeʼwaa talateena waya sümaa tü kasa waaʼinrakat jee wayaawateerü aaʼu tü wakuwaʼipainjatkat. Weʼitaainjatü wapüleerua kasa eekai süpüla wountuin wanaapünaa sümaa wakuwaʼipa jee tü watüjakalü apüleerua, nnojoluinjatü weʼitaain tia wanaapünaa sümaa tü naaʼinrakat na waneinnua. Nnojorüle waaʼinrüin tia shapaajeerü waaʼin jee mojeerü waaʼin (Luc. 14:28). Waashajaa jooluʼu süchiki wanee pürekutsoot kanüliaka Midori.

¹⁶ Jintuluiwaʼaya Midori niyoujapuʼuin shia chi süshikai namaa na suwalayuukana jee namaa na koleejiakana sümaa, manoujainsai chi süshikai. Anuu sünüiki:«‹Nnojotsü kasain anain apüla taya›, mawaisü taya suluʼu taaʼin». Shiasaʼa mapa anasü tü jülüjakat saaʼin süchikijiraa, anuu sooʼomüin sünüiki: «Taashajeʼerawalin tü Bibliakat waneepia süka jutatüin taaʼin sutuma jee tayaawatüin saaʼu alin taya nüpüla Jeʼwaa». Shiʼitaain süpüleerua tü kasa eekat süpüla suuntuin jee suchuntuin nümüin Jeʼwaa süpüla süsaʼwatüin shia. Sutuma saaʼinrüin tia talatüsü shia sünain aʼyatawaa nümüin Jeʼwaa.

17. (1) ¿Kasa naaʼinrajatka na anoujashiikana süpüla ayatüin neeʼiratüin tü jülüjakat naaʼin? (2) ¿Kasa neʼreetka suluʼujee tia?

¹⁷ Kakaliasü süpüla sunoutaain tü kasa mojusü jülüjakat waaʼin wachikijiraa. Müshijeseʼe nümüin Jeʼwaa wamüin: «Ayataʼaya jiiʼiratüin tü kasa jülüjakat jaaʼin» (Éf. 4:23, TNM, 4:24). Süpüla waaʼinrüin tia oʼuraajüinjana waya otta wekirajaainjatü sünain tü Nünüikikat Maleiwa sümaa wasakireʼerüinjatüin waaʼin sünain. Ayataʼaya waaʼinrüin tia otta wachunta nümüin Jeʼwaa nükatchinraiwa  waaʼin. Nükaalinjeena waya Maleiwa nükajee chi naaʼinkai süpüla nnojoluinjatüin wayoujireʼerüin wakuwaʼipa namaa na waneinnua jee süpüla wanouteʼerüin wakuwaʼipa yaletüle waaʼin jee kachumuraliire waya.

18. ¿Jamüsü sümülialaaka paaʼin sutuma tü sümakat 2 Crónicas 6:29, 30?

¹⁸ (Paashajeʼera 2 Crónicas 6:29, 30). Nütüjaa aaʼu Jeʼwaa tü suluʼukat waaʼin, nütüjaa aaʼu tü waaʼinrakat süpüla nnojoluin keejiain wamüin tü keejiakat namüin na manoujainsaliikana otta tü waaʼinrakat süpüla wanouteʼerüin tü mojukat sünain wakuwaʼipa. Niʼrapa Jeʼwaa waaʼinrüin tia akooʼomüinraasü tü waalinkat nüpüla.

19. ¿Kasa nuʼwanaajireʼeraka amaa nukuwaʼipa Jeʼwaa süpüla wayaawatüin saaʼu tü waalinkat nüpüla?

¹⁹ Süpüla wayaawatüin saaʼu tü waalinkat nüpüla Jeʼwaa nuʼwanaajireʼerüin nukuwaʼipa sümaa sukuwaʼipa wanee wayuu aikai süpüla süchon (Is. 49:15). Anuu sünüiki Rachel, wanee wayuu kachonsü: «Joʼuusü Stephanie tü tachonkat süpülapünaa sükalia, joʼuuteetein shia teʼraiwaʼaya shia. Soʼunnaa tü waneekat kashi chajatü shia pitaaruluʼu, nuuʼulaain taya chi tottootkai tayuujain shia jee teʼrüin süchecheraain saaʼin süchiirua kateein soʼu. Sutuma tia aireesia maʼin shia tapüla jee aireesia taya süpüla. Talatüsü taaʼin sümaa». Niʼrapa Jeʼwaa süpüshuaʼa tü waaʼinrakat süpüla waʼyataainjanain nümüin süka süpüshuaʼa waaʼin, kooʼomüinreesia tü waalinkat nüpüla. ¿Aashin amülialaain waaʼin sutuma tia?

20. ¿Kasa eeka süpüla talatüin atuma naaʼin na aʼyataashiikana nümüin Jeʼwaa?

²⁰ Jalouishii waya wapüshuaʼa sümüin nupueulose Jeʼwaa. Nürütkeʼerüin waya Jeʼwaa nünainmüin süka niʼrüin kasa anasü suluʼu waaʼin, nnojotsü shiain saaʼujee analeein wakuwaʼipa noulia na waneinnua. Niʼrüin wayuuin anamia waya, wacheküin wekirajünüin nutuma jee wacheküin nunouteʼerüin wakuwaʼipa (Sal. 25:9). Talatüsü naaʼin Jeʼwaa niʼrapa waʼyataain nümüin süka süpüshuaʼa waaʼin wanaapünaa sümaa tü kasa wountakat. Wanaa sümaa wachecherüin waaʼin soʼunnaa müliaa jee waneepiain waya nümaa Maleiwa, atüjaana aaʼu wayuuin anamiain waya (Luc. 8:15). Ayataʼaya waʼyataain nümüin Jeʼwaa süka süpüshuaʼa waaʼin. Waaʼinrüle tia talateena waya sümaa tü waaʼinrakat otta nnojoleerü wayoujireʼerüin wakuwaʼipa namaa na waneinnua.