MWAHA WOOSOMIYA 29
Wuutteeliheni nrima wuunuwa winyu mminepani!
“Khula ntthu naahala ukhalana isariya yootteeliya nlattuwo meettelwaawe, kahi nlattu wo wiilattaniha ni ntthunkiina.”—AKALAS. 6:4.
NCIPO 34 Vou Andar em Integridade
NINHALA WIITTHUCANI? *
1. Yehova hinnilikaniherani naakhunanihu?
YEHOVA uncivela woona mikwaratathi cene co citthu. Nwo uncivelanwo unawoonannya nhina citthu cotheene cumpalyaawe, ni hataa apinaatamu. Hiiva khaninlikana naatthu akiina. Phimaana, Yehova khanoolikanihani naakhunaninyu. Uyo naamoona khula ntthu ciryaawe wanrimani. (1 Sam. 16:7) Uyo ciicammo naacuwela malipelo ni malolovelo a khula ntthu, ni naacuwela inanna cumpiyeenyu. Yehova khanoolepelani upanka itthu ihinhaleenyu ukhitiri. Hiiva nihaana niitthucaka wiiweha toko Yehova cinnoonaawe. Ala manannaala, ninaahala uthoonyera “ukhalana ankhili omaana”, awula khaninhala wancera wiicoona ukhala uculu awula vathi waakhunanihu.—Aroo. 12:3.
2. Kontha isiyani khunreera wiilattaniha naakhunanihu?
2 Khunnanara uweheeha citthu comaana cimpankaaya akhunanihu. Wootakihera, nyuuva atthunana nnancuwela munna awula nrokori nokhitiri ulalyeera ratta. (Mabere. 13:7) Untakiha pooti wuukaviherani ukhitiri ulalyeera ratta. (Afili. 3:17) Masi utakiha ni wiilattaniha ni ntthu cikhanle citthu piili cinvirikana cinene. Ntthu neelikaniha naatthu akiina pooti wancera uwoonela nttima, unyoonyiya awula uhiicoona ukhalana ifayita. Toko ciitthucaleehu nhina mwaha uvinre, utotha usinttana wanlokoni pooti uhonona upatthaniihu ni Yehova. Phimaana, Yehova naanivaha ila ikanweela: “Khula ntthu aweheehe meettelwaawe, vano phinhalaawe ukhalana isariya yootteeliya nlattu wo meettelwaawe, kahi nlattu wo wiilattaniha ni ntthu nkiina.”—Akalas. 6:4.
3. Mphantteni wo makhalelweenyu nyuuva unooteelihani nrima?
3 Yehova nopheela wiira wuutteeliheni nrima wuunuwa winyu mminepani. Wootakihera, wakhala wiira nyuuva nhopattisiya, iyo ikhanle iparakha yomaana! Kontha iyo itthu yaalakenleenyu veekha cinyu ni nlattu wonfenta winyu Nluku. Muupuwele ciicammo wuunuwa winyu nhina citthu cikhwaawe. Nna va unaatepa wuucivelani usoma Ibiiblya? Nnaakhitiri nna va ulompa saana uvikana khalayi? (Isaa. 141:2) Nna va khunoorikani ulalyeera ihapari ni nnaakhitiri uvarela nteko ratta ikaruma cihu cowuulalyeerani ihapari? Wakhala wiira nhaana itthokweenyu, Yehova hookaviherani ukhala ntheli, ntheliya awula nnyari omaana? Wakhala wiira nhoonuwa nhina wo khula itthu ihimiye, nyuuva pooti utteliya nrima.
4. Isiyani inhaleehu wiitthuca nhina ula mwahoola?
4 Hiiva pooti waakavihera akhwiihu utteeliya nrima nlattu wo wuunuwa mminepani. Ciicammo pooti waakavihera uhiilattaniha naakhunanaya. Nhina ula mwahoola, ninaahala wiitthuca manannani ayari cinlamuliyaaya waakavihera asaanaaya, manannani anamathelana cinlamuliyaaya ukaviherana ni manannani mahumu cinlamuliyaaya waakavihera mayamunna ni miyaanuunu o wanlokoni. Woomalihera, ninaahala woopela mwaha mattharelelo mbiiblyani anhala unikavihera wiihelela mipika cinhaleehu ukhitiri wiirannyeeha.
ISIYANI AYARI NI ALE ATHELANNE INLAMULIYAAYA UPANKA?
Ayari moone citthu comaana cinkhitiryaawe upanka khula mwaninyu (Nwehe iparaagarafu 5-6) *
5. Toko cinhimyaaya Efesu 6:4, isiyani ayari ihinlamuliyaaya upanka?
5 Ayari ahaana yanyemaka waalikanihaca asaanaaya awula waakhanyereriha upanka itthu ihinkhitiryaaya. Nnyo citthunnyo pooti waanyoonyiha asaanaaya. (Nsome Efesu 6:4. *) Nrokorihu neehaniya Sachiko * neera: “Mapurusoore yaakisomiha yaanaakikhaca cinene wiira kaavikane ucuwelaca amirawo yaasomanaaka. Uhiya commo, amaama yaanaakikhaca cinene wiira kitepe ucuwelaca ucikolani wiira mapurusoore ni apaapa yahaari Saahiti a Yehova akittottopele. Itthu yaapheelaaya amaama waari ukoona kikumihaka 20 valoore mmaporovani cotheene. Hataa ukhalaka wiira kimalihile usoma khalayi, mpaka ilelo mi kinawiikoha wakhala wiira Yehova cinantteeliha nrima khweeliini miteko cinonvarelaaka.”
6. Isaalimu 131:1, 2 inwiitthuciha isiyani ayari?
6 Ayari pooti wiitthuca ikano yomaana nhina Isaalimu 131:1, 2. (Nsome. *) Mwene Davidi himyale wiira uyova ‘khaatotha citthu cuulupale cinene,’ ni citthu cahaahalaawe ukhitiri uphiyeera. Nlattu wo wiiyeviha ni uhitotha citthu cuulupale, Davidi ahokhitiri ‘wiimaaliha.’ Moolumo a Davidi anniitthuciha isiyani? Ayari, mwiiyevihe kahi paasi nhina citthu cinweherereenyu ukhitiri upanka nyuuva, masi ciicammo nhina citthu cinweherereenyu wiira asaaniinyu apanke. Ncuwele malipelo ni malolovelo aasaaniinyu, ni mwaakavihere wiihelela mipika cinhalaaya ukhitiri wiirannyeeha. Ala manannaala, mwaninyu naahala woona wiira haana ifayita. Nrokorihu neehaniya Marina neera: “Amaama khayaakilikaniha naasuulupalyaaka awula naasaana aatthu akhwaawe. Ayo ahokiitthuciha wiira khula ntthu rina ucuwelaca wawe ni atthu otheene Yehova naawoona ukhalana ifayita. Nlattu wa amaama, miiva kahi venci wiilikaniha naatthu akiina.”
7-8. Ntheli nlamuliya waawacera cani amwaarawe?
7 Ntheli nkristau haana aathoonyeraka ihisima amwaarawe. (1 Pet. 3:7) Waathoonyera ihisima amwaarawe unkhala waalemeliha. Wootakihera, nlopwana naathoonyera ihisima amwaarawe awoonaka ukhalana ifayita ni ahaalepeleke itthu ihinhalaaya ukhitiri. Uyo khanaalattaniha naathiyana akhwaawe. Nthiyana aahala wiicoona cani awannyawe yakhalaka khula ukati yanlattanihaka ni athiyana akhwaawe? Moone ntakihero na nrokorihu Rosa. Awannyaya khanakhala Saahiti a Yehova, ni ayo ikwaha cinci ananlattaniha nrokorihu naathiyana akhwaawe. Nlattu wo iyo itthwiiyo, nrokorihu Rosa khaneecoona ukhalana ifayita. Uyo neera: “Ikwaha cinci akhunanaka ahaana yakuupuseraka wiira Yehova naakoona ukhalana ifayita.” Phimaana, ntheli nkristau haana aathoonyeraka ihisima amwaarawe. Uyo naacuwela wiira apankaka commo, naahala wiiwanana naamwaarawe ni upatthannyaawe ni Yehova unaakhala womaana. *
8 Ntheli naathoonyera ihisima amwaarawe naawuuluma saana uhoolo waatthu akhwaawe, naawiirela wiira nawaafenta ni nawaattottopela. (Miru. 31:28) Awannyawe nrokorihu Katerina, romoliye nhina mwaha woosomiya uvinre, yahancera upanka iyo itthwiiyo wiira aakavihere amwaarawe umaliha masukhuli yaarinaaya. Ukati waaryaawe mwanhima, nrokorihu Katerina aanaapwapweliyaka naanumwaane yanlattanihaka naasimpwanaawe ni asithiyana akhwaawe. Nlattu wo iyo Katerina ahancera uhiicoona ukhalana ifayita—hataa ciicammo ukati waakhanlyaawe Saahiti a Yehova! Awannyawe yahonkavihera uwacera saana masukhuli yaarinaawe Katerina ni unkavihera wiiwehera saana. Nrokorihu Katerina neera: “Awannyaka anaakifenta, anaakittottopela nlattu wo citthu comaana cimpankaaka ni anaakilompela. Ayo ciicammo anaakuupusera makhalelo omaana a Yehova ni anaakikavihera urehererya citthu cinvonyaaka ni umaliha masukhulyaaka.”
ISIYANI MAHUMU NI MAYAMUNNA AKIINA INLAMULIYAAYA UPANKA
9-10. Mahumu yankavihenre cani nrokorihu uhiya wiilattaniha naakhunanawe?
9 Manannani mahumu cinhalaaya waakavihera mayamunna aneelikaniha naakhunanaya? Moone itthu yankhumelenle nrokorihu neehaniya Hanuni, haattottopeliyaka waaryaawe mwankaani. Uyo neera: “Mi kaari mwanhima oomaala cinene ni kooniha wiira akaarina ifayita toko asinamwane akiina. Phimaana ukhuma uyo ukatyuuyo mpaka nna, mi kinawiilattaniha naakhwaaka.” Mpaka waapattisiyaawe khampa Saahiti a Yehova, nrokorihu Hanuni khaahiile wiilattaniha naakhunanawe. Nlattu wo iyo, uyo oopuwela wiira khaarina ifayita wanlokoni. Masi nna co, uyo khanle piyoneeru ootteeliya cinene. Isiyani inkavihenre nrokorihu urukunusa moopuwelelwaawe?
10 Nrokorihu Hanuni neera wiira ahokaviheriya ni mahumu o wanlokoni. Mahumu yaholipihera unhimerya wiira uyo haana ifayita cinene wanlokoni ni yahonttottopela nlattu wo meettelwaawe omaana. Hanuni hantikha eeraka: “Ukati nkiina mahumu yankilepelaka wiira kaalipihe miyanuunu o wanlokoni yaari nimasukhuli. Nlattu wookilepela upanka iyo, mi kaaneecoona ukhalana ifayita. Mi kinawuupuwela ikwaha mahumu waakithoonyenryaaya ukisukhuru nlattu miiva wo waalipiha amirawo o wanlokoni. Uyo ukatyuuyo, ayo yahokisomela 1 Atesalonika 1:2, 3. Wahokitteela nrima cinene! Nlattu wookaviheriya naayo mahumwaayo, ilelo kinawiicoona ukhalana ifayita mumphwinkoni wa Yehova.”
11. Ninlamuliya waakavihera cani ale “anhuvihiya ni owiiyeviha” anromoliya nhina Isaiya 57:15?
11 Nsome Isaiya 57:15. * Yehova nawaawacera mayamunneehu “anhuvihiya ni owiiyeviha.” Otheene cihu, kahi paahi mahumu, pooti waakavihera ayo mayamunnaayo. Inanna imoca cinhaleehu waakavihera ukhanle waathoonyera wiira ninawaawacera. Yehova unancivela naathoonyeraka mayamunneehu inanna uyova cinaafentaawe. (Miru. 19:17) Inanna ikhwaawe yo waakavihera mayamunneehu, ukhanle hiiva wiiyeviha ni uhitotha wiittitthimiha. Kontha umananiha upanka citthu wiira nitikhinaciye, pooti uwiiriha akhunanihu ukhalana nttima. Uhiya upanka commo, hiiva nihaana niikurumicaka uvarela nteko ucuwelaca wihu wiira naalipihe akhwiihu.—1 Pet. 4:10, 11.
Atthari a Yesu yaanampatthanana cinene, kontha uyo kheethenca wiira phikhanle muulupale waapwaha ayova. Yesu aanawaatanaca sana-saana naapatthannyaawe (Nwehe iparaagarafu 12)
12. Nlattuni atthu oohicuwelaca cinene waanaacivela ukhala nkhayi ni Yesu? (Nwehe ilatarato yo wakaapani.)
12 Mananna Yesu cinaawaceraawe attharyaawe inaaniitthuciha waawacera saana mayamunneehu. Hataa ukhalaka wiira Yesu phaari nlopwana muulupale aakhanle watuninyani va, uyo aari “ntthu oomaala ni owiiyeviha wanrimani.” (Mat. 11:28-30) Aari ncuwelaci muulupale, masi kaakhala eettitthihacaka wiira atikhinaciye. Uhiya commo, Yesu ukati waawiitthucihaawe atthu, aanawuuluma woohirikarikiha ni aanaataphulela malattanihero oohirika wiiwiya naathu oohicuwelaca cinene. (Luka 10:21) Ahooleli ottiini ukati wa Yesu yaanawiithenca ni yanwiiriha atthu wuupuwela wiira Nluku khanwoona ukhalana ifayita, masi Yesu khaapanka commo. (Joau 6:37) Yesu aanawaawacera niihisima atthu oohicuwelaca cinene.
13. Nifento ni unamaanana wa Yesu weethoonyenre cani nimananna caawaceraawe attharyaawe?
13 Nifento ni unamaanana wa Yesu waheethoonyera nimananna caawaceraawe attharyaawe. Uyo ancuwela wiira khula nttharyaawe ahaana ucuwelaca wawe ni makhalelwaawe. Phimaana otheene caya khayaahala uvahaceriya miteko cimocaaru ni ukhitiri uviriha ukati mmocaaru yalalyeeraka. Hataa ukhalaka commo, Yesu aanaavahera ifayita wiikurumica wa khula nttharyaawe. Yesu khanakhala nhooleli ootepa waakhaca attharyaawe; ayo makhalelwaayo hothoonyera waapankilyaawe ntakihero nanlopwana aavahale anantekwaawe nsurukhu wiira yampanke nakoso. Nhina nno ntakiheronno, uyo nlopwanooyo ahonruma khula nantekwaawe umpanka nakoso aahalaawe unkhitiri. Nanteko mmoca ahokhitiri ninakoso ampankilyaawe uphwanya iluukuru yinci unvikana nanteko nkhunanawe. Masi patarawaaya ahaattottopela ooyeeli caya, awiirelaka itthu imocaaru: “Uhopanka saana, iphottha yomaana ni yookhuluvelya!”—Mat. 25:14-23.
14. Ninlamuliya untakiha cani Yesu wo waawacera akhwiihu?
14 Yesu naanithoonyera unamaanaawe ni naanifenta. Uyo naacuwela wiira citthu cinkhitiriihu upanka ni makhalelweehu cinaavirikana, ni unantteela nrima neekurumicaka upanka hiiva inkhitiriihu. Nihaana nintakihaka Yesu. Atthunaka ahaavo mayamunneehu ahinkhitiri wiirannyeeha citthu toko akhwaawe ciiraneehalyaaya; hataa ukhalaka commo, khaninlamuliya wuuluma itthu inhala uwiiriha woona ihaaya ni wuupuwela wiira kharina ifayita. Uhiya commo, nihaana naattottopelaka nlattu wo wiikurumica upanka inkhitiryaaya wiira answalele Yehova.
MWIIHELELE MIPIKA CINHALEENYU UKHITIRI WIIRANNYEEHA
Wiihelela ni wiirannyeeha mipika co munnepani unaahala wuukaviherani ukhala ntthu ootteeliya (Nwehe iparaagarafu 15-16) *
15-16. Wiihelela mipika wankavihenre cani Midori?
15 Mipika co munnepani cinaanithoonyera iphiro yoohala weetta ni itthu yoohala upanka muukumini wihu. Wiira niihelele mipika cinhaleehu ukhitiri wiirannyeeha, nihaana niweheraka hiiva inkhitiriihu upanka ni makhalelweehu, kahi nlattu waakhwiihu. Wiihelela mipika cihinhaleehu ukhitiri wiirannyeeha, pooti uninyoonyiha. (Luka 14:28) Moone ntakihero na piyoneera neehaniya Midori.
16 Waaryaawe mwankaani, Midori aanawuulumeliya citthu coohinamaana natthumwaane ahiri Saahiti a Yehova. Ikwaha cinci, athumwaane yaananlattanihaka naasihimaawe ni naamirawo yaasomanaawe ucikola. Midori neera: “Mi akeecoona ukhalana ifayita.” Masi ukati waaviraawe oonuwaka, uyo ahancera wiicoona ukhalana ifayita. Midori neera: “Usoma Ibiiblya khula nihuku uhokikavihera ukhalana nnema wanrimani waka ni uhokikavihera woona wiira Yehova naakifenta.” Uhiya commo, Midori aheehelela mipika coonaawe wiira anhala ukhitiri wiirannyeeha ni ahonlepela Yehova unkavihera wiirannyeeha nnyo mipikannyo. Upanka wawe commo, Midori wahontteeliha nrima wuunuwa wawe mminepani.
NHIHIYE UNVAHA YEHOVA NYUUVA INKHITIRIINYU
17. Isiyani inlamuliyeehu upanka wiira ‘nihihiye urehererya moopuwelelweehu,’ ni isiyani inhala uniirannyeela napankaka iyo?
17 Pooti uvira ukati mwinci nanlelo nikhalanaka moopuwelo ooniriipiha nrima. Phimaana Yehova nniirela co: “Nhihiye urehererya moopuwelelweenyu.” (Efesu 4:23, 24) Wiira nikhitiri upanka iyo, nihaana ulompa, usoma Nuulumo na Nluku ni wuupuwela cinene insomeehu. Phimaana, mwiikurumice upanka nnyo citthunnyo ni nhihiye unlepela Yehova wuuvahani ikuru. Nnepa wowaarya wa Yehova unaahala wuukaviherani ukhitiri uhiya wiilattaniha naakhwiinyu. Ni wakhala wiira nhancera ukhalana nttima awula wiithenca wanrimani winyu, Yehova nahala wuukaviherani wiicoonelela woohipicapica ni uhiya ukhalana ayo makhalelo oohinamaanaayo.
18. Moolumo ari nhina 2 Ikoronika 6:29, 30 anoomaalihani cani?
18 Nsome 2 Ikoronika 6:29, 30. * Yehova naacuwela ciryaaya nrimeehu ni ciicammo naacuwela cinaananeehu makhalelo o ntuninyani ni ipahuwa cihu. Masi Yehova oonaka niikurumicaka cinene waanana nnyo citthunnyo, nifento nirinaawe ni hi ninaavira nuunuwaka.
19. Nlattaniheroni Yehova nimpankaawe wiira anikavihere woona mananna cinnifentaawe?
19 Wiira anithoonyere inanna cinnifentaawe, Yehova nawiilattaniha ni nthiyana nonfenta mwanawe cinene. (Isai. 49:15) Moone itthu yaakhumelenle athiyana aneehaniya Rachel arina asaana. Ayo ahantikha co: “Mwanaka Stephanie kinyarale cihinaphiyera myeeri cawe. Unyara waka, kahomoona wiira aari mwankaani cinene ni oohikhomaala. Mweeri woopacera, uyo ahaana akhalaka mmaakinani usipiritaali, masi mameetiku yaanaakitthuniheraka uncisa khula nihuku. Uncisa mwanaka wankikavihera umoonihera nifento naka. Ilelo, Stephanie rina myaakha 6 ni khanle ooyeva ncusa alikanihiyaka naasinamwane akiina arina ilikaawe. Hataa ukhalaka commo, mi kinanfenta cinene kontha khareere uhuva wiira akhalane ukumi, ni naakitteeliha cinene nrima!” Khweeliini, unaareera woona wiira Yehova naanifenta ayo manannaayo anoonaka niikurumicaka unswalela ni unvarela miteko cawe nuukumiihu wotheene!
20. Isiyani inoopankihani utteeliya nrima nnava ukhanleenyu Saahiti a Yehova?
20 Ukhala winyu nswali a Yehova, nyuuva nnaavirikana naatthu akhwaawe ni nhaana ifayita cinene iriyani yaamuci a Yehova akhanle oovirikana ikhapila. Yehova khawiihanneni wanlokoni wawe nlattu nyuuva wookhala ntthu omaana waapwaha akhwiinyu. Uyo wiihanneni kontha howeha nrimeenyu ni hoona wiira nkhanle ntthu owiiyeviha ni nnaapheela wiitthucihiya. (Isaa. 25:9) Nkhuluvele wiira Yehova nawoona ukhalana ifayita ikuru cimpankeenyu wiira nvare ntekwaawe. Uvilela ni unvaresesa winyu unthoonyera wiira nhaana nrima womaana. (Luka 8:15) Phimaana, nhihiye unvaha Yehova nyuuva inkhitiriinyu. Mwapankaka commo, nnaahala ukhalana isariya yootteeliya nrima ‘nlattu wo meettelweenyu.’
NCIPO 38 Jeová Vai Dar-te Força
^ par. 5 Yehova khannilikaniha naakhwiihu. Masi pooti ukhalaka wiira hiiva ninawiilikaniha naakhwiihu, ni ninawancera wuupuwela wiira khanirina ifayita. Nhina ula mwahoola, ninaahala woona nlattuni uhinreeraaya wiilikaniha naakhunanihu. Ciicammo ninaahala woona mananna cinlamuliyeehu waakavihera amuciihu ni mayamunneehu o wanlokoni wiiweha khampa Yehova cinwoonaawe.
^ par. 5 Efesu 6:4 Ni asinnapaapa, nhaanyoonyihe asaaniinyu, masi nhihiyerere uwuunuwiha mwaalakiheraka ni mwawiitthucihaka moopuwelo a Yehova.
^ par. 5 Macina makiina ahaakakhanihiya.
^ par. 6 Isaalimu 131:1 Oo Yehova, nrimaaka khurina wiicoona, ni meethwaaka kharina wiithenca; ciicammo akintotha citthu cuulupale ni citthu cihinhalaaka ukhitiri uphiyeera. 2 Mena, masi mi kiheemaaliha, toko mwaana hiihiye waamwa nanlelo acisiyaka naanumwaane; kinkhala ootteeliya toko mwaana oohiihiya waamwa.
^ par. 7 Unookhalaru wiira citthu cihimiye cinwuuluma atheli, atheliya ciicammo pooti weettela.
^ par. 11 Isaiya 57:15 Kontta co phiiralyaawe Ule ttitthimale ni Nkhulupale, nokhala mpaka ni rina ncina nowaarya: “Mi kinkhala nipuro nooculu ni nowaarya, masi ciicammo kinkhala wamoca naatthu anhuvihiya ni owiiyeviha, wiira kaatteelihe nrima atthu owiiyeviha ni wiira kaatteelihe nrima atthu anhuvihiya.”
^ par. 18 2 Ikoronika 6:29 Ni ntthu awula upoovu wotheene wo Isarayeli walompaka, awula yalepelaka isontte inhala ukhala poothe (kontha khula ntthu naacuwela itthu inonkhumelela ni inonwerya), yalompaka anataphulenle myoono ni matataaya anawehihenre uryaaya ila inupeela, 30 sontte, mwaaviriyane wiirimu uriinyu, nipuro ninkhaleenyu; munlevelele ni muntthuvele khula ntthu toko ciryaaya iphiro cawe cotheene, kontha nyuuva nnaacuwela ciryaaya mirima caya (thi nyuuva paasi khweeliini nnocuwela ciryaaya nrima wa pinaatamu).
^ par. 62 ILATARATO: Ukati wooswali waamuci, ayari inawaatteeliha nrima inkhitiryaawe upanka khula mwaana wiira akavihere utekiya ikalawa ya Nowee.
^ par. 66 ILATARATO: Athiyana oohitheliya arina mwaana mwankaani cinene anawiitthenkaca wiira avare nteko weepiyoneeru ookavihera ni unawaatteela nrima ukhitiri waya uyo ntekooyo.
