1. Йаһоԝа чьма мә бәрамбәри тʹӧ кәси накә?

ТʹӘБИЙӘТ рʹәнг-рʹәнги у щурʹә-щурʹә йә у мәрьв жи ӧса ньн. Һәр кәс жь мә жь һәв щӧда дьбә. Ләма жи Йаһоԝа мә тʹӧ щара бәрамбәри тʹӧ кәси накә. Әԝ нә кӧ рʹәнг-рʹуйе мә, ле дьле мә дьньһерʹә (1 Самуйел 16:7). Гава әԝ тьштәки жь мә дәʹԝа дькә, әԝ алийед мәйә сьст у ԛәԝи, у ӧса жи әʹсьл у култура мә һьлдьдә һʹәсаб. Гәрәке әм чʹәʹв бьдьнә Йаһоԝа у бь ньһерʹандьна ԝи сәр хԝә бьньһерʹьн. Ӧса әме рʹаст дәрһәԛа хԝә бьфькьрьн, у әме нә бьльнд нә жи ньмьз хԝә һʹәсаб кьн (Рʹомайи 12:3).

2. Чьма гәрәке әм хԝә бәрамбәри тʹӧ кәси нәкьн?

² Ԝе баш бә, ԝәки әм хушк-бьред амьн, йед кӧ хьзмәтеда пешдачуйи нә, хԝәрʹа бькьнә мәсәлә (Ибрани 13:7). Бь ԝе йәке, әме һин бьн кӧ чаԝа хьзмәтеда дьһа хирәт у пешдачуйи бьн (Филипи 3:17). Ле әв йәк кӧ әм чʹәʹв дьдьнә кәсәки найе һʹәсабе, ԝәки әм гәрәке хԝә бәрамбәри ԝи кәси бькьн. Чьмки жь бо ԝе йәке чʹәʹвнәбари дькарә бькʹәвә дьле мә, у әм дькарьн хирәта хԝә ӧнда кьн у хԝә беԛимәт һʹәсаб кьн. Чаԝа мә готара пешийа веда дит, һәврʹькʹи ортʹа хушк-бьра дькарә зьраре бьдә достийа мә тʹәви Йаһоԝа. Ләма жи Йаһоԝа бь һʹьзкьрьне тʹәмикә ӧса дьдә мә: «Бьра һәр  кәс кьрьнед хԝә бьдә сәр мезине у паши һьнге жь хԝә рʹази бә, нә кӧ хԝә һьмбәри һәвале хԝә кә» (Галати 6:4).

3. Кʹижан пешдачуйинед мә дьле мә ша дькьн?

³ Йаһоԝа дьхԝазә ԝәки тӧ пешдачуйина хԝәрʹа ша би. Мәсәлә, һәгәр тӧ ида һати ньхӧмандьне, гәрәке тӧ ша би ԝәки тӧ гьһишти ве нете! Тә хԝәха сафи кьр, ԝәки ве  гаве бавежи. Тӧ Хԝәде һʹьз дьки, ләма жи тә әв гав авит. Һәла бинә бира хԝә, ԝәки һьнгева тӧ чьԛас пешда чуйи. Дьбәкә тӧ ньһа хԝәндьн у леколина Кʹьтеба Пироз һе зедә һʹьз дьки у дӧайед тә һе зедә жь дьл тен (Зәбур 141:2). Дьбәкә тәрʹа ида дьһа һеса йә хьзмәтеда хәбәрдане дәстпеки у һащәтед бона һинкьрьне бьди хәбате. Ӧса жи, һәгәр малбәта тә һәйә, дьбәкә Йаһоԝа али тә кьрийә ԝәки тӧ щабдарийа хԝә чаԝа жьн, мер йан де у бав дьһа баш бини сери. Бәле, тӧ дькари ша би ԝәки тӧ ван алийава пешда чуйи.

4. Ве готареда, әме чь шеԝьр кьн?

⁴ Әм дькарьн али кәсед дьн бькьн, ԝәки әԝана жь пешдачуйина хԝәйә рʹӧһʹани шабуне бьстиньн. Ӧса жи, әм дькарьн али ԝан бькьн, ԝәки әԝана хԝә бәрамбәри кәсед дьн нәкьн. Ве готареда, әме бьвиньн кӧ де-бав чаԝа дькарьн али зарʹед хԝә бькьн, жьн-мер чаԝа дькарьн али һәв бькьн, у ӧса жи рʹуспи у кәсед дьн чаԝа дькарьн али хушк-бьра бькьн. Хьлазийеда, әме дина хԝә бьдьн һьнә принсипед Кʹьтеба Пироз, йед кӧ дькарьн али мә бькьн, ԝәки әм ль гора һʹӧнӧр у фәрәсәтед хԝә нетед реали дайньн пешийа хԝә.

5. Ль гора Әфәси 6:4, гәрәке де-бав чь нәкьн?

⁵ Де-бав гәрәке зарʹед хԝә бәрамбәри һәв нәкьн у жь ԝан дәʹԝа нәкьн ве йәке, чь кӧ жь ԛәԝата ԝан  дәр ә (Әфәси 6:4 бьхунә). Хушкәкә бь наве Сачико * ӧса дьбежә: «Дәрсдаред мьн тʹьме дьхԝәстьн, ԝәки әз жь һәвалдәрсед хԝә четьр бьм. Дийа мьн жи дьхԝәст кӧ әз мәкʹтәбеда рʹьнд һин бьм, ԝәки дәрсдар у баве мьни нәбаԝәрмәнд, дәрһәԛа Шәʹдед Йаһоԝа баш бьфькьрьн. Дийа мьн дьхԝәст, ԝәки әз һәр тʹьм нишанед һәри бьльнд бьстиньм, ле ԛәԝата мьн нәдьгьһиштә ве йәке. Рʹаст ә ида гәләк сал дәрбаз буйә, ле әв йәк ӧса сәр мьн һʹӧкӧм кьр, кӧ һʹәта рʹожа иро жи әз щарна дьфькьрьм гәло Йаһоԝа жь мьн рʹази йә гава әз чь дәсте мьн те дькьм».

6. Де-бав дькарьн жь Зәбур 131:1, 2 чь дәрс һин бьн?

⁶ Бона де-бава дәрсәкә фәрз һәйә  Зәбур 131:1, 2-да (бьхунә). Даԝьд Пʹадша нәдькʹәт пәй тьштед мәзьн, демәк пәй тьштед кӧ жь ԛәԝата ԝи дәр бун. Мьлукти али ԝи дькьр, ԝәки рʹази бә бона ԝан тьштед кӧ щәм ԝи һәбун. Гәло де-бав дькарьн жь готьнед Даԝьд чь һин бьн? Де-бав гәрәке мьлук бьн у синоред зарʹед хԝә жи бьзаньбьн. Әԝана гәрәке сьстбун у ԛәԝата зарʹед хԝә тедәрхьн, ԝәки бькарьбьн нетед ԛаси ԛәԝата ԝан дайньн пешийа ԝан. Хушкәкә бь наве Марина ӧса дьбежә: «Дийа мьн әз тʹӧ щар бәрамбәри бьред мьн у зарʹед дьн нәдькьрьм. Дийа мьн әз һин дькьрьм, ԝәки фәрәсәтед һәр кәси жь һәв щӧда нә, у Йаһоԝа һәр кәси жь мә ԛимәт дькә. Бь аликʹарийа ԝе, әз хԝә бәрамбәри кәсед дьн накьм».

7-8. Мер чаԝа дькарә бьдә кʹьфше кӧ жьна хԝә ԛимәт дькә?

⁷ Мер гәрәке ԛәдре жьна хԝә бьгьрә у ԝе ԛимәт бькә (1 Пәтрус 3:7). Әԝ ча дькарә ве йәке бьдә кʹьфше? Мер гәрәке пʹайе жьна хԝә бьдә у жь ԛәԝата ԝе зедәтьр тьшта жь ԝе дәʹԝа нәкә. Ӧса жи, гәрәке әԝ ԝе бәрамбәри жьнед дьн нәкә. Гәло чьрʹа? Мере хушкәкә мә бь наве Роза, йе кӧ Шәʹде Йаһоԝа нинә, гәләк щар ле бәрамбәри жьнед дьн дькә. Сәва готьнед ԝийә сәрт, Роза хԝә беԛимәт һʹәсаб дькә. Роза ӧса дьбежә: «Әз тʹьме һʹәԝще ве йәке мә, кӧ кәсәк мьнрʹа бежә, ԝәки Йаһоԝа мьн ԛимәт дькә». Мере кӧ принсипед Кʹьтеба Пироз тинә сери, пʹайе жьна хԝә дьдә, чьмки әԝ занә кӧ әв йәк ԝе һьм сәр зәԝаща ԝи һьм жи сәр достийа ԝи тʹәви Йаһоԝа баш һʹӧкӧм кә. *

⁸ Мере кӧ жьна хԝә ԛимәт дькә, пʹайе ԝе дьдә у тʹьме жерʹа дьбежә, ԝәки әԝ ле һʹьз дькә (Мәтʹәлок 31:28). Мере Катеринайе, йа кӧ мә готара пешийа веда бәʹса ԝи кьрьбу, али ԝе кьр, ԝәки әԝ жь һәстед беԛимәтбуне аза бә. Гава Катерина зарʹ бу, дийа ԝе ле ньмьз дькьр у бәрамбәри кәчʹькед дьн дькьр. Ләма чахе Катерина бу Шәʹда Йаһоԝа, һьнге жи әԝе хԝә бәрамбәри кәсед дьн дькьр. Ле мере ԝе али ԝе кьр ԝәки әԝ жь ве фькре аза бә у ԛәдьр-ԛимәта хԝә бьзаньбә. Катерина дьбежә: «Әԝ мьн һʹьз дькә, бона тьштед баш кӧ әз дькьм пʹайе мьн дьдә у бона мьн дӧа дькә. Ӧса жи, әԝ һʹӧнӧред Йаһоԝа тинә бира мьн у али мьн дькә кӧ әз фькред хԝәйә нәрʹаст рʹаст бькьм».

9-10. Рʹуспийа чаԝа али хушкәке кьрьн, ԝәки әԝ хԝә бәрамбәри кәсед дьн нәкә?

⁹ Гәло рʹуспи чаԝа дькарьн али хушк у бьра бькьн, йед кӧ хԝә һәр тʹьм бәрамбәри кәсед дьн дькьн? Дина хԝә бьдә сәрһатийа хушкәкә бь наве Һануни. Гава әԝ зарʹ бу, де у баве ԝе һьндьк пʹайе ԝе дьдан. Әԝ тинә бира хԝә: «Әз йәкә шәрмокә бум, у әз дьфькьрим кӧ зарʹед дьн жь мьн баштьр ьн.  Мьн хԝә һәр тʹьм бәрамбәри кәсед дьн дькьр». Паши кӧ Һануни бу Шәʹда Йаһоԝа жи, әԝе хԝә бәрамбәри кәсед дьн дькьр. Ләма жи әԝе хԝә щьватеда беԛимәт һʹәсаб дькьр. Ле ньһа, әԝ ида пешәнгәкә бәхтәԝар ә. Гәло чь али ԝе кьр кӧ ньһерʹандьна хԝә бьгӧһезә?

¹⁰ Һануни дьбежә кӧ рʹуспийа гәләк али ԝе кьрьн. Ԝана баԝәрийа хԝә ԝе дьанин у сәва амьнийа ԝе пʹайе ԝе дьдан.  Һануни ӧса дьбежә: «Рʹуспийа чәнд щара готьнә мьн, ԝәки әз дьл бьдьм һьнә хушка, йед кӧ һʹәԝще аликʹарийе бун. Шьхӧлед ӧса мьнрʹа нишан дькьрьн, ԝәки әз бекер ниньм. Те бира мьн ча һьнә рʹуспийа готьнә мьн, ԝәки әԝана гәләк рʹази нә кӧ мьн дьл дабу һьнә хушкед щаһьл. Паше ԝана 1 Тʹесалоники 1:2, 3 мьнрʹа хԝәнд. Ве  йәке гәләк дьле мьн гьрт! Бь сайа ван шьванед баш, әз ньһа фәʹм дькьм кӧ тʹәшкиләта Йаһоԝада щийе мьн һәйә».

11. Гәло әм чаԝа дькарьн али «дьлшкәстийа» бькьн?

¹¹ Зәбур 34:18 бьхунә. Йаһоԝа «незики дьлшкәстийа йә». Ԝе баш бә кӧ нә тʹәне рʹуспи, ле әм гьшк дьл бьдьн ван хушк у бьред һежа. Мәсәлә, гава әм жь дьл бона ԝана хәм дькьн, әв йәк ԝана гәш у ԛәԝи дькә. Йаһоԝа дьхԝазә кӧ әм нишани ԝан бькьн, ԝәки әԝ пәзед хԝә чьԛас һʹьз дькә (Мәтʹәлок 19:17). Ӧса жи, мьлуктийа мә дькарә али хушк-бьра бькә. Әм нахԝазьн бьбьн сәбәб кӧ әԝ чʹәʹвнәбарийе мә бькьн, ле әм дьхԝазьн бь сайа һʹӧнӧр у занәбуна хԝә дьл бьдьн һәвдӧ (1 Пәтрус 4:10, 11).

12. Мәрьв чьрʹа Иса һʹьз дькьрьн? (Бьньһерʹә шькле рʹуйе журнале.)

¹² Әм дькарьн гәләк тьшт һин бьн жь ве йәке кӧ Иса һьндава шагьртед хԝәда ча бу. Дьнйайеда кәс мина ԝи тʹӧнә бу. Диса жи, Иса «шкәсти» у «дьлмьлаһим» бу (Мәтта 11:28-30). Әԝи тʹӧ щара сәва билани у занәбуна хԝә пʹайе хԝә нәдьда. Хәбәрдана ԝи дьле мәрьва дьгьрт, чьмки әԝи бь зьманәки һеса у бь мәсәла хәбәр дьда (Луԛа 10:21). Сәрԝеред религи йед ԛӧрʹә, мәрьварʹа дьготьн кӧ Хԝәде ԝана ԛимәт накә, ле Иса тʹӧ щара ӧса нәдьгот (Йуһʹәнна 6:37). Иса һәр тʹьм ԛәдре мәрьва дьгьрт у нишан дькьр кӧ Хԝәде ԝана ԛимәт дькә. Ԝе баш бә кӧ әм жи чʹәʹв бьдьнә ԝи.

13. Иса чаԝа ԛәнщи у һʹьзкьрьна хԝә шагьртед хԝәрʹа нишан кьр?

¹³ Ԛәнщи у һʹьзкьрьна Иса дьһатә кʹьфше жь һәләԛәтийа ԝи тʹәви шагьртед ԝи. Әԝи заньбу кӧ фәрәсәт у дәрәщед ԝан жь һәв щӧда нә. Ләма жи, щабдарийед ԝан жь һәв щӧдә дьбун у әԝана нькарьбун хьзмәтеда мина һәв пешдачуйи буна. Диса жи, Иса хирәта һәр йәки жь ԝан ԛимәт дькьр. Ньһерʹандьна Иса жь мәсәла тәланта әшкәрә йә. Ве мәсәледа, аха һәр хӧламед хԝәрʹа «ԝәкә ԛәԝата» ԝан шьхӧл да ԝан. Йәк жь ван хӧлама жь йе дьн зедәтьр тәлант ԛазанщ кьр. Ле аха пʹайе һәрдӧйа мина һәв да: «Әʹфәрьм, хӧламе ԛәнщ у амьн!» (Мәтта 25:14-23).

14. Гәло әм чаԝа дькарьн чʹәʹв бьдьнә Иса?

¹⁴ Иса һьндава мәда жи ԛәнщи у һʹьзкьрьн нишан дькә. Әԝ занә кӧ фәрәсәт у дәрәщед мә жь һәв щӧда нә, у гава чь жь дәсте мә те әм бь дьл у щан дькьн, әԝ ша дьбә. Гәрәке әм мина Иса ԛәдре кәсед дьн бьгьрьн. Әм нахԝазьн кӧ хушк йан бьрак шәрм бькә йан хԝә бекер һʹәсаб кә, чьмки әԝ нькарә мина кәсед дьн шьхӧл бькә. Ԝәрә әм мәщала бьгәрʹьн кӧ пʹайе хушк-бьра бьдьн, чьмки чь жь дәсте ԝан те әԝана дькьн ԝәки Йаһоԝарʹа хьзмәт бькьн.

15-16. Хушкәкә кӧ һьнә нетед рʹӧһʹани дани пешийа хԝә, чь кʹар дит?

¹⁵ Гава әм нетед рʹӧһʹани датиньн пешийа хԝә, әм бәхтәԝар дьбьн. Ле  гәрәке әм нә ль гора ԛәԝата у дәрәщед кәсед дьн, ле ԛаси ԛәԝат у дәрәщед хԝә  хԝәрʹа нета дайньн. Әв йәк фәрз ә сәва кӧ әм дьлтәнг нәбьн у шабуна хԝә ӧнда нәкьн (Луԛа 14:28). Дина хԝә бьдьнә сәрһатийа пешәнгәкә бь наве Мидори.

¹⁶ Гава Мидори зарʹ бу, баве ԝе, йе кӧ Шәʹде Йаһоԝа нинә, әԝ бәрамбәри хушк у бьре ԝе у һәвалдәрсед ԝе дькьр у ле ньмьз дькьр. Ләма жи Мидори хԝә бекер һʹәсаб дькьр. Ле гава Мидори мәзьн бу, хԝәбаԝәрийа ԝе зедә бу. Әԝ дьбежә: «Мьн Кʹьтеба Пироз һәр рʹож дьхԝәнд, сәва кӧ әʹдьлайи бькʹәвә дьле мьн у әз һʹьзкьрьна Йаһоԝа бьвиньм». Хенщи ве йәке, әԝе нетед реали дани пешийа хԝә, у дӧа кьр кӧ Йаһоԝа али ԝе бькә ԝәки бьгьһижә ван нета. Ахьрийеда, Мидори рʹӧһʹанида пешда чу, у пешдачуйина хԝәрʹа ша дьбу.

17. Әм чаԝа дькарьн «бь рʹӧһʹ у фькьред хԝәда нуйәжийин бьн», у кʹара ԝе йәке чь йә?

¹⁷ Фькьр у һәстед мәйә негатив нькарьн рʹожәкеда ӧнда бьн. Ләма жи Йаһоԝа мәрʹа ӧса дьбежә: «Бь рʹӧһʹ у фькьред хԝәда нуйәжийин бьн» (Әфәси 4:23, 24). Бона ве йәке, гәрәке әм дӧа бькьн, Кʹьтеба Пироз леколин бькьн у кʹур сәр бьфькьрьн. Һәр гав ван тьшта бькә у жь Йаһоԝа ԛәԝате бьхԝазә. Йаһоԝа ԝе бь сайа рʹӧһʹе пироз али тә бькә, ԝәки тӧ хԝә бәрамбәри кәсед дьн нәки. Һәгәр дьле тәда ԛӧрʹәти йан чʹәʹвнәбари кʹока хԝә бьдә, Йаһоԝа ԝе али тә бькә кӧ тӧ ван һʹӧнӧред хьраб бьвини у жь дьле хԝә дәрхи.

18. Әм чаԝа дькарьн жь готьнед 2 Дирок 6:29, 30 дьлбинийе бьстиньн?

¹⁸ 2 Дирок 6:29, 30 бьхунә. Йаһоԝа  дьле мә дьвинә. Әԝ занә кӧ әм һьм мьԛабьли рʹӧһʹе ве дьнйайе һьм жи мьԛабьли кемасийед хԝә шәрʹ дькьн. Гава әԝ дьвинә кӧ әм чьԛас сәр хԝә дьхәбьтьн, ԝәки жь ван һʹӧнӧред нәбаш аза бьн, әԝ мә дьһа зедә һʹьз дькә.

19. Мәсәле биньн кӧ нишан дькә ԝәки Йаһоԝа чьԛас мә һʹьз дькә.

¹⁹ Чаԝа кӧ дайькәк зарʹа хԝә һʹьз дькә, Йаһоԝа жи ӧса мә һʹьз дькә (Ишайа 49:15). Сәрһатийа дайькәкә бь наве Рейчел ве һʹьзкьрьне нишан дькә. Әԝ ӧса дьбежә: «Ԛиза мьн пешийа ԝәхта хԝә һатә буйине. Гава мьн әԝ щара пешьн дит, әԝ гәләк бьчʹук у сьст бу. Ле мәһа пешьн, гава ԛиза мьн нәхԝәшханеда бу, һʹәким әԝ һәр рʹож дьда дәсте мьн. Бь ве йәке, әм гәләк незики һәв бун. Ԛиза мьн ньһа шәш сали йә, у бәжна ԝе жь бәжна һәвалед ԛаси ԝе, кьнтьр ә. Диса жи, әз ԝе гәләк һʹьз дькьм, чьмки әԝе гәләк щәфа кʹьшанд кӧ сах бьминә, у әԝе дьле мьн гәләк ша кьрийә!» Гава Йаһоԝа дьвинә кӧ әм чьԛас сәр хԝә дьхәбьтьн у щәфа дькʹьшиньн ԝәки бь дьл у щан ԝирʹа хьзмәт кьн, әԝ мә дьһа ԛайим һʹьз дькә!

20. Тӧ ча хьзмәткʹаре Йаһоԝа, бона кʹижан пешдачуйинед хԝә ша дьби?

²⁰ Тӧ хьзмәткʹарәки Йаһоԝа йи, ләма тӧ малбәта ԝида әндәмәки һежа йи. Йаһоԝа тӧ кʹьшандийә бал хԝә, нә жь бо ве йәке кӧ тӧ жь мәрьвед дьн четьр и, ле чьмки әԝи дьле тә ньһерʹи, дит кӧ тӧ йәки мьлук и, һазьр и жь ԝи һин би у бейи гӧһастьне (Зәбур 25:9). Баԝәр бә кӧ гава тӧ чь жь дәсте тә те дьки ԝәки ԝирʹа хьзмәт бьки, әԝ ве йәке гәләк ԛимәт дькә. Амьнийа тә нишан дькә ԝәки дьле тә «сах у ԛәнщ» ә (Луԛа 8:15). Ләма, бәрдәԝам кә чьԛас жь дәсте тә те бь дьл у щан Йаһоԝарʹа хьзмәт кә. Һәгәр тӧ ӧса бьки, тӧйе бькарьби кьред хԝәрʹа у пешдачуйина хԝәрʹа ша би!