1. Nama kebuah Jehovah enda mandingka kitai enggau orang bukai?

LEBUH Jehovah nempa utai, Iya nentuka semua utai nya enda sebaka. Tiap iku kitai enda sama. Nya alai, Jehovah enda kala mandingka kitai enggau orang bukai. Iya meda ati kitai, iya nya sapa kitai kebendar iya. (1 Sam. 16:7) Iya mega nemu pengering enggau pengelemi kitai, sereta chara kitai dibesaika. Lalu Iya enda minta kitai ngereja utai ke enda ulih digaga kitai. Kitai patut neladan Jehovah lebuh meda diri empu, iya nya baka chara Iya meda kitai. Enggau tu, kitai enda kelalu ngeninggika diri tauka ngemaruhka diri.—Rom. 12:3.

2. Nama kebuah enda manah mandingka diri enggau orang bukai?

² Kitai ulih belajar ari teladan manah menyadi Kristian ke bukai. Ambika chunto, kitai ulih belajar ngemanahka agi chara kitai nginjil ari menyadi Kristian ke landik ba pengawa nginjil. (Plp. 3:17; Heb. 13:7) Tang bisi bida entara nunda teladan manah orang bukai ari mandingka diri empu enggau orang bukai. Enti kitai mandingka diri empu enggau orang, kitai engka berasai kepapas, asa ati, tauka nadai guna. Baka ke udah dipelajar kitai ba artikel sebedau tu, enti kitai nguji deka manah agi ari bala menyadi Kristian, tu ulih ngachau kaul kitai enggau Jehovah. Nya alai Jehovah meransang kitai: “Genap iko orang patut ngabas ulah diri empu. Enti ulah iya badas, iya tau temegah [‘gaga ati,’ NWT] ka pengawa ti udah dikereja diri, tang anang bebanding ka utai nya enggau pengawa orang bukai.”—Gal. 6:4, Bup Kudus Berita Manah Ka Rebak Diatu.

3. Nama pemansang ke udah digaga nuan ti ngasuh nuan gaga ati?

 ³ Jehovah deka nuan gaga ati enggau pemansang diri empu. Ambika chunto, enti nuan udah dibaptisa, nuan ulih gaga ati laban udah nyapai juluk ati nya! Nuan ngaga pemutus nya ketegal nuan rinduka Petara. Pikirka pemansang ke udah digaga nuan kenyau ari nya. Ambika chunto, kati nuan diatu rindu agi macha Bup Kudus sereta belajarka diri empu? Kati sampi nuan bisi reti agi sereta datai ari ati? (Mas. 141:2) Kati nuan landik agi ngepunka randau lebuh nginjil sereta ulih ngena mayuh agi perengka ba pengawa nginjil? Lalu enti nuan bisi diri sebilik, kati Jehovah udah nulung nuan nyadi laki, bini tauka apai indai ke manah agi? Nuan ulih berasai gaga ati sereta puas ati enggau pemansang ke udah digaga nuan.

4. Nama deka dikerandauka kitai ba artikel tu?

⁴ Kitai ulih nulung orang bukai gaga ati enggau pemansang ke digaga sida, sereta enda mandingka diri enggau orang bukai. Ba artikel tu, kitai deka meda: (1) baka ni apai indai ulih nulung bala anak sida, (2) baka ni laki bini ulih nulung pangan diri, sereta (3) baka ni tuai gempuru enggau bala menyadi Kristian ke bukai ulih nulung menyadi Kristian sida. Ke penudi iya, kitai deka berandauka sekeda prinsip Bup Kudus ke ulih nulung kitai netapka juluk ati ke ulih dijapai kitai, nitihka penau sereta gaya diri empu.

5. Nitihka Epesus 6:4, nama patut diseliahka apai indai?

⁵ Apai indai patut bejimat ngambika enda mandingka anak sida enggau anak ke bukai tauka ngarapka anak sida ngereja utai ke enda ulih digaga sida. Enti apai indai ngereja nya, nya ulih ngasuh anak sida pedis ati. (Bacha Epesus 6:4.) Seiku menyadi indu ke benama Sachiko * madahka: “Pengajar aku ngarapka aku bulih pemutus peresa ti manah ari nembiak ke sekelas enggau aku. Nambahka nya, indai ka aku bulih seratus peratus ba peresa ngambika aku ulih meri saksi ti manah ngagai pengajar aku sereta apai aku ti ukai Saksi. Tang, nya tusah ba aku. Aku udah lama ninggalka sekula, tang kekadang aku ngasaika engka Jehovah  mega enda lantang ati enggau aku, taja pan aku udah ngereja utai enggau naka ulih.”

6. Nama ulih dipelajarka apai indai ari Masmur 131:1, 2?

⁶ Apai indai ulih belajar utai ti beguna ari Masmur 131:1, 2. (Bacha.) Raja David madahka iya “enda ngiruh diri enggau utai ti kelalu besai” tauka ngereja utai ti enda ulih iya. Ketegal iya baruh ati, iya puas ati sereta lantang. Nama ulih dipelajarka apai indai ari utai ke dipadah David? Apai indai ulih nunjukka diri baruh ati enti sida enda ngarapka diri ngereja utai ke enda ulih digaga sida, sereta enda ngarapka utai ti sama ba anak sida. Apai indai ulih nulung anak sida berasai berega enti sida nemu pengering enggau pengelemi anak sida lebuh nulung anak netapka juluk ati. Seiku menyadi indu ke benama Marina ngenang baru: “Indai aku enda kala mandingka aku enggau tiga iku madi aku tauka anak ke bukai. Iya madah ngagai aku, semua orang bisi pemeri ti enda sama sereta tiap iku kitai berega ba Jehovah. Ketegal nya, aku enda mandingka diri enggau orang bukai.”

7-8. Baka ni laki ngayanka basa ngagai bini?

⁷ Seiku laki Kristian patut bebasaka bini iya. (1 Pet. 3:7) Iya nemu ulah iya ulih mai empas ngagai kaul iya enggau bini iya sereta kaul iya enggau Jehovah. * Ambika chunto, seiku laki ngayanka basa ngagai bini iya enggau ngasuh bini iya ngasaika diri amat berega ba iya. Iya enda minta lebih ari utai ke ulih digaga bini iya. Pia mega, iya enda mandingka bini iya enggau indu bukai. Nama asai ati bini enti laki mandingka iya enggau indu ke bukai? Peratika utai ti nyadi ngagai seiku menyadi indu ke benama Rosa. Laki iya ke ukai Saksi suah mandingka iya enggau indu bukai. Iya suah bejaku jai ngagai Rosa. Tu ngasuh Rosa berasai enda beguna, lalu kakang ati sekalika orang ulih rinduka iya tauka enda. Iya madah, “Aku patut suah dikingatka, Jehovah rinduka aku.”

⁸ Laki ke bebasaka bini iya madahka pemanah bini iya ngagai orang bukai, madahka diri rinduka iya, sereta muji iya. (J-lam. 31:28) Tu meh utai ke nyadi ba Katerina, ke dipadah ba artikel sebedau tu. Laki iya ngereja tu lebuh Katerina ngasaika diri enda semanah orang bukai. Maya iya agi mit, indai iya suah ngemaruhka iya, lalu mandingka iya enggau nembiak indu ke bukai, nyengkaum bala pangan iya. Asil iya, Katerina berengkah mandingka diri enggau orang bukai lalu terus ngereja nya, indah pengudah iya nyadi seiku ari Saksi-Saksi Jehovah. Tang, laki iya nulung iya mutarka asai ati ke baka nya sereta nulung iya ngembuan asai ati ti ngena pasal diri empu. Ku Katerina madahka: “Laki aku rinduka aku, muji pemanah ke digaga aku, sereta besampi ke aku. Iya mega ngingatka aku pasal kualiti Jehovah ti manah lalu nulung aku ngemetulka runding ti negatif.”

9-10. Baka ni tuai gempuru nulung seiku menyadi indu enda mandingka diri enggau orang bukai?

⁹ Nama ulih digaga tuai gempuru enti bisi menyadi ke suah mandingka diri enggau orang bukai? Peratika peneleba menyadi indu ke benama Hanuni. Maya iya agi mit, iya jarang dipuji. Ku iya: “Aku nembiak ti pemalu lalu ngumbai nembiak bukai manah agi ari aku. Aku berengkah mandingka  diri enggau orang bukai kenyau ari aku agi mit.” Taja pan iya udah nyadi Saksi-Saksi Jehovah, Hanuni agi mandingka diri enggau orang bukai. Ketegal nya, iya ngasaika utai ke digaga iya dalam eklisia enda beguna. Tang diatu iya pengerintis ti gaga ati. Nama nulung iya berubah?

¹⁰ Hanuni nerima bantu ari tuai gempuru ke ibuhka iya. Sida madahka Hanuni amat berega dalam eklisia lalu muji penetap ati iya. Ku Hanuni: “Beberapa kali tuai gempuru minta aku meransang sekeda menyadi indu ke begunaka tulung. Tu ngasuh aku berasai berega. Aku agi ingat lebuh tuai gempuru beterima kasih ke pengawa aku, ke udah nulung meransang menyadi indu ke biak. Udah nya sida macha 1 Tesalonika 1:2, 3. Nya amat negu ati aku! Ketegal tulung ari bala tuai gempuru, diatu aku nemu aku berega ba eklisia.”

11. Baka ni kitai ulih nulung “orang ke tusah ati,” baka ke dipadah ba Masmur 34:18?

¹¹ Bacha Masmur 34:18. Jehovah amat ibuhka “orang ke tusah ati.” Semua kitai ulih nulung meransang bala menyadi Kristian ke tusah ati. Tu ukai semina pengawa tuai gempuru aja. Siti chara kitai ulih meransang sida, iya nya enggau nunjukka pengibuh ngagai sida. Jehovah deka kitai ngayanka pengerindu Iya ke bedus Iya. (J-lam. 19:17) Kitai mega ulih nulung bala menyadi lebuh kitai ngayanka pemaruh ati sereta enda temegahka pengelandik diri. Kitai enggai pengawa ke digaga kitai ngasuh kitai kelalu tampak dipeda laban tu ulih ngasuh orang bukai berasai kepapas. Tang, kitai deka ngena pengelandik sereta penemu kitai kena meransang pangan diri.—1 Pet. 4:10, 11.

12. Nama kebuah orang mayuh rindu begulai enggau Jesus? (Peda gambar ba mua majalah.)

¹² Kitai ulih belajar mayuh utai ari chara Jesus begulai enggau bala murid iya. Jesus nya mensia ti pemadu badas lalu enda ulih dibandingka enggau orang bukai. Taja pia, iya “nelap sereta baruh ati.” (Mat. 11:28-30) Iya enda temegahka penemu ti dikembuan iya. Lebuh iya ngajar, iya ngena jaku ti mudah sereta sempama ti senang dimeretika, ke negu ati orang ke ninga. (Luk. 10:21) Jesus enda baka tuai pengarap ti sumbung. Iya bebasaka orang lalu nulung sida ngasaika diri berega ba Petara.—Jhn. 6:37.

13. Baka ni Jesus ngayanka penyiru enggau pengerindu ngagai bala murid iya?

¹³ Baka ni Jesus ngayanka penyiru enggau pengerindu ngagai bala murid iya? Iya nemu sida ngembuan pengelandik sereta gaya ti enda sebaka. Nya alai, sida enda megai tanggung pengawa ti sama. Sida mega enda bulih asil ti sama dalam pengawa nginjil. Tang Jesus amat gaga ati laban tiap iku sida bebendar gawa. Jesus nunjukka nya nengah siti sempama. Dalam sempama nya, seiku tuan meri orang gaji pengawa “nitihka pengelandik sida siku-siku.” Bisi dua iku orang gaji bagas gawa, tang seiku ari orang gaji nya bulih asil mayuh agi ari orang gaji ke seiku agi. Taja pia, tuan nya muji seduai iya enggau madahka: ‘Manah pengawa seduai! Kita tu orang gaji ke manah sereta tetap ati.’—Mat. 25:14-23.

14. Baka ni kitai ulih nunda teladan Jesus?

¹⁴ Jesus siru enggau rinduka kitai. Iya nemu pengelandik sereta gaya kitai enda sebaka. Tang iya gaga ati maya kitai gawa enggau bebendar. Kitai deka nunda teladan Jesus. Kitai enggai ngasuh bala menyadi  berasai enda beguna tauka malu ketegal sida enda ulih ngereja mayuh baka orang bukai. Tang, kitai deka ngiga peluang muji bala menyadi kitai ke bebendar gawa ke Jehovah.

15-16. Baka ni seiku menyadi indu bulih penguntung ari netapka juluk ati ti ulih dijapai iya?

¹⁵ Lebuh kitai netapka juluk ati dalam sembah kitai ke Jehovah, pengidup kitai bisi reti. Tang kitai deka netapka juluk ati ke ulih dijapai kitai, nitihka penau enggau gaya diri empu, ukai orang bukai. Enti kitai nitihka juluk ati orang bukai, kitai engka berasai tusah ati sereta asa. (Luk. 14:28) Peratika peneleba seiku pengerintis ke benama Midori.

¹⁶ Lebuh Midori agi mit, apai iya ke ukai Saksi suah madah, madi iya enggau orang ke sekelas enggau iya manah agi ari Midori. Midori madahka: “Aku berasai enda beguna.” Tang seraya iya mansang besai, Midori berengkah ngembuan runding ti ngena pasal diri empu. Iya madahka: “Aku macha Bup Kudus ninting hari ngambika aku bisi pengelantang ba ati sereta ngasaika pengerindu Jehovah ke aku.” Pia mega, iya netapka juluk ati ti ulih dijapai iya lalu besampi minta Jehovah nulung iya nyapai juluk ati nya. Asil iya, Midori ulih gaga ati enggau pemansang diri.

17. Baka ni kitai terus ‘ngelakka runding enggau ati kitai diubah nyadi baru,’ sereta nama asil iya?

¹⁷ Kitai begunaka awak kena ngaga ubah ba runding sereta mutarka asai ati ti negatif pasal diri empu. Nya alai, Jehovah meransang kitai terus “ngelakka runding enggau ati kita diubah nyadi baru.” (Eps. 4:23, 24) Kena ngereja tu, kitai patut besampi, belajar  sereta belematika Bup Kudus. Terus meh ngereja tu lalu minta pengering ari Jehovah. Roh kudus Iya deka nulung nuan mutarka pengingin ke ngasuh nuan mandingka diri enggau orang bukai. Jehovah mega deka nulung nuan nemu sekalika nuan udah nyadi kepapas tauka sumbung. Enti bisi, Iya deka nulung nuan jejampat ngaga ubah.

18. Baka ni nuan bulih pengelantang ari 2 Bansa Israel 6:29, 30?

¹⁸ Bacha 2 Bansa Israel 6:29, 30. Jehovah nemu nama utai diperundingka kitai. Iya mega nemu kitai bebendar ngelaban pengingin ari dunya sereta pengelemi kitai. Lebuh Jehovah meda kitai bebendar ngelaban semua pengingin tu, Iya majak rinduka kitai.

19. Nama sempama ke dikena Jehovah ke nunjukka Iya ibuhka kitai?

¹⁹ Kena ngambarka baka ni asai ati Jehovah ngagai kitai, Iya ngena chunto pengerindu entara indai enggau anak iya. (Isa. 49:15) Peratika chunto seiku indai ke benama Rachel. Iya nulis: “Anak indu aku Stephanie ada enda chukup bulan. Lebuh terubah kali aku meda iya, iya amat mit. Tang lutur ngelakka aku merap iya ninting hari sekumbang iya ke ditan ba sepital pengelama sebulan. Maya nya, kaul aku enggau anak aku majak semak. Diatu iya beumur enam taun lalu iya mit agi ari nembiak ke serambau enggau iya. Taja pia, aku amat sayauka iya laban iya bebendar deka idup maya iya agi mit suba, lalu iya udah mai pengaga ati ba pengidup aku!” Baka nya mega, Jehovah balat rinduka kitai lebuh kitai bebendar meri utai ti pemadu manah ke Iya!

20. Nama kebuah nembiak Jehovah ulih gaga ati?

²⁰ Ketegal kitai nembiak Jehovah, tiap iku kitai berega ba Jehovah. Jehovah mai nuan semak ngagai Iya ukai ketegal nuan manah agi ari orang bukai. Tang nya ketegal Iya meda pemaruh ati nuan, ke sanggup diajar lalu ngaga ubah. (Mas. 25:9) Kingatka, tiap iku kitai enda sama. Nya alai, nuan ulih andal Jehovah beterima kasih lebuh nuan meri utai ti pemadu manah ngagai Iya. Pengeliat ati enggau penetap ati nuan nunjukka nuan bisi “ati ti manah sereta ngasi.” (Luk. 8:15) Nya alai, terus meh meri utai ke ulih nuan ngagai Jehovah! Udah nya, nuan ulih gaga ati “ke pengawa ti udah dikereja diri.”