1. Ngatta ari ittam nga ikumpara ni Jehova ta tanakuan?

PINARATU ni Jehova nga madduruma i ganna-gannug anna i totolay. Kakayà na gare i kunnatun. Maski sikaw awan tu kagittam. Yayya nga ari naka vuluvuga ikumpara ni Jehova ta tanakuan. Usitakkan na i futum anna ammammu naka. (1 Sam. 16:7) Ammu na i kalalakiammu, i pakkafiammu, anna nu kunnasi ka nga napadakal. Arian na gapa ikiddaw nikaw i ariammu nga makua. Kunnatun nakuan i pagimamma tam ta baggi tam. Ta nu ari nga atatannang onu alalinno i paningattam ta baggi tam, mapeggan ittam tu ‘mapakalinno nga appana-panono.’—Roma 12:3.

2. Ngatta ari tu makasta nu ikumpara tam i baggi tam ta tanakuan?

² Egga i magigiammu tam nu obserbattam i makasta nga ehemplo na tadday nga brother onu sister nga malalaki ta pallayyagayya. (Heb. 13:7) Makoffun yatun tapenu mas mapakasta tam gapa i pallayyagayya tam. (Fil. 3:17) Makasta gapa nu parigattam i ehemplo na tanakuan, ngem duma ngana nu ikumpara tam i baggi tam ta nira gare baka mappassil ittam, makkafi i nono tam, onu matageno tam nga awan tu sesserbi tam. Nagigiammu tam ta nappasa nga artikulo nga ari tu makasta ta espiritualidad tam nu makikompetensia ittam ta wawwaragi. Yayya nga meddu nga nitabarang ni Jehova nittam: “Mawag tu innan na kataggi-tadday i ikalangan na laggapa. Nu mapia, awayya na i magayaya ta kingngua na, anna ari ngana nga mawag tu iparig na ta kingngua na tanakuan nga tolay.”​—Gal. 6:4.

3. Anni ira i napprogresowammu nga mamagayayya nikaw?

 ³ Kayà ni Jehova nga magayayya ka ta pinapprogresom ta espiritual. Angngarigan na, nu nabawtisowakka ngana, magayayya ka nakuan ta nadde mu yatun! Sikaw lagapa i naddesision tatun megafu ta ayatammu i Dios. Ngem kumusta kari ngana i papprogresom? Angngarigan na, mas kakayà mu ngana kari sangawe i mabbibbig tu Biblia anna mappersonal study? Mas napafutuan ngana kari i pakimallo mu sangawe? (Sal. 141:2) Mas malalaki ka kari ngana nga mangigafu tu pakiyuvovug nu mallayyagayya onu ta pangusa tu rimienta ira ta ministerio? Nu familiadu ka gapa, noffunakka kari ni Jehova tapenu mabbalin tu mas mapia nga atawa onu mappagana? Magga magayayya ka tatun ira nga pinapprogresom.

4. Anni i gigiammuattam taw nga artikulo?

⁴ Moffunattam i tanakuan tapenu magayayya gapa ira ta pinapprogreso da ta espiritual. Egga gapa i makua tam tapenu mebita da nga ikumpara i baggi da ta tanakuan. Taw nga artikulo, ammuattam nu kunnasi nga moffunan na magana i ána da, nu kunnasi makka-uffun i magatawa, anna nu kunnasi moffunan na elder anna na wawwaragi i kapangngurug da. Tapus gigiammuattam gapa i prinsipio ira ta Biblia nga makoffun nittam tapenu makanono tu realistiko ira nga addetan nga mepangngo ta abilidad anna situasiottam.

5. Segun ta Efeso 6:4, anni i mawag nga lillitan na magana ira?

⁵ Ari nakuan nga ikumpara na magana i ana da ta tanakuan onu sossobra i ekspektadda ta nisa. Makkafi i nono na abbing nu kunnatun i kuan na magana na. (Bibbigan i Efeso 6:4.) Kunnaw i kagian ni Sister Sachiko *: “Ekspektan na mestrù ira nga affutakku i kaklasè. Ari nga Saksi i mestrù ira anna i yamà yayya nga kayà na yenà nga atannang i grades ku tapenu makasta i pagimamma da ta Saksi ira. Kayà na paga lagu nga ma-perfect ku i test ku ira, ngem imposible yatun. Maski lagu piga dagun ngana i nappasa turi ta nagiskuela ngà, egga lagapa i tiempo nga manono ku nga ari nga magayayya si Jehova maski nu kukukuakku i adde na mawayyà.”

6. Anni i magigiammu na magana ira ta Salmo 131:1, 2?

⁶ Makagigiammu i magana ira ta Salmo 131: 1, 2. (Bibbigan.) Kinagi ni Patul David nga ari na nga “agga-nono i gannug ira nga dakal i kebalinad-da” onu i ganna-gannug nga arianna vuluvuga madde. Megafu ta mapakalinno yayya, ‘makalanno ngana nu anni i egga nisa anna memammo yayya.’ Anni i magigiammu na magana tatun ira nga kinagi ni David? Mapakalinno i magana nu ari nga sossobra i ekspektadda ta baggi da anna ta ána da. Tapenu makkomfiansa i abbing, mawag nga ammuan na magana i kalalakian anna pakkafian na, anna uffunadda yayya tapenu makanono tu mepangngo ira nga addetan nga awayya na nga gawatan. Niyistoria ni Sister Marina: “Ari ngà vuluvuga nikumpara na yenà ta tallu nga wagì onu ta tanakuan nga abbing. Nituddu na nio nga nadduruma i abilidad tam anna nabalor kani Jehova i kada tadday nittam. Pia ngana laman ta kingngua na yatun. Bihira ku nga ikumpara i baggì ta tanakuan.”

7-8. Kunnasi nga mekakua na lalaki i atawa na?

⁷ Mawag tu ikakua na Cristiano nga lalaki i atawa na. (1 Ped. 3:7) Nelagum ta pangikakua i pangiyawa tu espesial nga atension anna pangirespeto. Angngarigan na, mekakua na lalaki i atawa na nu iddan na yayya tu dignidad. Ari na nga ikiddaw i ari nga makua na atawa na. Ari na gapa nga ikumpara i atawa na ta tanakuan nga babbay. Anni kari i matageno na babay nu kunnatun i kuan na atawa na? Innan i ekspiriensa ni Sister Rosa. Ari tu Saksi i atawa na anna kanayun na yayya nga ikumpara ta tanakuan nga babbay. Mataka-taki i kakkagian na nisa yatutta alalinno i anningan ni Sister Rosa ta baggi na anna madduda yayya nu egga kari i kurug nga mangiddu nisa. Kinagi na: “Mawag tu kanayun nga meperaddam niakan nga iddukan nà ni Jehova.” Ngem ikakua na Cristiano nga lalaki i atawa na. Ammu na gare nga makasta i efekto natun ta relasiodda nga magatawa anna ta relasion na kani Jehova. *

⁸ Mekakua paga na lalaki i atawa na nu dayawan na yayya, ipatageno na nga ayatan na yayya, anna komendan na yayya. (Prov. 31:28) Kunnatun i kingngua na atawa ni Sister Katerina nga nakagi ta nappasa nga artikulo. Nakoffun yatun nisa tapenu malabanan na i pakatageno nga awan tu sesserbi na. Ta kabbinna gare, kanayun yayya nga ivuya na yena na tapus ikukkumpara na yayya ta tanakuan nga babbay maski paga ta kokkofun na. Megafu tatun, nasanay yayya nga ikumpara i baggi na ta tanakuan, maski paga turi ta Saksi ngana yayya! Ngem noffunan yayya na atawa na tapenu meyemmang yatun anna mapeggan tu mepangngo nga pagimamma ta baggi na. Kinagi na: “Iddukan nà na atawà, komendan nà ta makasta ira nga makuà, anna ipaka-pakimallo nà. Ipanono na gapa niakan i makasta ira nga kualidad ni Jehova anna uffunan nà tapenu metunung ku i negatibo nga appana-panono ku.”

9-10. Kunnasi nga noffunan na masippo ira nga elder i tadday nga sister tapenu malabanan na i tendensia nga ikumpara i baggi na ta tanakuan?

⁹ Kunnasi nga moffunan na elder ira danuri egga i tendensia da nga ikumpara i baggi da ta tanakuan? Makagigiammu ittam ta ekspiriensa ni Sister Hanuni. Ta kabbinna, ari yayya kuruga makomendan. Kinagi na: “Ta kabbikku pagalaman, minappasirang ngà ngana anna nononopakku nga mas malalaki i tanakuan nga abbarabbing anne niakan. Kanayukku nga ikumpara i baggì ta tanakuan.” Ngem maski turi ta nakannammuan ngana ni Hanuni  i kinakurug, kukukuan na lagapa yatun. Anni i efekto natun nisa? Maski nu payunir yayya, natageno na nga baddi laman i meyuffun na ta kongregasion. Ngem sangawe, magayayya ngana si Hanuni. Kunnasi na nga noli i pagimamma na?

¹⁰ Inuffunan na masippo ira nga elder si Hanuni. Inappresia da i makua na ta kongregasion anna kinomendadda yayya ta makasta nga ehemplo na. Kunnaw i nitura na: “Namippiga nga nikiddaw niakan na elder ira nga pagarammakku i karuan nga sister nga magawag tu uffun. Natageno ku nga egga i meyuffukku. Nanono ku turi ta nappabalo i masippo ira nga elder niakan ta pinagaram ku i mas mabbing ira nga sister. Nibibbig da niakan i 1 Tesalonica 1:2, 3. Magaya-ayayya ngà tatun! Mappappabalo ngà tatun ira nga mapia nga pastor ta matageno ku ngana sangawe nga egga i meyuffukku ta kongregasion.”

11. Kunnasi tam moffunan danuri “natattazzian anna minappakalinno” nga nakagi ta Isaias 57:15?

¹¹ Bibbigan i Isaias 57:15. Kuruga ikavurungan ni Jehova danuri “natattazzian anna minappakalinno.” Ari laman tu i elder ira i mamagaram ta meddu nga wawwaragi. Makua tam ngamin yatun nu ikavurungattam ira. Kayà ni Jehova nga ipatageno tam nira i aya na para ta nabalor nga karneru na. (Prov. 19:17) Mapagaram tam gapa i wawwaragi tam nu minappakalinno ittam anna nu ariattam ipara-parayag i abilidad tam. Manaki tam nga isentro i atension ta baggi tam ta ariattam kayà nga mappassil i tanakuan nittam. Kayà tam lallagu nga makapagaram ta wawwaragi i ngamin nga kakkagian anna kukukuattam.​—1 Ped. 4:10, 11.

12. Ngatta kakayà na ordinariu nga totolay nga makikavulu kani Jesus? (Innan i letratu ta vungun.)

¹² Aru i magigiammu tam ta pinattratu ni Jesus ta tagatuttul na ira. Yayya i kapianan nga nattolay taw ta davvun. Ngem “masippo anna minappakalinno” yayya. (Mat. 11:28-30) Ari na nga nipapparayag nga malalaki yayya anna aru i ammu na. Simple laman i panuddu na anna mabi nga malippawa i ilustrasion na ira yayya nga nadde na i giffutuan na ordinariu nga totolay. (Luc. 10:21) Ari tu kagitta ni Jesus i minappakatannang nga lider ira na relihion. Kanayun na nga nipatageno ta tanakuan nga nabalor ira ta Dios. (Juan 6:37) Nikakua na i ordinariu nga totolay.

13. Kunnasi nipasingan ni Jesus i kinasippo anna aya na ta disipulos na?

¹³ Masippo anna minaggiddu si Jesus ta disipulos na. Ammu na nga nadduruma i abilidad anna situasiodda. Yayya nga ari tu para-parehu i mawayya da nga makua anna nadduruma gapa i magafuanadda ta ministerio. Ngem inappresia lagapa ni Jesus i kada tadday nira megafu ta kingngua da i mawayya da. Masingan gapa nga minangngalippawa si Jesus ta ilustrasion na ta talento ira. Mabibbig tam tatun nga nikargo na yafu i ngamin nga pakkukua na ta aripan na ira “segun ta abilidad na kataggi-tadday.” Tatun nga istoria, egga i dua nga malallappo nga aripan ngem mas aru i ganansia na tadday nira. Ngem parehu lagapa i pinakkomenda na yafu ta dua nga aripan na: “Mapia i kingnguam. Pammakatalakkak-ka nga doroban!”—Mat. 25:14-23.

14. Kunnasi tam maparigan si Jesus?

¹⁴ Kanayun nga masippo anna minaggiddu si Jesus nittam. Ammu na nga nadduruma i abilidad anna i situasiottam yatutta magayayya yayya nu kuattam i kapianan. Parigattam nakuan si Jesus. Ari tam kayà nga ipatageno ta kapangngurug tam nga awan tu sesserbi da onu mepasiranan ira megafu ta ari da makua i kagitta na makua na tanakuan. Kanayuttam  nakuan nga komendan i wawwaragi tam ta kukukuadda i kapianan ta passerbi kani Jehova.

15-16. Kunnasi nga nabbenefisio i tadday nga sister ta realistiko ira nga addetan nga ninono na?

¹⁵ Mapeggan tu direksion anna gakkag i pattolay tam nu egga i espiritual ira nga addetattam. Ngem ibase tam nakuan i espiritual nga addetattam ta sarili tam nga abilidad anna situasion, ari tu ta tanakuan. Ariattam gare kayà nga madismaya anna makkafi i nono tam. (Luc. 14:28) Kunnatun i nesimmu ta payunir nga si Sister Midori.

¹⁶ Ari nga Saksi i yama ni Midori. Pinasa-pasiranan na yayya ta kabbinna tapus ikumpara na yayya ta wawwaragi na anna ta kaklase na. “Gitta na awan tu kwentà,” kunni Midori. Ngem ta paddakal na, nassikan i nono na. Kinagi na: “Kadaggaw ku nga bibbigan i Biblia tapenu memammo ngà anna matageno ku nga iddukan nà ni Jehova.” Realistiko gapa i ninono na ira nga addetan tapus espesipiko nga nipakimallo na danatun tapenu madde na. Yayya nga magayayya si Midori ta pinapprogreso na ta espiritual.

17. Kunnasi tam metulu-tuloy nga ‘talibaguan i appana-panono anna affutu-futu tam,’ anna anni i meyuffun danatun?

¹⁷ Ari insigida mawawan i negatibo nga panageno anna appana-panono tam. Yayya nga kunnaw i nitabarang ni Jehova: Tulu-tuloy nga “talibaguan nu i appana-panono anna affutu-futu nu.” (Efe. 4:23, 24) Tapenu makua tam yatun, mawag nga makimallo ittam, maggigiammu tu Biblia, anna mannono tu mapia. Tulu-tuloy nga kuammu danatun anna makkiddaw ka kani Jehova tu sikan. Uffunan naka na masanto nga espiritu tapenu malabanammu i tendensia nga ikumpara i baggim ta tanakuan. Uffunan naka paga ni Jehova tapenu  makannammuammu nu minappassil ka onu minappakatannang ka anna uffunan naka nga magangngua insigida tu panguloli.

18. Ngatta mabbanna-bannayakka ta 2 Cronicas 6:29, 30?

¹⁸ Bibbigan i 2 Cronicas 6:29, 30. Ammu ni Jehova i mayan na futu tam. Ammu na gapa i pakarigatattam ira. Nelagum ngana tatun i pakillabattam ta marake ira nga influwensia ta mundo anna ta pakkafiattam ira. Nu masingan ni Jehova i pangikagumattam nga labanan i marake ira nga influwensia, mas ayatan na ittam.

19. Ta anni nga nigitta ni Jehova i pangaya na nittam?

¹⁹ Tapenu mepalippawa ni Jehova nittam nu anni i mataga-tageno na nittam, niyusa na i angngarigan meyannung ta pangaya na tadday nga yena ta beybi na. (Isa. 49:15) Ikonsidera tam i naekspiriensa na yena nga si Rachel. Nitura na: “Neyana nga premature i ana ku nga si Stephanie. Ta ollu nga pakasingakku nisa, balabaddi yayya anna kakkabbi. Ngem pinamavulunan nà na doktor nga magabbay yayya kadaggaw ta ollu nga vulan na ta incubator. Megafu tatun, talaga naddukko kami na ana ku. Annam ngana i dagun na sangawe anna mas baddi yayya kumpara ta kasiddagunan na ira. Ngem kuruga ayatakku yayya megafu ta narigi-rigatan yayya tapenu laman matolay. Kuruga mamagayayya yayya niakan!” Kunnatun i konag na pangaya ni Jehova nittam nu masingi-singan na nga kukukuattam i kapianan maski nu marigi-rigatan ittam. Talaga makapabannay yatun!

20. Ngatta magayayya i aripan ira ni Jehova?

²⁰ Megafu ta aripakka ni Jehova, nabalor ka nga parte na familia na anna awan tu kagittam. Ari naka nga niyaranni ni Jehova nisa megafu ta mas malalaki ka ta tanakuan. Niyaranni naka megafu ta nasingan na nga minappakalinno ka anna sigga-parakka nga mappetuddu anna mappamolde nisa. (Sal. 25:9) Makasiguradu ka nga appresian na nu kuammu i kapianan tapenu passerbian yayya. Ipasingan gapa na pagattattam anna kinamatalo mu nga ‘marenu anna napasikkal i affutu-futum.’ (Luc. 8:15) Yayya nga kanayummu nakuan nga iyawa i kapianammu para kani Jehova tapenu ‘magayayya ka lagapa ta kukukuammu.’