29-زەرتتەۋ ماقالاسى
ٶز ىستەرىڭىزگە قۋانىڭىز!
«اركىم ٶز ٸس-ارەكەتىن تەكسەرسىن، سوندا ٶزىن باسقالارمەن سالىستىرماي، ٶز ىستەرىنە قۋانادى» (عال. 6:4).
34-ٵن مىنسىزدىك جولىمەن ٴجۇرۋ
اڭداتپا *
1. نەلىكتەن ەحوبا ٴبىزدى وزگەلەرمەن سالىستىرمايدى؟
تابيعات الەمىنە قارايتىن بولساق، ەحوبانىڭ ارتۇرلىلىكتى سۇيەتىنىن كورەمىز. ادامدار دا ٵرتۇرلى، ٵرقايسىسى — دارا تۇلعا. سوندىقتان ەحوبا ٴبىزدى ەشقاشان ٴبىر-بىرىمىزبەن سالىستىرمايدى. ول ٴبىزدىڭ جۇرەگىمىزگە، ىشكى دۇنيەمىزگە نازار اۋدارادى (سام. 1-ج. 16:7). سونداي-اق ول مىقتى تۇستارىمىز بەن ٵلسىز تۇستارىمىزدى جانە قانداي ورتادان شىققانىمىزدى ەسكەرەدى. ول بىزدەن شامامىز كەلمەيتىندى تالاپ ەتپەيدى. ٴبىز دە وزىمىزگە ەحوبا سياقتى قاراۋدى ۇيرەنۋىمىز كەرەك. سوندا ەستى بولىپ، ٶزىمىز جايلى جوعارى دا، تومەن دە ويدا بولمايمىز (ريم. 12:3).
2. نەگە ٶزىمىزدى باسقالارمەن سالىستىرماۋىمىز كەرەك؟
2 باۋىرلاستاردىڭ جەمىستى قىزمەت ەتىپ جۇرگەندەرىن بايقاعانىمىز جاقسى، ارينە (ەۆر. 13:7). ويتكەنى ولاردىڭ ۇلگىسىنە قاراپ قىزمەتىمىزدى جاقسارتا الامىز (ٴفىلىپ. 3:17). الايدا باۋىرلاسىمىزدى ۇلگى ەتۋ ٴبىر باسقا، ٶزىمىزدى ونىمەن سالىستىرۋ ٴبىر باسقا. سالىستىرۋ بويىمىزدا قىزعانىش وياتۋى، كوڭىلىمىزدى ٴتۇسىرىپ، ٴتىپتى تۇككە تۇرعىسىز سەزىندىرۋى مۇمكىن. ال باۋىرلاستارمەن باقتالاساتىن بولساق، الدىڭعى ماقالادان بىلگەنىمىزدەي، رۋحاني كۇيرەۋىمىز مۇمكىن. سوندىقتان دا ەحوبا بىزگە بىلاي دەپ كەڭەس بەرەدى: «اركىم ٶز ٸس-ارەكەتىن تەكسەرسىن، سوندا ٶزىن باسقالارمەن سالىستىرماي، ٶز ىستەرىنە قۋانادى» (عال. 6:4).
3. ٴسىز شىندىق جولىنداعى قانداي جەتىستىكتەرىڭىزگە قۋاناسىز؟
3 ەحوبا ٴسىزدىڭ شىندىق جولىنداعى ٶز جەتىستىكتەرىڭىزگە قاراپ قۋانعانىڭىزدى قالايدى. مىسالى، شومىلدىرۋ راسىمىنەن وتكەنىڭىزدە، كەرەمەت ماقساتقا قول جەتكىزدىڭىز. بۇل ماڭىزدى شەشىمدى ٴسىز ەحوبانى سۇيگەندىكتەن جاسادىڭىز. ەندى سودان بەرى قالاي رۋحاني وسكەنىڭىزدى ويلاپ كورىڭىزشى. مىسالى، كيەلى كىتاپتى ٴسۇيىپ وقيتىن بولدىڭىز. جەكە زەرتتەۋىڭىز دە تەرەڭدەي ٴتۇستى. دۇعالارىڭىز دا ٴمان-ماعىناعا تولى (ٴزاب. 141:2). قىزمەتتە ادامدارمەن جاقسى اڭگىمە باستاپ، ٴتالىم بەرۋ قۇرالدارىن دا ٴتيىمدى پايدالاناتىن بولدىڭىز. ەگەر وتباسىلى بولساڭىز، ەحوبانىڭ كومەگىمەن جاقسى وتاعاسى، جاقسى ايەل، جاقسى اتا-انا بولۋدى ۇيرەنگەن شىعارسىز. ٴسىز ٶمىردىڭ ٵرتۇرلى سالالارىندا جاقسارىپ جاتقانىڭىزعا قۋانىپ، قاناعات سەزىنە الاسىز.
4. بۇل ماقالا نە جايلى بولماق؟
4 ٴبىز دە باۋىرلاستارعا ٶزىن وزگەلەرمەن سالىستىرماي، ٶز جەتىستىكتەرىنە قۋانۋعا كومەكتەسە الامىز. مىسالى، اتا-انالار بالالارىنا، ەرلى-زايىپتىلار ٴبىر-بىرىنە، اقساقالدار مەن باسقا باۋىرلاستار قاۋىمداعىلارعا قالاي كومەكتەسە الادى؟ ٶز جاعدايىمىزعا، ٶز قابىلەتتەرىمىزگە ساي ماقساتتار قويۋعا قانداي پرينسيپتەر كومەكتەسەدى؟ بۇل ماقالادا وسى سۇراقتارعا جاۋاپ الامىز.
اتا-انالار مەن ەرلى-زايىپتىلار نە ىستەي الادى؟
اتا-انالار، ٵر بالاڭىزدىڭ قوسىپ جاتقان ۇلەسىن باعالاڭىز (5، 6-ابزاستى قاراڭىز) *
5. ەفەستىكتەرگە 6:4 كە ساي، اتا-انالار نەدەن اۋلاق بولۋ كەرەك؟
5 اتا-انا بالالارىن ٴبىر-بىرىمەن سالىستىرۋدان جانە ولاردان شاماسى كەلمەيتىندى تالاپ ەتۋدەن اۋلاق بولۋ كەرەك. ويتكەنى بۇدان بالا ىزالانىپ نە ٴتۇڭىلىپ كەتۋى مۇمكىن (ەفەستىكتەرگە 6:4 وقىڭىز). ساحيكو * دەگەن ايەل باۋىرلاس بىلاي دەيدى: «مەكتەپتە مۇعالىمدەرىم مەنىڭ ۇزدىك وقۋشى بولعانىمدى قالايتىن. انام دا وسىنى تالاپ ەتەتىن، ويتكەنى بۇل سەنۋشى ەمەس اكەمە جانە مۇعالىمدەرىمە جاقسى كۋالىك بولادى دەيتىن. بۇعان قوسا، انام ەمتيحانداردا ەڭ جوعارى بال العانىمدى قالايتىن. ٴبىراق مەن ٷشىن بۇل مۇمكىن ەمەس ەدى. قازىر مەكتەپتى بىتىرگەلى ٴبىراز جىل ٶتتى. ەحوباعا بارىمدى سالىپ قىزمەت ەتسەم دە، ول ماعان ريزا ما ەكەن دەپ ۋايىمدايمىن».
6. ٴزابۇر 131:1، 2 دەگى سوزدەردەن اتا-انالار نە ۇيرەنە الادى؟
6 ٴزابۇر 131:1، 2 دە (وقىڭىز) اتا-انالار ٷشىن جاقسى كەڭەس بار. ٴداۋىت پاتشا: «تىم ۇلى ماقساتتارعا ۇمتىلمايمىن، ٵلىم جەتپەيتىن ىسپەن دە اينالىسپايمىن»،— دەگەن. كىشىپەيىل ٵرى قاراپايىم بولعاندىقتان، ونىڭ جانى تىنىش بولعان. وسى ورايدا اتا-انالار داۋىتكە ەلىكتەسە بولادى. كىشىپەيىل دە قاراپايىم اتا-انالار وزدەرىنەن عانا ەمەس، بالالارىنان دا كوپ نارسە تالاپ ەتپەيدى. ولار بالالارىنىڭ مىقتى جانە ٵلسىز تۇستارىن ەسكەرىپ، ولارعا قولجەتىمدى ماقساتتار قويۋعا كومەكتەسە الادى. مارينا دەگەن ايەل باۋىرلاس بىلاي دەپ ەسىنە الادى: «انام مەنى ەشقاشان ٷش باۋىرىممەن نە باسقا بالالارمەن سالىستىرمايتىن. ول ٵربىر ادامنىڭ وزىنە ٴتان قابىلەت-دارىنى بار جانە بارلىعىمىز ەحوبا ٷشىن باعالىمىز دەپ ۇيرەتەتىن. سونىڭ ارقاسىندا مەن قازىر ٶزىمدى وزگەلەرمەن سالىستىرمايمىن».
7، 8. ايەلىن قۇرمەتتەيتىن كۇيەۋ قانداي بولادى؟
7 ٴماسىشى كۇيەۋلەر ايەلدەرىنە قۇرمەت كورسەتۋلەرى كەرەك (پەت. 1-ح. 3:7). ايەلىن قۇرمەتتەيتىن كۇيەۋ ونى سيلايدى، باعالايدى. ودان شاماسى جەتپەيتىن نارسەنى تالاپ ەتپەيدى. سونداي-اق ونى وزگە ايەلدەرمەن سالىستىرمايدى. ال سالىستىرسا، بۇل ايەلىنە قالاي اسەر ەتەدى؟ روزا دەگەن باۋىرلاسىمىزدى كۋاگەر ەمەس كۇيەۋى باسقا ايەلدەرمەن كوپ سالىستىرادى ەكەن. كۇيەۋىنىڭ اۋىر سوزدەرىنەن كەيىن، روزا وزىنە دەگەن سەنىمدىلىگىن جوعالتقان. «مەن ەحوبا ٷشىن باعالى ەكەنىمدى قايتا-قايتا ەسىمە ٴتۇسىرىپ وتىرۋىم كەرەك»،— دەيدى ول. الايدا ٴماسىحشى كۇيەۋلەر بۇلاي ەتپەيدى. ويتكەنى بۇل ايەلىمەن جانە ەحوبامەن قارىم-قاتىناسىنا اسەر ەتەتىنىن جاقسى تۇسىنەدى *.
8 ايەلىن قۇرمەتتەيتىن كۇيەۋ ول تۋرالى جاقسى سوزدەر ايتادى، ماقتايدى، جاقسى كورەتىنىن، باعالايتىنىن ايتىپ وتىرادى (ناق. س. 31:28). الدىڭعى ماقالادا ايتىلعان كاتەرينا باۋىرلاستىڭ كۇيەۋى وسىلاي ەتەدى ەكەن. كاتەرينانى كىشكەنتاي كەزىندە اناسى باسقا قىزدارمەن، ٴتىپتى دوستارىمەن سالىستىرىپ، كەمسىتە بەرگەن. كاتەرينا شىندىققا كەلگەننەن كەيىن دە ٶزىن وزگەلەرمەن سالىستىراتىن بولعان. سودان وزىنە دەگەن قادىر-قاسيەتىن جوعالتقان. ٴبىراق ٴماسىحشى كۇيەۋى وعان وسى بەيىمدىلىگىمەن كۇرەسۋگە جانە ٶزى تۋرالى دۇرىس ويدا بولۋعا كومەكتەسكەن. كاتەرينا بىلاي دەيدى: «كۇيەۋىم مەنى سۇيەدى، جاقسى ىستەرىم ٷشىن ماقتاپ وتىرادى ٵرى مەن ٷشىن دۇعا ەتەدى. سونداي-اق ول ەحوبانىڭ كەرەمەت قاسيەتتەرىن ەسىمە سالىپ تۇرادى ٵرى جاعىمسىز ويلارعا بەرىلمەۋگە كومەكتەسەدى».
قامقور اقساقالدار مەن وزگەلەر نە ىستەي الادى؟
9، 10. ٶزىن باسقالارمەن سالىستىرىپ، ماڭىزسىز سەزىنگەن ايەل باۋىرلاسقا اقساقالدار قالاي كومەكتەستى؟
9 ٶزىن وزگەمەن سالىستىرۋعا بەيىم باۋىرلاستارعا اقساقالدار قالاي كومەكتەسە الادى؟ حانۋني دەگەن ايەل باۋىرلاسىمىز بالا كەزىندە ماقتاۋ ٴسوز ەستىمەي وسكەن ەكەن. «مەن وتە ۇيالشاق بولاتىنمىن جانە ٶزىمدى باسقا بالالاردان كەم سانايتىنمىن. ٶزىمدى وزگەلەرمەن سالىستىرا بەرەتىنمىن»،— دەيدى ول. ٴتىپتى شىندىققا كەلگەننەن كەيىن دە حانۋني ٶزىن باسقا باۋىرلاستارمەن سالىستىرىپ، قاۋىمعا كەرەكسىز سەزىنگەن ەكەن. ٴبىراق قازىر ول باقىتتى ٵرى ٸزاشارلىق قىزمەتىن قۋانا اتقارىپ ٴجۇر. وعان كوزقاراسىن وزگەرتۋگە نە كومەكتەستى؟
10 حانۋنيگە قامقور اقساقالدار كومەكتەستى. ولار وعان سەنىم ارتىپ، تاپسىرمالار بەردى، ادالدىعى ٷشىن ماقتادى. حانۋني بىلاي دەيدى: «اقساقالدار مەنەن بىرنەشە رەت جىگەرگە مۇقتاج ايەل باۋىرلاستارعا كوڭىل ٴبولۋدى ٶتىندى. وسىنداي كەزدە ٶزىمنىڭ قاۋىمعا كەرەك ەكەنىمدى سەزىنەتىنمىن. بىردە اقساقالدار مەنى بىرنەشە جاس قىز باۋىرلاسقا كومەكتەسكەنىم ٷشىن ماقتاپ، سالونيكالىقتارعا 1-حات 1:2، 3 ٴتى وقىپ بەردى. سول كەزدە جۇرەگىم ەلجىرەپ، ٶزىمدى شەكسىز باقىتتى سەزىندىم. وسىنداي تاماشا باعۋشىلارىمنىڭ بارىنا وتە ريزامىن. قازىر مەن ەحوبانىڭ ۇيىمىنداعى ورنىمدى قاتتى باعالايمىن».
11. بەيشارا ٵرى كۇيرەگەن جاندارعا قالاي كومەكتەسسەك بولادى؟ (يشايا 57:15)
11 يشايا 57:15 وقىڭىز. ەحوبا «بەيشارانىڭ رۋحىن، كۇيرەگەندەردىڭ جۇرەگىن» جانداندىرعىسى كەلەدى. وسىنداي باۋىرلاستارىمىزدى تەك اقساقالدار عانا ەمەس، ٴبارىمىز دە جىگەرلەندىرە الامىز. مۇنىڭ ٴبىر كەرەمەت جولى — ولارعا كوڭىل ٴبولۋ. ەحوبا وسى اسىل جانداردى جاقسى كورەتىنىن ٴبىز ارقىلى كورسەتكىسى كەلەدى (ناق. س. 19:17). سونداي-اق ٴبىز وسىنداي باۋىرلاستارمەن ارالاسقاندا كىشىپەيىل ٵرى قاراپايىم بولعىمىز كەلەدى. ويتكەنى ٶز قابىلەتتەرىمىزبەن ماقتانىپ، وزىمىزگە نازار اۋدارساق، ولاردىڭ بويىندا قىزعانىش تۋۋى مۇمكىن. ودان دا ٴبىلىمىمىزدى، قابىلەتىمىزدى ٴبىر-ٴبىرىمىزدى جىگەرلەندىرۋ ٷشىن قولدانايىق (پەت. 1-ح. 4:10، 11).
يسا ەشقاشان ٶزىن وزگەلەردەن جوعارى ۇستاماعان. شاكىرتتەرى ونىڭ قاسىندا وزدەرىن ەركىن سەزىنگەن. ول دوستارىمەن ارالاسىپ، ٴماز-مەيرام بولىپ وتىر (12-ابزاسىن قاراڭىز)
12. قاراپايىم ادامدار يسانى نە ٷشىن جاقسى كورگەن؟ (مۇقاباداعى سۋرەتتى قاراڭىز.)
12 يسانىڭ ٶز ٸزباسارلارىنا قالاي قاراعانىنان ٴبىز كوپ نارسە ۇيرەنە الامىز. ول جەر بەتىندە ٶمىر سۇرگەن ەڭ ۇلى تۇلعا بولسا دا، «جۇمساق ٵرى كىشىپەيىل» بولعان (مات. 11:28—30). ول ٴتىرى جاننىڭ ەشبىرىندە جوق ٴبىلىمى مەن دانالىعىن كورسەتىپ ماقتانا الار ەدى. ٴبىراق ول قاراپايىم ادامداردىڭ جۇرەگىنە جاقىن تىلدە سويلەپ، ولار بىردەن ۇعاتىن مىسالدار كەلتىرگەن (لۇقا 10:21). وركوكىرەك ٴدىني جەتەكشىلەردەن ايىرماشىلىعى، يسانىڭ الدىندا ادامدار وزدەرىن قۇداي ٷشىن باعالى ەكەندەرىن سەزىنگەن (جوح. 6:37). يسا قادىر-قاسيەتتەرىن كوتەرىپ، ولارعا قۇرمەتپەن قاراعان.
13. يسانىڭ شاكىرتتەرىنە دەگەن مەيىرىمدىلىگى مەن سۇيىسپەنشىلىگى نەدەن كورىندى؟
13 يسا شاكىرتتەرىنە مەيىرىممەن قارايتىن، سۇيىسپەنشىلىك تانىتاتىن. ولاردىڭ قابىلەتتەرى دە، جاعدايلارى دا ٵرتۇرلى ەكەنىن ەسكەرەتىن. يسا ٴبىر شاكىرتتىڭ ىستەگەنىنە باسقاسىنىڭ شاماسى كەلمەيتىنىن، بارلىعى بىردەي كولەمدە قىزمەت ەتە المايتىنىن جاقسى تۇسىنگەن. ول ٵربىر شاكىرتىنىڭ جان-تانىمەن اتقارعان قىزمەتىن باعالاعان. ونىڭ شاكىرتتەرىنە تۇسىنىكپەن قارايتىنىن تالانت تۋرالى كەلتىرگەن مىسالىنان بايقايمىز. مىسالدا قوجايىن قۇلدارىنىڭ ٵرقايسىسىنا «قابىلەتىنە قاراي» جۇمىس تاپسىرادى. كەيىن ەكى قۇلدىڭ بىرەۋى كوبىرەك تابىس تۇسىرەدى. ٴبىراق قوجايىندارى ەكەۋىن دە: «جارايسىڭ، جاقسى دا ادال قۇل!»— دەپ بىردەي ماقتايدى (مات. 25:14—23).
14. وزگەلەرمەن قارىم-قاتىناسىمىزدا يساعا قالاي ەلىكتەسەك بولادى؟
14 يسا بىزگە دە سۇيىسپەنشىلىكپەن، مەيىرىممەن قارايدى. ول ٵرقايسىسىمىزدىڭ قابىلەتىمىز، جاعدايىمىز ٵرتۇرلى ەكەنىن ەسكەرەدى جانە بار كۇشىمىزدى سالىپ جاتقانىمىزعا قۋانادى. ٴبىز دە وزگە باۋىرلاستارعا يسا سياقتى قاراۋىمىز كەرەك. باۋىرلاستار ٴبىزدىڭ قاسىمىزدا وزدەرىن لايىقسىز سەزىنگەنىن، ٴبىز سياقتى قىزمەت ەتپەي جاتقاندارىنا ۇيالىپ، قىسىلعاندارىن قالامايمىز. قايتا، ٴبىز ولاردى ەحوباعا ەڭ جاقسىلارىن بەرىپ جاتقاندارى ٷشىن ماقتاعىمىز كەلەدى.
قولجەتىمدى ماقساتتار قويىڭىز
قولجەتىمدى ماقساتتار قويىپ، ٶز جەتىستىگىڭىزگە قۋانىڭىز (15، 16-ابزاستى قاراڭىز) *
15، 16. ٴبىر ايەل باۋىرلاس قانداي قۋانىشقا كەنەلدى؟
15 رۋحاني ماقساتتار ٶمىرىمىزدى ٴمان-ماعىناعا تولتىرىپ، ٴبىزدى العا ۇمتىلدىرادى. ٴبىراق ٴبىز وزگەلەر قويعان ماقساتقا ۇمتىلمايمىز. كەرىسىنشە، ٶز جاعدايىمىزدى، ٶز قابىلەتتەرىمىزدى ەسكەرىپ ماقسات قويامىز. ويتكەنى شامامىز كەلمەيتىن نارسەگە ۇمتىلىپ، سودان كوڭىلىمىز ٴتۇسىپ، جىگەرىمىز جاسىعانىن قالامايمىز (لۇقا 14:28). قازىر ميدوري دەگەن ىزاشاردىڭ مىسالىن قاراستىرايىق.
16 ميدوريدىڭ اكەسى — كۋاگەر ەمەس. ول ونى بالا كەزىندە ىنىسىمەن، سىڭلىسىمەن جانە سىنىپتاستارىمەن سالىستىرىپ، كەمسىتەتىن بولعان ەكەن. «مەن ٶزىمدى ادام قۇرلى سەزىنبەيتىنمىن»،— دەيدى ميدوري. ٴبىراق ەسەيە كەلە ونىڭ وزىنە دەگەن قۇرمەتى ارتا باستادى. ول بىلاي دەيدى: «كيەلى كىتاپتى كۇندە وقىعانىمنىڭ ارقاسىندا جۇرەگىمدە تىنىشتىق پايدا بولدى جانە ەحوبا مەنى سۇيەتىنىن سەزە باستادىم». سونداي-اق ميدوري الدىنا شاماسى جەتەتىن ماقساتتار قويىپ، سولارعا جەتۋ ٷشىن ناقتى دۇعا ايتتى. ناتيجەسىندە ٶز جەتىستىكتەرىنە قۋاندى.
ٵرى قاراي دا ەحوباعا ەڭ جاقسىڭىزدى بەرە بەرىڭىز
17. «وي-سانامىزدى ارەكەتكە تالپىندىراتىن كۇشتى جاڭارتا بەرۋگە» نە كومەكتەسەدى جانە مۇنىڭ ناتيجەسى قانداي بولادى؟
17 جاعىمسىز ويلار مەن سەزىمدەر ٴبىر كۇندە جوق بولىپ كەتپەيدى. سوندىقتان ەحوبا بىزگە: «وي-سانالارىڭدى ارەكەتكە تالپىندىراتىن كۇشتى جاڭارتا بەرىڭدەر»،— دەيدى (ەفەس. 4:23، 24). بۇل ٷشىن دۇعا ەتۋىمىز، قۇداي ٴسوزىن زەرتتەۋىمىز جانە وي جۇگىرتۋىمىز كەرەك. وسى ىستەردى ۇزبەي اتقارىڭىز جانە ەحوبادان كۇش سۇراڭىز. ول سىزگە كيەلى رۋحىن بەرىپ، ٶزىڭىزدى وزگەلەرمەن سالىستىرماۋعا كومەكتەسەدى. سونداي-اق بويىڭىزدا قىزعانىش نەمەسە مەنمەندىك سياقتى جامان قاسيەتتەر پايدا بولسا، ەحوبا ولاردى دەرەۋ بايقاۋعا جانە ارىلۋعا كومەكتەسەدى.
18. شەجىرەلەر 2-جازبا 6:29، 30 داعى سوزدەر بىزگە قانداي جۇبانىش بەرەدى؟
18 شەجىرەلەر 2-جازبا 6:29، 30 وقىڭىز. ەحوبا ٴبىزدىڭ جۇرەگىمىزدى كورەدى. وسى دۇنيەنىڭ رۋحىمەن جانە ٶز كەمەلسىزدىگىمىزبەن كۇرەسىپ جۇرگەنىمىز دە وعان ٴمالىم. ەحوبا وسىنداي جاعىمسىز اسەرلەرگە بەرىلمەۋ ٷشىن قانشالىقتى كۇش سالىپ جۇرگەنىمىزدى كورگەندە، ٴبىزدى ودان سايىن جاقسى كورىپ كەتەدى.
19. ەحوبانىڭ بىزگە دەگەن سەزىمى قانداي؟ مىسال كەلتىرىڭىز.
19 ەحوبا بىزگە دەگەن سەزىمىن انانىڭ سابيىنە دەگەن سەزىمىنە تەڭەيدى (يشايا 49:15). رەيچەل دەگەن باۋىرلاستىڭ سوزىنە نازار اۋدارايىق. «مەنىڭ قىزىم ستەفاني شالا تۋىلدى. ول وتە كىشكەنتاي ٵرى دارمەنسىز ەدى. ستەفاني ٴبىر اي بويى ينكۋباتوردا جاتقاندا، دارىگەرلەر ونى كۇندە قۇشاعىما الىپ تۇرۋىما رۇقسات بەردى. سول ساتتەردىڭ ارقاسىندا ٴبىز ٴبىر-بىرىمىزگە بايلانىپ، ەرەكشە جاقىن بولىپ كەتتىك. قازىر ستەفانيدىڭ جاسى التىدا. ٴبىراق ول ٶز قاتارلاستارىنان الدەقايدا كىشكەنتاي. مەن ونى سوندا دا جاقسى كورەمىن، ويتكەنى ونىڭ ٶمىر ٷشىن قالاي كۇرەسكەنىن جاقسى بىلەمىن. ول مەنىڭ ٶمىرىمدى قۋانىشقا تولتىردى». ەحوبا ٴبىزدى وسىنداي انا سياقتى جاقسى كورەدى. ويتكەنى وعان جان-تانىمىزبەن قىزمەت ەتۋ ٷشىن قالاي كۇرەسىپ جۇرگەنىمىزدى بىلەدى. بۇل بىزگە زور جۇبانىش بەرەدى ەمەس پە؟!
20. ەحوباعا قىزمەت ەتەتىندىكتەن سىزدە قۋانۋعا قانداي سەبەپ بار؟
20 ٴسىز ەحوباعا قىزمەت ەتىپ جاتقاندىقتان، ونىڭ وتباسىنىڭ دارا ٵرى باعالى مۇشەسىسىز. ول ٴسىزدى وزگەلەردەن ارتىق بولعاندىقتان شىندىققا جاقىنداتىپ تارتقان جوق. ول جۇرەگىڭىزگە قاراپ، مومىن ٵرى ودان ۇيرەنۋگە دايىن ەكەنىڭىزدى كوردى دە، وزىنە جاقىنداتىپ تارتتى (ٴزاب. 25:9). وعان قىزمەت ەتۋگە بارىڭىزدى سالىپ جۇرگەنىڭىزدى ول قاتتى باعالايدى. ٴسىزدىڭ تاباندىلىعىڭىز بەن ادالدىعىڭىز «جۇرەگىڭىزدىڭ تازا دا ىزگى» ەكەنىنىڭ دالەلى (لۇقا 8:15). ەندەشە، وعان بار جاقسىڭىزدى بەرۋگە كۇش سالا بەرىڭىز. سوندا ٶز ىسىڭىزگە قاراپ قۋاناتىن بولاسىز.
38-ٵن قۇداي ساعان كۇش بەرەدى
^ 5-ابزاس ەحوبا ەشقاشان ٴبىزدى وزگەمەن سالىستىرمايدى. ٴبىراق كەيدە ٴبىز ٶزىمىزدى وزگەلەرمەن سالىستىرىپ، ٶز-وزىمىزگە كوڭىلىمىز تولماي، ۇنجىرعامىز ٴتۇسىپ جاتادى. بۇل ماقالادا ٶزىمىزدى سالىستىرۋ نەلىكتەن زيان ەكەنىن قاراستىرامىز. سونداي-اق وتباسىمىزداعىلار جانە قاۋىمداعىلار ٶز-وزدەرىنە قۇدايدىڭ كوزىمەن قاراۋلارى ٷشىن، ٴبىز نە ىستەي الاتىنىمىزدى تالقىلايمىز.
^ 5-ابزاس كەيبىر ەسىمدەر وزگەرتىلگەن.
^ 7-ابزاس بۇل ويلار كۇيەۋگە قاتىستى ايتىلسا دا، مۇنداعى كوپ پرينسيپتەر ايەلدەرگە دە قاتىستى.
^ 58-ابزاس سۋرەت سيپاتتاماسى: وتباسىلىق عيبادات كەزىندە اتا-اناسى نۇحتىڭ كەمەسىن سوعۋعا قاتىسىپ وتىرعان ٵربىر بالاسى ٷشىن قۋانىپ وتىر.
^ 62-ابزاس سۋرەت سيپاتتاماسى: كىشكەنتاي بالاسى بار ٴبىر جالعىزباستى انا قوسالقى ٸزاشار بولىپ قىزمەت ەتۋ ٷشىن جوسپار قۇرىپ جاتىر، كەيىن ول سول قىزمەتتى اتقارا العانىنا قۋاندى.
