1. Mwahaya bwaddi Yehova ahiniliganihaga ni athu amodha?

YEHOVA onodhiveliwa makalelo dhopaddusa dhaye dhihiyaniliwa. Eyo enowoneya mwadhopaddusiwa dhaye dhatedhene ni athuya. Kaavo muthu analigana ni muthu mukwaye. Bumwahaya Yehova kanadha aniliganiha ni athu amodha. Oliye onopendda murima wawo, ni emuthu yawo yatene. (1 Sam. 16:7) Oliye ohunona makalelo opaddusiwiwe, dhithu onawedhiwe opara ni dhithu ohunawedhiwe. Oliye kanadha uloba werana ethu ohunandiwe. Iyo nnofwanelela ohudhera ekalelo ela wihina nikanne moonelo yola wowiwona ninga Yehova ananoniye. Nerana ndo, nnere otonyihedha wi ‘nihikanna thotho.’​—Rom. 12:3.

2. Mwahaya bwaddi kahiyo yapama wiliganiha ni athu amodha?

² Kahiyo yabure watajhiha athu amodha eneriwana. Motajhiha, podi wera ohumunona ddibila anonne wapara pama mabasa oolaleya. (Heb. 13:7) Eyo podi wukavihera niweya onona pama wapara mabasa oolaleya. (Fil. 3:17) Mbwenye wihikala ohiyana winlubale, omutajhiha muthu ni wiliganiha ni muthu yoyo. Muthu anakanna elemelelo yowiliganiha podi wambela okanna nrima, okwerebeya obe wiwoonaga ninga kanna thima. Ninga nonilihu yohudhera evirile, opokihana ni addibila ammulogoni podi onitotela makathamiho epaddi yehu yomuzimuni. Bumwahaya Yehova aganilaga nuudhivela egi: ‘Kadda muthu asugwerege dhowera dhaye, ndo anere okanna ethu enamuhagalasa yeka, ohiya wiliganiha ni athu amodha.’ — Gál. 6:4.

3. Epaddi baani mwigumini mwawo enuhagalasa mwaha wowunnuwelavo?

 ³ Yehova anafuna wihina ohagalalege ni dhithu dhomuzimuni onandiwe werana. Motajhiha, akala we ohumala obaddiziwa, onotamaleliwa vanlubale! Ela ethu othomiliwe weka mwaha wodhivela onniwena ni Mulugu. Kasugwa makalelo wunnuweliwevo ofiyera peeno. Motajhiha, omwileri Bibliya ni ohudhera wavayeka winowudhivela? Malobelo awo, enakuma vati vamurima? (Sal. 141:2) Mabasa oolaleya enowudhivela ni ohunona pama oparihedha dhipano dhinalabihedhiwa mmalaleyelo? Akala ohukanna murala, onowedha woona makalelo ukavihere Yehova okala mulobwana ni babi apama? Akala dhithu ndha dhisorihiwe vala ohunnuwelavo epaddi modha, ohagalalege.

4. Yohudhera ela nnaasuze muselu baani?

⁴ Iyo podi wakavihera athu amodha ohagalala ni dhithu enawedhiwa opara epaddi yomuzimuni. Ohiya eyo, iyo podi wakavihera nahiliganihaga ni athu amodha. Yohudhera ela, nnere woona makalelo ababi enafuniwa wakavihera aniwa, ni anamatelana enande addi okaviherana mmodha ni mukwaye. Ki anamaholela mulogo enande addi wakavihera addibila ni arogola ammulogoni. Omagomiherowa, nnere woona dhoolaga dha mBibliyani dhinanikavihere okanna dholuba nnawedhihu wakwaniha mowiwanana ni dhithu nnandihu opara mwigumini mwehu.

5. Mowiwanana ni Efésios 6:4, ababi kikanne elemelelo baani?

⁵ Ababi kikanne elemelelo yomuliganiha mwaniwa ni mwaana mukwaye obe omuwaddihedha mwaana werana ethu ahinandiye. Makalelo ala podi omuukula mwaana. (Omwileri Efésios 6:4.) Murogola anithaniwa Sachiko * onosoriha egi: “Apurusoraga yafunesa ninga manotaga yapithege anaskola akwaga. Teto othabwihawa, amama yaganesa ethu emodhave. Aliwa yafuna ninga manotaga yapithege anaskola amodha wihina githetheliwege ni purusoraga vamodha ni apapa yahali Anamona a Yehova. Mwebaribarene ethu yafuniwa miyo kagaawedhe werana. Naarive ngamarihe ohudhera yaka dhowinjhivadhene mundduli, malabo mamodha ginokala nuwikoha akala mabasa ginamparelimi Yehova enomwakwana.”

6. Salmos 131:1, 2 anaahudhiha ddi ababi?

⁶ Ababi podi ohudhera ethu yathima ni  Salmos 131:1, 2. (Omwileri.) Mwene Davidi, ahisoriha mwinya egi kaginasayela ‘dhithu dhinlubale’ newene dhithu gihinandimi okanna. Mwaha wowiyeviha ni wonona manddilaye, Davidi ahiwedha ‘obebedha ni okurumusa muneba waye.’ Madhu ala asorihe Davidi, enanihudhiha ddi? Ababi mukale owiyeviha ni mwanone manddile eenyu, ohiya wawaddihedhaga aninyu dhithu ehinawedhiwa. Mbwenye mwanona wi ninyuwa, muhukanna dhithu dhimodha dhinurusani werana, munere owedha wakavihera aninyu okanna dhooluba dhinawedhiwa wakwaniha. Mwamakalelo yala, mwanawo anere onona wihina ohukanna thima. Murogola anithaniwa Marina onowubuwela egi: “Amama kiyanna elemelelo yogiliganiha ni addibilaga obe nahima aathu amodha. Aliwa ehigihudhiha wi kadda muthu ohukanna dhithu dhinamuhiyaniha ni muthu mmodha, teto kadda muthu wahiyo dathima vamentoni va Yehova. Mwaha wanikavihero namama, kaginna elemelelo yowiliganiha ni athu amodha.”

7-8. Mulobwana anatonyihedhe aavi wi onomuthithimiha mwariye?

⁷ Mulobwana ootela ali mukiristawu, amuthithimihege mwariye. (1 Ped. 3:7) Omuthithimiha muthu enatapulela omuriha ni onvuruwana pamadhene anawogiye. Motajhiha, mulobwana onomuriha mwariye wodhela omweddiha ninga muthu athima. Oliye kanadha amuloba ethu ahinawedhiye. Ohiya eyo, kanadha atajhedha omuliganiha ni ahiyana amodha. Mwihiyana anakale aavi, amonaga mamune malabo amatene amuliganihaga ni ahiyana amodha? Kasugwa empadduwele Rosa. Mamune ahili Namona a Yehova, ahikanna elemelelo yomuliganiha ni ahiyana amodha. Mwaha wa yeyo Rosa kiwona ninga muthu athima. Oliye onosoriha egi: “Miyo ginohowelesa wihina athu amodha egubusedhege wi gihikanna thima vamentoni va Yehova.” Bumwaha mulobwana ali mukiristawu anofwanelela amuthithimihege mwariye. Oliye ohunona wi erana ndo mwariye podi olibiha wandana anniyena ni mamune ni wandana anniyena ni Yehova. *

⁸ Mulobwana anamuthithimiha mwariye, onomuwoga pama akala naathu amodha, oliye kanakanna manyazo womwaddela wi ginowudhivela ni onomutamalela. (Pro. 31:28) Siyeyo aneresana mamune Katarina nimusorihilihu yohudhera evirile wihina amukavihere ogonjhiha mubuwelo wabure anniyena. Katarina agaali mwaana, amaye yahikanna elemelelo yonvanyiha ni yomuliganiha ni anamwali amodha naaleya yaali akwaye. Mbwenye mamune ali mukiristawu, omukavihera owanana mubuwelo ola wiwoona ninga kanna thima. Katarina onosoriha egi: “Mamunaga onogidhivela, onogitamalela dhithu dhapama ginaparimi ni onogilobelela. Ohiya eyo onogubusedha dhikalelo dhapama anna Yehova ni onogikavihera owomihedha gakanna mubuwelo wabure.”

9-10. Anamaholela mulogo emukavihere addi murogola osaddula ekalelo yaye anniyena yowiliganiha ni athu amodha?

⁹ Anamaholela mulogo enakavihere addi ale enna ekalelo yowiliganihaga ni athu amodha? Kasugwa yopadduwa ya murogola anithaniwa Hanuni, agaali mwana Hanuni malabo owinjhivene kavo muthu amutamalela. Oliye onowoga egi: “Miyo gaali muliba manyazo ni gakala ni ahima akwaga gubuwela wi aliwa bathima ohiyana ni miyo. Naari dhigavirile yaka dhowinjhivadhene, miyo ginowubuwela wi mwaha wa mubuwelo yoyo gobajha wiliganiha ni  athu amodha.” Naarive agahudhere ebaribari, Hanuni ahikannave mubuwelo wowiliganiha ni athu amodha. Eyo yamudhelena makathamiho baani? Oliye oona wi miyo kaginna thima mmulogoni. Naari dhigalive ndo, peeno Hanuni anowapara mabasa oopiyonera ni onohagalala. Ki emukavihere Hanuni osaddula monelo waye ddi?

¹⁰ Hanuni onosoriha egi, egikavihere thinikavihero egivahile anamaholela mulogo. Aliwa omutamalela mwaha ororomeleya waye ni mwaha okala yotajhiha yapama yamuthu oliba murima. Oliye ohuleba egi: “Mudhidhi mmodha anamaholela mulogo yogilobesa akala dhere wenyeya miyo omulibiha murogola mmodha ahowela nikavihero. Mabasa ala yagithomela anamaholela mulogo yogivaha ebaribari wi miyo gili athima. Ginowubuwela anamaholela mulogo yagitamalelegiwa mwaha miyo walibiha arogola amodha. Ohiya eyo aliwa omwileri 1 Tessalonicenses 1:2, 3. Eyo yahigiddiginya murima vanlubale! Ginotamalela vanlubale mwaha wa anamakukula ala apama, vano dhorela dhaaga buumburo ginnimina munikuruni mwa Yehova.”

11. Nnalibihe addi ale ‘ekwerebeye ni enna muzimu wowiyeviha,’ enasorihiwa va Isaías 57:15?

¹¹ Omwileri Isaías 57:15. Yehova onowakavihera vanlubale ale ‘ekwerebeye ni enna muzimu wowiyeviha.’ Aatene iyo, ohiya anamaholelave mulogo baahi podi okavihera walibiha addibila ni arogolihu. Makalelo mamodha owalibiha addibila ni arogola fuwavuruwana pama. Yehova anafuna wihina iyo nadhivelege mwaha bimambila aye. (Pro. 19:17) Teto iyo nnowakavihera addibila ni arogola nakala athu owiyeviha ni nanona manddile ehu. Iyo kannafuna wiwoonaga ninga nili athimaya, mwaha eyo yere otatamula ntxiga ni addibilihu. Nlabihedhe enonelo yehu ni ndhe nnandihu werana wihina nilibihane mmodha ni mukwaye. — 1 Ped. 4:10, 11.

12. Mwahaya bwaddi athu owiyeviha yodhiveliwa okala ni Yesu? (Osugwe fotu yavakapani)

¹² Iyo podi ohudhera makalelo owaweddiha athu amodha ni Yesu wodhela makalelo aweddihiye anamaharaye. Yesu di muthu athima aali velaboni yavati. Mwebaribarene oliye ali ‘oopwaseya teto murima waye waali wowiyeviha.’ (Mat. 11:28-30) Oliye aali athotho vanlubale, ahikanna enonelo yowinjhiva mbwenye kithukula. Bumwahaya Yesu ahudhihaga owawoga madhu okweya wawonelamo ni dholaddaniha dhathukula murima athu owiyeviha. (Luc. 10:21) Anamaholela gereja amalabo a Yesu yaali athu owithukula ni yowaweriha athu wubuwela wihina kiyanna thima vamentoni va Mulugu, mbwenye Yesu kaali ndo. (João 6:37) Oliye owavaha thima athu atene.

13. Yesu onihe addi wihina owadhivela ni owaweddiha pama anamaharaye?

¹³ Yesu owadhivela ni owaweddiha pama anamaharaye. Oliye ahinona wi aliwa yahikanna enonelo yohiyana. Teto atene kiyanna mutholo mmodhave, ni kopolo dhimodhave dholaleya. Naari dhigalive ndo, oliye odhiveliwa ni ootamalela wilibihedha wa kadda muthu. Wodhela yoladdaniha ela ya talentu nnowona wihina Yesu oohagalala ni wilibihedha wa kadda muthu. Va yoladdaniha ela, kadda mudhaari aathomeliwe mabasa ni nabwiye ‘mowiwanana ni thotho dhaye.’ Adhaari abili nuuwapara mabasa ewa yahiganyari okunamo, kadda mudhaari ohiyana ni mukwaye. Mbwenye nabwiya ewa watamalela ni madhu mamodhave egihina: ‘Dhihikala, oli mudhaari apama ni oororomeleya!’ — Mat. 25:14-23.

14. Nnaaweddihe addi athu amodha ninga Yesu?

¹⁴ Yesu anonidhivela ni anoneddiha nuupama. Oliye ohunona wihina iyo niri ohiyana mmodha ni mukwaye mwa dhatedhene.  Mbwenye anohagalala oonaga wilibihera wehu. Naweddihege athu amodha ninga Yesu. Podi wera addibila amodha kinawedha wapara mabasa ninga addibila amodha. Naari dhigarive ndo, kanerena ethu yathukulihe manyazo obe yonihe wihina kinna thima. Mbwenye sapama watamalela mwaha wilibihera wewa mmabasani mwa Yehova.

15-16. Ethu baani epadduwe ni murogola athomile dholuba dhiwanana ni kopolo dhaye?

¹⁵ Dholuba dhomuzimuni dhinonikavihera ovaha thima egumi yehu ni dhinowoniha dila yohara. Mbwenye yapamaya fuluba dhithu ononiwe wihina onere wakwaniha, ohiya oluba ethu mwaha wofuna wiliganiha naathu amodha. Naluba ethu nahinawedhihu podi onikwerebeyiha omuzimuni. (Luc. 14:28) Kasugwa yopadduwa ya piyonera anithaniwa Midori.

¹⁶ Agaali mwaana, Midori owoonihiwa goyi naababe yahali Anamona a Yehova. Ababe yomuliganiha naarogoliye vamodha nanaskola akwaye. Midori wera: “Miyo goona wi kaginna mabasa.” Vano agunnuwale obajha wivaha thima. Midori wera: “Mwaha omwileri Bibliya malabo amatene gihikanna murenddele ni ginowoona wihina Yehova anogidhivela.” Ohiya yeyove Midori, ahithoma dholuba dhiwanana ni kopolo dhaye ni ahimuloba Yehova wihina amukavihere wakwaniha. Mwaha wa yeyo, Midori anohagalala ni dhithu dhomuzimuni anandiye opara.

17. Enahoweleya ddi wihina nsaddule ‘mubuwelo wehu,’ ki mareeliho baani nnawakelihu?

¹⁷ Dhowubuwela dhabure kadhinamala nlabo nimodha baahi. Bumwahaya Yehova anixagihaga ni madhu ala: ‘Musaddulegeve mubuwelo  weenyu.’ (Efé. 4:23, 24) Wihina nsaddule mubuwelo wehu nnohowela olobela, omwileri ni ompendda Bibliya kadda labo. Bumwahaya wilibihere werana dhithu ndha ni olobe nikavihero na Yehova. Muzimu wotxena wa Mulugu onere wukavihera ohiliganiha naathu amodha. Vano wabajha okanna nrima ni withukula, Yehova anere wukavihera woona ni wigara mmurimani mwawo dhikalelo ndha dhabure.

18. Ethu baani yudhivele eli va 2 Crónicas 6:29, 30?

¹⁸ Omwileri 2 Crónicas 6:29, 30. Yehova ohunona murima wehu. Teto oliye ohunona koddo ninnihuna — ni muzimu weelabo vamodha ni ohulogomana wehu. Vano Yehova anonaga nilibiheraga owana koddo ela, odhivela waye ni iyo onerege othabwa.

19. Wihina nonelemo odhivela Yehova anniyena ni iyo, oliye iladdanihe nnani?

¹⁹ Wihina nonelemo odhivela Yehova anniyena ni iyo, oliye iladdanihe ni mayi. (Isa. 49:15) Kasugwa empadduwele mayi anithaniwa Rachel. Oliye ohuleba egi: “Mwanaga Stephanie gimbalile ahinakwanihe mweri mitanu nennayi. Ombalawene ahithabwa oyeva ni ohowela nikavihero. Bumwahaya mudhidhi ganbaxarimina ospitale amediku wera akalege oddulive malabo amatene. Mwaha wa yeyo odhivela ginnimina ni mwanaga weraga othabwa. Peeno Stephanie anna yaka 6, mbwenye kanaligana ni ahima akwaye ebaliwe nlabo nimodhave. Naari dhigarive ndo, miyo ginomudhivela vanlubale mwaha gihimonela goyi wihina akalewo ni ohudhana ohagalala mwigumini mwaga!” Yehova ohukanna odhivela wimodhave ni iyo anonaga nilibihedhaga wihina nimulabele oliye ni murima wamutene, eyo enohagalasa!

20. Dhithu baani dhinuhagalasa mwaha okala mudhaari a Yehova?

²⁰ Mwaha okala mudhaari a Yehova, we ori ofuneya ni ori vaari veemudhi enna athu ohiyana-iyana enafwanyeya elabo yatene yavati. Yehova kuwithanile we mwaha okala athima wapitha athu amodha. Mbwenye oliye asugwile murimawo ni oliye woona wihina oli muthu owiyeviha ni onofuna ohudhera. (Sal. 25:9) Okanne ebaribari wi Yehova onovaha thima dhatedhene oneriwena wi omulabele. Ovilela wawo ni ororomeleya wawo makalelo owoniha wihina we ohukanna ‘murima wopwaseya ni wapama.’ (Luc. 8:15) Bumwahaya onahiye omparela Yehova mabasa ni kopolo dhawo dhatedhene. Werana yeyo, we onere ‘okanna ethu enuhagalase weka.’