1. Mu bungu dia nti Yehova kalembo tu fwanakasaka na bantu bakaka?

YEHOVA luswaswanu lwa kazololo. Wa tuzebi mu bungu ti wasala miti mia swaswana, bibulu na bantu ba swaswana. Muna muntu wa swaswana wena. Buna, kani kabwe Yehova ka ku fwanakasaka ko na bantu bakaka. Mbo kataluzulaka mutima’aku na timuntu tiaku. (1 Sam. 16:7) Zebi misamu mi lendi tomo yirika na mio mi lendi lembo tomo yirika, mpe mpila yi bakukurisila ya kazebi. Ka ku lombaka ko mu yirika misamu mi lendi lembo lenda. Tufweti tibongelaka ntiana Yehova bu katubongelaka. Buna, mbo tubâ na ‘mabanza ma delakana’, ka tubanza ko ti beto tuyôkele, peleko ka twena buma ko.​—Rom. 12:3.

2. Mu bungu dia nti wulembolo musamu wa mbote mu tifwanakasaka na bantu bakaka?

² Tulendi landa tifwani tia mpangi ya kwikama yisalaka tisalu tia samuna bubote. (Ebr. 13:7) Tulendi kwizi bakula bwe tulendi sarila tisalu tieto tia samuna mu mpila ya mbote. (Flp. 3:17) Kâ, luswaswanu lwe ho mu tifu tia landa tifwani tia mbote tia muntu na tia tifwanakasa na yandi. Wamana tifwanakasa, lendi kwizi bâ na tifu tia dienokena, lendi nôka peleko lendi kwizi mona ti ka wena salu ko. Kâ, tala ti tuyêlele mu dinga mu yôka mpangi zeto, tulendi kwizi bebesa tindiku tieto na Yehova ntiana bu talongokele wo mu timoko tiayôkele. Na luzolo lwalwansoni, Yehova tulombele ti: ‘Muna muntu kasungamana tisalu tia yandi beni. Kamana tia bakila lenda dia malona, katilona mu bungu dia yandi beni; kâ, ka wena ko ti mu [tifwanakasa na] muntu wakaka.’​—Nga. 6:4.

3. Ntia nsobolo za timpeve wayizi sa zikutâka nsayi?

³ Yehova zololo ti wayangalala mu mio mi lendi yirika mu mu  sarila. Mu tifwani, tala ti wabatusu, fweti yangalala mu kani dio di walungisa! Nge beni wabonga nzengolo yo. Nzengolo yo mu luzolo lwaku mu Nzambi yasikamana. Dimbitila mu nsobolo zi wasa tûka bu wabatusu. Mu tifwani, ngano luzolo lwaku mu bungu dia ntangulu na ndongokolo ya Bibila ya nge beni lwakuriri? Ngano wayika tomo sambilaka mu bunsungu? (Mik. 141:2) Ngano wayika tomo saka bimoko mu tisalu tia samuna, mpe bisalulu bieto bia sarilaka mu mpila ya mbote? Tala ti kanda die naku, ngano Yehova wakubakisa mu bâ bakala dia mbote, mukento wa mbote peleko tibuti tia mbote? Lendi tomo yangalala mu nsobolo zi wayizi sa mu misamu mio.

4. Nti tutaluzula mu timoko ti?

⁴ Tulendi bakisa bantu bakaka mu yangalala mu nsobolo zi basaka mu sarila Yehova. Tulendi ba bakisa mpe mu lembo bâ na tifu tia tifwanakasaka na bantu bakaka. Mu timoko ti, mbo tumona ka bwe bibuti bilendi bakisila bala bawu, ka bwe bantu ba kwelana balendi tibakisila mu tintwari, mpe bwe bakuluntu na bantu bakaka balendi bakisila bampangi. Ha manima, mbo tutaluzula mitieno mia Bibila milendi tu bakisa mu bâ na makani ma delakana ma tulendi lungisa.

5. Tintwari na Bisi-Efeze 6:4, ntia misamu bibuti bifweti sila keba?

⁵ Bibuti bifweti saka keba mu lembo fwanakasa mwana’awu na mwana wakaka, peleko mu mu lomba mu yirika musamu wu kalendi lembo lenda. Bibuti biamana sila bo, bilendi nôkesa mwana’awu. (Tanga Bisi-Efeze 6:4.) Mpangi ya yikento ye na nkumbu Sachiko, * têle ti: “Milongisi miani mbo mieri kekoloko ti nayôka bampwana’ani ku lukolo. Mpe nguri’ani wazolo ti nasala bubote ku lukolo ngatu nahana timbangi tia tibote kwe mulongisi’ani na kwe tata’ani walembo bâ mbangi ya Yehova. Nguri’ani keri’a zoloko ko nalembana na kani tima timosi, mu ntangu ya ekzame. Namona ti musamu wo ka waketi’â bâ ko. Ni bu sa ti nabika lukolo tûka mvula zazingi, ntangu zakaka mbo nitiyulaka tala ti Yehova mbo kayangalalaka mu ngolo zi nisarilaka.”

6. Bibuti nti bilendi longoka mu Mikunga 131:1, 2?

⁶ Bibuti bilendi baka malongi ma mfunu mu Mikunga 131:1, 2. (Tanga.) Mutinu Davide watâ ti keri’â dingaka ‘bima bia binene’ ko,  peleko bima bieri mpasi kwe yandi mu baka. Mu bungu ti wa kuluka weri, mpe mbo keri zabaka ndilu zandi, Davide mu nsayi na mu tidzunu keri. Ngano bibuti ntia malongi bilendi baka mu misamu mia tâ Davide? Bibuti bilendi bâ bia kuluka mpe bilendi zaba ndilu zawu mu mio mi bakekoloko mu bawu beni, kâ mpe mu mio mi bakekoloko mu bala bawu. Bibuti bilendi bakisa bala bawu mu mona ti ntalu bena, bu babakula misamu mi balendi yirika, mi balendi lembo yirika na mu bâ na makani ma balendi lungisa. Mpangi ya yikento ye na nkumbu Marina mbo kabambukaka ti: “Nguri’ani, kani kabwe, keri’â kumfwanakasaka ko na yaya’ani na mpangi zani za zole peleko na bala bakaka. Wakundongesa ti muna muntu lenda dia swaswana die nandi mpe ntalu kena kwe Yehova. Na lubakusu lwa nguri’ani, ka nivulu’â tifwanakasa na bantu bakaka ko.”

7-8. Ngano bwe bakala dia kwela dilendi songela ti mukento’andi kakembesaka?

⁷ Bakala die Mukristo difweti kembesaka mukento’andi. (1 Pi. 3:7) Kembesa muntu wuzololo tâ mu kipa mpe mu zitisa. Mu tifwani, bakala mbo kakembesaka mukento’andi bu kamuzitisaka. Ka mu lombaka ko mu yirika misamu mi kalendi lembo lenda. Mpe ka mu fwanakasaka ko na bakento bakaka. Bwe mukento wumona tala ti bakala diandi dimufwanakase na bakento bakaka? Mpangi ya yikento ye na nkumbu Rosa mbo bavulu mu fwanakasaka na bakento bakaka kwe bakala diandi dilembolo Mbangi ya Yehova. Misamu mio mia mbi mi keri tesaka Rosa miamumwisa mpasi mpe miasa ti ka bândi na lukwikulu mu yandi beni. Rosa têle ti: “Ntangu zazansoni, nzololo bakumbamulaka ti ntalu ndiena kwe Yehova.” Kâ, bakala die Mukristo, mbo kakembesaka mukento’andi. Zebi ti musamu wo mbo wunataka nsobolo za mbote mu tindiku tiandi na mukento’andi na mu tindiku tiandi na Yehova. *

⁸ Bakala dizitisaka mukento’andi, mbo kamukembesaka, mbo kasongelaka ti yandi kazololo mpe mbo kamusîkaka. (Bin. 31:28) Bakala dia Katerina, wuta zonzele mu timoko tia yôkele ni bo kamubakisila mu mona ti muntu wa mbote wena. Katerina bu keri mwana fioti, nguri’andi mbo keri mu fwisaka nsoni bu keri vulu mu fwanakasaka na bala bakaka ba bakento mpe na ndiku zandi. Musamu ni wo wasa ti Katerina kabatika mu tifwanakasa na bantu bakaka​—mpe watatamana mu sila bo ni bu sa ti wayizi bâ Mbangi ya Yehova! Kâ bakala diandi die Mukristo wamubakisa mu telamana tifu tio, na mu bâ na mabanza ma delakana mu yandi beni. Katerina têle ti: “Meno kazololo, mbo kakunsîkaka mu bungu dia misamu mia mbote mi niyirikaka, mpe mbo kasambilaka mu bungu dia meno. Mbo kakumbambulaka bifu bia Yehova, mpe mbo kakumbakisaka mu sungika mbanzulu zani za mbi.”

9-10. Bwe bakuluntu ba mbote babakisila mpangi ya yikento mu telamana tifu tia tifwanakasaka na bantu bakaka?

⁹ Bakuluntu bwe balendi bakisila bô bê na tifu tia tifwanakasaka na bantu bakaka? Tazonzeleno tifwani tia mpangi ya yikento ye na nkumbu Hanuni, wu beri lembo vulu sîkaka bu kweri mwana fioti. Têle ti: “Wa yembama ndieri, mpe mbo ndieri vulu monaka ti bala bakaka bakundioka. Nayizi batika mu tifwanakasaka na bantu bakaka bu ndieri mwana fioti.” Bu kayizi zaba matieleka, Hanuni wayizi tatamana mu tifwanakasaka na bantu bakaka. Mpe wamona ti, misamu mi keri yirikaka mu timvuka,  ka miabâ salu ko. Lumbu ti Hanuni mupasuri-nzila we mu nsayi wena. Ngano nti biamubakisa mu soba mabanza?

¹⁰ Hanuni têle ti bakuluntu bê na luzolo bamubakisa. Basongela lukwikulu lwawu mu yandi, mpe bamusîka mu bungu dia tifwani tiandi tia kwikama. Hanuni têle ti: “Ntangu zakaka, bakuluntu mbo beri kundombaka mu tindisa mpangi zakaka zeri na nsatu lubakusu. Madema mo, makumbakisa mu bakula ti salu ndiena. Mbo nibambukaka ntangu bakuluntu ba luzolo yi bakuntonda mu bungu dia lutindusu lu nahana kwe mpangi za zikento za ntwenia. Bakuntangila 1 Bisi-Tesalonike 1:2, 3. Yatomo kunsima mutima! Na lubakusu lwa mivungi mio mia mbote, mbo nizoloko tibuka tiani mu organisasio ya Yehova.”

11. Ntiana bu batêle wo mu Izaya 57:15 bwe tulendi bakisila bantu “ba baniekonaka na ba kuluka”?

¹¹ Tanga Izaya 57:15. Yehova mbo katomo belokelaka lwaka bantu “ba baniekonaka na ba kuluka.” Beto bansoni tulendi tindisa mpangi zo, ka diena kwa dema dia bakuluntu ko. Mpila yimosi yi tulendi ba tindisila ni mu ba songela ti, bawu tubelokelaka lwaka. Yehova zololo ti tabasongela ti bawu katomono zolo. (Bin. 19:17) Tulendi mpe bakisa mpangi zeto bu tubâ ba kuluka na bu tuzaba ndilu zeto. Ka tuzololo’â ko ti batalaka kwa beto ngatu mpangi zeto balembo bâ na tifu tia dienokena. Kâ mbo tukwe sariri misamu mi twe na mio lenda na luzabu lweto, mu kwe titindisi beto na beto.​—1 Pi. 4:10, 11.

12. Mu bungu dia nti bantu ba mpamba-mpamba beri zoloko mu bâ tintwari na Yezu? (Tala tifwani ha tinima tia ntete.)

¹² Tulendi longoka misamu miamingi mu mpila yi tulendi bongela bantu bakaka, bu tutaluzula tifwani tia Yezu mu mpila yi keri bongelaka milongoki miandi. Ka kweri’â muntu ko weri ntiana yandi. Kâ wa lembama mpe wa kuluka weri. (Mat. 11:28-30) Keri’â songelaka ko ti yandi wayôka mu mayela mpe luzabu lwalwingi lweri nandi. Bu keri longesaka, mbo keri sarilaka nzonzolo ya peta, na bifwani bieri simbaka mitima mia bô ba kuluka. (Like 10:21) Yezu keri’â ntiana mfumu za mabundu ko zeri na lulendo, mbo keri songelaka kwe bantu ti ntalu bena kwe Nzambi. (Za 6:37) Na buzitu bwabwansoni keri bongelaka bantu ba mpamba-mpamba.

13. Bwe nsayi na luzolo lwa Yezu bieri monekenaka mu mpila yi keri bongelaka milongoki miandi?

¹³ Nsayi na luzolo lwa Yezu mbo bieri monekaka mu mpila yi keri bongelaka milongoki miandi. Wazaba ti, lenda dia swaswana dieri nawu mpe misamu mia swaswana mieri nawu. Buna babansoni ka baketi’â nata madema mamosi ko; mpe ka baketi’â sala mpila mosi ko mu tisalu tia samuna. Kâ, mbo keri zoloko ngolo zeri sarilaka muna muntu mu bawu. Yezu wasongela ti bantu keri bakulaka, bu kasarila tifwani tia talents. Mu tifwani tio mfumu wahana tisalu kwe muna ngamba tieri delakanaka na lenda diandi. Mosi mu ngamba zole za mbote, wabaka bima biayôka bia mpwana’andi. Kâ mfumu, mpila mosi kasîkila ngamba zo za zole bu kabatêla ti: ‘Mia mbote, tisari tia mbote [mpe tia kwikama]!’​—Mat. 25:14-23.

14. Bwe tulendi landila tifwani tia Yezu mu mpila yi keri bongelaka bantu bakaka?

¹⁴ Yezu mu nsayi na mu luzolo katubongelaka. Zebi ti lenda dieto na misamu mieto mia swaswana miena, mpe nsayi yibâka nandi bu tusarilaka ngolo zeto zazansoni. Tufweti landa tifwani tia Yezu mu mpila yi tubongelaka bantu bakaka. Kani kabwe, ka tufweti’â tasa ko ti mpangi zeto zamona ti ka zena salu ko peleko bafwa nsoni mu bungu ti ka bena na lenda ko mu sala ntiana bantu bakaka. Kâ, tufweti dinga misamu mi tusîkila mpangi zeto mu bungu dia ngolo zi basarilaka mu tisalu tia Yehova.

15-16. Bwe mpangi yimosi ya yikento kabakila ndandu mu bungu ti makani ma delakana meri nandi?

¹⁵ Bu tubâka na makani mu tisalu tia Yehova luzingu mbo lubâka lwa toma mpe mbo lubâka na nsasa. Musamu wa nguri ni wena’eti, tufweti bâka na makani madelakane na lenda dieto na misamu mie neto; kâ ka tudingakandi mu landa kwa bantu. Tamana landa kwa bantu tulendi nionga mpe tulendi nôka. (Like 14:28) Tataleno tifwani tia mpangi yimosi ya yikento ye na nkumbu Midori we mupasuri-nzila.

¹⁶ Tata dia Midori dilembolo Mbangi ya Yehova mbo keri mu fwisaka nsoni bu keri mwana fioti bu keri mu fwanakasaka na mpangi zandi mpe na bampwana’andi ba ku lukolo. Midori têle ti: “Mbo ndieri monaka ti ka ndiena salu ko.” Kâ bu keri kwe kuri Midori wabatika mu bâ na lukwikulu mu yandi beni. Têle ti: “Mbo nitangaka Bibila bilumbu biabiansoni mu bungu ti mbo dikumbakisaka mu bâ na tidzunu tia mutima na mu mona ti Yehova meno kazololo.” Wayizi bâ na makani ma delakana mpe wasambila na bunsungu bwabwansoni mu baka lubakusu mu lungisa makani mo. Musamu wo wabakisa Midori mu yangalala mu misamu mi kalendi yirika mu bungu dia Yehova.

17. Ngano bwe tulendi “tatamana mu tambula mu bâ ba môna mu mbanzulu [zeto zitutumaka],” mpe ntia ndandu tubaka?

¹⁷ Ntangu yayingi yifwanakane mu soba mpila yi tutibongelaka. Yehova mbo katutêlaka ti: “Mpe lufweti tatamana mu tambula mu bâ ba môna mu mbanzulu zeno zilutumaka.” (Efz. 4:23, 24, NWT) Mu sila bo, tufweti sambilaka, tufweti tangaka Zu dia Nzambi mpe tufweti dimbitilaka. Buna, tatamana mu sarila misamu mio, mpe lomba ngolo kwe Yehova. Mpeve santu’andi mbo yikubakisa mu telamana tifu tia tifwanakasaka na bantu bakaka. Yehova mbo  kakubakisa mu zaba tala ti tifu tia dienokena tie naku, peleko lulendo lwe naku mpe mbo kakubakisa mu sa nsobolo na manzangu mamansoni.

18. Ngano ntia lutindusu lendi baka mu 2 Ntangu 6:29, 30?

¹⁸ Tanga 2 Ntangu 6:29, 30. Yehova mitima mieto mia kazebi. Zebi ti ngolo tusarilaka mu telamana misamu mia mpasi mia nza yi na masumu meto. Mu ntangu Yehova yi kamonaka ngolo zi tusarilaka mu telamana misamu mio mia mbi, mbo kavutu tomo tu zoloko.

19. Ngano Yehova ntia tifwani kasarilaka mu songela mio mi kamonaka ku mutima mu bungu dia beto?

¹⁹ Mu songela mio mi kamonaka mu bungu dia beto, Yehova mbo kasarilaka tifwani tia luzolo lwe ha kati dia mama na mwana’andi. (Iza. 49:15) Tazonzeleno tifwani tia mama yimosi yi batâka nkumbu Rachel. Têle ti: “Mwana’ani wa mukento Stephanie prématurée yabutuka. Mbala ya ntete yi namumona, wa nguria wa fioti weri mpe keri’â na ngolo ko. Kâ ku lupitalu, bakungana nzila mu mu simbaka bilumbu biabiansoni mu ngonda’andi ya ntete bu keri mu couveuse. Mu ntangu yîna, mwana’ani na meno tayizi tomo bâ penepene. Bwawu bu mvula 6 ze nandi mpe bamana mu fwanakasa na bala ba bena mvula zimosi, wa fioti monekaka. Kâ yandi ntomono zolo mu bungu ti watomo nwana mu bâ wa moyo mpe nsayi yayingi kanata mu luzingu lwani!” Ntia mpila nsayi mu zaba ti Yehova luzolo ni lwa mpila yo kabâka na lo mu beto bu katumonaka bu tusarilaka ngolo zeto zazansoni mu mu sarila!

20. Mu bungu dia nti bisari bia Yehova biyangalalaka?

²⁰ Mu bungu ti nge tisari tia Yehova tiena, ntalu wena mu kanda diandi, mpe ka kwena muntu ko we ntiana nge. Yehova ka ku benda kwe Yandi ko mu bungu ti nge yôkele bampwana’aku. Wakubenda mu bungu ti watanga mu mutima’aku, mpe wamona ti nge muntu wa lembama wena wu kalendi longesa mpe wu kalendi sobesa. (Mik. 25:9) Bâ na lukwikulu ti mbo kayangalalaka bu saka miamiansoni mi lenda mu mu sarila. Tifu tiaku tia korela na kwikama kwaku mbo bisongelaka ti ‘mutima wa mbote we naku.’ (Like 8:15) Buna tatamana mu sa miamiansoni mi lenda mu bungu dia Yehova. Mpe mbo bâ na misamu mia mbote mi yangalala mu bungu dia nge beni.