1. Kifer Zeova pa konpar nou ar lezot?

ZEOVA kontan varyete. Li pa anvi ki tou kitsoz ouswa tou dimounn parey. Nou trouv sa dan so kreasion parski Li’nn kree diferan kalite plant ek zanimo. Ek mem bann imin zot diferan. Lor later, pena de dimounn ki san poursan parey. Zeova zame pa pou konpar twa avek enn lot dimounn. Li konn to leker ek Li kone kisannla to ete vremem. (1 Sam. 16:7) Li kone dan ki lanvironnman to sorti, ek Li konn to lafors ek to bann febles. Ek Li pa demann twa pou fer plis ki seki to kapav fer. Nou bizin trouv noumem parey kouma Zeova trouv nou. Lerla, nou pou “ena bann panse modes,” nou pa pou pans plis ki seki bizin lor noumem, ek nou pa pou panse ki nou inferyer.​—Rom. 12:3.

2. Kifer li pa bon ki nou konpar noumem ar lezot?

² Nou kapav aprann boukou ar lexanp bann frer ek ser ki fidel ek ki efikas dan predikasion. (Ebre 13:7, NW) Gras-a zot bon lexanp, nou kapav amelior fason ki nou prese. (Fil. 3:17) Me ena enn diferans ant swiv lexanp enn kikenn ek konpar noumem avek li. Si nou konpar noumem ar lezot, nou riske anvie zot, nou kapav dekouraze, ek nou kapav mem panse ki nou pena valer. Ek parey kouma nou ti trouve dan lartik avan, si nou fer konpetision ar lezot, nou kapav gat nou relasion avek Zeova. Akoz sa, avek boukou lamour, Zeova ankouraz nou: “Me sakenn bizin examinn so prop aksion. Lerla, li pou kontan pou seki li’nn fer, ek pa parski li’nn konpar li avek enn lot.”​—Gal. 6:4, NW.

3. Parmi bann progre ki to’nn fer, ki kitsoz rann twa zwaye?

³ Zeova anvi ki to zwaye pou bann progre ki to’nn fer. Par exanp, si to’nn pran batem, to bizin kontan ki  to’nn reisi realiz sa lobzektif-la! Personn pa’nn obliz twa pou pran sa desizion-la. To’nn pran sa desizion-la parski to kontan Zeova. Asterla, reflesi lor bann progre ki to’nn fer depi ki to’nn pran batem. Par exanp, eski to plis kontan lir ek etidie Labib? Eski to bann lapriyer inn vinn pli sinser? (Ps. 141:2) Eski to koumans pli fasilman bann konversasion ek to servi pli bien bann piblikasion kan to prese? Si to marye, eski Zeova inn ed twa pou vinn enn pli bon mari, enn pli bon madam, ouswa enn pli bon paran? To bizin zwaye pou tou bann progre ki to’nn reisi fer.

4. Ki nou pou examine dan sa lartik-la?

⁴ Nou kapav ed lezot pou zot zwaye konsernan bann progre ki zot fer. Nou kapav osi ed zot pou zot aret konpar zot ar lezot. Dan sa lartik-la, nou pou gete kouma bann paran kapav ed zot zanfan, kouma bann konzwin kapav ed zot kamarad, ek kouma bann ansien, ek lezot dan lasanble, kapav ed bann frer ek ser. Apre sa, nou pou get sertin prinsip Labib ki kapav ed nou pou fixe bann lobzektif ki nou kapav realize.

5. Dapre Efezien 6:4, ki kitsoz fode pa bann paran fer?

⁵ Paran, fode pa to konpar to zanfan avek enn lot ek fode pa to demann to zanfan pou fer plis ki seki li kapav fer. Si bann paran fer sa, zot kapav dekouraz zot zanfan. (Lir Efezien 6:4.) Enn ser ki apel Sachiko * dir: “Dan lekol, mo bann profeser ti atann ki mo travay pli bien ki mo bann kamarad. Anplis, mo mama ti anvi ki mo travay bien dan lekol pou ki mo profeser ek mo papa, ki pa Temwin, ena enn bon lopinion lor bann Temwin Zeova. Li ti anvi ki mo gagn 100 lor 100 dan tou mo bann lexame, me mo ti trouv sa inposib. Mem si sa fer lontan ki mo’nn kit lekol, parfwa mo demann momem si Zeova apresie seki mo fer, mem si mo fer mo best pou Li.”

6. Ki leson bann paran kapav aprann dan Psom 131:1, 2?

⁶ Bann paran kapav aprann enn leson bien inportan dan Psom 131:1, 2. (Lir.) Lerwa David ti dir ki li pa ti “galoup deryer bel-bel zafer ki tro gran pou [li]” ek li  pa ti rod fer bann kitsoz ki tro difisil pou li. David ti ena limilite, akoz sa li ti anpe ek li ti satisfe avek seki li ti ena. Ki leson bann paran kapav aprann ar David? Bann paran ki ena limilite ek modesti, zot konn zot limit, ek zot pa atann ki zot zanfan fer plis ki seki li kapav fer. Kan bann paran ed zot zanfan pou fixe bann lobzektif, zot kapav rasir zot zanfan. Kouma zot kapav fer sa? Zot fer sa kan zot ed li pou konpran dan ki domenn li bon ek dan ki domenn li mwin bon. Enn ser ki apel Marina dir: “Mo mama zame ti konpar mwa ar mo bann frer, ouswa ar lezot zanfan. Li ti ansegn mwa ki tou dimounn ena diferan kapasite ek ki tou dimounn ena valer devan lizie Zeova. Gras-a mo mama, bien rar mo konpar mwa ar lezot.”

7-8. Kouma enn mari kapav donn so fam loner?

⁷ Enn mari Kretien bizin donn so fam loner. (1 Pier 3:7) Donn loner enn kikenn vedir donn li enn latansion spesial ek respekte li. Par exanp, enn mari donn loner so fam kan li tret li avek respe. Li pa demann so fam pou fer plis ki seki li kapav fer. Anplis, li pa pou konpar li ar bann lezot madam. Kan enn mari konpar so madam ar lezot madam, ki madam-la kapav resanti? Anou get lexanp Rosa. So mari, ki pa enn Temwin, souvan konpar li ar lezot madam. So bann parol bien kriel pa ti zis fer Rosa perdi konfians an limem, Rosa explike: “Mo touletan bizin ki lezot rasir mwa ki mo ena valer devan lizie Zeova.” Parkont, enn mari Kretien donn loner so madam. Li kone ki, si li pa fer sa, sa pou afekte so relasion avek so madam me osi so relasion avek Zeova. *

⁸ Enn mari ki donn so madam loner, li pa koz koze so madam ar lezot, ek li dir so madam ki li kontan li ek ki li ena valer pou li. (Prov. 31:28) Se samem ki mari Katerina, ki nou’nn mansione dan lartik avan, ti fer. Katerina ti panse ki li pena valer, ek so mari ti ed li pou sirmont sa santiman negatif la. Kan Katerina ti tipti, so mama souvan ti kritik li ek ti konpar li ar bann lezot tifi. Akoz sa, Katerina ti koumans konpar limem ar lezot, ek li ti kontign fer sa mem si li ti vinn enn Temwin Zeova. Gras-a so mari, Katerina ti aret fer sa ek li ti koumans trouv limem dan enn fason pozitif. Katerina dir: “Mo mari kontan mwa, li felisit mwa pou bann bon kitsoz ki mo fer, ek li priye pou mwa. Li osi ed mwa pou rapel bann zoli kalite ki Zeova ena, ek li ed mwa pou rezet bann panse negatif ki mo ena.”

9-10. Kouma bann ansien ti ed enn ser ki ti ena tandans pou konpar li avek lezot?

⁹ Kouma bann ansien kapav ed bann frer ek ser ki ena tandans pou konpar zot avek lezot? Anou get lexanp enn ser ki apel Hanuni. Kan li ti tipti, bien rar bann dimounn ti felisit li pou seki li ti fer. Hanuni dir: “Mo ti bien timid ek mo ti panse ki bann lezot zanfan ti pli bon ki mwa. Depi mo tipti, mo konpar mwa avek lezot.” Mem si li’nn vinn enn Temwin Zeova, Hanuni ti kontign konpar li avek lezot. Ek akoz sa, li ti panse ki tou seki li fer dan lasanble pena linportans. Selman, azordi, Hanuni bien zwaye dan so servis pionie. Ki kitsoz finn ed li pou sanz so latitid?

¹⁰ Hanuni explike ki li ti gagn led avek bann ansien ki ena boukou lamour. Zot ti  montre li ki zot ti ena konfians an li ek zot ti felisit li pou bon lexanp ki li ti done dan lasanble. Hanuni dir: “Enn-de fwa, bann ansien ti demann mwa pou ankouraz bann lezot ser ki ti bizin led. Gras-a sa responsabilite-la, mo ti santi mwa itil. Mo rapel kan bann ansien ti remersie mwa pou lankourazman ki mo ti donn bann zenn ser. Apre sa, zot ti lir 1 Tesalonisien 1:2, 3 avek mwa. Sa ti vremem tous mo leker! Gras-a sa bann bon berze-la, azordi mo kone ki mo ena mo plas dan lasanble.”

11. Kouma nou kapav ed “bann ki kraze ek ki ena limilite”?

¹¹ Lir Izai 57:15. * Zeova gagn traka “bann ki kraze ek ki ena limilite.” Tou dimounn dan lasanble kapav ankouraz sa bann frer ek ser-la, pa zis bann ansien. Enn fason ki nou kapav ankouraz zot se kan nou montre zot ki nou vremem interese ar zot. Zeova anvi ki nou montre zot ki kantite Li kontan zot. (Prov. 19:17) Nou kapav osi ed nou bann frer ek ser kan nou ena limilite ek modesti. Nou pa anvi atir latansion lor noumem parski nou pa anvi ki lezot anvie nou. Okontrer, nou anvi servi nou konesans ek nou bann kapasite pou ankouraz nou kamarad.​—1 Pier 4:10, 11.

12. Kifer bann ti-dimounn ti kontan Zezi? (Get zimaz lor kouvertir.)

¹² Nou kapav aprann kouma pou tret lezot ar fason ki Zezi ti tret so bann disip. Zezi ti zom pli inportan ki’nn viv lor later. Pourtan, so ‘karakter ti dou e so leker ti ranpli ar imilite.’ (Mat. 11:28-30) Mem si li ti extra intelizan ek li ti konn boukou kitsoz, zame li ti flat limem. Kan li ti ansegne, li ti servi enn langaz ki sinp ek bann lexanp ki ti tous leker bann ti-dimounn. (Lik 10:21) Zezi ti bien diferan ar bann sef relizie ki ti fier. Zezi ti touletan fer lezot santi ki zot ena valer devan lizie Zeova. (Zan 6:37) Li ti tret bann ti-dimounn avek boukou respe.

13. Kouma Zezi ti montre lamour ek bonte anver so bann disip?

¹³ Zezi ti montre lamour ek bonte anver so bann disip dan fason ki li ti azir avek zot. Li ti kone ki zot sitiasion pa ti parey ek ki zot pa ti ena mem kapasite. Akoz sa, zot tou pa ti kapav asim bann mem responsabilite ek fer mem kantite dan predikasion. Kanmem sa, Zezi ti kontan zot parski sakenn ti pe fer so best pou Zeova. Nou konpran sa kan nou reflesi lor parabol bann talan. Dan sa parabol-la, met-la donn sak esklav enn travay, “sakenn dapre so kapasite.” Enn parmi sa de bon esklav-la, ti gagn plis ki so kamarad. Pourtan, met-la ti felisit toulede ek ti dir zot mem parol: “To finn bien fer, bon serviter fidel.”​—Mat. 25:14-23.

14. Kouma nou kapav imit lexanp Zezi dan fason ki nou tret lezot?

¹⁴ Zezi montre lamour ek bonte dan fason ki li azir anver nou. Li kone ki nou sitiasion pa parey ek ki nou pena mem kapasite, me kanmem sa li kontan kan nou fer nou best pou Zeova. Nou osi, nou bizin imit lexanp Zezi dan fason ki nou tret lezot. Fode zame nou fer enn frer ouswa enn ser santi li initil parski li pa kapav fer otan ki nou. Okontrer, nou bizin rod bann lokazion pou felisit li parski li pe fer so best pou servi Zeova.

15-16. Kouma enn ser inn gagn bann bienfe kan li’nn fixe bann lobzektif ki li kapav realize?

¹⁵ Kan nou ena bann lobzektif spiritiel, sa ed nou pou avanse ek sa donn nou lavi enn sans. Selman, nou bizin fixe bann lobzektif dapre nou kapasite ek nou sitiasion. Fode pa nou rod fer parey kouma lezot. Si nou fer sa, kitfwa nou pou dekouraze si nou pa reisi realiz lobzektif-la. (Lik 14:28) Anou get lexanp enn pionie ki apel Midori.

¹⁶ Kan Midori ti tipti, so papa, ki pa enn Temwin, ti abitie dir li ki so bann frer ek ser ek so bann kamarad lekol ti pli bon ki li. Midori dir: “Mo ti panse ki mo pa ti ena valer.” Me kan li’nn grandi, Midori inn koumans ena konfians an limem. Li dir: “Mo lir Labib toulezour parski sa ed mwa pou santi mwa anpe ek pou trouve ki Zeova kontan mwa.” Anplis, Midori ti fixe li bann lobzektif ki li ti kapav realize, ek li ti fer bann lapriyer presi pou ki li kapav realiz so bann lobzektif. Sa ti ed Midori pou trouv lazwa dan bann kitsoz ki li ti kapav fer pou Zeova.

17. Kouma nou kapav “kontign renouvle [nou] fason panse,” ek ki pou arive si nou fer sa?

¹⁷ Sa kapav pran boukou letan pou sanz fason ki nou trouv noumem. Me Zeova ankouraz nou pou “kontign renouvle [nou] fason panse.” (Efe. 4:23, 24, NW) Pou nou reisi fer sa, nou bizin priye Zeova, etidie Labib ek medit lor la. Alor, kontign fer sa bann kitsoz-la ek kontign rod led Zeova pou ki Li donn twa lafors. So lespri sin pou ed twa pou rezet tandans pou konpar twa avek lezot. Zeova pou osi ed twa pou trouve si to’nn vinn  enn dimounn ki fier, ek Li pou ed twa pou fer bann sanzman pli vit posib.

18. Kouma bann parol ki trouv dan 2 Kronik 6:29, 30 kapav rekonfort twa?

¹⁸ Lir 2 Kronik 6:29, 30. * Zeova kone ki nou resanti. Li kone osi ki nou bizin lit kont bann move linflians ki ena dan sa lemond-la ek osi lit kont nou prop linperfeksion. Kan Zeova trouv bann zefor ki nou fer pou lit kont tou sa bann kitsoz negatif la, so lamour pou nou ogmante.

19. Ki lexanp Zeova servi pou montre nou seki Li resanti pou nou?

¹⁹ Zeova servi enn lexanp pou montre nou seki Li resanti pou nou. Sa lexanp-la se lamour ki ena ant enn mama ek so zanfan. (Iza. 49:15) Anou get lexanp enn mama ki apel Rachel. Li dir: “Mo tifi Stephanie inn ne avan ler. Premie fwa ki mo ti trouv li, li ti tipti ek san defans. Me kan li ti dan so inkibater, pandan premie mwa, toulezour bann dokter ti les mwa pran li inpe. Sa bann moman-la ti kree enn lien bien for ant nou. Stephanie ena si-z-an asterla ek li pli tipti ki bann zanfan so laz. Selman, mo bien kontan li parski li’nn lite pou li kapav viv, ek li rann mwa bien zwaye!” Dan mem fason, Zeova kontan nou boukou parski Li trouve kouma nou pe lite pou fer nou best pou servi Li!

20. Ki bann rezon nou ena pou zwaye?

²⁰ Antan ki serviter Zeova, nou form parti so fami ek nou ena valer pou Li. Zeova pa’nn atir twa ver Li parski to pli bon ki lezot. Li’nn atir twa ver Li parski Li’nn get dan to leker ek Li’nn trouve ki to ena limilite, ek ki to dispoze pou les Li form twa. (Ps. 25:9) To kapav sir ki Li kontan kan to fer to best pou servi Li. To landirans ek to fidelite montre ki to ena “enn leker bon ek onet.” (Lik 8:15) Alor, kontign fer to best pou Zeova. Lerla, to pou ena bann bon rezon pou zwaye “pou seki [twa to] fer.”