1. Engvângin nge Jehova’n mi dangte nêna min khaikhin loh?

JEHOVA chuan thil engkim inang khat vek ni tûrin a duh lo. Chu chu mihringte pawh tiamin, a thil siam mak takahte a lang a ni. Kan za hian danglamna kan nei ṭheuh va. Chuvângin, Jehova chuan mi dangte nên min khaikhin ngai lo. Ani chuan kan thinlung leh chhûng lama kan nihna chu a hria a. (1 Sam. 16:7) Kan chakna lai te, chak lohna lai te, leh kan ṭobulte pawh a hre bawk. Kan tih theih aia tam ti tûrin min phût lo va. Jehova min thlîr dân anga mahni inthlîrin, ani chu kan entawn a ngai a ni. Chutianga kan tih chuan ‘rilru fel tak’ kan nei ang a, a lutuka inngaihlutna leh inngaihnêpna kan nei lo vang.—Rom 12:3.

2. Engvângin nge mi dangte nêna inkhaikhin chu a ṭhat loh?

² Rawngbâwlnaa hlawhtling tak unau rinawmte entawn tûr siam tha takte chu kan hlâwkpui thei a. (Heb. 13:7) Chutiang chuan kan rawngbâwlnaah hlawhtlin lehzual theih dân kawngte kan hria ang. (Phil. 3:17) Mahse, unaute entawn tûr siam ṭha tak entawn leh anmahni nêna inkhaikhin chu a inang lo. Chutianga inkhaikhinna chuan îtsîkna te, lunghnualna te, leh hlutna nei lo nia inhriatna hial pawh min neihtîr thei a ni. Thuziak hmasaa kan hriat tawh angin, kohhrana unaute nêna inelna chuan thlarau lama chhiatna min thlen thei a. Chuvângin, Pathian Jehova chuan: “Mi tinin mahni thiltih fiah ṭheuh zâwk rawh se, chumi hunah chuan mi dang chung ni lovin, mahni chung chauhvah chhuan tûr a nei ang,” tiin hmangaihna nei takin min fuih a ni.—Gal. 6:4.

3. I hlimna thlentu eng thlarau lam hmasâwnnate nge i neih tawh?

³ Jehova chuan thlarau lama hma kan sâwna chunga hlim tûrin min duh a. Entîr nân, baptisma chang tawh i nih chuan,  chu thiltum i hlen avângin i lâwm hle ngei ang! Baptisma chan chu nangma thu tlûkna siam a ni a. I thu tlûkna siam chu nangman Pathian i hmangaihnaah a innghat a ni. Baptisma i chan aṭanga tûn thlenga i hmasâwnnate chu han ngaihtuah teh. Entîr nân, mi mala Bible chhiarna leh zirna chu tûn hma aiin nuam i ti tawh zâwk em? I ṭawngṭainate chuan awmzia a nei lehzual tawh em? (Sâm 141:2) Thu hrilh rawngbâwlnaah mi biak dân i thiam lehzualin, rawngbâwlna atâna kan hmanruate chu i hmang thiam lehzual tawh em? Chhûngkaw nei i nih chuan, nupui pasal ṭha zâwk emaw, nu leh pa ṭha zâwk emaw ni tûrin Jehova’n a ṭanpui tawh che em? Chûngahte chuan hmasâwnna i neih tawh avângin i lungawi hle ngei ang.

4. He thuziakah hian eng nge kan sawiho vang?

⁴ Mi dangte chu thlarau lama hma an sâwnnaa hlimna nei tûrin kan ṭanpui thei a. Inkhaikhinna rilru put hmang nei lo tûrin kan ṭanpui thei bawk. He thuziakah hian, nu leh pate’n fate an ṭanpui theih dân te, nupate an inṭanpui tawn theih dân te, leh kohhran upate leh mi dangte’n unaute an ṭanpui theih dânte chu kan sawiho vang a. A tâwpah, kan theihnate leh dinhmunte azira thiltum inâwm takte siam tûra min ṭanpui theitu Bible thu bul ṭhenkhat pawh kan sawiho bawk ang.

5. Ephesi 6:4-a sawi angin, nu leh pate’n eng nge an pumpelh ang?

⁵ Nu leh pate chu an fate khaikhin lo tûr leh an tih theih aia tam phût lo tûrin an fîmkhur tûr a ni a. Inâwm lo taka khaikhinna leh a lutuka phûtna chuan naupang chu a tithinur thei a ni. (Ephesi 6:4 chhiar rawh.) Unaunu Sachiko-i * chuan: “Zirtîrtute chuan ka classmate-te aia tiṭha zâwk tûrin min beisei a. Chu bâkah, ka nu chuan min zirtîrtu leh ring lotu ka pa hnêna thu hriattîrna ṭha a nih theih nân school-ah ti ṭha tûrin min duh a. Dik tak chuan, exam hunah 100-a 100 hmu tûrin min beisei a; mahse, chu chu thil theih loh tluk a ni. School ka kal tawh lohna chu kum tam tak ni tawh mah se, theih tâwp ka chhuahna chu Jehova tân a ṭhat tâwk leh tâwk loh ngaihtuah châng ka nei ṭhîn,” tiin a sawi.

6. Nu leh pate chuan Sâm 131:1, 2-na thu aṭangin eng nge an zir theih?

⁶ Nu leh pate tâna zir tûr pawimawh tak pakhat chu Sâm 131:1, 2-ah kan hmu a. (Chhiar  rawh.) Lal Davida chuan a tih theih loh tûr thil, a nih loh leh ‘thil ropui takahte a intelh loh’ thu a sawi a. A inngaihtlâwmna leh a thuhnuairawlhna chuan ani chu ‘a awi tleiin a tikhui’ a ni. Nu leh pate chuan Davida thusawi aṭangin eng nge an zir theih? Anni chuan an laka an inbeiseinaah mai ni lovin, an fate laka an beiseinaah pawh inngaihtlâwmna leh thuhnuairawlhna an lantîr thei a. An fate chu thiltum inâwm takte siam tûra an ṭanpui hunah an chaknate leh chak lohnate hriatthiampuiin an fuih thei a ni. Unaunu Marina-i chuan: “Ka nuin ka unau pathumte leh naupang dangte nên min khaikhin ngai lo. Kan thilpêk dawn chu inang lo ṭheuh mah se, Jehova tân kan hlu vek tih min zirtîr a. Mi dangte nêna inkhaikhin ka chîn loh avângin ka nu chungah ka lâwm tak zet a ni,” tiin a sawi.

7-8. Engtin nge pasalin a nupui chu a chawimawi theih?

⁷ Pasal chuan a nupui a chawimawi tûr a ni a. (1 Pet. 3:7) Chawimawinaah chuan mi dangte ngaihsakna leh zahna lantîr a tel a ni. Entîr nân, pasal chuan a nupui chu zah taka cheibâwlin a chawimawi a. A tih theih aia tam ti tûrin a phût lo. Chu bâkah, a nupui chu hmeichhe dangte nên a khaikhin hek lo. A khaikhin a nih chuan, chu chuan eng nghawng nge a neih theih? Unaunu Rosa-i chu ring lotu a pasalin hmeichhe dang nên a khaikhin fo va. A ṭawngkam na takte chuan a rilru a tihnat mai bâkah, hmangaihna dawng lo nia inhriatna a neihtîr a ni. Unaunu chuan, “Jehova’n min ngaihlu tih ka inhriatnawntîr reng ṭhîn,” tiin a sawi. Chumi nêna inkalhin, thutaka awm pasal chuan an nupui chu a chawimawi a. Chu chuan a nupui nêna an inlaichînnaah leh Jehova nêna an inlaichînnaah nghawng a nei tih a hria a ni. *

⁸ Nupui chawimawitu pasal chuan a nupui chu a hmangaihziate hrilhin, a fak fo ṭhîn a, mi dangte hmaah pawh ṭha takin a cheibâwl a ni. (Thuf. 31:28) Thuziak hmasaa târ lan tâk Unaunu Katerina-i pasal chuan a nupuiin hlutna nei lo nia inhriatna a neih chu hneh tûrin a ṭanpui a. Unaunu Katerina-i chu a naupan laiin, a nu chuan a ṭhiante leh hmeichhe dangte nên khaikhinin a sawisêl ṭhîn a. Chuvângin, mi dang nêna inkhaikhin a lo chîng ta a—thutak a hmuh hnuah pawh chutiang chuan a ti ṭhîn a ni. Mahse, a pasal chuan a thil chîn dân chu do hneh tûr leh a âwm tâwka mahni inthlîr tûrin a ṭanpui a. Ani chuan: “Ka pasal hian min hmangaihin, ka thil ṭha tihte avângin min fak ṭhîn a, min ṭawngṭaisak ṭhîn. Chu bâkah, Pathian mize duhawm tak takte min chhûtpui ṭhînin, a thim zâwnga inthlîrna ka neih chu siam ṭha tûrin min ṭanpui ṭhîn bawk,” tiin a sawi.

9-10. Engtin nge min ngaihsaktu kohhran upate chuan mi dangte nêna inâwm lo taka inkhaikhin ṭhîn unaunu chu an ṭanpui?

⁹ Engtin nge kohhran upate chuan mi dangte nêna inkhaikhin chîng unaute chu an ṭanpui theih? A naupan laia fak hlawh ngai lo unaunu Hanuni thiltawn hi han ngaihtuah teh. Ani chuan: “Mi zakzum tak ka ni a, naupang dangte chu kei aia fel zâwkah ka ngai a. Ka naupan lai aṭangin, mi dangte nêna inkhaikhin ka chîng ṭan a ni,” tiin a sawi. Unaunu Hanuni chu thutak a hmuh hnuah pawh mi dangte nên a la inkhaikhin fo va. Chuvângin, kohhranah hlutna nei lo niin a inhria a. Mahse, tûnah chuan hlim takin pioneer a thawk a ni. A thlîr dân thlâk danglam tûrin engin nge ṭanpui?

¹⁰ Unaunu Hanuni chuan hmangaihna nei tak kohhran upate’n an ṭanpui tih a sawi a.  Anni chuan kohhrana a ṭangkaiziate hrilhin, a entawn tûr ṭha siam avângin an fak a. Ani chuan: “A chângin kohhran upate chuan ṭanpui ngai unaunu ṭhenkhatte fuih tûrin min ti a. Chu chuan ṭangkaina nei nia inhriatna min neihtîr a ni. Kohhran upate’n ṭhalai unaunute ka fuih avânga an lâwmzia min hrilh chu ka la hre reng. Anni chuan 1 Thessalonika 1:2, 3 chu min chhiarsak a. Chu chuan ka thinlung a khawih hle! Tûnah chuan, Jehova inawpna pâwlah ṭangkaina ka nei tih ka inhriat tawh avângin, chûng berâm vêngtu ṭhate chungah chuan ka lâwm tak zet a ni,” tiin a sawi.

11. Engtin nge Isaia 57:15-naa târ lan ‘thuhnuairawlhte leh inchhîr ngawih ngawihte’ chu kan ṭanpui theih?

¹¹ Isaia 57:15 chhiar rawh. Jehova chuan ‘thuhnuairawlhte leh inchhîr ngawih ngawihte’ chu a ngaihsak tak zet a. Kohhran upate chauh ni lovin, kan za hian chûng unaute chu kan fuih thei a ni. Kan tih theih dân kawng khat chu an chunga ngaihsakna lantîr hi a ni a. Jehova chuan a berâm hlu takte hnênah a hmangaihzia hriattîr tûrin min duh a ni. (Thuf. 19:17) Inngaihtlâwmna leh thuhnuairawlhna lantîrna hmangin unaute chu kan ṭanpui thei bawk. Mi dangte chu îtsîkna rilru put hmang neihtîr kan duh loh avângin, mite ngaihsakna lâk chu kan duh lo va. Chu aiin, kan theihnate leh hriatnate chu intihchak tawn nân kan hmang zâwk a ni.—1 Pet. 4:10, 11.

12. Engvângin nge mi inngaitlâwmte chuan Isua bula awm chu nuam an tih? (A kâwma milem en rawh.)

¹² Isua’n a hnungzuitute a cheibâwl dân ngaihtuahna aṭangin mi dangte kan cheibâwl dân tûr chungchângah zir tûr tam tak kan nei a ni. Ani chu nung tawh azawnga mi ropui ber a ni a. Mahse, “thuhnuairawlh leh rilrua inngaitlâwm tak” a ni. (Mt. 11:28-30) A finna leh hriatna nasa tak chu a uanpui ngai lo. Mi inngaitlâwmte thinlung thlentu ṭawngkam mâwl mang tak leh tehkhin thu hriatthiam awlsam takte hmangin a zirtîr zâwk ṭhîn a. (Lk. 10:21) Sakhaw hruaitu chapo takte nêna inang lo takin, mi dangte chu Pathian hmaah hlutna nei lo nia inhriatna neihtîr tûr zâwngin a cheibâwl ngai lo. (Joh. 6:37) Chu aiin, mi nâwlpuite chu zahawm takin a cheibâwl zâwk a ni.

13. Engtin nge Isua ngilneihna leh hmangaihna chu a zirtîrte a cheibâwl dânah a lan?

¹³ Isua ngilneihna leh hmangaihna chu a zirtîrte a cheibâwl dânah a lang a. Ani chuan an theihnate leh an dinhmunte a inang lo tih a hria a ni. Chuvângin, mawhphurhna inang an chelh vek thei lo va, rawngbâwlnaa an hlawhtlinna pawh a inang vek thei hek lo. Mahse, a zirtîr tinte theih tâwp chhuahna chu a ngaihlu hle a. Isua’n mi dangte chunga hriatthiamna a neihzia chu talent tehkhin thu-ah a hmuh theih a ni. Chu tehkhin thu-ah, pu ber chuan bâwihte chu “an tih theih tâwk tûr ang zêl ṭheuhvin” hna a pe a. Bâwih taima tak pahnih zînga pakhat chuan a dang aiin a thawk chhuak tam zâwk a. Mahse, pu ber chuan an pahnih hnênah: “Bâwih ṭha leh rinawm, i tiṭha e,” tiin a fak ve ve a ni.—Mt. 25:14-23.

14. Engtin nge Isua’n mi dangte a cheibâwl dân chu kan entawn theih?

¹⁴ Isua chuan ngeilnei tak leh hmangaihna nei takin min cheibâwl a. Kan theihna leh dinhmunte a inang lo tih a hria a, theih tâwp kan chhuahna chungah a lâwm a ni. Keini pawhin Isua angin mi dangte kan cheibâwl tûr a ni a. Kan Kristian unau ṭhenkhat chu unau dangte tluka an thawh tam theih loh avângin hlutna nei lo nia inhriatna leh mahni insitna neihtîr tûr zâwngin kan cheibâwl ngai tûr a ni lo. Chu aiin, Jehova rawngbâwlnaa theih tâwp an chhuah avânga fak tûrin hun remchângte kan zawng zâwk tûr a ni.

15-16. Engtin nge unaunu pakhat chuan thiltum inâwm takte insiamna chu a hlâwkpui?

¹⁵ Thlarau lam thiltumte insiamna chuan kan nun chu awmzia a neihtîr a. Mahse, a pawimawh ber chu mi dangte thiltum siam ang ni lovin, kan theihna leh dinhmunte mila thiltumte insiam hi a ni. Mi dangte thiltum siam ang siam ve tumna chuan lunghnualna leh beidawnna min thlen thei a. (Lk. 14:28) Pioneer unaunu Midori thiltawn hi han ngaihtuah teh.

¹⁶ Midori naupan lai chuan, Thuhretu ni lo a pa chuan a unau dangte leh a classmate-te nêna khaikhinin, a tizak ṭhîn a. Unaunu Midori chuan: “Hlutna nei lo ni hian ka inhria,” tiin a sawi. Mahse, a rawn upat chhoh chuan mahni inrintâwkna a nei a. Ani chuan, “Chhûngrila thlamuanna ka neih theih nân leh Jehova’n min hmangaih tih ka hriat theih nân nî tin Bible ka chhiar ṭhîn,” tiin a sawi. Chu bâkah, thiltum inâwm takte insiamin, chumi a hlen theih nân Pathian hnênah a ṭawngṭai ṭhîn bawk. Chuvângin, Unaunu Midori chuan thlarau lama a hmasâwnnaah hlimna a nei a ni.

17. Engtin nge kan “rilru thlarauvah chuan a thara [kan] awm zawm zêl” theih a, eng nge a rah chhuah ang?

¹⁷ A thim zâwnga mahni inthlîrna leh ngaihtuahnate chu zan khat thil thua hneh theih mai a ni lo. Chuvângin, Pathian Jehova chuan: “In rilru thlarauvah chuan a tharin lo awm [“zawm zêl,” NW] ula,” tiin min fuih a ni. (Eph. 4:23, 24) Ni e, chutianga ti tûr chuan kan ṭawngṭai a, Bible kan chhiar a, kan chhût ngun a ngai a. Chûng thilte tihnaah inhmang zawm zêlin, Jehova hnênah chakna dîl ang che. A thlarau thianghlim chuan mi dangte nêna inkhaikhin duhna i neih chu hneh tûrin a  ṭanpui ang che. Jehova chuan itsîkna leh chapona i neih leh neih loh hre tûr leh i lo nei reng a nih chuan, a ṭûl anga inthlâk danglamna siam nghâl tûrin a ṭanpui ang che.

18. Engtin nge 2 Chronicles 6:29, 30-na thu aṭanga thlamuanna i hmuh theih?

¹⁸ Chronicles pahnihna 6:29, 30 chhiar rawh. Jehova chuan kan thinlung a hria a. He khawvêl thlarau leh kan ṭhat famkim lohnate kan do tlat tih pawh a hre bawk. Chûng thununna ṭha lote kan do nasatzia a hmuh hian min hmangaih lehzual a ni.

19. Jehova’n kan chunga a rilru put hmang chu eng nên nge a khaikhin?

¹⁹ Jehova chuan kan chunga a rilru put hmang chu nu leh a fa sên inlaichînna nên a khaikhin a. (Is. 49:15) Nu pakhat Rachel-i thiltawn hi han ngaihtuah teh. Ani chuan: “Ka fanu Stephanie-i chu thla kim lovin a piang a. A lo pian chhuah chuan a têin, a chak lo hle a. Mahse, nausên dah lumna khâwla a awm laiin thla khat chhûng chu doctor-te’n nî tina ka pawm min phalsak a. Chutianga ka pawm ṭhin avângin, ka fanu nên inlaichînna ṭha tak kan nei a. Tûnah chuan, kum ruk mi a ni tawh a; mahse, a kum rualpuite aiin a tê a ni. A dam chhuah theih hrâm avângin ka hmangaih êm êm a, ani chuan min tihlim tak zet a ni,” tiin a sawi. Jehova chuan thinlung zawng zawnga a rawngbâwl tûra theih tâwp kan chhuah tih a hmuh hian chutiang bawk chuan min hmangaih a ni, tih hriat chu a va thlamuanthlâk tak êm!

20. Jehova chhiahhlawh inpumpêk tawh i nih angin, lâwmna tûr chhan eng nge i neih?

²⁰ Jehova chhiahhlawh i nih avângin i danglam bîk a, a chhûngkaw zînga mi ngaihhlutawm tak i ni. Jehova’n a lama a hîp chhan che chu mi dangte aia i ṭhat zâwk vâng a ni lo. Ani chuan i thinlung a en a, mi thuhnuairawlh tak i ni tih leh a duh anga zirtîr theih i ni dâwn tih a hriat avângin a hîp che a ni. (Sâm 25:9) Theih tâwp chhuaha a rawng i bâwlna chungah a lâwm a ni tih i chiang thei a ni. I chhelna leh rinawmna chu ‘rilru fel leh ṭha’ i neihzia finfiahna a ni a. (Lk. 8:15) Chuvângin, Jehova hnênah i neih ṭhat ber chu pe chhunzawm zêl ang che. Chutianga i tih chuan, “[nangma] chung chauhvah” lâwmna tûr chhan ṭha i nei ang.