1. Yehowa gaw anhte hpe kaga ni hte hpa majaw n shingdaw ai kun?

YEHOWA gaw amyu baw hkum sumhpa hpe tsawra ai. Dai hpe shi a mauhpa hpan da lam ni hte, shinggyim masha ni hpe yu nna chye lu ai. Anhte langai hpra gaw laklai ai ni re. Dai majaw Yehowa gaw nang hpe, kaga ni hte galoi n shingdaw ai. Na a myit masin hpe sha shi yu ai. (1 Sa 16:7) Nang hta nga ai n-gun atsam, gawng kya lam hte shingdu labau ni hpe mung shi chye ai. Nang jaw lu ai hta na grau jaw na matu, shi n hpyi shawn ai. Tinang hkum tinang Yehowa mu mada ai zawn mu mada nna, Yehowa hpe kasi la ra ai. Rai yang, tinang hkum tinang shajan shalai (sh) grit nem ai hku n myit ai sha, ram daw myit lu na re. ​—Rom 12:3.

2. Tinang hkum hpe kaga ni hte shingdaw ai gaw hpa majaw n kaja ai kun?

² Hkaw tsun bungli hta awng dang lam lu nga ai sadi dung ai hpunau (sh) nauna ni a kasi hpe yu nna mung akyu lu mai ai. (Heb 13:7) Hkaw tsun bungli hta grau tang du ai ladat ni hpe, shanhte kaw na anhte sharin la lu na re. (Hpl 3:17) Raitim, marai langai a kaja ai kasi hpe hkan sa ai hte, tinang hkum tinang shi hte shingdaw yu ai gaw n bung ai. Dai zawn shingdaw ai lam ni gaw, manawn ai myit, myit daw ai lam (sh) manu n dan ai ngu na pyi hkamsha shangun chye ai. Nawku hpung hta nga ai kaga ni hte shingjawng ai gaw, wenyi lam hta pyi hkra machyi shangun chye ai hpe shawng na sumhpa hta anhte hkaja wa sai. Dai majaw tsawra myit hte Yehowa anhte hpe ndai hku shadut da ai: “Langai hte langai gaw tinang a bungli hpe dinglik yu u ga; shaloi shi gaw masha kaga hta n rai, tinang hta sha gumrawng shara rai na ra ai.” ​—Gal 6:4.

3. Wenyi lam hta gara rawt jat ai lam ni gaw nang hpe kabu gara shangun ai kun?

³ Wenyi lam hta, na a masa hte maren nang rawt jat na kabu gara nga ai hpe Yehowa ra sharawng ai. Ga shadawn, nang hkalup hkam la ai ngu saga. Dai bandung de du lu ai majaw, kabu gara ging ai. Karai hpe tsawra ai na a tsawra myit hta madung  nna, dai dawdan lam hpe nang jahkrat wa ai re. Dai aten kaw nna, nang rawt jat wa ai lam ni hpe myit yu u. Ga shadawn, tinang hkrai Chyum Laika hti ai lamang hte, hkaja ai lamang hpe nang ra sharawng ai kun? Na a akyu hpyi ga ni gaw, masin salum kaw na rai nna grau lachyum nga wa ai kun? (Shk 141:2) Hkaw tsun bungli hta grau nna tsun shaga chye wa ai kun? Hkaw tsun bungli a matu hkingrai ni hpe grau nna tang du hkra akyu jashawn chye wa ai kun? Nang gaw dinghku hte re nga yang, grau kaja ai madu jan, madu wa, kanu kawa byin na matu Yehowa karum ya wa ai kun? Dai zawn rawt jat lam ni nang galaw lu wa ai majaw, myit dik nna kabu gara lu ai.

4. Ndai sumhpa hta hpa lam hkaja mat na kun?

⁴ Kaga ni mung shanhte a masa hta hkan nna rawt jat nga ai lam hta kabu gara lu hkra anhte karum ya lu ai. Kaga ni hte shanhte n shingdaw hkra galaw ya ai hku nna mung anhte karum ya mai ai. Kanu kawa ni gaw ma ni hpe gara hku karum ya lu ai, ningrum ningtau ni gaw shada da gara hku karum ya lu ai, myitsu salang ni hte kaga ni gaw hpunau nauna ni hpe gara hku karum ya lu ai lam ndai sumhpa hta hkaja lu na re. Hpang jahtum, tinang a masa lam hte atsam ningja hta hkan nna, du dep lu na bandung ni hpe gara hku jahkrat lu na lam hpe chye shangun na Chyum Laika npawt tara nkau hpe hkaja mat na re.

5. Ehpesu 6:4 hku nga yang, kanu kawa ni gaw hpa hpe koi ging ai kun?

⁵ Kanu kawa ni gaw, ma langai hte langai hpe n shingdaw ging ai. Shing nrai, galaw lu ai hta na grau galaw na matu, n mai hpyi shawn ai. N htap htuk ai shingdaw lam, hpyi shawn ai lam ni gaw ma ni hpe myit daw shangun ai. (Ehpesu 6:4 hpe hti u.) Nauna Sachyiko * ndai hku tsun ai: “Jawng manang ni hta na grau ram ai wa byin na matu, sara ni gaw ngai hpe myit mada ai. Anu mung ngai hpe jawng hta atsawm nga shangun mayu ai. Rai yang she, sara hte makam masham n bung ai awa hpe sakse hkam lu na re. Dai sha n-ga anu gaw, jawng san poi htai ai shaloi mung tsep kawp n shut shangun mayu ai. Raitim, dai gaw n mai byin ai. Jawng ngut mat ai na sai raitim, Yehowa a matu kaja htum gaw galaw ya nga ai kun? ngu na ngai myit tsang nga ai.”

6. Shakawn Kungdawn 131:1, 2 kaw na kanu kawa ni hpa sharin la lu ai kun?

⁶ Kanu kawa ni a matu grai kaja ai hpaji jaw ga hpe, Shakawn Kungdawn 131: 1, 2 (Hti u.) hta mu lu ai. Hkawhkam Dawi gaw, shi hte “n ging ai amu” (sh) “mauhpa bungli” hpe n tam ai ngu na shi tsun ai. Shi a shagrit shanem ai lam  gaw, shi hpe simsa shangun ai. Dawi tsun ai ga ni kaw na kanu kawa ni hpa sharin la lu ai kun? Kanu kawa ni hku na, tinang hkum tinang mung, tinang a ma ni hpe mung ladu lai n myit mada ai hku na, shagrit shanem ai myit madun mai ai. Ma ni a n-gun atsam hte gawngkya ai lam hta hkan nna, htap htuk ai bandung ni jahkrat lu hkra, ma ni hpe kanu kawa ni karum ya mai ai. Nauna Marina ndai hku tsun ai: “Nu gaw nye a kahpu kanau masum (sh) kaga ma ni hte ngai hpe galoi n shingdaw ai. Langai hpra hta galaw lu ai atsam ningja n bung ai, langai hpra gaw Yehowa a matu manu dan ai ngu ai lam shi sharin ya ai. Tinang hkum tinang kaga ni hte ngai nau n shingdaw ai. Anu hpe grai chyeju dum ai.”

7-8. Madu wa gaw madu jan hpe gara hku shagrau mai ai kun?

⁷ Hkristan madu wa gaw, madu jan hpe shagrau ra ai. (1 Pe 3:7) Shagrau ai ngu ai hta, atsawm sha madat ya ai lam hte hkungga ai lam ni lawm ai. Ga shadawn, madu wa gaw madu jan hpe ahkyak shatai ai hku nna shagrau mai ai. Madu jan jaw lu ai hta grau nna jaw na matu n hpyi shawn ai. Kaga num ni hte mung n shingdaw ai. Madu wa gaw dai hku shingdaw ai nga yang hpa byin wa chye ai kun? Madu wa Sakse Hkam n re ai nauna Rosa gaw, kaga num ni hte shingdaw ai chyahkring hkring hkrum ai. Madu wa a mazut ai ga ni gaw, nauna Rosa a tinang hkum tinang kam ai myit hpe yawm shangun ai. Nauna ndai hku tsun ai: “Yehowa ngai hpe manu shadan ai hpe, ngai chyahkring hkring bai shadum la ra ai.” Madu jan hpe shagrau na lit, Hkristan madu wa ni hta nga ai. Tinang galaw ai lam gaw, madu jan hte hku hkau lam, Yehowa hte hku hkau lam hpe hkra machyi shangun lu ai hpe madu wa chye ai. *

⁸ Madu jan hpe shagrau ai madu wa gaw, madu jan hpe shakawn ai, tsawra ai lam madun ai, manu shadan ai lam madun ai. (Gsh 31:28, 29) Shawng na sumhpa hta hkaja wa sai nauna Katarina a madu wa gaw, dai hte maren galaw wa ai. Dai majaw nauna gaw, manu n dan ai ngu ai hkamsha lam ni hpe tawt lai lu wa ai. Ma prat hta shi a kanu gaw, kaga mahkawn ni, shi a manang ni hte pyi shingdaw nna myit kaji hkra galaw ai. Dai majaw Katarina gaw, teng man ai lam hta du ai hpang hta pyi, shi hkum shi kaga ni hte shingdaw na nga chye ai. Raitim, shi a Hkristan madun wa gaw, shi a myit jasat hpe gasat na matu, shi hkum shi rapra ai hku mu mada chye wa hkra karum ya wa ai. Nauna ndai hku tsun ai: “Shi ngai hpe tsawra ai. Ngai galaw ai kaja ai lam ni a matu shakawn ya ai. Nye a matu akyu hpyi ya ai. Yehowa hta nga ai laklai ai atsam ningja ni hpe bai shadum ya nna, nye a n kaja ai myit mang lam hpe mung sharai ya ai.”

9-10. Kaga ni hte shingdaw chye ai akyang nga ai nauna langai hpe tsawra myit rawng ai myitsu salang ni gara hku karum ya wa ai kun?

⁹ Tinang hkum tinang kaga ni hte shingdaw chye ai ni hpe myitsu salang ni gara hku karum ya mai na kun? Ma prat hta nau n shakawn hkrum wa ai nauna Hanune a mahkrum madup hpe myit yu ga. Shi ndai hku tsun ai: “Ngai gaw kaya chye ai. Kaga ma ni gaw ngai hta grau ai ngu na hkamsha ai. Ma kaji prat kaw nna ngai gaw kaga ni hte shingdaw wa ai.” Teng man lam hta du nga sai raitim pyi, Hanune gaw shi hkum shi kaga ni hte shingdaw taw nga ai. Dai majaw, nawku hpung hta nau manu n dan ai ngu na shi hkamsha ai. Rai ti mung ya gaw, kabu gara ai hte ningshawng langai hku na magam gun nga ai. Galai shai lu hkra shi hpe hpa gaw karum ya wa ai kun?

 ¹⁰ Myitsu salang ni gaw shi hpe karum ya wa ai ngu Hanune tsun dan ai. Shi hpe kam ai lam tsun dan nna, shi a sadi dung ai kasi ningli hpe shakawn ya ai. Shi ndai hku tsun dan ai: “N-gun jaw lam ra nga ai nauna nkau hpe n-gun jaw na matu, myitsu salang ni gaw ngai hpe kalang lang karum hpyi ai. Ndai lit a majaw, ngai gaw akyu rawng ai ngu hkamsha ai. Asak kaji ai ramma nauna ni hpe ngai n-gun jaw ai hte seng nna, myitsu salang ni chyeju dum ai lam tsun ai hpe ngai naw dum ai. Shanhte gaw 1 Htesaloni 1:2, 3 hpe hti dan ai. Dai gaw ngai hpe grai kabu shangun ai. Yehowa a uhpung hta nye a shara hpe manu shadan chye sai. Tsawra myit nga ai dai myitsu salang ni hpe grai chyeju dum ai.”

11. Esaia 57:15 hta tsun da ai hte maren, “myit daw ai ni hte gawng run ai ni” hpe anhte gara hku karum ya mai na kun?

¹¹ Yehowa gaw “myit daw ai ni hte gawng run ai ni” hpe grai lanu lahku ai. (Esa 57:15, NW) Myitsu salang ni sha n-ga, anhte yawng gaw hpunau nauna ni hpe n-gun jaw nna karum ya lu ai. Shanhte hpe n-gun jaw mai ai lam langai gaw, myit lawm ai lam madun ai hku na re. Yehowa gaw shi a manu dan ai sagu ni hpe kade daram tsawra ai lam anhte hpe madun shangun mayu ai. (Gsh 19:17) Shagrit shanem ai lam madun ai hku nna, hpunau nauna ni hpe anhte karum ya mai ai. Tinang hpe kaga ni myit maju jung wa nna, manawn wa hkra n galaw ai. De a malai, anhte a atsam ningja ni hte machye machyang hpe shada da n-gun jaw na matu akyu jashawn ai. ​—1 Pe 4:10, 11.

12. Yu maya masha ni gaw Yesu hte hpa majaw arau nga mayu ai kun? (Makawp sumla hpe yu u.)

¹² Yesu gaw shi hpang hkan ai ni hpe gara hku kanawn mazum ai hpe hkaja nna, anhte kaga ni hpe gara hku kanawn mazum mai na lam sharin la lu ai. Yesu gaw asak hkrung wa ai yawng hta, grau htum ai shinggyim masha re. Raitim shi gaw, “myit sumnung ai hte myit gyip” ai. (Mat 11:28-30) Shi hta nga ai laklai ai nyan hpaji hte, grau htum ai machye machyang ni hpe shi n madun wa ai. Yu maya masha ni a masin hpe hkra shangun lu ai ga shadawn ni hte, yawng chye na ai ga ni hpe lang na sharin ya wa ai. (Luk 10:21) Yesu gaw gumrawng ai nawku htung ningbaw ni hte n bung ai. Kaga ni hpe Karai a matu manu n dan ai ngu hkamsha hkra shi n galaw wa ai. (Yhn 6:37) De a malai, masha ni hpe shi shagrau wa ai.

13. Yesu a tsawra myit hte matsan dum ai lam hpe, sape ni hpe kanawn mazum ai lam hta gara hku mu lu ai kun?

¹³ Yesu a tsawra myit hte matsan dum myit hpe shi a sape ni hte kanawn mazum ai lam hta mu lu ai. Sape ni hta n bung ai atsam ningja, n bung ai masa lam ni nga ai hpe shi chye ai. Dai majaw, lit ni hpe gunhpai ai shaloi langai hte langai n bung ai, hkaw tsun bungli hta awng dang ai lam mung n bung ai. Raitim, langai hpra a myit masin mahkra hte sak jaw ai lam hpe shi manu shadan wa ai. Dai hpe shi chye na ai lam, shi a gumhpraw ga shadawn hta mu lu ai. Ga shadawn hta madu gaw, mayam langai hpra a atsam hte maren bungli ap da ai. Bungli shakut galaw ai marai lahkawng hta na langai gaw, grau awng dang ai. Raitim madu gaw lahkawng yan hpe, “Ara, kaja ai hte sadi dung ai mayam e” ngu na maren sha shakawn wa ai.​—Mat 25:14-23.

14. Kaga ni hpe Yesu kanawn mazum ai lam hpe anhte gara hku kasi la mai na kun?

¹⁴ Anhte hpe mung Yesu gaw tsawra nna, matsan dum myit hte kanawn mazum ai. Anhte langai hpra a galaw lu ai atsam hte masa lam gaw n bung ai hpe shi chye ai. Rai ti mung, anhte a kaja htum hpe sak jaw na nga yang shi kabu ai. Anhte mung Yesu zawn sha, kaga ni hpe kanawn mazum ging ai. Hpunau nauna langai gaw kaga marai galaw ai daram n lu galaw ai majaw, shi hpe kaya mat hkra (sh) manu n dan ai ngu hkamsha hkra, anhte n galaw mayu ga ai. De a malai, Yehowa a matu hpunau nauna ni kaja htum sak jaw nga ai hpe shakawn ya na matu, ahkaw ahkang tam ga.

15-16. Nauna langai gaw shi du dep lu na bandung ni hpe jahkrat ai majaw gara hku akyu lu wa ai kun?

¹⁵ Wenyi bandung ni gaw anhte a prat hpe lam matsun ya nna, yaw shada lam nga shangun ai. Raitim bandung jahkrat ai shaloi, kaga ni hpe n yu ai sha, tinang a galaw lu ai atsam hte masa hta hkan nna jahkrat na matu ahkyak ai. Nrai yang, myit n pyaw ai lam ni, myit daw ai lam ni hpe pyi hkamsha wa chye ai. (Luk 14:28) Ningshawng nauna Midori a kasi hpe myit yu ga.

¹⁶ Midori a kawa gaw, Sakse Hkam n re. Midori kaji ai aten hta shi a kahpu kanau ni, jawng manang ni hte shi hpe shingdaw ai. “Ngai gaw manu n dan ai ngu hkamsha ai” ngu Midori tsun ai. Raitim, shi kaba wa ai shaloi gaw shi hkum shi kam ai myit hpe bai lu la ai. Shi ndai hku tsun ai: “Shani shagu ngai Chyum Laika hti ai. Dai majaw, ngai myit simsa ai. Yehowa ngai hpe tsawra ai hpe ngai kam ai.” Ngut na shi du dep lu na bandung ni hpe jahkrat ai. Dai bandung de du dep lu na matu mung, shi akyu hpyi ai. Dai majaw Midori gaw wenyi lam hta rawt jat wa nna kabu gara nga ai.

17. Anhte a “kraw lawang myit masin ni hpe tsep kawp ningnan matut shabyin lu” hkra gara hku galaw lu ai kun? Dai hku galaw yang, hpa akyu lu na kun?

¹⁷ N kaja ai myit mang lam ni hte hkamsha lam ni gaw, lana mi hte sha mat mat na n re. Dai majaw Yehowa ndai hku n-gun jaw da ai: “Nanhte a kraw lawang myit masin ni hpe tsep kawp ningnan matut shabyin lu na rai myit dai.” (Ehp 4:23, 24, NW) Dai hku galaw lu na matu, akyu hpyi ra ai, Karai a Mungga hkaja nna myit sawn sumru ra ai. Dai lam ni hpe matut galaw nga nna n-gun atsam a matu Yehowa kaw matut hpyi shawn nga u. Kaga ni hte shingdaw mayu ai myit hpe nang tawt lai lu hkra, shi a chyoi pra ai wenyi gaw karum ya na re. Nang hta manawn ai myit (sh) gumrawng ai myit nga wa ai hpe chye nna, dai hpe ru hte nawng baw kau lu hkra, Yehowa karum ya na re. Alawan galai shai lu hkra mung shi karum ya na re.

18. 2 Hkawhkam Labau 6:29, 30 hta mu lu ai ga ni gaw, nang hpe gara hku shalan shabran lam jaw ai kun?

 ¹⁸ 2 Hkawhkam Labau 6:29, 30 hpe hti u. Anhte a myit masin hpe Yehowa chye ai. Tinang nan a n hkum tsup ai lam hte, mungkan a myit jasat ni hpe shakut gasat nga ra ai hpe mung Yehowa chye ai. Dai zawn n kaja ai myit mang lam ni shingkang n ka-up hkrum na matu, anhte shakut let gasat nga ai hpe Yehowa mu ai shaloi, anhte hpe shi grau nna tsawra ai.

19. Anhte hte seng nna Yehowa gara hku hkamsha ai hpe, gara ga shadawn hte Yehowa tsun dan ai kun?

¹⁹ Anhte hte seng nna Yehowa gara hku hkamsha ai hpe chyena na matu, kanu hte ma chyangai kasha a lapran hta nga ai makyit sumri a lam hpe Yehowa tsun dan wa ai. (Esa 49:15) Ma kanu Rishe a kasi hpe myit yu ga. Shi ndai hku tsun ai: “Nye kasha Stehpani gaw shata n hpring ai sha shangai wa ai. Shi hpe shawng nnan ngai mu ai shaloi, shi gaw grai kaji taw nna, karum shingtau lam n nga taw ai. Shangai na shata mi laman hta, shani shagu shi hpe pawn ba na matu, sarawun gaw ahkang jaw ai. Dai aten ni gaw, an lahkawng a makyit sumri hpe grau ngang shangun ai. Ya, shi 6 ning rai sai. Shi hte asak bung ai ni hta na gaw grau kaji ai. Rai ti mung, shi hpe ngai tsawra htum re. Shi asak hkrung lu na matu grai shakut ra wa ai. Shi gaw ngai hpe kabu gara hkra galaw ya ai.” Yehowa hpe myit masin mahkra hte nawku lu na matu anhte shakut nga ai hpe shi mu ai shaloi, dai zawn tsawra myit hte anhte hpe tsawra ai hpe chye lu ai gaw, shalan shabran lam lu shangun ai n rai!

20. Yehowa hpe apnawng da ai mayam langai hku na, hpa lam a majaw nang kabu gara lu ai kun?

²⁰ Yehowa a mayam langai re ai nang gaw, Yehowa a dinghku hta laklai nna manu dan ai. Htingbu htingbyen ni hta na, nang grau kaja ai majaw Yehowa nang hpe laula ai n re. Na a myit masin hpe shi mu nna, shi sharin ya ai hpe nang hkap la na hpe chye ai majaw nang hpe laula ai re. (Shk 25:9) Nang kaja htum sak jaw nga ai hpe, Yehowa manu shadan ya ai hpe kam u. Nang hkam sharang nna sadi dung let magam gun nga ai gaw, “kaja ai hte madat mara ai myit masin” nga ai hpe madun ai re. (Luk 8:15, JCLB) Dai majaw, na a kaja htum hpe matut nna Yehowa hpe jaw u. Rai yang, tinang a bungli hta kabu gara lam hkam la lu na re.