1. Warom tuut Yeehoowa uns net mit te anere ferklayche?

YEEHOOWA liipt tas ti tinge eensich sin. Meyer khene tas mërke in Yeehoowa sayn xeen kriatsyoon, too tepay ti mënxe. Yeete eene fon uns is eensich. Tes weeche, tuut Yeehoowa tich nii mools mit te anere ferklayche. Tee tuut tayn hërts unersuuche un siit was tuu wërklich pist. (1 Sam. 16:7) Tee wees was tayn kuute kwaliteete un tayn xwacheete sin, un wiis tuu ketsoo kep pist. Tee tuut tich net ferlange mee wiis tuu kepe khanst. Meyer mise uns selepst siin wii Yeehoowa uns siit. Tan, tuun mer ‘ferninftichkheet tsayche’ un net tsu fiil orer tsu weenich fon uns selepst tenke. (Rom. 12:3)

2. Warom is es net kuut uns mit te anere ferklayche?

² Kewis, meyer khene mit tëm kuut payxpiil fon te anere lërne. Fiilaycht khëne mer een pruuter orer een xwester woo kwap in te preetich aarwayt is. (Hep. 13:7) Meyer khene mit tiise pruuter orer xwester lërne wii khene mer unser preetich aarwayt ferpesere. (Fili. 3:17) Awer es kept een unerxiit tswixich mit tiise persoon lërne un uns mit tëne ferklayche. Wën mer uns ferklayche khene mer naytich un oone muut wëre, orer soo kaar uns oone weyert xpiire. Un wii mer in tëm letste artikel kesiin hon, wën mer fersuuche peser wii unser priiter sin, khene mer unser froyntxaft mit Yeehoowa fersaue. Tes weeche, tuut Yeehoowa uns liiplich aan reete: “Tas yeete eene sayn aychne aktsyoone noo kukt. Un tan, tuut eyer sich fraye ploos weeche was eyer selepst kemacht hot, oone sich mit yemant aneres ferklayche.” (Kal. 6:4)

3. In was fer aate fon Yeehoowa sayn aanpeetung frayst tuu tich tas tuu foran kang pist?

³ Yeehoowa wil hon tas tuu tich frayst mit wii fiil tuu xon foran kang pist in kaystlich aat. Tsum payxpiil, wëns tuu  tich taafe kelos host, khanst tuu tich fraye weeche tuu tiise tsiil ketrof host. Tuu host tiise ëntxlus aleen kemacht weeche tayn liip tsu Kot. Tenk mool triwer noo aan ales was tuu xon, sayt tiise taach, kemacht host. Tsum payxpiil: hot tayn liip fer ti Piipel leese un se xtutiire sich ferkreest? Xpiirst tuu tas tayn kepeete, ti letst tsayt, eerliche kep sin? (Psal. 141:2) Xpiirst tuu tich kwaper hayt tsu taach fer ti preetich aarwayt un in kuut penutse ti feramente woo mer hon? Un wëns tuu een familye host, xpiirst tuu tas Yeehoowa tich keholef hot een peser man, fraa, muter orer fater sin? Wëns tuu foran kang pist in tiise aate, host tuu uersache fer tich fraye un tsufriite xpiire.

4. Was tuun mer in tiise artikel siin?

⁴ Meyer khene ti anere helfe sich fraye mit was se xon in kaystlich aat foran kang sin. Meyer khene tëne aach helfe noo lose sich mit te anere ferklayche. In tiise artikel, tuun mer siin wii ti eltere khene sayn khiner helfe, wii een man un sayn fraa khene sich naner helfe un wii ti elteste un anere khene sayn priiter un xwestere helfe. Un am ën, tuun mer etliche tekste siin woo khene uns helfe tsiile xtele woo mer trefe khene.

5. Tëm noo Ëfeser 6:4, was sole ti eltere net mache?

⁵ Ti eltere sole uf phase fer net een khint mit tëm aner ferklayche un aach net mee fon een khint waarte wii tas mache khan. Soo sorte tinge khene een khint oone muut lose. (Lees Ëfeser 6:4.) * Een xwester, woo Sachiko * heest, saat: “Mayn leerer hon kewaart tas ich peser wii mayn xuul koleke weyer. Mayn mama wolt aach hon tas ich kuut in te xuul kengt fer een tsaye kepe fer ti leerer un fer mayn papa, woo kheen Yeehoowa sayn Tsayer waar. Fer ti woerheet saan, mayn mama wolt hon tas mayn noote in te xuul imer perfekt weyere; awer ich hon tas unmeechlich kefun. Opwool ich fërtich kep sin mit te xuul phaar yoore tsurik, frooe ich mich als mools ep mayn pestes kuut kenuuch fer Yeehoowa is.”

6. Was khene ti eltere mit Psalm 131:1, 2 lërne?

⁶ Een wichtich lisyoon fer ti eltere xteet in Psalm 131:1, 2. * (Lees.) Te kheenich Tawi hot kesaat tas eyer hat net ‘kroose tinge fer sich selepst kesuucht’ un aach net tinge woo “tsu  xweyer” fer tëm waare. Weeche sayn teemuut, waar eyer froo un in friit. Was khene mer mit Tawi sayn wërter lërne? Eltere, sayt teemuutich un ferninftich mit was teyer fon aych selepst waart un aach fon was teyer fon ayre khiner waart. Erkhënt tas ayre khiner khene etliche tinge kuut mache, awer tas se aach xwacheete hon. Tan, helft tëne tsiile xtele woo se trefe khene; soo, tuun ti khiner xpiire tas se weyert hon. Een xwester, woo Marina heest, saat: “Mayn mama hot mich nii mools mit mayn tray priiter orer mit anere khiner ferklaycht. Tii hot mich in kelërnt tas yeete eene fon uns hot unerxiitliche apiliteete, un tas meyer al fiil weyert foer Yeehoowa hon. Weeche mayn mama mich soo ketsoo hot, tuun ich neekst nii mich mit anere ferklayche.”

7-8. Wii khan een man sayn fraa eere?

⁷ Een kristlich man mus sayn fraa eere. (1 Phe. 3:7) Yemant eere petayt tëm respektiire un ekstra acht kepe. Tsum payxpiil, een man tuut sayn fraa eere wën eyer se mit respekt pehantele tuut. Tee tuut net mee ferlange wii tii mache khan. Un kewis, tee tuut net sayn fraa mit anere fraae ferklayche. Wii teet een fraa sich xpiire wën sayn man soo etwas mache teet? Kuk mool Rosa sayn payxpiil; sayn man, woo kheen Yeehoowa sayn Tsayer is, tuut se ofts mit anere fraae ferklayche. Ti krope wërter fon sayn man hot ti aat petrof wii Rosa sich selepst kesiin hot un se tswayfele kemacht op yemant se wërklich liipe teet. Tii saat: “Ale kepot mus yemant mich erinere tas ich weyert fer Yeehoowa hon.” In tëm keeche teel, een kristliche man tuut sayn fraa eere. Eyer wees tas wën eyer tas macht, tas tuut net ploos sayn hayrat petrefe, awer aach sayn froyntxaft mit Yeehoowa. *

⁸ Een man woo sayn fraa eert, tuut imer kuut fon tëne fer ti anere xpreche; tee saat tas eyer se liipt un tuut se aach ofts loope. (Xpr. 31:28) Te man fon Katerina, ti xwester iwer weem mer im letste artikel kexproch hon, hot tas kemacht fer tii helfe torich sayn nekatiiwe xpiirunge triwer wech khome. Wii Katerina een khint waar, hot sayn mama se ofts niter kextelt un se mit anere meetche ferklaycht, too tepay sayn froynte. Weeche tas, hot Katerina aan kefang sich mit anere ferklayche, un hot tas wayter kemacht soo kaar noo tas se een Yeehoowa sayn Tsayer kep is! Awer sayn kristlich man hot se keholef keeche tas khëmpfe un sich in te richtich aat siin. Tii saat: “Eyer liipt mich un loopt mich fer ti kuute tinge woo ich mache, un peet weeche mich. Tee erinert mich aach iwer Yeehoowa sayn wunerliche kwaliteete un heleft mich mayn nekatiiwe ketanke korikiire.”

9-10. Wii hon liipliche elteste een xwester keholef noo lose sich mit te anere ferklayche?

⁹ Wii khene ti elteste helfe tii woo sich mit te anere ferklayche? Kuk mool ti speryens fon een xwester woo Hanuni heest. Wii se een khint waar, hot se neekst nii een loop kriit. Tii saat: “Ich waar pleet un hon kemënt tas ti anere khiner peser wii ich waare. Tan, wii ich noch een khint waar, hon ich aan kefang mich mit te anere ferklayche.” Hanuni hot sich wayter mit te anere ferklaycht, soo kaar noo tas se een Yeehoowa sayn Tsayer kep is. Tes weeche, hot se kemënt tas se weenich weyert fer ti kemaynt hat. Awer yets, is Hanuni  een froo pyoneerin. Was hot se keholef sayn aanxtelung ënere?

¹⁰ Hanuni fertseelt tas se hot hilef fon liipliche elteste kriit. Tii hon kesaat tas se aarich wichtich fer ti kemaynt waar un hon se keloopt weeche sayn kuut payxpiil. Tii xraypt: “Als mool, hon ti elteste mich ferlangt fer etliche xwestere uf muute woo hilef prauchte. Weeche tas, hon ich mich nutslich kefun. Ich erinere mich wii etliche liipliche elteste mich keloopt hon wayl ich hat phaar yunge xwestere uf kemuut. Tan, hon se 1^te Thesalooniker 1:2, 3 fer mich kelees. Tas hot mayn hërts aan kekrif! Weeche tiise liipliche elteste, kepe ich yets weyert fer mayn plats in Yeehoowa sayn Orkanisatsyoon.”

11. Tëm noo Isaiias 57:15, wii khene mer helfe tii woo “uner ketrikt sin”?

¹¹ Lees Isaiias 57:15. * Yeehoowa khimert sich wërklich fiil mit tii woo “uner ketrikt sin”. Meyer al, net ploos ti elteste, khene tiise liipe priiter un xwestere uf muute. Een aat fer tas mache is tsayche tas meyer wërklich mit tëne uns khimere. Yeehoowa liipt sayn weyertliche xeef aarich fiil; un tee wil hon tas meyer unser priiter helfe tas xpiire. (Xpr. 19:17) Meyer khene aach unser priiter un xwestere helfe wën mer teemuutich sin. Meyer wole net acht fer uns selepst hoole, wayl es khent ti anere naytich lose. Xtats tas, sole mer unser apiliteete un khëntnis penutse fer eene ti anere uf muute. (1 Phe. 4:10, 11)

12. Warom waare ti keweenliche layt kërn mit Yeesus kewees? (Kuk tas pilt am aanfang fom piichelche.)

¹² Ti aat wii Yeesus sayn nookeener pehantelt hot, khan uns fiil in lërne wii ti anere pehantele. Yeesus waar te kreeste man woo xon uf te eyert keleept hot. Awer noch soo, waar eyer ‘tsaam un teemuutich im hërts’. (Mat. 11:28-30) Tee hot sich nii keproost iwer wii xlau eyer waar un al ti tinge woo eyer wust. Xtats tas, wën Yeesus in kelërnt hot, hot eyer keweenliche wërter un ilustratsyoone penutst woo ti teemuutiche layt sayn hërts aan kekrif hon. (Luk. 10:21) Ti relichyeese fiirer in Yeesus sayn taache waare hoochnaasich, un hon ti layt tenke kemacht tas se kheen weyert foer Kot hate. Awer Yeesus waar kans anerste kewees — tee hot ti keweenliche layt mit respekt pehantelt. (Yoo. 6:37)

13. Wii hot Yeesus liip un kuutheet ketsaycht in te aat wii eyer mit sayn tisipele um kang is?

¹³ Yeesus sayn kuutheet un liip waare taytlich ketsaycht in te aat wii eyer mit sayn tisipele um kang is. Eyer wust tas yeete eene fon tëne hat unerxiitliche apiliteete un situatsyoone. Tes weeche, khonte se net al ti selwiche flichte hon un soo fiil in te preetich aarwayt xafe. Noch soo, waar Yeesus froo tas yeete eene fon tëne hot sayn pestes kemacht. Yeesus sayn xpiirung is taytlich ketsaycht kep in te ilustratsyoon fon te talënte. In tiise ilustratsyoon, hot te Hër fer yeete sklaaw aarwayt kep tëm noo sayn apiliteete. Eene fon te tswaay flaysiche sklaawe hot mee resultaate wii te aner kriit; awer te Hër hot ti tswaay mit te selwiche wërter keloopt: “Aarich kuut, tuu kuute un troye sklaaw!” (Mat 25:14-23)

14. Wii khene mer noo mache Yeesus sayn aat fer ti anere pehantele?

¹⁴ Yeesus is imer kuut un liiplich in te aat wii eyer mit uns um keet. Tee wees tas meyer al hon unerxiitliche apiliteete un situatsyoone un eyer is froo wën meyer unser pestes mache. Meyer mise Yeesus noo mache. Khan sin tas etliche fon unser priiter orer xwestere khene net soo fiil wii ti anere in Yeehoowa  sayn aarwayt mache. Noch soo, meyer sole nii mools tëne ferxeeme orer tëne weenicher sich xpiire mache. Xtats tas, sole mer imer unser priiter un xwestere loope wayl tii sin sayn pestes in Yeehoowa sayn aarwayt am mache.

15-16. Was fer nutse hot een xwester kriit fon tsiile xtele woo se trefe khont?

¹⁵ Wën mer tsiile in Yeehoowa sayn aarwayt hon, hot unser leepe een opjetiiw un mer sin froo. Awer meyer mise tsiile xtele woo mit unser aychne apiliteete un situatsyoone phase, net mit te anere sayns. Wën net, khene mer oone muut wëre. (Luk. 14:28) Kuk mool tas payxpiil fon een pyoneerin woo Midori heest.

¹⁶ Wii se noch een khint waar, tëne sayn papa, woo net een Yeehoowa sayn Tsayer is, hot se ofts niter kextelt; tee hot se imer mit sayn pruuter, sayn xwester un sayn xuul koleke ferklaycht. Midori saat: “Ich hon mich unutslich kexpiirt.” Awer wii se elter kep is, hot se aan kefang een peser mënung iwer sich selepst hon. Tii saat: “Ti Piipel yeete taach leese hot mich friit im hërts kep un mich xpiire kemacht tas Yeehoowa mich liipt.” Un noch: tii hot tsiile kextelt woo se trefe khent un Yeehoowa sayn hilef ferlangt fer tiise tsiile trefe. Tas hot Midori keholef froo sin mit te tinge woo se fer Yeehoowa mache khont.

17. Wii khene mer ‘wayter ti aat wii mer tenke nay mache’, un was wëre ti resultaate sin?

¹⁷ Es nëmt een lang tsayt fer ënere ti aat wii meyer uns selepst siin. Tes weeche, saat uns Yeehoowa: “Tuut wayter ti aat wii teyer tenkt nay mache.” (Ëfe. 4:23, 24) Kewis, fer tas hin kriin, mise mer peete, Kot sayn Wort xtutiire un triwer noo tenke. Tan, xtreng tich aan fer tiise tinge mache un ferlang Yeehoowa sayn kraft. Tëm sayn hayliche kayst tuut tich helfe noo lose tich mit te anere ferklayche. Un wën  te nayt un te hoochmuut aan fange in tayn hërts wakse, Kot tuut tich helfe tas mërke un tiise xpiirunge fon tayn hërts xnel raus rope.

18. Wii khan 2^te Kroonike 6:29, 30 tich treeste?

¹⁸ Lees 2^te Kroonike 6:29, 30. * Yeehoowa khënt unser hërts. Tee khënt aach unser khëmpf keeche te xlechte kayst fon tiise welt un keeche unser aychne imperfektsyoone. Wën Yeehoowa unser aanxtrengung mërkt, tëm sayn liip tsu uns wërt kreeser.

19. Was fer ferklaychung penutst Yeehoowa fer uns helfe ferxteen sayn liip tsu uns?

¹⁹ Fer se ferklayche wii fiil Yeehoowa uns liipt, penutst eyer ti ferpiinung fon een mama un sayn nëneche. (Isa. 49:15) Kuk mool was pasiirt is mit een muter woo Rachel heest. Tii xraypt: “Mayn meetche Stephanie is eente uf te welt khom wii mer kewaart hon. Wii ich se tas eyerste mool kesiin hon, tii waar soo tërche un xwach... Awer ti toktere hon mich erlaupt, yeete taach, mayn khint hoole un se um aarme torich te eyerste moonat woo se must im krankehaus plaype. Torich tiise tsayt, mayn ferpiinung mit mayn nëneche is aarich xtark kep. Yets, is Stephanie 6 yoore alt un is kleener wii ti khiner woo ti selwich elter wii tii hon. Noch soo, liipe ich se aarich fiil wayl tii hot fiil fer sayn leepe kekhëmpft un hot fiil frooheet fer mich keprung!” Es frayt uns se wise tas Yeehoowa liipt uns aarich fiil wën eyer siit tas mer xtram xafe fer unser pestes fer tëm mache.

20. Warom khene Yeehoowa sayn tiiner sich fraye?

²⁰ Wayls tuu een tiiner fon Yeehoowa pist, pist tuu een weyertliche teel fon Yeehoowa sayn familye, un es kept nimant soo wiis tuu. Yeehoowa hot net tich tsu tëm ketsoo wayls tuu peser wii ti anere pist; tee hot tich tsu tëm ketsoo wayl eyer hot tayn hërts unersuucht un hot kesiin tas tuu teemuutich pist, imer wilich fer iwer tëm se lërne un ënerunge in tayn leepe mache. (Psal. 25:9) Say tich sicher: Yeehoowa kept fiil weyert wëns tuu tayn pestes machst fer tëm tiine. Tayn persewerans un troyheet tsayche tas tuu een ‘eerlich un kuut hërts’ host. (Luk. 8:15) Tan, tuu wayter tayn pestes fer Yeehoowa kepe. Soo, host tuu uersache fer tich fraye mit te tinge woos ‘tuu selepst kemacht host’.