1. ¿Kenke Jehová amo kiita tlen tiuelij tijchiuaj ika tlen sekinok kena uelij?

JEHOVÁ amo kipaktia ma eli sanse nochi tlamantli. Yeka, amo sanse kej tlachijchijki. Se maseuali amo eli sanse ika seyok maseuali, yeka Jehová amo kema kiita tlen tijchiuaj ika tlen sekinok kichiuaj. Ya nochipa san kiita tlen tijpiaj ipan toyolo (1 Sam. 16:7). Nojkia, kiita tlake tiuelij tijchiuaj o tlake amo uan tlen techpanok uejkajkia. Uan amo techchiualtia ma tijchiuakaj tlen amo tiuelij. Yeka, nojkia ma tijchiuakaj kej Jehová, uan ma timoitakaj kej ya techita. Tlaj kiampa tijchiuaj, techpaleuis ma timoitakaj kej kinamiki (Rom. 12:3).

2. ¿Kenke amo kinamiki san tikitasej tlen sekinok kichiuaj ika tlen tojuantij amo tiuelij?

² Amo kenijki tlaj tikitaj kenijkatsa se toikni tlauel kuali tlajtolmoyaua (Heb. 13:7). Nopa techpaleuis nojkia kiampa ma titlamachtikaj (Filip. 3:17). Maske tlauel techpaleuia, amo techpaleuis tlaj san tikitasej tlen sekinok kena uelij pampa kichiuas amo ma timopatiitakaj o tlauel timopatiitasej. Nojkia kichiuas ma titekualankaitakaj uan ma timoyolkokokaj. Kej tikitakej ipan tlamachtili 28, amo kinamiki tikitasej tlen toikniuaj uelij kichiuaj ika tlen amo tiuelij pampa nopa kichiuas ayokmo kuali titlatekipanosej. Yeka, Jehová techilnamikilia: “Moneki sejse tojuantij ma timotekitlachilikaj [...] pero axaka ma paki san pampa kichijtok tlen achi kuali” (Gál. 6:4).

3. ¿Tlake tlen tijpatlatokej kichiua tlauel ma tiyolpakikaj?

³ Jehová kineki ma tiyolpakikaj ika tlen tijchijtokej. Tlaj timoatsonpoliuiltijtokej moneki tiyolpakisej pampa uelki tijchiuaj nopa. Tojuantij tijtlapejpenijkej kiampa tijchiuasej pampa tlauel tikikneliaj Jehová. Ma timoiljuikaj ipan tlen tijpatlatokej. Uelis nama nojua tlauel techpaktia tijpouasej Biblia,  timomachtisej uan timomaijtosej ika nochi toyolo (Sal. 141:2). Nojkia, kuali tijmatij kenijkatsa tijkamanaljuisej se akajya uan kuali tijtekiuiaj tlen ika titlamachtiaj. Uan uelis nama Jehová tlauel techpaleuijtok, yeka nojua tlauel tikikneliaj tonamik uan kuali tikinmokuitlauiaj tokoneuaj. Yeka, kinamiki tlauel tiyolpakisej pampa uelki tijpatlaj miak tlamantli ipan tonemilis.

4. ¿Tlake tikitasej ipan ni tlamachtili?

⁴ Uelis tikinpaleuisej sekinok nojkia ma yolpakikaj kema kitekipanouaj Jehová ika tlen uelij kichiuaj uan amo san ma kiitakaj tlen kichiuaj sekinok. Ipan ni tlamachtili tikitasej kenijkatsa tetajmej uelis kinpaleuisej ininkoneuaj, kenijkatsa uelis mopaleuisej katli mosenkajtokej uan kenijkatsa ueuejtlakamej uan toikniuaj uelis kinpaleuisej sekinok. Nojkia, tikitasej se keski textos tlen techpaleuis ma tikitakaj tlake kena tiuelij tijchiuaj uan tlake amo tiuelij.

5. Kej kiijtoua Efesios 6:4, ¿tlake moneki kichiuasej tetajmej?

⁵ Tetajmej amo kinamiki kiiljuisej se ininkone ma kichiua sanse kej kichiua iikni pampa nopa amo kipaleuis uan tlauel kitetsopas (xijpoua Efesios 6:4). Se tosiuaikni katli itoka Sachiko, * kiijtoua: “Katli nechmachtiyayaj kinekiyayaj ma nijkixti kuali calificaciones. Uan nonana nojkia kinekiyaya kiampa ma nijchiua, kiampa kuali nechitaskiaj katli nechmachtiyayaj uan notata katli amo kitekipanoua Jehová. Kinekiyaya nochipa ma nijkixti kuali calificaciones kema tijchiuayayaj examen maske amo niueliyaya. Maske ya uejkajtok ayokmo nimomachtia, kemantika nimoiljuia Jehová amo tlauel kipatiita tlen nijchiua uan kineki nojua tlauel ma nijtekipano”.

6. Kej kiijtoua Salmo 131:1, 2, ¿tlake uelis kiyekosej tetajmej?

⁶ Tetajmej uelis kiyekosej tlen tlauel ipati ipan tlen kiijtoua Salmo 131:1, 2 (xijpoua). Tlanauatijketl David kiijtok: “Na axnimoiljuia para achi más nikuali, niyon axnimoiljuia para más nijmati que sekinok”. Ya amo moueyimatki uan kimatiyaya amo ueli kichiua nochi tlamantli, yeka kuali kiyolmatiyaya. Ni uelis kinpaleuis tetajmej amo ma moueyimatikaj uan amo ma kinekij kichiuasej tlen amo uelij, uan nojkia uelis kinpaleuisej ininkoneuaj kiampa ma kichiuakaj. Tetajmej moneki  kiitasej tlake uelij kichiuaj ininkoneuaj uan tlake amo, kiampa amo kintetsopasej kema kiniljuisej ma mosentlalikaj kichiuasej se tlamantli uan kuali kiyolmatisej. Se tosiuaikni katli itoka Marina, kiijtoua: “Nonana amo kema nechiljuik ma nijchiua kej kichiuayayaj eyij noikniuaj yon kej kichiuaj sekinok. Ya nochipa nechilnamikilik amo tijchiuaj sanse tlamantli, uan Jehová nochi kinpatiita. Tlen nechiljuik tlauel nechpaleuik pampa nama amo san nimosentlalia ipan tlen amo ueli nijchiua”.

7, 8. ¿Kenijkatsa se tlakatl uelis kinextis kipatiita isiua?

⁷ Se tlakatl katli kitekipanoua Jehová moneki kitlepanitas isiua (1 Ped. 3:7). Kineki kiijtos san isiua moneki kiiknelis uan kitlepanitas. ¿Kenijkatsa uelis kichiuas? Moneki kinextis tlauel kipatiita, amo kichiualtis ma kichiua tlen amo ueli uan amo kiiljuis amo ueli kichiua se keski tlamantli tlen sekinok siuamej kena uelij. ¿Kenke amo kinamiki kiampa kichiuas? Ma tikitakaj tlen kipanok tosiuaikni Rosa. Iueue katli amo kitekipanoua Jehová nochipa kiiljuia ma kichiua kej sekinok siuamej. Nochi tlen kiiljuia iueue, kichiua amo ma mopatiita, uan nojkia kichiua ma moiljui amo aka kiiknelia. Rosa kiijtoua: “Nochipa nijneki ma nechilnamikilikaj Jehová tlauel nechpatiita”. Yeka, tlakamej katli kitekipanouaj Jehová moneki tlauel kipatiitasej ininsiua, tlaj kiampa kichiuasej kuali mouikasej ininuaya uan nojkia kuali kitekipanosej Jehová. *

⁸ Tlakamej katli kipatiitaj ininsiua, nochipa kuali kamanaltij tlen inijuantij, kiniljuiaj kinikneliaj uan kintlaskamatiliaj ika tlen kichiuaj (Prov. 31:28). Katerina, katli tikijtojkej ipan tlamachtili 28, iueue tlauel kipaleuik ma mopatiita. Kema Katerina nojua eliyaya se siuapil, inana amo kipatiitayaya uan nochipa kiiljuiyaya ma kichiua se keski tlamantli kej kichiuayayaj sekinok siuapilmej o iuampoyouaj. Tlen kipanok Katerina kichijki nochipa ma kiita san tlen sekinok kichiuayayaj uan amo ipan tlen ya ueliyaya kichiua, uan maske ya kitekipanoua Jehová nojua kiampa kipano. Maske kiampa kiyolmati, iueue tlauel kipaleuijtok ma moita kej kinamiki. Katerina kiijtoua: “Noueue tlauel nechiknelia, nochipa nechtlaskamatilia kema nijchiua se tlamantli uan kiiljuia Jehová ma nechpaleuia. Nojkia, nechpaleuia ma nikilnamiki nopa kuajkuali tlamantli tlen Jehová kinextia uan ayokmo ma nimoiljuia amo tlauel nopati”.

9, 10. ¿Kenijkatsa ueuejtlakamej kipaleuijkej se tosiuaikni katli nochipa san kiitayaya tlen sekinok kichiuayayaj?

⁹ Ueuejtlakamej uelis kinpaleuisej toikniuaj katli moiljuiaj sekinok kuali kichiuaj se keski tlamantli uan inijuantij amo. Ma tikitakaj tlen kipanok se tosiuaikni katli itoka Hanuni. Kema eliyaya se pilsiuapiltsi nochipa kiiljuijkej amo kuali kichiuayaya se tlenijki. Ya kiijtoua: “Tlauel nipinauayaya uan nimoiljuiyaya sekinok konemej nochipa kuali kichiuayayaj se tlamantli. Uan nikilnamiki nochipa kiampa nechpanotok”. Kema Hanuni pejki kitekipanoua Jehová, nojua moiljuiyaya sekinok toikniuaj kuali tlatekipanouaj uan ya amo, yeka moiljuiyaya amo tlauel ipati tlen kichiuayaya. Maske kiampa kiyolmatiyaya, nama tlatekipanoua kej precursora. ¿Tlake kipaleuik ayokmo kiampa moiljuis?

¹⁰ Hanuni, kiijtoua ueuejtlakamej tlauel kipaleuijkej uan kinextijkej tlauel kipatiitaj. Inijuantij kiiljuijkej motemachiyayaj ipan ya, uan  kitlaskamatilijkej pampa kuali tlatekipanoua. Hanuni kiijtoua: “Kemantika ueuejtlakamej nechiljuiyayaj ma nikinpaleui se keskij tosiuaikniuaj kema monekiyaya. Nopa kichijki ma nikita toikniuaj kinekiyayaj ma nikinpaleui. Nikilnamiki ueuejtlakamej nechiljuijkej ika miak tlaiknelili tlauel kuali tlen nijchijtoya pampa nikinpaleuijtoya tosiuaikniuaj, uan nechpouilijkej 1 Tesalonicenses 1:2, 3. Tlen nechiljuijkej tlauel nechyolchikajki. Nojkia, tlauel niyolpaki pampa kichijkej ma nikita ipan tlanechikoli nijpia se tekitl”.

11. Kej kiijtoua Isaías 57:15, ¿kenijkatsa uelis tikinpaleuisej katli moyolkokouaj?

¹¹ (Xijpoua Isaías 57:15). Jehová tlauel kitekipachoua tlen kinpano katli tlauel moyolkokouaj. Maske amo tielij tiueuejtlakamej, uelis tikinyolchikauasej toikniuaj katli moyolkokojtokej. Uelis tijnextisej kema nelnelia timotekipachouaj ipan tlen kinpano. Jehová kineki ma kiitakaj toikniuaj ya tlauel kiniknelia (Prov. 19:17). Nojkia, uelis tikinpaleuisej toikniuaj tlaj amo timoueyimatij uan amo timoiljuiaj san tojuantij nochi tiuelij tijchiuaj. Uan amo ma tijchiuakaj sekinok ma techuejkapantlalikaj pampa nopa uelis kichiuas amo kuali ma kiyolmatikaj toikniuaj. Moneki tikinyolchikauasej toikniuaj ika tlen tijmatij uan ika tlen tiuelij tijchiuaj (1 Ped. 4:10, 11).

12. ¿Kenke maseualmej kinpaktiyaya itstosej iuaya Jesús? (Xikita tlaixkopinkayotl ipan ipantsajka).

¹² Tlaj tikitasej kenijkatsa Jesús kinkamanaljuiyaya itokilijkauaj, uelis tijyekosej miak tlamantli. Maske tlauel kiixmatkej, ya kinextik amo mosisinia yon amo moueyimati (Mat. 11:28-30). Maske Jesús kimatiyaya miak tlamantli, ya amo kema moueyimatki. Kema kinmachtiyaya maseualmej nochipa kitekiuiyaya tlajtoli uan neskayotl tlen amo ouij uan tlen ueliyaya asi ipan ininyolo (Luc. 10:21). Nojkia, amo kichijki kej katli tlayakanayayaj ipan religiones, ya kichijki ma kiyolmatikaj maseualmej Jehová tlauel kinpatiitayaya (Juan 6:37). Jesús nochipa kintlepanitak maseualmej katli amo tlauel kinixmatiyayaj uan katli amo tlauel ixtlamatiyayaj.

13. ¿Kenke tikijtouaj Jesús kinextik kiniknelia nochi itekipanojkauaj?

¹³ Jesús nochipa kinextik kiniknelia itokilijkauaj uan kimatiyayaj amo ueliyayaj kichiuaj sanse tlamantli. Yeka, amo nochi sanse kichiuayayaj ininteki yon sanse tlajtolmoyauayayaj. Maske amo sanse kichiuayayaj ininteki, ya tlauel kipatiitak tlen kichiuayayaj. Nojkia, Jesús amo kinchiualtiyaya itokilijkauaj ma kichiuakaj tlen amo ueliyayaj. Kiampa kinextik kema kiijtok nopa tlapoualistli tlen se tlakatl katli amo sanse kinmakak tomij itekipanojkauaj. Ininteko kintlaskamatilik nopa omej tlatekipanouanij maske amo sanse tekitl kichijkej (Mat. 25:14-23).

14. ¿Kenijkatsa uelis tijchiuasej kej Jesús kema tiitstokej ininuaya toikniuaj?

¹⁴ Jesús nojkia tlauel techiknelia. Ya kimati amo tiuelij tijchiuaj sanse tlamantli, yeka tlauel yolpaki kema kiita tijchiuaj kampeka titlatekipanosej. ¿Kenijkatsa uelis tijchiuasej kej ya? Amo kema ma tijchiuakaj se tlenijki tlen kichiuas toikniuaj ma kiyolmatikaj amo tleno ininpati o ma pinauakaj pampa amo uelij tlatekipanouaj kej sekinok. Moneki nochipa tikintlaskamatilisej pampa kichiuaj kampeka tlatekipanosej.

15, 16. ¿Kenijkatsa Midori kipaleuik kema kiitak tlake kena ueliskia kichiuas?

¹⁵ Tlaj tijnekij kuali titlatekipanosej uan tiyolpakisej, moneki tikitasej tlake tlamantli uelis tijchiuasej. Kema kiampa tijchiuaj, moneki tikitasej tlake nelnelia tiuelij tijchiuaj  uan kenijkatsa tiitstokej. Amo ma tikitakaj tlen sekinok kena uelij kichiuaj pampa uelis kichiuas tlauel ma timoyolkokokaj uan ayokmo ma tiyolpakikaj (Luc. 14:28). Ma tikitakaj tlen kichijki se precursora katli itoka Midori.

¹⁶ Kema Midori eliyaya siuapil, itata katli amo kitekipanoua Jehová, nochipa kiiljuiyaya amo ueli kichiua se keski tlamantli kej iikniuaj uan kej katli ininuaya momachtiyaya. Ya kiijtoua: “Kichijki ma nijyolmati amo tleno nopati”. Maske tlauel moyolkokouayaya, teipa ayokmo kiampa kiyolmatki. ¿Tlake kipaleuik? Midori, kiijtoua: “Mojmostla nijpouayaya Biblia pampa nopa kichiuayaya kuali ma nijyolmati uan nechpaleuiyaya ma nikita Jehová tlauel nechiknelia”. Nojkia, kiitak tlake kena ueliskia kichiuas uan kiiljuik Jehová ma kipaleui ipan tlen mosentlalijtoya. Nopa kipaleuik ma kiitak kenijkatsa nojua tlatekipanoskia uan ma yolpaki.

17. ¿Kenijkatsa uelis tijpatlasej kej timoiljuiaj, uan kenijkatsa techpaleuis?

¹⁷ Kemantika moneki panos miak tonali uan kiampa ayokmo timoiljuisej amo tleno topati. Yeka, Jehová techilnamikilia ni tlamantli: “Moneki inkinextisej inmonemilis tlen yankuik” (Efes. 4:23, 24). Tlauel techpaleuis tlaj mojmostla timomaijtouaj, timomachtiaj Biblia, timoyoliljuiaj ipan tlen tijpouaj uan tlaj tikiljuiaj Jehová ma techpaleui. ToTeotsij itonal techpaleuis amo san ma tikitakaj tlen sekinok uelij kichiuaj. Nojkia, Jehová techpaleuis ma tikitakaj tlaj timoueyimatij o titekualankaitaj, uan nima ma tijpatlakaj tlaj kiampa tielij.

18. ¿Kenijkatsa techpaleuia tlen kiijtoua 2 Crónicas 6:29, 30?

¹⁸ (Xijpoua 2 Crónicas 6:29, 30). Jehová kuali kimati tlen tijpixtokej toyolijtik. Nojkia, kimati tijchiuaj kampeka amo tijchiuasej kej  sekinok kichiuaj uan amo titlajtlakolchiuasej. Kema Jehová kiita nojua tlauel tijchiuaj kampeka kuali titlatekipanosej, ya nojua tlauel techiknelia.

19. ¿Ika tlake neskayotl kinextia Jehová tlauel techiknelia?

¹⁹ Jehová kineki ma tijmatikaj ya tlauel techiknelia, yeka kitekiuia se neskayotl tlen se tenaj katli tlauel kiiknelia ipilkone (Is. 49:15). Se tosiuaikni katli itoka Rachel, kiijtoua: “Stephanie tlakatki kema ayamo kiaxitijtoya chiknaui metstli. Yeka kema nikitak, nesiyaya tlauel nelpilkentsi uan amo kipixtoya chikaualistli... Maske nojua monejki itstos se metstli hospital, nopa tepajtijketl nechkajki mojmostla ma nijnaua. Nopa kichijki tlauel ma nikikneli. Nama nosiuapil kipia chikuasej xiuitl, uan maske amo ueyi kej sekinok konemej katli kipiaj ixiui, tlauel nikiknelia pampa kichijki kampeka itstos uan pampa kichiua tlauel ma niyolpaki”. Kema Jehová kiita tijchiuaj kampeka tijtekipanosej, ya tlauel techiknelia kej Rachel kiiknelia isiuapil. ¡Nelia tlauel techyolchikaua pampa Jehová tlauel techiknelia!

20. ¿Tlake uelis kichiuas ma tiyolpakikaj?

²⁰ Nochi Jehová itekipanojkauaj kipiaj se tekitl ipan itlanechikol uan ya tlauel kinpatiita pampa amo elij sanse. Ya amo techyoltilanki pampa tijmatij miak tlamantli, ya kichijki pampa kiitak tlen tijpiaj ipan toyolo, amo timoueyimatij, tijnekij tijchiuasej tlen technauatia uan tijnekij nojua tijpatlasej tonemilis (Sal. 25:9). Jehová nelia tlauel yolpaki kema tijchiuaj kampeka tijtekipanosej. Kema tikijiyouiaj nochi uan amo tijtlauelkauaj, tijnextiaj tijpiaj kuali toyolo (Luc. 8:15). Yeka, ma tijchiuakaj kampeka kuali tijtekipanosej Jehová. Tlaj kiampa tijchiuasej, tlauel tiyolpakisej.