1. Dahaka dainai Iehova ese ita na ma haida ida se haheḡereḡeredamu?

IEHOVA ese taunimanima iboudiai na e ura henidiamu. Una ta dibamu badina ia ese tubutubu ḡaudia, animal bona taunimanima idauidau e karadia. Una dainai Iehova ese oi na ma ta ida se haheḡereḡeremumu. Ia ese kudoumu e itaia. (1 Sam. 16:7) Ia na mai dibana dahaka be ba kara diba, bona dahaka be basio kara diba. Bona emu mauri dalana danu mai dibana. Bona ia ese oi na se dorimumu basio karaia diba ḡauna ba karaia. Namona na Iehova ese ita e lalodamu dalana baita laloa bada, unu amo lalohadai maorona baita abiamu bona baita lalomu ita ese haida na asita hereadia eiava idia ese ita e hereada.​—Roma 12:3.

2. Dahaka dainai ita siboda na ma haida ida basita haheḡereḡere?

² Haroro ḡaukara e karaia namonamomu tadikaka ta o taihu ta ena haheitalai amo diba baita abi. (Heb. 13:7) Una ese be durudamu eda haroro ḡaukara ihanamodia daladia baita dibamu. (Fili. 3:17) To, ta ena haheitalai namona ba tohotohoa bona ta ida sibomu ba haheḡereḡere na mai edia idau. Ta ida sibomu bo haheḡereḡeremu neganai, bo mamamu, bo lalomanokamu, o bo mamiamu emu ḡaukara na asi anina. Atikol 28 ai ta itaia heḡereḡerena, bema kongrigeisin ai haida ida baita kara helulumu neganai, eda hetura karana Iehova ida baita hadikaiamu. Una dainai Iehova na mai lalokauna ida e hagoadadamu: “Ta ta ena ḡaukara ena ḡaukara bae diba, a bamona ena basine diba, unu amo sibona ena ḡaukara baine heaḡilaia.”​—Gal. 6:4.

3. Lauma dalanai ba goada totona, oi be dahaka o kara unu amo o moale?

 ³ Iehova na e uramu ia ihesiai heninai ba kara diba gaudia daidiai ba moale. Heḡereḡere bema oi na o bapatiso, una tahua ḡauna o haḡuḡurua dainai ba moale! Oi sibomu ese una abi hidi o karaia. Badina Dirava o lalokau henia dainai. Una nega amo o kara ḡaudia ba lalo. Heḡereḡere, Baibul iduahina bona istadilaina karana o ura henia badamu, a? Oi be mai kudoumu ibounai ida o ḡuriḡurimu, a? (Sal. 141:2) Haroro ḡaukara ai emu herevahereva karana o hanamoamu bona iseda tulu idauidau o ḡaukaralai namonamomu, a? Bema oi na mai emu ruma bese, Iehova ese oi be edena dalai e durumu tau o hahine, eiava tama o sina namona ta ai ola? Lauma dalanai ba goada totona, unu ḡau idauidau o kara dainai ba moale.

4. Ina atikol ai dahaka baita herevalaimu?

⁴ Haida baita durudia lauma dalanai e goadamu dainai bae moale. Danu baita durudia sibodia ma haida ida basie haheḡereḡere. Ina atikol ai, ita na tama sina ese natu bae durudia daladia, headava taudia bae heduru heheni daladia, bona elda bona haida ese tadikaka taihu bae durudia daladia baita herevalaimu. Danu, Baibul ena hahekau herevadia haida baita herevalaimu, unu ese be durudamu eda diba bona noho dalana heḡereḡerenai baita haḡuḡuru diba tahua ḡaudia baita ato.

5. Efeso 6:4 heḡereḡerena, tama sina be dahaka basie kara?

⁵ Namona na tama sina na bae henahua toho, natu ta na ma natu ta ida basie haheḡereḡerea. Eiava basine doria basine kara diba ḡaudia baine kara, unu be kara tomamu neganai natudia na be lalohisihisimu. (Efeso 6:4 ba duahia.) Taihu ta ladana Sachiko * na e gwa: “Egu teacher na e urava egu skuli ḡaudia na baina kara namonamo, unu amo egu classmate na baina hereadia. Bona sinagu danu e urava skuli ḡaukaradia na baina kara namonamo, unu amo egu teacher bona tamagu, dia Witnes tauna, ese Iehova ena taunimanima bae lalo namo henidia. Danu sinagu na e ura egu exam ai mistake ta basina karaia, to una na auka. Una dainai, ena be skuli na rakatania bona laḡani momo vada ela, to nega haida na laloamu reana Iehova na egu ai se moalemu, ena be ia na hesiai heniamu.”

6. Tama sina be Salamo 131:1, 2 amo dahaka bae diba

 ⁶ Tama sina ese bae dibaia mai anina bada ḡauna ta na Salamo 131:1, 2 ai. (Ba duahi.) King David na e gwa “ḡau bada hereadia” o ienai e aukamu ḡaudia na basine kara diba. E manau dainai baine kara diba ḡaudia mo e lalo bona ia na e “lalomaino.” David ena hereva amo tama sina be dahaka e dibamu? Tama sina na bae manau totona sibodia basie helalo bona natudia basie doridia basie kara diba ḡaudia bae kara. Tama sina ese natudia baine kara diba ḡaudia bona basine kara diba ḡaudia be lalopararalaimu neganai, natudia na be duruamu baine haḡuḡuru diba tahua ḡaudia baine ato. Taihu ta ladana Marina na e gwa: “Sinagu ese lau na varabougu bona natu ma haida ida na se haheḡereḡereguva. To, e hadibagu taunimanima edia diba na idauidau bona ita ta ta na Iehova ese e laloda badamu. Sinagu ena heduru dainai, sibogu ma haida ida asina haheḡereḡereva.”

7-8. Edena dala ai tau ese adavana baine matauraia?

⁷ Kristen tauna ese adavana baine matauraia na namo. (1 Pet. 3:7) Anina na ena namo baine lalo bada bona baine hanamoa. Heḡereḡere, tau ese hahine na mai hematauraina ida baine kara namo henia. Basine doria basine kara diba ḡaudia baine kara totona. Bona hahine ma haida ida basine haheḡereḡerea. Bema tau na unu be kara tomamu hahine ena hemami be ede bamona? Taihu ta ladana Rosa, adavana na dia Witnes tauna bona nega momo ia ese Rosa na ma hahine haida ida e haheḡereḡereava. Ena haheisi herevadia dainai Rosa na e laloava ia na dia hahine namona bona ta ese se ura heniava. Ia na e gwa, “Namona na hanaihanai baina helalotao Iehova ese lau na e lalogu badamu.” To, Kristen tauna ese adavana na e matauraiamu. Ia na mai dibana unu be kara tomamu neganai, ia, adavana bona Iehova ida edia hetura karana na be namomu. *

⁸ Adavana e matauraiamu tauna ese adavana e lalokau heniamu, e laloa badamu, bona ma haida vairadiai e hanamoamu. (Her. 31:28) Atikol 28 ai ta herevalaia taihuna, Katerina, adavana na unu e kara toma. Katerina na e laloava ena ḡaukara na asi anina, to adavana ese e durua una lalohadai baine dadaraia. Katerina na maraḡinai sinana ese e gwau heniava, bona nega momo kekeni ma haida bona turana ida e haheḡereḡereava. Una dainai Katerina e bada bona Iehova ena Witnes ta ai ela neganai, ia na dounu sibona ma haida ida e haheḡereḡereva. To adavana ese e durua una lalohadai baine dadaraia bona lalohadai maorona baine abia. Katerina na e gwa: “Adavagu ese lau na e lalokau henigumu, na karamu ḡau namodia daidiai e hanamogumu, bona lau daigu ai e ḡuriḡurimu. Danu e durugumu Iehova ena kara namodia baina lalo bona egu lalohadai kereredia baina hamaoromaoro.”

9-10. Edena dalai elda taudia ese taihu ta e durua sibona ma haida ida basine haheḡereḡere?

⁹ Bema ta na sibona haida ida e haheḡereḡeremu, elda taudia be edena dalai ia bae durua? Taihu ta ladana Hanuni, ena ekspiriens aita laloa. Ia na maraḡinai ta ese se hanamoava. Ia na e gwa: “Lau na na hemaraiva bona na hemamiva maraḡidia haida ese lau na e hereagu. Na helalotaomu maraḡigu negana amo lau na sibogu ma haida ida na haheḡereḡereva.” Ena be Hanuni na hereva momokani ai e vareai, to dounu una lalohadai na e abiava. Una dainai e mamiava  kongrigeisin ai ta ese se laloava. Hari ia na mai moalena ida e painiamu. Dahaka ese e durua ena kara e haidau?

¹⁰ Hanuni na e gwa ia na elda taudia ese e durua. E hamaoroa kongrigeisin ai ena ḡaukara namodia na e lalo badamu bona ena haheitalai namona dainai e hanamoa. Ia na eto: “Nega haida elda ese e noigu heduru e ura taihudia baina durudia totona. E henigu asainmendia amo na dibava lau na e laloguva. Na helalotaomu elda taudia ese e tenkiu henigu badina matamata taihu haida na hagoadadia. Bena idia ese 1 Tesalonika 1:2, 3 e duahi henigu. Una ese lau na e hamoalegu bada! Unu elda taudia edia heduru dainai hari na dibamu kongrigeisin taudia ese lau na e lalogu badamu.”

11. Isaia 57:15 ai e gwauraidia “lalometau taudia bona ogoḡami taudia” be ede baita durudia toma?

¹¹ Iehova ese “lalometau taudia bona ogoḡami taudia” na e lalodia badamu. (Isa. 57:15, NWT) Dia elda taudia mo, to ita iboudai ese tadikaka taihu unu bamodia baita hagoadadia. Baita hagoadadia dalana ta na, eda kara bona hereva amo baita hahedinaraia idia na ta lalodia badamu. Iehova na e uramu idia baita hadibadia Ia ese idia na e lalokau henidiamu. (Her. 19:17) Danu eda tadikaka baita durudia totona, baita manau bona eda diba na basita heaḡilaia. Ita na asita uramu baita heaḡi unu amo haida ese bae mama henida. To, ta uramu eda hereva bona kara amo tadikakada baita hagoadadia.​—1 Pet. 4:10, 11.

12. Dahaka dainai taunimanima na e urava Iesu dekena baela? (Rau 1 laulauna ba itaia.)

¹² Iesu ese ena hahediba e kara henidia dalana amo baita dibamu haida be ede baita kara henidia toma. Iesu na tau hereadaena. To, ia na “manada bona lalo-manau” tauna. (Mat. 11:28-30) Ena be ena aonega bona diba na bada, to ia na se heaḡi. Taunimanima na e hadibadiava neganai, idia bae lalopararalai herevadia bona haheitalaidia e ḡaukaralaiva. (Luka 10:21) Iesu na hanaihanai taunimanima e hadibadiava Dirava ese idia na e lalodia badamu. To, e hekokorokuva tomadiho igunalaina taudia be unu asie kara tomava. (Ioa. 6:37) Iesu ese taunimanima na e matauraidiava.

13. Iesu ese ena hahediba e kara henidia neganai, edena dalai hebogahisi bona lalokau e hahedinaraia?

¹³ Iesu ese ena hahediba e kara henidia karana amo ena hebogahisi bona lalokau e hahedinaraia. Ia na mai dibana edia diba bona noho daladia na idauidau. Una dainai idia e huamu madunadia na dia heheḡereḡere, bona ta ese e karaiamu ḡaukarana na idau ma ta ena amo. Idia na mai kudoudia idoinai e ḡaukarava dainai, Iesu na e moale. Iesu ese talent parabolena ai e hahedinaraia edia kara na e lalopararalaiva. Una parabole ai, tau ta ese hesiai taudia ta ta na ḡaukara e henidia, “ta ta ena diba ena diba heḡereḡeredia.” Hesiai tauna ta ese e abi talent na hesiai taudia rua edia talent e hereaia. To, biagudia ese ina hahenamo hereva tamona e hamaorolaidia: “Namo herea, oi na hesiai taumu namona kara maoromaoro taumu!”​—Mat. 25:14-23.

14. Iesu ese haida e kara henidia dalana be ede baita tohotohoa toma?

¹⁴ Iesu na mai ena hebogahisi bona lalokau ida ita e kara henidamu. Ia na mai dibana iseda diba bona noho daladia na idauidau. Bona mai kudouda idoinai ida ta ḡaukaramu neganai, ia na e moalemu. Haida ta kara henidiamu neganai, Iesu baita tohotohoa na namo. Asita uramu eda kara o hereva amo tadikaka taihu baita hahemaraidia bena bae lalo idia e karamu ḡaukaradia na asi anidia. To namona na hanaihanai tadikaka taihu baita hanamodia badina mai kudoudia idoinai ida Iehova e hesiai heniamu.

15-16. Taihu ta ese baine haḡuḡuru diba tahua ḡaudia e ato karana ese ia be ede e durua toma?

¹⁵ Bema Iehova ihesiai heninai tahua ḡaudia baita atomu neganai, eda mauri na mai anina bona baita moalelaiamu. To, namona na eda diba bona noho daladia heḡereḡerediai tahua ḡaudia baita ato, dia haida baita tohotohodia. Bema unu baita kara tomamu, baita lalohisihisimu bona baita lalomanokamu. (Luka 14:28) Painia taihu ta ladana Midori ena haheitalai mani aita laloa.

¹⁶ Midori maraḡinai tamana ese e gwau heniava bona e hamaoroava, ia na dia tadina bona ena classmate heḡereḡeredia. Midori na e gwa: “Na hemamiva lau na karava ḡaudia na asi anidia.” To Midori e bada neganai e lalogoada. Ia na e gwa: “Dina iboudiai Baibul na duahiamu unu amo lalomaino na abiamu bona na mamiamu Iehova ese lau na e lalokau henigumu.” Danu, baine haḡuḡuru diba tahua ḡaudia e ato bona Iehova e noia baine durua unu tahua ḡaudia baine haḡuḡuru. Una ese Midori e durua Iehova ihesiai heninai e karamu ḡaudia baine moalelai.

17. Edena dalai “darada baita hamatamata,” bona unu baita kara tomamu neganai dahaka be varamu?

¹⁷ Siboda ta abimu lalohadai kereredia na basie ore haraḡamu. Una dainai Iehova na ita e hagoadadamu: “Namona na hanaihanai darada baita hamatamata.” (Efe. 4:23, 24) Unu baita kara toma totona, namona na baita ḡuriḡuri, Dirava ena Hereva baita stadilaia, bona baita lalo dobu. Hanaihanai unu baita kara toma bona Iehova baita noia, goada baine henida. Iena lauma helaḡa ese oi be durumumu unu amo oi sibomu na ma haida ida basio haheḡereḡere. Danu, Iehova ena heduru amo bo lalopararamu  oi be o mamamu, eiava o hekokorokumu, bona be durumumu unu kara ba dadarai.

18. Sisiḡa Iharuana 6:29, 30 ena hereva ese oi be ede baine hagoadamu toma?

¹⁸ Sisiḡa Iharuana 6:29, 30 ba duahi. Iehova na ita kudoudai e miamu ḡaudia na mai dibana. Ia na mai dibana ita na ta hekwarahimu tanobada ena lalohadai bona eda manoka ḡaudia baita dadarai. Iehova na e itaiamu bema ita na ta hekwarahimu unu baita dadarai, iena lalokau ita edai na be badamu.

19. Iehova ese ita e lalodamu dalana be ede e herevalaia toma?

¹⁹ Iehova ese ita e lalodamu dalana baita lalopararalaia totona, ia na sina ta ese natuna e lalokau heniamu karana ena haheitalai e ḡaukaralaia. (Isa. 49:15) Sina ta ladana Rachel ena haheitalai mani aita laloa. Ia na e gwa: “Natugu Stephanie na madi e vara maraḡi. Na itaia matama neganai, ia na maraḡi herea bona na hebogahisi. To, hospele ai ia e vara hua ginigunana ai dokta ese gwaumaoro e henigu dina iboudiai baina rosia. Una negai egu lalokau natugu enai na e bada. Hari, ia laḡanina na da siks bona iena uru taudia amo ia na maraḡi. To, na lalokau henia badamu badina ia na e hekwarahi baine mauri bona ia dainai na moalemu!” Ta moalemu badina ta dibamu Iehova ese ita na unu e lalokau henida tomamu, bema e itaiamu ita na ta hekwarahimu mai kudouda idoinai ida Ia ta hesiai heniamu!

20. Dahaka dainai Iehova ena hesiai taudia na e moalemu?

²⁰ Oi na Iehova ena hesiai tauna ta dainai, ena ruma bese lalonai oi na e lalomu badamu. Iehova ese oi e verimu mai badina na dia oi ese ma haida o hereadia dainai. Lasi, to e itamu oi na o manau bona o ura ia amo diba bavabi bona emu mauri ba haidaua. (Sal. 25:9) Namona na ba diba ia na e moalemu bema mai kudoumu idoinai ida Ia o hesiai heniamu. Emu haheauka bona Dirava o badinaia karana ese e hahedinaraia oi “kudoumu na namo.” (Luka 8:15) Una dainai hanaihanai mai kudoumu idoinai ida Iehova ba hesiai henia, unu amo bo moale dibamu.