1. Mukonda dyahi Jihova kene mutusokesa ni akwetu?

JIHOVA kamesena kwila o ima yoso ni athu oso adifwa ngó. Tuzwela kiki mukonda mwene wabhange isasa, yama ni athu amaukexilu avulu, kadifu. Séku muthu wadifu ni mukwa mu maukexilu oso. Kyenyikiphe, Jihova nuka wandakusokesa ni athu engi. Mwene wejiya yakukala ku muxima, o ima i utena kubhanga kyambote ni ima ki utena ku ibhanga. (1 Sam. 16:7) Mwene wejiya o ukexilu wakusase. Mwene kandakubhinga phala kubhanga kima kyatundu o nguzu yé. Twabhingi kukayela o phangu ya Jihova mukuditala kala kyatutala mwene. Kyenyiki, etu twanda ‘di banza kyasoko,’ kifwa, kitwandaxinganeka kwila twabetakota, maji kitwandaxinganeka we kwila ki twala ni valolo.—Loma 12:3.

2. Mukonda dyahi kima kyayibha kudisokesa ni akwetu?

² Mukidi, etu tutena kukatula mbote mu phangu ya akwetu. Mukifika, tutena kutala phange wala ni uhete musidivisu yakuboka. (Jihe. 13:7) Tutena kutala kyebhi mwene kyene mukalakala phala tutene kubandekesa o uhete wetu mu ukunji. (Fil. 3:17) Maji kukayela o phangu yambote ya akwetu, kikwadifu ni kudisokesa nawu. O kubhanga kiki kutena kukubhekela lwimbi, kuluwala mba kudivwa kwila eye kiwala ni valolo. Maji kala kitwadilongo mu milongi yatundumu, o kusota kulondekesa kwila twabetakota akwetu ndenge, kutena kuzanga o ukamba wetu ni Jihova. Kiki kyene kibhangesa Jihova kututendelesa: “Kala muthu a lole o wendelu wê, mbé o kya ta nzabala, i kale ya kibhangelu kyê-mwene, sé kubhindamena kudifikisa mu wendelu wa athu engi.”—Nga. 6:4.

3. Mu ubhezelu wé kwa Jihova ima yahi iwabhange yabandekesa o kusanguluka kwé?

³ Jihova wamesena kwila, tusanguluka ni ima itwene mubhanga  musidivisu yê. Mukifika, se akubatizala kya, wasangulukile kyavulu, kyoso ki wakumbidila o mbambe yiyi. Eye wasolo kubhanga kiki mu vondadi ye mwene. O henda yé kwa Nzambi yene yakukwatekesa kubhanga kiki. Xinganeka ngó mu ima yoso iwabhange kya tunde kya kubatizala! Mukifika o kwila o vondadi yé ya kutanga ni kudilonga o Bibidya ubheka yadibandekesa dingi? O kwila wene musamba dingi ni muxima woso? (Jisá. 141:2) O uhete wé wakuzwela ni athu ni kukalakala ni jifalamenda jetu mu ukunji, wadibandekesa dingi? O kumwiji wé, o kwila Jihova wakukwatekesa kukala munumi, muhatu, tata mba mama yambote? Eye utena kusanguluka mu ima yoso iwabhange phala kulungulula o ukexilu wé.

4. Ihi itwandadilonga mu milongi yiyi?

⁴ Tutena kukwatekesa akwetu kusanga we o kusanguluka, kyoso kyaya ni kubandekesa o uhete wâ mudivisu ya Jihova. Tutena we kukwatekesa akwetu phala kakale ni kifwa kya kudisokesa ni akwa. Mu milongi yiyi twandamona kyebhi o jitata kyatena kukwatekesa o twana twâ, kyebhi o makaza kyatena kudikwatekesa mudya. Twandamona we kyebhi o tufunga ni athu amukwa, kyatena kukwatekesa o jiphange jâ munzumbi. Kudisukilu twandadilonga jivelusu ja Bibidya, jitena kutukwatesa kusola jimbambe jitutena kukumbidila.

5. O jitata katokala kubhanga ihi kala kilondekesa Efezu 6:4?

⁵ O jitata jatokala kudilanga phala kasokese o twana twâ ni ana engi. Katokala we kwa abhinga phala kubhanga kima kyatundu o nguzu yâ. Se o jitata abhanga kiki, andaluwalesa o twana twâ. (Tanga Efezu 6:4.) Phange ya muhatu amwixana Sachiko * wambe: “O alongexi ami, exile mungijijidika kudilonga dingi, o jikoleka jami ndenge. O mametu wamesenene we kwila, ngidilonga kyavulu phala kubhana umbangi wambote kumulongexi wami ni kwa tat’etu kexile Mbangi ya Jihova. Mukidi, mametu wamesenene kwila, mu jipolova, ngitambwijila se kulwezabhu kibhwidisu kimoxi. Eme kingejitena kubhanga kiki. Kwabhiti kya mivu tunde kingazubha kudilonga mu xikola, maji sayi ithangana ngene mudibhwidisa hanji: O kwila Jihova wasanguluka ni yoso ingene mubhanga mu sidivisu yê?”

6. Ihi itena kudilonga o jitata ku Sálamu 131:1, 2?

⁶ O jitata atena kudilonga disá dyambote mu Sálamu 131:1, 2. (Tanga.) Sobha Davidi  wambe kuma, mwene kexile “mu xikulula mesu ni katunda koso” mba kubhanga ima yamubhonzele kyavulu. O kulenduka kwê kwamubhangesa kusanguluka ni ima yexile nayu, kwamubhekela we kutululuka. Ihi itena kudilonga o jitata ku izwelu ya Davidi? O Jitata atokala kulondekesa kulenduka ni ukexilu wakuditulula, kana ngó mu ima yabhanga, maji ni mu ima ya kingila ku twana twâ. O jitata atena kukwatekesa o twana kudivwa kwila ala ni valolo, mu kusota kwijiya itena kubhanga o twana ni ihi katena ku ibhanga. Mukusuluka, ene atokala kusola jimbambe jasoko ni uhete ni nguzu ya twana twâ. Phange ya muhatu amwixana Marina wambe: “Mametu kexile mu ngisokesa ni jiphange jami mba twana twengi. Mwene wangilongo kwila, etwenyoso twala ni mauhete kadifu, ni kwila, kumesu ma Jihova, etwenyoso twala ni valolo. Mukonda dya ukexilu wangisase mametu, eme lelu kingala ni kifwa kyakudisokesa ni akwetu.”

7-8. Kyebhi o anumi kyatena kubhana kijingu kwa ahatwâ?

⁷ Mukilunga kya Jihova, o munumi watokala kubhana kijingu kwa muhatwê. (1 Phe. 3:7) O kubhana o kijingu kilombolola kuxila ni kubhana valolo kwa akwetu. Mukifika, o munumi ujingisa muhatwê, umutalatala ni kuxila kwoso. Mwene kandamubhinga phala kubhanga kima kya tundu o nguzu yê. Mwene kandasokesa muhatwê ni ahatu engi. Kyebhi kyandadivwa o muhatu se munumyê umusokesa ni ahatu engi? O munumi wa phange Rosa, ki Mbangi ya Jihova. Mwene wexile ni kifwa kyakusokesa phange Rosa ni ahatu engi. O ukexile we wakuzwela sé henda, wabhangesa phange Rosa kudivwa kwila, kexile ni valolo, séku muthu wamuzolele. Phange Rosa wambe: “Mu ithangana yoso ngabhindamene muthu ungilembalesa kwila, Jihova wangizolo.” Maji o anumi mukilunga, abhana kijingu kwa ahatwâ. Ene ejiya kwila, kubhanga kiki kutena kubandekesa o ukamba wa ni ahatwâ, ni ukamba wâ ni Jihova. *

⁸ O munumi ubhana o kijingu kwa muhatwê, uzwela ima yambote yalungu ni muhatwê, umutangela kwila wamuzolo, ulondekesa kwila mwene wala ni valolo yavulu kwa mwene. (Jisa. 31:28) Kiki kyene kyexile mubhanga mwadiwa phange Katarina, twamutumbula mu milongi yatundumu. O ukexilu yú wakwatekesa phange Katarina kutolola o ixinganeku yayibha. Mu undenge, manya wexile ni kifwa kya kumusebhulula ni kumusokesa ni twana twengi twa ahatu, katé mwene ni makamba mê. Kyenyiki, Katarina wexile ni kifwa kya kudisokesa ni akwa, wasuluka ni kubhanga kiki katé mwene kyoso kya kituka Mbangi ya Jihova! Maji mwadiwê wamukwatekesa kutolola o ukexilu yú wakuxinganeka, yu wamateka kuditala mu ukexilu watokala. Mwene wambe: “Mwene wangizolo, ungiximana kyoso kingibhanga ima yambote, ungitumbula we mumisambu. Mwene ungilembalesa we o idifwa ya Jihova, ungikwatekesa we kukala ni ixinganeku yambote.”

9-10. Kyebhi o tufunga twa henda kya kukwatekesa phange yamuhatu wexile ni kifwa kya kudisokesa ni akwa?

⁹ Kyebhi o tufunga kyatena kukwatekesa yó ala ni kifwa kya kudisokesa ni akwa? Tala yabhiti ni phange yamuhatu amwixana Hanuni. Mu undenge we, kexile mumuximana. Mwene wambe: “Eme ngexile ngimukwa jisonyi, ngexile muxinganeka kwila akwetu abetakota, eme ndenge. Kyenyiki, ngamateka kudisokesa ni akwetu, tunde undenge. ” Né mwene kyoso kya kituka Mbangi ya Jihova, Hanuni wexile hanji ni kifwa kyakudisokesa ni akwa. Kiki kyamubhangesa kudivwa kwila, mu kilunga mwene kexile ni valolo. Maji lelu wamusidivila kala muboki  wathembu yoso ni kusanguluka kwoso. Ihi yamukwatekesa kulungulula o ukexilu we wakuditala?

¹⁰ Hanuni wambe kwila, sayi tufunga twa henda twamukwatekesa. Ene alondekesa kwila amudyelela, amuximana we mukonda dya kubhana phangu yambote mu kilunga. Mwene wasoneka: “Sayi ithangana o tufunga exile mungibhinga phala kukwatekesa jiphange ja ahatu abhindamene kikwatekesu. Kutambula o maujitu yá, kwa ngibhangesa kumona kwila mbe ngala ni valolo mu kilunga. Ngilembalala kyoso o kafunga ni henda yoso wangisakidila mukonda dya kiswinisu kingabhele ku jiphange ja ahatu, exile hanji minzangala. Mukusula, ene atange neme o mukanda 1 Tesalonika 1:2, 3. Kiki kya ngisangulukisa kyavulu! Ngisakidila kyavulu o kikwatekesu kya tufunga tutu twa henda. Kindala ngejiya kwila mbe eme ngala ni valolo mu kilunga kya Jihova.”

11. Kyebhi kitutena kukwatekesa “woso mukwa muxima wa toloka, wa batama,” kala kya kijimbulula mu Izaya 57:15?

¹¹ Tanga Izaya 57:15. Jihova usuwa kyavulu “woso mukwa muxima wa toloka, wa batama.” Ko tufunga ngó, maji etwenyoso tutena kuswinisa o jiphange jiji jakazola. Ukexilu umoxi wakubhanga kiki, o kulondekesa kwila twa aswu. Jihova wamesena kwila, twa akwatekesa kumona kwila, mwene wa azolo kyavulu. (Jisa. 19:17) Tutena we kukwatekesa o jiphange jetu mukulondekesa o kulenduka ni kukamba kudinanza mukonda dya mauhete utwala nawu. Etu kitusoto we kudifumanesa mukonda kubhanga kiki kutena kubhangesa akwetu kutukwatela lwimbi. Muveji dya kusota kudifumanesa, tusota kuswinisa akwetu bhukaxi ka kwijiya kutwala naku.—1 Phe. 4:10, 11.

12. Mukonda dyahi o athu awabhelele kukala kumoxi ni Jezú? (Tala ofoto yakapa.)

¹² Kudilonga kyebhi Jezú kya talatala o akayedyê, kutena kutukwatekesa kwijiya kyebhi kitwatokala kutalatala akwetu. Mwene wexile o diyala dya betakota dyexile kya mu ngongo. Né kiki, mwene wexile muthu ‘wabelesela, wabatama muxima.’ (Mat. 11:28-30) Mwene kexile mu dithutha mukonda dya unjimu wê. Né mwene ni unjimu wavulu wexile nawu, kyoso kyexile mulonga o athu, o izwelu ni ifika yé kiyabhonzele ku itendela. (Luka 10:21) Jezú kadifwile ni atwemeni a jingeleja, exile mudizangeleka. Mu ithangana yoso mwene wexile mubhangesa akwa kudivwa kwila, exile ni valolo kumesu ma Nzambi. (Nzwá 6:37) Mwene wexile muxila o athu oso.

13. O henda ni ukexilu wambote wa Jezú yadimonekena kyebhi mu ukexilu wadibhana ni maxibulu mê?

¹³ Tutena kumona o ukexilu wambote ni henda ya Jezú mu ukexilu wadibhana ni maxibulu mê. Mwene wejidile kwila, o maxibulu mê kadifwile mu mauhete. Kyenyiki, enyoso kejitambula ikalakalu yadifu. Mu ukunji enyoso keji bhanga kikalakalu kyasokela. Maji mwene wasangulukile ni ikalakalu yabhangele muthu ni muthu. Jezú walondekesa kwila wadivwile kiki, mukifika kya jitalendu kyatele. Mukifika kiki, o ngana wabhana ikalakalu ku jiselevende jê, “kala muthu kyoso kya soko nakyu.” Ku jiselevende jiyadi jafiyele, umoxi wanganyala dingi o mukwa ndenge. Maji o ngana waximana o jiselevende jiyadi mu ukexilu umoxi: “Kyawabha! Selevende yambote, ya fiyele!”—Mat. 25:14-23.

14. Kyebhi kitutena kukayela o ukexilu wa Jezú watalatala akwa?

¹⁴ Mu ithangana yoso, Jezú ulondekesa henda, ututalatala kyambote. Mwene wejiya kwila, o mauhete metu kadifu, o ibhidi itwamudibhana nayu ki idifu we. Mwene usanguluka kyoso kitubhanga yoso itutena musidivisu ya Jihova. Etu twatokala kukayela o phangu ya Jezú. Etu kitwamesena kubhangesa phange kudivwa kwila kale ni valolo, mba kumukwatesa jisonyi mukonda kamutena kubhanga yoso yamubhanga akwa. Muveji dya kiki, twatokala kusota  kuxima o jiphange jetu mukonda amubhanga yoso yatena musidivisu yâ kwa Jihova.

15-16. Mbote yahi yakatula phange yamuhata mukusola jimbambe jatenene kukumbidila?

¹⁵ O kukala ni jimbambe musidivisu ya Jihova, kusangulukisa dingi o mwenyu wetu. Maji twatokala kusola jimbambe jitutena kukumbidila, jasoko ni uhete wetu. Kitwabhingi kusola jimbambe jasolo we akwetu. O kubhanga kiki kutena kutuluwalesa ni kutukatula o nguzu ya kukalakala. (Luka 14:28) Tala yabhiti ni phange ya muhatu, muboki wathembu yoso, amwixana Midori.

¹⁶ O tata ya phange Midori ki Mbangi ya Jihova. Kyenyiki, kyoso phange kyexile monandenge, tat’ê wexile mumusokesa ni jiphange jê, ni jikoleka jê ja xikola. Phange Midori wambe: “Eme ngexile mudivwa kwila, kingala ni valolo.” Maji kyoso kyakituka mwadyakime, phange Midori wamateka kya kuditala mu ukexilu wambote. Mwene wambe: “Eme ngexile mutanga o Bibidya izuwa yoso, kiki kyangikwatekesa kukala ni kutululuka kwamuxima, ngamateka kudivwa kwila, mbe Jihova wangizolo kyavulu.” Mwene wasolo we jimbambe, wabhingi kikwatekesu mumusambu, phala atene kujikumbidila. Kubhanga kiki kwa kwatekesa phange Midori kukala ni kusanguluka musidivisu yê kwa Jihova.

17. Kyebhi kitutena ‘kubiluka jinga kyengi mu ilunji yetu ni mu mixima yetu moxi?’ Ihi yandabhita se tubhanga kiki?

¹⁷ Kubhinga ithangana yavulu phala kulungulula o ukexilu wetu wakuditala. Kyenyiki, Jihova ututendelesa: ‘bilukenu jinga kyengi mu ilunji yenu ni mu mixima yenu moxi.’ (Efe. 4:23, 24) Phala kubhanga kiki, twabhingi kusamba, kudilonga o Mak’â Nzambi, ni kuxinganeka mu ima itwadilongo. Kyenyikiphe, bhanga jinga o ima yiyi, bhinga nguzu kwa Jihova. O nzumbi  ikôla yandakukwatekesa kutolola o kifwa kya kudisokesa ni akwenu. Jihova wandakukwatekesa we kutonginina se wamukala ni lwimbi kumuxima mba wamudizangeleka. Mwene wandakukwatekesa we kulungulula o ukexilu we ni lusolo.

18. Kyebhi o izwelu mu 2 Malunda 6:29, 30 itena kutuximbakatesa?

¹⁸ Tanga 2 Malunda 6:29, 30. Jihova wejiya o muxima wetu. Mwene wejiya we kwila, twamubhanga nguzu phala o ukexilu wayibha wa mundu yú ki utufunyise, twamubhânga we ni ukexilu wetu wakukamba o kuyuka. Kyoso Jihova kyamona o nguzu itubhanga phala o ima yiyi ki itufunyise, o henda yatukwatela idibandekesa dingi.

19. Kifika kyahi kyate Jihova phala kutukwatekesa kutendela o ukexilu watutala?

¹⁹ Phala kutukwatekesa kutendela kyebhi kya divwa yalungu n’etu, Jihova uta kifika kyalungu ni henda ya mama ni monê. (Iza. 49:15) Tala yabhiti ni mama amwixana Rachel. Mwene wasoneka: “Monami Stephanie ngamuvwala kasuwa. Kyoso kingamumono muveji ya dyanga, ngamono kwila, watolele kyavulu. Kexile ni nguzu yavulu. Maji o jidotolo angehela kumwondeleka izuwa yoso, kyoso kyexile mu inzo ya kusaka, mu mbeji yamuvimba tunde kingamuvwala. O ithangana yiyi yangibhangesa kuzola dingi mon’ami. Kindala mwene wala ni mivu isamanu. Watoloku dingi, akwa ala mukitala kye aneteku dingi. Né kiki, eme ngamuzolo kyavulu, mukonda mwene wabhânge kyavulu phala kukala kumwenyu. Mwene we wangibhekela kusanguluka kwavulu kumwenyu wami!” Kitusangulukisa we kyavulu kwijiya kwila, Jihova utuzola dingi, kyoso kyamona o nguzu itubhanga phala kumusidivila ni muxima wetu woso!

20. Kuma eye uselevende ya Jihova ihi yandakubhangesa kusanguluka?

²⁰ Kuma uselevende ya Jihova, eye wala ni kididi mu kilunga kyê, seku dingi muthu wedi kala eye. Jihova ka kwixana mukilunga kyê mukonda eye wabetakota o athu engi ndenge. Mwene wakwixana mukonda watonginina o muxima wé yu wamona kuma eye walenduka, uxikina kukulonga ni kulungulula o ukexilu wé. (Jisá. 25:9) Dyelela kwila, Jihova wasanguluka ni yoso iwene mubhanga musidivisu yé kwa mwene. O kukolokota ni ufiyele wé ulondekesa kwila, eye wala ni “muxima wa kidi, wa wabha.” (Luka 8:15) Kyenyikiphe, suluka ni kubhanga yoso i utena musidivisu yé kwa Jihova. Se kyene ki ubhanga, eye wandasanguluka jinga mukonda ‘dya ibhangelu yé mwene.’