1. Muloñadi Yehova chabulilañayi kutwesekeja nawakwetu?

YEHOVA hakeñaña yuma yejima niantu ejima kwikala chochimuku. Chumichi chamwekenaña muyileñaleña yindi, kushilahu niantu. Wejima wetu twenda kwambuka. Yehova hayesekejaña enu nawakwenuku. Washinshikaña mumuchima, wuntu wamukachi. (1 Sam. 16:7) Welukaña yuma yimunateli kutwesha kwila, yimukukañanya nichayikulishiliwu. Hayilejaña nindi mwili yuma yinabadiki muñovu jenuku. Twatela kumwimbujola Yehova kuhitila mudimona etu aweni neyi chatumonañayi. Dichi tukutoñojokaña ‘kwesekeja nachitwekala,’ hitukutoñojokaña netu twabadika hela tudi amukunkulwayiku.—Rom. 12:3.

2. Chataminadi kudesekeja nawakwetu?

² Tunateli kudizila kuyakutalilahu yawakwetu. Hadaha twelukahu manakwetu hela muhela wazataña chiwahi mumudimu wakushimwina. (Heb. 13:7) Tunateli kudizila kudi wena chakushimwina chiwahi. (Fwili. 3:17) Ilaña hekala chaambu hakwimbujola chakutalilahu chachiwahi chawakwetu nakudesekeja nawu. Neyi tudesekejaña nawakwetu tukwikala nechima, tukuneñaña hela kudimona netu twashikilamu wanyi. Neyi chitwadizili muchibaaba chinafumihu, neyi tukudibechaña nawamanakwetu niahela muchipompelu, wubwambu wetu naYehova wukuzeya. Yehova watulejaña nindi: “Muntu-himuntu, yashinshiki chekala yilwilu yindi yomweni, kuhiñahu dinu yazañaleli muyuma yindi yomweni, bayi kudesekeja namukwawuku.”—Ñal. 6:4.

3. Yumanyi yimunahimpi yayiletelaña muzañalu?

 ³ Yehova wakeñaña nindi muzañalaleña nayuma yejima yimwelaña hakudifukula kudi yena. Chakutalilahu, neyi mwapapatishewa dehi mwatela kuzañalalaña hakumona nenu mwashikijili mwejima mumwafuukwili. Mwadifuukwililihu enu aweni kupapatishewa. Kumukeña Nzambi dikwayiletesheli. Toñojokenuña hayuma yejima yimuneli kufuma tuhu hayina mpinji. Chakutalilahu, komana munasweji kukeñesha kutaña Bayibolu nkawenu nikudiza? Komana ichi munakulomba chakufuma hamuchima? (Mas. 141:2) Komana ichi muneluki chakutachika kuhanjeka nawantu mumudimu wakushimwina nichakuzatisha chiwahi yozelu yetu? Nawa neyi mudi nachisaka, Yehova nayikwashi kwikala iyala wamuwahi, mumbanda wamuwahi hela nvwali wamuwahi? Munateli kutiya kuwaha hayuma yejima yimunahimpi.

4. Tukuhanjekadi muchinu chibaaba?

⁴ Twatela kukwasha antu amakwawu kuzañalala nayuma yinakwilawu hakumukalakela Yehova. Twatela cheñi kuyikwasha kulonda abuleña kudesekeja nawakwawu. Muchinu chibaaba, tukuhanjeka anvwali chinateli kukwashawu anyanawu, adisumbula chinateli kudikwashawu wumu namukwawu, akulumpi niantu amakwawu chinateli kukwashawu amanakwawu niahela. Nkumininaku, tukuhanjeka hayishina yamuBayibolu yinateli kutukwasha kwimika yikonkwanyi yitunateli kuzata kwesekeja nahakumina ñovu jetu nichidi yuma.

5. Kwesekeja naAEfwesesa 6:4, chumanyi chatela kutondolwelawu anvwali?

⁵ Anvwali hiyatela kuyesekejaña anyanawu hela kuyila nawu eli yuma yinabadiki muñovu jawuku. Neyi anvwali elaña mwenimu anateli kuneñesha mwanawu. (Tañenu AEfwesesa 6:4.) Muhela Sachiko * wahosheli nindi: “Antañishi yami akeñeleña nawu nizateña nañovu kubadika akwetu ejima mushikola. Kubombelahu, amama akeñeleña nawu nizateña nañovu kushikola kulonda antañishi jami niatata abula kwitiya ayilemesheña antu jaYehova. Akeñeleña nawu nituwaneña twejima mukweseka, chuma chankalili. Hela chakwila hanahiti yaaka yayivulu kufuma hinamanishili shikola, najinookaña neyi chakwila nazataña nañovu hakumukalakela Yehova.”

6. Yumanyi yinateli kudizilawu anvwali kunsona yaMasamu 131:1, 2?

 ⁶ Chuma chalema chatela kudizilaku anvwali chekala haMasamu 131:1, 2. (Tañenu.) Mwanta Davidi wahosheli nindi, “hinakwataña kunsañu jamanenuku,” hela helileña yuma yamubadikili muñovu jindiku. Chineli wadiña wadikehesha nawa wadizoza, wamweneña yuma yikwetiyi nindi yinashikili nawa wadiña mukuwunda. Chumanyi chinateli kudizilaku anvwali kumazu ahosheliyi Davidi? Hakwila anvwali ekali adizoza hiyatela kwilaña yuma yinabadiki muñovu yawuku. Nawa bayi ayilejaña anyanawu kwila yuma yikukañanyawuku. Anvwali anateli kukwasha mwanawu kudimona nindi walema neyi eluka yuma yinateli kutwesha kwilayi niyikukañanyayi nawa atela kumwimikila yikonkwanyi yikutwesha kushikijayi. Muhela Marina wahosheli nindi: “Amama hiyañesekejeleña nawamanakwami asatu hela anyana amakwawuku. Anlejeli nawu, wejima wetu twekala nayawana yashiyashana nawa Yehova watulemesha wejima wetu. Muloña wawena, hinadesekejaña nawantu amakwawuku.”

7-8. Iyala nateli kumulemesha ñahi ñodindi?

⁷ Iyala mukwaKristu watela kumulemeshaña ñodindi. (1 Pet. 3:7) Mukumulemesha mwabombela kumusha maana nikulemesha antu amakwawu. Chakutalilahu, iyala walemeshaña ñodindi kuhitila mukumumona nindi walema. Hamwilaña nindi yeleña yuma yabadika muñovu yindiku. Nawa hamwesekejaña nawambanda amakwawuku. Mumbanda wukutiya ñahi neyi nfumwindi yamwilaña chamuchidiwu? Iyala wabula kwikala Chinsahu wasumbula muhela Rosa kakavulu wamwesekejaña ñodindi nawambanda amakwawu. Mazu indi atama amuleteshaña muhela Rosa kuneña nikudimona nindi kwosi wamukeña. Wahosheli nindi: “Kakavulu nakeñaña kuñanukisha nawu Yehova wankeña.” Kwambukaku, iyala mukwaKristu wamulemeshaña ñodindi. Weluka nindi neyi yelaña mwenimu, wubwambu windi nañodindi niYehova wukukola. *

⁸ Iyala wamulemesha ñodindi, wamuhamekaña, wamulejaña nindi wamukeña nawa wamumonaña nindi walema. (Yish. 31:28) Ichi dicheliliyi nfumwa amuhela Katerina itwahanjekahu muchibaaba chinafumihu, wamukwashili ñodindi kuleka kudimona nindi walema wanyi. Hadiñayi kansi, amama yindi amudiwileña nawa amwesekejeleña nawanyana awambanda amakwawu, niamabwambu jindi. Chafuminimu, Katerina watachikili kudesekeja nawakwawu, nihanyima yakudiza chalala. Nfumwindi namukwashi kuleka kutoñojoka muniyi njila, nikudimona yomweni nindi walema. Wahosheli nindi: “Wankeña, wanhamekaña hayuma yayiwahi yinelaña nawa wanlombelañaku. Wañanukishaña yilwilu yaYehova yayiwahi nawa wankwashaña kuleka kutoñojoka mwaluwa.”

9-10. Akulumpi amukwashili ñahi muhela kuleka kudesekeja nawakwawu?

⁹ Akulumpi anateli kukwasha ñahi antu ekala nachaaku chakudesekeja nawakwawu? Talenu chuma chamumwekeneni muhela Hanuni, abulileña kuhamekawu hadiñayi kansi. Wahosheli nindi: “Nadiña nansonyi nawa nadimweneña nami atwansi amakwawu ambadikili. Nadiña nakudesekeja nawakwetu kufuma tuhu hinadiña kansi.” Nihampinji yadiziliyi chalala, Hanuni watwalekelihu kudesekeja  nawakwawu. Chafuminimu watachikili kudimona nindi walema wanyi muchipompelu. Chayinu mpinji, hipayiniya wudi namuzañalu. Chumanyi chamukwashili kuhimpa yilwilu yindi?

¹⁰ Hanuni wahosheli nindi amukwashili kudi akulumpi. Amulejeli nawu walema muchipompelu nawa amuhamekeli hakwikala washinshika. Wasonekeli nindi: “Mpinji yikwawu akulumpi anlejeleña kuya nakukolesha ahela amakwawu akeñekeleña kuyikolesha. Iyi nyidimu yankwashileña kwiluka nami nalema. Inakwanuka chansakililiwu akulumpi hakuyikolesha ahela atwansi. Nkumininaku antañilili 1 ATesalonika 1:2, 3. Chumichi chanzañalesheli nankashi. Muloña wanawa akulumpi, ichi ninami nadimonaña nami nalema mukuloñesha kwaYehova.”

11. Tunateli kukwasha ñahi antu “[akweti] muchima wachikeka, adizoza,” neyi chinashimuniwu haIsaya 57:15?

¹¹ Tañenu Isaya 57:15. Yehova wakamenaña nankashi antu “[akweti] muchima wachikeka, wadizoza.” Wejima wetu tunateli kuyikolesha amanakwetu niahela bayi akulumpi hohuku. Njila yimu mutunateli kuyikoleshela hikumwekesha netu twayakamenaña. Yehova wakeñaña tumwekesheña chayikeñayi anyikoku jindi. (Yish. 19:17) Tunateli cheñi kuyikwasha amanakwetu niahela kuhitila mukwikala adizoza nikubula kuditiya nayuma yitunakuzata. Hitunakukeña nankashi kudilemesha etu aweniku, muloña tunakukeña wanyi antu amakwawu kwikala nechima. Tunakukeña yuma yitunakuhosha niyitunakwila yikolesheña amanakwetu.—1 Pet. 4:10, 11.

12. Muloñadi antu adizoza chenjilileñawu kudi Yesu? (Talenu mwevulu wudi hakava.)

¹² Yesu wayakameneneña akwakumulondela, ninetu twatela kudizilaku. Wadiña wabadika hadi antu ejima. Ilaña wadiña “[wadikehesha] nikudizoza mumuchima.” (Mat. 11:28-30) Hadeteleña hebwambu namaana adiñayi nawu hela yuma yejima yelukiliyiku. Neyi nakutañisha wazatishileña mazu apela niyakutalilahu yayishikileña antu adizoza hamuchima. (Luka 10:21) Kwambukaku nawakulumpi jamunsakililu adivwimba, Yesu wayikwashileña antu kwiluka nawu ayilemesha kudi Nzambi. (Yow. 6:37) Nawa wayilemesheleña antu.

13. Yesu wamwekesheli ñahi luwi nikukeña chelileñayi nawatumbanji twindi?

¹³ Luwi lwaYesu nikukeña kwamwekeneneña muyuma yayililileñayi atumbanji twindi. Welukili nindi adiña nawuswa nichihandilu chashiyashana. Dichi adi kuzata nyidimu yoyimu hela kushimwina chochimuku. Hela chochu, wayihamekeleña chazatileñawu nañovu hamuntu-hamuntu. Wamwekesheli chumichi, muchishimu chindi chantalenta. Munichi chishimu, mwanta wamwinkeli nduñu ninduñu mudimu “kwesekeja nahanakumini ñovu jindi.” Hadi awa anduñu ayedi adikita wumu wawaninihu jajivulu kubadika mukwawu. Ilaña nkaka yawu wayihamekeli wejima wawu, nindi: “Wuzataña, eyi nduñu wamuwahi nawa washinshika!”—Mat. 25:14-23.

14. Tunateli kumwimbujola ñahi Yesu chelileñayi nawantu?

¹⁴ Yesu watutiyilaña luwi mpinji yejima nawa watukeña. Weluka nindi tukweti wuswa nichihandilu chashiyashana, nawa watiyaña kuwaha neyi tuzata hakumina ñovu jetu. Twatela kuyimonaña akwetu neyi chayimonañayi Yesu. Bayi twilaña yuma yikuletesha amanakwetu niahela adimoneña nawu amukunkulwayi hela kuyitiyisha nsonyiku, muloña anakuzata wanyi neyi chazatañawu akwawu. Ilaña, tuyihamekeña amanakwetu nihela hachinakuzatawu nañovu kumukalakela Yehova.

15-16. Yumanyi yayiwahi yafuminimu muyuma yafuukwiliyi muhela kuzata?

¹⁵ Neyi twikalaña nayikonkwanyi mumudimu waYehova tukwikalaña namuzañalu muchihandilu. Hela chochu, chuma chinateli kutukwasha hikwimika yikonkwanyi kwesekeja nachidi wuswa wetu nichihandilu chetu, bayi yikonkwanyi yinemikiwu akwetuku. Neyi twimikaña yikonkwanyi yinakwimikawu akwetu tukukañanya nawa tukuzeya. (Luka 14:28) Talenu chuma chamumwekeneni muhela Midori.

¹⁶ Atata yaMidori abula kwikala aChinsahu amusawishileña kuhitila mukumwesekeja nawamanakwindi niakwawu akashikola. Midori wahosheli nindi: “Nadimweneña nami hinashikilamuku.” Ilaña chakuliliyi watachikili kutoñojoka nindi walema. Wahosheli nindi, “Natañileña Bayibolu mafuku ejima kulonda nikali nakuwunda mumuchima wami nikwiluka nami Yehova wankeña.” Kubombelahu, wafuukwilihu yuma yatela kuzatayi nawa walombelelihu kulonda yakatweshi kuyizata. Chafuminimu, Midori watiyileña kuwaha nanyidimu yamuzatilileñayi Yehova.

17. Tunateli kutwalekahu ñahi kubalumuka nakwikala amaha muyitoñojoka nimuyilwilu yetu,” nawa yumanyi yinateli kufumamu?

¹⁷ Hanateli kuhita mpinji hakwila tuleki kutoñojoka netu tudi amukunkulwayi. Dichi Yehova watuleja nindi: “Mwatela kutwalekahu kubalumuka nakwikala amaha muyitoñojoka nimuyilwilu yenu.” (Efwe. 4:23, 24) Hakwila twili mwenimu, twatela kulombaña, kudiza Izu daNzambi nikutoñojokahu chikupu. Dichi twalekenuhu kwila mwenimu nawa mulombenuña Yehova yayinki ñovu yikuyikwasha kuumika. Spiritu yindi yajila yikuyikwasha kuleka  kudesekeja nawakwenu. Yehova wukuyikwasha cheñi kwiluka neyi chakwila mukweti lwisu hela mwekala adivwimba, wukuyikwasha kwiluka swayi-swayi.

18. Mazu ekala ha 2 Kushindulula 6:29, 30 ayikundejaña ñahi?

¹⁸ Tañenu 2 Kushindulula 6:29, 30. Yehova weluka yitoñojoka yetu. Weluka nindi twazuñaña nayitoñojoka yatama yamukanu kaayi nikubula kuwanina kwetu. Neyi Yehova yamona chitwalwishaña naniyi yuma, waswejaña kutukeña.

19. Yehova walumbulula ñahi chatiyañayi hadi etu?

¹⁹ Hakulumbulula chatiyañayi hadi etu, Yehova wazatisha chakutalilahu chamama yawantu namwanindi. (Isa. 49:15) Talenu chakutalilahu chamama yawantu wejina daRachel. Wahosheli nindi: “Mwanami Stephanie wavwalikili henohu tukweji kanda tushikili. Chavwalikiliyi, wadiña wanyanya nimwakwilila nehi. Ilaña andotolu añitejeleña kumukwata ifuku didi dejima hakakweji kadiñayi muchipatela. Haniyi mpinji yejima ami namwanami twadikundili. Ichi wudi nayaaka 6 nawa wekala wanyanya hadi akwawu ejima mwavwalikililiwu. Hela chochu, namukeña nankashi, wakabakeni hakwila yahandi nawa wanletela muzañalu muchihandilu chami!” Chatukundejaña hakwiluka netu Yehova watukeña nankashi neyi yamona nindi tunakuzata nañovu hakwila nawu tumukalakeleña namuchima wetu wejima!

20. Chineli mudi ambuña aYehova yumanyi yimukweti yakuzañalelahu?

²⁰ Chineli mudi ambuña aYehova, mwalema nankashi nawa kwosi wudi neyi enu. Yehova wayikokela kwakwihi nayena bayi neyi muloña wakwila mwabadika akwenuku. Wayikokeli kwakwihi nayena muloña washinshikili munyichima yenu nawa wamweni nindi mwadizoza nawa nateli kuyidizisha. (Mas. 25:9) Ilukenu nenu watiyaña kuwaha neyi muzata hakumina ñovu jenu hakumukalakela. Chimomikaña nichimwashinshika chamwekeshaña nawu mwekala “namuchima wawuwahi.” (Luka 8:15) Dichi twalekenuhu kumukalakela Yehova hakumina ñovu jenu. Mukwikala nayuma yakuzañalelahu “enu aweni.”