1. Mwomwo ika Yehova katwesekesela kuli vakwetuko?

YEHOVA azanga vyuma vize atenga mujijila jakulisezaseza. Tunatachikiza ngocho mwomwo atenga mitondo, natunyama, kuhakilako vene navatu mujijila jakulisezaseza. Mutu himutu alihandununako kuli mukwavo mujijila jimwe. Shikaho, Yehova keshi kwesekesa mutu kuli mukwavoko. Eji kukekesanga mumichima yenu. (Samwe. 1, 16:7) Atachikiza vyuma munahase kulinga, navize kamweshi kuhasa kulingako, kaha nawa atachikiza mujila vamilelelemo. Keshi kumilweza mulinge vyuma vize kamweshi kuhasa kulingako. Twatela kulondezeza Yehova hakuhona kulyesekesanga kuli vakwetu. Nge natulinga ngocho kaha ‘natushinganyekanga mwamangana,’ ngocho katweshi kulimona ngwetu tuvamokomoko, chipwe kumona ngwetu twahambakana vakwetuko.—Loma 12:3.

2. Mwomwo ika chapwila chachipi kulyesekesa kuli vakwetu?

² Tunatachikiza ngwetu tunahase kulinangulako vyuma vimwe vyamwaza kuli vandumbwetu. Chakutalilaho, vandumbwetu vamwe veji kuzatanga kanawa mulimo wakwambulula. (Hepe. 13:7) Shikaho kulinangula kuli vandumbwetu kana chinahase kutukafwa nayetu tuhotole uhashi wetu wakwambulula. (Fwili. 3:17) Oloze kulondezeza chakutalilaho chamwaza chandumbwetu chalihandununa nakulyesekesa kuli ikiye. Mwomwo kulyesekesa kuli ikiye chinahase kutulingisa tumwivwile lushiushiu, nakuhomba chipwe kulivwa kupwa vamokomoko. Ngana muze twalinangulanga muchihande chinafumuho, kufwila kulikomwesa navandumbwetu muchikungulwilo chinahase kutulingisa tuzeye kushipilitu. Shikaho Yehova atulweza ngwenyi: “Mutu himutu akekese vilinga vyenyi, kaha mwawahilila navyuma vyenyi ivene, keshi hakulyesekesa kumutu mukwavoko.”—Ngale. 6:4.

3. Vyuma muka vyakushipilitu vize munatesamo vinamilingisa mupwenga vakuwahilila chikuma?

 ³ Yehova asaka muwahililenga hakuzovoloka chenu kushipilitu. Chakutalilaho, omu vamimbapachishile mwawahililile chikuma mwomwo mwatachikijile ngwenu mwateselemo chuma mwalitomenene. Wauchi nawa amishinjililile kulinga chuma kana. Oloze mwalihanyine enu vavene vamimbapachise mwomwo yakuzanga Kalunga. Shinganyekenu havyuma munalingi kufuma haze vamimbapachishile. Chakutalilaho, kutala munazange chikuma kutanga Mbimbiliya nakupwa nachilongesa chauka tahi? Kutala muli jino nakulomba kuli Yehova namuchima wenu wosena tahi? (Samu 141:2) Uno munalinangulako jijila jamwakushimutwila navatu namwakuzachishila kanawa vinoma tweji kuzachisanga mumulimo wakwambulula tahi? Kachi nge mwatwama natanga, kutala Yehova namikafwe mupwenga malunga, chipwe mapwevo, chipwe visemi vamwenemwene tahi? Nge munatesamo vyuma kana, kaha namupwa vakuwahilila chikuma.

4. Vyuma muka natushimutwila muchihande chino?

⁴ Tunahase kukafwa vandumbwetu vawahililenga hakuzovoloka chavo kushipilitu. Tunahase nawa kuvakafwa valihendenga kukulyesekesa kuli vakwavo. Muchihande chino, natushimutwila omwo visemi vanahase kukafwa vana vavo, nomwo vaze vali mumalo vanahase kulikafwa, nomwo tulama navandumbwetu veka vanahase kukafwa vandumbwavo muchikungulwilo. Natushimutwila nawa hajindongi jamuMbimbiliya jize jinahase kutukafwa tulitomene vyuma vize tunahase kutesamo.

5. Kweseka naWavaka-Efwesu 6:4, chuma muka chize kavatela kulinga visemiko?

⁵ Visemi vatela kuzangama kuchina navesekesa mwanavo umwe kumukwavo, chipwe kulweza mwanavo alinge chuma chize keshi kuhasa kulingako, mwomwo echi chinahase kuhombesa mwana. (Tangenu Wavaka-Efwesu 6:4.) Ndumbwetu wapwevo Sachiko * ambile ngwenyi: “Milongeshi jami vasakilenga nguhambakane vakwetu vosena hashikola. Mama nawa asakilenga ngulinge kanawa kushikola mangana nguhane unjiho wamwaza kuli milongeshi jami nakuli tata uze kapwa Chinjihoko. Asakilenga nguhone kulimbenjaho numba kamwe hakusoneka vyeseko, oloze changukaluhwililile kulinga ngocho. Numba tuhu munahichi myaka yayivulu kufuma haze ngwakumishile shikola, lwola lumwe ngweji kushinganyekanga ngwami pamo naYehova  keshi nakwivwila kuwaha milimo nguli nakumuzachilako numba nguzata tuhu nangolo.”

6. Vishina muka navalinangula visemi hali Samu 131:1, 2?

⁶ Visemi vanahase kulinangula vishina vyavilemu vize vyatwama hali Samu 131:1, 2. (Tangenu.) Mwangana Ndavichi ambile ngwenyi kafwililile “vyuma vyavinene chikumako,” chipwe kufwila vyuma vize keshi kuhasa kuwanako. Muchima wenyi wakulinyisa wamukafwile apwenga ‘wakuunda’ nakusuuluka navyuma apwile navyo. Vyuma muka navalinangula visemi kumazu ahanjikile Ndavichi? Muchima wakulinyisa unahase kukafwa visemi vatachikize hakumina ngolo javo nahakumina ngolo javana vavo. Visemi vanahase kukafwa vana vavo valivwe kupwa vavalemu hakuvakafwa valitomene vyuma vize vanamono ngwavo vanahase kuvitesamo. Ndumbwetu wapwevo Marina ambile ngwenyi: “Mama kangwesekeselenga kuli yayami chipwe kuli vasongo jami chipwe kuli vanyike vekako. Angunangwile ngwenyi mutu himutu atwama nawana wenyi, kaha tuvosena twapwa tuvavalemu kuli Yehova. Mwomwo yakungukafwa kuli mama, ngocho kangwalyesekesa kuli vakwetuko.”

7-8. Uno lunga nahase kusolola ngachilihi ngwenyi avumbika puwenyi?

⁷ Lunga uze apwa muka-Kulishitu atela kuvumbika puwenyi. (Petu. 1, 3:7) Chakutalilaho, atela kusolola ngwenyi avumbika puwenyi hakumumona kupwa wamulemu. Keshi kumulweza alinge chuma chize keshi kuhasa kulingako. Kaha nawa keshi kumwesekesa kumapwevo vekako. Uno pwevo nahase kwivwa ngachilihi nge lunga lyenyi mwamwesekesa kumapwevo veka? Chakutalilaho, ndumbwetu Rosa veji kumwesekesanga kumapwevo veka kuli lunga lyenyi uze kapwa Chinjihoko. Mazu amapi eji kuhanjikanga lunga lyenyi eji kulingisanga ndumbwetu Rosa evwenga kupihya nakushinganyeka ngwenyi wauchi nou amuzanga. Ou ndumbwetu ambile ngwenyi, “Lwola lwosena ngwasaka mutu wakungulweza ngwenyi Yehova anguzanga.” Oloze lunga uze apwa muka-Kulishitu eji kuvumbikanga puwenyi mwomwo kulinga ngocho chinahase kuzamisa ulo wavo nakupwa nausoko wakukola naYehova. *

⁸ Lunga uze avumbika puwenyi eji kumusangejekanga, nakumwalisa, nakumulweza ngwenyi amuzanga. (Vishi. 31:28) Omu mukiko chapwile nakuli Katerina, uze twavulukanga muchihande chinafumuho. Lunga lyenyi eji kumulingilanga vyumevi tunavuluka, ngocho echi cheji kumukafwanga alivwe kupwa wamulemu. Omu Katerina apwile kanyike, naye amwesekeselenga kuli vakwavo vanyike vamapwevo nakuli masepa jenyi. Echi chamulingishile alimone kupwa wamokomoko. Chalingishile nawa aputuke kulyesekesanga kuli vakwavo nahalwola ejile nakupwa Chinjiho chaYehova. Oloze lunga lyenyi uze apwa Chinjiho namukafwe ambile muchima wakulyesekesanga kuli vakwavo nakuputuka jino kulimona mujila yamwaza. Ambile ngwenyi: “Lunga lyami anguzanga, kaha eji kungusangejekanga havyuma vyamwaza ngweji kulinganga, nakungulombelako. Eji kungulwezanga nawa vilinga vyamwaza atwama navyo Yehova nangukukafwa ngwolole vishinganyeka vyami vyakuhenga ngweji kupwanga navyo.”

9-10. Tulama vakafwile ngachilihi ndumbwetu Hanuni alihende kumuchima wakulyesekesa kuli vakwavo?

⁹ Uno tulama vanahase kukafwa ngachilihi vandumbwetu vaze vazanga kulyesekesa kuli vakwavo? Tutalenu hachakutalilaho chandumbwetu wapwevo Hanuni, uze kavasangejekelenga chikumako omu apwile kanyike. Ambile ngwenyi: “Ngwapwilenga nguwasonyi nakushinganyeka ngwami vakwetu vanyike vanguhambakana ami. Muchima wakulyesekesa kuli vakwetu ngwaputukile kupwa nawo omu ngwapwile kanyike chikuma.” Ndumbwetu Hanuni  atwalileho lika kulyesekesanga kuli vakwavo nahalwola ejile mumuchano. Echi chamulingishile alivwe ngwenyi apwile wamokomoko muchikungulwilo. Oloze oholyapwa apwa payiniya wakuwahilila. Chuma muka chamukafwile echenga kulyesekesanga kuli vandumbwenyi?

¹⁰ Ndumbwetu Hanuni ambile ngwenyi tulama vakiko vamukafwile. Vamulwezelenga ngwavo apwile wamulemu muchikungulwilo nakumusangejeka hachakutalilaho chenyi chamwaza. Ambile ngwenyi: “Shimbu jimwe tulama vangulwezelenga ngukolezeze vandumbwetu vamapwevo vamwe vaze vapwile nakusakiwa kukolezeza. Kuzata mulimo kana changukafwile ngulivwe ngwami nayami ngwapwa nguwamulemu muchikungulwilo. Ngunakwanuka lwola lumwe, tulama vangusakwililile omu ngwakolezezele vandumbwetu vamwe vamapwevo vavanyike. Kufumaho vangutangilile chisoneka chaWavaka-Tesolonyika 1, 1:2, 3. Chisoneka kana changukolezezele chikuma. Ngweji kusakwililanga vaze tulama hakungukafwa ngumone ngwami ngwapwa wamulemu muchikungulwilo.”

11. Tunahase kukafwe ngachilihi vatu vaze “vanayanjiwa navaze vanahombo” ngana muze vavuluka hali Isaya 57:15?

¹¹ Tangenu Isaya 57:15. Yehova eji kuzakamanga chikuma vaze “vanayanjiwa navaze vanahombo.” Tuvosena twatwama namulimo wakukolezeza vandumbwetu muchikungulwilo keshi tulama kahako. Jila yimwe tunahase kukolezezelamo vandumbwetu shina kuvazakama. Yehova asaka tuvazange ngana muze avazanga ikiye. (Vishi. 19:17) Tunahase nawa kukafwa vandumbwetu nge natupwa vakulinyisa. Katwatela kulinga vyuma vize vinahase kulingisa vakwetu vatwivwile lushiushiuko. Oloze twatela kuzachisa uhashi wetu nachinyingi chetu hakukolezezanga vakwetu.—Petu. 1, 4:10, 11.

12. Mwomwo ika vatu vavavulu vayilililenga kuli Yesu? (Talenu muvwimbimbi wahalipapilo lyahelu.)

¹² Chakutalilaho chaYesu chize chasolola omwo azakaminyinengamo vaka-kumukavangiza chinahase kutukafwa. Numba tuhu Yesu apwile mutu wamulemu havatu vosena vaze vatwamaho lyehi hano hamavu oloze apwile ‘wamuvwovu, wakulikehesa mumuchima.’ (Mateu 11:28-30) Numba tuhu apwile namangana nachinyingi chachivulu oloze kalivwimbilengako. Hakunangula, azachishilenga mazu amashi aze vevwishishilenga vatu, navyakutalilaho vyavyashi vize vyahetelenga vatu kumichima. (Luka 10:21) Yesu kapwile ngana mwavatwamina vamukwitava vakulivwimba vaze valingishilenga vatu valimone ngwavo kavapwile vavalemu kuli Kalungako. (Yowa. 6:37) Oloze ikiye avumbikilenga vatu vosena.

13. Uno keke nazangi apwile navyo Yesu vyasolokele ngachilihi hatoma omu atwaminenga natumbaji twenyi?

¹³ Keke nazangi apwile navyo Yesu vyasolokele hatoma omu atwaminenga natumbaji twenyi. Atachikijile ngwenyi vapwile nauhashi wakulisezaseza nachiyoyelo chakulisezaseza. Ngocho kavazachilenga milimo yoyimwe chipwe kuzata haseteko yoyimwe muwandeko. Chipwe ngocho, Yesu amwenenga milimo vazachilenga tumbaji twenyi vosena kupwa yayilemu. Muchima kanou waYesu wasolokele hatoma omu ahanjikile chifwanyisa chajitalende. Muchifwanyisa kana, mwata wavo ahanyine mulimo ndungo hindungo “kweseka nangolo jenyi.” Vandungo vavali vazachile nangolo oloze umwe awanyine nganyo yayinene chikuma kuhambakana mukwavo. Oloze mwata wavo avasangejekele vosena vavali namazu owamwe ngwenyi: “Wazachila, ove ndungo wamwaza wakushishika!”—Mateu 25:14-23.

14. Tunahase kulondezeza ngachilihi Yesu?

¹⁴ Yesu atuzanga kaha nawa eji kutwivwilanga keke. Atachikiza ngwenyi uhashi wetu nachiyoyelo chetu vyalihandununa, ngocho eji kwivwanga kuwaha nge natumuzachila kweseka noho hakumina ngolo jetu. Shikaho twatela kulondezezanga Yesu hakulinganga mwamwaza kuli vakwetu. Katwatela kulingisanga ndumbwetu alivwe kupwa wamokomoko chipwe kumwivwisa sonyi mwomwo ngwetu keshi  nakuzata ngana mwavakwavoko. Oloze lwola lwosena twatela kusangejekanga vandumbwetu hakuzachila Yehova kweseka noho hakumina ngolo javo.

15-16. Uno ndumbwetu Midori anganyalile ngachilihi hakulitomena vyuma vize ateselengamo?

¹⁵ Kulitomena kulinga vyuma vyakushipilitu chinahase kutulingisa tuwahilile. Oloze twatela kulitomena vyuma vize natutesamo kweseka nauhashi wetu nachiyoyelo chetu, keshi kulondezeza vakwetuko. Oloze nge natulondezeza vakwetu kaha tunahase kuhona kuvitesamo nakwivwa sonyi, nakuhomba. (Luka 14:28) Tutalenu hachakutalilaho chandumbwetu wapwevo Midori uze apwa payiniya.

¹⁶ Midori vamwivwishilenga sonyi kuli ise uze kapwa Chinjihoko hakumwesekesa kuli yayenyi nakuli songo yenyi navakwavo vaka-shikola. Ngocho ambile ngwenyi: “Ngwalivwilenga kupwa nguwamokomoko.” Oloze omu ndumbwetu Midori akolele, aputukile kulimona ngwenyi naikiye apwa wamulemu. Ambile ngwenyi, “Ngwatangilenga Mbimbiliya hakumbi hakumbi mangana nguunde muchima, ngocho ngwevwilenga ngwami Yehova anguzanga.” Kaha nawa alitomenenenga vyuma vize mwatesamo nakulomba Yehova amukafwe atesemo vyuma kana. Echi chakafwile ndumbwetu Midori awahilile hakuzovoloka chenyi kushipilitu.

17. Uno vyuma muka vinahase kutukafwa ‘tupwenga lika tuvavahya muvishinganyeka vyamichima yetu,’ kaha vyuma muka navifumaho?

¹⁷ Cheji kumbatanga lwola numba twalumuneko jila twalimwenamo etu vavavene. Shikaho Yehova atulweza ngwenyi: “Pwenunga lika muvavahya muvishinganyeka vyamichima yenu.” (Efwe. 4:23, 24) Hakusaka tulinge ngocho, twatela kulombanga, nakulinangulanga Mazu aKalunga, nakushinganyeka havyuma natutanga. Twatela kulinga vyuma vyosena evi nakulombanga kuli Yehova atukafwe. Shipilitu yajila  nayitukafwa tulihendenga kumuchima wakulyesekesanga kuli vakwetu. Kaha nawa Yehova mwatukafwa tutachikize nge tunaputuka kupwa namuchima walushiushiu chipwe kulivwimba nakutukafwa tuzachileho washiwashi.

18. Uno mazu ahali Mijimbu 2, 6:29, 30 eji kutukolezezanga ngachilihi?

¹⁸ Tangenu Mijimbu 2, 6:29, 30. Yehova atachikiza michima yetu. Atachikiza nawa ngwenyi tweji kulipikanga navishinganyeka vyavipi vyamuno mukaye, natutenga twetu. Yehova eji kutuzanganga omu eji kutumonanga tuli nakukilikita mangana tufungulule vyuma kanevi.

19. Chakutalilaho muka azachisa Yehova chize chasolola nge atuzanga?

¹⁹ Yehova azachisa chakutalilaho chamwana nanaye mangana asolole omu atuzanga. (Isa. 49:15) Tutalenu chakutalilaho chachisemi wapwevo Rachel. Ambile ngwenyi: “Mwanami wapwevo Stephanie asemukile uvisu. Omu asemukile, apwile wamundende chikuma kaha nawa asolokele nge keshi kuyoyako. Ngocho vamuhakile kumalayiti, kaha ndotolo angwitavishile ngumusatengako halwola lwalundende hakumbi hakumbi. Echi chalingishile tulizange chikuma namwanami. Oholyapwa mwanami ali jino namyaka 6 oloze asoloka kukeha hakumwesekesa kuli vakwavo vali namyaka yoyimwe. Chipwe ngocho, ngwamuzanga chikuma mwomwo ahichile muukalu waunene, kaha eji kungulingisanga nguwahilile chikuma.” Tweji kuwahililanga hakutachikiza ngwetu Yehova atuzanga chikuma omu eji kutumonanga tuli nakukilikita mangana tumuzachile kweseka noho hakumina ngolo jetu.

20. Mwomwo ika vangamba jaYehova vatela kupwila vakuwahilila?

²⁰ Hakuwana nge mweji kuzachilanga Yehova, ngocho mwapwa muvavalemu muliuka lyaYehova, kaha nawa mwalihandununako kuli vakwenu mujijila jimwe. Yehova kamikokele mupandame kuli ikiye mwomwo ngwenyi mweji kulinganga kanawa vyuma kuhambakana vakwenuko. Oloze amikokele mwomwo atalile mumichima yenu nakumona ngwenyi mwapwa muvavavwovu kaha nawa nahase kuminangula nakwalumunako vilinga vyenu. (Samu 25:9) Tachikizenu ngwenu eji kuwahililanga chikuma nge namumuzachila noho hakumina ngolo jenu. Lukakachila lwenu nakushishika chenu vyasolola nge mwatwama “namuchima wamwaza, wamwenemwene.” (Luka 8:15) Shikaho twalenuho lika kuzachila Yehova kweseka noho hakumina ngolo jenu. Nge namulinga ngocho, kaha namuwahilila ‘navyuma vyenu’ enu vavene.