1. Aˬ htoꞈ ma te Yaˬhoˉvaˬ lehˬ ngaˬ hui shu htaꞈ maˇ tehˆ daꞈ ve le?

 Yaˬhoˉvaˬ lehˬ laiˉ ceuˬ htaꞈ dawˇ cawˇ ve yoˬ. Yaˬhoˉvaˬ hpanˍ taˍ ve awˬ ceuˬ teˇ hpaˍ leh nawˬ htaꞈ kaꞈ ngaˬ hui gʼa mawˬ ve yoˬ Nawˬ htaꞈ shuˍ ve teˇ gʼaˇ kaꞈ maˇ cawˬ. Leh Yaˬhoˉvaˬ kaꞈ nawˬ htaꞈ awˬ nu ve chaw htaꞈ maˇ tehˆ daꞈ jaw. Nawˬ hkʼaˬ hkʼe ve chaw hpehꞈ ve Gʼuiˬ sha shiˍ ve yoˬ. (1 Saˍmo˗eˍlaˆ 16:7) Nawˬ te jaw ve awˬ lawn daꞈ ve leh maˇ daꞈ ve htaꞈ kaꞈ Gʼuiˬ sha shiˍ ve yoˬ. Nawˬ te maˇ gʼa ve awˬ leuˉ Gʼuiˬ sha maˇ dawˇ law. Hkʼe te leh, ngaˬ hui a shu yawˇ awˬ to htaꞈ Yaˬhoˉvaˬ dawˇ ve hkʼe dawˇ nyi cawˇ ve yoˬ. Ngaˬ hui chi hkʼe te ve kʼo, a shu yawˇ awˬ to htaꞈ “dawˇ keunˍ dawˇ cawˇ ve” hkʼe ceh dawˇ leh a shu yawˇ awˬ pon tiˉ maˇ dawˇ nyi ve, maˇ heˆ leh a shu yawˇ awˬ to maˇ daꞈ ve tehꞈ kaꞈ maˇ dawˇ.—Roˉmaꞈ 12:3.

2. A shu yawˇ awˬ to leh shu htaꞈ tehˆ daꞈ ve hkʼaˬ hkʼe te maˇ daꞈ ve le?

² Awˬ viˉ awˬ nyi hto toˇ cheuˬ ve chaw teˇ hpaˍ ve awˬ lawn htaꞈ ngaˬ hui henˇ yuˬ gʼa ve yoˬ. (Heˍbrehˇ 13:7) Ngaˬ hui hto toˇ cheuˬ la tuˬ, yawˇ hto toˇ ve hkʼaˬ hkʼe te ve htaꞈ ngaˬ hui nyi ve yoˬ. (Hpiˇliˇpiˆ 3:17) Yaꞈ hkʼaˇ, nawˬ awˬ nu ve chaw htaꞈ nyi leh yawˇ ve daꞈ ve awˬ lawn henˇ yuˬ leh nawˬ leh yawˇ maˇ shuˍ daꞈ ve htaꞈ taˇ tehˆ daꞈ. Nawˬ leh awˬ nu ve chaw htaꞈ tehˆ daꞈ ve kʼo, yawˇ htaꞈ hkawehˉ ve cawˬ la ve yoˬ. Nawˬ awˬ gʼaˇ nuˇ leh a shu yawˇ awˬ to htaꞈ awˬ hpfuhˇ maˇ cawˬ tehꞈ dawˇ puiˉ la ve yoˬ. Chi hkʼoˆ kaꞈ, peuˬ taˉ ve teˇ lawn hkʼaw gʼa henˇ˗oˬ ve hkʼe, ngaˬ hui ve awˬ to awˬ viˉ awˬ nyi htaꞈ tehˆ daꞈ ve kʼo, ngaˬ hui yawˇ htaꞈ enˍ daꞈ gaˇ leh chi lehˬ ngaˬ hui Yaˬhoˉvaˬ geh meuˆ daꞈ ve htaꞈ heuˆ la kuiˬ cawˬ ve yoˬ. Hkʼe te leh, Gʼuiˬ sha haꞈ pehnˇ ve hkʼaw ngaˬ hui htaꞈ shaˍ tiꞈ peꞈ laˇ ve, “chaw teˇ gʼaˇ le le lehˬ a shu yawˇ te taˍ ve kanˉ htaꞈ dawˇ nyi tehˆ nyi˗o. Oˇ hkʼe te ve kʼo, shu te taˍ ve kanˉ awˬ hkʼaw lo yawˇ gʼa ha lehˬ tuˬ ve teˇ ceuˬ maˇ heˆ. Yawˇ awˬ to te taˍ ve kanˉ awˬ hkʼaw lo ceh tiˉ yawˇ gʼa ha lehˬ tuˬ yoˬ.”—Gaˍlaˍtiˆ 6:4.

3. Nawˬ te gʼa˗oˬ ve aˬ htoꞈ ma cawˬ ve le? Leh nawˬ ha lehˬ tuˬ te laˇ ve aˬ htoꞈ ma cawˬ ve le?

 ³ Yaˬhoˉvaˬ lehˬ nawˬ te gʼa ve awˬ ceuˬ htaꞈ ha lehˬ tcuh gaˇ ve yoˬ. Nawˬ Liꞈ hpu henˇ htaˇ ve htaꞈ dawˇ nyi sheˍ. Oˇ ve teˇ yanˇ lehˬ nawˬ Baˆtiˆsaˬ haꞈ yuˬ tuˬ dawˇ teh taˍ ve yoˬ. Leh nawˬ te gʼa ve htaꞈ kaꞈ ha lehˬ ve yoˬ. Nawˬ Gʼuiˬ sha htaꞈ haꞈ ve pa taw, nawˬ awˬ to nawˬ chi hkʼe te tuˬ dawˇ cheˆ ve yoˬ. Chi teˇ hkui nawˬ co ha hpawˇ hkʼaˬ hkʼe taw uiˍ la mvuh la˗oˬ ve htaꞈ dawˇ nyi sheˍ. Nawˬ liꞈ gʼaw leh Liꞈ hpu henˇ ve htaꞈ dawˇ cawˇ˗aw laˇ? Nawˬ bon lawˬ htaˇ nyi ma hkʼaw tawˆ la tcuh˗aw laˇ? (Chiˇ mvuh ve 141:2) Nawˬ hto toˇ ve cheuˬ leh maˍ htaˇ laꞈ caˉ teˇ hpaˍ yehˇ tuˬ awˬ hkʼaˇ shiˍ˗aw laˇ? Nawˬ yehˬ kʼa cawˬ ve kʼo, daꞈ ve awˬ hpawˇ awˬ miˇ ma maˇ heˆ leh daꞈ ve awˬ pa awˬ e hpehꞈ gʼa tuˬ, Yaˬhoˉvaˬ ga laˇ gʼa ve tehꞈ shiˍ˗aw laˇ? Chi teˇ hkui hkʼa gaˬ nawˬ co ha hpawˇ uiˍ la mvuh la chehˇ ve ha lehˬ jaˇ tuˬ yoˬ hehˉ.

4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁴ Awˬ nu ve chaw yawˇ te taˍ ve awˬ ceuˬ htaꞈ ha lehˬ gʼa tuˬ, ngaˬ hui ga piˇ gʼa ve yoˬ. Chi hkʼoˆ kaꞈ, yawˇ awˬ nu ve chaw htaꞈ maˇ enˍ daꞈ tuˬ kaꞈ ngaˬ hui ga piˇ gʼa ve yoˬ. Awˬ pa awˬ e yaˇ htaꞈ hkʼaˬ hkʼe ga piˇ gʼa tuˬ, awˬ hpawˇ awˬ miˇ ma hkʼaˬ hkʼe ga daꞈ gʼa tuˬ, nyi haꞈ shaˉ paˍ awˬ viˉ awˬ nyi htaꞈ hkʼaˬ hkʼe ga piˇ gʼa tuˬ, leh ngaˬ hui teˇ gʼaˇ le le hkʼaˬ hkʼe ga daꞈ gʼa tuˬ, awˬ lawn chi ve hkʼaw teˇ geh henˇ tuˬ yoˬ. Ngaˬ hui awˬ tehˬ te gʼa ve tehꞈ dawˇ leh dawˇ teh taˍ ve htaꞈ ga laˇ gʼa tuˬ, Liꞈ hpu hkʼaw ve awˬ liˇ awˬ hkʼaˇ aˬ htoꞈ ma cawˬ ve le teˇ geh henˇ tuˬ yoˬ.

5. Eˇfeˇsuꞈ liꞈ 6:4 hkʼaw kʼoˆ taˍ ve hkʼe, awˬ pa awˬ e aˬ htoꞈ ma htaꞈ maˇ te cawˇ ve le?

⁵ Awˬ pa awˬ e lehˬ yaˇ awˬ nu ve teˇ gʼaˇ htaꞈ maˇ gʼa tehˆ daꞈ tuˬ shaˍ tiꞈ gʼa te cawˇ ve yoˬ. Yaˇ te gʼa ve awˬ leuˉ kʼawꞈ te tuˬ maˇ dawˇ law cawˇ. Chi hkʼe te ve kʼo, yaˇ awˬ gʼaˇ nuˇ tuˬ te piˇ la ve yoˬ hehˉ. (Eˇfeˇsuꞈ 6:4 gʼaw sheˍ.) Awˬ viˉ awˬ nyi teˇ gʼaˇ Sa˗hki˗hko * meh ve kʼoˆ ve, “liꞈ maˍ paˍ saˍ laꞈ ngaˬ awˬ chawˇ aꞈ kehˉ cheuˬ tcuh gaˇ ve yoˬ. Liꞈ maˍ paˍ saˍ laꞈ leh ngaˬ pa Shaˉhkiˆhkanˍ ve chaw htaꞈ dawˇ cawˇ tuˬ liꞈ na htaˇ hkʼa dehꞈ gʼa tcuh gaˇ ve yoˬ. Oˇ ve teˇ yanˇ ngaˬ e ngaˬ htaꞈ 100 hkʼa biˇ gʼa tcuh tehꞈ kʼoˆ laˇ ve yoˬ. Yaꞈ hkʼaˇ, ngaˬ te maˇ gʼa taˍ tehꞈ shiˍ ve yoˬ. Ngaˬ liꞈ henˇ peuˬ˗oˬ ve laiˉ hkʼawꞈ gaˬ˗oˬ ve htawˇ, Yaˬhoˉvaˬ htaꞈ daꞈ ve te piˇ ve lawꞈ˗oˬ laˇ tehꞈ, teˇ pawˆ pawˆ htawˇ dawˇ nawˬ dawˇ cawˬ ve yoˬ.”

6. Chiˇ mvuh ve liꞈ 131:1, 2 hkʼaw awˬ pa awˬ e hkʼaˬ hkʼe henˇ yuˬ gʼa ve le?

⁶ Chiˇ mvuh ve liꞈ 131:1, 2 hkʼaw awˬ pa awˬ e henˇ yuˬ gʼa ve a yeˇ uiˍ ve awˬ lawn cawˬ ve yoˬ. (Gʼaw sheˍ.) Jawˇmawˇ Daˍviˆ kʼoˆ ve, “dawˇ uiˍ gaˇ uiˍ ve nyi ma htaꞈ htawˇ hpfuhˆ baˬ taˉ peuˬ.”  Daˍviˆ nyi ma nuˇ nehˬ leh nyi ma taˍ nehˬ ve pa taw, gawˬ lehˍ cawˬ gʼa ve yoˬ. Awˬ pa awˬ e Daˍviˆ ve tawˇ hkawˇ htaꞈ hkʼaˬ hkʼe henˇ yuˬ gʼa ve le? Awˬ pa awˬ e nyi ma nuˇ nehˬ leh nyi ma taˍ nehˬ ve cawˬ ve kʼo, a shu yawˇ awˬ to htaꞈ maˇ dawˇ law jaˇ leh yaˇ te maˇ gʼa ve awˬ leuˉ htaꞈ kaꞈ maˇ dawˇ law. Yaˇ dawˇ teh taˍ ve cawˬ tuˬ ga piˇ htaˇ, yaˇ aˬ htoꞈ ma te gʼa ve, maˇ te gʼa ve, yawˇ gʼa dawˇ nyi ve yoˬ. Yawˇ chi hkʼe te ve kʼo, yaˇ awˬ gʼaˇ gʼa leh yaˇ yawˇ awˬ to awˬ hpfuhˇ cawˬ ve tehꞈ dawˇ tuˬ yoˬ. Awˬ viˉ awˬ nyi yaˇ miˇ Ma˗ri˗naˆ kʼoˆ ve, “ngaˬ e ngaˬ htaꞈ awˬ viˉ awˬ nyi maˇ heˆ leh awˬ nu ve yaˇ htaꞈ maˇ tehˆ daꞈ laˇ jaw. Teˇ gʼaˇ le le puiˉ ve hpehꞈ ve maˇ shuˍ daꞈ tehꞈ ngaˬ e ngaˬ htaꞈ maˍ laˇ leh, teˇ gʼaˇ le le kaꞈ Yaˬhoˉvaˬ awˬ pon awˬ hpfuhˇ cawˬ ve tehꞈ maˍ laˇ ve yoˬ. Ngaˬ e chi hkʼe te ve ngaˬ e htaꞈ ngaˬ awˬ bon uiˍ jaˇ. Hkʼe te leh, ngaˬ awˬ to leh shu htaꞈ maˇ tehˆ daꞈ.”

7-8. Awˬ hpawˇ awˬ miˇ ma htaꞈ hkʼaˬ hkʼe te yawˆ yan piˇ gʼa tuˬ le?

⁷ Hkriꞈ yaˇ hpehꞈ ve awˬ hpawˇ lehˬ awˬ miˇ ma htaꞈ gʼa yawˆ yan ve yoˬ. (1 Peˍtruˆ 3:7) Tawˇ pa haˉ te kʼo, awˬ miˇ ma htaꞈ a yeˇ gʼa yuˬ leh awˬ nu ve chaw aꞈ kehˉ awˬ miˇ ma htaꞈ gʼa nyi haꞈ shaˉ piˇ ve yoˬ. Awˬ hpawˇ awˬ miˇ ma htaꞈ maˇ dawˇ law jaˇ leh awˬ miˇ ma awˬ nu ve yaˇ miˇ htaꞈ maˇ tehˆ daꞈ. Yaꞈ hkʼaˇ, awˬ hpawˇ chi hkʼe maˇ te ve kʼo, hkʼaˬ hkʼe hpehꞈ la tuˬ le? Ro˗saˆ lehˬ awˬ hpawˇ Shaˉhkiˆhkanˍ ve chaw maˇ hpehꞈ. Awˬ hpawˇ awˬ miˇ ma awˬ nu ve yaˇ miˇ htaꞈ tehˆ daꞈ leh aˬ htoꞈ ma te nawˬ shu htaꞈ maˇ shuˍ tehꞈ kʼoˆ piˇ ve yoˬ. Yawˇ awˬ to yawˇ maˇ yonˍ gʼa leh yawˇ htaꞈ haꞈ ve chaw cawˬ˗aw laˇ tehꞈ, maˇ yonˍ gʼa tuˬ te piˇ ve yoˬ. Yawˇ kʼoˆ ve, “ngaˬ awˬ to ngaˬ hkʼaˬ htaˆ kaꞈ shaˍ tiꞈ gʼa piˇ ve, ngaˬ Yaˬhoˉvaˬ mehˆ gʼuˇ suhˍ lo awˬ hpfuhˇ cawˬ ve yoˬ.” Yaꞈ hkʼaˇ, Hkri yaˇ hpehꞈ ve awˬ hpawˇ lehˬ chi hkʼe maˇ te. Yawˇ chi hkʼe te ve kʼo, awˬ miˇ ma geh kaꞈ meuˆ daꞈ leh Yaˬhoˉvaˬ geh kaꞈ meuˆ daꞈ tuˬ yoˬ tehꞈ shiˍ ve pa taw, yawˇ awˬ miˇ ma htaꞈ yawˆ yan ve yoˬ. *

⁸ Awˬ hpawˇ awˬ miˇ ma htaꞈ yawˆ yan ve lehˬ, awˬ miˇ ma htaꞈ chiˇ mvuh piˇ leh awˬ miˇ ma htaꞈ haꞈ ve tehꞈ kʼoˆ piˇ leh suh mehˆ gʼuˇ suhˍ kaꞈ awˬ miˇ ma htaꞈ chiˇ mvuh ve yoˬ. (Tawˇ naˉ ve 31:28) Peuˬ taˉ ve teˇ lawn hkʼaw Hke˗hti˗naˆ ve awˬ lawn gʼa henˇ ve, yawˇ awˬ to yawˇ awˬ hpfuhˇ maˇ cawˬ tehꞈ dawˇ ve yoˬ. Yaˇ ehˉ htaˇ awˬ e yawˇ htaꞈ deˇ hkʼeh leh awˬ nu ve yaˇ miˇ leh yawˇ ve awˬ chawˇ htaꞈ kaꞈ yawˇ awˬ e yawˇ htaꞈ tehˆ daꞈ ve yoˬ. Yawˇ uiˍ la˗oˬ htaˇ yawˇ awˬ to leh awˬ nu ve chaw htaꞈ tehˆ daꞈ hkʼeh ve yoˬ. Yawˇ Shaˉhkiˆhkanˍ ve chaw hpehꞈ˗oˬ ve htawˇ, chi hkʼe te sheˍ ve yoˬ. Yawˇ awˬ to yawˇ awˬ hpfuhˇ maˇ cawˬ ve tehꞈ dawˇ ve htaꞈ tawˍ daꞈ gʼaˇ tuˬ, hpehꞈ chehˇ ve htaꞈ shiˍ tuˬ, yawˇ awˬ to leh shu htaꞈ maˇ gʼa tehˆ daꞈ tuˬ, Hke˗hti˗naˆ awˬ hpawˇ ga piˇ ve yoˬ. Hke˗hti˗naˆ awˬ hpawˇ htaꞈ kʼoˆ ve, “yawˇ ngaˬ htaꞈ haꞈ ve yoˬ. Ngaˬ te ve daꞈ ve kʼo yawˇ chiˇ mvuh laˇ leh Yaˬhoˉvaˬ ve te hkʼaˇ dawˇ hkʼaˇ daꞈ ve htaꞈ ngaˬ dawˇ nyi tuˬ yawˇ ga laˇ ve yoˬ. Leh ngaˬ maˇ daꞈ ve dawˇ hkʼaˇ cawˬ htaˇ kaꞈ pa tuˬ yawˇ ga laˇ ve yoˬ.”

9-10. Awˬ viˉ awˬ nyi yaˇ miˇ teˇ gʼaˇ yawˇ awˬ to leh shu htaꞈ maˇ gʼa tehˆ daꞈ tuˬ nyi haꞈ shaˉ paˍ teˇ hpaˍ hkʼaˬ hkʼe ga piˇ ve le?

⁹ Awˬ viˉ awˬ nyi yawˇ awˬ to leh shu htaꞈ tehˆ daꞈ gaˇ ve chaw htaꞈ nyi haꞈ shaˉ paˍ hkʼaˬ hkʼe ga piˇ ve le? Awˬ viˉ awˬ nyi yaˇ miˇ Ha˗nu˗ne ve awˬ lawn htaꞈ teˇ geh nyi sheˍ. Yaˇ ehˉ htaˇ yawˇ htaꞈ shu hkʼa dehꞈ maˇ chiˇ mvuh piˇ. Yawˇ kʼoˆ ve, “ngaˬ yaꞈ taw puiˉ jaˇ leh awˬ nu ve chaw ngaˬ aꞈ kehˉ daꞈ ve tehꞈ dawˇ ve yoˬ. Ngaˬ tawnˇ gʼa la˗oˬ htaˇ, ngaˬ awˬ to shu htaꞈ hkʼaˬ htaˆ kaꞈ tehˆ daꞈ ve yoˬ.” Ha˗nu˗ne Shaˉhkiˆhkanˍ ve chaw hpehꞈ˗oˬ ve htawˇ, yawˇ awˬ to leh shu htaꞈ tehˆ daꞈ chehˇ sheˍ. Hkʼe te leh, Hkriꞈ yaˇ awˬ moˍ hkʼaw yawˇ a yeˇ maˇ uiˍ tehꞈ dawˇ ve yoˬ. Yaꞈ hkʼaˇ, chi teˇ hkui yawˇ gʼuˇ suhˍ peuˍ ve te ve ha lehˬ jaˇ. Yawˇ pa gʼa tuˬ aˬ htoꞈ ma ga piˇ ve le?

¹⁰ Ha˗nu˗ne nyi haꞈ shaˉ paˍ htaꞈ kʼoˆ piˇ ve, nawˬ hui ngaˬ htaꞈ ga laˇ gʼa jaˇ. Nawˬ Hkriꞈ yaˇ awˬ moˍ hkʼaw a yeˇ uiˍ ve chaw hpehꞈ ve tehꞈ yawˇ hui kʼoˆ piˇ leh nawˬ daꞈ ve henˇ yuˬ tuˬ hpehꞈ ve tehꞈ yawˇ  hui chiˇ mvuh piˇ ve yoˬ. Ha˗nu˗ne kʼoˆ ve, “awˬ viˉ awˬ nyi yaˇ miˇ a shaꞈ i ve chaw htaꞈ awˬ gʼaˇ ca piˇ˗e tehꞈ nyi haꞈ shaˉ paˍ ngaˬ htaꞈ laiˉ pawˆ kʼoˆ laˇ ve yoˬ. Ngaˬ ha lehˬ jaˇ. Chi ngaˬ awˬ hpfuhˇ cawˬ ve tehꞈ dawˇ tuˬ te laˇ ve yoˬ. Hkriꞈ yaˇ awˬ moˍ hkʼaw ve yaˇ miˇ haˉ teˇ hpaˍ htaꞈ ngaˬ ga piˇ ve awˬ bon uiˍ jaˇ tehꞈ, nyi haꞈ shaˉ paˍ kʼoˆ laˇ ve yoˬ. Leh 1 Hteˇsaˍlawˇniˆ liꞈ 1:2, 3 ngaˬ htaꞈ gʼaw maˍ laˇ ve yoˬ. Ngaˬ nyi ma hkʼaw gaˬ jaˇ. Ngaˬ nyi haꞈ shaˉ paˍ htaꞈ awˬ bon uiˍ jaˇ. Yawˇ hui lehˬ yawˬ hawˉ shehˍ hpaˇ yawˬ htaꞈ haꞈ jaˇ ve hpehꞈ ve yoˬ. Chi teˇ hkui ngaˬ Yaˬhoˉvaˬ ve kanˉ hkʼaˇ hkʼaw awˬ hpfuhˇ cawˬ ve tehꞈ dawˇ˗oˬ.”

11. Iˉsaˍyaˆ liꞈ 57:15 hkʼaw kʼoˆ taˍ ve hkʼe, shu fawˉ mehˍ piˇ leh nyi cha piˇ ve chaw htaꞈ ngaˬ hui hkʼaˬ hkʼe ga piˇ gʼa tuˬ le?

¹¹ Iˉsaˍyaˆ liꞈ 57:15 gʼaw sheˍ. Yaˬhoˉvaˬ lehˬ shu nyi cha piˇ ve chaw leh fawˉ mehˍ piˇ ve chaw htaꞈ dawˇ haˍ jaˇ. Ngaˬ hui yawˇ hui htaꞈ a yeˇ yuˬ piˇ ve teˇ hkʼaˇ lehˬ, dawˇ haˍ piˇ ve yoˬ. Yaˬhoˉvaˬ yawˇ hui htaꞈ haꞈ ve leh yawˇ hui Yaˬhoˉvaˬ mehˆ gʼuˇ suhˍ awˬ hpfuhˇ hkʼaˆ jaˇ ve tehꞈ dawˇ tcuh gaˇ ve yoˬ. (Tawˇ naˉ ve 19:17) Ngaˬ hui te gʼa ve awˬ nu ve teˇ hkʼaˇ lehˬ, ngaˬ hui nyi ma nuˇ nehˬ ve cawˬ leh nyi ma taˍ nehˬ ve tehꞈ, ngaˬ hui cheuˬ ve tehꞈ shu htaꞈ maˇ hpeuꞈ maw piˇ gaˇ. Awˬ viˉ awˬ nyi ngaˬ hui htaꞈ hkawehˉ laˇ ve pa taw, ngaˬ hui a yeˇ uiˍ ve chaw hpehꞈ ve tehꞈ yawˇ hui htaꞈ maˇ dawˇ tcuh gaˇ. Ngaˬ hui puiˉ ve hpehꞈ ve leh cuˇ yiˍ htaꞈ yehˇ leh shu htaꞈ awˬ gʼaˇ piˇ cawˇ ve yoˬ.—1 Peˍtruˆ 4:10, 11.

12. Nyi ma nuˇ nehˬ ve chaw aˬ htoꞈ ma te Yeˍsuˆ geh laˬ gaˇ ve le? (Awˬ htaꞈ hpawˇ ve awˬ han htaꞈ nyi sheˍ.)

¹² Yeˍsuˆ awˬ hkʼaˇ suh gʼaꞈ yuˬ ve chaw htaꞈ te piˇ ve awˬ hkʼaˇ laiˉ ceuˬ htaꞈ ngaˬ hui henˇ yuˬ gʼa ve yoˬ. Yeˍsuˆ lehˬ miˬ guiˬ hkʼoˆ lo cheuˬ jaˇ ve chaw hpehꞈ ve yoˬ. Yaꞈ hkʼaˇ, yawˇ “nyi ma nuˇ nuˇ nehˬ nehˬ cawˬ” ve yoˬ. (Maꞈhtehˍ 11:28-30) Yeˍsuˆ cuˇ yiˍ cawˬ jaˇ leh hkʼaˬ hkʼe taw shiˍ ve tehꞈ shu htaꞈ maˇ kʼoˆ piˇ. Yawˇ maˍ htaˇ hkʼa sha sha˗ehˬ na gʼa ve tawˇ hkawˇ yehˇ leh a hkʼe leˇ ve chaw hkʼa dehꞈ na gʼa tuˬ yawˇ tawˇ pa haˉ tehˆ maˍ piˇ ve yoˬ. (Luˉkaꞈ 10:21) Oˇ htaˇ teˇ co˗e bon awˬ hoˉ hui uiˍ muiˬ caˆ muiˬ ve htaꞈ Yeˍsuˆ maˇ shuˍ leh Gʼuiˬ sha mehˆ gʼuˇ suhˍ chaw yaˇ awˬ hpfuhˇ maˇ cawˬ tehꞈ dawˇ tuˬ yawˇ hui te piˇ ve yoˬ. (Yoˇhanˬ 6:37) Yeˍsuˆ lehˬ teˇ gʼaˇ le le htaꞈ yawˆ yan ve yoˬ.

13. Yeˍsuˆ awˬ laꞈ gʼawˇ hui htaꞈ haꞈ leh na gʼa ve tehꞈ hkʼaˬ hkʼe hpeuꞈ maw piˇ ve le?

¹³ Yeˍsuˆ awˬ laꞈ gʼawˇ hui htaꞈ haꞈ leh na gʼa ve yoˬ. Yeˍsuˆ teˇ gʼaˇ leh teˇ gʼaˇ htaꞈ awˬ vuiˬ piˇ ve maˇ shuˍ daꞈ ve yoˬ. Teˇ gʼaˇ leh teˇ gʼaˇ peun daꞈ ve, puiˉ ve hpehꞈ ve kaꞈ maˇ shuˍ daꞈ ve, leh Gʼuiˬ sha ve kanˉ te gʼa ve kaꞈ maˇ shuˍ daꞈ tehꞈ yawˇ shiˍ ve yoˬ. Yaꞈ hkʼaˇ, yawˇ hui te gʼa ve hkʼe te ve kʼo, Yeˍsuˆ kaꞈ yawˇ hui htaꞈ nyi hkʼaˇ suh jaˇ ve yoˬ. “Yawˇ hui puiˉ ve hpehꞈ ve” htaꞈ nyi leh hpu piˇ ve maˇ shuˍ daꞈ. Awˬ shehˍ hpaˇ yawˇ hui htaꞈ chiˇ mvuh piˇ leh kʼoˆ ve, “daꞈ ve yoˬ. Na yuˬ puiˉ leh daꞈ ve awˬ ceˬ˗oˬ!”—Maꞈhtehˍ 25:14-23.

14. Ngaˬ hui Yeˍsuˆ htaꞈ hkʼaˬ hkʼe te henˇ yuˬ gʼa tuˬ le?

¹⁴ Yeˍsuˆ ngaˬ hui htaꞈ haꞈ leh na gʼa ve yoˬ. Ngaˬ hui teˇ gʼaˇ leh teˇ gʼaˇ maˇ shuˍ daꞈ ve leh, puiˉ ve hpehꞈ ve kaꞈ maˇ shuˍ daꞈ ve tehꞈ yawˇ na gʼa ve yoˬ. Yaꞈ hkʼaˇ, ngaˬ hui te gʼa ve hkʼe te ve kʼo, Yeˍsuˆ ngaˬ hui htaꞈ nyi hkʼaˇ suh jaˇ ve yoˬ. Ngaˬ hui kaꞈ Yeˍsuˆ htaꞈ henˇ yuˬ cawˇ ve yoˬ. Awˬ viˉ awˬ nyi yawˇ awˬ hpfuhˇ maˇ cawˬ ve tehꞈ dawˇ tuˬ ngaˬ hui maˇ te piˇ cawˇ leh yawˇ awˬ nu ve chaw hkʼe taw maˇ te gʼa leh yaꞈ taw tuˬ kaꞈ ngaˬ hui maˇ te piˇ cawˇ. Yaꞈ hkʼaˇ, awˬ viˉ awˬ nyi Yaˬhoˉvaˬ ve kanˉ te chehˇ ve daꞈ jaˇ˗oˬ ve htaꞈ ngaˬ hui coˇ caˇ leh chiˇ mvuh piˇ cawˇ ve yoˬ.

15-16. Awˬ viˉ awˬ nyi yaˇ miˇ teˇ gʼaˇ yawˇ dawˇ teh taˍ ve awˬ ceuˬ htaꞈ te gʼa htaˇ aˬ htoꞈ ma awˬ bon gʼa ve le?

¹⁵ Ngaˬ hui Yaˬhoˉvaˬ ve kanˉ te tuˬ dawˇ teh taˍ htaˇ, ngaˬ hui ve a shaꞈ kaꞈ awˬ hpfuhˇ cawˬ leh ha lehˬ jaˇ tuˬ yoˬ. Yaꞈ hkʼaˇ, a yeˇ uiˍ jaˇ ve lehˬ shu awˬ hkʼaˇ suh gʼaꞈ te ve maˇ heˆ. Ngaˬ hui te gʼa ve awˬ ceuˬ htaꞈ gʼa dawˇ teh taˍ ve yoˬ. Shu hkʼe gʼaꞈ te ve kʼo, nyi ma luˬ leh awˬ gʼaˇ nuˇ tuˬ yoˬ. (Luˉkaꞈ 14:28) Gʼuˇ suhˍ peuˍ ve Mi˗do˗ri ve awˬ lawn htaꞈ teˇ geh nyi sheˍ.

¹⁶ Mi˗do˗ri ve awˬ pa Shaˉhkiˆhkanˍ ve chaw maˇ  hpehꞈ. Yawˇ yaˇ ehˉ htaˇ awˬ pa lehˬ, yawˇ htaꞈ awˬ nyi awˬ naˉ leh liꞈ henˇ kuiˬ lo ve awˬ chawˇ teˇ hpaˍ geh tehˆ daꞈ leh nawˬ aˬ htoꞈ ma te shu hkʼe maˇ cheuˬ tehꞈ kʼoˆ ve yoˬ. Mi˗do˗ri kʼoˆ ve, “oˇ ve teˇ yanˇ ngaˬ dawˇ maˇ jaˇ leh ngaˬ awˬ to ngaˬ awˬ hpfuhˇ maˇ cawˬ tehꞈ dawˇ ve yoˬ.” Yaꞈ hkʼaˇ, uiˍ la˗oˬ htaˇ yawˇ awˬ to htaꞈ kʼawꞈ yonˍ gʼa la ve yoˬ. “Ngaˬ teˇ nyi le le Liꞈ hpu gʼaw ve pa taw, ngaˬ awˬ to ngaˬ yonˍ gʼa tuˬ te laˇ leh Yaˬhoˉvaˬ ngaˬ htaꞈ haꞈ ve tehꞈ dawˇ ve yoˬ.” Chi hkʼoˆ kaꞈ, yawˇ te gʼa tuˬ awˬ ceuˬ htaꞈ dawˇ teh taˍ leh yawˇ dawˇ teh taˍ ve hkʼe te gʼa tuˬ, Yaˬhoˉvaˬ ga laˇ tuˬ bon lawˬ ve yoˬ. Yaˬhoˉvaˬ awˬ pon te piˇ ve awˬ ceuˬ htaꞈ yawˇ ha lehˬ ve yoˬ.

17. Ngaˬ hui ve “nyi ma awˬ hkʼaw lo dawˇ hkʼaˇ awˬ suhˉ cawˬ la” tuˬ hkʼaˬ hkʼe te gʼa ve le? Leh ngaˬ hui chi hkʼe te ve kʼo, awˬ bon hkʼaˬ hkʼe gʼa tuˬ le?

¹⁷ Ngaˬ hui coˇ caˇ leh maˇ daꞈ ve dawˇ hkʼaˇ htaꞈ maˇ dawˇ˗oˬ ve htawˇ dawˇ chehˇ sheˍ. Chi lehˬ sha ve maˇ heˆ. Yaˬhoˉvaˬ ngaˬ hui htaꞈ kʼoˆ laˇ ve, “nyi ma awˬ hkʼaw lo dawˇ hkʼaˇ awˬ suhˉ cawˬ la piˇ˗oˆ.” (Eˇfeˇsuꞈ 4:23, 24) Chi hkʼe te gʼa tuˬ nawˬ bon gʼa lawˬ ve, Liꞈ hpu henˇ ve, leh henˇ taˍ ve awˬ ceuˬ htaꞈ hkʼa dehꞈ dawˇ nyi ve, Yaˬhoˉvaˬ ve daꞈ kehˬ ve awˬ ha hpu ga laˇ tuˬ lawˬ sheˍ. Nawˬ awˬ to shu htaꞈ maˇ gʼa tehˆ daꞈ tuˬ, Gʼuiˬ sha ve daꞈ kehˬ ve awˬ ha hpu ga laˇ tuˬ lawˬ sheˍ. Chi hkʼoˆ kaꞈ, nawˬ hkawehˉ ve maˇ heˆ leh nyi ma hkʼaw uiˍ muiˬ caˆ muiˬ ve cawˬ˗aw laˇ tehꞈ shiˍ tuˬ Gʼuiˬ sha ga laˇ tuˬ yoˬ. Yaꞈ hkʼaˇ, maˇ daꞈ ve dawˇ hkʼaˇ chi hkʼaˬ hkʼe htaˇ cawˬ la ve kʼo, nawˬ dawˇ hkʼaˇ chi hkʼe ve htaꞈ laꞈ haˉ yuˬ baˬ gʼa tuˬ Gʼuiˬ sha ga laˇ tuˬ yoˬ.

18. 2 Raˍsaˍvanˍ liꞈ 6:29, 30 hkʼaw nawˬ awˬ gʼaˇ gʼa tuˬ hkʼaˬ hkʼe ga laˇ ve le?

¹⁸ 2 Raˍsaˍvanˍ liꞈ 6:29, 30 gʼaw sheˍ. Yaˬhoˉvaˬ lehˬ ngaˬ hui ve dawˇ hkʼaˇ htaꞈ shiˍ ve yoˬ. Miˬ guiˬ yaˇ ve dawˇ hkʼaˇ hkʼe dawˇ ve htaꞈ ngaˬ hui gʼa tawˍ daꞈ leh awˬ gʼaˇ nuˇ ve htaꞈ kaꞈ gʼa tawˍ daꞈ ve Yaˬhoˉvaˬ shiˍ ve yoˬ. Ngaˬ hui hkʼaˬ hkʼe taw gʼa tawˍ daꞈ ve htaꞈ Yaˬhoˉvaˬ mawˬ htaˇ, yawˇ ngaˬ hui htaꞈ haꞈ jaˇ ve yoˬ.

19. Yaˬhoˉvaˬ ngaˬ hui htaꞈ hkʼaˬ hkʼe dawˇ ve na gʼa tuˬ yawˇ aˬ htoꞈ ma ve awˬ lawn htaꞈ yehˇ leh tehˆ maˍ laˇ ve le?

 ¹⁹ Yaˬhoˉvaˬ ngaˬ hui htaꞈ hkʼaˬ hkʼe dawˇ ve na gʼa tuˬ, awˬ e teˇ gʼaˇ yawˇ ve yaˇ htaꞈ hkʼaˬ hkʼe dawˇ ve awˬ lawn htaꞈ yehˇ leh tehˆ maˍ laˇ ve yoˬ. (Iˉsaˍyaˆ 49:15) Awˬ e teˇ gʼaˇ Ra˗che˗on meh ve awˬ lawn htaꞈ teˇ geh nyi sheˍ. Yawˇ kʼoˆ ve, “ngaˬ ve yaˇ miˇ Sa˗teh˗fa˗niˇ awˬ yanˇ maˇ gaˬ sheˍ htaˇ paw ve yoˬ. Ngaˬ ve yaˇ htaꞈ awˉ lawˉ teˇ pawˆ mawˬ htaˇ, yawˇ i jaˇ ve pa taw ha kʼaˉ jaˇ. Sa˗teh˗fa˗niˇ awˉ lawˉ teˇ ha pa htaˇ naˆ tsuhˇ yehˬ lo daˆ gʼa mvuhˍ ve yoˬ. Yaꞈ hkʼaˇ, saˍ laꞈ gʼonˍ yaˇ htaꞈ teˇ nyi le le taˆ guiˇ tcuh laˇ ve yoˬ. Ngaˬ yaˇ geh gʼa chehˇ ve ha lehˬ jaˇ leh ngaˬ yaˇ geh meuˆ daꞈ ve yoˬ. Chi teˇ hkui Sa˗teh˗fa˗niˇ 6 hkʼawꞈ gaˬ˗oˬ leh yawˇ a shaꞈ hkʼa ma˗ehˬ ve awˬ nu ve yaˇ aꞈ kehˉ i jaˇ. Yawˇ a shaꞈ teꞈ chehˇ gʼa tuˬ hkʼaˬ hkʼe taw gʼa tawˍ daꞈ ve htaꞈ ngaˬ shiˍ ve pa taw, ngaˬ yawˇ htaꞈ haꞈ jaˇ. Yaˇ ngaˬ ha lehˬ tuˬ te laˇ jaˇ.” Ngaˬ hui Gʼuiˬ sha ve kanˉ te gʼa ve hkʼe te gʼa tuˬ htaꞈ tawˍ daꞈ chehˇ ve Gʼuiˬ sha mawˬ htaˇ, yawˇ ngaˬ hui htaꞈ haꞈ jaˇ ve shiˍ htaˇ awˬ gʼaˇ gʼa jaˇ.

20. Nawˬ Yaˬhoˉvaˬ ve kanˉ te ve chaw hpehꞈ ve ha lehˬ tuˬ te laˇ ve aˬ htoꞈ ma le?

²⁰ Nawˬ Yaˬhoˉvaˬ ve kanˉ te ve chaw hpehꞈ leh yawˇ ve yehˬ kʼa hkʼaw chehˇ ve yoˬ. Nawˬ awˬ hpfuhˇ cawˬ ve tehꞈ Gʼuiˬ sha mawˬ leh nawˬ htaꞈ shuˍ daꞈ ve teˇ gʼaˇ kaꞈ maˇ cawˬ. Nawˬ shu aꞈ kehˉ daꞈ ve maˇ heˆ leh cheuˬ ve pa taw, Yaˬhoˉvaˬ gʼawˬ veu laˇ ve maˇ heˆ. Nawˬ nyi ma nuˇ nehˬ leh Gʼuiˬ sha ve awˬ lawn shiˍ gaˇ ve tehꞈ yawˇ mawˬ˗oˬ ve pa taw, nawˬ ve dawˇ hkʼaˇ pa tuˬ yawˇ htaꞈ ga laˇ tcuh ve yoˬ. (Chiˇ mvuh ve 25:9) Nawˬ Yaˬhoˉvaˬ ve kanˉ te gʼa ve hkʼe te ve kʼo, nawˬ te ve kanˉ yawˇ awˬ hpfuhˇ shiˍ leh yawˇ ha lehˬ jaˇ ve nawˬ te piˇ gʼa ve tehꞈ yonˍ gʼa ve yoˬ. Nawˬ yeunˇ hkanˍ leh yonˍ hkʼaˇ htaꞈ haꞈ shaˉ ve kʼo, “hteˇ ve leh daꞈ ve nyi ma awˬ hkʼaw lo” cawˬ ve tehꞈ hpeuꞈ maw piˇ ve yoˬ. (Luˉkaꞈ 8:15) Yaˬhoˉvaˬ ve kanˉ nawˬ puiˉ ve hpehꞈ ve hkʼe caˉ leh te sheˍ. Nawˬ kaꞈ “a shu yawˇ te taˍ ve kanˉ awˬ hkʼaw lo ceh tiˉ” gʼa ha lehˬ tuˬ yoˬ.