1. Apay a dinatayo ikomkompara ni Jehova iti sabsabali?

MAGUSTUAN ni Jehova ti panagduduma ti bambanag. Nalawag daytoy kadagiti parsuana, a pakairamanan ti tattao. Awan kapadpada ti tunggal maysa kadatayo. Isu a dinaka pulos ikompara ni Jehova iti sabsabali. Suksukimatenna ti pusom, ti makin-uneg a kinataom. (1 Sam. 16:7) Ikabkabilanganna met dagiti paglaingan, pagkapuyan, ken ti pannakapadakkelmo. Ken dina kidkiddawen ti ad-adu ngem iti maipaaymo. Masapul a tuladentayo ti panangmatmat ni Jehova kadatayo. Iti kasta, ‘nasimbeng ti panunottayo,’ a saantayo a panunoten a nakangatngatotayo wenno nakababbabatayo.​—Roma 12:3.

2. Apay a saan a nasayaat nga ikomparatayo ti bagitayo iti sabsabali?

² Siempre, mabalin a magunggonaantayo no obserbarantayo ti nasayaat nga ulidan dagiti matalek a kakabsat a nabunga iti ministerio. (Heb. 13:7) Baka adda makitatayo kadakuada a pamay-an tapno agbalintayo a mas epektibo iti ministerio. (Fil. 3:17) Ngem ti panangtuladmo iti nasayaat nga ulidan ti maysa ket naiduma iti panangikomparam iti bagim kadakuada. No ikomparam ti bagim kadakuada, baka mariknam ti apal, pannakaupay, wenno kinaawan serserbi. Kas iti nasursurotayo iti napalabas nga artikulo, madadael ti espiritualidadtayo no makikompetensiatayo iti dadduma a kakabsat iti kongregasion. Isu a siaayat nga iparegta kadatayo ni Jehova: “Sukimaten koma ti tunggal maysa dagiti aramidna tapno addanto panggapuanna nga agrag-o kadagiti aramidna, ken saan a gapu iti panangikomparana iti bagina iti sabali.”​—Gal. 6:4.

3. Ania a naespirituan a panagrang-aymo ti nangparagsak kenka?

³ Kayat ni Jehova a naragsakka iti naespirituan nga irarang-aymo.  Kas pagarigan, no bautisadokan, nakaragragsakka la ketdi ta naragpatmon dayta a kalat! Inaramidmo dayta a desision a bukbukodmo. Imbasarmo dayta a desisionmo iti ayatmo iti Dios. Panunotem dagiti nagrang-ayam sipud idi. Kas pagarigan, immuneg kadi ti panangipategmo iti personal a panagbasa ken panagadal iti Biblia? Nagbalin kadi a mas naimpusuan dagiti kararagmo? (Sal. 141:2) Mas natural kadin ti pannakisaritam no mangaskasabaka ken mas epektibon ti panangusarmo kadagiti tool para iti ministerio? Ket no adda pamiliam, nagbalinka kadi a nasaysayaat nga asawa a lalaki, asawa a babai, wenno nagannak gapu iti tulong ni Jehova? Maragsakanka la ketdi ken kontentoka kadagita a nagrang-ayam.

4. Ania ti usigentayo iti daytoy nga artikulo?

⁴ Matulongantay ti dadduma nga agrag-o iti naespirituan nga irarang-ayda. Matulongantay met ida a saan a mangikompara iti bagida iti sabsabali. Iti daytoy nga artikulo, makitatayo no kasano a matulongan dagiti nagannak ti annakda, no kasano nga agtinnulong ti agassawa, ken no kasano a dagiti panglakayen ken ti dadduma matulonganda dagiti kapammatianda. Kamaudiananna, usigentayo ti dadduma a prinsipio ti Biblia a makatulong iti panangaramidtayo kadagiti rasonable a kalat sigun iti abilidad ken kasasaad ti tunggal maysa kadatayo.

5. Sigun iti Efeso 6:4, ania koma ti liklikan dagiti nagannak?

⁵ Saan koma nga ikompara dagiti nagannak ti anakda iti sabali wenno ekspektarenda nga ad-adu ti maaramidanna ngem iti kayana. No aramidenda dagita, mabalin a maupay ti anakda. (Basaen ti Efeso 6:4.) Kinuna ti sister nga agnagan Sachiko: * “Ekspektaren idi dagiti titserko a nalalaingak ngem kadagiti kaklasek. Kayat met idi ni nanangko a lalaingek ti ageskuela tapno agbilib kadagiti Saksi dagiti titserko ken ni tatangko a saan a Saksi. Kinapudnona, kayatna a 100 porsiento ti maalak kadagiti eksam, ngem imposible dayta. Nupay nabayagen a nalpas ti panageskuelak, adda pay la dagiti tiempo a mariknak a baka saan a maragsakan kaniak ni Jehova uray no ar-aramidek ti kasayaatan.”

6. Ania ti masursuro dagiti nagannak iti Salmo 131:1, 2?

⁶ Adda napateg a masursuro dagiti nagannak iti Salmo 131:1, 2. (Basaen.) Imbaga ni Ari David a saan nga “agambision kadagiti  nangato unay” wenno iti bambanag a narigatna a ragpaten. Ti kinapakumbaba ken kinaemmana ti ‘namagkalma ken namagtalna’ kenkuana. Ania ti masursuro dagiti nagannak iti imbaga ni David? Maipakita dagiti nagannak ti kinapakumbaba ken kinaemma saan laeng nga iti ekspektarenda iti bagida no di pay ket iti ekspektarenda iti anakda. Maipariknada a napateg ti anakda no bigbigenda dagiti paglaingan ken pagkapuyanna sa tulonganda a mangaramid kadagiti kalat a kayana a ragpaten. Malagip ti sister nga agnagan Marina: “Dinak pulos inkomkompara ni nanangko iti tallo a kakabsatko wenno iti dadduma nga ubbing. Insurona kaniak nga agduduma ti abilidad ti tunggal maysa ken napategtayo amin ken Jehova. Gapu kenkuana, manmano nga ikomparak ti bagik iti sabsabali.”

7-8. Kasano a maipakita ti asawa a lalaki a padpadayawanna ni baketna?

⁷ Masapul a padayawan ti Kristiano nga asawa a lalaki ni baketna. (1 Ped. 3:7) Karaman iti dayta ti panangipaay iti espesial nga atension ken respeto kenkuana. Kas pagarigan, padpadayawan ti asawa a lalaki ni baketna no resrespetuenna. Dina kiddawen ti ad-adu ngem iti kabaelanna. Ken dina pulos ikompara ni baketna iti sabali a babbai. No aramidenna ti kasta a panangikompara, ania ti mabalin nga epekto dayta? Ti saan a Saksi nga asawa ti sister nga agnagan Rosa masansan nga ikomparana isuna iti sabali a babbai. Gapu iti nasakit a sasao ni lakayna, nakababbaba ti panagkitana iti bagina. Imbaga ni Rosa: “Kasapulak ti kanayon a pammasiguro nga ipatpategnak ni Jehova.” Iti sabali a bangir, ti Kristiano nga asawa a lalaki padpadayawanna ni baketna. Ammona a nasayaat ti epekto dayta iti relasionna ken baketna ken iti relasionna ken Jehova. *

⁸ Ti asawa a lalaki a mangpadpadayaw ken baketna ipakaammona iti sabsabali ti apresasionna kenkuana, ipasiguradona nga ay-ayatenna, ken komendaranna. (Prov. 31:28) Kasta ti ar-aramiden ti asawa ni Katerina, a nadakamat iti napalabas nga artikulo. Gapu iti dayta, natulongan a mangbalbaliw iti nababa a panagkitana iti bagina. Idi ngamin ubing ni Katerina, tinagtagibassit ni nanangna, a masansan a mangikompara kenkuana iti dadduma nga ubbing, a pakairamanan dagiti gagayyemna. Kas resultana, ikomkomparana metten ti bagina iti sabsabali​—uray idi nagbalinen a Saksi! Ngem tinulongan isuna ti Kristiano nga asawana tapno malabananna dayta a tendensia ken agbalin a mas rasonable iti panagkitana iti bagina. Kinunana: “Ay-ayatennak ni lakayko, komkomendaranna ti nasayaat a maar-aramidak, ken ikarkararagannak. Ipalpalagipna met dagiti nagsayaat a kualidad ni Jehova ken tultulongannak a mangkorehir iti negatibo a panagpampanunotko.”

9-10. Kasano a tinulongan dagiti nadungngo a panglakayen ti maysa a sister a manglaban iti tendensiana a mangikompara iti bagina iti sabsabali?

⁹ Kasano a matulongan dagiti panglakayen dagidiay adda tendensiada a mangikompara iti bagida iti sabsabali? Usigentayo ti kapadasan ti sister nga agnagan Hanuni, a manmano a makomendaran idi ubing. Malagipna: “Managbabainak idi, ket panagriknak, nalalaing ngem siak ti dadduma nga ubbing. Isu nga ikomkomparak ti bagik iti sabsabali.” Uray idi naammuanen ni Hanuni ti kinapudno, ikomkomparana pay laeng ti bagina iti sabsabali. Gapu iti dayta, impagarupna a bassit ti pategna iti kongregasion. Ngem agserserbi itan kas naragsak a payunir. Ania ti nakatulong tapno agbalbaliw ti panangmatmatna?

 ¹⁰ Imbaga ni Hanuni a timmulong kenkuana dagiti nadungngo a panglakayen. Imbagada a napateg isuna a paset ti kongregasion ken kinomendaranda ti kinamatalekna. Insuratna: “Adda dagiti gundaway a kiddawen dagiti panglakayen a paregtaek ti dadduma a sister nga agkasapulan iti tulong. Gapu iti dayta, nariknak a napategak. Malagipko idi nagyaman kaniak dagiti nadungngo a panglakayen gapu iti panangparegtak iti dadduma nga ub-ubing a sister. Sa imbasada kaniak ti 1 Tesalonica 1:2, 3. Anian a ragsakko iti dayta! Agyamanak unay kadagidiay a nasayaat a pastor. Ipatpategko itan ti papelko iti organisasion ni Jehova.”

11. Kasano a matulongantayo “dagiti marigrigatan ken nanumo,” kas nailadawan iti Isaias 57:15?

¹¹ Basaen ti Isaias 57:15. Maseknan unay ni Jehova kadagiti “marigrigatan ken nanumo.” Amintayo, saan laeng a dagiti panglakayen, ket makatulong a mangparegta kadagitoy a patpatgentayo a kakabsat. Ti maysa a pamay-an a maparegtatayo ida ket ti panangipakita kadakuada iti naimpusuan nga interes. Kayat ni Jehova nga ipakitatayo ti ayatna kadagiti ipatpategna a karnero. (Prov. 19:17) Matulongantayo met dagiti kakabsattayo no agbalintayo a napakumbaba ken naemma. Ditay kayat nga iturong ti atension iti bagitayo a mabalin a mangirugi iti panangapal kadatayo ti sabsabali. Imbes ketdi, usarentayo dagiti abilidadtayo ken ti pannakaammotayo tapno makapagpipinnaregtatayo.​—1 Ped. 4:10, 11.

12. Apay a dagiti nanumo magusgustuanda ni Jesus? (Kitaen ti ladawan iti akkub.)

¹² Adu ti masursurotayo iti panangtrato ni Jesus kadagiti pasurotna. Isu ti katan-okan pay laeng a tao a nagbiag. Ngem isu ket ‘naalumamay ken napakumbaba.’ (Mat. 11:28-30) Dina impalastog ti kasta unay a kinalaingna ken ti adu a pannakaammona. Nangisuro babaen ti simple a sasao ken nalaka a maawatan nga ilustrasion a nangtukay iti puso dagiti nanumo. (Luc. 10:21) Naiduma ni Jesus kadagiti napannakkel a lider ti relihion ta dina pulos imparikna iti sabsabali a nababa ti pategda iti Dios. (Juan 6:37) Imbes ketdi, rinespetona dagiti ordinario a tattao.

13. Kasano nga impakita ni Jesus ti kinaimbag ken ayat iti pannakilangenna kadagiti adalanna?

¹³ Nakita ti kinaimbag ken ayat ni Jesus iti pannakilangenna kadagiti adalanna. Ammona a nagduduma ti abilidad ken kasasaadda. Isu a saan nga agpapada a responsabilidad ti kabaelanda ken saan nga agpapada ti maaramidanda iti ministerio. Ngem inapresiarna ti amin-kararua a panagregget ti tunggal maysa. Makita a mannakaawat ni Jesus iti ilustrasionna maipapan kadagiti talento. Iti dayta nga ilustrasion, inikkan ti apo ti tunggal adipen iti trabaho “sigun iti abilidadda.” Ad-adu ti naganansia ti maysa kadagiti dua a nagaget nga adipen. Ngem agpada ti komendasion kadakuada ti apoda: “Nasayaat ti inaramidmo, naimbag ken matalek nga adipen!”​—Mat. 25:14-23.

14. Kasanotayo a matulad ti panangtrato ni Jesus iti sabsabali?

¹⁴ Naimbag ken naayat ti pannakilangen ni Jesus kadatayo. Ammona nga agduduma ti abilidad ken kasasaadtayo, ken maragsakan no ipaaytayo ti kasayaatan a maaramidantayo. Masapul a tuladentayo ti panangtrato ni Jesus iti sabsabali. Ditay koma pulos iparikna iti maysa a kapammatiantayo nga awan serserbina wenno agbain ta bassit ti maar-aramidanna no ikompara iti sabsabali. Imbes ketdi, mangbiroktayo kadagiti gundaway a mangkomendar kadagiti kakabsattayo gapu iti panangaramidda iti kasayaatanda iti panagserbida ken Jehova.

15-16. Kasano a nagunggonaan ti maysa a sister iti panangaramidna kadagiti rasonable a kalat?

¹⁵ Adda direksion ken panggep ti biagtayo no adda dagiti naespirituan a kalattayo. Ngem ti tulbek ket ti panangaramidtayo kadagiti kalat sigun iti bukodtayo nga abilidad ken kasasaad, saan nga iti kalat ti sabsabali. Saantayo a kayat ti mapaay ken maupay. (Luc. 14:28) Usigentayo ti ulidan ti payunir a sister nga agnagan Midori.

¹⁶ Saan a Saksi ti ama ni Midori. Pabpabainanna ni Midori idi ubing pay babaen ti panangikomparana kenkuana kadagiti kakabsatna ken kaklasena. “Nariknak nga awan serserbik,” imbaga ni Midori. Ngem bayat a dumakdakkel, naaddaan iti kompiansa iti bagina. Imbagana, “Inaldaw a basbasaek ti Biblia tapno agkalma ti pusok ket mariknak nga ay-ayatennak ni Jehova.” Nangaramid met kadagiti rasonable a kalat. Ken espesipiko nga inkararagna ti tulong tapno maragpatna dagita a kalat. Kas resultana, nagrag-o ni Midori iti naespirituan a panagrang-ayna.

17. Kasanotayo a ‘maitultuloy a pabaruen ti puersa a mangiturturong iti panunottayo,’ ken ania dagiti resulta dayta?

¹⁷ Saan a kaskarina a maikkat ti negatibo a rikrikna ken panagpampanunot. Isu nga imparegta kadatayo ni Jehova: “Masapul nga itultuloyyo a pabaruen ti puersa a mangiturturong iti panunotyo.” (Efe. 4:23, 24) Ngem tapno maaramidantayo dayta, masapul nga agkararagtayo, agadal iti Sao ti Dios, ken agutob. Kanayon nga aramidem dagita, ket kiddawem ken Jehova a pabilgennaka. Tulongannaka ti nasantuan nga espirituna tapno malabanam ti aniaman a tendensia a mangikompara iti bagim iti sabsabali. Tulongannaka met ni Jehova  a mangbigbig ken insigida a mangparut iti apal wenno kinapannakkel no mangrugrugin nga agtubo dagita iti pusom.

18. Kasano a maliwliwaka iti kuna ti 2 Cronicas 6:29, 30?

¹⁸ Basaen ti 2 Cronicas 6:29, 30. Ammo ni Jehova ti linaon ti pusotayo. Ammona met dagiti panagreggettayo​—ti pananglabantayo iti espiritu ti lubong ken iti bukodtayo a kinaimperpekto. Bayat a makitkita ni Jehova ti panangikagumaantayo a manglaban kadagita a negatibo nga impluensia, ad-adda met nga ayatennatayo.

19. Kasano nga inyilustrar ni Jehova ti marikriknana maipapan kadatayo?

¹⁹ Inusar ni Jehova ti dungngo ti maysa nga ina iti maladagana kas panangyilustrar iti marikriknana maipapan kadatayo. (Isa. 49:15) Kitaentayo ti ulidan ti ina nga agnagan Rachel. Insuratna: “Kurang ti bulan ni Stephanie idi inyanakko. Idi damok a makita, nakabasbassit ken nakakaasi. Ngem iti umuna a bulan a kaaddana iti incubator, impalubos ti ospital nga inaldaw nga ubbaek. Dagita a kanito ti nakatulong tapno suminged ti riknami iti maysa ken maysa. Innem ti tawenna itan ket basbassit ngem kadagiti kaedadna. Nupay kasta, ay-ayatek unay gapu ta inkarkarigatanna ti agbiag, ket kasta unay a ragsak ti inyegna iti biagko!” Anian a makaliwliwa a maammuan a kasta ti kauneg ti panagayat ni Jehova kadatayo no makitkitana nga ikarkarigatantayo ti agserbi kenkuana iti amin-kararua!

20. Kas dedikado nga adipen ni Jehova, ania ti panggapuam nga agrag-o?

²⁰ Kas adipen ni Jehova, awan kapadam ken napategka a miembro ti pamiliana. Inyasidegnaka ni Jehova kenkuana saan a gapu ta nalalaingka ngem iti sabali. Inaramidna dayta ta sinukimatna ti pusom ken nakitana a naemmaka ken nalakanaka nga isuro ken sukogen. (Sal. 25:9) Masiguradom nga apresiarenna ti panangaramidmo iti kasayaatan a maaramidam nga agserbi kenkuana. Ti panagibtur ken kinamatalekmo ket ebidensia nga addaanka iti “napasnek ken nasayaat a puso.” (Luc. 8:15) Isu nga itultuloymo nga ited ken Jehova ti kasayaatan a maaramidam. Iti kasta, adda panggapuam nga agrag-o ‘kadagiti aramidmo.’