1. ¿Ñobätä Jehová ñaka ni ñäke ni mada ben?

JONDRON bätäkä ngwarbe ye tuin kwin Jehovai. Raba nemen gare metre nie jondron sribebare kwe aune ni kä tibienbätä sribebare kwe yebätä. Ni nibu ñaka ja erebe, yebätä Jehovakwe ñaka ni ñäkäi jire ni mada ben. Ni brukwä ño aune ni töi ño ye mikata ñärärä kwe (1 Sam. 16:7). Kukwe meden ni raba nuainne kwin, meden ni ñaka raba nuainne aune ni ngübabare ño ye mikata ñärärä kwe arato. Kukwe meden ni ñaka raba nuainne ye ñaka ribeta nuaindre kwe nie. Ni rabadre ja ngwen niara erere aune niarata ni mike tuin ño jai, ye erere nikwe ja mikadre tuin jai. Nikwe ye erere nuaindi ngwane, nita “töbike kwin” ja käne nikwe bämikai aune ni abokän bäri ütiäte o bäri ngwarbe ye nikwe ñaka nütüdi jabätä (Rom. 12:3).

2. ¿Ja ñäkädre ni mada ben ye ñobätä ñaka kwin?

² Erametre, ja mräkä iti tä kukwe driere kwin ye ni tädre mike ñärärä ye ñaka blo (Heb. 13:7). Ye raba ni dimike nemen dirikä kwin (Filip. 3:17). Akwa ja mräkä iti tä kukwe nuainne ye ni tädre mike ñärärä ja ngwankäre erere aune ja mräkä iti tä kukwe nuainne ye ni tädre mike ñärärä ne kwe ni bäri ütiäte o bäri ngwarbe rabadre gare nie, ye ñaka ja erebe nikwe ngwandre törö jai. Nikwe ja ñäkäi ni mada ben ngwane, ye köböite ni raba kite bätä ngwen, di nekä o ja raba kite ruin ngwarbe nie. Ja gadre ja mräkätre konkrekasionte ben ye köböite ni ñaka raba ja kete kwin Jehovabe ye rababa gare nie kukwe ja tötikara känebätä. Jehovata ni tarere yebätä tä kukwe ne niere nie: “Ni itire itire tä sribi nuene ño, ye mika ñäräre kuin kwe, yebtä blita au kwe jakrä angwane, jändrän nuenta kuin kwe raba tuen ie, yebtä tö raba ja käikitekä ne ngwane ja käikitaka kwe, akwa ni mda mda tä sribi nuene ño, yebtä ñan ñäkä kwe” (Gál. 6:4).

3. ¿Mata kukwe nuainne kwin Jehová kräke ye meden käi bäri juto mäbätä?

 ³ Nita nirien kukwe ja üairebiti ye käi rabadre juto nibätä yei Jehová tö. Ñodre, nikwe ja ngökabarera ñöte ngwane, nikwe kukwe ye nuainbare ye käi tädre juto nibätä. Jehová tare nikwe yebätä nikwe kukwe ye diani nuaindre akwle jai. Köbö ye näire nükebe nengwane kukwe meden ni niena nuainne bäri kwin yebätä ani töbike. Ñodre, ñäkädre aune ja tötikadre Bibliabätä ye käi bäri juto nibätä. Ni kitera orare nguseta aune ja brukwä ngöibiti raba ruin nie (Sal. 141:2). Blita kömika ye niena gare bäri kwin nie aune jondron kukwe driekäre yebiti kukwe drie niena gare bäri kwin nie. Aune ni brare gure, meri gure o ni rüne aune meyere dre dre nuaindre yebätä Jehovakwe ni dimikanina nuainne bäri kwin raba ruin nie. Kukwe ne jökrä ni niena nuainne ye käi tädre juto nibätä.

4. ¿Dre rabai gare nie kukwe ja tötikara nekänti?

⁴ Ni raba ja mräkätre mada dimike ne kwe rabadre dre dre nuainne Jehová kräke ye käi tädre jutobätä aune ñan ja ñäkädre kwe nitre madabe. Nitre rüne raba monsotre kwe dimike ño, nitre gure raba ja dimike ño kwärikwäri aune nitre umbre ji ngwanka aune ja mräkätre konkrekasionte raba ja mräkätre mada dimike ño ye rabai gare nie kukwe ja tötikara nekänti. Aune mrä, kukwe ja jie ngwankäre ruäre ye raba ni dimike ño ne kwe ni raba ngwane, ni raba kukwe nuainne aune raba nemen bare nie ye nikwe mikadre nuaindre jai ye rabai gare nie arato.

5. ¿Efesios 6:4 tä niere erere nitre rüne ñaka rabadre dre nuainne?

⁵ Nitre rüne ñaka rabadre monsotre kwe ñäke monsotre madabe aune kukwe meden ñaka raba nemen bare monsotre ie ye ñaka ribedre kwe ietre. Monsotre ñäkädre monsotre madabe aune kukwe ribedre nuaindre bäri ie ye raba monsotre mike ulire (ñäkädre Efesios 6:4 yebätä). Meri testiko kädekata Sachiko * tä niere: “Tikwe nota diandrekä bäri kwin monsotre mada ye kräke ye nitre dirikä tie nämä ngübare tibätä. Ne madakäre, ti töi gitiadrekä kwin ye ie ti meye tö nämä, ne kwe ti rabadre kukwe kwin bämike ti rün ñaka testiko Jehovakwe aune nitre dirikä tie ye okwäbiti. Tikwe nota diandrekä kwin examenbätä ye ti meye nämä ribere tie, akwa ye erere ñaka namani bare. Känerabe ti ngidianinanka kwelate, ti ta sribire krubäte Jehová kräke akwa ye tuin chi Jehovai tä nemen ruin tie ruäre ngwane”.

6. ¿Salmo 131:1, 2 tä kukwe niere yebätä dre raba nemen gare nitre rüne ie?

 ⁶ Kukwe nieta Salmo 131:1, 2 (ñäkädrebätä) * yebätä kukwe ütiäte raba nemen gare ja töi kräke nitre rüne ie. Rey David käkwe niebare: “Ti ñaka jondron krikri ribere jai, ti ñaka ja töi mike jondron meden ñaka raba nemen tikwe yebätä”. Niara töi nämäne bobre aune ñaka raba kukwe jökrä nuainne nämäne gare ie, yebätä ja nämäne nemen ruin “kwekebe aune jäme” ie niebare kwe. Nitre rüne tö dre nuain aune tä dre ribere nuaindre monsotre ie ngwane, rabadre ja töi mike bobre aune ñaka raba kukwe jökrä nuainne kaibe ye ngwandre törö kwe jai ye drieta ietre kukwe nebiti. Monsotre raba kukwe meden kwin nuainne aune meden ñaka raba nemen bare ie ye nitre rüne ngwandre törö jai tä kukwe mike nuaindre ietre ye ngwane, ye köböire monsotre ie ja rabai nemen ruin kwin. Meri testiko kädekata Marina tä niere: “Ti meye ñaka ti ñäkäba jire ti ngwaitre nimä ben aune monsotre madabe. Ni jökrä ie kukwe nuain gare kwin aune ni jökrä ütiäte Jehová kräke ye drieba kwe tie. Ye köböire ti ñaka ja ñäke jire nitre madabe”.

7, 8. ¿Nitre brare gure raba muko mike ño ütiäte jai?

⁷ Nitre brare gure rabadre muko kwe ye mike ütiäte jai (1 Ped. 3:7 TNM). Rabadre ja töi mike kwin muko kräke aune mike ütiäte jai meden gärätä. ¿Rabadre nuainne ño? Muko ye ütiäte kräke bämikadre kwe kukwe meden ñan raba nemen nuaindre muko ie, ye ñaka ribedre nuaindre kwe ie aune ñaka ketadre kwe meritre madabätä. ¿Ni ketata ni madabätä ye köböite dre raba nemen bare? Kukwe meden nemen bare meri kädekata Rosabätä yebätä ani blite. Muko kwe ñaka testiko, ye tä käre niara kete meritre madabätä. Muko kwe tä kukwe niere ye köböite ja ñaka ruin ütiäte ie, akwa ye ñan aibe ni iti ñaka niara tarere bökän ruin ie arato. Niara tä niere: “Jehovata ti mike ütiäte jai ye käre ngwandre törö tie tita ribere jai”. Nitre brare gure kukwebätä ye tä muko kwe mike ütiäte jai ñobätä ñan aune ye köböire tä ja kete kwin muko kwe ben aune Jehovabe gare ietre yebätä. *

⁸ Ni brare gure kukwebätä tä muko kwe mike ütiäte jai ngwane, tä blite kwinbätä, tare kwe nieta kwe ie aune kukwe nuainta kwe yebätä tä kwin niere ie (Prov. 31:28). Katerinabätä blitani párrafo käne yekänti, ye kräke muko kwe käkwe kukwe ye kwrere nuainbare ne kwe ja rabadreta ruin kwin ie yekäre. Katerina nämäne chi ngwane, meye ñaka nämäne mike ütiäte jai aune käre nämäne kete nitre madabätä aune ja ketamuko kwe ben. Aisete Katerina jatani ja ñäke nitre madabe aune kukwe metre namanina gare ie ye bitikäre nämäne nuainne jankunu arato. Akwa muko kwe käkwe dimikani ne kwe ñaka töbikadre kore kwe aune töbikadre ño kwe jabätä yebätä dimikani kwe arato. Niara tä niere: “Ti muko tä ti tarere, kukwe kwin nuainta tikwe yebätä tä kwin niere tie aune tä orare ti kräke. Jehová töi kwin keta kabre ye ngwanta törö kwe tie aune tita töbike ñaka kwin yebätä tä ti dimike ja töi ükete”.

9, 10. ¿Meri testiko iti nämäne ja ñäke ni madabe ye nitre umbre ji ngwanka käkwe dimikani ño?

⁹ ¿Nitre tö ja ñäkäbätä ni madabätä ye nitre umbre ji ngwanka raba dimike ño? Meri testiko kädekata Hanuni yebätä ani blite, niara nämäne chi ngwane kukwe kwin nuain nämäne kwe ye ñaka niebare jire ie. Niara tä niere: “Ti ñan blite krubäte aune monsotre mada bäri ütiäte ti kräke nämäne nemen ruin tie. Käre ti nämäne ja ñäke ni madabe ye törö tie”. Ja ngökani ñöte kwe ye bitikäre, nämäne ja ñäke ni madabe ye  köböite ñaka nämäne kukwe nuainne krubäte konkrekasionte nämäne nemen ruin ie. Akwa nengwane tä sribi prekursor nuainne kä jutobiti. ¿Dre käkwe dimikani?

¹⁰ Nitre umbre jie ngwanka Hanuni dimikani aune ja tare bämikani ie nieta kwe. Niaratre nämäne tö ngwen ie aune nämäne kukwe kwin nuainne yebätä kwin niebare kwetre ie. Hanuni tä niere: “Ruäre ngwane, tikwe meritre mada dimikadre ye nitre umbre ji ngwanka ribeba nuaindre tie, ye köböire konkrekasion nämä ti ribere jai ye rükaba gare tie. Tikwe meritre bäri bati dimikanina yebätä nitre umbre ji ngwanka kwin nieba tie. Aune biti ñäkäba kwetre 1 Tesalonicenses 1:2, 3 yebätä tie. Kukwe ye mataba ti brukwäte. Nitre umbre ji ngwanka töi kwin käkwe ti dimikani, ye köböire ti ütiäte juta Ngöbökwe te rababa gare tie”.

11. ¿Isaías 57:15 tä blite “nitre di ñakare” yebätä ye ni raba dimike ño?

¹¹ (Ñäkädre Isaías 57:15 yebätä). * “Nitre di ñakare” yebätä Jehová töita krubäte. Ni jökrä rabadre ja töi mike nitre ie ja ruin kore yebätä aune ñaka nitre umbre ji ngwanka aibe. Akwa yekäre nikwe ja töi mikadre bökän nitre madabätä. Oveja Jehovakwe ye tare krubäte nikwe ye nikwe bämikadre ie Jehová tö (Prov. 19:17). Kukwe madabiti ni raba nitre mada dimike ye abokän nikwe ja töi mikadre bobre aune ni ñaka raba kukwe jökrä nuainne ye nikwe ngwandre törö jai. Ni ñaka tö nitre mada töi mikabätä jabätä ñobätä ñan aune jatadre bätä ngwen nibätä ye ie ni ñaka tö. Kukwe nuain gare nie aune kukwe gare nie yebiti ni tö ja dimikabätä kwärikwäri (1 Ped. 4:10, 11).

12. ¿Ñobätä nitre töi bobre ie ja nämäne nemen ruin kwin Jesús ken? (Üai kena täräkwatabätä mikadre ñärärä).

¹² Jesukwe nitre ja tötikaka mikani tuin ño jai yebätä nikwe töbikadretari ngwane, nitre mada mikadre tuin ño jai ye raba nemen gare nie. Jesús ye ni bäri ütiäte nünanbare kä tibienbätä, akwa niara ye ‘moto jäme amne bike tidrä’ (Mat. 11:28-30). Niara töbätä krubäte aune kukwe gare krubäte ie, yebätä ñaka nämä niken ja dikaire nitre mada okwäbiti. Nämäne dirire kukwe nuärebiti aune nämäne kukwe kwin bämike ye nämäne mate nitre töi bobre ye brukwäte (Luc. 10:21). Ñaka ja ngwani kwe nitre ji ngwanka kukwebätä ye erere, ñakare aune nitre ye ütiäte Ngöbö kräke ye mikani gare metre kwe ietre (Juan 6:37). Käre nämäne ni jökrä mike tuin ütiäte jai.

13. Jesukwe nitre ja tötikaka kwe kräke ja töi mikani kwin aune tarebare, ¿ye ñobätä ni raba niere?

¹³ Jesús nämäne ja tare bämike nitre ja tötikaka kwe ie aune nämäne ja töi mike kwin kräketre. Nitre ja tötikaka kwe ye ñan raba kukwe ja erebe nuainne aune nämäne ja tuin kukwe ñaka ja erebe ben ye nämäne gare Jesús ie. Aisete ñan raba sribi ja erebe nuainne aune kukwe driere ja erebe ye nämäne gare ie. Akwa nitre ja tötikaka kwe nämäne ja di ngwen ye nämäne nemen ütiäte Jesús kräke. Kukwe bämikani kwe talentobätä yebiti ni töi nüke gare kwin ie bämikani metre kwe. Kukwe bämikani yete, ni ni klabore bökänkä käkwe “ni itire itire töi ño ño ye erere btä ngwian biani kwe” nitre klabore ie. Erametre nitre klabore nibu käkwe sribibare, akwa iti käkwe jondron gananbare bäri. Akwa ni klabore bökänkä käkwe kukwe kwin niebare ie kukwe nebiti: “Bäri kuin. Ma abko sribikä kuin amne ma kuin tödekakrä” (Mat. 25:14-23).

14. ¿Jesús erere ni raba ja töi mike ño ni mada kräke?

¹⁴ Jesús tä ni tarere aune ja töi mike kwin ni kräke arato. Ni ñan raba kukwe ja erebe nuainne aune nita ja tuin kukwe ñan ja erebe ben ye gare kwin ie aune ni raba dre dre nuainne ye erere nita nuainne ye käita jutobätä. ¿Ni raba ja ngwen ño Jesús erere? Ja mräkä iti ñan raba sribire ja erebe ja mräkä mada kwrere, yebätä ja rabadre ruin ngwarbe ie o rabadre ja gaire ye ie ni ñaka  tö. Ñakare aune tä ja di ngwen sribikäre Jehová kräke yebätä nikwe kwin niedre ie.

15, 16. Meri testiko iti raba dre dre nuainne ye erere mikani nuaindre kwe jai, ¿ye käkwe dimikani ño?

¹⁵ Nikwe sribi mikadre nuaindre jai Jehová kräke ye käkwe ni dimikai kä ngwen juto jabätä aune nüne kwin, ni raba dre dre nuainne ye ererebätä nikwe kukwe mikadre nuaindre jai aune ni mada raba dre nuainne ye ererebätä nikwe ñan kukwe mikadre nuaindre jai ñobätä ñan aune ye köböite ni raba nemen ulire aune ni raba nemen di nekä (Luc. 14:28). Kukwe namani bare prekursora kädekata Midori yebätä ani blite.

¹⁶ Midori nämäne chi ngwane, rün kwe ñaka testiko nämäne käre kete eteba, ngwai aune monsotre kwelate yebätä. Yebiti nämäne mike tuin ngwarbe jai. Midori ta niere: “Ye köböite ja nämä nemen ruin ngwarbe tie”. Kä nikani ta ye bitikäre Midori namani töbiketa kwin jabätä. Niara tä niere: “Ti nämä ñäke Bibliabätä köbö kwatire kwatire ñobätä ñan aune ye nämä ti töi mike jäme aune Jehová nämä ti tarere ye nämä nemen gare tie”. Ne madakäre, Midori raba dre nuainne ye mikani nuaindre kwe jai aune Jehovakwe dimikadre kukwe ye mike nemen bare ye ribebare kwe Jehovai. Ye köböire, raba sribi meden meden nuainne Jehová kräke ye käi namani jutobätä.

17. ¿Nitre kristiano rabadre ‘ja töi kwite ño jankunu’ aune ye köböire dre rabai bare?

¹⁷ Ja ñaka ruin kwin nie aune ni ñan tä töbike kwin ye ñan riaikä jötrö ngwarbe. Yebätä Jehovata kukwe ne niere nie: “Mun töita ño ye mun rabadre kwite jankunu” (Efes. 4:23, 24, TNM). Akwa kukwe ne rabadre bare nie yekäre, nikwe oradre, ja tötikadre Bibliabätä aune töbikadretaribätä. Käre nikwe kukwe ne nuaindre aune Jehovakwe ja di biandre nie ye nikwe kärädre ie.  Ni töita nierare ja ñäkäbätä ni madabe yebätä üai deme raba ni dimike ja töi ükete. Ni niena bike kri o bätä ngwen ye Jehovakwe mikai gare nie aune ni dimikai kwe ja töi käme ye kwite.

18. Kukwe nieta 2 Crónicas 6:29, 30 yebätä, ¿ye tä mä dimike ño?

¹⁸ (Ñäkädre 2 Crónicas 6:29, 30 yebätä). * Ni brukwä ño ye gare Jehovai. Töi käme kä nebätä aune ni töi ngite yebe nita ja di ngwen ja tuakäre ye gare ie. Kukwe ne jökräbätä nita ja di ngwen ye tuin Jehovai ngwane, tä nemen ni tarere bäri.

19. ¿Jehovata ni tarere ye bämikata kukwe medenbiti kwe?

¹⁹ Jehová töita ño ni kräke ye mikakäre gare nie, kukwe bämikata kwe ni meyere iti tä monso chi kwe tarere yebiti (Is. 49:15). Ni meyere kädekata Rachel tä niere: “Ti ngängän Stephanie däreba köbö te däredre ye känenkri. Tikwe tuaba ngwane, rababa tuin chi krubäte tie aune di ñakare... Sö krati kena yete, nämä incubadora te, akwa doctor käkwe ti tuanmetreba den kisete köbö kratire kratire. Ye köböire nun jataba nökrö bäri ja ken. Kä niena kwä ti biti nengwane akwa bäri chi monsotre mada kä ja närebiti ye kräke, akwa tita tarere ja brukwä ngöibiti ñobätä ñan aune ja di ngwani kwe nünankäre. Ye tä kä mike juto tibätä”. Nita ja di ngwen kukwe kwin nuainkäre Jehová kräke ngwane, ni meyere tä monso chi kwe tarere ye erere Jehová tä nemen ni tarere krubäte. Kukwe ne nemen gare nie ye tä ni töi mike jäme, ¿ñan ererea?

20. ¿Ñobätä ni raba kä ngwen juto jabätä?

²⁰ Ni jökrä Jehová mikaka täte itire itire ye ütiäte Jehová mräkätre bätäkä ngwarbe ye ngätäite. Ni bäri ütiäte ni mada kräke ye ñan aibätä jatani ni ngwena ja kokwäre, ñakare aune niarakwe ni brukwä mikani ñärärä, ni töi jäme aune niarakwe ni tötikadre aune ni töi ükadrete yekäre ni nämäne juto biare ye jutuabare ie (Sal. 25:9). Ni raba dre dre nuainne ye nita ja di ngwen nuainkäre Jehová kräke, ye käi jutobätä ye tädre gare metre nie. “Ni töi kuin amne tä biare” ye nikwe bämikai nita kä ngwen nüke jai aune nita ja ngwen metre niarai yebiti (Luc. 8:15). Aisete nikwe ja di ngwandre jankunu sribire kwin Jehová kräke. Nikwe ye erere nuaindi ngwane, kukwe nuainta nikwe ye käi täi juto nibätä aune nikwe ñaka ja ñäkäi ni madabe.