1. ¿Mbaʼérepa Jehová nañanekomparái ótrore?

JEHOVÁPE ningo ogustaiterei la varieda. Upéva ñande jaikuaa pórke haʼe ojapo vaʼekue diferénte kláse plánta, animál ha yvyporakuéra jepe. Káda uno ñande ñanediferénte ha ndaipóri voi ótro ñandeichaguaite. Upévare Jehová núnka nañanekomparái ótrore. Haʼe ohecha la oĩva ñane korasõme ha oikuaa mbaʼeichagua persónapa ñande (1 Sam. 16:7). Jehová oikuaa avei mbaʼépepa ñandevale, mbaʼépa ndajajapokuaái ha mbaʼéichapa ñañemongakuaa vaʼekue. Ha haʼe ndojeruréi ñandehegui umi mbaʼe ndaikatumoʼãiva jajapo. Tekotevẽ ningo jasegi Jehová ehémplo ha jajehecha ñandejupe haʼe ñanderechaháicha. Péicha ikatúta “ñapensa porã ñandejehe” ha ndajaikomoʼãi ñapensa ñaneimportantetereiha térã ndajavaleiha mbaʼeverã (Rom. 12:3).

2. ¿Mbaʼérepa naiporãmoʼãi ñañekompara ótrore?

² Ñande ningo ikatu ñaaprende ñande rapichakuéra ehémplogui. Ñamoĩ chupe jaikuaaha peteĩ ermána térã ermáno iguapoitereívape predikasiónpe (Heb. 13:7). Upéicharõ ñaaprendekuaa chugui mbaʼéichapa ikatu ñandekatupyryve predikasiónpe (Filip. 3:17). Péro ndahaʼéi hína la mísma kósa jasegi peteĩ persóna ehémplo ha ñañekompara hese. Ñande jaikóramo ñañekompara ótrore ikatu jaju ñaneenvidióso, ñañedesanima, térã ñañandu ndajavaleiha mbaʼeverã. Jahecháma haguéicha pe artíkulo ohasa vaʼekuépe, ñakompetíramo ótrondi kongregasiónpe ikatu hína ñambyai pe amista jarekóva Jehovándi. Upévare mborayhúpe Jehová heʼi ñandéve: “Káda uno tojesareko umi mbaʼe ojapóvare, péicha ovyʼáta hembiapóre ha ndahaʼéi oñembojoja haguére ótrore” (Gál. 6:4).

3. ¿Mbaʼe progrésopa jajapóma Jehová servísiope ha ñanembovyʼaitereíva?

³ Jehová ningo oipota javyʼa japrogresa haguére jahávo iservísiope.  Upévare oiméramo jajevautisáma, ikatu javyʼaiterei jahupyty haguére upe méta. Ñande jadesidi kuri upéva ñandejeheguiete voi. Jajapo upéva ñande jahayhúgui Jehovápe. Ñapensamíntena entéro mbaʼe jajapómavare upe tiémpo guive. Por ehémplo, ¿ñañandúpa igustoveha ñandéve jalee la Biblia, ha hypyʼũveha umi estúdio jajapóva? ¿Jahechakuaápa umi ñemboʼe jajapóva koʼág̃arupi osẽha ñande pyʼaite guive? (Sal. 141:2). ¿Ñandekatupyryvépa ñañepyrũ hag̃ua ñañemongeta la héntendi predikasiónpe, ha jaipurukuaavépa umi erramiénta jarekóva japredika hag̃ua? Ha oiméramo ñamenda térã jareko família, ¿ñanepytyvõmapa Jehová jajapo porãve hag̃ua umi mbaʼe oñehaʼarõva peteĩ ména, tembireko, sy térã túagui? Ñande ningo ikatu javyʼa ha ñañeñandu porã jajapóma haguére entéro umi kámbio tekotevẽva.

4. ¿Mbaʼépa jahecháta ko artíkulope?

⁴ Ñande ikatu ñaipytyvõ ótrope ovyʼa hag̃ua umi progréso ojapóvare Jehová servísiope. Avei ñaipytyvõta koʼã ermánope nañakomparáiramo chupekuéra ótrore. Ko artíkulope jahecháta mbaʼéichapa tuakuéra ikatu oipytyvõ ifamiliakuérape, mbaʼéichapa umi omendáva ikatu oñopytyvõ, ha mbaʼéichapa ansianokuéra ha umi ótro ermáno ikatu oipytyvõ iñermáno ha iñermanakuérape. Ha ultimoite jahecháta unos kuánto konsého oĩva la Bíbliape ñanepytyvõtava ñamoĩ hag̃ua káda uno umi méta ikatútava jahupyty.

5. Heʼiháicha Efesios 6:4, ¿mbaʼépa tuakuéra ndojapói vaʼerã?

⁵ Tuakuéra oñatende vaʼerã ani hag̃ua okompara ifamília ojuehe térã ojerure chugui umi mbaʼe ndaikatumoʼãiva ojapo. Tuakuéra ojapóramo péicha ikatu hína odesanima térã odesahusia ifamiliakuérape (elee Efesios 6:4). Peteĩ ermána hérava Sachiko * heʼi: “Che profesorkuéra oipota vaʼekue voi chevaleve umi che kompañerokuéragui. Hiʼarive che sy oipota ajapo porã entéro mbaʼe koléhiope, ikatu hag̃uáicha che profesorkuéra ha che túa ndahaʼéiva Testígo oñeʼẽ porã Jehová puévlore. Haʼe ndoipotái voi aperde ni un púnto umi exámenpe, péro upéva ningo ijetuʼueterei vaʼekue chéve. Ojapóma hína unos kuánto áño atermina hague che koléhio, ha añehaʼãmbaitéramo jepe ajapo pe iporãvéva lomímonte añeporandu jepi: ‘¿Oime piko Jehová ovyʼa hína umi mbaʼe ajapóvare?’”.

6. ¿Mbaʼépa tuakuéra ikatu oaprende pe heʼívagui Salmo 131:1, 2?

 ⁶ Tuakuéra ningo ikatu oaprende peteĩ mbaʼe iñimportantetereíva pe heʼívagui Salmo 131:1, 2 (elee). Rréi David heʼi vaʼekue: “Che ndaipotái chéve g̃uarã heta mbaʼe tuichaitereíva. Oĩ heta mbaʼe ndaikatumoʼãiva ahupyty, ha ndaikói voi umíva rapykuéri”. Haʼe iñumílde rupi ‘ndoikovéima oñekevranta, síno ipyʼaguapýma’. ¿Mbaʼépa tuakuéra ikatu oaprende upe David heʼi vaʼekuégui? Haʼekuéra ikatuha ohechauka iñumildeha nohaʼarõivo hetaiterei mbaʼe ijehegui voi ha avei umi ifamíliagui. Umi tuakuéra ikatu oipytyvõ ifamíliape oñandu hag̃ua ojevaloraha chupe. Upearã haʼekuéra ohechakuaa vaʼerã mbaʼépepa umi ifamília ivale térã mbaʼépa ndojapokuaái, ha omoĩ chupekuéra umi méta ikatútava ohupyty. Peteĩ ermána hérava Marina imanduʼa: “Che sy núnka nachekomparái vaʼekue umi che ermanokuérare ni umi ótro mitãre. Haʼe chemboʼe káda uno jarekoha diferénte avilida ha enterovépe Jehová ñandevaloraitereiha. Upéicha rupi kási núnka nañekomparáiva ótrore”.

7, 8. ¿Mbaʼéichapa peteĩ ména ikatu ohechauka omombaʼeha hembirekópe?

⁷ Peteĩ ména oservíva Jehovápe omombaʼe vaʼerã hembirekópe (1 Ped. 3:7). Por ehémplo, peteĩ ména ohechauka omombaʼeha hembirekópe orrespeta ha ovalorávo chupe. Haʼe ndojeruremoʼãi hembirekópe peteĩ mbaʼe ndaikatumoʼãiva ojapo, ha ndoikomoʼãi asy okompara chupe ótro kuñáre. ¿Ha mbaʼéichapa oñeñandúta peteĩ tembireko iména ojapóramo upéicha? Jahechamína la oikóva peteĩ ermána héravare Rosa. Iména ndahaʼéiva Testígo pyʼỹinte okompara chupe ótro kuñáre. Umi mbaʼe heʼíva omoñeñandu vaieterei Rósape, ha opensa voi ijehe ndovaleiha mbaʼeverã. Haʼe heʼi: “Aikotevẽ manterei ótro chemomanduʼa Jehová chevaloraha”. Upévare peteĩ ména oservíva Jehovápe omombaʼe vaʼerã hembirekópe. Haʼe oikuaa ndojapóiramo upéva oafektataha pe amista orekóva hembirekóndi ha avei Jehovándi. *

⁸ Peteĩ ména omombaʼéva hembirekópe oñeʼẽ porã hese ótrope, ha heʼi voi hembirekópe ohayhu ha ovaloraha chupe (Prov. 31:28). Upéicha ojapo Katerina ména, pe ermána ñañeʼẽ hague pe artíkulo ohasa vaʼekuépe. Iména ningo hetáma oipytyvõ chupe haʼe oñandu jave ndaivaleiha umi ótroicha. Katerínape isy oapoʼi vaʼekue imitãme, pyʼỹinte okompara vaʼekue chupe umi ótro mitãkuñaʼíre, umi iñamigakuérare jepe. Upéicha rupi Katerina oñepyrũ vaʼekue oñekompara ótrore, ha osegi ojapo upéva oiko rire jepe chugui testígo de Jehová. Péro iména oipytyvõ chupe anivéma hag̃ua ojapo upéicha, ha opensa hag̃ua hekópe porã ijehe. Katerina heʼi: “Che ména cherayhu, cheguerohory umi mbaʼe porã ajapóvare ha oñemboʼe cherehehápe. Haʼe chemomanduʼa avei umi kualida porãite Jehová orekóvare, ha chepytyvõ akorrehi hag̃ua umi pensamiénto vai arekóva”.

9, 10. ¿Mbaʼéichapa umi ansiáno imbaʼeporãitéva oipytyvõ peteĩ ermánape anive hag̃ua oñekompara ótrore?

⁹ ¿Mbaʼéichapa ansianokuéra ikatu oipytyvõ umi oikóvape oñekomparase ótrore? Jahechamína la ohasa vaʼekue peteĩ ermána hérava Hanuni, chupe ningo ndojeguerohoryguasúi vaʼekue imitãme. Haʼe imanduʼa: “Che ningo cheotĩ vaʼekue ha añandu umi ótro mitã ivaleveha chehegui. Upéicha rupi chemitãme añepyrũma vaʼekue añekompara ótrore”. Oiko rire jepe chugui Testígo, Hanuni osegi kuri oñekompara ótrore. Upéicha rupi, haʼe oñandu naiñimportanteiha umi mbaʼe ojapóva kongregasiónpe. Koʼág̃a haʼe vyʼápe osegi oservi de prekursóra. ¿Mbaʼépa oipytyvõ raʼe chupe okambia hag̃ua?

 ¹⁰ Hanuni omombeʼu oipytyvõ hague chupe umi ansiáno imbaʼeporãitereíva. Haʼekuéra heʼi chupe ojeroviaha hese, ha oguerohory chupe omoĩ haguére ehémplo porã. Haʼe heʼi: “Sapyʼánte umi ansiáno ojerure chéve amokyreʼỹ hag̃ua umi ermána oikotevẽvape ajúda. Koʼã mbaʼe rupive añandu chedeprovechoha kongregasiónpe. Chemanduʼa mbaʼéichapa umi ansiáno mborayhúpe oagradese chéve amokyreʼỹ haguére umi ermána imitãvévape, ha upéi olee chéve hikuái 1 Tesalonicenses 1:2, 3. ¡Upéva ningo chembovyʼaiterei! Umi ansiáno imbaʼeporãitéva rupive, koʼág̃a amombaʼeterei pe lugár arekóva Jehová organisasiónpe”.

11. ¿Mbaʼéichapa ikatu ñaipytyvõ ‘umi oñeñandúvape yvýre’ heʼiháicha Isaías 57:15?

¹¹ (Elee Isaías 57:15). Jehová ningo ojepyʼapyeterei ‘umi oñeñandúvare yvýre’. Ha enterove ikatu ñaipytyvõ umi ermáno ha ermanakuéra oñeñandúvape péicha, ndahaʼéi umi ansianokuérante. Upearã ikatu jahechauka añetehápe jajepyʼapyha hesekuéra. Jehová ningo oipota voi jaikuaauka koʼã ermánope mbaʼeichaitépa haʼe ohayhu chupekuéra (Prov. 19:17). Ikatu avei ñaipytyvõ koʼã ermánope ñaneumíldevo ha ndajaikóivo jasovra umi mbaʼe jajapokuaávare. Ñande ndajaikoséi ñañemoimportánte, pórke upéva káusare ñane ermanokuéra ikatu oñepyrũ iñenvidióso. Upéva rangue, jaipurúkena umi avilida jarekóva ha umi mbaʼe jaikuaáva ñañomokyreʼỹ hag̃ua (1 Ped. 4:10, 11).

12. ¿Mbaʼeichagua persónapa oñeñandu porã vaʼekue Jesús ndive? (Ehecha pe taʼanga oĩva ko rrevísta apére).

¹² Jesús ningo otrata porã vaʼekue idisipulokuérape, ha ñande ikatu ñaaprende iñehémplogui. Haʼéngo pe kuimbaʼe iñimportantevéva oiko vaʼekue ko yvy ape ári. Upéicharõ jepe, ‘haʼe ndaipochyreíri ha iñumílde ipyʼaite guive’ (Mat. 11:28-30). Haʼe ndoikói vaʼekue ojechauka iñintelihenteterei térã oikuaa haguére heta mbaʼe. Haʼe omboʼérõ guare la héntepe omboʼe sensillomínte, ha oipuru umi ehémplo ndahasýiva oñentende hag̃ua ha og̃uahẽva umi iñumíldeva korasõme (Luc. 10:21). Jesús ndojoguái vaʼekue umi líder rrelihióso oñemombaʼeguasúvape, pórke haʼe siémpre oipytyvõ umi héntepe oñandu hag̃ua ivaliosoitereiha Jehovápe g̃uarã (Juan 6:37). Jesús orrespeta vaʼekue opaichagua persónape.

13. ¿Mbaʼéichapa Jesús ohechauka vaʼekue imbaʼeporã ha ohayhuha idisipulokuérape pe otrata lájare chupekuéra?

¹³ Jahechakuaa Jesús imbaʼeporã ha ohayhu hague idisipulokuérape pe otrata lájare chupekuéra. Haʼe oikuaa vaʼekue káda uno isituasión idiferenteha ha avei umi avilida orekóva. Avei oikuaa ndaikatumoʼãiha enterove okumpli la mísma rresponsavilida, térã iguápo predikasiónpe peteĩchapa. Upéicharõ jepe, haʼe omombaʼeterei vaʼekue umi mbaʼe ojapóva káda uno ipyʼaite guive. Jesús ohechauka ontendeha chupekuéra pe ehémplo oñeʼẽvape umi monéda de plátare. Upe ehémplope pe patrón omeʼẽ itravahorã káda esklávope asegún ‘pe ikatúva okuida porã’. Mokõi esklávo ningo iguapoiterei, péro peteĩva ogana hetave pe ótrogui. Upéicharõ jepe, pe patrón oguerohory mokõivévape heʼívo: “Oĩ porãiterei la rejapóva. Nde ningo peteĩ esklávo de konfiánsa ha ndeguápo” (Mat. 25:14-23).

14. ¿Mbaʼéichapa ikatu jasegi Jesús ehémplo jatratávo ñane ermanokuérape?

¹⁴ Ñandetrata lájare, Jesús ohechauka imbaʼeporã ha ñanderayhuha. Haʼe oikuaa káda uno situasión idiferenteha ha avei umi avilida jaguerekóva, ha ovyʼa ñandereheve jajapo jave pe iporãvéva. ¿Mbaʼéichapa ikatu jasegi Jesús ehémplo? Ikatu jajapo upéva jatrata porãvo ñane ermanokuérape. Ñande arakaʼeve ndajaipotái ñande káusare peteĩ ermáno térã ermána oñandu ndovaleiha mbaʼeverã, ni nañamotĩmoʼãi chupe ndaikatúi haguére ojapo heta  mbaʼe umi ótroicha. Upéva rangue, jahekáta voi oportunida jaguerohory hag̃ua ñane ermáno ha ermanakuérape ojapo haguére pe iporãvéva oservi hag̃ua Jehovápe.

15, 16. ¿Mbaʼéichapa ideprovécho peteĩ ermánape omoĩ haguére umi méta ikatúva ohupyty?

¹⁵ Umi méta ningo ñanepytyvõ jaikuaa hag̃ua mbaʼépa jahupytyse ha omosentído ñande rekove. Péro ñamoĩ vaʼerã umi méta ikatútava jahupyty asegún pe situasión ñande jarekóva ha umi mbaʼe jajapokuaáva. Natekotevẽi hína jahupytyse la mísma méta orekóva umi ótra persóna, pórke jajapóramo upéicha ikatu ñañedesepsiona ha ñañedesanima (Luc. 14:28). Jahechamína mbaʼépa oiko vaʼekue peteĩ prekursóra héravare Midori.

¹⁶ Midori túa ndahaʼéiva Testígo oapoʼi vaʼekue chupe imitãme, ha heʼi chupe iñermanokuéra ha umi ikompañerokuéra eskuelapegua ivaleveha chugui. Midori heʼi: “Che añandu vaʼekue cheinutilha ha ndavaleiha mbaʼeverã”. Péro haʼe okakuaavévo oñepyrũma ojeroviave ijehe. Midori heʼi: “Alee ningo la Biblia káda día ikatu hag̃uáicha chepyʼaguapy ha añandu Jehová cherayhuha”. Avei haʼe omoĩ umi méta ikatútava ohupyty, ha oñemboʼe ikatu hag̃uáicha ohupyty umíva. Upéva oipytyvõ chupe ovyʼa hag̃ua umi mbaʼe ikatúvare ojapo Jehová servísiope.

17. ¿Mbaʼépa ikatu ñanepytyvõ ‘ñambopyahu hag̃ua ñapensa lája’, ha mbaʼépa jahupytýta jajapóramo upéva?

¹⁷ Ndahaʼéi ningo peteĩ tesapirĩme ojeítamava ñandehegui umi mbaʼe vai ñapensáva ñandejehe, ha umi mbaʼe ñanemoñeñandu vaíva. Upévare Jehová heʼi ñandéve: “Peẽ pesegi vaʼerã pembopyahu pepensa lája” (Efes. 4:23, 24). Upearã tekotevẽ ñañemboʼe, jastudia Ñandejára Ñeʼẽ ha jajepyʼamongeta. Upévare jasegíkena jajapo koʼã mbaʼe, ha jajerure Jehovápe tañanemombarete. Ijespíritu sánto ñanepytyvõta ani  hag̃ua ñañekompara ótrore. Jehová ñanepytyvõta avei jaikuaa hag̃ua ñañepyrũmapa hína ñaneenvidióso térã ñañembotuicha, ha pyaʼe porã jahapoʼoite hag̃ua ñane korasõgui koʼã mbaʼe vai.

18. ¿Mbaʼéichapa ikatu ñanekonsola la heʼíva 2 Crónicas 6:29, 30?

¹⁸ (Elee 2 Crónicas 6:29, 30). Jehová ningo oikuaa mbaʼépa jareko ñane korasõme. Haʼe oikuaa avei ñañehaʼãmbaiteha ani hag̃ua ñapensa ko múndope oñepensaháicha, ha ani hag̃ua jajapo umi mbaʼe vai ñaneimperfékto káusare. Jehová ohechávo mbaʼeichaitépa ñañorairõ hína koʼã mbaʼe vai kóntrape, haʼe ñanderayhuvéntema.

19. ¿Mbaʼérepa Jehová ombojoja pe mborayhu haʼe oñandúva ñanderehe?

¹⁹ Ñantende hag̃ua mbaʼeichaitépa Jehová ñanderayhu, haʼe okompara upe mborayhu oñandúva ñanderehe pe mborayhu oñandúvare peteĩ sy iveveʼíre (Is. 49:15). Jahechami la ohasa vaʼekue peteĩ sy hérava Rachel. Haʼe heʼi: “Che membykuñaʼi Stephanie onase vaʼekue prematúra. Ha primera ves ahechárõ guare chupe, haʼe anga michĩeterei ha iñindefensami. Pe primer méspe haʼe oĩ vaʼekue inkuvadórape, péro pe ospitálpe oñepermiti chéve káda día ahupi chupe che jyva ári. Upe tiémpo rohasa vaʼekue oñondive orepytyvõ rojoayhueterei hag̃ua. Koʼág̃a Stephanie orekóma 6 áño ha michĩve entéro umi ótro mitã ijaveguávagui. Upéicharõ jepe che ahayhueterei chupe, pórke haʼe heta oñehaʼã vaʼekue oikove hag̃ua, ha haʼe hetáma chembovyʼa”. Ajépa ñanembovyʼaite jaikuaávo Jehová ñanderayhuetereiha ohechávo ñañehaʼãmbaiteha jaservi chupe ñande pyʼaite guive.

20. ¿Mbaʼépa ombovyʼa Jehová siervokuérape?

²⁰ Ñande haʼégui Jehová siérvo, jareko peteĩ lugár espesiál ha ivaliosoitereíva ifamília tuichaitévape. Jehová ningo nañanemoag̃uíri vaʼekue ijehe ñandevaleve rupi ótrogui, síno ohechágui mbaʼépa oĩ ñane korasõme. Avei haʼe ohechakuaa ñaneumildeha, ñaaprendeseha chugui ha ikatuha ñakambia (Sal. 25:9). Ñaimekuaa segúro haʼe omombaʼetereiha ñañehaʼãmbaite jave jajapo pe iporãvéva iservísiope. Ñande ningo ñaaguantáma heta mbaʼe ha ñandefiél Jehovápe, upéva ohechauka ‘ñanesinseroha ha ñandepyʼapy porãha’ (Luc. 8:15). Upévare ñande jasegíta jajapo pe iporãvéva Jehová servísiope. Upéicha jajapóramo ‘javyʼáta pe tembiapo ñandete voi jajapóvare’.