1. Bwabiny Yehow kiinoh bend wiitufwanyikij ni bakwaabw?

YEHOW i mukat kutal biit bya mishind ni mishind. Bwaal oobw i bwa biin-biin hatutaatal biit bidyey muhang bitukeekemesh, mishind yishiil-shilangan ya mitond, ya nyam ni ya baat. Tut boos tudy bashiilangan. Nook, Yehow kiin mwanj kukufwanyikijoh bend ni bakwaabw. Ukookontonon micim yiibuh , tuleeb neey: buumuut bwiibuh. (1 Sam. 16:7) Cikwaabw i mumanyik myand yiwudy mwa kulong ni yiwudy kuy mwa kulong ni cyaab ciwudy mukasakeen. Ni kiinoh bend mwa kukulomb myand yikwaabw yiwudy kuy mwa kukumbaj. Bikaam twiidikij Yehow hakutal myand teng bu yiy. Twiiyiiy kwiikal ni “meej malengel,” katuy tulang neey bakwaabw i bituhitok.​—Rom 12:3, NWT.

2. Bwabiny kabiin bilengel bwa kwiifwanyikij ni bakwaabw?

² Biin-biin tudy mwa kulongel ku cileejel cilengel cya mwiin-kweet mwaan-mulum eeny mwaan-mukaj wa lulamat udy muhet bihet bilengel mu mudimw a bukajaady. (Ebr. 13:7) Tudy mwa kulongel ku cileejel cindiy mushind mulengel utudy mwa kulengej mudimw iitut a bukajaady. (Fili. 3:17) Ki kudy dishiilangan hakulond cileejel cilengel cya muut ni mushind a kukal naacy mudimw ni kihacil ka kwiifwanyikij nend. Uw wiifwanyikij nook, udy mwa kwiiy kuhet mukaw, ukooyel mu mabok, eecy wiiyumvw kuy ni buseeb. Teng mutwaakady balong mu ciin bwaal cishaal, kwiitemb ni baat bakwaabw ba mu cisumbw kudy mwa kunyang bulund bwiitut ni Yehow. Ki bwaal kaay Yehow wiitubeebel ni lukat loos neey: “Muut ni muut atal kushikat kwindiy. Biikaley mutal ney i kulengel iitumbish [‘asangal’, NWT], ki alek kufwaanyikij ni kushikat kwa bakwaabw.”​—Kal. 6:4.

3. I myand kaay yidy yikuhetesh musangal yileeleej neey udy muy kuuhal mu myand ya mu spirit?

 ³ Yehow i mukat bwa wiikal ni musangal bwa muwuyaay kuuhal mu myand ya mu spirit. Cileejel, uw mutambul, bikaam wiikal ni musangal muwudy mukumbaj kihacil aak! I dihangadik diwudy mwangat kayeeb. Udy mwangat dihangadik aady bwa lukat lwiibuh bwa Mawej. Lang cikwaabw bwa muwudy muy kuuhal mu myand yoos ya mu spirit yiwukaady mulong. Cileejel: udy mukatok kubal ni kulong Bibl bikasakan eeny? Udyaakaloh ulong masambil miibuh ni mucim woos eeny? (Mus. 141:2) Ukaady mutwaadijok kudiil baat musah mwiilekelel ni mu mushind mulengel eeny? Ukaakalok mudimw bilengel ni video ni byaamw bya kulongweesh naaby eeny? Uw mwiikal ni cisak, Yehow i mukwambulwiishok bwa kwiikal mwaan-mulum, mwaan-mukaj eecy mulel mulengel eeny? Udy mwa kwiikal biin-biin ni musangal bwa muwuyaay kuuhal mu myand eey.

4. I biny bitwiiyiiy kulong mu ciin bwaal eecy?

⁴ Tudy mwa kwambulwiish bakwaabw bwa biikal ni musangal bwa myand ya mu spirit yidyobw balong. Tudy mwa kwiibambulwiish cikwaabw bwa balek kwiifwanyikij ni bakwaabw. Mu ciin bwaal eecy, twiiyiiy kutal mudy balel mwa kwambulwiish baan baababw, mudy biin maluw mwa kwambulwiishangan ni mushind udy bakul ni baat bakwaabw mwa kwambulwiish biin-kweet mu cisumbw. Ku bulekel, twiiyiiy kutal mudy may matam ma mu Bibl mwa kwiitwambulwiish bwa kwiifundil bihacil bya meej bitudy mwa kukumbaj.

5. Bilondeshel mukand a Biin Efez 6:4, bikaam balel balek kulong biny?

⁵ Kabiin bikaam balel biikal bafwanyikij mwaan ni mukwaabw eecy kwambil mwaan bwa kulong bwaal budyey kay mwa kukumbaj. Kufwanyikij ook, kudy kakuy kulengel ni kwa meej, kudy mwa kufulwiij mwaan mund. (Bal Biin Efez 6:4.) Mwiin-kweet mwaan-mukaj Sachiko * uleeleeb neey: “Balongweesh baamim baakady bakaam bwa niikal ni bihet bilengel bihitok balony naany mu kalaas. Cikwaabw, maam waakady mukat bwa niikal nalong myand yilengel mu kalaas ni kihacil ka kudiil mulongweesh aam ni taat a mim udy kay temw musah mulengel. Biin-biin, waakady ukaam bwa nahet teng bya lukam ha lukam mu mateet, ki byaakady bikasakan bwa kulong nook. Ning munaakady muman kalaas kukaady mivw yivul, misang yikwaabw nalaalang neey: Yehow ning udy ni musangal bwa myand yilengel yinamuloolongel.”

6. I biny bidy balel mwa kulongel ku may mady mu Musambw 131:1, 2?

 ⁶ Tusaasangan dilongweesh dya buseeb bwa balel mu mukand a Musambw 131:1, 2. (Bal.) Mukaleng Davih uleebel neey: kaakady ukaam kulong myand yikasakan eecy kulong myand yaakady yimuhit diikand, kwiihweekej kwindiy ni meej malengel byaakady ‘bimushikik tatal.’ I biny bidy balel mwa kulongel ku may ma Davih? Balel bady mwa kwiikal biin kwiihweekej ni biin meej malengel, kabiin teng mwa kulomb mwaan aababw bwa kulong myand yidy yimukasakeen. Balel bady mwa kwambulwiish mwaan aababw bwa kumanyik myand yidyey mwa kulong ni yidyey kay mwa kulong ni bwa kwiifundil bihacil bidyey mwa kukumbaj. Mwiin-kweet mwaan-mukaj Marina uvuuvuluk neey: “Maam a mim kiin mwanj kuufwanyikijoh bend ni baan-beet basat baan-balum eecy baan bakwaabw mu mushind a kulong myand. Waakady uulongweesh neey: muut woos udy ni ciheel cindiy ni tut boos tudy ni buseeb ku mees kwa Yehow. Ku dyambulwiish dindiy ciinoh bend niifwanyikij ni bakwaabw.”

7-8. I mushind kaay udy mwaan-mulum mwa kuleej mukaj indiy kaneemw?

⁷ Bikaam mwaan-mulum mwiin Krist a leej mudyey uneemek mukaj indiy. (1 Py. 3:7) Kuneemek kumvumvwiij, kukun bakwaabw mat ni kwiibangat ni buseeb. Cileejel, hady mwaan-mulum ulongel mukaj indiy myand ni kaneemw uleeleej mudyey umwangat ni buseeb. Kiin mwa kumulomb bwa kulong myand yidyey kay mwa kukumbaj. Ni kiishoh bend mwa kumufwanyikij ni baan-bakaj bakwaabw. Mwaan-mukaj udy mwa kumvw bicy hady mbaayend umufwanyikij ni bakwaabw? Mbaayend a Rosa udy kay temw a Yehow, waakady teng umufwanyikij ni mwaan-mukaj mukwaabw. Rosa kaakady uteekel mbaayend micim, bwaal waakady umuleeb may maakady mamutah. Uleeleeb neey: “Nady mukat kujaadik ning nady ni buseeb ku mees kwa Yehow.” Mwaan-mulum mwiin Krist, udyaakal uneemek mukaj indiy. I mumanyik neey: yiy mulong nook, bulund bwindiy ni mukaj bukaakasakan, ni bulund bwindiy ni Yehow bukaakasakan byaabw. *

⁸ Mwaan-mulum uneeneemek mukaj indiy, uleeleeb bilengel bwindiy, umuleeleej mudyey mumukat ni umufwiijok. (Tus. 31:28) Ki mushind udy mbaayend a Katerina uleebelobw mu ciin bwaal cishaal, mwambulwiish mukaj indiy bwa kulek kwiitaley neey: kiinoh bend ni buseeb. Ha cyaakadyey mwaan, maam indiy waakady umuheehej hakumufwanyikij ni baan-bakaj bakwaabw ni balund nend. Bu cihet, Katerina waakady mutwaadij kwiifwanyikij ni baat bakwaabw—ning haanyim a yiy muman kushaal temw a Yehow! Nook, mbaayend mwiin Krist i mumwambulwiish bwa kulwiish meej mabiih aam, ni bwa kwiikaley ni meej malengel. Uleeleeb neey: “I muukat, uufwiifwiijok bwa myand yilengel yinaloolong ni uusaasambidil. Ni uuvuuvulwiijok cikwaabw biikadil bilengel byeeh bya Yehow ni uuyaayambulwiish bwa kulek kwiikal ni meej mabiih.”

9-10. Bakul ba lukat luvul i bambulwiish mwaan-neet mwaan-mukaj bwa kucimun meej ma kwiifwanyikij ni bakwaabw bicy?

⁹ I mushind kaay udy bakul mwa kwambulwiish baat bady ni meej ma kwiifwanyikij ni bakwaabw? Tutalaay bwaal bwaakady bufikil mwiin-kweet mwaan-mukaj Hanuni, waakadyobw kabay bafwiijok hacyaakadyey mwaan-mutofw. Uvuuvuluk neey: “Naakady muut waakady kay uleeb menmen, naakady natal neey: baan bakwaabw baakady baahitok. Naakady mutwaadij kwiifwanyikij ni bakwaabw teng hanacyaakady mwaan-mutofw.” Ning haakady Hanuni mushaal temw a Yehow, waakady teng ulw diivit bwa kulek meej aam. Bu cihet,  waakady mwiital bu muut waakady kay ni buseeb mu cisumbw. Kaabaak, i seb’aa njil ukaakal mudimw ni musangal. I biny bimwambulwiishil bwa kushiitulul meej mindiy?

¹⁰ Hanuni uleeleeb neey: baakady bamwambulwiish kudy bakul ba lukat ni kumufwiijok bwa cileejel cindiy cya lulamat. Uleeleeb neey: “Haanyim a mafuk, bakul baakady baalomb bwa kukashish biin-kweet baan-bakaj bakwaabw baakady bakaam dyambulwiish. Mudimw oow waakady mulong bwa niiyumvw neey: nady ni buseeb. Navuuvuluk mwaakady bakul ba lukat baafwiijok bwa munaakady mukashish baasand baan-bakaj bakwaabw. Cikwaabw baakady baabadil mukand a 1 Biin Tesalonik 1:2, 3. Byaakady biiyakish musangal muvul! Nafwiifwiijok bikasakan balamy balengel aab, nady mumanyik neey: nady ni cyaab mu bulongolody bwa Yehow.”

11. Teng mudyobw bibileej mu mukand a Yeshaay 57:15, i mushind kaay utudy mwa kwambulwiish aab “bakaakabishobw ni bady ni micim ya kwiihweekesh?”

¹¹ Bal Yeshaay 57:15. Yehow wiitaatacish bikasakan bwa aab “bakaakabishobw ni bady ni micim ya kwiihweekesh.” Kabiin teng bakul kayaabw bady mwa kukashishangan, ki tut boos tudy mwa kukashishangan mu cisumbw. Mushind utudy mwa kwiibakashish, i kuleej mutwiibataatacil ni mucim woos. Yehow ukaakaam bwa twiibaleej neey: i mwiibakat bikasakan. (Tus. 19:17) Cikwaabw tudy mwa kwambulwiish baan-beet baan-balum ni baan-bakaj ni kwiihweekej ni meej malengel. Katwiin teng mwa kukok meej maababw kutudy, bwaal bidy mwa kujuul bakwaabw mukaw. Hamut a kulong nook, bikaam muut woos akal mudimw ni cihel cidyey naacy ni diimany bwa kukashish bakwaabw.​—1 Py. 4:10, 11.

12. Bwabiny baat biin kwiihweekesh baakady bakat kuy kudy Yeez? (Tal cifwaatul cya ha cizubw.)

¹² Tudy mwa kulongel bakwaabw myand ha kulond mushind waakady Yeez ulongel biiyij bindiy. Muut mutam weeh wa kacy ni kacy. Cikwaabw, waakady “mutalal myand ni mutukij micim.” (Mat. 11:28-30) Kaakadyoh bend wiileej bwa meej ni diimany divul byaakadyey naaby. Waakady ulongweesh mu may mahehel ni utwaal bileejel bilengel byaakady mwa kwambulwiish baat bwa kumvw ni byaakady biteng baat baakady ni micim ya kwiihweekesh. (Luuk 10:21) Bishilangan ni bafumw ba bitendeleel biin kwiiyumb kwa mwiiwul, ki Yeez waakady teng ulongel bakwaabw myand bwa biital neey bady ni buseeb ku mees kwa Mawej. (Jah 6:37) Nook, waakady uneemek baat boos.

13. I mushind kaay waakady Yeez muleej biiyij bindiy mucim mulengel ni lukat?

¹³ Mucim mulengel ni lukat bya Yeez byaakady bimweekel mu mushind waakadyey ulongel biiyij bindiy myand. Waakady mumanyik neey kabaakady mwa kulong myand mu mushind aakaabumw. Nook, kabaakady mwa kwiikal ni majit maakaabumw; ni boos kabaakady mwa kuhet bihet byaakaabumw mu mudimw a bukajaady. Cikwaabw waakady ni musangal bwa mwaakady muut woos wiikashishomw bwa kukal mudimw. Yeez utwaadil kasumw ka talant bwa kuleej mushind waakadyey wiiyumvw. Fumw a mudimw waakady mwaakish muhik woos mudimw “hakutal meej maakady naam muut ni muut.” Umw wa ku bahik babidy baakady bakal mudimw ni cisumy, uhetel diifut muhitok mukwaabw. Ki fumw aabw kwiibafwiijok ni may aam: “I bilengel, aash udy mwiin mudimw mulengel udy ni cisumy!”​—Mat. 25:14-23.

14. I mushind kaay utudy mwa kulond mu diikas dya Yeez mu mushind utuloolongel bakwaabw myand?

¹⁴ Yeez ucidy teng wiitulongel myand ni mucim mulengel ni lukat. I mumanyik bidy muut woos mwa kulong ni cyaab cidyey mukasakeen. Ki usaasangal bwa kwiikashishomw kwiitut. Bikaam twiidikij cileejel cya Yeez mu mushind a kulongel bakwaabw myand. Katwiin mwa kulongel mwiin-kweet myand yidy mwa kulong bwa iital neey: kiin ni buseeb eecy yidy  mwa kumufwiij bumvw, bwaal kiin ulong myand bu bakwaabw. Hamut a kulong nook, bikaam twiikal tufwiijok baan-beet baan-balum ni baan-bakaj bwa myand yilengel yidyobw bakal mu mudimw a Yehow.

15-16. I biny byaakady byambulwiish mwiin-kweet mwaan-mukaj bwa kwiitaley neey udy ni buseeb?

¹⁵ Biihacil biitut bya mu spirit biloolong bwa buumy bwiitut bwiikal ni kiihacil. Ki bikaam twiifundil biihacil bitudy mwa kukumbaj bilondeshel bukash bwiitut, katulondoh bend bidy bakwaabw biifundil. Katwiin bakat kwiifundil biihacil bidy mwa kwiitumb mwanz ku makas ni kwiitukooyesh mu mabok. (Luuk 14:28) Tal cileejel cya seb’aa njil mwaan-mukaj ubiibiikanobw neey: Midori.

¹⁶ Taatend a Midori, ukiish temw a Yehow, waakady umuheehej hacyaakadyey mutofw a kumufwanyikijey ni baan baabw ni balund nend ba mu kalaas. Midori uleeleeb neey: “Cyaakadyoh bend niiyumvw ni buseeb.” Ki hakasakeeney, wiiyil kumanyik neey: nady ni buseeb. Uleeleeb neey: “Naakady nabal Bibl diifuk dyoos bwa kwiikal ni diitalal dya mu micim ni naakady natal neey: Yehow iimuukat.” Cikwaabw, waakady mwiifundil biihacil bya meej, ni waakady usambil Yehow bwa amwambulwiish bwa kukumbajey biihacil aaby. Bu cihet, Midori waakady ni musangal bu mwaakadyey uy kuuhal mu myand ya mu spirit.

17. I mushind kaay utudy mwa “kwiikal baat bahyaabahy mu micim yiitut ni mu meej miitut,” ni twiiyiiy kuhet biny?

¹⁷ Byangangat mafuk mavul bwa kushiitulul mushind ututaatal myand yiitut. Ki bwabiny Yehow wiitubeebel neey: “Nwiikal baat bahyaabahy mu micim yiinun ni mu meej miinun.” (Ef. 4:23, 24) Bwa kwiikal nook, bikaam wiikal usambil, ubal diiy dya Mawej ni ulangiloh. Kooyel myand eey ni lomb Yehow bwa akukashish. Spirit indiy mujilang wiiyiiy kukwambulwiish  bwa kuful meej ma kwiifwanyikij ni bakwaabw. Yehow wiiyiiy ukwambulwiish kabidy bwa umanyik ning udy ni meej ma kacik eecy ma kwiiyumb mwiiwul, ni bwiibuh kushiituluk lwang-lwang.

18. I mushind kaay udy may mady mu mukand a 2 Cifuk 6:29, 30 mitukashish ?

¹⁸ Bal 2 Cifuk 6:29, 30. Yehow i mumanyik myand yitulaalang. I mumanyik cikwaabw mutulwaal diivit—ni myand ya mu bulongolody oobw ni bilem biitut. Hady Yehow wiitutal mu tulwaal diivit ni myand eey, wiitukaakat bikasakan.

19. I cileejel kaay cidy Yehow mutwaal bwa mushind udyey wiidyumvw bwiitut?

¹⁹ Bwa kuleej mwiiyumvumvwey bwiitut, Yehow ukaakal mudimw ni cileejel cya maam mulel ni mwaan indiy. (Ye. 49:15) Tal cileejel cya maam ubiibiikanobw neey: Rachel. Waakady mufund neey: “Mwaan aam Stephanie waakady mulel kabish. Hanamutadil musang a kuuhal, kaakady ka mwaan kakeeh kakay’a makand. Waakady mulamin mu cyaamw mu suuny a kuuhal unaakady mumulel, ki mu mafuk moos ma suuny aaw, dokteer waakady muuyambil bwa kwiikal kuy teng ku lupitaady bwa kumwangatok. Ciisang eecy i citwambulwiish bwiitut kukatangan bikasakan ni mwaan. Udy kaabaak ni mivw yisambombw ni i mumweek mutofw menmen kudy baan ba mulong nend. Nady mumukat bikasakan bwaal i mul diivit menmen bwa kushaaley ni buumy, ni i muuhetej musangal muvul mu shikacil aamim!” Kabiin bitukashishok ku micim hakumanyik neey: Yehow i mwiitukat bikasakan hadyey wiitutal tul diivit bwa kumukadil mudimw ni mucim aakaabumw!

20. Tudy mwa kwiitumbish bwa tubingil kaay?

²⁰ Bu mutukaakadil Yehow mudimw, tut boos katwiin mushind aakaabumw, Yehow i mwiitwaakidil mu cisak cindiy bwaal tudy ni buseeb ku mees kwindil. Yehow kiinoh bend mukukok kudyey bwaal waakady ni buseeb muhitok bakwaabw. Yehow waakady mukukok kudyey bwaal waakady mutal neey: waakady mwiin kwiihweekesh ni waakady mukat kulong myand indiy bwa kushituluk. (Mus. 25:9) Iikal mutwiishibw neey: Yehow udy ni musangal hawuloolong mwiibuh mwoos bwa ku mukadil mudimw. Kutaatameen kwiibuh ni lulamat lwiibuh, ki kuleeleej neey: udy muut udy mumvw ‘diiy dya Mawej ni mwiidilam bilengel mu micim.’ (Luuk 8:15) Nook, tungunuk teng ni kwaakish Yehow cidy cilengel bwiibuh. Ni wiiyiiy kwiikal ni kabingil kalengel ka “kwiitumbish [‘kusangal’, NWT].”