1. Wetin mek Jiova nɔ de kɔmpia wi wit ɔda pipul dɛn?

JIOVA nɔ want ɔltin ɛn ɔlman fɔ bi di sem. Wi no dis bikɔs i mek difrɛn difrɛn plant dɛn, animal dɛn, ɛn ivin mɔtalman dɛn. Nɔbɔdi nɔ fiba yu pan ɔltin. So Jiova nɔ de ɛva kɔmpia yu wit ɔda pipul dɛn. I de si wetin de na yu at ɛn udat yu rili bi insay. (1 Sam. 16:​7) I no bak wetin yu ebul fɔ du fayn, wetin yu nɔ ebul fɔ du, ɛn di we aw yu mɛn. Ɛn i nɔ de aks yu fɔ du wetin yu nɔ ebul fɔ du. Wi nid fɔ falamakata Jiova bay we wi de si wisɛf lɛk aw i de si wi. Dɔn wi go “tink di kɔrɛkt we,” bay we wi nɔ de tink se wi tu impɔtant ɔ wi nɔ gɛt valyu.—Rom. 12:​3.

2. Wetin mek i nɔ fayn fɔ kɔmpia wisɛf wit ɔda pipul dɛn?

² Wi kin lan frɔm ɔda pipul dɛn gud ɛgzampul. Sɔntɛm, wi sabi wan brɔda ɔ sista we sabi prich gud gud wan. (Ibru. 13:​7) Wi kin lan aw wi go sabi fɔ prich lɛk dɛn. (Fil. 3:​17) Bɔt difrɛns de bitwin we yu de falamakata pɔsin in gud ɛgzampul ɛn we yu de kɔmpia yusɛf wit am. If wi de kɔmpia wisɛf wit ɔda pipul dɛn, wi go milɛ dɛn, wi at go pwɛl, ɔ wi go ivin fil se wi nɔ impɔtant. Akɔdin to wetin wi lan na di atikul bifo dis wan, if wi tray fɔ mek kɔmpitishɔn wit wi brɔda ɛn sista dɛn na di kɔngrigeshɔn, wi go pwɛl wi padi biznɛs wit Jiova. So Jiova de ɛnkɔrej wi se: “Lɛ ɔlman wach di tin dɛn we i de du, ɛn i go gɛt rizin fɔ gladi fɔ wetin i dɔn du. I nɔ fɔ kɔmpia insɛf wit ɔda pɔsin.”—Gal. 6:​4.

3. Us chenj dɛn yu dɔn mek fɔ wɔship Jiova we de mek yu gladi?

 ³ Jiova want yu fɔ gladi fɔ ɔl di tin dɛn we yu de du fɔ go bifo as yu de wɔship am. Fɔ ɛgzampul, if yu dɔn baptayz, yu fɔ gladi bikɔs yu ebul fɔ rich da gol de. Na yusɛf sɛf disayd fɔ du dat. Yu bin du am bikɔs yu lɛk Gɔd. Tink bɔt ɔl wetin yu ɔn du afta dat. Fɔ ɛgzampul, yu dɔn lɛk fɔ du yu pasɔnal Baybul ridin ɛn pasɔnal stɔdi mɔ ɛn mɔ? Yu prea dɛn dɔn gɛt mɔ minin ɛn dɛn de kɔmɔt na yu at? (Sam 141:​2) I dɔn izi mɔ fɔ mek yu stat fɔ prich to pipul dɛn ɛn fɔ yuz di tin dɛn we wi de yuz fɔ prich gud gud wan? Ɛn if yu gɛt famili, Jiova dɔn ɛp yu fɔ bi gud maredman, mareduman, ɔ gud mama ɛn papa? Yu kin gladi ɛn rili fil fayn fɔ ɔl di chenj dɛn we yu dɔn mek.

4. Wetin wi go tɔk bɔt insay dis atikul?

⁴ Wi kin ɛp ɔda pipul dɛn fɔ gladi fɔ di tin dɛn we dɛn de du fɔ go bifo pan dɛn savis to Jiova. Wi kin ɛp dɛn bak fɔ lɛf fɔ kɔmpia dɛnsɛf wit ɔda pipul dɛn. Insay dis atikul, wi go tɔk bɔt aw mama ɛn papa dɛn kin ɛp dɛn pikin dɛn, aw maredman ɛn mareduman dɛn kin ɛp dɛnsɛf, ɛn aw ɛlda dɛn ɛn ɔda pipul dɛn kin ɛp dɛn brɔda ɛn sista dɛn. Dɔn, wi go tɔk bɔt sɔm Baybul prinsipul dɛn we go ɛp wi fɔ sɛt gol dɛn we wi go ebul fɔ rich.

5. Akɔdin to Ɛfishians 6:​4, wetin mama ɛn papa dɛn nɔ fɔ du?

⁵ Mama ɛn papa dɛn fɔ tek tɛm mek dɛn nɔ kɔmpia wan pikin wit ɔda pikin, ɔ dɛn nɔ fɔ ɛkspɛkt se dɛn pikin go du pas wetin i ebul fɔ du. If mama ɛn papa dɛn du dis, dɛn go mek dɛn pikin in at pwɛl. (Rid Ɛfishians 6:​4.) Wan sista we nem Sachiko * bin se: “Mi ticha dɛn bin de ɛkspɛkt mi fɔ du wɛl pas mi ɔda klasmet dɛn na skul. Pantap dat, mi mama bin want mi fɔ du wɛl na skul so dat mi ticha ɛn mi papa we nɔto Jiova Witnɛs go tink gud tin bɔt Jiova in pipul dɛn. Infakt, i bin want mek a de gɛt 100 pasɛnt pan mi ɛgzam dɛn, bɔt dat nɔ bin pɔsibul. I dɔn tek lɔng tɛm we a lɛf skul, bɔt sɔntɛnde, a kin fil se Jiova nɔ gladi wit mi, ilɛksɛf a du mi bɛst.”

6. Wetin mama ɛn papa dɛn kin lan frɔm Di Sam Dɛm 131:​1, 2?

 ⁶ Wan impɔtant lɛsin we mama ɛn papa dɛn kin lan de na Di Sam Dɛm 131:​1, 2. (Rid.) Kiŋ Devid bin tɔk se “natin nɔ ful [in] yay,” ɛn i nɔ put insɛf usay i nɔ rich. Bikɔs i bin ɔmbul, i nɔ bin de “wɔri.” Wetin mama ɛn papa dɛn kin lan frɔm wetin Devid bin se? Fɔ mek mama ɛn papa dɛn go ɔmbul, dɛn nɔ fɔ ɛkspɛkt se dɛn ɛn dɛn pikin dɛn go du pas wetin dɛn ebul fɔ du. Mama ɛn papa dɛn kin ɛp dɛn pikin dɛn fɔ no se dɛn impɔtant bay we dɛn de ɛp dɛn fɔ no wetin dɛn ebul fɔ du ɛn wetin dɛn nɔ ebul fɔ du. Dɔn bak, dɛn kin ɛp dɛn fɔ sɛt gol dɛn we dɛn go ebul fɔ rich. Wan sista we nem Marina bin se: “Mi mama nɔ ɛva kɔmpia mi ɛn mi tri brɔda dɛn ɔ wit ɔda pikin dɛn. I bin tich mi se ɔlman gɛt difrɛn gift dɛn, ɛn ɔlman valyu to Jiova. A de tɛl mi mama tɛnki bikɔs i dɔn mek i nɔ izi fɔ mek a kɔmpia misɛf wit ɔda pipul dɛn.”

7-8. Aw maredman go sho ɔnɔ to in wɛf?

⁷ Maredman we na Kristian fɔ ɔnɔ in wɛf. (1 Pit. 3:​7) Fɔ ɔnɔ pipul dɛn min se wi de gi dɛn spɛshal atɛnshɔn, ɛn wi de rɛspɛkt dɛn. Fɔ ɛgzampul, maredman go ɔnɔ in wɛf bay we i de trit am wit rɛspɛkt. I nɔ de aks am fɔ du wetin i nɔ ebul fɔ du. Ɛn i nɔ de kɔmpia am wit ɔda uman dɛn. Aw mareduman go fil if in man de kɔmpia am wit ɔda uman? Wan sista we nem Roza, we in man nɔto Jiova Witnɛs, kin de kɔmpia am wit ɔda uman dɛn ɔltɛm. I kin tɛl Roza at at wɔd dɛn we mek i nɔ jɔs de fil bad bɔt insɛf, bɔt i de dawt if ɛnibɔdi lɛk am. Roza se: “A nid fɔ mek dɛn de mɛmba mi ɔltɛm se Jiova valyu mi.” Bɔt maredman we na Kristian de ɔnɔ in wɛf. I no se if i de du dat, i go ɛp dɛn mared-os ɛn i go gɛt tayt padi biznɛs wit Jiova. *

⁸ Maredman go ɔnɔ in wɛf bay we i de tɔk fayn tin bɔt am to ɔda pipul dɛn, tɛl am se i lɛk am ɛn i valyu am. (Prɔv. 31:​28) Katarina, we wi bin dɔn tɔk bɔt na di atikul bifo dis wan, in man dɔn ɛp am fɔ mek i nɔ fil se ɔda pipul dɛn valyu pas am. We Katarina na bin pikin, in mama bin de tɔk bad bɔt am, ɛn ɔltɛm i bin de kɔmpia am to in padi dɛn ɛn ɔda titi dɛn. So Katarina bigin fɔ kɔmpia insɛf to ɔda pipul dɛn, ɛn i kɔntinyu fɔ du so ivin we i bin dɔn bi Jiova Witnɛs. Bɔt in man bin ɛp am fɔ stɔp fɔ du dat ɛn fɔ tink bɔt insɛf di rayt we. Katarina se: “Mi man lɛk mi, i de tɛl mi tɛnki we a du fayn tin, ɛn i de pre fɔ mi. I de mɛmba mi bak bɔt Jiova in wɔndaful kwaliti dɛn, ɛn i de ɛp mi fɔ kɔrɛkt di rɔŋ we aw a de tink.”

9-10. Aw ɛlda dɛn bin ɛp wan sista fɔ mek i lɛf fɔ kɔmpia insɛf wit ɔda pipul dɛn?

⁹ Aw ɛlda dɛn go ɛp di wan dɛn we kin kɔmpia dɛnsɛf to ɔda pipul dɛn? Lɛ wi tɔk bɔt wan sista we nem Anuni. We i bin smɔl, na wan wantɛm dɛn bin de tɛl am tɛnki. I se: “A bin de shem ɛn a bin de fil se ɔda pikin dɛn bɛtɛ pas mi. A bigin fɔ kɔmpia misɛf wit ɔda pipul dɛn frɔm we mi na bin smɔl pikin.” Anuni bin kɔntinyu fɔ kɔmpia insɛf wit ɔda pipul dɛn ivin afta we i kam na di trut. So i bin  de fil se wetin i de du na di kɔngrigeshɔn nɔ impɔtant. Bɔt naw, i dɔn gladi mɔ we i de sav as payɔnia. Wetin bin ɛp am fɔ chenj da abit de?

¹⁰ Anuni se di ɛlda dɛn bin gud to am, ɛn dɛn bin ɛp am. Dɛn se i gɛt impɔtant tin fɔ du na di kɔngrigeshɔn, ɛn dɛn tɛl am tɛnki fɔ in gud ɛgzampul. I rayt se: “Wan wantɛm, di ɛlda dɛn bin de aks mi fɔ ɛnkɔrej sɔm sista dɛn we bin nid ɛp. Dis wok bin de mek a no se dɛn nid mi. A mɛmba we di ɛlda dɛn bin tɛl mi tɛnki fɔ di ɛnkɔrejmɛnt we a bin gi sɔm yɔŋ sista dɛn. Dɔn dɛn bin rid 1 Tɛsalonians 1:​2, 3 to mi. Dat bin mek a rili gladi. A de tɛl bɔku tɛnki to dɛn gud shɛpad dɛn ya bikɔs naw a no se a impɔtant na Jiova in ɔganayzeshɔn.”

11. Aw wi go ɛp di wan dɛn we Ayzaya 57:​15 se “gɛt sɔri . . . spirit”?

¹¹ Rid Ayzaya 57:​15. Jiova rili bisin bɔt di wan dɛn we “gɛt sɔri . . . spirit.” Wi ɔl kin ɛp fɔ ɛnkɔrej dɛn wi brɔda ɛn sista dɛn ya we wi lɛk, nɔto di ɛlda dɛn nɔmɔ fɔ du dat. Wan we we wi kin ɛnkɔrej dɛn na bay we wi de sho se wi rili bisin bɔt dɛn. Jiova want wi fɔ sho dɛn aw i rili lɛk dɛn. (Prɔv. 19:​17) Wi kin ɛp wi brɔda ɛn sista dɛn bak bay we wi de put wisɛf dɔŋ ɛn nɔ bost bɔt di tin dɛn we wi sabi du. Wi nɔ want fɔ mek pipul dɛn pe atɛnshɔn to wi bikɔs wi nɔ want fɔ mek ɛnibɔdi jɛlɔs wi. Bifo dat, wi want fɔ yuz wetin wi sabi du ɛn di sɛns we wi gɛt fɔ ɛnkɔrej ɔda pipul dɛn.—1 Pit. 4:​10, 11.

12. Wetin mek ɔdinari pipul dɛn bin lɛk fɔ de wit Jizɔs? (Luk di pikchɔ na di frɔnt pej.)

¹² Wi kin lan bɔku tin dɛn bɔt aw fɔ trit ɔda pipul dɛn we wi wach aw Jizɔs bin de trit di wan dɛn we bin de fala am. In na di pɔsin we impɔtant pas ɔlman we dɔn liv na di wɔl, bɔt i bin “de tek tɛm du tin ɛn [i bin] ɔmbul.” (Mat. 11:​28-30) I nɔ ɛva bost bɔt di sɛns we i gɛt ɛn ɔl di tin dɛn we i sabi du. We i bin de tich pipul dɛn, i bin de yuz simpul langwej, ɛn i bin de yuz ɛgzampul we izi fɔ ɔndastand ɛn we bin de tɔch di ɔdinari pipul dɛn at. (Lyuk 10:​21) Jizɔs nɔ bin tan lɛk di bigman dɛn pan Gɔd biznɛs we bin prawd. Ɔltɛm, i bin de mek ɔda pipul dɛn no se dɛn impɔtant to Gɔd. (Jɔn 6:​37) I bin de trit di ɔdinari pipul dɛn wit rɛspɛkt.

13. Aw di we we Jizɔs bin de trit in disaypul dɛn sho se i gɛt lɔv ɛn i gud?

¹³ Di we aw Jizɔs bin de trit in disaypul dɛn bin de sho se i gɛt lɔv ɛn i gud. I bin no se dɛn sabi fɔ du difrɛn tin dɛn, ɛn nɔto di sem tin bin de apin to dɛn ɔl. So dɛn nɔ go ebul fɔ du di sem wok dɛn, ɛn dɛn nɔ go ebul fɔ du di prichin wok di sem we. Bɔt i bin gladi fɔ we dɛn de du dɛn bɛst. Jizɔs bin sho se na so i de fil bay we i pul di parebul bɔt di talɛnt. Insay da parebul de, di masta bin gi di slev dɛn di wok we dɛn “go ebul kia fɔ.” Wan pan di tu slev dɛn we bin wok tranga wan bin gɛt pas di ɔda wan. Bɔt di masta bin tɔk di sem tin fɔ tɛl dɛn ɔltu tɛnki. I bin se: “Yu dɔn du wɛl, yu na slev we gud ɛn fetful!”—Mat. 25:​14-23.

14. Aw wi go falamakata di we aw Jizɔs bin de trit ɔda pipul dɛn?

¹⁴ Di we aw Jizɔs de trit wi de sho se i gɛt lɔv ɛn i gud. I no se na difrɛn tin dɛn wi sabi fɔ du ɛn na difrɛn tin dɛn de apin to wi, ɛn i gladi we wi de du wi bɛst. Wi fɔ falamakata Jizɔs. Wi nɔ fɔ ɛva  mek wi brɔda ɛn sista dɛn fil se dɛn nɔ impɔtant ɔ mek dɛn shem bikɔs dɛn nɔ ebul fɔ du wetin ɔda pipul dɛn de du. Bifo dat, wi fɔ tɛl wi brɔda ɛn sista dɛn tɛnki ɔltɛm fɔ we dɛn de du dɛn bɛst fɔ sav Jiova.

15-16. Aw wan sista bɛnifit we i sɛt gol dɛn we i ebul rich?

¹⁵ We wi gɛt gol dɛn na Jiova in savis, wi layf go gɛt minin, ɛn wi go ɛnjɔy wi layf. Bɔt wi fɔ sɛt gol dɛn we wi go ebul fɔ rich. Wi nɔ nid fɔ sɛt gol dɛn lɛk ɔda pipul dɛn. If wi du dat, wi go gɛt pwɛlat. (Lyuk 14:​28) Lɛ wi tɔk bɔt wan payɔnia sista we nem Midori in ɛgzampul.

¹⁶ We Midori bin smɔl, in papa we nɔto Jiova Witnɛs bin de tɛl am se in yɔŋ brɔda ɛn sista ɛn in klasmet dɛn bin bɛtɛ pas am. Midori se, “A bin de fil se a nɔ impɔtant.” Bɔt as i bin de gro ɔp, i stat fɔ fil gud bɔt insɛf. I se, “A de rid di Baybul ɛvride bikɔs dat de ɛp mi fɔ gɛt kolat ɛn fɔ si se Jiova lɛk mi.” Pantap dat, i bin sɛt gol dɛn we i go ebul rich, ɛn i bin pre fɔ mek Jiova ɛp am fɔ rich dɛn gol dɛn de. Dat bin ɛp Midori fɔ mek i gɛt gladi-at fɔ di tin dɛn we i ebul du fɔ Jiova.

17. Wetin go ɛp wi fɔ “kɔntinyu fɔ de chenj di we aw [wi] de tink,” ɛn wetin go apin we wi du dat?

¹⁷ I kin tek lɔng tɛm fɔ mek wi chenj di we aw wi de fil bɔt wisɛf. So Jiova de ɛnkɔrej wi bay we i se: “Una kɔntinyu fɔ de chenj di we aw una de tink.” (Ɛfi. 4:​23, 24) Fɔ du so, wi nid fɔ pre, stɔdi Gɔd in Wɔd, ɛn tink gud wan bɔt am. So na fɔ kɔntinyu fɔ de du dɛn tin dɛn ya, ɛn aks Jiova fɔ mek i gi yu di trɛnk we  yu nid. In oli spirit go ɛp yu fɔ mek yu lɛf fɔ de kɔmpia yusɛf wit ɔda pipul dɛn. Dɔn bak, Jiova go ɛp yu fɔ no if yu dɔn bigin fɔ milɛ ɔ prawd, ɛn i go ɛp yu fɔ chenj kwik kwik wan.

18. Aw di wɔd dɛn na Sɛkɛn Kronikul 6:​29, 30 de ɛnkɔrej wi?

¹⁸ Rid Sɛkɛn Kronikul 6:​29, 30. Jiova no wetin de na wi at. I no bak se wi de fɛt agens di tin dɛn na di wɔl ɛn di mistek dɛn we wi kin mek. We Jiova de si aw wi de tray tranga wan fɔ fɛt agens dɛn tin dɛn ya, i de lɛk wi mɔ ɛn mɔ.

19. Us ɛgzampul we Jiova yuz fɔ sho di we aw i de fil bɔt wi?

¹⁹ Fɔ lɛ Jiova sho wi aw i de fil bɔt wi, i yuz di ɛgzampul bɔt di lɔv we de bitwin mama ɛn in pikin. (Ayz. 49:​15) Lɛ wi tɔk bɔt wan mama we nem Rechɛl in ɛgzampul. I rayt se: “Mi galpikin Stɛfni bin bɔn as primachɔ. We a si am fɔ di fɔs tɛm, i bin rili smɔl ɛn i nɔ ebul ɛp insɛf. Bɔt di dɔktɔ dɛn bin alaw mi fɔ ol am ɛvride we wi bin de na di ɔspitul insay di fɔs mɔnt we i bɔn. Insay dɛn tɛm dɛn de, mi ɛn mi pikin bin rili kam fɔ lɛk wisɛf. I dɔn ol siks ia naw, ɛn i smɔl pas in kɔmpin dɛn we dɛn ɔl na sem ej. Bɔt a rili lɛk am bikɔs i tray tranga wan fɔ lɛ i nɔ day, ɛn i dɔn rili mek a gladi.” Wi kin rili gladi fɔ no se na da kayn lɔv de Jiova gɛt fɔ wi we i de si se wi de tray tranga wan fɔ du wi bɛst fɔ sav am.

20. As Jiova in savant, us rizin yu gɛt fɔ gladi?

²⁰ Bikɔs yu na Jiova in savant, dat min se yu de na in famili, yu gɛt valyu, ɛn no ɔda pɔsin nɔ tan lɛk yu. Jiova nɔ briŋ yu kam nia am bikɔs yu bɛtɛ pas ɔda pipul dɛn. Bɔt na bikɔs i luk insay yu at ɛn si se yu ɔmbul ɛn yu rɛdi fɔ lan frɔm am ɛn chenj di we aw yu de tink. (Sam 25:​9) Biliv tranga wan se i kin gladi we yu de du yu bɛst fɔ sav am. Bikɔs yu de bia ɛn yu fetful, dat de sho se yu gɛt gud “at.” (Lyuk 8:​15) So kɔntinyu fɔ du yu bɛst fɔ sav Jiova. We yu du dat, yu go gɛt gud rizin fɔ gladi “fɔ wetin [yu] dɔn du.”