1. Morwasinke Jehova a dilire kutuhetakanesa nava wopeke?

JEHOVA kwa hara yininke yokulisiga-siga novantu wokulisiga-siga. Ano eyi kuyimonena mweyi ga sita kukwatera mo vantu. Natuvenye mulyo. Yipo nye, Jehova kapi a tu hetakanesa nava wopeke. Age kukonakona mutjima goge. (1 Sam. 16:7) Age hena ga diva eyi nosikisa mo neyi no dira kusikisa mo ntani ga diva monkedi omu va ku rera. Ntani hena age kapi a ndindire ko yoyinzi koge eyi no dira kusikisa mo. Twa hepa kulitara nyamwetu ngwendi moomu atu tara Jehova. Ano eyi ngayi tu vatera tu kare nomagazaro gomawa yipo tu li tare nyamwetu monkedi zongwa.—Rom. 12:3.

2. Morwasinke natu dilira kulihetakanesa novakwetu?

² Sihonena samunazinyetu ogu a li tura mo unene mokuzuvhisa kuvhura kutuvatera. (Heb. 13:7) Kuvhura tu lirongere ko kwendi kuhamena omu nayi tu tompoka nose mokuzuvhisa. (Fil. 3:17) Nye pwa kara elisigo pokatji kokuhonena muntu gongandi ntani nokulihetakanesa nendi. Nsene tu lihetakanesa novakwetu, ngayi tu ninkisa tu kare nomfudu, ngatu dompa mutjima ntani ngatu lizuvha asi ose kwato mulyo. Ntani hena ngomu katu yi lirongere mosirongwa sa ka pita, nsene tu lihetakanesa nava womombungakriste, elikwatakano lyetu naJehova ngali kara mosiponga. Jehova kututantera asi: “Nkenye ogu a kona-kone yirugana yamwene, ntani nye a lifumadeke mwamwene, kapisi a liyereke namukwawo.”—Gar. 6:4.

3. Marunduruko musinke wa tura po aga aga kuretere ruhafo?

³ Jehova kuna hara o hafere ezokomeho lyopampepo eli ono kutura po. Pasihonena, nsene wa gwana ekuho, ove kuvhura o hafe morwa wa sikisa mo sitambo oso. Ove kwa tulire po etokoro olyo nyamoge nokulisikisa mo. Ove kwa li tulire po morwa wa hara Karunga. Ntani gazadara ko eyi wa sikisa mo kutunda pekuho lyoge dogoro ngesi. Pasihonena, ove ngesi wa hara unene kuresa Bibeli no kuzilironga ndi? Ove ngesi kukanderera kutundilira komutjima ndi? (Epis. 141:2) Ove ngesi wa diva nawa kuzogera novantu mokuzuvhisa ntani nokuruganesa nawa yiruganeso yetu yomokuzuvhisa ndi? Ntani nsene wa kara nepata, Jehova ga ku vatera yipo o kare nturagumbo gomuwa, mukadi gomuwa ndi mukurona gomuwa ndi? Ove kuvhura o hafe nsene asi wa tura po malitjindjo nagenye ogo.

4. Yisinke natu ka zogera mosirongwa esi?

⁴ Kuvhura tu vatere vakwetu yipo va hafere eyi vana kutompora  ngomu vana kukarera Jehova. Kuvhura hena tu va vatere va dire kulihetakanesa nava wopeke. Mosirongwa esi tatu ka konakona omu vakurona nava vatera vana vawo ntani nomu valikwali nava livatera nyamwawo ntani nomu vakuronambunga nava vatera vapuli vakwawo. Ano konyima tatu ka zogera nompango dimwe domoBibeli edi nadi tu vatera tu li tulire po yitambo eyi natu vhura kusikisa mo kuliza noukaro wetu.

5. Kuliza noVaefeso 6:4, yisinke va hepa kunyokera po vakurona?

⁵ Vakurona va hepa kutakamesa yipo va dire kuhetakanesa munawo kwagumwe ndi va mu pure a rugane yininke eyi na dira kusikisa mo. Nsene vakurona va yi rugana oyo, ayo ngayi guvisa munawo. (Resa Vaefeso 6:4.) Munazinyetu gomukadi Sachiko * kwa tanta asi: “Vamitili vange kwa here ni tompore unene mosure kupitakana varongwa vakwetu. Ntani oyina nawo kwa here ni tompore unene kosure yipo mitili gwetu ntani notate wovahapuli va kare nomutaro gomuwa kuhamena Nombangi daJehova. Oyina kwa here ni pite nawa makonakono na hana kudopa po nampili simwe, nye kapi nayi sikisire mo. Ngesi pana piti nomvhura kutunda apa na mene sure, nye poyiruwo yimwe ame kulizuvha asi Jehova kapi ana kuhafera eyi nina ku mu ruganena paapa na hulira.”

6. Yisinke nava lirongera ko vakurona ketjangwa lyoMapisarome 131:1, 2?

⁶ Vakurona kuvhura va lirongere ko sirongwa somulyo mEpisarome 131:1, 2. (Resa.) Hompa Ndafita kwa tente asi kapi ana “kukondjera hena yoyinene” ndi yoyidigu unene kwendi. Elinunupiko kwa mu vaterere a kare ‘teete nombili.’ Yisinke nava lirongera ko vakurona kononkango daNdafita? Mokuninka asi vakurona va kare nelinunupiko, kapisi va ndindire ko yoyinzi kwavene nokovana vawo. Vakurona kuvhura va vatere munawo pokudiva eyi na vhura kusikisa mo neyi na dira kusikisa mo ntani nokumuvatera a litulire po yitambo eyi na sikisa mo. Munazinyetu gomukadi Marina kwa tanta asi: “Oyina kapi ava hetakanesa nge namukurwange gomugara ntani novamumbya vange vavali wovakadona ndi nankenye ogu. Awo kwa ronga nge asi nkenye ogu kwa kara nouhwi ntani natuvenye mulyo kwaJehova. Ame ku yi va pandwira morwa kuvatera nge ni dire kulihetakanesa nava wopeke.”

7-8. Ngapi mugara na likida efumadeko kwamukadendi?

 ⁷ Mugara goMukriste ga hepa kufumadeka mukadendi. (1 Pet. 3:7) Kufumadeka wopeke kwa kwatera mo kuvapakera mbili. Pasihonena, mugara ogu a fumadeke mukadendi kumutara asi mulyo unene. Age kapi a ndindire ko yoyinzi kwa mukandendi eyi na dira kuvhura kusikisa mo. Ntani kapi a hetakanesa mukadendi kovakadi vapeke. Ngapi omu mukadi na lizuvha nsene mugara gwendi a mu hetakanesa nava wopeke? Mugara gwaRosa gomuhapuli nga mu hetakanesa novakadi vapeke. Nonkango dendi kwa ninkisire Rosa a li zuvhe udona ntani nokukara nomasinganyeko nsene asi kweli ogu ga mu hara. Rosa kwa tanta asi: “Ame na hepere kulidiworokesa nkenye apa asi Jehova ga hara nge.” Mokulisiga, mugara goMukriste kufumadeka mukadendi. Age ga yi diva asi eyi a rugana kuvhura kukundama elikwatakano lyendi namukadendi ntani naJehova. *

⁸ Mugara ogu ga fumadeka mukadendi, kumutangauka kovakwawo, age kumutantera asi ga mu hara ntani nokumupandadeka. (Yis. 31:28) Mugara gwaKaterina ogu ka tu tumbwire mosirongwa sa ka pita, kwa mu vaterere monkedi ozo apa ga lizuvhire asi age kwato mulyo ngwendi vakwawo. Apa Katerina ga kere munona, ozina ngava mu hetakanesa novakadona vakwawo kukwatera mo vakaume vendi. Ngoyitundwamo, Katerina kwa ya tamekere kulihetakanesa novakwawo nampili konyima za pa ga tambwire usili. Mugara gwendi goMukriste kwa mu vaterere a hageke kulizuvha asi age kwato mulyo nokulitara nyamwendi monkedi zongwa. Age kwa tanta asi: “ Mugara gwange kwa hara nge ntani kupandadeka nge koyirugana yoyiwa eyi ani rugana ntani nokukanderera nge po. Age hena kudiworokesa nge yikara yoyiwa yaJehova ntani kuvatera nge ni nyokere po magazaro gomadona.”

9-10. Ngapi omu vakuronambunga va vaterere munazinyetu gumwe yipo a dire kulihetakanesa nava wopeke?

⁹ Ngapi omu vakuronambunga nava vatera ava ava li hetakanesa novakwawo? Tu zeni tu ka tare sihonena samunazinyetu gomukadi Hanuni ogu ngava dili kupandadeka nkenye apa pounona. Age kwa tanta asi: “Ame kwa kere nonomuga ntani ngani lizuvhu asi vanona vakwetu va pita nge. Ame kwa tamekere kulihetakanesa novakwetu apa na kere simpe munona.” Nampili konyima zapa Hanuni ga tambwire usili, age simpe nga li hetakanesa navamwe. Ano ngoyitundwamo, age kwa lizuvhire asi kwato mulyo mombungakriste. Age ngesi kuna kara muzuvhisi gokukarerera goruhafo. Yisinke ya mu vaterere a tjindje nkareso zendi?

¹⁰ Hanuni kwa tanta asi vakuronambunga kwa mu vaterere. Awo kwa mu tanterere asi age mulyo mombungakriste ntani kwa mu pandadekere kosihonena sendi sosiwa. Age kwa tanta asi: “Poyiruwo yimwe, vakuronambunga ngava ninki nge ni korangede vanavazinyetu wovakadi ava va hepere evatero. Ano situmbukira esi kwa ninkisire nge ni lizuvhe asi name mulyo mombungakriste. Tani diworoka apa vakuronambunga va pandwire nge kweyi  na korangedere vanavazinyetu wovadinkantu wovakadi. Awo kwa reserere nge 1 Vatesaronika 1:2, 3. Ano eyi kwa hafesere nge sili unene. Nevatero lyovakuronambunga, ame ngesi kulizuvha asi name mulyo mombungakriste.”

11. Ngapi natu vatera ava lina pu ehuguvaro, ngomu va yi tumbura moMapisarome 34:18?

¹¹ Resa Episarome 34:18. Jehova kupakera mbili “ava lina pu ehuguvaro.” Natuvenye kuvhura kuvatera nokukorangeda vanavazinyetu ava vana kupita moukaro owo, nye kapisi vakuronambunga velike wokuyirugana. Nkedi zimwe omu natu va korangeda kuna kara pokuyilikida asi twa kara nosinka kwawo. Ntani Jehova kuna hara tu va likide omu ga va hara. (Yis. 19:17) Ose kuvhura hena tu vatere vanavazinyetu nsene tu linunupika. Kapi tuna hara kurugana yininke eyi ngayi ninkisa vamwe va tu zuvhire mfudu. Nye ose tuna hara kuruganesa udivi wetu yipo tu vatere vakwetu.—1 Pet. 4:10, 11.

12. Morwasinke vantu ava ngava tara asi kwato mulyo va hareere kukara kumwe naJesus? (Tara efano lyopontunda.)

¹² Monkedi omu Jesus ga tekwire varongwa vendi, kuvhura nose tu lirongere ko nonkedi dimwe omu natu tekura vakwetu. Age kwa kere muntu gomulyo ogu ga parukire pevhu. Nye nampili ngoso, age ‘kwa gomoka ntani kwa linunupika momutjima.’ (Mat. 11:28-30) Age kapi ga linenepekere kediwo eli ga kere nalyo nokulimonekesa koyininke eyi ga rugene. Age kwa rongere vantu monkedi zoureru ntani nokuruganesa yifanekeso youreru kukwata egano. (Ruk. 10:21) Mokulisiga novampitisili womaukarelikarunga, Jesus kapi ga ninkisire vantu va lizuvhe asi awo kwato mulyo kwaKarunga. (Joh. 6:37) Nye age kwa tekwire nefumadeko vantu ava ngava tara asi kwato mulyo.

13. Ngapi omu Jesus ga likidire nkenda neharo kovarongwa vendi?

¹³ Jesus kwa likidire nkenda neharo monkedi omu nga tekura varongwa vendi. Age ga yi divire asi awo kwa kere nomaukaro gokulisiga-siga. Yipo nye, kapi va vhulire kurugana yininke yokulifana ntani noyirugana yokulifana mokuzuvhisa. Nye nampili ngoso, age kwa haferere elituromo lyawo. Nkareso zendi kuzimonenena mosifanekeso esi ga geve sonoranda. Mosifanekeso oso, mugara kwa pere vakareli vendi yirugana ‘nkenye ogu yokuyereka ponondunge dendi.’ Mukareli gumwe kwa gwanenene po yoyinzi kupitakana vakwawo. Nye hekurwawo kwa pandadekere vakareli navenye asi: “Yina wapa, nani o mukareli gomuwa, kukuhuguvara tupu nani.”—Mat. 25:14-23.

14. Ngapi natu honena Jesus monkedi omu nga tekura vantu?

¹⁴ Jesus kulikida mbili neharo monkedi omu a ruganene kumwe nose. Age ga yi diva asi maukaro getu ga li siga ntani age kuhafa apa atu rugana paapa twa hulira. Twa hepa nose kuhonena Jesus pokutekura vakwetu monkedi zongwa. Kapi tuna hara kuninkisa munazinyetu a li zuvhe asi age kwato mulyo ndi a li fe nomuga morwa kapi a rugana unene ngwendi wopeke. Nye twa hepa kupandadeka vanavazinyetu kweyi vana kurugana paapa va hulira mokukarera Jehova.

15-16. Mauwa musinke ga gwanena mo munazinyetu gomukadi pokulitulira po yitambo?

 ¹⁵ Nsene tu litulira po yitambo yopampepo, ose ngatu hafera eparu. Twa hepa kutura po yitambo kuliza nevhuliko lyetu ndi noukaro wetu nye kapisi yeeyi vana kutura po vakwetu. Nsene tu honena vakwetu, kuvhura ngayi tu dompese. (Ruk. 14:28) Tu tareni sihonena samunazinyetu gomukadi Midori, muzuvhisi gokukarerera.

¹⁶ Apa Midori ga kere munona, oguhwe ava va kara asi kapisi Mbangi zaJehova, ngava mu hetakanesa novamumbya vendi ntani novanasure vakwawo. Midori kwa tanta asi: “Ame kwa lizuvhire asi kwato mulyo.” Nye ngomu ga kulire age kwa tamekere kulizuvha asi age mulyo. Age kwa tanta asi: “Ame kuresa Bibeli nkenye ezuva morwa eyi kuvatera nge ni kare nombili zomomutjima nokulizuvha asi Jehova ga hara nge.” Age hena kwa litulilire po yitambo ntani ga kanderere kwaJehova a mu vatere a sikise mo yitambo yendi. Ngoyitundwamo, Midori kwa haferere yininke eyi ga sikisire mo ngomu nga karere Jehova.

17. Yisinke natu rugana yipo ‘tu tjindje nomutjima detu nonompepo detu di kare donompe’ ntani yitundwamo musinke ngayi kara?

¹⁷ Ayo kuvhura yi guse siruwo mokunyokera po magazaro gomadona. Jehova kutukorangeda asi: ‘Situnukeni, nomutjima deni nonompepo deni di kare nompe.’ (Efe. 4:23, 24) Nye mokuyisikisa mo oyo, twa hepa kukanderera nokulironga Bibeli ntani nokuteda ko. Twikira kuyirugana ngoso ntani nokukanderera kwaJehova a ku pe nonkondo. Mpepo zendi zokupongoka nga zi kuvatera o nyokere po kulihetakanesa novakweni. Jehova nga ku vatera o dimburure nokunyokera po mfudu nelinenepeko.

18. Ngapi omu nonkango da kara mo-2 Histoli 6:29, 30 nadi kuhengagwida?

¹⁸ Resa 2 Histoli 6:29, 30. Jehova ga diva eyi ya kara monomutjima detu. Age hena ga diva maudigu aga tuna kuligwanekera nago ntani maupirankondo getu. Apa Jehova a tu mono kuna kukondja  tu nyokere po yininke oyo, age kutu hara unene.

19. Sifanekeso musinke asi likida asi Jehova kwa tu hara unene?

¹⁹ Jehova kwa ruganesa sifanekeso sazinya namunwendi mokutulikida omu a lizuvhu kutuhamena. (Jes. 49:15) Tu tareni sihonena samunazinyetu Rachel. Age kwa tanta asi: “Munange gomukadona Stephanie kwa mu hampurukire age sprima. Apa na mu mwene age kwa kere gomununu-nunu. Nampili ngoso, vandokotora kwa pulisilire nge ni mu kwate nkenye ezuva ure wokwedi apa ga kere mosipangero. Posiruwo oso, ame kwa tulisire po elikwatakano lyenene namunange. Ngesi nomvhura dendi ntazimwe, age mununu mokumuhetakanesa novanona vakwawo wonomvhura dendi. Nye ame namuhara unene morwa ga paruka ntani ga hafesa nge unene meparu. Ayo kuhengangwida pokudiva asi Jehova nage ga tu hara unene apa atu mono kuna kurugana paapa twa hulira tu mu karere.

20. Yisinke nayi tu hafesa ngovakareli vaJehova?

²⁰ Ngomukareli gwaJehova, ove mulyo mepata lyendi. Jehova kapi ga ku kokera kwendi morwa asi ove mulyo kupitakana vakweni. Nye age kwa ku kokera kwendi morwa ga mwene asi ove wa linunupika ntani ureru kutura po malitjindjo. (Epis. 25:9) Kara nehuguvaro asi age kuhafa apa o rugana paapa wa hulira moku mukarera. Elididimiko lyoge noulimburukwi woge kulikida asi wa kara ‘nomutjima gomuwa.’ (Ruk. 8:15) Twikira kuruganena Jehova paapa wa hulira. Makura ove ngo hafera eyi o rugana.