1. Samu na yinki Yehova ke kompareke ve beto na bantu ya nkaka?

YEHOVA zola ve ti bima nyonso mpe bantu nyonso vanda faso mosi. Beto zaba yawu samu yandi salá ve bayinti, bibulu mpe ata bantu faso mosi. Na yinza nyonso, nge lenda kuzwa ve muntu yina ke faso nge na bamambu nyonso. Ni na yawu Yehova ke kompareke ve nge na bantu ya nkaka. Yandi ke talá ntima ya nge mpe yandi zaba nani nge kele. (1 Sa. 16:7) Yandi zaba mpe faso nge kulá, bima yina nge lenda sala bien mpe yina nge lenda sala ve na faso ya mbote. Mpe yandi lenda lomba ve na nge na kusala bima yina nge ke ve na ngolo ya kusala. Beto zolá landa ekzample ya Yehova mpe kutala banzutu ya beto faso yandi ke talak’ yawu. Ya ke sala ti beto vanda na ‘makanisi ya mbote,’ mpe beto kanisa ve ti beto me lutila bampangi to bampangi me lutila beto.—Rom. 12:3.

2. Samu na yinki ya ke yimbi na kusala bakomparezon na bampangi?

² Beto lenda longoka bamambu mingi ntangu beto ke talá ekzample ya mbote ya bampangi. Na kifwani, beto lenda zaba ti mpangi mosi ya bakala to ya kento zaba bien kusala kisalu ya predikasion. (Ebr. 13:7) Kutala yandi, lenda sadisa beto na kubongisa faso ya beto ya kupreche. (Flp. 3:17) Kasi, kulanda ekzample ya muntu mpe kusekompare na yandi ke ve kima mosi. Si nge ke na talá ti bampangi me lutila nge, nge lenda banda kutula meso na bima ya bawu. Dyaka, ya lenda lembisa nge, to nge lenda tala ti nge ke ve na valere. Kasi si nge ke na talá ti nge me lutila bampangi, faso beto talak’ yawu na artikle yina me luta, nge ke bebisa kikamarade ya nge na Yehova. Na yawu, na luzolo nyonso, Yehova ke zonzá na beto: “Konso muntu fwana kutala wapi mutindu kele nkadulu ya yandi mosi. Kana yandi ke na dyambu ya [kusepela], yandi ke sala yawu samu na yandi mosi. Kasi, yandi sala yawu ve  samu ti yandi ke na kubanza ti yandi me lutila bantu ya nkaka.”—Gal. 6:4.

3. Wapi bamambu ya kimpeve nge me lenda kusala yina ke na pesá nge kilengi?

³ Yehova ke na kilengi na nyonso yina nge me sala tii bubu yayi samu na kubongisa faso ya nge ya kusambila yandi. Na kifwani, si nge me zwá deja bateme, nge zola sepela na yina nge me luta etape yayi. Desizion yayi, nge bakak’ yawu nge mosi, samu nge ke zolá Nzambi. Kanisa na nyonso yina nge me lenda kusala depwi bateme ya nge. Na kifwani, nsatu ya nge ya kutanga Biblia mpe ya kulongoka yawu me kula? Nge mase salá mingi balusambu yina ke katuká na ntima? (Nku. 141:2) Nge me kuma ngolo na kubanda masolo na predikasion? Nge me bongisa faso ya nge ya kusadila mikanda mpe bavideo ya beto? Mpe si nge ke ya kukwela, Yehova me sadisa kwandi nge na kukuma bakala, kento, papa to mama ya mbote? Nge lenda vanda na kilengi na bima nyonso yayi nge me lenda kusala.

4. Yinki beto ke zonzila na artikle yayi?

⁴ Beto lenda sadisa bampangi na kuvanda na kilengi na nyonso yina ba ke na lendá kusala na kisalu ya Yehova. Beto lenda sadisa mpe bawu na kubika kifu ya kusalá bakomparezon na bampangi. Na artikle yayi, beto ke tala faso bapapa na bamama lenda sadisa bana ya bawu, bantu ya kukwela lenda sadisa bampangi, bakuluntu mpe beto nyonso lenda sadisa bampangi na kimvuka. Na kumanisa, beto ke zonzila mwa baverse yina lenda sadisa beto na kusala baproje ya kimpeve yina beto ke na ngolo ya kulungisa.

5. Faso me zonza Baefeze 6:4, yinki ba yina ke na bana zolá sala ve?

⁵ Ba yina ke na bana zolá sala keba na kukompare ve mwana mosi na mwana ya nkaka, to kuvingila ti mwana sala bima ya kulutila yina yandi ke na ngolo ya kusala. Si bapapa na bamama sala bamambu ya faso yayi, ba lenda manisa bana ngolo. (Tanga Baefeze 6:4.) Sachiko * mpangi mosi ya kento me zonza: “Baprofesere ya munu vandá vingila ti mu lutila bana ya nkaka yina vandá kotá na munu klase mosi. Mpe mama ya munu vandá zola mu vanda na banote ya bien na lekole, samu profesere ya munu na papa ya munu yina ke ve Temwe, vanda na dikanisi ya mbote na Batemwe ya Yehova. Na yawu, yandi vandá sosa mu kuzwa kaka ba 20/20, kima yina mu vandá lenda ve kusala. Ata mu manisá lekole depwi ntama, kasi bantangu ya nkaka, mu ke talá ti Yehova ke sepelá ve na yina mu ke salá samu  na yandi, ata ntangu mu ke salá bangolo ya munu nyonso.”

6. Yinki ba yina ke na bana lenda longoka na Nkunga 131:1, 2?

⁶ Bapapa na bamama lenda kuzwa malongi ya mbote na Nkunga 131:1, 2. (Tanga.) Mfumu David zonzá ti yandi vandá ve ‘na nsatu ya kuvanda na bima ya nene’ to kusala bima yina vandá ngolo ya kulutila samu na yandi. Samu yandi vandá ya kukuluka, ntima ya yandi vandá ya ‘kupema mpe na kizunu.’ Yinki ba yina ke na bana lenda longoka na bamambu yina David zonzá? Bapapa na bamama ya kukuluka zaba balimite ya bawu. Na yawu, ba ke vingilá ve mingi na bawu mosi mpe na bana ya bawu. Ba zolá nata bana na kuzaba yina ba zaba bien kusala mpe yina lenda vanda mwa mpasi na bawu na kusala. Ya ke sala ti bana ya bawu kanisa ve ti ba ke kaka bantu ya mpamba, ntangu ba ke lendá ve kusala kima. Dyaka, ba zolá nata bana na kusala baproje yina ba lenda lungisa. Marina, mpangi mosi ya kento me zonza: “Mama ya beto vandá kompareke ve munu na yaya ya munu ya bakala, na baleki ya munu zole to na bana ya nkaka. Yandi vandá zonzá na munu ti muntu nyonso ke na ngolo mpe mayela ya yandi. Kasi beto nyonso ke na valere na meso ya Yehova. Faso ya yandi ya kutadila bamambu me sala ti, bubu yayi, mu ke ve na kifu ya kusalá bakomparezon na bampangi.”

7-8. Wa’ faso bakala lenda pesa kento ya yandi valere?

⁷ Bakala ya kukwela me lunga kupesa valere na kento ya yandi. (1 Pi. 3:7) kupesa valere na muntu zola zonza kuzaba faso ya kubakila yandi mpe kupesa yandi buzitu. Na kifwani, bakala lenda zonza ve na kento ya yandi na kusala bima yina kento ke ve na ngolo ya kusala. Mpe surtu, yandi zolá kompare ve yandi na bakento ya nkaka. Yinki ya lenda sala kento si bakala ya yandi ke na kifu ya kukompareke yandi na bakento ya nkaka? Rosa, mpangi mosi ya kento ke na bakala yina ke ve Temwe. Bambala mingi, bakala yango ke sosá kulakisa ti bakento ya nkaka me lutila Rosa. Bamambu ya ngolo yina yandi vandá zonzilá Rosa vandá nata mpangi ya beto na kutala ti yandi ke muntu ya mpamba mpe ata muntu ke zolak’ yandi. Yandi me zonza: “Mu ke ntangu nyonso na nsatu ba zabisa munu ti, mu ke na valere na meso ya Yehova.” Kasi, bakala yina ke sadilá Yehova ke pesá kento ya yandi buzitu. Yandi zaba ti si yandi sala yawu, yandi ke vanda na kikamarade ya mbote na kento ya yandi, mpe na Yehova. *

⁸ Bakala yina ke pesá valere na kento ya yandi, ke zonzilá bima ya mbote yina yandi ke salá, ke lakisá ti yandi ke zolak’ yandi, mpe ke felisiteke yandi. (Bin. 31:28) Ni yina mpe ke salá bakala ya Katerina yina beto zonzilá na artikle yina me luta. Yandi sadisá Katerina na kukanisa dyaka ve ti yandi ke muntu ya mpamba. Ntangu Katerina vandá mwana ya fioti, mama ya yandi vandá zonzilá yimbi ya yandi mpe vandá kompareke yandi na bana ya kento ya nkaka. Ya salá ti Katerina kuma na kifu ya kusalá bakomparezon na bampangi. Kifu yayi manisá ve ata ntangu yandi kumá Temwe ya Yehova. Kasi, bakala ya yandi sadisak’ yandi na kubika kifu yango mpe na kuvanda na makanisi ya mbote. Katerina me zonza: “Bakala ya munu ke zolá munu, ke felisiteke munu samu na bima ya mbote yina mu ke salá, mpe yandi ke sambilá samu na munu. Yandi ke zonzilá mpe munu mingi bifu ya mbote ya Yehova mpe ke sadisá munu na kukatula makanisi ya yimbi.”

9-10. Wa’ faso bakuluntu na luzolo nyonso sadisá mpangi mosi ya kento yina vandá tala ti bampangi ya nkaka me lutila yandi?

⁹ Wa’ faso bakuluntu lenda sadisa ba yina ke na kifu ya kusalá bakomparezon? Beto tala ekzample ya mpangi ya kento Hanuni, yina ba vandá felisiteke ve mingi ntangu yandi vandá mwana ya fioti. Yandi me zonza: “Mu vandá muntu ya nsoni  mpe mu vandá kanisá ti bana ya nkaka lutilá munu. Mpe banda ntangu yina, mu kumá na kifu ya kusalá bakomparezon na bampangi.” Ata na ntangu yina yandi kumá Temwe ya Yehova, Hanuni biká ve kifu yayi. Na yawu, yandi vandá tala ti nyonso yina yandi vandá sala na kati ya kimvuka, vandá kaka fioti. Kasi bubu yayi, yandi ke pionye mpe ke talá kilengi na yina yandi ke salá. Yinki me sadisa yandi na kubika kifu yina?

¹⁰ Hanuni me zonza ti ni luzolo yina bakuluntu vandá lakisa yandi, sadisak’ yandi. Ba vandá lakisak’ yandi ti ba vandá na konfianse na yandi, mpe ba vandá felisiteke yandi samu na ekzample ya yandi ya mbote. Yandi soniká: “Bantangu ya nkaka bakuluntu vandá zonza na munu na kupesa ngolo na bampangi ya nkaka ya kento ya jeune yina vandá na yawu nsatu. Ya vandá sadisa munu na kutala ti mu ke na plase ya munu na kati ya kimvuka. Mu lenda zimbana ve bambala nyonso yina bakuluntu vutulá munu matondo samu na yina mu salá samu na bampangi yina. Na manima, ba tangilá munu 1 Batesalonika 1:2, 3. Baverse yayi simbá ntima ya munu! Samu na luzolo yina lakisá munu bakuluntu, mu ke na kilengi na kisalu yina mu ke salá na kati ya kimvuka.”

11. Wa’ faso beto lenda sadisa ba ‘yina ke na mawa mpe ya kulemba,’ faso ke na zonzá Izaya 57:15?

¹¹ Tanga Izaya 57:15. Yehova ke kipeke ba ‘yina ke na mawa mpe ya kulemba.’ Beto nyonso, kaka ve bakuluntu, lenda pesa ngolo na bampangi ya beto ya kimvuka. Mosi ya bafaso yina beto lenda sala yawu ni ya kulakisa bawu ti beto ke zolá bawu na ntima mosi. Yehova ke na nsatu beto lakisa bawu ti yandi ke zolá bawu. (Bin. 19:17) Si beto ke ya kukuluka, ya ke sadisa bampangi ya beto. Samu na yinki? Samu beto ke sosa ve kulakisa ti beto ke na mayela to beto zaba mingi. Na yawu, beto ke sala ve matalana, samu ya lenda puse bampangi na kusala beto kimbanda. Kasi, beto ke na nsatu ti bamambu nyonso yina beto ke zonzá to ke salá pesa bampangi ngolo.—1 Pi. 4:10, 11.

12. Samu na yinki bantu ya kukuluka vandá zolá kuvanda na Yesu? (Tala foto ya kuverture.)

¹² Beto lenda zaba faso ya mbote ya kubakila bampangi si beto tala faso Yesu vandá bakilá badisiple ya yandi. Yandi vandá muntu ya kulutila nene na bantu nyonso yina zingá na ntoto. Kasi, yandi vandá “na ntima ya kulembama mpe ya kukuluka.” (Mat. 11:28-30) Yandi salá ve matalana ya mayela ya yandi mpe ya bamambu nyonso yina yandi zabá. Ntangu yandi vandá longá, yandi vandá zonzá bamambu yina vandá ve mpasi na muntu nyonso na kusimba. Yandi vandá sadila mpe ba-ekzample ya kitoko samu na kusimba bantima ya ba yina vandá ya kukuluka. (Luke 10:21) Yesu vandá ve na lulendo faso bachef ya mabuundu. Yandi vandá sala ve mpe kuzonza ve bamambu yina zolá nata bampangi na kukanisa ti ba ke kaka na valere ya fioti na meso ya Nzambi. (Yoa. 6:37) Kasi, yandi vandá pesá buzitu na bantu nyonso.

13. Wa’ faso ntima ya mbote mpe luzolo ya Yesu talaná na faso ya yandi na kubakila badisiple ya yandi?

¹³ Ntima ya mbote mpe luzolo ya Yesu vandá talana na faso yina yandi vandá bakilá badisiple ya yandi. Yesu zabá ti ba vandá ve na mayela mosi mpe luzingu ya bawu vandá ve faso mosi. Na yawu, ba zolá lenda ve kusala bima mosi to kantite ya kisalu mosi na predikasion. Kasi, yandi vandá na kilengi na kutala ti mosi na mosi ya bawu vandá sala bangolo ya yandi nyonso. Yandi lakisak’ yawu na ekzample ya ba-talent. Na disolo yayi, mfumu pesá na mosi na mosi ya bisadi ya yandi kisalu ‘faso vandá ngolo mpe mayela ya muntu nyonso.’ Na bisadi zole yina salá, mosi lutilá kuzwa. Kasi, mfumu felisiteke bawu zole faso mosi. Yandi zonzá na bawu: “Ya [ke] mbote. Nge [ke] kisadi ya mbote mpe ya kukwikama!”—Mat. 25:14-23.

14. Wa’ faso beto lenda landa faso Yesu vandá bakilá bantu ya nkaka?

¹⁴ Yesu ke lakisá mpe beto ntangu nyonso ntima ya mbote mpe luzolo. Yandi zaba ti ngolo, mayela mpe luzingu ya beto nyonso ke ve faso  mosi. Na yawu, yandi ke sepelá ntangu beto ke salá nyonso yina beto lenda sala. Beto zolá landa ekzample ya Yesu. Beto zolá sala ve kima yina lenda nata bampangi ya beto na kukanisa ti ba ke ve na valere to ba kuma na nsoni samu ba ke na lendá ve kusala faso bampangi ya nkaka. Ntangu nyonso, beto zolá felisite bampangi ya beto na nyonso yina ba ke salá samu na Yehova.

15-16. Yinki mpangi mosi ya kento kuzwá samu yandi vandá sala baproje yina yandi lenda lungisa?

¹⁵ Ntangu beto ke salá baproje na kisalu ya Yehova, luzingu ya beto ke vandá kilengi mpe kitoko. Kasi, beto zolá sala baproje yina beto lenda lungisa. Beto sala ve baproje kaka samu bampangi mpe ke na salak’ yawu. Si beto landa bampangi mpe bamambu simba ve, ya lenda manisa beto ngolo. (Luke 14:28) Beto zonzila ekzample ya Midori, mpangi mosi ya kento ya pionye.

¹⁶ Ntangu Midori vandá mwana ya fioti, papa ya yandi yina ke ve Temwe, vandá zonzá ti baleki ya yandi mpe bakamarade ya yandi ya lekole lutilá yandi. Midori me zonza: “Mu vandá talá ti mu ke kaka muntu ya mpamba.” Kasi, ntangu yandi kulá, yandi bandá kupesa nzutu ya yandi valere. Yinki sadisak’ yandi? Yandi me zonza: “Mu ke tangá Biblia bilumbu nyonso samu na kuzwa kizunu ya ntima mpe kutala ti Yehova ke zolá munu.” Dyaka, yandi salá baproje ya kulunga, mpe sambilá Yehova sadisa yandi na kulungisa yawu. Midori bandá kutala kilengi na nyonso yina yandi ke salá samu na Yehova.

17. Wa’ faso beto lenda sadila Baefeze 4:23, 24?

¹⁷ Ya ke baká mwa ntangu samu na kuchanje makanisi ya yimbi. Ni na yawu Yehova ke zonzá na beto: “Beno fwana [kubika ve] kusoba na kati ya bantima mpe mabanza ya beno.” (Ef. 4:23, 24) Na kusala yawu, beto zolá sambila, kulongoka Biblia mpe kukanisa na yina beto me longoka. Kontinye kusala bamambu yayi mpe zonza na Yehova pesa nge ngolo. Mpeve ya yandi ya santu ke pesa nge ngolo ya kukatula kifu ya kusalá bakomparezon  na bampangi. Dyaka, Yehova ke sadisa nge na kuzaba si nge me kuma na kifu ya kutulá meso na bima ya bampangi to lulendo. Yandi ke pesa mpe nge ngolo ya kusala bachanjema na mbangu.

18. Wa’ faso bamambu yina ke na 2 Bansangu 6:29, 30 ke pesá beto ngolo?

¹⁸ Tanga 2 Bansangu 6:29, 30. Yehova zaba bamambu yina ke na kati ya bantima ya beto. Yandi zaba mpe ti beto ke na nwaná na makanisi ya yimbi yina yinza ke sosá kukotisa na kati ya bantima ya beto. Beto ke nwaná mpe na nzutu ya beto ya masumu. Ntangu Yehova ke talá bangolo yina beto ke na salá samu na kunwana na makanisi ya yimbi, luzolo ya yandi samu na beto ke kulá.

19. Wapi ekzample Yehova sadilá samu na kulakisa faso yandi ke bakilá beto?

¹⁹ Samu beto zaba luzolo yina yandi ke na yawu samu na beto, Yehova me sadila ekzample ya luzolo yina ke vandá na kati ya mama na bébé ya yandi. (Iza. 49:15) Beto zonzila ekzample ya mama mosi na nkumbu ya Rachel. Yandi soniká: “Mwana ya munu ya kento Stephanie butuká prématurée. Mbala ya ntete mu talak’ yandi, yandi vandá ya kuchika mpe lebe-lebe. Kasi, ntangu yandi vandá ntete na lopital, doktere ndimá ti mu nanguna yandi bilumbu nyonso. Na kati ya bantangu yina, beto kumá pene-pene. Bubu yayi, yandi ke na bamvula 6 mpe yandi ke nkufi kulutila bana ya aje ya yandi. Kasi mu ke zolak’ yandi mingi, samu yandi nwaná na kufwa ve mpe yandi me natina munu kilengi mingi na luzingu!” Beto ke na kilengi ya kuzaba ti Yehova ke zolá beto mingi ntangu yandi ke talá bangolo yina beto ke salá samu na yandi!

20. Samu na yinki bisadi ya Yehova zolá vanda na kilengi?

²⁰ Samu nge ke sadilá Yehova, nge ke muntu ya famiye ya yandi yina ke na valere na meso ya yandi. Yandi ke zolá nge faso nge kele. Yehova bendá ve nge na kote ya yandi samu nge me lutila bampangi. Yandi bendá nge samu yandi talá ti nge vandá ya kukuluka. Mpe yandi talá nsatu ya nge ya kubika yandi longa nge samu nge kuma muntu ya mbote na meso ya yandi. (Nku. 25:9) Zaba ti yandi ke na vrai kilengi ntangu yandi ke talá bangolo yina nge ke salá samu na kusadila yandi. Yehova ke na talá faso nge ke na kangá ntima na kati ya bampasi mpe faso nge ke ya kukangama na yandi. Nyonso yayi ke na lakisá ti nge ke na “ntima ya mbote mpe ya [kitoko].” (Luke 8:15) Kontinye na kusala bangolo ya nge nyonso na kisalu ya Yehova. Ya ke sala ti nge sepela ‘na bamambu ya nge mosi.’